ހިތް މިއެދޭ ސޫރައޭ ތީމަގޭ

ގަލަން އަތަށް ހެޔޮވަރު ކޮށްލުމަށްފަހު އިސްއުފުލާ ބަލާލި އަޔާންގެ ދެބުމަ ގޮއްޖެހިގެން ދިޔައީ ކުރިމަތީއިން ކުއްޖާ ފެނުމުންނެވެ. ޝާނިމްވެސް ހުރީ ދެންވާނެ ގޮތެއް ނޭނގޭތީ އަނގަމަތީ އަތްއަޅާލި ގޮތަށެވެ. އެވަގުތު އެތާ މީހުން މަދުކަން ނަސީބެވެ. ” ޔާލް ޝާހިދު” އަޔާންގެ ދުލުން ޔާލްގެ ނަން ބޭރުވީ ރުޅިވެރިފާޑަކަށެވެ. މިއޮއް ހުރިހާއިރު އަޔާންގެ މޫނަަށް ނަޒަރު ހުއްޓައިލައިގެންހުރި ޔާލް ސިއްސައިގެންގޮސް އިސްޖެހިއެވެ. އަހަރެންވާން މިޖެހެނީ މީނަގެ ސެކެޓްރީއަކަށް ހެއްޔެވެ؟ އެހެންވެއްޖެނަމަ އޭނަ އަހަރެން ރޮލާ ކާލާކަށްވެސް ފަހެއްނުޖެހޭނެއެވެ. ޔާލްގެ ހިތަށް އަރަމުންދިޔަ އެއްޗެހިން މީހާ ދާހިތްލާ ފޯވިއެވެ. ނަމަވެސް ހިތުގެ ރާޖާ ގާތުގައި މަސައްކަތްކުރަން ޖެހުމުން އުފާނުވާނީ ކާކު ހެއްޔެވެ؟ އުފަލަށްވުރެ ބޮޑަށް ޔާލް ގަތީ ބިރެވެ. މި މަގާމަށް ހޮވިއްޖެނަމަ އަޔާން ރުޅިވެރިކަމުގެ ނަޒަރުން ސަލާމަތް ނުވެވޭނެއެވެ. އިންޓަރވިއު ނިމުނުއިރުވެސް ދެމީހުންގެ ހިތުގައިވީ ހައިޖާނުގަނޑު އެހާމެ ބޮޑެވެ. “ދެން ހެޔޮ ދިޔަޔަސް..” ފަރުވާކުޑަ ގޮތަކަށް އަޔާން ބުނެލުމުން ޔާލްގެ ހިތަށް ތަދުވިއެވެ. ނަމަވެސް އޭނާއަކީ އިހްސާސްތައް ފޮރުވުމުގައި އެއްވަނައެވެ. މޫނުމަށްޗަށް ލުއި ހިނިތުންވުމެއް ގެނައުމަށްފަހު ކޮޅަށްތެދުވެ އަޔާންގެ ގަމީހުގައި އިން ނަން ބެޖަށް ނަޒަރުހިންގާލިއެވެ. “މުހަންމަދު އަޔާން ފަޔާޒު”ޔާލްއަށް މަޑުމަޑުން ކިޔާލެވުނެވެ. ” އާނ. އަހަންނަށް ކިޔަނީ އަޔާންއޭ! ދެން ތިވަރަށް ނުބަލާ ދާންވީނުދޯ..” އަޔާންގެ އަޑުއިވުމުން ޔާލް ދިޔައީ ސިއްސައިގެންނެވެ” މީ ހާދަ ކަންފަތްވެސް ތޫނު މީހެކޭދޯ.” ޔާލް ހިޔާލެއްގައިހުރެ ބޭރަށް ނުކުތެވެ.” ވަރުގަދަ ފިރިހެނެއް! އަދިވެސް އެރުޅިގަނޑު މައިތިރިނުވޭ..” ކިތަންމެ ވަރަކަށް ޔާލްގެ ދުލުން އަޔާންއާއި ދިމާލަށް އެއްޗެހިކީ ނަމަވެސް އެބަސްނާހާ ހިތް އެދެނީ އެ ސޫރައެވެ. ލޯތްބަކީ އެކަހަލަ އެއްޗެކެވެ. “އަހަމް އަހަމް.. ކާކުތަ މާ ވަރުގަދަވެގެން ތިއުޅެނީ..؟ ކަރުކެހިލަމުން ޔާލްގެ ކުރިމައްޗަށްއެރި ނޫރާ ފެނި ޔާލްއަށް ދެލޯ ބޮޑުކޮށްލެވުނެވެ. އެންމެ ގާތް އެކުވެރިޔާއާއި ބައްދަލުވުމުން ފުޅާ ހިނިތުންވުމަކާއެކު ޔާލް ނޫރާގައިގައި ބައްދާލިއެވެ. “ނޫ.. މިތާ ކޮންކަމެއް؟؟” ” ފުރަތަމަ ޔާލް ބުނެބަލަ.. ޔާލް ކޮންކަމެއް؟؟.. ” ދެމީހުންވެސް ހުރީ ދޫކުރާގޮތަކަށް ނޫނެވެ. ” މިއުޅެނީ ވަޒީފާގެ އިންޓަރވިއުއަށް އައިސް..” ޔާލް ފެންފޮދެއްބޯލަމުން ވާހަކަދެއްކިއެވެ. ” އަހަރެން މިއުޅެނީ މިތަނުގެ ވަޒީފާތަކުގެ މައުލޫމާތު ކޮޅެއް ސާފުކޮށްލާ.. މިތަނާ ހަވާލުވެ ހުންނަނީ އަޔާން އެންނު.. މަޝްހޫރު ބިޒްނަސް ޑީލަރ ފާއިޒްގެ ދޮށީދަރި އެއީ..” ނޫރާ ފޯނުބަލަމުން ވާހަކަ ދެއްކިއެވެ. ފެންބޯންހުރި ޔާލް ވަގުތުން ކޮށިއެރިއެވެ. “އޭތް.. ކިހިނެއް ތިހެދީ..؟؟” ނޫރާ މަޑުމަޑުން ޔާލްގެ ބުރަކަށީގައި ޖަހާލަމުން ބުނެލިއެވެ. “ކަމެއްނުވޭ.. ދެން ދަނީއޭ..މިއޮތީ ނަންބަރު.. ގުޅައްޗޭ.. ވާނެ ގެޔަށްވެސް އަންނަން..” ޔާލް ނޫރާއަށް ނަންބަރު ޖަަހައިދެމުން ބުނެލިއެވެ.*************************************************************************
“އަދި މާވެފަ އައިއްސިއެންނު ވަޒީފާއަށް.. ރީއްޗަށް ވަޒީފާ ދޭނަމޭ މިފަހަރު..” އަޔާން ގޮނޑީގައި ލެގިލީ ޔާލްގެ ފައިލްނަގާހުޅުވާލަމުންނެވެ. “އޭ ބުރޯ ތިހެން ނުހަދާތި. އެ މަންޖެ އެހާ އުންމީދާއެކު އައިމަވެސް ތިހުރީ އަޔާގެ ވިސްނުންހުރި ގޮތް.. ރުޅި އަޔަސް ތިވަރު ވާކަށްނުވާނެ…” ޝާނިމް ހުރިހާ ވާހަކައެއް ދައްކާ ނިންމާލުމަށްފަހު އަޔާންއާއި ދިމާލަށް ބަލާލިއިރު އޭނާ އިނީ އަނގަހ ހުޅުވިގޮތަށް ލައްޕަން ނޭންގިފައެވެ. ” ކޮބާ.. ތިހުރީ ވެފަ.. ދެން މާދަން ޔާލްއަށް ވަޒީފާއަށް ނިކުންނަން