ތިޔަ ލޯތްބާ ދުރަށް (5)

ޝައިމަންގެ ބައްޕަ ހިނިތުންވެލީ ދަރިފުޅުގެ އުފަލަށްޓަކައި މިފަދަ ބޮޑު ކަމެއް އޭނާއަށް ކޮށްދެވޭތީއެވެ.

” ދެން މީ މިދެމަފިރިންގެ ދޮށީ ދަރިފުޅު ޝައިމަން. އަދި ހުންނާނެ އަންހެން ކުއްޖެއް. ޝައިމަންއަށް ވުރެ ކުޑަވާނީ އެންމެ 2 އަހަރު. އެކަމަކު ބައްޕަމެން މާލެ ބަދަލުވުމާއި އެކު ޚަބަރު ލިބުނީ މީހަކާއި އިނދެގެން 2 ދުވަސްނުވެ ފިލައިގެން ދިޔަ ޚަބަރު. ދޯ އަދުހަމް.” އަދުހަމަށް ދޯ އަޅާލަމުން ޝާފީ ބުންޏެވެ. ” ކީއްކުރާނީ ޝާފީ؟ އެއީ މިޒަމާނުގެ ހާލަތު. މައިންބަފައިންނަކީ މުޙިއްމު ބައެއް ނޫން. އަހަރެމެންގެ ބަދުނަސީބު އެއީ އެކަންތައް ގަނޑު ހިނގި އިރު މިދަރިފުޅު އެތާ ނެތްކަން. ޝައިމަން އޭރު މުހިއްމު ކަމަކު ވިލިނގިލީގަ ހުރީ. މިހާރު ހިތައް އަރާ ވަލީނުދެވުނު ނަމައޭ. ވަލީ ނުދިން ނަމަވެސް ގޯސް ވާނީ އަހަރެމެން. އެގޮތް ނޭދޭތީ ވަލީ ދިނީ. އިނދެގެން ދެދުވަސް ނުވެ ފިލައިފި. އަހަރެމެން ނުރުހޭތީއޭ ކިޔާފަ” ” ބައްޕާ! ދެން އެވާހަކަ ހުއްޓާލާ. ވީ ކަމެއް ނުވާ ކަމަކަށް ނުހެދޭނެ.” އަދުހަމްގެ ލޯ ކަރުނައިން ފުރުންތަން ފެނި ޝައިމަން ބުންޏެވެ. ތެދެކެވެ. ރިފާވަނީ މީހަކާއި އިނދެގެން ފިލާފައެވެ. އުޅެނީ ކޮންތާކު ކަމެއް ދުނިޔޭގަ ހުރިކަމެއް ނެތްކަމެއްވެސް ޝައިމަންއަކަށް ނޭނގެއެވެ. އިނީ ކާކާ ކަމެއްވެސް ޝައިމަންއަކަށް ހަމަހިލާ ނޭނގެއެވެ. އެއީ ބެލުން މުހިއްމު ކަމެއްގެ ގޮތުގައި އޭނާވެސް ނުދެކެއެވެ. އޭނާ ދެކޭ ގޮތުގައި މައިންބަފައިން ދޫކޮށްފައި ދާނީ ވަރަށް ހިތްހަރު، ރަހުމުކުޑަ، ގޮތެއް ފޮތެއްނެތް މީހެކެވެ. އެއީ ތުއްތު އިރުއްސުރެ ލޯތްބާއިއެކު ބަލާބޮޑުކުރީތީ ދޭންޖެހޭނެ ބަދަލެއްނޫނެވެ.

” ބައްޕަ ދަރިފުޅާއީ ޝައިމަންގެ ޢާއިލާއާއި މިބައްދަލުކޮށްލީ ދަރިފުޅުގެ މުސްތަޤްބަލަށްޓަކައި ބައްޕަ ތިދެކުދިންގެ ކައިވެނި ހަމަޖެއްސި ވާހަކަ ބުނެލަން. މީހަކާއި ނީނދެ މާ ގިނަ ދުވަހު ހުންނަންވަންޏާ ކަމަކު ނުދާނެ. ފާފައަކަށް އަރައިގަނެވިދާނެ. އެހެންވީމަ ތިދެކުދިންގެ ޚިޔާލަކީ ކޮބާ؟” ޝާފީ މިދެއްކި ވާހަކައިން ޝާނާ އިނީ ހަމަ އަޖައިބުވެ އަންތަރީސް ވެފައެވެ. މިހާބޮޑު ނިންމުމެއް ނިންމި އިރު އޭނާ ކައިރި ބުނެވެސް ނުލުމުންނެވެ. ނަމަވެސް އެދެމަފިރިންގެ އުފަލަށްޓަކައި އޭނާ މިކައިވެނި ކުރާނެއެވެ. އެއަށްފަހު ޝައިމަންއާއި ވާހަކަދައްކާނީއެވެ.

