ނާމާން ދުނިޔެއިން ލިބުނު އަލިކަން

މިއީ މީހަކަށް ދިމާވި ހަޤީޤީ ހާދިސާތަކެކެވެ.

އެ ނާމާން ދުނިޔެ އަހަރެން ސިފަކޮށްދޭނީ ކިހިނެއް ހެއްޔެވެ؟ އެއީ މުޅިންވެސް އަނދިރިކަމެވެ. އާނއެކެވެ. އަހަރެންގެ ވަށައިގެންވީ އަނދިރިކަމެވެ. ދުނިޔޭގައި ހިނގަމުންދިޔަ އެއްވެސް ކަމެއް އަހަރެންނަކަށް ނުފެނެއެވެ. އަހަރެންވީ އެނާމާންކަމުގެ ތެރެއަށް ގެއްލިފައެވެ. އަހަރެންވީ އެތައް އިހްސާސެއްގެ ތެރެއަށް ޣަރަޤުވެފައެވެ. ބިރުވެރިކަމުގެ އިހްސާސެވެ. ހިތާމަވެރި ކަމުގެ އިހްސާސެވެ. އެކަނިވެރިކަމުގެ އިހްސާސެވެ. އެތަނުން އަހަރެން ސަލާމަތް ކޮށްދޭނެ މީހެއްގެ އިންތިޒާރުގައި ކަރުނަ އޮހޮރީމެވެ. އަލިކަމެއް ފެންނަން ނެތުމުން ރުޅިވެރިކަންވެސް ދެއްކީމެވެ.

އެ ނާމާންކަން އިހްސާސް ކުރެވެމުން ދިޔައީ އަހަންނަށް އެކަންޏެވެ. އެހެންމީހުންނަށް އަހަރެން ފެންނަނީ ހަމަ އާދައިގެ އުފާވެރި މޫނެއްގެ ވެރިއެއްގެ ގޮތުގައެވެ. އަހަރެންގެ ކިބަޔަކުން ހިތާމަވެރިކަމެއް، ބިރުވެރިކަމެއް، އެކަނިވެރިކަމެއް އެއިން އެއްވެސް މީހަކަށް ނުފެންނާނެއެވެ. އެ އިހްސާސްތައްވަނީ އިންސާނުންނަށް ކަޝްފު ކުރެވިފައެވެ. އަހަރެން އެ ވާހަކަތައް ކިޔައިދެމެވެ. އަހަރެންގެ އެކަނިވެރި ދުނިޔޭގެ ހިތާމެވެރިކަން ބުނެދެމެވެ. ކާކަށްކަމެއް ނޭނގެއެވެ. ފާޚާނާތެރޭގައި އެތައް އިރެއްވަންދެން އަހަރެން އެވާހަކަތައް ދައްކަމެވެ. ކޮޓަރި ތެރޭގައި އެކަނި އޮވެ ވެސް އެތައް އިރަކު ވާހަކަ ދެއްކެއެވެ.

ފިރިމީހާގެ އުޅުން ހުންނަ ގޮތުގެ ވާހަކައެވެ. އަޅާނުލާ ވާހަކައެވެ. އެހެން އަންހެން ކުދިންނާ މާ ގާތްކޮށް އުޅޭ ގޮތުގެ ވާހަކައެވެ. ރަނގަޅައް ހަމަޖެހިގެން އަހަންނާއި ވާހަކަ ދައްކާނެ ވަގުތެއް ނުވާ ވާހަކައެވެ. އަހަރެންގެ އެއްވެސް ކަމެއް އޭނާއަށް ކަމުނުދާ ވާހަކައެވެ. އަހަރެންގެ ރަނގަޅު ނުވާ ބަލިތަކުގެ ވާހަކައެވެ. އިނީންސުރެ އަބަދުވެސް އުޅެނީ ބަލިވެއެވެ. ދެމަހުން އެއްމަހު ކަހަލަ ގޮތަކަށް ޑަކްޓަރަށް ދެއްކުމަށް މާލެ ދާން ޖެހެއެވެ. ބޭސް ކެއުމުން ވަގުތީ ލުޔެއް ލިބެއެވެ. ނަމަވެސް ދުވަހަކުވެސް އެކަމުން މިންޖެއް ނުވެއެވެ.

މި ވާހަކަތައް އަހަރެން ކިޔައި ދިނުމުން އެއަކަށް ރައްދެއް ނުލިބެއެވެ. އެކަމަކު ސިފަވެއެވެ. ފިރިމީހާގެ ޝަކުވާ ކުރިވަރަކަށް ސިކުނޑިއަށް ފެންނަނީ އަހަރެމެން ދެމީހުން ވަކިވާ މަންޒަރެވެ. ފިލްމުތަކުން ފެންނަހެން ވާހަކައެއްގެ ސިފައިގައި އަހަރެންގެ ސިކުނޑިއަށް އެކިފަހަރުމަތިން އެކަހަލަ އެތައް ހިތާމަވެރި މަންޒަރުތައް ސިފަވެއެވެ. އަހަންނަކަށް އެ މަންޒަރުތައް ބަލަން ފަސޭހަ އެއް ނޫނެވެ. އަހަރެން ފިރިމީހާއާއި ވަކިވާ ޚިޔާލުއަޔަސް ލޮލުން ކަރުނަ ނުހިކެއެވެ. އޭނާޔާއި ނުލާ އަހަންނަށް ނޫޅެވޭނެކަމުގެ އިހްސާސް ހިތުގައި އުފެދުމުންނެވެ. އެކަމަކު ހަމައެޔާއިއެކު އެ މަންޒަރުތަކުން އޭނާގެ އުޅުން ދެކެ އިތުރަށް ފޫހިކުރުވައެވެ. އޭނާގެ ކަންތައްތަކާއި މެދު އެތައް ގުނަޔަކަށް މާޔޫސް ކުރުވައެވެ. އަހަރެންގެ ބަލީގެ ޝަކުވާ ކުރިވަރަކަށްވެސް ވަނީ ހަމަ އެހެނެވެ. ހިތާމަވެރި ފިލްމީ މަންޒަރުތައް އަހަންނަށް ސިފަވެއެވެ. އެ ބަލިތަކާއިމެދު އިތުރަށް މާޔޫސް ކުރުވައެވެ. އެއީ އަހަރެން އަބަދުވެސް އުޅެން ޖެހޭނެ ގޮތްކަމުގައި ހިތައް ވަށްދައެވެ. އެކަމުން ދުވަހަކުވެސް މިންޖެއް ނުވާނެކަމުގެ އިހްސާސް ކުރުވައެވެ. އެ ބަލިކަށި ވިސްނުން ތަކުގައި އަހަރެންގެ މުޅި ހަށިގަނޑު ނިކަމެތި ކުރުވައެވެ. ކަމެއްނުވާނެ ބޭކާރު މީހެއްގެ ގޮތުގައި އަމިއްލަ ނަފްސް ކުއްވެރި ކުރެވެއެވެ. އެ ހިތާމަވެރި މަންޒަރުތަކުގެ ފުންކަނޑުގައި އަހަރެންވީ ޣަރަޤުވެފައެވެ.

އެއީ އެ ނާމާން ދުނިޔެ ފެށިގެން އައިރުގެ އިހްސާސް ތަކެކެވެ. އަހަރެންވީ އެ ސިފަވާ ޚިޔާލީ ދުނިޔެއަށް ގެއްލިފައެވެ. އެ މަންޒަރުތައް ހިތައް އަރުވަ އަރުވާފައި ހިތާމަކުރަން އަހަރެން އެތައް ގަޑިއިރުތަކެއް އެނދުމަތީގައި ހޭދަކުރީމެވެ. އެކަނިމާ އެކަންޏެވެ. އެ ނާމާން ދުނިޔެ ތެރޭގައެވެ. އެހެން އެއްވެސް މީހަކަށް އެކަމުގެ ކުޑަވެސް އިހްސާސެއް ނުކުރެވެއެވެ. އަހަރެން އަބަދު ކޮޓަރިތެރޭގައި އޮންނާތީ ގޭ މީހުން ޝަކުވާ ކުރެއެވެ. ނަމަވެސް އެއީ އަހަރެންގެ އާދަކަމުގައި އަހަންނަށްވެސް ގަބޫލު ކުރެވުނީ އެކަމުގައި މައްސަލައެއް އަހަންނަށް ނުފެންނާތީއެވެ. ނަމަވެސް ހަޤީޤަތަކީ އެއާދަ އަހަރެންގެ ގައިގައި ހިފީ އެގެއަށް ދިޔަފަހުންކަމެވެ. އެކަމުގެ ހަޤީޤަތެއް އަހަންނަކަށް އޭރަކު އިހްސާސެއް ނުކުރެވެއެވެ. އަހަރެންވީ އެ ހިތާމަވެރި އިހްސާސްތަކުގެ ފުންކަނޑުން ސަލާމަތް ކޮށްދޭނެ ފަރާތަކަށް އިންތިހާއަށް ބޭނުންވެފައެވެ.

