ނޭނގި ހިތޭ ތި އަތުލީ 28

އިވިގެން ދިޔަ ޤަބޫލްކުރަން ދަތި ހަޤީޤަތާއެކު އެކަކު އަނެކަކުގެ މޫނަން ބަލާލިއެވެ. ވާންވީ އުފާކަމެއް ނުވަތަ ދެރަކަމެއްވެސް ނޭނގޭ ކަހަލައެވެ. ދެމީހުންވެސް ތިބީ ހައިރާންވެފައެވެ. އެތަށް އަހަރެން ވެގެން ދިޔައިރު އެ ހަޤީޤަތް ނުބުނެ ސިއްރުކުރުމުން ދެމީހުންވެސް ތިބީ ހިސާބަކަށް ހިތްހަމަނުޖެހިފައެވެ. “ބައްޕައަށް މާފް ކުރާނެކަމަށް އުއްމީދުކުރަން” “އަހަރެން މާފްކޮށްފިން، ވަރަށް އުފާވެއްޖެ ކޮއްކޮއެއް ލިބުމުން..” މަލާކް ބުނެލިއެވެ. ނިއަމްވެސް ކަންތަން ކުރީ ހަމަ އެފަދައިން ނެވެ. ދެމީހުން އެކަކު އަނެކަކު ގައިގައި ކުޑަކޮށް ބައްދާލާ ހަދާލިއެވެ.

ކުރަށްހުރި ސުވާލު ކިތައްމެ ގިނަ ނަމަވެސް ދެމީހުންވެސް އެވަގުތު އިތުރު ސުވާލެއް ނުކުރެއެވެ. ޝަރީފް އަމިއްލައަށް ފެނިގެން ކިޔާދެންދެން އިންތިޒާރުގައި ތިބީ ކަމަށްވެސް ވެދާނެއެވެ. ނަމަވެސް ޝަރީފް އިތުރަށް އޭނަގެ މާޒީ ކިޔާދޭ ޚިޔާލެއް ނުކުރިއެވެ. ބަދަލުގައި ދައްކަން ފެށީ އޭނަގެ ވިޔަފާރި ތަކުގެ ވާހަކައެވެ. ހުރިހާ ވިޔަފާރިއެއްގައިވެސް ނިއަމްއެކޭ އެއްވަރުގެ ހިއްސާއެއް މަލާކަށް ވެސް އޮންނާނެކަމުގައި ބުނެލިއެވެ. އަދި ގެއަށް ދިރިއުޅެން އައިސްސި ނަމަ އޭނަ ވަރަށް އުފާވާނެކަމަށް ބުނެލިއެވެ. ނިއަމްވެސް އެކަމާ އެއްބަސް ވެލިއެވެ. މަލާކް ބުނީ އެކަމާ ވިސްނާނެކަމުގައެވެ.

ތިންމަސް ފަސް

މަލާކް އުޅެމުން ދިޔައީ މައުވަންގެ ގޭގައެވެ. އަމީނާއަށް މައުވަންގެ ކައިވެނީކެ ކަންތައް އެނގިދާނެތީވެ މަލާކް ބަދަލުވީއެވެ. ދެމީހުންގެ ގުޅުމަކަށް ވަކި ބަދަލެއް ނާދެއެވެ. ރަފާ އާއި މައުވަންގެ ގުޅުންވެސް ހަމަ އެފަދައެވެ.

އަކްޔަންއާއި އަލާ ކައިވެނި ކޮށްގެން ބޭރަށް ދިޔަގޮތަށް އަދި ނާދެއެވެ. ނަމަވެސް ދެކުދިން އުޅެންދަނީ ނުލާހިކު އުފާވެރި ކޮށެވެ.