ގުޅަ.. ބަލާބަލަ ތިހުރީ އެންމެ މަތީ ފާހުގެ ސެޓްފިކެޓްތަށް… ޔަގީން އިންޓަރވިއުއަށް އައި އެހެން ކުއްޖަކު ތިވަރެެއްނުވާނެކަން..” އަޔާންގެ އަނގަ ލައްޕާލަމުން ޝާނިމް އެހެން ބުނުމަށްފަހު ދިޔަައީ ފޯނެއް އައުމުންނެވެ. އާނއެކެވެ. ޔާލް އާއި ގާތްކޮށްލެވޭވަރުގެ އިތުރު ކުއްޖަކުނެތެވެ. ހިތާ ދެކޮޅަށް ނަމަވެސް މިޖެހުނީ ޔާލް ހޮވާށެވެ. އަޔާން މަޑުމަޑުން ނިތްކުރިމަތީ އަތްހިންގާލިއެވެ. އެނދުގައި ދެއަތަށް ފުރޮޅިލައި އޮތް ޔާލްއަށް އޮތީ ނުނިދިފައެވެ. އަޔާން އޭނާއަށް ވަޒީފާ ދޭނެކަމާމެދުވެސް ޝައްކެވެ. ކޯކު ތަށްޓެއް ބަންޑުންވެގެން އެހައި ރުޅި އަންނަންޖެހޭ ހެއްޔެވެ؟ އަޖައިބެއްފަދަ ޒުވާނެކެވެ. ކޮންމެ ގޮތެއްވިޔަސް މާދަން އެނގޭނެތާއެވެ. އަޔާންގެ ވިސްނުމުގައި އޮއްވައި ނިދުނުއިރެއްވެސް ނޭނގެއެވެ. ***************************************************************
“ޕިސް ޕިސް.. ދެންހަމަ އޭނަޔަށް ޖޮބް ދޭންވީތަ؟؟ އަޔާން އިނީ ބެލްކަނީގެ ރެއޮލިންގައި އަތްއަޅުވައިލައިގެންނެވެ. ފަޒާގައި ތެތްފިނިކަމުގެ އަސަރު ހިފާފައިވީއިރު ފާޅުކަންބޮޑު ގޮތެއްގައި އުުޑުމަތީގައި ތަރިތަށް ވިދަވިދާހުށްޓެވެ. ހަނދުވަރުދޭ ރީތި ރެއެއްނަމަވެސް ކަޅުބޯ ވިލާތަކުން އުދުމަތީގައި ސާލެއްލެވޭކަށް މާގިނައިރެއް ނުނެގިއެވެ. އަޔާން ވިސްނުންތަކުން ދުރުވަމުން އެތެރެއަށް ހިނގައިގަތީ ވާރޭ ކެރި ޖަހަންފެށުމުންނެވެ..
ޖެހިގެންއައި ދުވަހު ހެނދުނުގެ ވަގުތު ޔާލް ހުރީ ބިމަށްޖެހި މުޑިއެއްހެން ހުއްޓުން އަރާފައެވެ. އަޔާންގެ އޮފިހުން އޭނާއަށް އެގުޅީ އޮޅިގެން ހެއްޔެވެ؟ މިއަދު އިރުއެރީ ކޮންފަރާތަކުން ހެއްޔެވެ؟ ވަޒީފާ ލިބުމުން އުފާވިނަމަވެސް ޔާލް ހުރި ވާނުވާގައެވެ. އެކިހިޔާލުތަކުގައި ހުރެ މަންމަ ކައިރީ ޗަޒީފާ ލިބުނު ވާހަކަ ބުނުމަށްފަހު ރެޑީވެގެން ކުޑަ ހިފައިގެން އޮފިހާދިމާލަށް މިސްރާބުޖެހިއެވެ….