އަނެއްކާވެސް ބަލިވެގެން މާލެ ދިޔައީމެވެ. މާޔޫސްކަމާއެކު އަހަރެންގެ ބަލިތަކުގެ ވާހަކަ އަހަރެންގެ ގާތްއެކުވެރިޔަކާއި ހިއްސާ ކުރީމެވެ. މާލެދާ ކޮންމެ ފަހަރަކު އޭނާޔާއި ބައްދަލުވެ އެވާހަކަތައް ކުރިންވެސް އޮތީ ދެކެވިފައެވެ. އެހެންކަމުން އޭނާ ލަފާ ދިނީ ސިހުރުގެ ކަމެއްހުރިތޯ ބަލާށެވެ. ގިނަގިނައިން ޤުރުޢާން ކިޔެވުމަށް ނަސޭހަތް ދިނެވެ. އަދި އެކަހަލަ ސިހުރުގެ ބައެއް ހާދިސާތައް އޭނާ އަހަންނާއި ހިއްސާ ކުރިއެވެ. އަހަންނަށް އޭނާގެ ވާހަކަތަކާއިމެދު ވަރަށް ވިސްނުނެވެ. އެގެއަށް ދިޔަފަހުން ނަމާދާއި ވަރަށް ދުރުވެވިއްޖެކަން އިހްސާސް ކުރެވުނެވެ. އެހެންކަމުން އާ އަޒުމަކާއި އެކު އެނބުރި ރަށައް ގޮސް އަލުން ނަމާދު ކުރަން ފެށީމެވެ. ޚަތިމު ނަގައިގެން ޤުރުޢާން ކިޔަވަން ފެށީމެވެ. އެކުވެރިޔާގެ އިރުޝާދުގެ މަތިން ވަކިވަކި އާޔަތްތަކާއި ސޫރަތްތައް ތަކުރާރުކޮށް ގިނަގިނައިން ކިޔަވަން ފެށީމެވެ.

މާ ގިނަދުވަހެއްނުވެ އެ ނާމާން ދުނިޔެ އިތުރަށް ނާމާންވާން ފެށިއެވެ. ކުރީގެ ނާމާން ކަމާއި މި ނާމާންކަން މުޅިން ތަފާތެވެ. އަހަރެން ބިރުންގޮސް ތުރުތުރު އަޅައެވެ. ރޭގަނޑު ވެއްޖިއްޔާ އެންމެ ވަގުތު ކޮޅަކަށްވެސް ފިރިމީހާއާއި ވަކިވާކަށް ނުކެރެއެވެ. ނިދިއައިސްގެން ވެއްޓޭވަރުވިޔަސް އެސްފިޔަތައް ލައްޕާކަށް ނުކެރެއެވެ. ހޭލާ ހުއްޓާ އަޑު އަޑު އިވެނީއެވެ. ހިޔަނި ފެންނަނީއެވެ. ނިދިޖެހޭއިރައް އައިސް އަނިޔާ ކުރަން އުޅެނީއެވެ. ދެބަ ދޭތެރޭގައި އޮވެވޭހެން ހަރަކާތެއް ނުކުރެވި، ނުތެދުވެވި، އޮންނަންޖެހޭ ފަހަރު ގިނަވީއެވެ. ބިރުވެރި ހުވަފެން ފެންނަލެއް ގިނަވީއެވެ. ހޭލާ ހުއްޓާ ވައި އަޑުން އަހަރެންގެ ނަމުން ކަންފަތް ބުޑުގައި ގޮވާ އަޑުވެސް އެހީމެވެ. ގެންގުޅޭ އެއްޗެހި ގެއްލިގެން ހޯދަން ޖެހޭ ފަހަރުވެސް މަދެއް ނޫނެވެ. ހޯދާހޯދާ ނުފެނި ވަރުބަލިވެގެން އެކަން ހުއްޓާލުމުން، އައި ނައި ދިމާއެއް ނޭނގި ކުރިމަތީގައި އޮށްވާވެސް ފެނެއެވެ.

މި ނާމާންކަން ތަފާތުވި ނަމަވެސް ރަނގަޅުވަމުން އައިކަންތައްތައް ގިނަވިއެވެ. ނަމާދުކޮށް ޤުރުޢާން ކިޔަވަން ފެށުމުން އަހަރެންނަށް މަޑުމަޑުން ދުނިޔެއަށް ލޯހުޅުވެން ފެށުނެވެ. ހިޔާލީ ދުނިޔެއިން ނިކުމެވެން ފެށުނެވެ. އެހެންމީހުންނަށް އަހަރެންގެ ހާލަތު ފެންނަން ފެށިއެވެ. ފިރިމީހާއަށް، އަހަންނަށް ފެނި އިހްސާސް ކުރެވޭ ކަންތައްތައް ކިޔައިދިނީމެވެ. އަނެއްކާވެސް ފަރުވާ ހޯދުމަށް މާލެ ދިޔައީމެވެ. އަހަރެންގެ ބަލިވަރަށް ބޮޑު ވިއެވެ. ވަރުބަލިވާވަރުން ހިނގާލަންވެސް ނުކެރެއެވެ. އަބަދު ހުންނަނީ ނޭވާ ކުރުވެފައެވެ. މެއަށް ތަދުވާވަރުން ކެތް ނުވެގެން ހޮސްޕިޓަލުގެ އެމަޖެންސީއަށްވެސް ދާން ޖެހުނެވެ. ބަނޑަށް ތަދުވާވަރުން ބުރަކަށި ސީދާ ނުކުރެވިގެންއުޅޭ ވަގުތުތައްވެސް އާދެއެވެ. އެކުވެރިޔާގެ އިރުޝާދުގެ މަތިން ރުޤްޔާ ކުރާ މީހަކު ގެނެސް ބެލުނެވެ. ސިހުރުގެ އަސަރާއި އެސްފީނާގެ އަސަރު ވަރަށް ބޮޑަށް ހުރިކަން ފާހަގަކުރިއެވެ.

ކިޔަވަންވީ ތަކެއްޗާއި، ހަދަންވީގޮތް ކިޔައިދިނުމުން އެނބުރި ރަށަށްގޮސް ޕޮރޮގްރާމާއި އެއްގޮތައް އަމަލު ކުރީމެވެ. ﷲގެ އިރާދަފުޅުން ބިރުވެރި ހުރިހާ ކަމެއް ކެނޑިއްޖެއެވެ. ޕޮރޮގްރާމުގައި ވާގޮތައް ވަކި މުއްދަތަކައް ހުރިހާ ކަމެއް ބަރާބަރަށް ކުރީމެވެ. ބަލިގަނޑައް ލުއި ލިބުނު ނަމަވެސް ދާއިމީ ހައްލެއް ނުލިބެއެވެ. އެއަށްފަހުގައި ނަމާދު ކުރުމާއި، ޤުރުޢާން ކިޔެވުން އާދައަކަށް ހަދައިފީމެވެ. ނަމަވެސް އެ ނާމާންކަމުގެ އަސަރު ދެން ފެނުނީ މުޅިން ތަފާތު ގޮތަކަށެވެ. އެއީ ބުއްދި ލިބިފައިވާ ބަޔެއްކަމުން އެމީހުންގެ ބުއްދީގެ ބޭނުން އެމީހުން ރަނގަޅައް ކުރިއެވެ.

ވީގޮތް އަހަރެންނަށްވެސް ރޭކާލީ އެތައް ދުވަހެއް ފަހުންނެވެ. އޭރު އަހަރެމެން ދެމީހުންގެ ގުޅުންވަނީ ކެނޑިފައެވެ. ވަރިވެފައެވެ. އެދުވަސް އަހަރެން އަދިވެސް ހަނދާން އެބަހުއްޓެވެ. އަހަރެން އޭނާޔާ ކުރީ ސުވާލެކެވެ. އެއީ އަހަންނަށް ވަރަށް މުހިންމު ސުވާލެކެވެ. “މިހާރު އަހަރެންދެކެ ލޯތްބެއް ނުވޭދޯއެވެ؟” އޭނާގެ އަމަލުތައް ހުންނަގޮތުން އަހަންނަށް އެކަން އިހްސާސް ނުވަނީއެވެ. އަހަރެން އޭނާއާއި އިނީ އޭނާ އަހަރެން ދެކެ ލޯބިވާ ކަމަށް ދުލުން ބުނެގެނެއް ނޫނެވެ. ނަމަވެސް އޭނާގެ ލޯތްބާއި އަޅާލުމުން އެކަން އިހްސާސް ކުރެވޭތީއެވެ. ނަމަވެސް މިސުވާލު ކުރެވުނީ އޭނާގެ އަމަލުތަކުން އަހަންނަށް އޭނާ އަހަރެންދެކެ ފޫހިވެ ރުޅިއަންނަކަން އިހްސާސްވާލެއް ބޮޑުކަމުންނެވެ.

އޭނާ އެ ސުވާލައް އިޚްތިޔާރުކުރީ ހިމޭންކަމެވެ. އަހަރެންގެ ހިތުގައި އެތައް ވޭނެއް އެޅިއެވެ. އާއެކޭ ނުވަތަ ނޫނެކޭ ބުނުމަށް އެދުނީމެވެ. ދެންވެސް ޖަވާބެއް ނުލިބުނެވެ. އަހަރެންގެ ތަދުވަމުން ދިޔަ ހިތުގައި އަތްއަޅައިގެންހުރެ، އެ ހަމަހިމޭންކަމުގެ މާނައަކީ ލޯތްބެއް ނުވެޔޭ ކަމުގައި މާނަ ނަގަންވީ ހެއްޔޭ އަހަރެން އެހީމެވެ. ” ނޭނގެ. ކުރިން ލޯބިވީ ގޮތައް މިހާރު ނުވޭ” ޖަވާބު ލިބުނެވެ. އެޖަވާބުން އަހަރެންގެ ހިތް ފުނޑުފުނޑުވި ކަހަލައެވެ.