ޝައިމަންއާއި ޝާނާގެ އެއްވެސް އުޒުރެއް ނެތުމުން ވީހާވެސް އަވަހަކަށް ކައިވެނި ކުރަން ނިންމިއެވެ. ޝާނާ ހިތާއި ދެކޮޅަށް ނިންމި ނިންމުމެއްކަމުން އޭނާ އެފަލެއްނުވެއެވެ. އޭނާ ލޯބިވަނީ ފިޔާމް ދެކެއެވެ. ނަމަވެސް އެލޯތްބަށްޓަކައި އޭނާގެ މައިންބަފައިން ދޫކޮށް މައިންބަފައިންގެ އެމާތް ލޯތްބާ ދުރަށް ދާކަށް އޭނާ ނޭދެއެވެ. ނަމަވެސް ފުރަތަމަ ޖެހޭނީ ހުރިހާ ކަމެއް ކުރުމުގެ ކުރިންވެސް މައިންބަފައިން އިސްކުރާށެވެ. ޝައިމަންގެ ކޮއްކޮ ކަންތައްކުރި ގޮތަށް މައިންބަފައިންނާއި ދޭތެރޭ ކަންތައް ކުރާކަށް އޭނާ ނޭދެއެވެ.

ރިފާ އޮތީ ފިޔާމްގެ އުނގުގައި ބޯ އަޅައިލައިގެންނެވެ. ހުއްޓުމެއްނެތި އެލޮލުން ކަރުނަ އޮހޮރެއެވެ. ފިޔާމް ވީ ކީއްތޯ އެހުމުން ބުނަނީ އެއީ ދޮންބެއާއި މަންމަމެން މަތިން މާބޮޑަށް ހަނދާންވަނީ ކަމަށެވެ. ފިޔާމަށް ވަނީ ރިފާގެ މައިންބަފައިންނާއި ބައްދަލުވެފައެވެ. ނަމަވެސް ރިފާގެ ދޮންބެއާއި ދިމާވާ ގޮތް ނުވީ އެދުވަސްކޮޅު އޭނާ ރަށުން ބޭރުގައި ހުރުމުންނެވެ. ރިފާގެ ވާހަކަތަކުން އެއީ ފުލުހެއްކަމާއި އޭނާގެ ނަމަކީ ޝައިމަންކަން އިނގިގެން ދިޔައެވެ. އެހެން ނަމަވެސް ފިޔާމް ކިޔާ ކިޔާވެސް ޝައިމަންގެ ފޮޓޯ އެއްހާ ހިސާބުވެސް ދައްކާކަށް ރިފާ އެއްބަހެއް ނުވިއެވެ. ހުރިހާ ކަމެއް ހަމައަކަށް އެޅުމުން ބައްދަލުކުރުވާނަން ކަމަށް ބުންޏެވެ. އެހެން ކަމުން ފިޔާމްވެސް އިތުރަކަށް އެކަން ކުރާކަށް މަސައްކަތެއް ނުކުރެއެވެ. އެއަށްވުރެ އޭނާ ރިފާ ދެކެ ލޯބިވެއެވެ. ރިފާގެ ވިސްނުން ހުރީ އަދިވެސް މިއަދުވީ ކަންތަކާއި ދިމާލުގައެވެ.

މަގުމަތިން ހިނގާފައި ދަނިކޮށް ފިޔާމްގެ ގައިގައި ޝައިމަން ޖެހިފައި ޝައިމަން ވެއްޓުނެވެ. ރިފާއަށް ޝައިމަން ފެނުމާއި އެކު އަނެއް ފަރާތަށް އެނބުރިލީ ޝައިމަންއަށް ފެނިދާނެތީއެވެ. ކިތަންމެ ހިތް އެދުނަސް ގޮވާލާކަށް އޭނާއަކަށް ނުކެރޭނެއެވެ. ފިޔާމްގެ ރުޅިގަނޑު ހުންނަ ގޮތުން ޝައިމަންއަށް ގޮތެއް ހަދާފާނެތީވެސް އޭނާ ހުރީ ބިރުން ތުރުތުރުލައެވެ. ނަސީބަކުން މަޢާފުކުރާށޭ ބުނެފައި ޝައިމަން ދިޔައެވެ. ރިފާއަށް މައި ނޭވާއެއް ލެވުނީ ބޭއިޚްތިޔާރުގައެވެ. ވާނީވެސް އެހެންތާއެވެ. ފިރިމީހާގެ ލޯތްބަށްޓަކައި އޭނާވަނީ މައިންބަފައިންގެލޯތްބާއި ވަރަށް ދުރަށް އާދެވިފައެވެ. މިފަދަ އެތަކެއް ތަފާތު ޚިޔާލުތަކުގައި ރިފާ އޮއްވައި ނިދުނީ ކޮންއިރަކު ކަމެއްވެސް ނޭނގެއެވެ.

ދުވަސްތައް ފާއިތުވަމުން ގޮސް ކައިވެނި ކުރާ ދުވަސް ޖެހިއްޖެއެވެ. މިރޭ އޮންނަ ކައިވެނީގެ ޙަފްލާއަށް ޝާފީ މެންގެ ޢާއިލާއާއި ޝައިމަންގެ ޢާއިލާ، އެންމެ ފަހުގެ ތައްޔާރީތައް ކުރަމުން ދިޔައީ ޝާފީމެންގެ ގޭގައެވެ. މިކައިވެނީގެ ޙަފްލާއަކީ ހަމައެކަނި ދެފަރާތުގެ ޢާއިލާއާއި ރަޙުމަތްތެރިން ބައިވެރިކޮށްގެން ފާހަގަ ކުރެވޭ ކުޑަ ޙަފްލާއަކަށްވީ ނަމަވެސް މުޅިތަންވަނީ ވަރަށް ފުރިހަމައަށް ޒީނަތްތެރިކޮށްފައެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.