ހިތްއެކީ ދެވިއްޖޭ (16) ފަހުބައި

“އަހަރެންނޭ؟ އަހަރެން ތިހާ ރޮމޭންޓިކްއެއް ނުވާނެ.” ހިނިގަނޑެއް ޖަހައިލަމުން ޔައިޝް ބުނެލިއެވެ. “އެކަމަކުވެސް ހެވޭ. ކީކުރަން ތިގުޅީ؟” މާބޮނޑިއަށް ބަލައިލަމުން އަލްކާ އަހައިލިއެވެ.

އަލްގެ ތިލޯބި އަޑުއަހައިލާ ހިތުން.” ލާނެތް ރާގަކަށް ޔައިޝް ބުނެލިއެވެ. “ނޫޅެން.” އަނގައަށް ވައްތަރެއް ޖައްސައިލަމުން އަލްކާ އެހެން ބުނެލުމާއެކު ޔައިޝް ހޭންފެށިއެވެ.

“އަސްލު ގުޅީ މާދަން ރޭގަ މީޓް ކުރެވިދާނެތޯ އަހައިލަން. އަހަރެން އެބައޮތް ވަރަށް ބޮޑު ވާހަކައެއް ދައްކަންވެފަ.” ސީރިއަސްވެލަމުން ޔައިޝް އެހެން ބުނެލުމާއެކު އަލްކާ ވަގުތުން އެއްބަސްވިއެވެ. ހިނިތުންވެލަމުން ޔައިޝް ފޯންބޭވިއެވެ.

އަލްކާއަށް ގަޑިއަށް ބަލައިލެވުނީ ބޭއިޚުތިޔާރުގައެވެ. މިހާރުއްސުރެ ވަގުތު ގުނަން ފެށިއްޖެއެވެ. އަދި މާދަން ރޭ ވާނީ ކޮންއިރަކުންހެއްޔެވެ؟ ގަޑިއަށް ބަލައިލުމަށްފަހު އަލްކާ ގޮސް ފެންވަރައިލަން ވަނެވެ.

ޖެހިގެންއައި ދުވަހަކީ ބަންދު ދުވަހެއްކަމުން އަލްކާ އެނދުގައި އޮށޯވެލައިގެން އޮތީ ފޫހިވެފައެވެ. ކުރާނެކަމެއް ނެތި އޮށޯވެގެން އޮތް އަލްކާ އިރުއިރުކޮޅާ ފޯނަށް ބަލައިލައެވެ. އެވަގުތު ކޮޓަރީ ދޮރުގައި މީހަކު ޓަކި ޖެހުމުން ވަންނާށޭ އަލްކާ ބުނެލީ ފުދޭވަރަކަށް ބާރަށެވެ.

ބޮޑު ފްލާވާރ ބާސްކެޓެއް ހިފައިގެން ވަތް ޝަޔާނީ ފެނިފައި އަލްކާއަށް އޮތްތަނުން ތެދުވެވުނު ގޮތްވެސް ނޭނގުނެވެ. އަވަސް އަރުވައިލައިފައި ގޮސް ޝަޔާނީ އަތުން އެ ބާސްކެޓް އަތުލިއެވެ.

ބާސްކެޓުގެ ދަށުގައި ރަންކުލައިގެ ކަރުދާހުން ޕާރްސަލް ކުރެވިފައި އޮތް ގިފްޓް ބޮކްސްއެއް އޮތެވެ. ހައިރާން ކަމާާއެކު އެ ފްލާވާރ ބާސްކެޓްގެ މަތީގައި ބާވައިލައިފައި އޮތް ކާރޑް ނަގައި ކިޔައިލިއެވެ. އޭގައިވަނީ ރީތި އިނގެރޭސި އިބާރާތްކޮޅަކުން މައާފަށް އެދިފައި ލިޔެފައިވާ ކުޑަ ލިޔުންކޮޅެކެވެ. ލިޔުންކޮޅުގެ ތިރީގައި ލިޔެފައި އޮތް ޔައިޝްގެ ނަން ފެނުމުން އަލްކާގެ ތުންފަތް މައްޗަށް ވަގުތުން ހިނިތުންވުން ވެރިވެގެން ދިޔައެވެ.

ބާސްކެޓްގެ ތިރީގައި އޮތް ޕާރްސަލް އަވަސް އަވަހަށް ކަނޑައި ބަލައިލިއިރު އޭގައި އޮތީ ރަތާއި ކަޅުކުލައިގެ ދިގު ހެދުމެކެވެ. ކުދި އެސްތަކަކުން ހެދުމުގެ ފަސްބައި ޖަރީކުރެވިފައި ވާއިރު މޭމަތީގައިވެސް ރީތި ޑިޒައިނަކަށް އެސް ޖަހައިފައިވެއެވެ. ހެދުމާއިއެކު އޮތް ރަތާއި ކަޅުކުލައިގެ ޝޯލް ފެނުމުން ޔައިޝް ބޭނުންވާގޮތް ވަގުތުން އަލްކާއަށް ވިސްނުނެވެ. ހެވިފައިހުރެ ހެދުން ޝަޔާނީއަށް ދައްކައިލިއެވެ. މިރޭ ބައްދަލުކުރަން އަންނައިރު އެހެދުން ލުމަށް ޔައިޝް ވަނީ އެދިފައެެވެ. ގަޑިއަށް ބަލައިލަމުން ހެދުން ގައިގައި ޖައްސައިލުމަށްފަހު އަލްކާ އެނބުރިގަތެވެ.