އަހަރެންގެ ލޯބިވާ ފިރިމީހާ އަހަރެންދެކެ ލޯތްބެއް ނުވާކަމަށް ފާޅުގައި ބުނެފިއެވެ. އެމީހަކަށްޓަކާ އަހަރެންގެ އުމުރު ހުސްކޮށްގެންހުރި މީހާ އަހަރެންނަށް ފުރަގަސްދީފިއެވެ. އެމީހަކާއިނުލާ އަހަރެންގެ ދިރިއުޅުމެއް ނުވާކަމަށް އަހަރެން ގަބޫލުކޮށްގެންހުރި މީހާ އަހަރެންދެކެ ފޫހިވާ ކަމަށް އެއްބަސް ވެއްޖެޔެވެ. އަހަރެންގެ ހުރިހާ އުންމީދަކާއި، ހުވަފެންތަކެއް އެމީހަކާއި ގުޅިފައިހުރި މީހާ އެންމެ ޖުމްލަޔަކުން އެ ފޮނިފޮނި ހުވަފެންތަކާއި، އުންމީދުތައް ފުނޑު ފުނޑު ކޮށްލައިފިއެވެ. އަހަރެންގެ ދުނިޔެ އަނދިރި ވެއްޖެއެވެ. އުފާވެރިކަން ގެއްލިއްޖެއެވެ. އަހަންނަށް ބޭއިޚްތިޔާރުގައި އެހުނެވެ. ” ކީއްވެގެން ހެއްޔެވެ؟ އަހަންނަށް ނުކޮށްދެވުނީ ކޮންކަމެއް ހެއްޔެވެ؟ އަހަރެންގެ ފަރާތުން އުނިވީ ކޮންކަމެއް ހެއްޔެވެ؟” އަހަރެންގެ ހިތައް ޔަޤީނުންވެސް ވަނީ އެ ޖުމްލައިން ފުން ތީރެއް ހެރިފައެވެ. ދުވަހަކުވެސް ފަސޭހަނުވާނެ ވަރަށް ޒަހަމް ވެއްޖެކަމުގެ އިހްސާސުން މީހާގެ ސިކުނޑި ސުމަކަށް ހިނގައްޖެއެވެ. އަޑުން އަޑުނަގާ ރޯން ބޭނުންވުމުން ވަދެވުނީ ފާޚާނާއަށެވެ.

ހިނދުކޮޅަކަށް އަހަރެންގެ ނަފްސު ހަމަހިމޭން ވިއެވެ. ރުޅިވެރިކަމާއި، ހިތާމަވެރިކަމުން ސިކުނޑި ފުރިގެންދިޔައެވެ. ބުނެދޭން ނޭނގޭ ބާރަކުން ސިކުނޑީގައި ވެރިކަން ކުރަން ފެށިކަހަލައެވެ. އޭނާ އަހަންނާއި ވާހަކަ ދައްކަން މަސައްކަތް ކުރިއެވެ. ނަމަވެސް އޭނާގެ އަޑުޖެހޭ އިރަށް އަހަރެންގެ ނަފްސު ކޮންޓްރޯލުން ނެއްޓޭފަދައެވެ. ލޯބިނުވާ މީހަކާއި އެކު ނޫޅެވޭނެކަމަށް ހަރުއަޑުން ބުނެވެން ފެށިއެވެ. ރުޅިވެރިކަމާއިއެކު ވަރިކުރުމަށް އެދެވެމުން ދިޔައެވެ. އޭނާ ދެތިން ދުވަހެއްގެ މަތިން އެތައް ފަހަރަކު އަހަރެން ހަމަޔަކަށް އަޅުވަން އުޅުނެވެ. ނަމަވެސް އަހަރެންގެ ކަންފަތުގައި އޭނާގެ އަޑުޖެހުމާއެކު އަހަރެންގެ ނަފްސައް ރުޅިވެރިކަމެއް ފެތުރިގެން ދެއެވެ. ކޮންޓްރޯލެއް ނޯވެއެވެ. އެންމެފަހުން އޭނާވެސް ރުޅިއައިސްގެން ތިހާ ބޭނުންވަންޏާ ތިހިރީ ވަރިކޮށްފާ ކަމަށް ބުންޏެވެ.

އެ ނިމުނީއެވެ. އެ ޖުމްލައިން އެގުޅުން ނިމުމާއެކީ އަހަރެންގެ ރުޅިގަނޑުވެސް ޖާދުލެއްފަދައިން ގެއްލިއްޖެއެވެ. އެވަގުތުވެސް ދެމީހުން އެތައް އިރަކު ރުއީމެވެ. ދެމީހުންގެ ނަފްސަށް އާދަޔާ ހިލާފް ހަމަހިމޭންކަމެއް ވެރިވެފައިވިއެވެ. ކުއްވެރިޔަކީ ތިމަންނާކަމަށް ދެމީހުންވެސް އަމިއްލަ އަށް އެއްބަސް ވިއެވެ. ދެމީހުންވެސް އެކަކު އަނެކަކުގެ ކިބައިން މާފައް އެދުނީމެވެ. ދެމީހުންގެ ހިތުގައި އެކަކު އަނެކަކަށް އެއްވެސް ރުޅިވެރިކަމެއް ނެތެވެ. ނަމަވެސް ބައެއް ކަންތައްތަކަކީ އެއްވެސް މީހެއްގެ އިޚްތިޔާރުގައި އޮންނަ ކަންތައްތަކެއް ނޫނެވެ. އެ ޝައިޠާނުންގެ ސިކުނޑި ކިތަމެ ތަނަވަސްވީ ނަމަވެސް އަދި ކިތަމެ ރޭވުމެއް ރޭވިނަމަވެސް ﷲ ގެ ރޭވުން މާ ފުރިހަމަވާނެކަން ޔަޤީނެވެ.

މި ކަންތައް ވެގެން ދިޔަގޮތް ވިސްނިއްޖެ ހެއްޔެވެ؟ ޝައިޠާނުންގެ މޮޅު ރޭވުންގަނޑު ރޭކާލައިފި ހެއްޔެވެ؟ އެ ނާމާންކަމުގެ އަސަރު މިފަހަރު ކުރިގޮތް އިހައް ފަހައް ބާއްވާށެވެ. އެކަންތައް ފަޅާއެރި ގޮތް ފަހުން އެނގޭނެއެވެ. ދެން ކަންތައް ވެގެން ދިޔަގޮތް ކިޔާލާށެވެ.

އެ ނާމާންކަމުން އަނެއްކާވެސް އަހަރެންގެ ދިރިއުޅުން ފުސްކުރަމުން ދިޔައެވެ. އަހަރެން އެނބުރި މައިންބަފައިން ކައިރިއަށް ބަދަލު ވި ފަހުންނެވެ. އަހަރެން ދިރިއުޅުމަށް މަސައްކަތެއް ފެށީމެވެ. ނަމަވެސް ކުރިއަކަށް ނުދެވުނެވެ. ބަލިވާން ފަށައިފިއެވެ. އަނެއްކާވެސް ކޮޓަރިތެރޭ އެކަނި ހޭދަކުރެވޭ ވަގުތު ގިނަވާން ފެށިއެވެ. ބަލިކަމުން މަސައްކަތައް ހުރަސް އެޅެން ފެށިއެވެ. އަބަދު ކަންނެތްވެ މީހުންނާއި އެކަހެރިވާން ފެށުނެވެ. އެއްވެސް ކަމަކަށް މޫޑެއް ނުހުރެއެވެ. އަމިއްލަ ނަފްސާއި ވާހަކަދެކެވެން ފެށިއެވެ. ނަމަވެސް މިފަހަރު ރައްދު ލިބެއެވެ. ހިތާއި ހިތުން ވާހަކަދެކެވެނީއެވެ. ކިހިނެއްކަމެއް ހުދު އަހަންނަކަށްވެސް ނޭނގެއެވެ. އަހަރެން ހިތައް އަރާ ކޮންމެ ސުވާލެއްގެ ޖަވާބު ސިކުނޑިއަށް ލިބެމުން ދެޔެވެ. ވާހަދައްކާކައްވެސް ނުޖެއެވެ. ހިތައް އެރުވުމުން ނިމުނީއެވެ.

މިގޮތުގައި ދުވަހަކަށްފަހު ދުވަހެއް ފާއިތުވަމުން ދިޔަވަރަކަށް މިކަމަށް އަހަރެން ލޯބި ޖެހެން ފެށިއެވެ. ވަރީގެ ސަބަބުން ލިބެމުން ދިޔަ އެކަނިވެރިކަން ފިލަން ފެށިއެވެ. މިވާހަކަދެކެވެނީ ޖިންނިއަކާކަން އެނގުނު ނަމަވެސް އެކަމުން ސަލާމަތްވާން ބޭނުން ނުވާ ފަދައެވެ. ފިލްމުތަކުން ފެންނަހެން ޕްރިންސެސް ސަލާމަތްކޮށްދޭން ޕްރިންސް އަންނަހެން އަހަރެންވެސް ބޭނުންވީ އަހަރެންގެ ލޯބިވާ އައިސް އަހަރެން އެކަމުން ސަލާމަތް ކުރާށެވެ. ވާނުވާއެއް ހުދު އަހަންނަކަށްވެސް ނޭނގޭ ކަހަލައެވެ. މިވާހަކަދެކެވެނީ ކާކާ ކަމެއް، މިއީ ކިހާވަރެއްގެ ކަމެއް ކަމެއް ވިސްނާވެސް ނުލެވެއެވެ. ނަމަވެސް އެއް ދުވަހެއްގެ މެންދުރު ވަގުތެވެ. ދަތުރުވަރިއެއްގައި ގޭ އެންމެންވެސްވީ ރަށުން ބޭރުގައެވެ. އަހަރެންނާއި ބައްޕަ ފިޔަވައެވެ. ބައްޕަ އެވަގުތު ގެޔަކު ނޫޅެއެވެ.

