ކުރިން އެނގުނުނަމަ (ފަންސަވީސްވަނަ ބައި)

ބޮލުގައި މާގަދައަށް ރިއްސަން ފެށުމުން އިޔާން ބޭނުންވީ ގެއަށް ގޮސް ނިދާލުމަށެވެ. މޭޒުމަތީގައި އޮތް ފޮޓޯ ގަނޑާއި ނޯޓްފޮތް ލެޕްޓޮޕް ދަބަހުގެ ތެރެއަށް ލަމުން ދަބަސް ނަގައި ކޮނޑުގައި އަޅުވާލިއެވެ. ފޯނުނަގައި ޖީބަށް ލަމުން ހިނގައިގަތީ އޮފީހުން ނިކުންނާށެވެ. ދޮރު ހުޅުވާލުވާ ލުމަށްފަހު އެޅި ފުރަތަމަ ފިޔަވަޅާއެކީ އެތެރެއަށް ވަންނަން އައިސް ހުރި ޔޫންގެ ގައިގާ ޖެހިއްޖެއެވެ. ވެއްޓެންދިޔަ ޔޫންއަށް ތޫލި އަޑަކުން ހަޅޭލަވައި ގަނެވުނެވެ.  އިޔާން ހުށިޔާރު ކަމާއެކީ ޔޫން ވެއްޓުނަ ނުދީ ސަލާމަތް ކުރިކަމުގައި ވިޔަސް ފައިލު ތަކުގައި ހުރި ގަނޑުތައް ވައިގެ ތެރޭގައި ބުރަބުރައިގެން ހިނގައްޖެއެވެ. އިޔާންގެ މޭގައި ޖެހިފައިވާ މޫނު ދުރުކޮށްލަމުން ޔޫން އިޔާންގެ މޫނަށް ބަލާލިއެވެ. އެހަށިގަނޑުން ދޮވަމުންދާ މީރުވަހުން ޔޫންގެ ހިތާއި މުޅިހަށިގަނޑަށް އެކަމުގެ އަސަރުތައް ކުރުވަމުން ދިޔައެވެ. ހިތުގެ ވިންދު އާދަޔާ ހިލާފަށް އަވަސްވެގެން ދިޔައެވެ. ޔޫންގެ އަތުގައި ހިފަހައްޓާލާފައިވާ އަތް ދޫކޮށްލަމުން އިޔާން ދުރަށް ޖެހިލަން އުޅުނެވެ. ނަމަވެސް ޔޫންއަށް އަދިވެސް ހުރީ ގަމީހުގައި ހިފެހެއްޓިފައި ކަމަށްވުމުން އިޔާންއަށް ދުރަކަށް ނުޖެހެވުނެވެ. ޔޫންގެ ކޮނޑުގައި ހިފާ ދުރުކޮށްލަން އުޅުމުން ތެޅިގެންފައި ޔޫންވެސް ދުރަށްޖެހިލިއެވެ. ޔޫންގެ ދޮން މޫނަށް ވެރިވެފައިވާ ލަދުވެތި ކަމުގެ އަސަރުތަކުން މަޑު ފިޔާތޮށި ކުލައެއް ވެރިވެފައިވެއެވެ. ޔޫންއައީ ފައިލުގެ ގަނޑުތަކަށް ބަލަމުން ކަމުން އިޔާން ނިކުމެގެން އައިތަން ނުފެނުނީއެވެ. އިޔާންއަށްވެސް ބަލަން ވާވަރަށް ނުބެލުނީއެވެ. ޔޫން އަވަސް އަވަހަށް ގަނޑުތައް ނަގަން ފެށިއެވެ. އިޔާންވެސް ގުދުވަމުން ގަނޑުތައް ނަގައިދެވޭތޯ މަސައްކަތް ކުރިއެވެ. ނަމަވެސް ގުދުވުމާއެކީ ބޮލުގައި ރިއްސަންފެށީ މާގަދަޔަށެވެ. ބޮލުގައި އެއްއަތުން ހިފަހައްޓަމުން ތެދުވެ ހިންދެމިލެވޭތޯ މަސައްކަތްކުރިއެވެ. މަންޒަރު ފުސްވާން ފެށުމާއެކީ އިޔާންގެ އަގައިން ވޭނީ އާހެއްގެ އަޑު ބޭރުވެގެން ދިޔައެވެ. ޔޫންއަށް ބަލާލެވުނު އިރު އިޔާން ބޮލުގައި ހިފަހައްޓައިގެން ހުރިތަން ފެނުމުން ކޮންމެވެސް ގޯހެއްވެއްޖެޔޭ ހިތްބުނަން ފެށިއެވެ.