ރޭގަނޑުގެ ވަގުތެވެ. ގަޑިން ބަރާބަރު 8 ޖެހިއިރު އަލްކާ ހުރީ ލޯގަނޑުކުރިމަތީގައި އޭނާއަށް ތައްޔާރު ވެވުނު އެންމެ ފުރިހަމައަކަަށް ތައްޔާރުވެގެންނެވެ. އެހެދުމުގައި އަލްކާ ހީވަނީ ޕަރީޒާދެއް ހެންނެވެ. ބޮލުގައި އޮޅައިލެވިފައިވާ ޝޯލްގެ ތެރެއިން އެމޫނު ފާޅުވަމުންދިޔައީ ނުހަނު ހިތްގައިމު ގޮތަކަށެވެ. ތުންފަތުގައި ގަދަ ރަތްކުލައިގެ ލިޕްސްޓިކް ޖައްސައިލެވިފައި ވީއިރު އެ އަސަރުގަދަ ދެލޯ ވަނީ އައިލައިނާރއިން އިތުރަށް ފަވައިލައި ކަޅުކޮށްލައިފައެވެ.

ހިތްހަމަޖެހޭވަރު ވުމުން ގަޔަށް ސެންޓްކޮޅެއް ޖަހައިލުމަށްފަހު ފޯން ނެގިތަނާ ޔައިޝްގެ ކޯލެއް އައެވެ. އަވަސް އަވަހަށް ފޯނަށް ޖަވާބުދެމުން ކޮޓަރިން ބޭރަށް ބޯދިއްކޮށްލައި އެއްވެސް މީހެއްގެ ހިލަމެއްވޭތޯ ބަލައިލިއެވެ. މީހަކު ފެންނަން ނެތުމުން އަވަސްއަރުވައިލައިފައި ގެއިން ނުކުތެވެ. އޭރު ޔައިޝް ކާރުގައި އަލްކާގެ އިންތިޒާރުގައި އިނެވެ.

އަލްކާ ކާރަށް އެރުމާއެކު ދެލޯބޮޑުކޮށްލަމުން އަލްކާގެ ރީތި މޫނަށް ޔައިޝް ބަލައިލިއެވެ. ކޮންފަދަ ރީތިކަމެއް ހެއްޔެވެ؟ ޔައިޝްއަށް ހިނިތުންވެލެވުނެވެ. ކާރު ދުއްވައިލަމުން ޔައިޝް އަލްކާއާާ ދިމާއަށް އެއްލޯ މަރައިލިއެވެ. އެތަންފެނި އަލްކާގެ ދޮން ކޯތާފަތަށް ޖަންބުކުލަ ވެރިވެގެން ދިޔައެވެ.

ކާރު ގޮސް މަޑުކޮށްލީ މެލޭޝިޔާގެ މަޝްހޫރު ރެސްޓޯރެންޓެއް ކައިރިއަށެވެ. ދެލޯބޮޑުކޮށްގެން ހުރެ ކާރުން ފޭބީއްސުރެ އަލްކާ އެރީތި ބިލްޑިންގްއަށް ބަލަމުން ދިޔައެވެ. ފަހަތުން ޔައިޝް އައިސް އޭނާާގެ އުނަގަނޑުގައި އަތް އަޅުވައިލުމުން ސިހިފައި އަލްކާ ޔައިޝްގެ މޫނަށް ބަލައިލިއެވެ.

“ޔޫ އަރ ލުކިންގް ސޯ ސޯ ބިއުޓިފުލް.” ގުދުވެލަމުން އަލްކާގެ ކަންފަތް ދޮށުގައި ޔައިޝް ބުނެލީ ލޯބިވެތި ގޮތަކަށެވެ. ލަދުގެންފައިހުރި އަލްކާއަށް އިސްޖަހައިލެވުނެވެ. ދެމީހުން އެތެރެއަށް ވަންނަން ހިނގައިގަތެވެ. ޔައިޝް އަލްކާ ގޮވައިގެން އެރީ އެރެސްޓޯރެންޓްގެ އެންމެ މަތީ ބަޔަށެވެ. އެބަޔަކީ މަތި ނިވައިނުކޮށް ހާމައަށް އޮތް ބަޔެއްކަމުން ކުދި ތަރިތައް ވިދަމުންދިޔަ އުޑު ފެންނަން އޮތެވެ.

ދެމީހުން އެތަނަށް އެރިއިރު މުޅިއެތަންވަނީ އުއްބައްތިން ދިއްލައިލައިފައެވެ. އެދެމީހުން ފިޔަވައި އިތުރު އެއްވެސް ބަޔަކު އެތަނަކު ނެތެވެ. އާޝޯޚުވެފައި ހުރެ ޔައިޝްއާ އެއްކޮށް ހިނގަމުންގޮސް އަލްކާ އެތަނުން މޭޒެއްގެ ދޮށުގައި އިނށީނެވެ.

މުޅިމާޙައުލުގައި ވަނީ ތާޒާ ފިނިފެންމަލުގެ ހިތްގައިމު ވަސް ހިފައިލައިފައެވެ. ވަށައިގެން ހޯދަމުންދިޔަ އަލްކާގެ މޫނަށް ހެވިފައި ޔައިޝް ބަލަމުން ދިޔައެވެ.

ސާފު ރީތި އުޑުގައި ރަނިކަންކުރަމުންދިޔަ ހަނދަށް އަލްކާގެ ނަޒަރު ހުއްޓުނެވެ. އެހިތްގައިމު މަންޒަރުފެނި ހިތަށް ހަމަޖެހުން ވެރިވަމުންދިޔައެވެ. ހަނދާއި ތަރިތަކުގެ ރީތި ބެބުޅުންތަކުން މުޅި އުޑުވަނީ ދިއްލައިއަޅައިލައިފައެވެ. ހީވަނީ އެދެމީހުންގެ އުފަލުގައި އެހަނދާއި ތަރިތައްވެސް ބައިވެރިވަމުން ދާހެންނެވެ.