އަހަރެން އިނީ ބޭރުގައި ހުރި އުނދޯލި ހެއްލާށެވެ. ހިތާއި ހިތުން ވާހަކަދެކެވެމުން ދިޔައެވެ. ހަޤީޤަތަކީ އޭރުވެސް އަހަރެން ވަރި ކުރި މީހާއަށް އިންތިޒާރު ކުރަމުން ދިޔަ ކަމެވެ. އަނބުރާ އޭނާގެ ދިރިއުޅުމަށް ގެންދޭތޯ ހިތާއި ހިތުން ދުޢާ ކުރެވެއެވެ. ވީހާވެސް އަވަހަކަށް ކައިވެނި ކުރަން ބޭނުން ވެއެވެ. އެ ޚިޔާލުގައި އިންދާ ސިކުނޑިން ޖަވާބު އައެވެ. ” އޭނާއެއް ދެން ނާންނާނެ. އަޔަކަވެސް ނުދޭނަން.” އެޔާއިއެކު އަހަންނަށް ސިފަވިއެވެ. ކަންހިނގާ ދިޔަގޮތް ވަރަށް ރީތިކޮށް ސިފައެވެ.

އަހަރެންގެ ފިރިމީހާއަކީ ދީނީ ކަންކަމާއި ވަރަށްދުރު މީހެކެވެ. ނަމާދުކުރުމާއި ޤުރުޢާން ކިޔެވުމަކީ އޭނާގެ އެއްވެސް ދުވަހެއްގެ ޝެޑިޔުލުގައި ހިމެނޭ ކަމެއް ނޫނެވެ. އަހަރެން އޭނާއަށް ވަރަށް ނަސޭހަތް ދެމެވެ. އުޅުން އިސްލާހު ކުރުމަށެވެ. ނަމާދުކުރަން ފެށުމަށެވެ. އަހަރެން ނަމާދުކޮށް ޤުރުޢާން ކިޔަވަން ފެށުމުން އަހަރެންގެ ސިކުނޑިއާއި ބެހެން އެތަކެއްޗައް އުނދަގޫވީއެވެ. އެހެންކަމުން ދެން އެމީހުން އޭނާގެ ސިކުނޑިއާއި ކުޅެން ފެށީއެވެ. އޭނާއަށް ދުވަހަކުވެސް އަހަރެން އުފަލުގައި ނުގެންގުޅެވޭނެކަމަށް ވިސްނައިދިނެވެ. އަހަރެންދެކެ ފޫހި ކުރުވިއެވެ. އަހަރެންގެ އުނި ސިފަތައް ގިނަގިނައިން އޭނާއަށް ދެއްކިއެވެ. އޭނާޔާއިއެކު އުޅޭހާ ހިނދެއްގައި އަހަރެންގެ ބަލިގަނޑު ދުވަހަކުވެސް ރަނގަޅު ނުވާނެކަމަށް ސިކުނޑިއަށްވައްދާ މާޔޫސް ކުރުވަން ފެށިއެވެ. ހުރިހާ ގޮތަކުންވެސް އަހަންނަށް އެންމެ ރަނގަޅުވާނީ އަހަރެން ދޫކޮށްލިއްޔާ ކަމަށް ވިސްނައިދިނެވެ. އަހަރެން ބޭނުންވާ ކަހަލަ ފިރިއަކަށް ދުވަހަކުވެސް އޭނާއަކަށް ނުވެވޭނޭ ކަމަށް ވިސްނައިދިނެވެ. އޭނާ އެ ވިސްނުން ޤަބޫލު ކުރީއެވެ. ހިތް ފުނޑުފުނޑުވި ވަގުތު އަހަރެން އިންތިހާއަށް ދެރަވެ، ރުޅިގަދަވެ، ހަމަޖެހުން ލިބުމަށް ފާޚާނާ އިޚްތިޔާރު ކުރުމުން، އަހަރެންގެ ނަފްސުގެ ކޮންޓްރޯލް އެމީހުން އަތުލީއެވެ.  އަނެއެްކާވެސް އެމީހުން އަހަރެންގެ ހަށިގަނޑު ތެރެއަށް ފަސޭހަކަމާއެކު ވަނީއެވެ. ދެމީހުން ދުރުކުރުވި މޮޅު ރޭވުން ގަނޑު މިއީއެވެ.

އަހަންނަށް އެ މަންޒަރުތައް ސިފަވިއެވެ. އޭނާގެ ހާލަތު ވިސްނުނެވެ. ދެން ސިކުނޑިއަށް އައި ޖަވާބު އަދި މާ ހައިރާންކުރުވިއެވެ. “އެހެންވީމާ އޭނާ ކަލޭ ދެރަކުރާކަށް އެނބުރި އޭނާގެ ދިރިއުޅުމަކަށް ނުގެންދާނެ. އަދި ވިސްނިގެން ގެންދަން އުޅުނަސް ގެންދިޔަކަ ނުދޭނަން. ކަލޭ އަހަންނާއި އިންނަންވީނު. އޭރުން އެއްވެސް ކަމެއްގައި ހިތާމަ ކުރާކަށް ނުޖެހޭނެ. ނުލާހިކު ހެޕީ ވާނެ.” އަހަރެންގެ ލޯ ހުޅުވުނީ ދެނެވެ. ނިދިން ހޭލެވުނީ ދެނެވެ. އަމިއްލަ ސިކުނޑިން ވިސްނާލެވުނީ އަދިކިރިޔާއެވެ. ކޮންމެ ވާހަކައެއްގައި ޕްރިންސެއް ނޫޅޭނެކަމެވެ. ކޮންމެ ޕްރިންސަކީ އެހާ ހިއްވަރުގަދަ މީހެއް ނޫންކަމެވެ. މިއަނދިރިކަމުން ސަލާމަތްވާން އަމިއްލައަށް މަސައްކަތް ކުރަން ވެއްޖެކަމެވެ. އަހަރެން މި ވާހަކަދައްކަނީ އަހަރެންގެ ދިރިއުޅުން ބަރުބާދު ކޮށްލި ނުބައި ނުލަފާ އެއްޗަކާ ކަމެވެ. އިންތިހާއަށް ރުޅިއާދެވުނެވެ. އޭނާޔަށް ދެވަނަ ފަހަރައް އަހަރެންގެ ދިރިއުޅުމާ ކުޅެން ފުރުސަތު ނުދޭން ވަގުތުން އަޒުމް ކަނޑައެޅީމެވެ.

އަހަރެން ބާރު ހިނގުމެއްގައި ގޮސް ވުޟޫ ކުރީމެވެ. އަދި ކުރުސި ކިޔައި އެނޫންވެސް އެނގޭހާ ހެޔޮ އެއްޗެއް ކިޔައި ހަށިގަނޑު ތަޅުލަން ކިޔަވާ އާޔަތްތައް ކިޔަވާ ގައިގައި އަތް ކޭތްތީމެވެ. ނަމާދުކޮށްގެން މުޞައްލަމަތީ އިނދެ ވެސް ކިޔެވީމެވެ. އެއްކަލަ އެކުވެރިޔާއަށް ވީހާވެސް އަވަހަކަށް ރާޤީއެއް ހޯދާދިނުމަށް އެދި މެސެޖް ކުރީމެވެ. އެޔާއިއެކު އަހަރެން ހަނދާންވިއެވެ. އޭގެ ކުރިންވެސް އަހަރެން އެ އެކުވެރިޔާއަށް އަނެއްކާވެސް އަހަންނަށް އުނދަގޫވާ ވާހަކަ މެސެޖް ކުރަން އެތައް ފަހަރަކު އުޅުނީމެވެ. އެކަމަކު އެކަމެއް ނުކުރެވުނެވެ. ފޯނު ނެގުމާއެކީ ފޫހިވަނީއެވެ. ބުނުމުގެ ބޭނުމެއް ނެތްކަމަށް ދެކެވެނީއެވެ.

އިސާހިތަކު ރޭގަނޑުގެ އަނދިރިކަން ވެރިވެއްޖެއެވެ. ބައްޕަ އުޅެނީ ފިހާރައިގައިކަމުން އަބަދުވެސް ގޭގައި ހުންނަނީ އަހަރެން އެކަނިންނެވެ. ގެޔައް ހީވަނީ ތޫފާނެއް އައިސްގެން އުޅޭ ހެންނެވެ. ކޮޓަރިއަށް ވަދެއްޖެނަމަ ފާޚާނާ ދޮރު ބާރުބާރައް ޖެހޭ އަޑައް ސިއްސައިގެން ދެއެވެ. ބައްޕައަންނަން ވާއިރައް ކާންހަދަން ބޭރު ބަދިގެ ފަރާތައް ނިކުތީމެވެ. ހީވީ ކުއްލިއަކަށް ބާރު ވައިގެ ތޫފާނެއް އެހިސާބައް އެރިހެނެވެ. ހުރިހާ ގަސްތަކެއް މުލުން ލުހެލާފާނެ ފަދައެވެ. ލިބުނު ކުއްލި ސިހުމާއެކީ ބިރުން ދުވެފައި ގެޔައްވަދެވުނެވެ. ބަދިގެ ދޮރު ހުޅުވާފައި ހުރުމުން އެދޮރުވެސް ހީވަނީ އުފުރާލާފާނެ ހެނެވެ. ހުއްޓުމެއްނެތި ބާރުބާރައް ދޮރުފަތް ޖެހެމުންދިޔައެވެ.