“ސަރ އާ ޔޫ އޯލްރައިޓް؟” އިޔާންގެ އަތުގައި ހިފަހައްޓާލަމުން ޔޫންއަށް އަހާލެވުނެވެ. އިޔާންއަށް ވާހަކައެއް ނުދެއްކުނެވެ. ކެބިންނާއި ދިމާއަށް އިޝާރާތް ކޮށްލުމުން ޔޫންއަށް އޭނާ ބޭނުންވަނީ އެތެރެއަށް ދާންކަން ވިސްނިއްޖެއެވެ. އަދި ޔޫންގެ އެހީތެރިކަމާއެކީ އިޔާންއަށް ގޮސް ގޮނޑީގައި އިށީދެލިއެވެ.ދެލޯމެރިފައި އިން އިޔާން ފެނިފައި ޔޫންގެ ހިތަށް ނޭނގޭ ބިރުވެރިކަމެއް ވެރިވެގަތެވެ. ތައްޓަށް ފެން އެޅުމަށްފަހު ފެންފޮދެއް ބޯންދެވޭތޯ ކުރި މަސައްކަތް ކޮންމެވެސް ވަރަކަށް ކާމިޔާބު ވިއެވެ. އަތަށް ފެން ފޮދެއް އެޅުމަށްފަހު މޫނުގައި ފެންހާކާލިތާ ފަސްވަރަކަށް މިނިޓް ތެރޭގައި އިޔާން ލޯހުޅުވާލިއެވެ. ގަމީހަށް އެޅުނު ފެންތައް ޓިޝޫއަކުން ފުހެދޭން ހުރި ޔޫން އިޔާންއަށް ފެނުނީ ޒީކްގެ ސިފާގައެވެ. ލޯމަރާލަމުން ޔޫންގެ އުނަގަނޑުގައި އިޔާންގެ ދެއަތް އަޅުވާލިއެވެ. ޔޫން ސިއްސައިގެން ދިޔަލެއް ބޮޑުކަމުން ދުރަށް ޖެހިލަންވެސް މަސައްކަތް ކުރިއެވެ. ނަމަވެސް އިޔާންގެ ސިކުނޑީގައި ހިނގަމުންދަނީ ހިޔާލުތައް މާވަރުގަދައެވެ. ޔޫންގެ ބުރަކަށީގައި އިޔާންގެ އަތުން ފިރުމަމުން ދިޔައެވެ. ޔޫންވެސް މަޑުމަޑުން އިޔާންގެ ކޮންމެ އެދުމަކަށް އިޖާބަދެމުން ދިޔައެވެ.

ނިތްކުރި މަތީގައި އަތްބާއްވައި ލައިގެން އެނދުމަތީގައި ރުއާން އޮތެވެ. ފުލް ސްޕީޑް ގައި އެނބުރެމުން ދިޔަ ފަންކާއިން ޖެހެމުން ދިޔަ ވައިން އެހެއްވެސް ފިނީގެ އަސަރެއް ނުކުރާކަހަލައެވެ. މޫނުމަތި ވިދަމުން ދިޔައީ ދާތިކިތަކުންނެވެ. ފޯން ރިންގ ވާން ފެށުމާއެކީ ރުއާން ފޯނަށް ބަލާލިއެވެ. ނީލާ ގުޅަން ފަށައިފިނަމަ ނަގަންދެން ހުއްޓާނުލައި ގުޅާނެކަން އެނގުމުން ތެދުވެ ހަމަޖެހިލަމުން ފޯނުނެގިއެވެ.

“ގުޅާވެސް ނުލައި ކީއްތަ ތިރަށުގައި ތިކުރަނީ” ނީލާ ޝަކުވާ ކުރިއެވެ.

“ނީލް އަހަރެން ވާހަކައެއް ބުނެފިއްޔާ ރުޅި އަންނާނަންތަ؟” ރުއާންގެ އަޑުގައިވާ ހިތާމަވެރިކަމާއި ނުތަނަވަސްކަން ފާޅުނުކޮށްވޭތޯ ރުއާން މަސައްކަތް ކުރިއެވެ.