މޭޒުދޮށުގައި އިނށީންތާ މާގިނައިރެއް ނުވަނީސް އެތަނުގެ ވެއިޓަރެއް އައިސް މޭޒުމަތީގައި ކާތަކެތި އަތުރަން ފެށިއެވެ. ހައިރާންކަމާއެކު ހެވިފައި އިނދެ އަލްކާ އެމީހާގެ މަސައްކަތަށް ބަލަމުން ދިޔައެވެ.

ވެއިޓަރ ދިއުމާއެކު ދެމީހުން ކެއުމަށް އިންސާފުކުރަން ފެށިއެވެ. ޔައިޝްގެ މިރޭވުމާމެދު ސުވާލުއުފެދިފައި އިނދެ އަލްކާވެސް ކަމުން ގެންދިޔައެވެ.

“އަހަރެން ހަމަ ހައިރާން ވެއްޖެ. ގައިމު އިއްޔަ އަހަރެންގާތު ބުނި ޔައިޝް އެހާ ރޮމް އެއްްނުވާނޭ. ދެން މީ ކޮންކަމެއް؟ އަނެއްކާ ތީހަމަ ޔައިޝްތަ؟” ހިނިގަނޑެއް ޖަހައިލަމުން އަލްކާ އެހެން ބުނެލީ މަޖާވެލައިފައި އިނދެއެވެ. އެއާއެކު ޔައިޝްވެސް ލުއި ގޮތަކަށް ހިނިތުންވެލިއެވެ.

“ވެދާނެ ތިހެން ކަމަށްވެސް.” އެއްލޯމަރައިލަމުން ޔައިޝް ބުނެލިއެވެ. ތުންކޮޅު އޫކޮށްލަމުން އަލްކާ ވައްތަރެއް ޖައްސައިލިއެވެ. ކައި ނިމުމާއެކު ވެއިޓަރ އައިސް ތަށިތައް ހިފައިގެން ދިޔައެވެ.

“އަލް ވަރަށް ލޯބި ބުރުގާ އެޅީމަ.” އަލްކާގެ ދޮންމޫނަށް ނަޒަރު ހުއްޓައިލައިގެން އިނދެ ޔައިޝް ބުނެލިއެވެ. ޔައިޝް އެހެން ބުނެލުމާއެެކު ލަދުގަނެފައި އަލްކާ އިސްޖަހައިލިއެވެ.

“ކޮންވާާހަކައެއްތަ އަސްލު ދައްކަން އުޅުނީ؟” ވާހައިގެ މިސްރާބު އަލްކާ ބަދަލުކޮށްލީ ޔައިޝް ދައްކަން އެއުޅޭ ވާހަކައެއް އެނގެންބޭނުންވެފައި ހުރި ވަރުންނެވެ.

ފުންނޭވައެއް ލުމަށްފަހު ޔައިޝް މިޒްރާގެ ހުރިހައި ވާހަކައެއް އަލްކާއަށް ކިޔައިދިނެވެ. ދެލޯބޮޑުކޮށްގެން އެވާހަކަތައް އަޑުއަހަންއިން އަލްކާގެ ހިތުގައި އުފާވެރިކަމުގެ ރާޅުބާންޏެއް ދުވެލީ ޔައިޝް މިޒްރާާ ވަރިކުރި ވާހަކަ ބުނުމުންެނެވެ. އަލްކާގެ ހިތަށް ބަޔާން ނުކުރެވޭފަދަ ހަމަޖެހުމެއް ލިބިގެން ދިޔައެވެ. ދެލޯ މަރައިލަމުން ހެއްދެވި ފަރާތަށް ހަމްދުކޮށްލެވުނީ ލިބުނު އުފާވެރިކަމެއްގެ ސަބަބުންނެވެ.

“ދެން ކީއްވެ ޔައިޝް އަހަރެންނާ އެހައި ދުރުވީ؟ ކީއްވެ އަހަރެންނާ ދޭތެރޭ އެގޮތަށް އަމަލުކުރީ؟” ޔައިޝްގެ ދެލޮލަށް ބަލައިލަމުން އަލްކާ ޝަކުވާކޮށްލިއެވެ. އަލްކާ އެހެން އަހައިލުމާއެކު އެދުވަސްތަކު އަލްކާ އުޅުނުގޮތް ހިތަށް އަރައިފައި ޔައިޝްއަށް ހެވުނެވެ.

“އެއީ އަލް އަހަރެންދެކެ ލޯބިވާވަރު އިހުސާސުކޮށްލާހިތްވި ވަރުން ކުރި ކަމެއް. އަހަރެން އެނގެންބޭނުންވީ އަހަރެން އަލްއާ ވަކިވެއްޖެނަމަ އަލް ދެރަވާނެވަރު. ވަރަށް އުފާވި އަލް އަހަރެންދެކެ އެހައި ލޯބިވާކަން އިހުސާސުވީމަ. މިހިތަށް ލިބުނީ ބަޔާންވެސް ނުކުރެވޭފަދަ ފޮނި މީރު އުފަލެއް.” ހިތާއިވީ ފަޅީގައި އަތުން ފިރުމައިލަމުން ޔައިޝް ބުނެލިގޮތުން އަލްކާއަށް ހެވުނެވެ. ދެފަރާތަށް ބޯހޫރުވައިލެވުނީ އެދުވަސްތަކު އޭނާއަށް އުޅެވުނުގޮތް ހިތަށް އެރުމުންނެވެ.

އިރުކޮޅަކު ވާހަކަދައްކަން އިނުމަށްފަހު ދެލޯ މަރައިލުމަށް ޔައިޝް އެދުނެވެ. ވާންމިއުޅެނީ ކިހިނެއްކަން ނޭނގިއިން އަލްކާ ދެލޯމަރައިލިއެވެ.