“ކޮންމެ ގޮތެއްވިޔަސް މިވަގުތު އެހެންމީހަކު ނެތެވެ. މިއީ އަހަރެންގެ އިމްތިހާނެވެ. ބިރުގަތް ވަރަކަށް ބިރުގަންނުވާނެއެވެ. މިކަމާއި ކުރިމަތިލާން ޖެހޭނީ ހުދު އަހަންނެވެ.” އެ ވިސްނުމުގައި ﷲއަށް ވަކީލު ކޮށްލާފައި އަނެއްކާވެސް ބޭރަށް ނިކުމެ ބިސްމި ކިޔާފައި ދޮރުލައްޕާ ތަންޑު އަޅުވައިފީމެވެ. ވައިގަދަވެ ވިއްސާރަ ވެއްޖެއެވެ. ބައްޕަ ކައިގެން ދިޔުމުން އަހަރެން ތަށިތައް ނަގާފައި ކޮޓަރިއަށް ވަނީމެވެ. އަދި އަހަންނަށް މިހާރު ހުރިހާ ހަޤީޤަތެއް އެނގިއްޖެ ކަމަށްބުނެ ކުރީގެ ފިރިމީހާއަށް މެސެޖް ކުރީމެވެ. އޭނާ ހައިރާންވެގެން ކޮންކަމެއްތޯ އެހުމުން އަހަރެން ވީގޮތް ކިޔައިދިނީމެވެ. އޭނާ ހުރީ ޤަބޫލު ނުކުރެވިފައެވެ. އަދި އެއީ މުޅިންވެސް ތެދުކަމަށް އެއްބަސްވިއެވެ. އޭނާއަށް މުޅިންވެސް ވިސްނުނީ އެގޮތައް ކަމަށް ބުންޏެވެ.

ނަމަވެސް އޭރު އޭނާ ވަނީ ދެވަނަ ކައިވެންޏަކަށް ތައްޔާރުވެފައެވެ. ޝައިޠާނާގެ ލާނެތް ނުބައި ހިނިގަނޑު އަހަރެންގެ ސިކުނޑީގައި ގުގުމަމުން ދިޔައެެވެ. އެއީވެސް އެމީހުންގެ ނުބައި ރޭވުމެއްކަން ވިސްނުނެވެ. ޚިޔާލުތަކުގައި ވަނިކޮށް އާދުވަހަކައް އިރުއަރައިފިއެވެ. ބޭރަށް ނިކުމެ ބަލައިލީމެވެ. ވިއްސާރައިގެ އަސަރެއްވެސް ވައިގެ އަސަރެއްވެސް މިހާރަކު ފެންނާކަށް ނެތެވެ. ނަމަވެސް ރޭގެ އައި ވަރުގަދަ ކޮޅިގަނޑުގައި އުނދޯލިގެ ހިޔާކޮށްފައިވާ ސަތަރިގަނޑު ވަނީ އެކީއެކަށް ވީދައިގެންގޮސް ކުދިކުދި ވެފައެވެ. ކޮޓަރީގެ ފާޚާނާގެ ދޮރުވެސް ވަނީ ވަޔާ ތެޅުނުލެއް ބާރުކަމުން އެއްފަރާތުން ނައްޓައިގެން ގޮސްފައެވެ. ބައްޕައަށް އެ ދޮރު ފެނުމުން ދޮރައް މިހިރީ ކިހިނެއް ހަދާފަތޯ ސުވާލު ކުރިއެވެ. ވަޔާތެޅިތެޅި ނެއްޓުނީ ކަމަށް އަހަރެން ބުނީމެވެ. ހަތަރުފަރާތުން ފާރެއްލައި ހިޔާކޮށް ބަންދުކޮށްފައިހުރި ކޮޓަރިއަކަށް އެހާ ވަރަށް ވައިޖެހުނީ ކޮންތާކުންތޯ ބައްޕަ ސުވާލުކުރީ އެއީ އަހަރެން އަތުން ވީ ކަމެއްކަމަށް ހީކޮށެވެ. އަހަންނަކަށް އެ ސުވާލަކަށް ޖަވާބެއް ނުދެވުނެވެ.

ﷲގެ ހެޔޮ ރަހްމަތުން ރާޤީއެއްގެ ކަންތައް ހަމަޖެހިއްޖެއެވެ. މާލެ ގޮސް ރުޤްޔާ ކުރެވެން ފެށުނެވެ. ދެދުވަހުން އެއްދުވަހު ރާޤިއައިސް އަހަރެން ކައިރީ ކިޔަވައެވެ. ފެނާއި، މާމުތާއި ތެލައް ކިޔަވާފައި އެ ބޯންދިނެވެ. ކަދުރާއި، ޒައިތޫނިކާން ބުންޏެވެ. ކޮންމެ ދުވަހަކު ކިޔަވާނެ ސޫރަތްތަކާއި އާޔަތްތައް އަހަރެންނަށްދީ އެތަކެތި ކިޔައިތޯ ބަލައެވެ. ސިހުރާއި އެސްފީނާއަށް ފެންވަރަން ފެށުނެވެ. އުޅުނު ގެތަކުން ސިހުރު ހަދާފައި ހުރިތަންތަން ފާހަގަ ކުރެވި އެތަންތަނަށް ކިޔަވާފައި ފެން އެޅިއެވެ.

އަހަންނަށް އެތައް ކަމެއް ތަޖުރިބާ ކުރެވުނެވެ. ޝައިޠާނުންގެ ބިރުވެރި ސިފަތައް ލޮލައް ސިފަވެއެވެ. އެމީހުންގެ ނުބައި ރޭވުންތައް ކުރިއަށް ގެންދިޔުމަށް ކުރާ މަސައްކަތްތައް ދެނެގަންނަން އެނގުނެވެ. ކީރިތި ޤުރުޢާނުގެ ބާރު އިހްސާސް ކުރެވުނެވެ. އެއިން އެތަކެއްޗައް ވާ އުނދަގޫ ތަޖުރިބާ ކުރެވުނެވެ. އޭގައި ބަޔާން ކޮށްދީފައިވާ ތެދުތައް ލޮލައް ފެނުނެވެ. އިންސާނުންގެ ދުނިޔޭގައި  ޝައިޠާތުންތައް ފައިވިއްދާފައިވާވަރު ފެނިގެން ދިޔައެވެ. އަހަރެމެންގެ ލޯ ކުރިމަތީގައި ކަޝްފުވެގެން ތިބެ ކުރާ ޖެއްސުން އިހްސާސް ވިއެވެ.

އެއީ ނާމާން ދުނިޔެކެވެ. އެއްވެސް އަލިކަމެއް ރަނގަޅުކަމެއް ނުވާ، ސިހުރުތަކާއި، ފާފަތަކުން ފުރިގެންވާ ދުނިޔެއެކެވެ. އެކަކު އަނެކަކަށް ހެޔޮ އެދުމެއް ނުވާ މަކަރާއި ހީލަތުން ފުރިގެންވާ ބަޔެކެވެ. އެމީހުންގެ ޓާގެޓަކީ މުޅިންވެސް އިންސާނުންނެވެ. އިންސާނުންގެ ދިރިއުޅުމުގެ ހަމަޖެހުން ނަގައިލުމެވެ. އެކަމުގައި އެކަކު އަނެކަކަށް މަދަދު ވެއެވެ. އެކަކަށްވުރެ އަނެކަކުގެ ބާރުގަދަކަން ދައްކައެވެ. ބާރުދައް ތަކެއްޗަކީ ބާރުގަދަ ތަކެތީގެ އަޅުންނަށް ހަދައެވެ. އެތާކު ކުޑަނަމަވެސް ހަމަޖެހުމެއް ނުވާ ކަހަލައެވެ. އެމީހުންގެ މެދުގައި ލޯތްބެއް، އިޚްލާސްތެރިކަމެއް، އިޙްތިރާމެއް ނުވާފަދައެވެ. ބިރުގަންނަނީ ހަމައެކަނި ވެރިމީހާދެކެއެވެ. ކޮންމެ ބައިގަނޑަކަށް ވެރިއަކުވެއެވެ. ބައިގަނޑުތައް ވަކިވެފައިވަނީ އެބަޔަކަށް ލިބިފައިވާ ބާރާއި ފެންވަރުންނެވެ. ވެރިމީހާ އެބައިގަނޑައްވުރެ ބާރުގަދަވާނެއެވެ. ވެރިމީހާގެ ބައިގަނޑު ވެސް ވަނީ އެފަދައިންނެވެ. އެގޮތައް ގިންތީތަކަކަށް ބެހިގެންގޮސް އެންމެ ބާރުގަދަ ވެރިޔާއާ ހިސާބައް ދާއިރު މުގުލުގައި ހުންނަނީ އިބިލީހެވެ. ޤުރުޢާނުގައިވާ ފަދައިންނެވެ.

