ލޯބިވަން….(އަށްވަނަބައި)

ޔާނީއަށް ކޭކު ލަވަން އުޅުން މުލައިލް ގެ ގައިން ވަރުދޫވާހެން ހީވިއެވެ. ނަމަވެސް ކެތްކުރަމުން ގެންދިޔައީ އޭނާއަށް ގޮތެއްވެއްޖެނަމަ އެންމެން ހާސްވާނެ ކަން އިނގޭތީއެވެ. ނަމަވެސް މުލައިލްއަކަށް އެކަމެއް ކާމިޔާބެއް ނުވިއެވެ. އެންމެފަހުން އަތުގައި އޮތް ކޭކު ކޮޅާއެކު ހޭނެތިގެން ބިންމައްޗަށް ވެއްޓުނީއެވެ. އެންމެންގެ ސަމާލުކަން ދަމައިގަންނަމުންނެވެ. “މުލައިލްލްލްލްލް…………” އިވިގެން ދިޔައީ ޔުސްރާގެ އަޑެވެ.

ހޮސްޕިޓަލް ކުރިމައްޗަށް މަޑުކޮށްލި އެމްބިއުލާންސުން ބޭޅުމަށްފަހު މުލައިލް ވަގުތުން އަވަސް ފަރުވާ ދޭތަނަށް ވެއްދުނެވެ. ކޯޓެއް ލަމުން ޔުސްރާ އަދި ޝިފާންވެސް އަވސްފަރުވާދޭ ކޮޓަރިއަށް ވަނީ ޔާނީ ގާތު ކެތްތެރި ވުމަށް ބުނެފައެވެ. ނަމަވެސް ހަމްނާގެ ގައިގައި ބައްދައި ގަނެގެން ހުރެ ރޮމުން ދިޔަ ޔާނީއަށް އެއަޑު ނީވޭ ފަދައެވެ. އޭރު ޝާމީލް، ލީނާ، އަދި ލީނާވެސް ހުއްޓެވެ.

އަވަސްފަރުވާދޭ ކޮޓަރީގެ ތެރެ ހަލަބޮލި ވަމުން ދިޔައެވެ. މުލައިލްގެ އަނގައިން ހުދު ފޮނަ ތަކެއް ނިކުންނަމުން ދިޔައިރު މީހާ ދިޔައީ ފިޓު ޖެހެމުންނެވެ. ހާސްވެފައި ތިބެ ޔުސްރާމެން އެމީހުންނަށް މަސައްކަތް ކުރެވޭނެ އެންމެ މަތީދަރަޖައަށް މަސައްކަތް ކުރަމުން ގެންދިޔައެވެ. ކުއްލިއަކަށް މުލައިލްގެ ހަރަކާތް ހުއްޓުނެވެ. އަދި ހިތުގެ ހިނގުން މަޑުވާކަމަށް ކާޑިއެކް މޮނިޓާއިން ދައްކާލިއެވެ. އެވަގުތު އޮކްސިޖަން ގުޅާލުމަށްފަހު ޑެފިބްރިލޭޓާރ ޖައްސާލުމަށްފަހު މުލައިލްގެ ތަނަވަސް މޭމަތީގައި ޖައްސާލިއެވެ. ލޯ މަރާލަމުން ޔުސްރާ ﷲ އަށް ވަކީލުކޮށްލިއެވެ.

ގިނަ އިރު ރުއިމުގެ ސަބަބުން ޔާނީގެ މޫނު ވަނީ ރަތްވެފައެވެ. އޭރުވެސް ހުއްޓުމެއްނެތި އެބޮޑު ދެލޮލޮުން ކަރުނަ ފައިބަމުން ދިޔައިރު ޔާނީއަށް ގިސްލެވެމުން ދިޔައެވެ. އޭރުވެސް ޔާނީ އިނީ ހަމްނާގެ ކޮނޑުގައި ބޯ އަޅާލައިގެނެވެ.