“ދެން އޯކޭ ދެލޯ ހުޅުވިއަސް.” ކުޑަހިނދުކޮޅެއް އެގޮތުގައި ހޭދަވުމަށްފަހު ޔައިޝް ބުނެލިއެވެ. މަޑުމަޑުން އަލްކާ ދެލޯ ހުޅުވައިލުމާއެކު އޭނާގެ ދެލޯ ބޮޑުވެގެން ދިޔައެވެ. ކުރިމަތީގައި ބެހެއްޓިފައިހުރި ބޮޑު ކޭކަށް އަލްކާގެ ނަޒަރު ހުއްޓުނެވެ. ހުދުކުލައިގެ އައިސިންގް ޖަހައިފައިހުރި އެކޭކުގައި ވަނީ ކަޅު ކޯޓްފަޓުލޫނުގައި ހުރި ފިރިހެންކުއްޖަކު ކަޅާއި ރަތުގެ ހެދުމެއްގައިހުރި ބުރުގާއެޅި އަންހެންކުއްޖަކަށް ޕްރޮޕޯސްކުރާ ތަސްވީރެއް ކުރެހިފައިވައެވެ. ކޭކުގެ އަރިމަތީގައިވަނީ ރަތްކުލައިގެ ކުދިކުދި ހިތްތަކެއް ޖަހައިފައެވެ. އެތަސްވީރުގެ ތިރީގައި ރަތްކުލައިގެ އައިސިންގްްއިން ލިޔެވިފައިވާ ލިޔުންކޮޅު އަލްކާ ކިޔައިލިއެވެ. “ވިލް ޔޫ މެރީ މީ؟” ދެލޯބޮޑުކޮށްލަމުން ޔައިޝްގެ މޫނަށް އަލްކާއަށް ބަލައިލެވުނީ ގަބޫލުނުކުރެވިފައި އިންފަދަ ގޮތަކަށެވެ. މިއީ ހަގީގަތެއް ބާވައެވެެ؟ އަލްކާގެ ބޮޑު ދެލޯ އުފާވެރިކަމުގެ ކަރުނައިން ފުރިގެން އައެވެ.

އަލްކާގެ މޫނަށް އަރައިފައިބަމުންދިޔަ ކުލަތަކަށް ބަލަންއިން ޔައިޝް ވަގުތުން އިންތަނުން ތެދުވިއެވެ. ލައިފައިހުރި ކަޅުކުލައިގެ ކޯޓުގެ ތެރެއިން ރަތްކުލައިގެެ ފިނިފެންމަލެއްގެ ސިފައިގައިހުރި ރިންގް ބޮކްސްއެއް ނެގުމަަށްފަހު އައިސް އަލްކާގެ ކުރިމަތީގައި އެއްކަކޫ މައްޗަށް ޔައިޝް ތިރިވިއެވެ. މިތަންފެނި ގޮނޑީގައި އިނށީދެގެންއިން އަލްކާއަށް ވަގުތުން ކޮޅަށް ތެދުވެވުނެވެ. އަނގަމަތީގައި ދެއަތް އަޅައިލަމުން ފެންކަޅިވެފައި ޔައިޝްގެ މޫނަށް ބަލަންހުރި އަލްކާއަށް ޔައިޝް ހިނިތުންވެލިއެވެ.

އަލްކާއާ ދިމާއަށް ދިށްކޮށްގެންހުރި ރިންގް ބޮކްސް ޔައިޝް ހުޅުވައިލިއެވެ. އޭރު އޭގެ އެތެރޭގައި ވިދަމުންދިޔަ ރަން އަނގޮއްޓިފެނިފައި އަލްކާގެ ދެލޯ އިހުނަށްވުރެ ބޮޑުވެގެން ދިޔައެވެ. ގަދަ ރަތްކުލައިގެ އެހެއް ޖަހައިފައިހުރި އެއަނގޮއްޓި ނަގަމުން ޔައިޝް އަލްކާއާާ ދިމާއަށް އެއަނގޮއްޓި ދިއްކޮށްލިއެވެ.

“އަހަރެންގެ މުޅި ހަޔާތުގައިވެސް އަލްދެކެ ލޯބިވީ ފަދަައިން އިތުރު އެހެން އެއްވެސް މީހެއްދެކެ ލޯތްބެއް ނުވަން. މުޅި އުމުރުގަައިވެސް އަހަރެންނަށް ލޯބިވެވުނު ހަމައެކަނި އަންހެންކުއްޖަކީ ތިއީ. އަހަރެންގެ ހިތުން ޖާގައެއް ދެވުނު ހަމައެކަނި ކުއްޖަކީވެސް ތިއީ. އަހަރެންގެ މުޅި ހިތްއެކީ އަލްއަށް ދެވިއްޖެ. އުމުރަށްވެސް ލޯބިވާނީ ހަމައެކަނި އަލް ދެކެ. އަހަރެން އެދެނީ އަހަރެންގެ މުޅި އުމުރުގެ ބާކީ އޮތް ދުވަސްތައް އަލްއާ އެކުގައި ހޭދަކުރަން. ސޯ ޓެލްމީ މައި ލަވް. ވިލް ޔޫ ސްޕެންޑް ދަ ރެސްޓް އޮފް ޔޯ ލައިފް ވިތް މީ؟ ވިލް ޔޫ މެރީ މީ؟” ލޯތްބާއި ކުލުނާއެކު އަނގަމަތީގައި އަތް އަޅައިގެން ރޮވިފައިހުރި އަލްކާގެ މޫނަށް ބަލަންއިން ޔައިޝް ބުނެލިއެވެ. އުފަލުންގޮސް ހަދާނެގޮތެއް ނޭނގިފައިހުރި އަލްކާއަށް މަޑުމަޑުން ބޯޖަހައިލެވުނެވެ.

“ޔެސް މައި ލަވް. އައި ވިލް.” ރޮވިފައިވާ އަޑަކުން އަލްކާއަށް އެހެން ބުނެވުނީ އިރުކޮޅެއް ފަހުންނެވެ. އެއާއެކު ޔައިޝްގެ ތުންފަތް މައްޗަށް ފުޅާ ހިނިތުންވުމެއް ވެރިވެގެން ދިޔައެވެ. ލޯތްބާއެކު އަލްކާގެ ވައަތުގެ ކަށި އިނގިލީގައި ޔައިޝް އެއަނގޮއްޓި އަޅުވައިދިނެވެ. އަދި އިންތަނުން ތެދުވެ އަލްކާގެ ލޮލުން އޮހޮރެމުންދިޔަ ކަރުނަތައް ފުހެލައިދިނެވެ.

“މަރުހަބާ” ފަހަތުން ބަޔަކު އެހެން ކިޔައި ހަޅޭލަވައިގަތުމުން ސިހިފައި އަލްކާ ފަހަތް ބަލައިލިއެވެ. އޭރު އޭނާގެ ފަހަތުގައި ޝަޔާނީގެ އާއިލާ އާއި އޭނާގެ އާއިލާ އާއި ޔައިޝްގެ އާއިލާ މީހުން ތިއްބެވެ. ދެލޯބޮޑުކޮށްލަމުން އެއްފަހަރު އެމީހުންގެ މޫނަށް އަނެއްފަހަރު ހެވިފައިހުރި ޔައިޝްގެ މޫނަށް އަލްކާ ބަލަމުންދިޔައެވެ.

“މަންމާ. ބައްޕާ. ނައި.” އެއްފަހަރާ އެންމެނަށް ގޮވައިލުމަށްފަހު އަލްކާއަށް ދުވެފައިގޮސް އޭނާގެ މައިންބަފައިންގެ ގައިގައި އޮޅުލައިގަނެވުނެވެ. “ކޮންއިރަކު އައީ؟ އަޅުގަނޑަށް އަންގައިވެސް ނުލާ.” ތުންކޮޅު ދަމާލަމުން އަލްކާ ޝަކުވާންކުރަންފެށިއެވެ.

“ހެހެ. ކުރިން ދުވަހަކު ނުދަންނަ ނަމްބަރަކުން ބައްޕައަށް މީހަކު ގުޅީ. ފޯން ނެގީމަ އެނގުނީ ޔައިޝްކަން. އެދުވަހު ޔައިޝް ބައްޕައަށް ހުރިހައި ވާހަކައެއް ކިޔައިދިނީ. އަދި ދަރިފުޅާ ކައިވެނިކުރަން ހުއްދައަށް ބައްޕަ ގާތުން އެދުނީ. ބައްޕަ ވަރަށް އުފާވި ބައްޕަގެ ދެދަރިންނަށްވެސް އެހައި ރަނގަޅު އަދި އެހައި ލޯބިވާ ދެމީހުން ލިބުނީމަ. ދެން އެދުވަހު ޔައިޝް އެދުނީ ދަތިކަމަކަށް ނުވަންޏާ މިކޮޅަށް އައިސް ދިނުމަށް. އެހެންވެ ޗުއްޓީ ނަގައިގެން އަވަހަށް މީގެ އެއްދުވަސްކުރިން ބައްޕަމެން މިކޮޅަށް އައީ. ދެން ތިގެއަށް ނުދިޔައީ ދަރިފުޅަށް ޝައްކުވެދާނެތީ. އެހެންވެ ގެސްޓް ހައުސްއެއްގަ ތިބީ.” ހިނިތުންވެފައިހުރެ އަލްކާގެ ބޮލުގައި ފިރުމައިލަމުން އަޖުވަދު އެެހެން ބުނުމުން ޝުކުރުވެރި ނަޒަރަކުން އަލްކާ ޔައިޝްގެ މޫނަށް ބަލައިލިއެވެ.

“ބައްޕަގެ ނަމްބަރ ޔައިޝް ހޯދީ ކިހިނެއް؟” ވިސްނައިލަމުން އަލްކާ އަހައިލިއެވެ. “އަހަރެން ދިނީ.” ހެވިފައިހުރެ އެއްއަތް މައްޗަށް ހިއްލައިލަމުން ޝަޔާނީ ބުނެލިއެވެ. އެއާއެކު އެންމެން ހޭންފެށިއެވެ. ނައިރާ ގާތުގައިހުރި ޝިވަންގެ މޫނަށް ބަލައިލަމުން އަލްކާ ހިނިތުންވެލިއެވެ. ހާމިދާގެ ފަރާތުން އޭނާއަށްވަނީ ނައިރާ އާއި ޝިވަންގެ ގުޅުމުގެ ވާހަކަ އަޑުއިވިފައެވެ. ޒާލިމްގެ ހުއްދައާއެކު ޝިވަން މެލޭޝިޔާއަށް އައީ އަޖުވަދުގެ އެދުމުގެ މަތިންނެވެ. އަލްކާ ހިނިތުންވެލިތަންފެނި ޝިވަންވެސް ހިނިތުންވެލިއެވެ.

“މިއީތަ އަހަރުމެންގެ ވާން އުޅޭ ދަރިއަކީ؟” އަލްކާގެ ކޮނޑުގައިހިފައި އަނބުރައިލަމުން ސާޖިދާ އަހައިލީ ލޯތްބާއެކުއެވެ. ހިނިތުންވެލަމުން އަލްކާ އިސްޖައިލީ ލަދުވެތި ގޮތަކަށެވެ. “އަހަރެންގެ ވާންއުޅޭ ދަރިފުޅު ވަރަށް ލޯބި.” އަލްކާގެ އޮމާން ކޯތާފަތުގައި ލޯތްބާއެކު ފިރުމައިލަމުން ޔައިޝްގެ މޫނަށް ބަލައިލައިފައި އަނެއްކާވެސް ސާޖިދާ ބުނެލިއެވެ. ހުރިހައި އެންމެން ހެވިފައި މިމަންޒަރު ބަލަން ތިއްބެވެ.