ބައެއް މީހުން ސުވާލު ކުރެއެވެ. އަހަންނަށް މިކަންތައްތައް އެނގެނީ ކިހިނެއް ހެއްޔެވެ؟ ޖިންނި ބުނަނީ ހެއްޔެވެ؟ ހުވަފެނުން ދައްކަނީ ހެއްޔެވެ؟ އޭތި ފެންނަ ހިސާބުގައިހުރެ ކިޔައިދެނީ ހެއްޔެވެ؟ އަހަރެން ބުނަމެވެ. އަހަންނަކަށްވެސް ނޭނގެއެވެ. ނުފެނެއެވެ. ހުވަފެނަކުވެސް އަދި ހަޤީޤަތަކައްވެސް ނުފެނެއެވެ. އެކަމަކު އިހްސާސް ކުރެވެއެވެ. ސިކުނޑިއަށް ސިފަވެއެވެ. އަހަންނަށް އެނގެއެވެ. މިއީ އާންމުކޮށް މީހުން ޤަބޫލު ކުރާނެ އަދި ކުރެވޭނެ ކަންކަމެއް ނޫނެވެ. ފުރަތަމައިނުން އަހަންނަށްވެސް ޤަބޫލު ނުކުރެވެއެވެ. އަހަރެން އަނެއްކާ މޮޔަވީ ނޫންބާއޭ ހިތައް އެރިއެވެ. ވަރީގެ ސަބަބުން ޑިޕްރެސްވެ މެންޓަލްވީ ނޫންބާއޭ ހިތައް އެރިއެވެ. ސިކުނޑިން ޖިންނިއަކާއި ވާހަކަ ދެއްކޭނެ ހެއްޔެވެ؟ އަހަރެން މިސުވާލުގެ ޖަވާބު ހޯދަން މަސައްކަތް ކުރީމެވެ.

އެތައް ވެބްސައިޓެއް ބަލާ ބޭރުގެ ރާޤީން މިކަމާއި ގުޅޭ ގޮތުން ބަހެއް ބުނެފައިވޭތޯ ހޯދީމެވެ. މީހުންގެ ހަޤީޤީ ވާހަކަތައް ކިއީމެވެ. ލިބުނު މައުލޫމާތަކީ ޖިންނިއަކު އިންސާނާގެ ހަށިގަނޑުގައި އުޅެނީނަމަ ހާއްސަކޮށް ސިކުނޑީގައި ގިނަ މުއްދަތަކަށް ވާނަމަ އެ ޖިންނީގެ ވިސްނުމާއި ޚިޔާލު އިންސާނާއަށް އިހްސާސް ކުރެވެއެވެ. އަދި އިންސާނާގެ ވިސްނުމާއި ޚިޔާލު އެ ޖިންނިއަކަށްވެސް އިހްސާސް ވާނެއެވެ. އެގޮތުން ބަސްމޮށުންތެރިކަމާއި ނުލާ ސިކުނޑިން އެކަކު އަނެކަކާއި ވާހަކަ ދެކެވޭނެ އެވެ. ނުބައި ވިސްނުންތައް ސިކުނޑިއަށް ވައްދައި މީހާ މޮޔަކުރުވޭނެއެވެ. ހަޤީޤަތް އަސްލު ނޫން ގޮތްގޮތުގައި ދައްކާ، އޮޅުވާލާ މީހުންގެ ސިކުނޑިއަށް ވެއްދުމުގެ ބާރު އެތަކެއްޗައް ލިބިފައިވެއެވެ. އެކަހަލަ އެތައް ހަޤީޤީ ހާދިސާއެއް އަހަރެން ކިއީމެވެ. އެހެންކަމުން ކަންވާގޮތް އޮޅުން ފިލާ، އެގޮތައް ކަންތައްތައް ވަމުން ދިޔުމުން އެކަން އަހަންނަށް ޤަބޫލުކުރަން މަޖުބޫރު ވިއެވެ.

ޤުރުޢާނުންނާއި ސުންނަތުން ސާބިތުވާ ހުރިހާ ފަރުވާއަކުން އެ ނާމާންކަމުން ސަލާމަތްވެވޭތޯ މަސައްކަތް ކުރީމެވެ. ހިޖާމާ ޖެހީމެވެ. ރޯސްވޯޓަރ، ރޯކިރު، ހުއިސުމް، ބޮކަރު މިހެންގޮސް އެތައް ބާވަތެއްގެ އެއްޗެއް ރާޤީ އަހަރެންލައްވާ ބޭނުންކުރުވިއެވެ. އޭނާއަށް ކުރެވޭ އެންމެ ފުރިހަމައަށް އޭނާ މަސައްކަތް ކުރިއެވެ. އެގޮތުގައި ތިންމަސް ހޭދަވެ ނިމިއްޖެއެވެ. އަހަންނަށް އެތައް ގޮތަކުން ވަނީ ލުއި ލިބިފައެވެ. ސިކުނޑިއަށާއި ހަށިގަނޑައްވެސް ލުުޔެވެ. ނަމަވެސް ނުކެނޑޭ އައްސިކަމެއް އަތާއި ފައިގައި އަބަދުވެސް ހުރެއެވެ. އެނބުރި ރަށައް ދިޔައީ އެކަން އެއްކޮށް ރަނގަޅުވަންދެން އަމިއްލަ އަށް ރުޤްޔާ ކުރުމުގައި ދެމިހުރުމަށް ރާޤީ އިރުޝާދު ދިނުމުންނެވެ.

އަހަރެންގެ މޫނުމަތިންވެސް މިހާރު އުފާވެރިކަމެއް ފެންނަ ކަމަށް އާއިލާ މީހުން ބުނެއެވެ. ކުރިން ފެންނަނީ މަތިމަރުވެފައިވާ މާޔޫސްކަމުން ފުރިގެންވާ މޫނެއްކަމަށް އެމީހުން ބުންޏެވެ. ދުވަހަކަށްފަހު ދުވަހެއް އަހަރެން ދިޔައީ ދީނާއި ގާތްވަމުންނެވެ. ބަރާބަރަށް އަޅުކަންތައްތަކުގައި ސާބިތުވެ ދުޢާތަކަށް ރައްކާތެރިވީމެވެ. ނަމަވެސް ރަށަށް ދެވުމުން އަނެއްކާވެސް ރުޤްޔާގެ ގޮތުގައި ކިޔަވާ އާޔަތްތައް ބަރާބަރަކަށް ނުކިޔެވެއެވެ. ގޭގެ ހުރިހާ ކަމެއްގައި އިސްވެ އުޅެވޭތީ ވަރުބަލިކަމުން އެކަމަށް ވަގުތު ނުދެވެން ފެށީއެވެ.

ކޮންމެޔަކަސް އަހަރެން ވެސް ދެވަނަ ކައިވެންޏެއްކުރަން ގަސްތުކުރީމެވެ. އެއީ މީގެ ދެތިންމަސް ކުރިން އަހަރެންކައިރީ އިންނަން އެހި އަޚްލާޤް ރަނގަޅު ދީންވެރި ކުއްޖެކެވެ. އަހަރެންގެ ހާލަތު ބަޔާންކޮށްދީ އެކަމުން ރަނގަޅު ވީމައި ނޫނީ ކައިވެނި ކުރެވެން ނެތް ކަމަށް އަހަރެން އޭރުގައި ޖަވާބު ދިނީމެވެ. އޭނާ އަހަރެންނަށް އިންތިޒާރު ކުރިއެވެ. ފާއިތުވެ ދިޔަ ދުވަސް ތަކުގައި އެކި ގޮތްގޮތައް އަހަރެންގެ ހާލުބަލައި ދީނުގައި ސާބިތުވެ ހުރުމަށް ހިތްވަރު ދެމުން ގެންދިޔައެވެ. ދަމުނަމާދު ކުރުމަށާއި، ނަމާދުގެ ވަގުތުގައި ލަސްކުރުމެއްނެތި ވީހާވެސް އަވަހަކަށް ނަމާދު ކުރުމަށާއި، ގިނަގިނައިން ރޯދަހިފުމަށް ނަސޭހަތްދީ ހެދިއެވެ.

ނަމަވެސް ފުރަތަމަ އަހަރެންނަށް ވަރަށް އެކަމާއި ވިސްނުނެވެ. އަހަންނަށް އެހެންމީހަކުދެކެ ލޯބިވެވޭނެތޯ އަމިއްލަ ނަފްސާއި ސުވާލު ކުރީމެވެ. އެހެން މީހަކާއިއެކު އުޅެވޭނެބާއޭ ހިތައް އަރަމުން ދިޔައެވެ. އަންބެއްގެ ހައްޤުތައް ފުރިހަމައަށް އަދާކުރެވޭނެބާއޭ ވެސް ހިތައް އެރިއެވެ. އަނެއްކާވެސް ދެވަނަ ކައިވެނިވެސް ހިތިގޮތަކަށް ނިމިދާނެކަމުގެ ބިރުވެރިކަން ހިތުގައި އުފެދުނެވެ. ނަމަވެސް އަހަރެންގެ ހިތް ބުނަމުން ދިޔައެވެ. ފިރިމީހާގެ ފަރާތުން ލިބެންޖެހޭ ފުރިހަމަ ލޯތްބާއި އަޅާލުން ލިބެނީ ކަމުގައި ވަނީނަމަ އަހަންނަށްވެސް އަލުން ލޯބި ވެވޭނެއެވެ. އަހަންނަށްވެސް ލޯބިދެވޭނެއެވެ. އަދި އެ ލޯތްބާއި އަޅާލުން ނުލިބުނު ކަމުގައި ވިޔަސް، މީހެއްގެ އަންބެއްގެ ގޮތުގައި ހުރިހައި ހިނދަކު އޭނާއަށް ވަފާތެރިވާނެކަން ޔަޤީނެވެ. އަހަންނަކީ މިހާރު ކަންކަމާއި ކުރިމަތިލާން ކެރޭނެ މީހެކެވެ. ފަސްޖެހެންވީ ސަބަބެއް ނެތެވެ. އެހެންނޫނަސް އަހަންނަށް ނުއުފުލެވޭވަރުގެ ބުރައެއް ﷲ ނުޖައްސަވާނޭކަން ޔަޤީނެވެ. ނަމަވެސް ދެންވެސް ހިތުގައި އުނދަގޫ ކަމެއް ހުރުމުން އަހަރެން އިސްތިހާރާ ނަމާދު ކުރީމެވެ.