އޮފީހަށް އައިސް ވަދުނު އަޔާން ހުރީ ތެމިފޯވެފައެވެ. ކެބިންއަށްގޮސް ބަލާލިއިރު ޔާލްއަށް ވަކިން އޮފިޝަލް މޭޒެއް ހުއްޓެވެ. ޝާނިމް އެއޮށް އަވަހާ މޭޒު ރާވާލީހެއްޔެވެ؟
ކުޑަ ލައްޕާލުމަށްފަހު އޮފީހަށްވަދެގެން އައި ޔާލް ކުރިމަތިންދިޔަ ޝާނިމްއަށް ގޮވާލިއެވެ. ” ޝާނިމް.. ހަމަ އަހަރެންނަށްތަ ޖޮބް ހަމަޖެހުނީ؟؟؟” ޝާނިމް ދެޖީބަށް އަތްޖަހާލިއެވެ. ” ހެހެ. އާނ މަންޖޭ.. ގަބޫލުވެސް ނުކުރެވޭދޯ.. އެއީ އަސްލު ޔާލްގެ އެޑިއުކޭޝަން ލެވެލް ހައިވީމަ.. އެކަމު ކޮންމެސް ބަލައިގެން އުޅޭތި.، އަޔާން ވަރަށް ހަރުކަށިވާނެ.. މިހުރީ އަޔާން ކެބިން.. ޔާލް މަސައްކަތްކުރަން ޖެހޭނީ މިތާ..” ކެބިންގެ ދޮރާދިމާލަށް އިޝާރާތް ކޮށްލަމުން ޝާނިމް އެހެން ބުނުމަށްފަހު ދިޔައެވެ. މަޑުމަޑުން ކެބިންގެ ދޮރު ހުޅުވާލުމަށްފަހު ޔާލް ބޯދިއްކޮށްލިއެވެ. އޭނާއަށްވީ މޭޒުމަތީ ދަބަސް ބެހެއްޓުމަށްފަހު އެނބުރިލިވަގުތު އަޔާންގެ މޭޒުމަތީއިން ފޮޓޯ ފްރޭމް ލޮލުގައި އަޅައިގަތެވެ. އެފޮޓޯ ފްރޭމް ފެނުމުން ޔާލްއަށް ބޭއިކްތިޔަރުގައި ހިނގައިގަނެވުނެވެ. ކޮންފަދަ ރީތި ދެލޮލެއް ހެއްޔެވެ؟ ހިތްކަތިލާފަދަ ހިނިތުން ވުމެކެވެ. އަޔާންގެ ފޮޓޯއަށް ހިތާލިތުން ތަަަޢރީފުކޮށްލެވުނެވެ. ނަމަވެސް މިއިން ދުވަހަކުވެސް މި ލޯބި ލިބޭނެބާއެވެ. އަޔާންގެ ހިތުގައި އޭނައށްވަނީ ނަފްރަތެވެ. ހުސް ނަފްރަތެވެ، ދެލޯމަރާ ބާރުކޮށްލެވުނީ ހިތަށްކުރި އަސަރަކުންނެވެ. ލިބެންނެތް ލޯތްބެއް ހޯދަން އުޅުމަކީ ބޭކާރުކަމެކެވެ. ޔާލް ނިންމީ އެލޯބީގެ މަށްޗަށް ރުލިވެރިކަން ފޯރުވުމަށެވެ. ފޮޓޯ ފްރޭމް ބެހެއްޓުމަށްފަހު އެނބުރުނު ޔާލްގެ މޫނުޖެހުނީ ސިދާ އަޔާންގެ ތަނަވަސް މޭމަތީގައެވެ. ފޮގް ސެނޓުގެ މީރުވަސް ޔާލްގެ ނޭފަތުގައި ޖެހުނެވެ. މަޑުމަޑުން އިސްއުފުލާ ބަލާލިއިރު އަޔާންގެ ދެލޮލުގައިވީ މަލާމާތެވެ. އަޔާންގެ މޫނު އެހާގާތުން ފެނުމުން ޔާލްގެ ހިތް ބާރުބާރަށް ތެޅެންފެށިއެވެ. ކިތަންމެ މަސައްކަތްކުރިޔަސް އެހިތަށް އަސަރު ފޯރުވާނެގޮތެއް