ދެންއައީ ކޮންމެ މީހެއްގެ ދިރިއުޅުމުގައިވެސް އައި އެންމެ އުފާވެރި ދުވަސްތަކެވެ. އަޑިގަނޑަކަށްފަހު އައި އުސްގަނޑުން އެންމެންގެ ހިތްތައް އުފާވެރިކަމުން ފުރައިލިއެވެ. ކޮންމެ މީހެއްގެ މޫނުމަތީގައިވެސް ނުފިލާ ހިނިތުންވުމެއް ރަސްކަންކުރަމުން ދިޔައެވެ.

އަލްކާގެ އެދުމަށް ކައިވެނި ލަސްކޮށްލީ އޭނާ ކިޔަވަމުންދިޔަ ކޯސް ނިމުމުން ކައިވެނި ކުރާ ގޮތަށެވެ. ޔައިޝްއަށްވެސް މިގޮތް ކަމުދިޔައީ އަލްކާ ހަދަމުން ދިޔައީ ބޭސިކް ކޯހަކަށްވެފައި އެކޯސް އަންނައަހަރު ނިމޭނެތީއެވެ. އަޖުވަދު ބޭނުންވީ އޭނާގެ ދެދަރިންގެ ކައިވެނި އެއްކޮށް ކުރުވުމަށެވެ. އެގޮތަކާ ނައިރާއާާއި ޝިވަންވެސް އެއްބަސްވީ އުފަލާއެކުއެވެ.

ޝިވަންގެ އެދުމަށް ނައިރާވެސް ބުރުގާ އެޅިއެވެ. އަދި ލަމުންދިޔަ ހެދުންތައް ގަޔަށް ދޫ ދިގުހެދުމަށް ބަދަލުކޮށްލިއެވެ. ކޮންމެ މީހަކުވެސް އުފަލާއެކުގައި ދުވަސްތައް ގުނަމުންދިޔައީ އަލްކާއާާއި ނައިރާގެ ކައިވެންޏަށް އިންތިޒާރުކުރާ ހާލުގައެވެ.

ދުވަސްތައް އޭގެ ހަލުވިމިނުގައި ފާއިތުވަމުންގޮސް އަލްކާގެ ކޯސް ނިމި ކައިވެނިކުރަން ހަމަޖެހިފައިއޮތް ދުވަސް އައިސް ޖެހިއްޖެއެވެ. މިކައިވެންޏަށްޓަކައި އަލްކާއާއި އެއްކޮށް ޔައިޝްގެ އިތުރުން ޝަޔާނީގެ އާއިލާވެސް ރާއްޖެއަށް އައެވެ.

ކައިވެނީގެ ތައްޔާރީތައް ފޯރިއާއެކު ކުރިއަށް ދިޔައިރު ކޮންމެ މީހެއްގެ މޫނުމަތިންވެސް ފެންނަމުންދިޔައީ ހަމަޖެހުމުގެ ކުލަވަރެވެ. ކައިވެނި ޕާޓީ ބާވަން ހަމަޖެހިފައި އޮތީ ދަރުބާރުގޭގައެވެ.

އަލްކާއާއި ނައިރާ ތައްޔާރު ކުރުމުގައި ބިއުޓިޝަނުން ހަރަކާތްތެރިވަމުން ދިޔައިރު އެމީހުނަށް އެހީތެރިވުމުގައި މައުރީނާއި ޝަޔާނީވެސް ބައިވެރިވަމުން ދިޔައެވެ. ކައިވެނި ކުރެވޭ ވަގުތު ކުޑަތަންވަމުން ދިޔަވަރަކަށް ދެކުދިންގެ މޫނުމަތިންވެސް ކޮންމެވެސް ވަރަކަށް ހާސްކަން ފާޅުވަމުން ދިޔައެވެ. އެންމެފަހު ފަހަރަށް ލޯގަނޑުން އަމިއްލަ ސޫރައަށް ބަލައިލުމަށްފަހު ދެކުދިންވެސް ހިނިތުންވެތިބެ ގެއިން ނުކުމެ ދަރުބާރު ގެއަށް ދިއުމަށްޓަކައި ކާރަށް އެރިއެވެ. އަހުސަނު ކާރު ދުއްވައިލުމާއެކު ނައިރާއަށް އަލްކާގެ އަތުގައި ހިފައި ބާރުކޮށްލެވުނެވެ. ދެކުދިންގެ ހިތްވެސް ބާރު ބާރަށް ތެޅެމުންދިޔައެވެ.

ދަރުބާރުގޭ ކައިރިއަށް ކާރު މަޑުކޮށްލުމާއެކު ހަމަޖެހެން މަސަތްކަތްކުރަމުން ދެކުދިން ކާރުން ފޭބިއެވެ. ފަހަތުން އައި ކާރުން މައުރީނާއި ޝަޔާނީވެސް ފޭބިއެވެ. އަދި އައިސް އަލްކާއާާ ނައިރާ ގާތުގައި މަޑުކޮށްލިއެވެ. އޭރު ދެއާާއިލާގެ މީހުންވެސް އެތަނުގައި ހަރަކާތްތެރިވަމުން ދިޔައެވެ.

ޝަޔާނީ އަލްކާގެ ކޮނޑުގައި ހިފަހައްޓައިލުމާއެކު މައުރީންވެސް މަޑުމަޑުން ނައިރާގެ ކޮނޑުގައި ހިފަހައްޓައިލިއެވެ. މަޑު ހިނގުމެއްގައި ކައިވެނިކުރުމަށްޓަކައި ތައްޔާރުކުރެވިފައިވާ މޭޒާ ދިމާއަށް ދެމީހުން ހިނގައިގަތެވެ. އަވަސްވެފައިވާ ހިތަކާއިއެކު އަލްކާއާ ނައިރާވެސް ހިނގަމުންދިޔައެވެ.