އަހަރެންގެ މައިންބަފައިންނާއި ކައިވެނީގެ ވާހަކަ ދެއްކުމުން އޭނާގެ ކަންތައްތައް ހުރިނެތްގޮތް ދަންނަ މީހުންކައިރިން އޮޅުންފިލުވިއެވެ. އަދި ރަނގަޅު ކުއްޖެއްކަން އެނގުމުން ދެފަރާތުގެ އާއިލާގެ ރުހުމާއިއެކު ކައިވެނި ކުރެވިއްޖެއެވެ. ﷲގެ ހެޔޮރަޙްމަތުން އުފާވެރި ކައިވެންޏެއްގައި ވަގުތު ގުނަމުން ދިޔައީމެވެ. ފިރިމީހާގެ އެއްބާރު ލުމާއިއެކު އިތުރަށް ދީނުގެ ކަންތައްތަކަށް ސަމާާލުކަން ދެވެއެވެ. ދެމީހުންއެކީ ސުންނަތް ރޯދަތައް ހިފައި ސުންނަތް ނަމާދުތައް ކުރަމެވެ. ނަމަވެސް މާކަ ގިނަދުވަހެއް ނުވެ އަނެއްކާވެސް އެއްކަލަ ނާމާންކަމުގެ ހިޔަނި ދިރިއުޅުމަށް އެޅެން ފެށިއެވެ.

އަނެއްކާވެސް ބަލިވާން ފެށިއެވެ. ސަރަހައްދީ ހޮސްޕިޓަލްތަކުން ދިން އެއްވެސް ބޭހަކަށް ނުގުޑައެވެ. މާލެ ދިޔައީމެވެ. ހަމަ ކަންތައްވީ އެހެނެވެ. ލުޔެއް ލިބޭގޮތެއް ނުވިއެވެ. އާއިލާގެ މީހުންތައް އަނެއްކާވެސް ސިޙްރުގެ ކަމެއް ކަންނޭނގެ އޭ ކިޔަންފެށިއެވެ. އަހަރެންވެސް އެގޮތައް ހިތައް އަރަމުން އައެވެ. ނަމަވެސް އެއީ އަހަރެން އެއްގޮތަކަށްވެސް ބޭނުންވާ ކަމެއް ނޫންކަމުން ޓެސްޓަކަށްފަހު ޓެސްޓެއް ހަދާ ޗެކް ކުރަމުން ދިޔައީމެވެ. ހުރިހާ އެއްޗަކުންވެސް ދައްކަނީ ނޯމަލް ކަމަށެވެ. އެއްވެސް މައްސަލައެއް ނޫޅެއެވެ. އެކަމަކު ނޯމަލްނަމަ އަހަންނަށް މިވަނީ ކޮންއުނދަގޫ ތަކެއް ހެއްޔެވެ؟ ޑޮކްޓަރުންނަކަށް އެ ސުވާލަކަށް ޖަވާބެއް ނުދެވުނެވެ.

އަހަރެންގެ މާޔޫސްކަން ދިޔައީ ދުވަހެއް ދުވަހަކަށް އިތުރުވަމުންނެވެ. އެންމެފަހުން އެހެންގޮތެއް ނެތުމުން ކުރީގެ ރާޤީއަށް ގުޅީމެވެ. ވާގޮތްތައް ކިޔައިދިނީމެވެ. އެއީ ސިހްރެއްގެ އަސަރުކަމަށް ލަފާ ކުރެވޭ ކަމަށް ބުންޏެވެ. ނަމަވެސް ޔަޤީން ކުރެވޭނީ ކައިރީގައި ކިޔަވާލުމުންކަމަށް ބުންޏެވެ. އެއަށްފަހު ވާ އުނދަގޫތަކަށް ކިޔަވަންވީ ދެތިން ސޫރަތެއް ބުންޏެވެ. އަހަރެން އެ ސޫރަތްތައް ތަކުރާރުކޮށް ކިޔަވަން ފެށީމެވެ. ލިބުނީ ހައިރާން ކަމެކެވެ. ދެދުވަހެއްގެ ތެރޭގައި އެންމެ އުނދަގޫވެގެން އުޅުނު ކަންކަމަށް ލުއި ލިބިއްޖެއެވެ. ހައިރާންވެގެން އެވާހަކަ ރާޤީ ކައިރީގައި ދެކެވުނެވެ. އަލާމާތްތަކުން ދަރިއަކު ލިބުނަ ނުދިނުމަށް ހަދާފައި ހުރި ސިހުރެއްކަމަށް ލަފާކުރިއެވެ. އެހެންކަމުން އަނެއްކާވެސް އެކަމަށް އިތުރު ސޫރަތެއް ގިނަގިނައިން ކިޔަވަން ބުންޏެވެ.

އަހަންނަށް އަނެއްކާވެސް ލިބުނީ ބޮޑު ސިހުމެކެވެ. އަހަންނަކަށް އެ ސޫރަތް އެއްކޮށް ކިޔެވޭގޮތެއް ނުވިއެވެ. މެޔައް ތަދުގަނޑެއް އަރަނީއެވެ. އެތަދުގަނޑު ހީލިގަނޑެއްހެން ބޮލައް ފެތުރިގަންނަނީއެވެ. އެވަގުތު ތަކުގައި ހަދާނެ ނުހަދާނެ ގޮތެއް ނެތިގެން ތެޅިފޮޅެމެވެ. އެކަންކަން ކެނޑޭތޯ އެއްކަމަކަށްފަހު އަނެއްކަމެއް ކުރަމެވެ. ސަޖިދައަށް ތިރިވެ ﷲއަށް ވަކީލްކޮށްގެން އޮވެވޭތޯ ބަލަމެވެ. ދެން ކެތްނުވީމާ ތެދުވެ ކުރުސިޔާއި އެނޫންވެސް އާޔަތްތައް ތަކުރާރު ކުރަމުން ދެކޮޅައް ހިނގަ ހިނގަ ހުންނަމެވެ. އެވަރުންވެސް ލުޔެއް ނުލިބިގެން ފޯނުން ބަންގި ޖަހަމެވެ. ނޫންނަމަ ބަޤަރާތް ސޫރަތް ޖަހަމެވެ. ބަޤަރާތް ސޫރަތް އަޑުއެހުމުން ލުއިވާލެއް އަވަސްކަން ފާހަގަ ކުރެވުނެވެ.

ރާޤީ ބުނި ފަދައިން ދަރިއަކު ލިބުމަށް ހުރަސް އެޅުމަށް ހަދާފައިހުރި ސިހުރެއްގެ އަސަރުކަން ޔަޤީންވުމުން ހިނދުކޮޅަކަށް ނަމަވެސް ކެތްތެރިކަން ކޮޅުންލިއެވެ. ރުޅިގަދަވިއެވެ. ދުނިޔެއިން އަހަރެން އެންމެ ބޭނުންވި ދެ އުފާވެރިކަންވެސް ނިގުޅައިގަންނަން މަސައްކަތް ކުރަނީކަން އެނގުންވުމުން ރުޅި ނާންނާނީ ކާކު ހެއްޔެވެ؟ ފުރަތަމައިނުން ކުރީގެ ފިރިމީހާ އަހަންނާއި ވަކި ކޮށްލީއެވެ. މިފަހަރު އަނެއްކާ ދެވަނަ އަށް އަހަރެން މި ދުނިޔެއިން އެންމެއެދޭ، މަޔަކަށް ވުމުގެ ހައްޤު އަހަރެންގެ ކިބައިން ނިގުޅައިގަންނަން މަސައްކަތް ކުރަނީއެވެ. ސިހުރު ހަދަނީ ކޮންމެ މީހަކު ކަމުގައި ވީނަމަވެސް މީދެން ބޮޑުވަރެއް ނޫން ހެއްޔެވެ؟ އަހަންނަށް އެ މީހަކަށް އުނދަގުލެއް ޖައްސަން ކުރެވުނީފަހެ ކޮންކަމެއް ހެއްޔެވެ؟

ނުބައި ފިކުރުތަކުންނާއި ރުޅިއައުމުން ނަފްސު ދިފާއު ކުރެވޭތޯ އަހަރެން މަސައްކަތް ކުރީމެވެ. އަނެއްކާވެސް ރުޤްޔާކުރަން މާލެ ދިއުމުގެ ބަދަލުގައި މިފަހަރު އަހަރެން އިޚްތިޔާރުކުރީ އަމިއްލައަށް ރުޤްޔާ ކުރާށެވެ. ކުރިން ރުޤްޔާކުރިއިރު ރާޤީ ގެންގުޅުނު އުސޫލުތަކުގައި އަމިއްލަ އަށް ހިފީމެވެ. ނޭނގޭ ކަންތައް އެނގޭ މީހުން ކައިރިން އަހާ އޮޅުން ފިލުވީމެވެ. ރުޤްޔާފެން ކިޔަވާފައި ގަޔައް އެޅުމަށް ބޭނުންވާތީ މަންމަމެން ކައިރިއަށް ދުވަސްކޮޅަކަށް ބަދަލުވީ އެގޭގައި ވަށާފޫޓްފާރު ނަގާފައި ހުންނާތީ އެކަން ކުރަން ފަސޭހަ ވާނެތީއެވެ. ގޭގެ އެއްވެސް މަސައްކަތެއްގައި ބައިވެރިނުވެ ގާތްގަނޑަކަށް މުޅި ދުވަސް އެއްކޮން އަހަރެން ހޭދަކުރީ ޤްރުޢާން ކިޔެވުމުގައެވެ. ހާއްސަކޮށް ކޮންމެ ނަމާދަކަށްފަހު މުޞައްލަމަތީ އިނދެގެން ފާތިހާ ސޫރަތާއި، ކުރުސިޔާއި ތިރީ ތިން ސޫރަތް ތަކުރާރު ކުރާ އަދަދެއްވެސް ނޭނގެއެވެ. ބައެއް ފަހަރު އަސުރު ނަމާދައްފަހު އިރުއޮށްސެންދެކަށެވެ. ނޫނީ މަޣްރިބު ނަމާދާއި އިޝާ ނަމާދާއި ދެމެދުއެވެ.