އަމީނާގެ ކިބައިން މާފަށް އެދެވުނު އަދަދެއް ޝަރީފަކަށް ނޭނގެއެވެ. އަދިވެސް މާފްކުރާ ޚިޔާލެއް ނުކުރެއެވެ. ޝާރީފް އަމީނާއާއި ކައިވެނި ކުރަން ބޭނުން ވާކަމާއި އަދިވެސް ދެގޮތެއްނުވެ އޭނަގެ ހިތުގައި ވަނީ އަމީނާކަން ހާމަކުރިއެވެ. އެވަރުންވެސް ގޮތްދޫކުރާ ޚިޔާލެއް އޭނަގެ ނެތެވެ. ޝަރީފް އާދޭސް ކުރުން ހުއްޓާނުލީ މަލާކް ދޭ ހިތްވަރުންނެވެ. މަލާކް ބުނާ ގޮތުންނަމަ އަމީނާގެ ހިތުގައި ޝަރީފަށްޓަކައި އަދިވެސް ލޯބިވެއެވެ. އަމީނާ އެކަމަށް އެއްބަސްވާން ބޭނުން ނުވަނީއެވެ.

އާދައިގެ މަތީން މަލާކް ދިޔައީ އޭނަގެ ޕޭޝަންޓަކް އެޑްމިޓްކޮއްފައިވާތީވެ ކުޑަކުދިންގެ ވޯޑަށެވެ. އެކަން ނިންމާލާފައި އޭނަގެ ރޫމަށް ވަންނަ ދިޔަމަގު މަތީގައި މަޑުކޮއްލަން ޖެހުނީ އޭނަގެ ރައްޓެއްސަކާ ދިމާވީމައެވެ. އޭނަ އުޅެނީ ރިޕޯޓެއް ނަގަން އައިސް ކަމުން މަލާކްވެސް އޭނަޔާއެކު ދިޔައީ އެދިމާލަށެވެ. ރިޕޯޓްނަގަން އެކުވެރިއާ އެތެރައަށް ވަތް ވަގުތު އެތަނުން ނުކުމެގެން އައީ ރަފާއާއި އޭނަގެ އެކުވެރި އެހެން އަންހެން ކުއްޖެކެވެ. ރަފާއަށް މަލާކްގެ މޫނު ފެންނަން ވާއިރަށް އަނެއްފަރާތަށް މަލާކް އެބުރުނީ ރަފާ އެއްޗެއް ބުނެފާނެތީއެވެ. ރަފާ ހުންނަނީ އަބަދުވެސް ކޮންމެސް އެއްޗެކޭ ކިޔާ މަލާކަށް ކެއްސުމެއް ކޮށްލާހިތުންނެވެ. “ކޮންގްރާ އިނގޭ….ދެން އެކަމު ދަރިއަކު ލިބުނީމަ އަހަރެމެންނާއެކު އެންޖޯއި ކޮށްލާނެ ވަގުތެއްވެސް ނުވާނެ ދޯ..” އެވަގުތު  ރަފާގެ އެކުވެރިއާ ބުނެލި ޖުމްލަ ކިތައްމެ ރީއްޗަކަށްވެސް މަލާކަށް އިވުނެވެ. މަލާކްހުރީ ހައިރާންވެ އިންތިހާއަށް ދެރަވެސް ވެފައެވެ. މައުވަން އުޅޭގޮތުން އޭނަޔަށް ހީވެފައި ވަނީ ރަފާދެކެ ލޯބިނުވާހެންނެވެ. އެހެން ނަމަވެސް ކުރެވުނީ ކުށްހީއެއްކަން މި އެނގުނީއެވެ. މައުވަންއާއި ރަފާގެ ދިރިއުޅުމުގައި ކުރިފަޅައިގެން ދަނީއެވެ. އޭނަ މިހިރީ ބާކީވެފައެވެ. މައުވަންއާއި އިނދެގެން މިހާދުވަހު އުޅެވުނީވެސް އޭނަގެ މޮޔަކަމުންނޭ އެވަގުތު މަލާކްގެ ހިތަށް އެރިއެވެ. އޭނައަށް މައުވަން އޭނަދެކެ ލޯބިވާކަމަށް ހީކުރެނީ ކީއްވެބާއޭވެ؟ އެ ދެލޮލުން އޭނައަށް އެދި ގޮވާހެން ހީވަނީ ކީޢްވެބާއެވެ؟ ވެދާނެއެވެ. އޭނަ މައުވަންދެކެ ލޯބި ވާތީ ހައްތަހާވެސް ހީވާހީވުން ކަންނޭގެއެވެ. މިފަދަ ޚިޔާލްތަކެއް މަލާކްގެ ސިނކުޑީގައި އެބުރެމުން ދިޔައެވެ.  އަދި އޭނަގެ އެކުވެރިއާ އަންނަންދެންވެސް މަޑުނުކޮށް މަލާކް ދިޔައީއެވެ. އޭރުވެސް ނުރޯން އުޅުނެއް ކަމަކު މަލާކްގެ ލޮލުން ކަރުނަ އާދެއެވެ.