“ތިހާމް. ދެން ނޭންގެ. ރިޕޯޓުތައް ބުނާ ގޮތުން އެ ކޭކު ކޭމަ އެހެން ވީ. އެޔަށް ހުރީ ރައިސިން އަޅާފަ. ގައިމު ތިހާމް މެންނަކަށް ނޯޅޭނެ އެއީ ކިހާ ބާރުގަދަ ވިހައެއް ކަމެއް. އޭގެ އެންމެ ގުޅަ އަކުންވެސް މީހަކު މަރާލާނެ. އަހަރެމެންނަށް ފަރުވާ ދެވުނުލެއް އަވަސް ކަމުން ސަލާމަތް ވީ. އަދިވެސްއެފަކީރު ހޭ ނާރާ. އަހަރެން ކީކޭތަ ޔާނީ ގާތު ބުނާނީ؟ ރުއާ އެމީހުން މަރަން ފެންބޮވައި ގަނެގެން އުޅޭ ވާހަކަތަ؟ ލާނީމެންގެ މާޒީ ކިޔާދޭންވީތަ؟؟!! ޑެމްއިޓް ތިހާމް. އޭނަ ހޯދަބަލަ. ހެޔޮނުވާނެ. ޔުސް މެން ތެޅުނު ގޮތަށް ދެން ތިބި ދެކުދިން ތެޅޭތަން ދެކޭކަށް ކެތެއް ނުވާނެ. ” ޝިފާންއަށް ރޮވުނެވެ. މީ ކޮންފަދަ ތަގުދީރެއް ހެއްޔެވެ؟ ގައިމު އެމީހުން ހީކުރީ ހުރިހާ ކަމެއް ނިމުނީ ކަމަށެވެ. އެމީހުންގެ އުފާވެރި ހަޔާތް ފެށުނީކަމަށެވެ. ބަހާރު މޫސުމަށް ހަރީފު މޫސުން ވެރިވެގަތްލެއް ހާދަހާވާ އަވަހެވެ.

އަވަސް ފަރުވާދޭ ކޮޓަރިން ނިކުމެގެން އައި ޔުސްރާފެނުމާއެކު ޔާނީ މަޑުމަޑުން ތެދުވެލިއެވެ. ހީވާގޮތުން ވަރެއް ނެތީއެވެ. “ޔާނީ. މަންމަ ގެ ކެތްތެރި ޕްރިންސަސް. އިއްލު އިޒް އައުޓް އޮފް ޑޭންޖަރ. އެކަމް އަދި ހޭ ނާރާ. ވަރަށް އަވަހަށް ހޭ އަރާނެ އިނގޭ އިންޝާ ﷲ..” ކިތަންމެ ދޮގު ހަދަން ބޭނުން ނުވިޔަސް މަސްލަހަތަށްޓަކައި ޔުސްރާ ދޮގު ހެދީއެވެ. ހަގީގަތަކީ މުލައިލްގެ ހަށިގަނޑު އަދިވެސް ވަނީ ނުރައްކަލުގެ ތެރޭގައި ކަމެވެ. ހޭއަރާނެ ކަމެއް ނުވަތަ ނޫންކަމެއްވެސް ޔަގީން ނުވާކެމެވެ. ނަމަވެސް އެވާހަކަ ތަކުގެ ސަބަބުން ޔާނީގެ މިލާފައިވާ މޫނު ކޮންމެސް ވަރަކަށް އުޖާލާވެގެން ދިޔަތަން އެންމެނަށްވެސް ފެނުނެވެ. އެމީހުންގެ އެކުވެރިންވެސް ގެޔަށް ދިޔައީ އޭރު ދިހަގަޑި ބައިވެ ބޮޑުވެފައި ވާތީއެވެ.

ގަޑިން ބާރަގަޑި ބައި ވީއެވެ. މުލައިލް ކޮޓަރިއަކަށް ބަދަލު ކުރެވިފައި ވާއިރު އެތަނުގައި މަޑުކޮށްގެން އިން ޔާނީއަށް ވަނީ ނިދިފައެވެ. ތުންފަތް ހިކިވެ މޫނު ދުޅަވެފައި ވީއިރު ޔާނީއަށް ނިދުނީވެސް ރޯން އޮއްވާކަން ހާމަވާން ހުއްޓެވެ.

އާދުވަހަކަށް އިރު އަރައިގެން އައީ އެކި މީހުންގެ ހަޔާތަށް އެކި ކުލަ ގެންނަމުންނެވެ. ސްކޫލުވެސް ހުޅުވުމާއެކު ކިތަންމެ ވަރުބަލިވެ، ދާހިތް ނުވި ކަމުގައި ވީނަމަވެސް ޔާނީ ސްކޫލަށް ހާޒިރުވިއެވެ. ތަފާތަކީ އެހެން ދުވަސްތަކުގައި އަބަދު އަނގަގަދަކޮށް އުޅޭ ޔާނީ ގެ ބަދަލުގައި މަޑުމޮޅި ބަސްމަދު ޔާނީއެއް އިންކަމެވެ. ގިނަ ވަގުތު ބޯޖަހައިގެން އޮންނައިރު މާ ބޮޑަށް ފިލާވަޅަށް ސަމާލުކަމެއްވެސް ދޭހެނެއް ހިޔއް ނުވެއެވެ. ޔާނީގެ އެ މިޒާޖުން އެންމެންގެ ހިތްތައް ފިސްފިސް ވަމުން ދިޔައިރުވެސް އަޅާނުލީ ހާލަތާ ވަގުތުގެ ގޮތުންނެވެ.

ސްކޫލު ނިންމާލުމަށްފަހު ޔުނީފޯމުވެސް ބަދަލުކޮށްނުލާ ޔާނީ ހޮސްޕިޓަލަށް ދާން ހިނގައިގަތެވެ. ފަހަތުން ޔާނިލާވެސް އައެވެ. “އޯކޭތަ އަހަރެން ދިޔަސް؟” ޔާނީ ހަމައެކަނި ބޯޖަހާލީއެވެ. މަންޒިލާ ހިސާބަށް އާދެވުނުއިރުވެސް ދެމީހުން ކުރެ އެކަކުވެސް އިތުރުބަހެއް ނުބުނެއެވެ. “ނިލް ވަދެ. އަހަރެން އަންނާނަން ފެން ފުޅިއެއް ހިފައިގެން.” މުލައިލް އޮތް ކޮޓަރީގެ ދޮރާހިސާބަށް އާދެވުމާއެކު ޔާނީ ބުނެލިއެވެ. ބޯޖަހާލަމުން ޔާނިލާ އެތެރެއަށް ވަނެވެ.

ޔާނިލާގޮސް މަޑުކޮށްލީ މުލައިލްގެ ބޯ އޮތް ކޮޅުގައެވެ. އޭރު މުލައިލްގެ މޫނުން ދާތިކި ވިދަމުން ދިޔައެވެ. ޔާނިލާ މަޑުމަޑުން މުލައިލްގެ އަތުގައި ހިފާލުމާއެކު މުލައިލް ތެޅެން ފެށިއެވެ. ދެލޯ މަރާ ތަގުޅިކޮށްގެން އޮތް އިރު ހީވީ މަރަށް ތެޅެމުން ދިޔަ މީހެއް ހެނެވެ. އޭގެ ސަބަބުން ގުޅާފައިވާ އައިވީ ފުޅީގެ ތެރެއަށް ލޭއެޅެން ފެށިއެވެ. ޔާނިލާއަށް ހުރެވުނު ތަންވެސް ނޭންގުނެވެ. ހަޅޭއްލަވަމުން ބޭރަށް ނިކުތްއިރު އެއަޑަށް ނަރުހުންގެ އިތުތުން ޔާނީވެސް ދުވެފައި އާދެވެ. ބާރަކަށް ދުވެފައި އައި ގޮތަށްއައިސް ޔާނީ އެކޮޓަރިއަށް ވަނެވެ. އެމަންޒަރަކީ ޔާނީއަށް އާ މަންޒަރަކަށް ނުވިޔަސް މިއަދު މުލައިލްއަށް އެހެންވަމުން ދިޔައީ އާދަޔާ ހިލާފަށް ބޮޑަށެވެ.

ރޮވިފައިހުރެ މުލައިލްއަށް ގޮވަމުން ގޮސް ޔާނީ މުލައިލްގެ އަތުގައި ހިާލިއެވެ. އަދި ނިތްކުރީގައި ފިރުމާލިއެވެ. ކުރިއެކޭވެސް އެއްފަދައިން މިފަހަރުވެސް މުލައިލްގެ ހާލަތު ރަނގަޅު ވިއެވެ. ނަމަވެސް މުޅިހަށިގަނޑުގައި ތުރުތުރެއް އޭރުވެސް ވިއެވެ. ފުންމައިގަންނަމުން މުލައިލް ލޯ ހުޅުވާލި ވަގުތަކީ ނަރުހުންތައްވެސް އައިސް ވަތް ވަގުތެވެ.