“ނޫން އަހަރެންނަށް ދުވަހަކުވެސް ރުއާންދެކެ ރުޅިއެއް ނާދެވޭނެ. އައި ލަވް ޔޫ ސޯ މަޗް” ނީލާގެ ވާހަކައިން ރުއާންއަށް ކޮންމެވެސް  ވަރެއްގެ ހަމަޖެހުމެއް ލިބުނެވެ. އަދި މިއަދާ ހަމައަށް އައިއިރު ޒީކްއާއި ދޭތެރޭގައި ކަންތައްތައް ކުރެވުނު ގޮތް ކިޔައި ދިނެއެވެ. އަދި ޒީކްގެ ކުށެއް ނެތްކަމާއި އެކަންތައް ކުރެވުނީ އަލްޔަން ގިނައަދަދެއްގެ ފައިސާ ދިނުމުން ކަމަށެވެ. އެންމެ ފުރަތަމަ ނީލާއާއި ރައްޓެހިވީ ވެސް ލޯބިވެގެން ނޫން ކަމަށާއި ޒީކްއަށް ދެރައެއްދެވޭނީ ނީލްވެސް ޒީކްއާއި ދުރުކޮށްގެން ކަމަށް ވާތީއެވެ. ނަމަވެސް މިހާރު ނީލްއާއި ދުރުގައި އެންމެ ހިނދުކޮޅަކުވެސް ހުރުމަކީ ނުވާނެ ކަމެވެ. އަލްޔަން ފުރަތަމަ ބޭނުންވީ ޒީކްއަށް ކެތްނުވާވަރަށް އެކިކަހަލަ ކަންތައްތައް ކޮށް އެގެއިން ފޮނުވާލާށެވެ. ނަމަވެސް އެންމެ ފަހު ވަގުތު އަލްޔަންގެ ހިތް ބަދަލުވެ ޒީކްދެކެ އިންތިހާއަށް ލޯބިވެވުނީއެވެ. އަދި މިއަދު އެއީ ރުއާންގެ ކޮއްކޮކަން އެނގުނު ކަމަށާއި އެކަމުން ބަޔާން ކުރަންދަތި ހިތާމައެއް ލިބިފައިވާ ކަމަށްވެސް ކިޔައިދިނެވެ. ކޮއްކޮއާއި ކުރިމަތި ލާނެ ގޮތެއްވެސް ނުވިސްނުނު ކަމަށާއި ކުރިމަތިލާން ލަދުގަންނަ ކަމަށެވެ. ރުއާންއަށް ހުރިހާ ކަމެއް ކިޔައި ދެވުނީ ވަރަށް ގިނައިރުންނެވެ. ހިތަށް ކުރަމުންދާ އަސަރުން ވާހަކަ ދެއްކުމަށް ދަތިވަނީއެވެ.

“ޒީކްގެ ކިބައިން މާފަށް އެދޭ” ހުރިހާ ވާހަކައެއް ކިޔައިދިނުމުން ނީލާ ބުނެލިއެވެ.

“ނީލް އަހަރެންނަށް އެނގޭ މިކުރެވުނީ ކުށެއްކަން. . . ނީލްދެކެ އަހަރެން ވަރަށް ލޯބިވޭ” ރުއާންގެ އަޑު ނުކުތީ ވަރަށް އުނދަގުލުންނެވެ.

“އަހަރެންދެކެ ލޯބިވަންޏާ ޒީކް ގޮވައިގެން އަހަރެންގެ ކުރި މައްޗަށް އާދޭ” އެހެން ބުނުމަށްފަހު ނީލާ ފޯނު ކަނޑާ ލިއެވެ. ރުއާންއަށް އިނދެވުނީއެވެ. ހަދާނެ ގޮތެއް ނޭގިފައެވެ.

ހަވީރުގެ ވަގުތެވެ. ރުއާން ތައްޔާރުވަމުން ދިޔައީ ޒީކް ކައިރިއަށް ދިޔުމަށެވެ. ރުއާން އެއީ ޒީކްގެ ބޭބެއެއް ކަމަށް ގަބޫލުނުކުރިޔަސް އޭނާ މިއަދު ޒީކްއަށް ހަގީގަތް އަންގަ ދޭނެއެވެ. ޒީކް ބޭނުން ކޮންމެ ކަމެއް ކޮށްދިނުމުގައި އޭނާ ފަސްޖެހޭކަށް ބޭނުމެއް ނުވެއެވެ. ބޭބެއެއްގެ ވާޖިބުތައް އަދާކޮށްދިނުމުގައި އަލުން ފެއިލް ވާކަށް ރުއާން ބޭނުމެއްނުވެއެވެ. މާމައާއި ބައްދަލުކޮށް އެތަކެއް ސުވާލުތަކެއްގެ ޖަވާބު ހޯދަން ބޭނުންވެއެވެ. ކޮއްކޮ އޭނާއާއި އެކުގައި އެހެން ބައެއްގެ އަތް މައްޗަށް ދޫނުކޮށްލީ ކީއްވެގެންތޯ ބަލަން ބޭނުންވެއެވެ. އެހެން ނޫންނަމަ މިއަދު ޒީކް އުޅެމުންދާ ހިތްދަތި ދިރިއުޅުން ޒީކްއަށް ނުލިބުނީސްކަން ކަށަވަރެވެ.