މަލާކް ޑިއުޓީ ނިންމާލާފައި ދިޔައީ އަމީނާގެ ގާތަށެވެ. އަދި އެގެއިން ހަވީރު ސައި ބޮއެހަދައިގެން ގެއަށް ދިޔައީ އިރުއޮއްސުނު ފަހުންނެވެ. ގެއަށް ވަތްއިރު ނަސީބަކުން އެއްވެސް މީހަކާ ދިމާނުވެ ކޮޓަރިއާހަމައަށް ދެވުނެވެ. ދެންގޮސް ފާޚާނާއަށް ވަދެ ފެންވަރައިގެން ނުކުމެ އިޝާނަމާދު ކޮށްލިއެވެ. ދެން ގޮސް އެނދުގައި އޮށޯތްތަނާ ގުޅީ އޭނަގެ ބައްޕައެވެ. ރޭގަނޑުގެ ކައުމަށް ދައުވަތު ދިނުމަށެވެ. މަލާކް އިންކާރު ކުރީ އޭނަގެ މޫޑް މިރޭ ރަނގަޅު ނޫންވީމައެވެ. އެފޯން ނިންމާލިތަނާ ދޮރުހުޅުވާފައި ބޯދިއްކޮށްލީ މައުވަންއެވެ. އޭނަވެސް އެދުނީ ކާން އައުމަށެވެ. މަލާކް ބުނެލީ ދެންމެ މިއައީ ސައިބޮއެގެން ކަމުގައެވެ. އެހެންވެ މިރޭ ނުކާނެކަމުގައެވެ.

މަލާކްގެ ޖަވާބު އިވުމުން ދާންނޫޅެ މައުވަން ވަނީ އެތެރެއަށެވެ. “އެހެންވީރު މިރޭ އަހަންނާއެކު ދާންވީނު ބޭރަށް ޑިނަރއަކަށް؟” މައުވަން ވަދެ ކޮޓަރީގެ ދޮރު ލައްޕާލަމުން ބުނެލިއެވެ. “އެއީ ކޮންކަމެއް ސެލެބްރޭޓް ކުރަންށޯ” މަލާކް އަހާލިއެވެ. އޭރު އޭނަގެ ހިތުގައި ވަނީ ރަފާއެވެ. ބޭނުންވީ މައުވަންގެ ދުލުން އެ ހަޤީޤަތް އޭނައާއި ހިއްސާކުރޭތޯ ބަލާށެވެ. ” ވަކި ކަމެއް ނޫން… ނުދަމެއްނު އަހަންނާއެކު ބޭރަށް ކާކަށް… އެހެންވެ ދެން މިރޭ ގޮސްލަން ކަމަށް ” މައުވަން ބުނެލިއެވެ.

“ބޭރަށް ކާންދާކަށް އެހެން ނޫނަސް ނުބުނަމެއްނު…ދެން މިރޭ ވަކި ކީޢްވެހޭ ތިބުނީ…”

“ތަފާތު ކޮށްލަންވެގެން” ބުނާނެ ވަކި އެއްޗެއް ނޭނގުމުން އިރުކޮޅެއްގެ ހިމޭންކަމަށް ފަހު މައުވަން ވާހަކަ ދެއްކިއެވެ.