ޔާލްގެ ވިސްނުމަކަށްނައެވެ. ހިތް އިހްތިޔާރުން ބޭރުވެދާނެތީ އަވަސްހަރަކާތަކާއެކު ތިރީ ތުންފަތުގައި ދަތް އަޅާލުމަށްފަހު ޔާލް ހިނގައިގަތެވެ. ނަމަވެސް ޔާލްގެ ނޭވަ އަރުތެރޭ ތާށިވީ އަޔާން ކުއްލިހަރަކާތަކާއެކު ޔާލްގެ އަތުގައި ހިފައި ގެންގޮސް ފާރުގައި ލައްކޮށްލުމުންނެވެ. މިހާރު އެ ބެލުމުގައިވީ ރުޅިވެރިކަމެވެ. ދެމީހުންދޭތެރޭ ވައިރޯޅިއަކަށްވެސް ވަދެވޭހާ ޖާގަވެސް ނެތެވެ. “ބުނަންތަ.. އަހަރެން ޔާލް ޖޮބަށް ހޮވީ ހިތްހެޔޮވެގެނެެއްނޫން..އަހަރެން ޔާލްއަށް ކުރާ ނަފްރަތަށް ދުވަހަކުވެސް ބަދަލެއްނާންނާނެ.. އެކަން ހަނދާނުގައި ބަހައްޓައިގެން އުޅޭނީ..!! ” އަޔާންގެ ހޫނު ނޭވައި އެޅޭ ހިސާބުގައިހުރި ޔާލް ދެލޯ މަރާ ބާރުކޮށްލިއެވެ. އަދި އިހްސާސްތަކުގެ މައްޗަށް ބާރުފޯރުވަން މަސައްކަތް ކުރިއެވެ. ” އަހަންނެއް ނޫޅެން ކޮންމެހެން އަޔާންގެ ރުހުން ހޯދޭތޯއެއް.. ދޫކުރެ.. އަހަރެން ދާންވެއްޖެ.. ” ރުޅިވެރި އަޑަކުން ޔާލް ހިތާ ދެކޮޅަށް ވާހަކަ ދެއްކިއެވެ. ދެމީހުންނަށްވެސް ކުއްލިއަކަށް ދުރަށްޖެހިލެވުނީ ކެބިންގެ ދޮރުގައި ޓަކިޖަހާލި އަޑުއިވުމުންނެވެ. ލިބުނު ފުރުސަތުގައި ޔާލް ގޮސް ގޮނޑީގައި އިށީނދެލިއެވެ. މަސައްކަތުގައި މަސްއޫލުވެ އިން ޔާލްއަށް އިރުއިރުކޮޅުން އަޔާންގެ ރީތި ސޫރަޔަށް ބަލާލެވެއެވެ. ކުއްލިއަކަށް ފޯނަށް މެސެޖެއް އައިސްގެން ބަލާލިވަގުތު އެއީ ނުދަންނަ ނަންބަރަކުން ކޮށްފައިވާ މެސެޖެކެވެ. ” އަދި ތިހެން ސަލާމަތެއް ނުވެވޭނެ” މެސެޖުގައިވި މިހެންނެވެ. ޔާލް ދެން ބަލާލީ އަޔާން އަށެވެ. ފޯނު އަތަށްލައިގެން ތުންފަތަށް މަލާމާތުގެ ހިނިތުންވުމެއްވެރިކޮށްލަމުން އަޔާން އެއްބުމަ އަރުވާލިއެވެ.. މިހާރު މީނަ ފޯނުންވެސް އިންޒާރުދޭން ފެށީއެވެ. އަޅާވެސް ނުލާ ހުރިހާ މަސައްކަތްތަކެއް ނިންމުމަށްފަހު ދަބަސްއަޅުވާލައިގެން ހިނގައިގަތެވެ. ” މިރޭވެސް އޮފީހަށް އަންނާތި… މާދަމާއަށް ނިންމަންޖެހޭ ޕްރެސެންޓޭޝަންއެއް އެބައޮތް… ސީދާ އަށްގަޑި ފަނަރައަށް އަންނާތި.. ނޯ އެސްކިއުޒް..!!” މޭޒުމަތީހުރި ގަނޑުތަކަށް ނަޒަރު ހުއްޓައިލައިގެންހުރެ އަޔާން ބުނެލިއެވެ. ” ނޯ އެސްކިއުޒް” ފާޑަކަށް އަނގަޔަށް ވަށްތަރެއްޖައްސާލަމުން ޔާލް ނިކުމެގެން ދިޔައެވެ. މަގުމަތީގައި ހުރި ފެންކޯރުތަކުން ރެކެމުންދިޔަ ޔާލް ހުއްޓުން އެރީ މުޅި މީހާގަޔަށް ޗަކަ ބުރުމުންނެވެ. މޫނުމަތި ފޮހެލުމަށްފަހު ބަލާލިއިރު އަޔާންގެ ކާރު ދާތަންފެނުނެވެ. ޔާލް އައީ އަމަށަކު ރުޅިއެއްނޫނެވެ. ހުރިތާ ހުރެ ހަޅޭއްލަވައިގަނެވުނެވެ. ކާރުތެރޭ އިން އަޔާންގެ މޫނުމަތީގައިވީ ކާމިޔާބީގެ ހިނިތުންވުމެކެވެ. އެތަށް ގޮތަކުން ޔާލްގެ ކިބައިން ބަދަލުހިފުމަށް އަޔާން އަޒުމުކަނޑައެޅިއެވެ. ނަމަވެސް ކުރިޔަށް ވާނެ ގޮތެއް އިނގޭނީ ވަކި ކިހިނެއް ހެއްޔެވެ؟؟ **************************************************************
އެރޭ ޔާލް އުޅުނީ ކިނބިހި އަޅާވަރުންނެވެ. ސައިނަސްގެ ކަންތަށް ހުންނާތީ މިއަދު މާ ބޮޑުވަރުވެސްވެއްޖެއެވެ. ” އަން.. މިބޭސް ގުޅަ ކާލައިގެންދޭ އޮފީހަށް.. ދެންވެސް ވާރޭ ނުތެމޭތި.. ” ޔާލް އަތަށް ބޭސްގުޅައެއް ލައިދެމުން ޔާލްގެ މަންމަ ނަސީމާ ވާހަކަ ދެއްކިއެވެ. ޔާލް އަށް ހުރިހާކަމެއް ޖެހުނީ އަޔާންއާ ހެދިކން ޔާލްވަނީ އެނާ މަންމައަށް ސިއްރުކޮށްފައެވެ…
އޮފީހުގެ ތެރެއަށް ވަދެގެން ދިޔަ ޔާލް ހުއްޓުންއެރީ އެއްވެސް އަލިކަމެއް އެތެެެރޭގައި ނެތުމުންނެވެ. “ބަލަ އަހަރެން އެބަހުރީމޭ” ކުއްލިއަކަށް އަޔާންގެ އަޑު އެހާ ގާތުން އިވުމުން ޔާލް ދިޔައީ ސިއްސައިގެންނެވެ. ފޯނުން އަލިކޮށްގެން އަޔާންގޮސް ސާކެޓް ޖަށްސާލިއެވެ. އެޔާއެކުނ މުޅިތަން އަލިވެގެން ދިޔައެވެ. ޔާލް އިނީ އަދިވެސް ނޭފަތްމަތީ ތިޝޫއެއް އަަަަޅައިގެންނެވެ. ކިނބިހި އެޅުމުގެ ސަބަބުން ނޭފަތަށް މަޑު ރަތްކުލައެއް އަރާފައިވެއެވެ. ” އަހަަރެން މިއާދެވުނީ ކުނިގޮނޑަކަށް ވަދެވިފަތަ..؟” ކުއްލި ހަރަކާތަކާއެކު ދެ ކޮނޑުން ވަސް ބަލާލަމުން އަޔާން ބުނެލި ގޮތުން ޔާލްގެ ހިނިގނޑު ދިޔައީ ފަޅައިގެނެވެ. ” މާ ވައްތަރު ