އުޖާލާވެގެންދިޔަ ޙަޔާތް (1)

ކުޑަދޮރުގައި ހުރި ދޮރުފޮތިގަނޑުގެ ކުދި ކުދި ހޯތަކުން ފުރޭނިގެން އައި އިރުގެ ރަން ދޯދިތައް ނިދިފައި އޮތް ރިމްޝާގެ ދޮންދޮން މޫނަށް އެޅި އަލިވެގެންދިޔަ ހިނދު ދެތިންފަހަރަކު އެސްފިޔަތައް ތަޅުވާލުމަށްފަހު ލޯހުޅުވާލިއެވެ. ނިދުމުގެ ސަބަބުން ޗޮކްލެޓް ކުލަޔަކަށްދާ ފަން އިސްތަށިގަނޑު ހޭވިފާވާއިރު އެދޮންދޮން މޫނުމައްޗަށް ވެރިވެފައިވާ ލުއިހިނުތުންވުމުގެ ސަބަބުން މީހަކު ބަލާ ފޫހިނުވާނެއެވެ. ރިމްޝާގެ މަންމަ ހަސީނާއަކީ ދިވެއްސެއް ނަމަވެސް ރިމްޝާގެ ކިބައިގައިވާ ބޭރުކުއްޖެއްގެ ސިފަތަކުގެ އަސްލަކީ އޭނަގެ ބައްޕައެވެ. އިސްމާޢީލްގެ ކިބައިގައި އެއްވެސް ހަރުދަނާކަމެއްނެތްކަން އެނގިހުރެވެސް ހަސީނާ އިސްމާޢީލްއާ ކައިވެނިކުރީ އޭރު ވެވިފައިވާ ކަނުލޯތްބެއްގެ ސަބަބުންނެވެ. އިސްމާޢީލްގެ ރީތިކަމުގެ ޖާދޫގައިޖެހި ދިރިއުޅުމުގައި ފުރަތަމަ ފަހަރަށް އެޅުނު ކަތިފިޔަވަޅުގެ ނަތީޖާ ހަސީނާއަށް ފެނުނީ ނުހަނު ހިތިކޮންނެވެ. ހަސީނާ ވަރިކޮށްފައި އިސްމާޢީލް އޭނަގެ ޤައުމަށް އެނބުރިދިޔައީ ރިމްޝާއަށް އަހަރެއްވެސް ނުވަނީހެވެ. ރިމްޝާ ދެކެ ހަސީނާ އެންމެ ނަފްރަތުކުރާ މައިގަނޑު ސަބަކީވެސް އިސްމާޢީލްގެ ފަރާތުން ލިބުނު ދަރިއަކަށްވާތީއެވެ. ނަސީރުއާ އިނުމާ ހަމަައަށްވެސް މީހެއްގެ އަޅާލުމެއްނެތި ދަތިޙާލުގައި އުޅެންޖެހުނީވެސް ހަމަ އެޢިސްމާޣީލްގެ ސަބަބުންކަމަށްވާތީއެވެ.

ނިކަން ހަމަޖެހިލައިގެންއޮވެ ރިމްޝާ ވިސްނަމުންދިޔައީ ރޭގެ ހުވަފެނާ ދޭތެރޭގައެވެ. އާދައިގެ މަތިން ރިމްޝާއަށް ފެނުނީ ހަނދާންހުންނަންފެށީންސުރެންވެސް އެކަމަކަށްޓަކައި އޭނަ ފެންބޮވައިގެންފައިވާ މައިމީހާގެ ލޯތްބާއި އަޅާލުމެވެ. މޫނުމަތީގައިވާ ހިނިތުންވުން ގެއްލިގެންދިޔައީ ކެތްތެރިކަމާއިއެކު އެދުވަހަކަށް އިންތިޒާރުކުރަމުންދިޔަ ނަމަވެސް އެއީ ހުވަފެނުންނޫނީ ފެންނާނެ ދުވަހެއް ނޫންކަން ހަނދާންވުމުންނެވެ.

*********

ހިޔާލުތަކަށް ގެއްލިފައިއޮތް ރިމްޝާއަށް ހޭވެރިކަންވީ ކުރިމަތީގައިހުރި ގަޑި ފެނުމުންނެވެ. ފުންމައިގެން ތެދުވެވުނުއިރު ދެލޯވަނީ ބޮޑުވެފައެވެ. އެހެންދުވަސްދުވަހު ފަސްގަޑި ބައިގައި ހޭލާކުއްޖާއަށް މިއަދު މިހޭލެވުނީ އަށެއްޖަހާވެސް ބޮޑުވި ފަހުންނެވެ. ބަލާކަށްނުހުރެ ގޮސް ފާހާނާއަށްވަފެ ރީތިވެލައިގެން ގޮސް ބަދިގެއަށްވަދުނީ މަންމަމެން ހޭލުމުގެ ކުރިން ކާނެއެއްޗެއް ތައްޔާރުކުރުމަށެވެ. އަތްމަތި އަވަސްކޮށްލާފައި ކެއްކުމައިގެން އުޅުނުއިރު ހިތްނުތަވަސްވެފައިވަނީ މަންމައަށް ހޭލެވިއްޖެނަމަ ކަންތައްވާނެ ގޮތް ރަނގަޅަށް އެނގޭތީއެވެ. “ރިމްޝާ! ނޫނޭ އަދި ނުވެ ކައްކަން ވަންނާކަށް. މިމަންޖެ އަޅެ މިހުންނަނީ ކަންނެތްކަމުންގޮސް ހައްދުފަހަނަ އަޅާފަވިއްޔަ. މިހާރު އީނާލްމެންވެސް އެއޮއްހޭލީ. ސަހާދެއްމިބުނީ ދެން މާ ކަންނެތްވެގެން އުޅެންޏާ މިގޭން ނެރެލާނީ.” ސިއްސައިގެންގޮސް ރިމްޝާއަށް ފަހަތް ބަލާލެވުނީ ހަސީނާގެ ބަރުއަޑު ކަންފަތުގައިޖެހުމުންނެވެ. ކުޑަކުޑަ މިރާން ކިހިއްޔަށް ޖަހައިގެންހުރެ ރުޅިވެރިކަމާއެކު ހަސީނާގެ އަނގައިން ބޭރުވި ރަހުމްކުޑަ ޖުމްލަތަކުން ރިމްޝާގެ ހިތްފޮތިފޮތިވެގެންދިޔައެވެ. ވާނީވެސް އެހެންތާއެވެ. ތިމާ ބަނޑުއަޅާވިހޭ ދަރިފުޅުލައްވާ ދޮންދަރިންތަކަށް ނޯކަރެއް ފަދައިން ހިދުމަތްކުރުވުމުގެއިތުރުން އެމަންމަގެ ދުލުން ނުރުހުމުގެ ގޮތުންނޫނީ ރިމްޝާއަށްޓަކައި ބަހެއްވެސް ބޭރެއްނުވެއެވެ. ކޯތާފަތުގައި ބީހެމުންދިޔަ ކަރުނަތައް އަތުގެ ނުފުށުން ފޮހެލީ އެމަންޒަރު ފެނުނުކަމުގައިވިޔަސް ހަސީނާގެ ހިލަހިތަށްކުޑަކޮންވެސް އަސަރެއްނުކުރާނެކަން އެނގޭތީއެވެ. ހުރިހާ މަސައްކަތެއްކޮށްނިންމާލާފައި ރިމްޝާއަށް އޮފީހަށްދާން ރެޑީވެވުނުއިރު ގަޑިވެސްޖެހިއްޖެއެވެ. ހިތަދަތިކަމާއި ހިތާމައިން ފޯވެފައިވާ ހަޔާތާމެދު ވިސްނަމުން ގެއިން ނުކުތް ރިމްޝާ ބާރަށް ހިނގާލާފައިދިޔައިރު ހަޔާތަށް އަންނަން އުޅޭ ބޮޑު ތޫފާނުގެ ހިލަމެއްވެސްނުވެއެވެ.

…. ނުނިމޭ…