“މިރޭ އަހަރެން ގޮވައިގެން ކޮންމެހެން ބޭރަށް ކާން ދިއުމަށް ވުރެ ރަނގަޅު ވަނީ ރަފާ ގޮވައިގެން ދިޔައްޔާ ކަންނޭނގެ” އެތަށް ދުވަހަކަށްފަހު މަލާކްގެ އަނގައިން ރަފާގެ ނަން ބޭރުވުމުން މައުވަންގެ ނިންތަށް ރޫއަރައިގެން ދިޔައެވެ. މަލާކް މައުވަންގެ ގެއަށް އައިފަހުން އެއްވެސް ވަރަކަށް ރަފާގެ ވާހަކަ އެއްނުދައްކައެވެ. އެހެންވެ މިރޭ ކުއްލިއަކަށް ރަފާގެ ވާހަކަ ދެއްކުމުން އޭނަ ހައިރާންވެ މޫޑްވެސް ސަކަރާތްވިއެވެ.  އަދި އިތުރަށް ވާހަކަ ދައްކާކަށް ނުހެދިއެވެ.

ޖެހިގެން އައި ދުވަހު ހެނދުނު މަލާކް ހެނދުނު ސައިބޯން ދިޔައިތު ކާގޭގައި އުޅެނީ ހަމައެކަނި ރަފާ އާއި މައުވަންއެވެ. އެހެންކަމުން މަލާކް މަޑުކުރަން ނުހަދަ މައްޗަށް އެރިއެވެ. ދެން ނިކުމެގެން ދިޔައީބޭރަށެވެ. ދެމީހުންގެވެސް އޮފް ދުވަސްކަމުން ޑިއުޓީއެއް ނެތެވެ.

މަލާކް އެ ދިޔަތަނަކަށް ގޮސް އައި އިރު މައުވަން ކޮޓަރީގައި އިނެވެ. އަދި ސައިނުބޮއީ ކީއްވެތޯއަހާލިއެވެ. މައުވަން ކުރި ސުވާލުގެ ޖަވާބު ދިނުމުގެ ބަދަލުގައި މަލާކް ބުނެލީ އޭނަ ވަރަށް ބޮޑު ވާހަކަ އެއްދައްކަން ބޭނުންކަމުގައެވެ. އޭރު މައުވަން އިނީ ސޯފާގައި އިށީދެގެންނެވެ. މަލާކްވެސް ގޮސް މައުވަންއާއި ޖެހިގެން އިށީނެވެ. ދެން ދިޔައީ އިރުކޮޅެއްގެ ހިމޭންކަމެކެވެ. ވާހަކަ ފަށާނެ ގޮތެއް މަލާކް އުޅުނީ ނޭނގެ ގެންނެވެ. އޭނަ އިނީ އިސްޖަހައިގެން ދެއަތް ދެއަތާ މޮޑެލަ މޮޑެލައެވެ. “ކިޔާބަލަ؟” މައުވަން ބުނެލިއެވެ. ދައްކަން އުޅޭވާހަކަ އެއްވެސް ވަރަކަށް އަންދާޒާ ކޮއްލެވިފައި ނުވާތީ މައުވަން އިނީ ހަމަޖެހިފައެވެ. “އަހަރެން ބޭނުން ވަރިވާން” ވާހަކަ ފަށާނެ އިތުރު ގޮތެއް ނޭނގިގެން މަލާކް ސީދާ ބޭނުންވާ ގޮތް ހާމަކޮއްލިއެވެ. އެޔާއެކު “ކީކޭ” އޭބުނެ މައުވަންއަށް އިންތަނުން ތެދުވެވުނެވެ. “ތި އިވުނީ ރަނގަޅަށް” މަލާކް ޔަޤީން ކޮއްލަދިނެވެ.

“ކީއްވެ ކުއްލިއަކަށް” ހަމަޖެހެން މަސައްކަތް ކުރަމުންމައުވަން އެހިއެވެ. އެކަމަކު އަޑުގައިވަނީ މާޔޫސްކަމެވެ.