އެނދުގައި އިށީންދެގެން އިން މުލައިލް ފެނުމާއެކު ވަދެގެން އައި ދެނަރުހުންނަށްވެސް ހައިރާންކަން ލިބިގެން ދިޔައެވެ. ނަމަވެސް އެމީހުން އަވަސްވެގަތީ ލެއިން ކަޅިވެފައިވާ އައިވީ ފުޅި ނައްޓާލުމަށްފަހު އާ ފުޅިއެއް ގުޅާށެވެ. އެޔަށްފަހު މުލައިލް ހޭއެރި ހަބަރު ޔުސްރާއަށް ދިނެވެ. އެންމެން އުފާވެފައި ތިބުމާއެކު މުލައިލްއަށްވެސް ހީލެވުނެވެ. އެވަގުތު ދުރުގައި ހުރި ޔާނިލާ ފެނުމާއެކު އެ ހިނިތުންވުން ފުންވެގެން ދިޔައެވެ. އެމަންޒަރު ޔާނީއަށް ވަރަށް ރަނގަޅަށްވެސް ފެނިގެން ދިޔައެވެ.

ޔުސްރާ ޑިއުޓީގައި ނެތުމާއެކު މުލައިލްގެ ޗެކަޕް ހެދުމަށް އައީ ޝިފާންއެވެ. އިތުރު ނުރައްކަލެއްގެ އެއްވެސް އަލާމާތެއް ނުފެނުމާއެކު ﷲ އަށް ހަމްދުކޮށްލަމުން މުލައިލްގެ ގައިގައި ބައްދާލިއެވެ. “ޔެސް!!!” ނިކުތް ގޮތަށް ޝިފާން އެހެން ބުނެލުމާއެކު ޔާނީ އަށް އުފަލުން އަތްޖަހާލެވުނެވެ. ހިތާމަޔަކީ އެއުފާވެރި ކަމަކީ ވަގުތީ އުފާވެރިކަމެއްކަން އިނގޭތީއެވެ.

އިތުރު އެއްވެސް ކަމެއް ނެތުމާއެކު މުލައިލް ދޫކޮށްލެވުނެވެ. ހަތަރު މީހުންގެ އެ އާއިލާ އެކުގައި ހިނގާލާފައި ދިޔައިރު ޔުސްރާ އަދި ޝިފާންހުރީ ކުރީގައެވެ. މުލައިލް އަދި ޔާނީ ފަހަތުން ދިޔައެވެ. “އިއްލު. ކޮންކަހަލަ ހުވަފެނެއްތަ އެގަޑީ ފެނުނީ؟؟!! ނިލް ފަކީރު ހުރީ ކިރިޔާ ނުރޮވި” ހިނިގަނޑަކާއެކު ޔާނީ ބުެލިއެވެ. ނަމަވެސް އުޅެ އުޅެވެސް ފެނުނު އެކައްޗެއްވެސް މުލައިލްގެ ހަނދާނަކަށް ނައެވެ. އެހެންކަމުން ދެމީހުންވެސް ނިންމީ އިތުރަށް އެވާހަކަ ނުދެއްކުމަށެވެ.

ޖެހިގެން އައި ދުވަހު ޔާނީ ސްކޫލަށްދިޔައީ ވަރަށް ރަނގަޅު މޫޑެއްގައި ހުރެއެވެ. މުލައިލް ގޭގައި މަޑުކޮށްލީ ޝީފާންމެންގެ އެދުމުގެ މަތިންނެވެ. އެކަނި އޮވެއޮވެ ފޫހިވެގެން އެންމެ ފަހުން މުލައިލް ގަސްތު ކުރީ ސިނާ އަތުން ގެނައި ފައިލު ކިޔާލުމަށެވެ.

