ވާދޫއަށް ކުރި ދަތުރު

2016 ވަނަ އަހަރު ރ. ވާދޫ ސްކޫލުން އޯލެވެލް ނިންމާ އިތުރަށް ކިޔެވުމަށް މާލެ އައުމަށްފަހު އަހަރެން ރަށަށް ދިޔަ މިއީ ފުރަތަމަ ފަހަރެވެ. އެދުވަހު ކަންތަށް ހިނގި ގޮތް ކިޔާލަ ދޭނަމެވެ. ޝައުޤުވެރިކަމާއެކު ކިޔަމުން ދާނެ ކަމުގެ އުންމީދުގައެވެ.

ފަތިހު ހައެއް ޖަހާއިރު ފުރަން ހަމަޖެހިފައި ވާތީ ތައްޔާތު ވެލައިގެން އަހަރެން ގެއިން ނިކުތީމެވެ. ދެން އަހަރެންގެ އަމާޒު ހުރީ ޓެކްސީއެއް ނެގުމަށެވެ. މިހާރު މާލެއިން ޓެކްސީއެއް ހޯދުމަކީ ވަފާތެރި ލޯބިވެރިއެއް ހޯދުންހާ އުނދަގޫ ކަމެކެވެ. ވާނީވެސް އެހެންތާއެވެ. މީހުން ފުރާ އަޅާފައި ދާ ކާރުގައި ވެސް ފެހި ލައިޓެވެ. މީހަކު ނެތި ދާ އެއްޗެއްގައި ރަތް ލައިޓް ވެސް ދިއްލާ އަޅާފައި ހުރެއެވެ. ގިނަ ފަހަރު ލައިޓްގެ ކުލައާއި ކާރުގެ ހާލަތާއި ނުބައްދަލެވެ.

ފަނަރަ ވަރަކަށް މިނެޓް ތެރޭ ކާރެއް އަތު ޖެހިއްޖެއެވެ. ކާރަށް އެރުމަށް ފަހު ޑްރައިވަރު ގާތު ދާންވީ މަންޒިލް ބުނެދިނީމެވެ. ” އެއް ނަންބަރު ފާލަމަށް ”

ދުއްވަމުން ދިޔަ ކާރުގެ ޑްރައިވަރުގެ އަމަލުތަށް ހުރިގޮތުން އަހަރެން ކެކި އެރިއެވެ. ނަމަވެސް މުސްކުޅިއެއް ވީމަ އެއްޗެކޭ ނުބުނީއެވެ. އެއް އަތުން ފޯނު، އަނެއް އަތުން ހުންގާނެވެ. އަޅެ ފަހެ ތާކަށް މުޑި އަރައިފިއްޔާ ވަންނާނީ ކޮންތާކަށް ހެއްޔެވެ. ވާހަކަ ދައްކަނީ އަޑުގެ ނެތްތަނަށެވެ. ކަންފަތުގައި ހީވަނީ ގުގުރި ޖަހާހެންނެވެ.

އެންމެ ފަހުން ބޮލަށް އުނދަގޫވެގެން ކަންފަތުގައި ހެޑްސެޓް އަޅުވާލާއި ބާރަށް ލަވައެއް ޖަހާލީމެވެ.
‘ ކުރާށެ ދެން މަ ވަރި ނުރަބޯ ހަސަންބޭ…
މަ ނޫޅޭނަން ދެނެއް އައި އޭމް ސޮރީ… ‘
މިޖެހުނު ލަވަޔަކުން އަހަންނަށް ވަރަށް “ކިކު” އެރިއެވެ.