“ވީ ބޯތް ނޯ މިހާދުވަސް ވީއިރުވެސް މި އުޅުނީ ހަޒްބެންޑް އެންޑް ވައިފް ގޮތަކަށް ނޫން. އައި ތިންކް ނޮޓް އީވަން ފްރެންޑްސް. ކައިވެނީގެ ކުރިންވެސް މައުވަން ދެއްކި ވާހަކަތައް ހަނދާންއެބަހުރި… އެކަމަކުވެސް އަހަރެން ހުރީ މައުވަންއާއެކީ ރީތި ދިރިއުޅުމެއް އުޅެވޭތޯ… ނުވާނެކަމެއްކަން އިނގޭ އިރުވެސް މިހާ ދުވަހު އިނދެގެން މިއުޅެވުނީވެސް އަހަރެންގެ މޮޔަކަމުން…. ދެން އިތުރަށް އަހަރެންގެ ލައިފްގެ ދުވަސްތަށް ބޭކާރު ކޮށްލާކަށް ނެތީން….އަދި މައުވަން އާއި ރަފާގެ ތި ދިރިއުޅުމަށް އެޅޭހުރަކަށްވެސް ވާކަށް ނެތީން…. ވަރަށް ދުވަހު މައުވަންއަށް އުނދަގޫ ކުރެވިއްޖެ…. ވަރަށް ބޮޑަށް ސޮރީ….” ވާހަކަ ދެއްކި އިރު ކިތައްމެ ހިތްވަރު ކުރިއެއްކަމަކު އެ އަޑުން މަލާކް ދެރަވެފައިވާކަން އެނގުނެވެ.

“އަހަންނަން އިނގޭ މަލާކް އާދޭތެރޭ ކަންތަން ކުރެވުނީ ވަރަށް ގޯސްކޮންކަން…އެކަމާ އަހަރެން ދެރަވޭ….ވަރަށް ބޮޑަށް ދެރަވޭ….އެދުވަސް ތައް އަހަންނަން އަނބުރާ ނުގެނެވޭނެ…އަހަރެން ބޭނުން އޭގެ ބަދަލުގައި މަލާކަށް އުފާވެރި ދިރިއުޅުމެއް ހޯދަދޭން…ގެއްލި ދިޔަސް ދުވަސްތަކުގެ ބަދަލުގައި އާހަޔާތެއް ހޯދަދޭން ބޭނުން…”

އެކަކު އަނެކަކު ދެކެ ލޯބިވިއެއް ކަމަކު އެކަން ހާމަކުރާކަން މިއަދުވެސް އެކަކަށް ވެސް ނުކެރުނެވެ. ލޯބި މުޅިއުމުރަށް ވަކިވެދާނެ ކަމުގެ ބިރުހީވާންފެށުމުން މައުވަން އިނީ ނުހަނު ދެރަވެފައެވެ.

“ނޫން މައުވަން… ދެން އަޅާނުލާ…އަހަރެންގެ ހިތް މައުވަންއާ ދޭތެރޭ ވަރަށް ސާފު… ދެމީހުން ވެސް ހަޤީޤަތް ޤަބޫލްކުރަންވާނެ… އިނީ މައިން ބަފައިން ބުނެގެން…ބައެއް މީހުންނަން އެގޮތަށް ކުރާ ކައިވެނިތަށްވެސް ވަރަށް ކާމިޔާބު…އެކަމު އަހަރެމެން ދެމީހުންނަން މިވީ އެހެން ގޮތެއް… މައުވަން ވެސް ލޯބި ނުވާމީހަކަށް ހަޔާތުން ޖާގަ ދީގެން ވަރަށް ދުވަހު ކެތްކޮއްފީމެންނު…ދެން އޮތީ އުފާކުރަންވީ ދުވަސްތައް…” އަދި އެހެން ބުނެފައި ވަރިއަށް އެދޭ ފޯމް މަލާކް ދަބަހުން ނެގިއެވެ. އޭރު މަލާކްގެ ލޯވަނީ ކަރުނުން ފުރެފައެވެ. މައުވަން ވެސް އިސްޖަހައިގެން އިދެ ސިއްރުން ލޯފުހެލިއެވެ.