މޭޒު ދޮށުގައި އިނށީދެ ތިބި ޝިވަންއާ ޔައިޝް ފެނުމުން ދެކުދިންގެ މޫނަށް ޖަންބުކުލަ ވެރިވެގެން ދިޔައެވެ. އާޝޯޚުވެފައި އިނދެ އަލްކާއާއި ދިމާއަށް ޔައިޝް ބަލަމުންދިޔައިރު ޝިވަންވެސް ނައިރާގެ ރީތި ސޫރައަށް ބަލަމުންދިޔައެވެ. ހުދުކުލައިގެ ކައިވެނީގެ ހެދުމުގައި އަލްކާގެ ރީތިކަން އެތައްގުނައެއް އިތުރުވެފައިވިއެވެ. އަޅައިފައިވާ ބުރުގާގެ މަތި ޖަރީކޮށްފައިވަނީ ރަން ފަށްތަކަކުންނެވެ. އޭގެއިން އަރަމުންދިޔަ ކުލަވަރުން އަލްކާގެ މޫނުގެ ނަލަކަން އިތުރަށް ފުރިހަމަ ކުރަމުން ދިޔައެވެ. ޔައިޝްވެސްހުރީ އަލްކާއެކޭ އެއްފަދައިން ހުދުކުލައިގެ ކޯޓަކާއި ފަޓުލޫނެއް ލައިގެނެވެ.

ނައިރާ މިރޭ ލައިފައިވަނީ ރަތްކުލައިގެ ގަޔަށް ދޫ ބޮޑު ރީތި ހެދުމެކެވެ. ހެދުމުގެ މޭމައްޗާއި އަތް ވަނީ ހުދާއި ރަތުގެ މައު ތަކަކުން ޖަރީކޮށްފައެވެ. އަޅައިފައިވާ މަޑު ކްރީމް ކުލައިގެ ބުރުގާގައި ނިތްކުރިމައްޗަށް ވާގޮތަށް ހުދުކުލައިގެ އެސްތަކެއް ޖަހައިފައިވާ ވިދަމުންދިޔަ ރީތި ފަށެއްކަހަލަ އެއްޗެއް ހަރުކުރެވިފައި ހުއްޓެވެ. ޝިވަން ހުރީ އެތެރެއިން ހުދު ގަމީހެއް ލުމާއެކު ބޭރުން ގަދަ ނޫކުލައިގެ ކޯޓަކާއި ފަޓުލޫނެއް ލައިގެންނެވެ. ދެމީހުންގެ ރީތިކަންވެސް މިރޭ އެތައް ގުނައަކަށް އިތުރުވެފައިވާކަމަށް ދައްކައެވެ.

މަޑުހިނގުމެއްގައި ގޮސް ޝަޔާނީ އަލްކާ ޔައިޝް ގާތުގައި ބެއިނދިއެވެ. މައުރީންވެސް ހިނިތުންވެހުރެ ނައިރާ ގެންގޮސް ޝިވަންއާ ޖެހިގެންއިން ގޮނޑީގައި ބެއިނދިއެވެ. އެއާއެކު ގާޒީ ކައިވެނީގެ ޚުތުބާ ފެއްޓިއެވެ. ދެމީނުންގެ ދުލުންވެސް އަނބި ގަބޫލުކޮށްފީމޭ ބުނި ވަގުތުކޮޅުވީ ނައިރާއާއި އަލްކާގެ މުޅި ހަޔާތުގައިވެސް އައި އެންމެ އުފާވެރި ވަގުގުކޮޅަށެވެ. އިސްޖަހައިގެންތިބެ ހިނިތުންވެވުނު އަލްކާއާ ނައިރާގެ މޫނަށް ޔައިޝްއާއި ޝިވަން ބަލައިލީ ލޯތްބާއެކުއެވެ. މިމަންޒަރު ބަލަންތިބި ކޮންމެ މީހެއްގެ މޫނުމަތީގައިވެސް ފުޅާ ހިނިތުންވުމެއް ވިއެވެ.

ކައިވެނި ޕާޓީ ފެށުމާއެކު ދެޖިންސްގެ މީހުންތައް ދޮރުން ވަންނަމުން އައެވެ. ކޮންމެމީހަކުވެސް ދަނީ ކައިވެނިކުރެވުނު ދެ ޖޯޑަށްވެސް މަރުހަބާކިޔައި ހެޔޮދުއާ ކޮށްފައެވެ. ދެގަޑިއިރަށް ދެމިގެންދިޔަ ކައިވެނި ޕާޓީ ނިމުމާއެކު ވަރުބަލިވެފައިވާ ދެޖޯޑުވެސް ބޭނުންވީ ކައިގެން ގެއަށް ދިއުމަށެވެ. އާއިލާއާއި ވަދާއީ ސަލާމް ކުރުމަށްފަހު އަލްކާ ޔައިޝްއާ އެކު އޭނާގެ ގެއަށް ދިޔައިރު ނައިރާ ދިޔައީ ޝިވަންއާއެކު އޭނާގެ އެޕާޓްމަންޓަށެވެ.