ދިހަ ވަރަކަށް މިނެޓް ފަހުން ފާލަމާ ހަމައަށް ދެވިއްޖެއެވެ. ޑްރައިވަރަށް އަގު ދިނުމަށް ފަހު ފައިބައި ފާލަމަށް ގާތް ގޮށްފައި އޮތް ލޯންޗަށް އެރީމެވެ. ލޯންޗް ނައްޓާލީ އޭގެ ފަސް ވަަރަކަށް މިނެޓް ފަހުންނެވެ. ހުޅަނގު މޫސުން ވީމަ، ކަނޑު އާދަޔާ ހިލާފަށް ގަދައެވެ. ދެ ގަޑިއިރު ދުއްވައިގެން ރ. އަތޮޅަށް ވަދެވުނެވެ. ރ. އަތޮޅު އަދި މާގަދަ އެވެ. ލޯންޗް ހީވަނީ އުދުހިފައި ދާ ސާމަރާ ދޫންޔެއް ހެންނެވެ. ދެއަތަށް ހެލޭ “ސީސޯ”އެއް ހެންނެވެ.

ކަނޑު ގަދަވެ ދުއްވަން އުނދަގޫ ވާވަރު ވުމުން ކައްޕިއަށް މަޖުބޫރުވީ އެންމެ ކައިރީގައި އޮތް ރ. މީދޫއަށް މަޑު ކުރާށެވެ. ދެން ފުރާނީ ގަޑިއެއް ހާއިރު ފަހުން ކަމަށް އެންގުމުން، ލޯންޗުން ފައިބައިގެން އަހަރެން ދިޔައީ ހޮޓަލަކަށް ސައިބޯށެވެ. ދިޔަ މަގުމަތީ ފެންނަމުން ދިޔަ މަންޒަރުތަށް ފޮޓޯ ނަގަމުން ދިޔައީމެވެ. އެންމެ އަޅައިގަތީ މަގުމަތިން ދިޔަ އަންހެން ގުރޫޕެއްގެ ފަހަތު ޖީބަށް ޖަހައިފައި ހުރި ފޯނުތަކެވެ. އަހަރެން ހިތް ބުނަމުން ދިޔައެވެ. ” ލޮލް… ހިތުން ވަރަށް މޮޅު ކަމެެއް ދޯ؟ މީހަކު ޖަހައި ގަނެފިއްޔާ ދެމޭނީ ކޮންތާކަށް؟ ”

ހޮޓަލެއް ފެނުމުން އެތަނަށް ވަދެފީމެވެ. ވެއިޓަރަކަށް ގޮވާލިމެވެ. ” ބޮންދޫ… ” އަދި އަތުގެ އިޝާރާތުން އައުމަށް އެދުނީމެވެ. ” ކޯއްޗެއް ބޭނުން ” ވެއިޓަރަށް އައި ބަނގުލަދޭސް މީހާ ސުވާލު އެއްލީ އަހަންނަށެވެ. ޗޮކެއް ކަނޑާލާފައި އަހަރެން ބުނީމެވެ. ” ގެނޭ… ނެސްކެފޭ އަމާ މިލްކަކާއި ޗިކަން އަމާ ރައިސް އެއް… ” އެހެން ބުނުމުން ވެއިޓާރ ހުރީ ވާނުވާގައެވެ. ވާނީވެސް އެހެންނޭ މަށަށް އަދި އިނގުނަސް މިބުނި އެއްޗެއް އެކަކަށްވެސް ގެޓެއް ނުވާނެއެވެ. ” މިބުނީ ޗިކަން ރައިސްއަކާއި ނެސްކެފޭ މިލްކެއް ގެންނާށެ… ”

އެހެން ބުނުމުން ވެއިޓާރ ދިޔައީއެވެ. ވިއްސަކަށް މިނެޓް ފަހުން އޯޑާރ އައުމުން ކައިގެން ބިލް ދެއްކުމަށްފަހު، އަހަރެން ދިޔައީ ފުރަންށެވެ. ވާދޫއަށް ދެވުނީ އެދުވަހު އެގާރަ ޖަހާކަށް ހާއިރެވެ. ރަށުގައި ޖެހި ސަކަރާތް ވެސް އަދި އެހެން ވާހަކައެއްގައި އެބައާދެއެވެ. އިންތިޒާރުކޮށްލާށެވެ.

ނިމުނީ

ނޯޓް: ރޯދަ މަހުގެ ފުރަތަމަ ހަދިޔާ، ވާދޫގެ ލޮބުވެތި އަހުުންނާއި އުހްތުނަށް ޙާއްސަކޮށްލަން.