“އަހަންނަކަން މަލާކް ވަރިއެއް ނުކުރެވޭނެ” އިރުކޮޅެއްގެ ހިމޭންކަމަށްފަހު މައުވަން ބުނެލިއެވެ. “ނޫން މައުވަން އަހަރެން ވަރަށް ދުވަހު ކެތްކޮއްފިން…މިކަންތައް އަހަންނަން ކޮއްލަދީ…ޕލީޒް..” މަލާކް އާދޭސް ކުރިއެވެ.

އެޔާއެކު މައުވަން މަލާކް ދެކޯތާފަތްމަތީ ހިފާލާފައި ކޮޅަން ނެގިއެވެ. އަދި އެ ދެލޮލަށް ބަލަން އިރުކޮޅަކު ހުއްޓެވެ. “އައި ލަވް ޔޫ” މައުވަން ހާމަކޮއްލިއެވެ. މަލާކްގެ މޫނުން އެއްވެސް އަސަރެއް ނުފެނުނެވެ. ބަދަލުގައި އޭނަގެ މޫނުން މައުވަންގެ އަތް ނައްޓުވާލިއެވެ.

“އަހަންނަކަށް ނޭނގެ ތީގެ މާނައެއް…އަހަރެން އުއްމީދުކުރަނީ މި ކަންތައް އަހަންނަން ކޮއްދޭނެކަމަށް.. އަދި މައުވަންގެ ތި ކުޑަ އާއިލާއަށް އުފާވެރިކަން އެދެން…” ދެން އޭނަ ނުކުމެގެން ދިޔައީއެވެ.

މައުވަން މާޔޫސް ވިއެވެ. ކޮޓަރި ތެރޭގައި ދެކޮޅަށް ހިނގާލަ ހިނގާލަ އިރުކޮޅަކު ހުއްޓެވެ. ދެން ގޮސް އިށީނީ އެނދުގައެވެ. ދެކަކުލުގައި އުޅަބޮނށި ވިއްދާލައިގެން ދެއަތްތިލަ ދަތްދޮޅީގައި ޖައްސާލައިގެން އިނީ ވިސްނުމަކަށް ގެއްލިފައެވެ.

ބަނޑު ބޮޑުކަން އިނގުމުން ރަފާ އިނީ ހާސްވެފައެވެ. ވިސްނާވިސްނާވެސް ރަނގަޅު ގޮތެއް ނުފެނުނެވެ. ރައްޓެހިންގާތު އެއީ މައުވަންގެ ދަރިއެއް ނޫނޭ ހާމަކުރާކަން ނުކެރުނެވެ. އެހެންކަމުން އެމީހުންގާތު ޚިޔާލެއް ހޯދާލާކަށްވެސް ނުކެރުނެވެ. އަނެއްކޮޅުން އެ ކުއްޖާގެ ބައްޕަ އެކަމާ ވައިވެސް އެޅެން ބޭނުމެއްނޫނެވެ.

މަލާކް އެތަށް ގޮތަކަށް ވިސްނުމަށްފަހު އަމީނާއާއި ހަމައަށް ވަރިވާން އުޅޭކަމުގެ ޚަބަރު ގެންދިޔައެވެ. އެކަން އޭނަ ހާމަކުރީ ޝަރީފްވެސް އިންދައެވެ. މާބޮޑު ތަފްސީލެއް މަލާކް ނުދެއެވެ.ދެމީހުންނަންވެސް ރަނގަޅީ އެގޮތްކަމަށް ފެންނާތީ އެހެން ނިންމީކަމުގައި ބުނެލިއެވެ. އަމީނާމެން ނަސޭހަތްދިނީ ހަނދާންކޮށްދިނީ ކައިވެނީގެ މުހިންމުކަމެވެ. އެއީ ކިހާމާތް ގުޅުމެއްކަމެވެ. ނަމަވެސް ގޮތް ނިންމުމުގެ ފުރުސަތު މަލާކަށް ޝަރީފްމެން ދިނެވެ. ހަޤީގަތުގައި އެހުރިހާ ވާހަކައެއް އެމީހުން ދައްކަން ޖެހުނީ މަލާކް އެދެމީހުންގެ ގުޅުން އޮތްހިސާބު ކިޔައި ނުދިނީމައެވެ.