** ** **

“ވަރަށް ވަރަށް ލޯބިވޭ.” ދެމީހުންނަށްޓަކައި ތައްޔާރުކުރެވިފައިވާ ކޮޓަރިއަށް ވަދެވުމާއެކު ލޯބިން އަލްކާ އުރައިލަމުން ޔައިޝް ބުނެލީ މަސްތީ ރާގަކަށެވެ. އަލްކާވެސް ހިނިތުންވެފައި އޮވެ ޔައިޝްގެ ކަރުގައި އަތްއަޅުވައިލަމުން އެމޭމަތީގައި މޫނު ފޮރުވައިލީ ލަދުވެތިކަމާއެކުއެވެ. އަލްކާގެ މިލޯބިވެތި އަދާގެ ސަބަބުން ޔައިޝްގެ ކެތްތެރިކަން ކޮޅުންލަމުން ދިޔައެވެ. ލޯތްބާއެެކު އަލްކާ ގެންގޮސް އެނދުގައި ބާވައިލުމަށްފަހު އެނދު ކައިރީގައިހުރި މޭޒުމަތީގައިހުރި ބެޑް ލޭމްޕްގެ އަލި ޔައިޝް ފަނޑުކޮށްލިއެވެ. އަދި ހިނިތުންވެހުރެ އަލްކާ ގަޔާލައި ބޮނޑިކޮށްލީ އެދޭތެރެއަށް ވައިރޯޅިއަކަށްވެސް ނުވަދެވޭނެ ފަދައިންނެވެ. ކޮޓަރީގައި ދިއްލައިފައިހުރި އުއްބައްތީގެ އަލީގައި ފާރަށް އެޅިފައިވާ ދެމީހުންގެ ހިޔަނި އެކަތިގަނޑަކަށްވެގެން ދިޔައީ ކުޑަހިނދުކޮޅެއްގެ ތެރޭގައެވެ.

** ** **

ފާޚާނާއަށްވަދެ ހެދުން ބަދަލުކޮށްލައިގެން ނުކުތް ނައިރާ ފެނިފައި ޝިވަންއަށް ހިނިތުންވެލެވުނެވެ. ފައިގެ ފަލަމަސްގަޑުގެ މެދަކާއި ހަމައަށްއަރާ ރަތްކުލައިގެ ލޭސް ނައިޓީގައި ނައިރާ ހީވަނީ ދެންމެ ފޮޅިފައިވާ ތާޒާ ފިނިފެންމަލެއް ހެންނެވެ.

ތުވާލި ހަރުގައި އަޅުވައިލި ނައިރާ ސިހުނީ ޝިވަން އައިސް ފަހަތުން އޭނާގެ ގައިގައި ބައްދައިލުމުންނެވެ. ބޮލުގައި ޖަހައިފައިވާ ހުޅީގެ ސަބަބުން ހާމައަށް އޮތް އެދޮން ކަނދުރާގައި ޝިވަން ބޮސްދިނެވެ. އެއާއެކު ނައިރާ ލަދުވެތިގޮތަކަށް ހިނިތުންވެލިއެވެ.

“ނައި. މިއީ ކައިވެނީގެ ހަދިޔާއެއްގެ ގޮތުން އަހަރެން ނައިއަށްދޭ އެއްޗެއް.” ނައިރާ އޭނާއާއި ދިމާއަށް އަނބުރައިލަމުން، ޝިވަންގެ އަތުގައި އޮތް ފޮތް ނައިރާގެ އަތުތެރެއަށް ލައިދެމުން ޝިވަން ބުނެލިއެވެ. އަތުގައި އޮތް ފޮތަށް ބަލައިލުމާއެކު ނައިރާގެ މޫނުމަތި އުޖާލާވެގެން ދިޔައެވެ. އެއީ ޝިވަން ރިހެބްއަށް ދާން އުޅެނިކޮށް މައުރީން އަތަށް ދީފައި ނައިރާ ޝިވަންއަށްދިން ކުޑަ ޑައިރީއެވެ. އަވަސް އަވަހަށް ފޮތް ހުޅުވައިލުމަށްފަހު ނައިރާ ބަލައިލިއެވެ. ކޮންމެ ގަނޑެއްގައިވެސް ޝިވަން ވަނީ ނައިރާއަށް އެޑްރެސްކޮށްފައި އެކިއެކި ލޯބީގެ ޅެންތަކާއި އިބާރާތްތައް ލިޔެފައެވެ. އެދުވަސްތަކު އޭނާ ނައިރާމަތިން ހަނދާންވާވަރާއި ލޯބިވާ ވަރު ބަޔާންކޮށްދީފައިވެސް ބައެއް ޅެންތައް ލިޔެފައިހުއްޓެވެ. ވުގުތުން ނައިރާގެ ދެލޯ ފެންކަޅިވިއެވެ. ޝިވަން އޭނާދެކެ ލޯބިވާ މިންވަރު އިހުސާސު ވެގެން ދިއުމާއެކު ރޮވިފައިހުރެ ނައިރާ ޝިވަން ގައިގައި ބައްދައިލިއެވެ. “އައި ލަވް ޔޫ ޝިވަން. އައި ލަވް ޔޫ ސޯ ސޯ ސޯ މަޗް.” ޝިވަންގެ ހަށިގަނޑުގައި ބާރަށް އޮޅުލައިގަންނަމުން ނައިރާ އެހެން ބުނުމާއެކު ހީލައިފައި ޝިވަންވެސް އެބަސްތަކުގެ ޖަވާބު ދިނެވެ. އަދި އަތްދަނޑި މައްޗަށް ނައިރާ އުފުލައިލަމުން ގެންގޮސް އެނދުގައި ބާވައިލިއެވެ.

ނައިރާގެ އިސްތަށިގަނޑުގައި ޖަހައިފައިވާ ހުޅި ނައްޓައިލަމުން ޝިވަން އެފަން އިސްތަށިގަނޑުން ލޯތްބާއެކު ވަސްގަނެލިއެވެ. އަދި ކޮޓަރީގައި ދިއްލައިފައިވާ ބޮކި ނިއްވައިލަމުން ނައިރާއާ ގާތްވެލިއެވެ. އެވަގުތު ނައިރާގެ ލުއި ހީލުމުގެ އަޑު މަޑު މިއުޒިކެއް ފަދައިން ކޮޓަރިއަށް ފެތުރިގެން ދިޔައެވެ.

=ނިމުނީ=