ރުއާން ސައިކަލުގައި ގޮސް ވިޔަވަތި ގޭގެ ކައިރިއަށް މަޑުކޮށްލިއެވެ. ގޯތިތެރެއަށް އެޅި ފުރަތަމަ ފިޔަވަޅާއެކު އަމިއްލަ ވަންތަކަން އިހްސާސް ކުރެވުނެވެ. ސަލާމް ގޮވާލަމުން ގޭގެ ދޮރު ކައިރީގައި މަޑުކޮށްލީ ރުއާންއަށް ހުރިހާ ކަމެއް އެނގުނަސް އެހެން މީހުންގެ ހިތުގައި އުފެދިދާނެ ސުވާލުތަކަށް ވިސްނާފައެވެ. ދެފަހަރަކު ސަލާމް ގޮވާލި އިރަށް ހަފީޒާ އަންނަތަން ރުއާންއަށް ފެނިއްޖެއެވެ.

“ކީއްކުރާ ކުއްޖެއް؟” ހަފީޒާ ރުއާންއަށް ބަލާލަމުން ބުނެލިއެވެ.

“މީ . . . ޒީކް އެބަ އުޅޭތަ؟” ރުއާންއަށް އަހާލެވުނެވެ.

“ބޭރަށް ގޮސްވީ . . މިހާރު އަންނާނެ ކަންނޭގެ” ހަފީޒާއަށް އަދިވެސް ހުރެވުނީ ރުއާންގެ މޫނަށް ބަލަހައްޓައިގެންނެވެ. ދަންނަ މީހަކާ ވައްތަރުވީ ކަމަށް ވެދާނެއެވެ.

“ތީ މިރަށު ކުއްޖެއްތަ؟ ކޮންގެއަކު ކުއްޖެއް؟” ހަފީޒާ އަހާލިއެވެ.

“މާމާ” ރުއާންގެ ކެތްތެރިކަން ކޮޅުންލީ އެހިސާބުންނެވެ. ރޮއިގަންނަމުން ހަފީޒާގެ ގައިގާ ބައްދައިގަތެވެ. ހަފީޒާއަކަށް އެއްވެސް އެއްޗެއް ނުބުނެވުނެވެ. ރުއާންގެ މޫނަށް ބަލަހައްޓައިގެން ހުރެވުނީއެވެ.

“ތީ މާމަގެ ދަރިފުޅު ރުއާންތަ؟” ހަފީޒާއަށް އަދިވެސް ގަބޫލުކުރަން ދަތި ވަނީއެވެ.

“އާނ! މީ މާމަގެ ރުއާން. . . މިހިރީ މާމަ ކައިރިއަށް އައިސް” ރުއާން ލޮލުން އައިސްފައިވާ އުފާވެރި ކަމުގެ ކަރުނަތައް ފޮހެލަމުން ބުނެލިއެވެ.

“ދަރިފުޅަށް ކޮއްކޮ އެނގޭތަ؟” ހަފީޒާ ކުއްލިއަކަށް އެއްޗެއް ހަނދާންވާ ފަދައަކުން ބުނެލިއެވެ.

“ހޫމް އެނގޭ. . . އެކަމަކު ކޮއްކޮ ކައިރީގައި އަދި ނުބުނައްޗޭ އަހަރެން އައި ވާހަކަ” ރުއާން މާމަގެ ދެއަތުގައި ހިފާލަމުން ބުނެލިއެވެ.

“އެއީ . . . . އޭރުން ޒީކް ވަރަށް އުފާވާނެ” ހަފީޒާ ހައިރާންވެފައި ބުނެލިއެވެ.

“ކޮއްކޮއަށް ސަޕްރައިޒެއް ދޭނީ. އޭރުން އަދި މާ އުފާވާނެ” ރުއާން ހިނިތުންވެލަމުން ބުނެލިއެވެ.

“މާމާ ދެން ދަނީ ފަހުން އަންނާނަން” ރުއާން މާމަގެ އަތުން ދޫކޮށްލަމުން ބުނެލިއެވެ.

ހަފީޒާއަށް ބަލަހައްޓައިގެން ހުރެވުނީއެވެ. ނުދާށޭ ބުނަން އޭނާ ނުހަނު ބޭނުންވެއެވެ. ނަމަވެސް މީގެ އެތަކެއް އަހަރު ކުރިން އެހެން މީހަކާ ރުއާން ހަވާލުކުރީ އޭނާގެ ދެއަތުންނެވެ. މިއަދު އޭނާއަށް އެހެން ބުނާކަށް އެއްވެސް ހައްގެއް ނެތޭ ހިތަށް އަރަމުންދިޔައެވެ. ނަމަވެސް ރުއާންގެ ނަސީބާ ދޭތެރޭ ވިސްނާލުމަށްފަހު ހިތްހަމަޖައްސާލިއެވެ. އެފަދަ ރަނގަޅު ދިރިއުޅުމެއް އޭނާގެ ގާތުގައި ހުރިނަމަ ރުއާންއަށް ނުލިބުނީސްކަން ކަށަވަރެވެ.