“ދެހާސް ނަވާރަވަނަ އަހަރު. މަގުމަތީގެ އެކްސިޑެންޓު. މަރުވި މީހުން. ލައިތް..އަލާނިޔާ.. ނޯ..މަންމަ މަރުވީ އެހެނއް ނޫނެއްނު؟ ގައިމު ޔުސްމަމް ބުނީ އަހަރެން ވިހާފަ.. އޯ ނޯ. އެއީ ހުސްދޮގޮ. ޒަހަމްވި މީހުން ގެ ތެރޭގަ އެބައިން މުލައިލް ބުން ލައިތް، އުމުރުން ތިން އަހަރު. އެއީ އަހަރެން… ދެން ޔާނީ..އެހެން ވީމަ އެދުވަހު އެކަމެއް ހިނގީ ހަމަ އަހަރެމެން މަރާލުމުގެ ނިޔަތުގަ. އެކަމު ލާނީ މަމް އަހަރެމެން ސަލާމަތް ކުރީ. އަހަރެން ކާރަށް އަރަން ބިރުގަންނަނީ އެހެންވެ. ޔާނީ އަށް ޕޯސްޓް ޓްރައުމަޓިކް ސްޓްރެސް ޑިސްއޯޑާ ޖެހުނީ އެހެންވެ. އޯ މައި ގޯޑް. މީ ކޮން ކަންތައް ގަނޑެއްތަ؟!!! ކީއްވެތަ އަހަރެމެން. އަހަރެން ބޭނުމެއް ނޫން ޔާނީއަށް ކިޔާދޭކަށް. އެކަމަކުވެސް ހެޔޮ. އަހަރެމެން ވައުދުވީން ދެމީހުން އެކުގައި މިކަން ކުރަން. އެކަމް ވެސް…..”

މުލައިލްގެ ސިކުނޑި ހީވަނީ ފަޅައިގެން ގޮސްފާނެހެންނެވެ. އެ ހާދިޘާގެ ފަހަތުގައިވެސް ވަނީ ރުއާކަމާ މުލައިލްގެ މަންމަ މެންގެ މަރުގެ ހަގީގަތް އެނގުމާއެކު މުޅިމީހާ ހޫއްޓިފައި ވާކަހަލައެވެ. ރުއާގެ ހަގީގީ މަގްސަދެއް ނޭންގޭއިރު މިހާރު އޭނާ ރާވަމުންދާ އެއްވެސް ކަމެއްވެސް އަންދާޒާވެސް ކޮށްލަން އިނގެނީކީ ނޫނެވެ. ނަމަވެސް ޕާޓީ އޮތް ރޭގައި ރުއާ ގެޔަށް ވަދެފައި ނުވާނެކަން މުލައިލްއަށް ޔަގީނެވެ. އެހެނީ އެގެޔަކީ ހުރިހާގޮތަކުންވެސް ސެކިއުރިޓީ ވަރަށް ވަރުގަދަ ގެއެކެވެ. އެހެން ކަމަށް ވާނަމަ އެއީ ރުއާއަށް ހެޔޮ އެދޭ މުލައިލްމެންގެ އެކުވެރިއެކެވެ. އަނެއްކާ ރުއާގެ ދަރިއެއް ނޫންބާވެއެވެ؟ އެހެންވެއްޖެނަމަ ސްކޫލުގެ ހާދިޘާއިން ފެނުނު ޑީއެންއޭވެސް ދިމާވާނެތާއެވެ. އެހެންކަމަށް ވާނަމަ ރުއާގެ ދަރި އުޅެނީ އެމީހުންގެ ސްކޫލުގައެވެ. އެއީ ކާކު ބާވައެވެ؟

“މިވަރުން އަހަރެން މޮޔަވާނެ. އެކަމަކު ކާކުތަ އެއީ؟؟ އަހަރެންގެ މިހީވުމަކީ ތެދެއްތަ؟ މި ސުވާލުތަކުގެ ޖަވާބު އަހަންނަށް ވަގުތު ފާއިތު ވުމުގެ ކުރިން ލިބޭނެތަ؟” މުލައިލްގެ ލޮލުން ކަރުނަ ހިލުނެވެ.

****************************************************************

“މަންމާ. މިހާރު އަހަރެންގެ ކުޅިބައިވެސް އަތުރައިފިން. މިފަހަރު އެއިން އެކަކުވެސް ސަލާމަތް ވިޔަކަ ނުދޭނަން. މަންމަގެ ހައްގުގައިވެސް އަހަރެން އެ އެންމެނަށް ކުޅި ދައްކާލާނަން. ޔާނީ އެންޑް މުލައިލް.. ތި މީހުން ހީވެސް ނުކުރާނެ އަހަރެން މީ ކާކު ކަމެއް..ހަހަހަހަހަ”

***************************************************************

ނުނިމޭ….

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.