ޝައިޠާނާއަށްވާ އުނދަގޫ އަަހަންނަށް އިހްސާސް ކުރެވެއެވެ. އަޑުގެ ނެތްކޮޅައް ރޮއެ، ހަޅޭއްލަވާކަން އިހްސާސް ކުރެވެއެވެ. އަހަރެންގެ މުޅި ހަށިގަނޑާއި އިނގިލިތައް ތުރުތުރު އަޅައެވެ. ވާތް ފަޅީގައި ހުރިހާ ގުނަވަނަކަށް ތަދު އިހްސާސް ކުރެވެމުން ގޮސް، އަމިއްލަ އިޙްތިޔާރަކާއި ނުލާ ވާތުން އަމިއްލަ ކަރުގައި ހިފަން އުޅެވެއެވެ. ސިކުނޑިތެރެއިން ދެން ހުއްޓާލާށޭ ބުނެ ހަރުއަޑުން ހަޅޭލަވާ އަޑު ގުގުމަ ގުގުމަ ހުރެއެވެ. އަހަރެން ކެތްތެރި ވެވޭތޯ މަސައްކަތް ކުރީމެވެ. ބައެއް ފަހަރު އަހަރެން މުސައްލަމަތީ އިނދެ ރޮއެ، ވާތަދުން ކުކުރާ އަޑައް ފިރިމީހާ އައިސް ކައިރީގައި ބަންގި ގޮވައެވެ. ނުވަތަ ފޯނުން ބަންގި ޖެހުމުން އުނދަގޫތައް ކެނޑިގެން ދެއެވެ. ނަމަވެސް ދުވަހަކަށްފަހު ދުވަހެއް އުނދަގޫ ކުޑަވަމުން ދިޔައެވެ. ހަފްތާއެއްގެ ތެރޭގައި ﷲގެ އިރާދަފުޅާއެކު ކުރީގެ ހާލަތައް ބަދަލު ވެއްޖެއެވެ. ކުޑަކުޑަ އައްސިކަމެއް ފިޔަވައި ދެން ހުރި ކަންތައްތައް ކެނޑިއްޖެއެވެ. ނާމާންކަން އެކީހެން ކެނޑިއްޖެއެވެ.

އެއަށް ފަހު ހުއްޓާނުލާ އަބަދުވެސް ރުޤްޔާ ކުރުން މަތީގައި ދެމި ހުރެވޭތޯ މަސައްކަތް ކުރަމެވެ. މީ އަހަރެންގެ އިމްތިޙާނެވެ. މި ދުނިޔޭގައި ކޮންމެ މީހަކަށްވެސް އެކި ގޮތްގޮތައް އެކިއެކި އިމްތިޙާން ތަކާއި ކުރިމަތިލާން ޖެހޭނެކަން ކަށަވަރެވެ. ކާމިޔާބުވާނީ ކެތްތެރިވެގެންނެވެ. ބައެއްމީހުން ބުނެއެވެ. “ތީ ރަނގަޅުވާކަމެއްވެސް ނޫންތާއެވެ” އަދި އެތައްފަހަރެއްގެ މަތިން ގާތް މީހުންގެ ފަރާތުން އެކިއެކި ސިހުރުވެރިންކައިރިއަށް ދިއުމަށް ބުނެއެވެ. އެއީ ވަރަށް މޮޅު މީހެއްގެ ގޮތުގައެވެ. އެވެނި މީހަކު މިވެނި މީހަކު އެމީހަކު ކައިރިއަށް ދިޔުމުން ނިކަން އަވަހައް ރަނގަޅުވިއޭ ބުނެ އެކަމަށް އެދެއެވެ. ނަމަވެސް އަހަރެން އެކަމަށް އިންކާރު ކުރަމެވެ. ކިތަމެ ގިނަދުވަހަކު އަދި މުޅި އުމުރު މިކަމުގައި ހޭދަވީ ނަމަވެސް ﷲ ގެ އިރާދަފުޅާއެކު އެކަލާނގެ އެންގެވުމަކާއި ހިލާފެއް ނުވާނަމެވެ.

ހުރިހާ ބާރެއްގެ ވެރި ފަރާތަކީ މާތް ﷲއެވެ. އެކަލާނގެ އިރާދަކުރެއްވި ކަމެއް ފިޔަވާ ނުވާނެކަން ޔަޤީނެވެ. ޖިންނި ޝައިޠާނުންނަކަށްވެސް އެކަލާނގެ އިރާދަކުރެއްވުމަކާއި ނުލާ އަހަރެންގެ ބޮލުގެ އިސްތައްޓެއްހާވެސް ގުޑުވާލުމުގެ ބާރެއް ލިބިގެންނުވާކަން ކަށަވަރެވެ. އެކަލާނގެ، އެކަލާނގެ އަޅުތަކުންނަށް ނުއުފުލޭނެ ވަރުގެ ބުރަ އެއް ނުޖައްސަވާނެކަން އަންގަވާފައިވެއެވެ. އަދި ކެތްތެރިންނަށް އާޚިތަތުގައި އެތައް ދަރުމައެއް ދެއްވާނެކަން އަންގަވާފައިވެއެވެ. ދާއިމީ ގޯއްޗަކީ އާޚިރަތުގެ ގޯއްޗެވެ.

އަހަރެންނަށް މިހުރިހާކަމަކުން ލިބުނީ އަލިކަމަކަށްފަހު އަލިކަމެކެވެ. މި ދުނިޔެއިން ލިބެނިވި އެންމެ ބޮޑު ނިއުމަތެވެ. ހިދާޔަތް ލިބުމެވެ. އެކަލާނގެ ކުޅަދުންވަންތަކަމާއި، ޤުރުއާނުގެ އަޖައިބު ލޮލައްފެނި އިހްސާސް ވުމެވެ. އޭގައިވާ ތެދުވެރިކަން އިހްސާސްކުރެވުމެވެ. އެއަށްވުރެ ބޮޑު ނިޢުމަތެއް ވަކި ކޮބައި ހެއްޔެވެ؟ ދެދުނިޔެ ބާއްޖަވެރި ކުރުމަށް ތެދުމަގުގައި ފައި ސާބިތު ކުރާނެ އެތައް ހިއްވަރެއް ލިބި އީމާންކަން އިތުރުވުން ނޫންކަމެއް ނުވިއެވެ. ކޮންމެ ދުވަހަކު އެކަމަށް ކިޔެވޭ އެންމެ އާޔަތަކުންވެސް އަހަންނަށް ލިބޭނީ އެތައް ސަވާބެކެވެ. ހެއްދެވިފަރާތާއި ގާތްކަން އިހްސާސްވުމުން ހިތައް ލިބެނީ ބުނެދޭން ނޭނގޭ ހަމަޖެހުމެކެވެ.

ޔަޤީނުންވެސް ދުޝްމަނުންގެ ރޭވުންތައްވީ ބަރުބާދެވެ. ލިބުނު ހިދާޔަތުން ނަސްރު ލިބުނީ އަހަރެންނަށެވެ. އެމީހުންނަށް ފާފައިގެ މައްޗައް އިތުރު ފާފަތަކެއް ކުރުން އިތުރުކުރުން ނޫން އެހެން އެއްޗެއް ނުލިބޭނެއެވެ. އަދި އެމީހުންގެ ބައެއް ސިހުރުތައް އެނބުރި އެމީހުންނަށް ރައްދުވެ އެތައް ވޭނެއްގައި އުޅޭތަން އަހަރެން ދެކުނީމެވެ. މުޅިންވެސް ﷲގެ ކުޅަދުންވަންތަކަމެވެ. ކާމިޔާބުލިބޭނީ އެކަލާނގެ އެންގެވި މަގުގައި ސާބިތުވެގެންކަން އަންގަވާފައި ވެއެވެ. އަހަރެންގެ ދުޢާ އަކީ މިފަދަ އިމްތިޙާންތަކާއި ކުރިމަތިލާން ޖެހިފައިވާ އެންމެންނަށް ﷲ ކެތްތެރިކަން ދެއްވުމެވެ. އަދި އަހަރެންގެ މިވާހަކައިން އެ އެންމެނަށް އިތުރު ހިއްވަރެއް ލިބުމެވެ.

**ނިމުނީ**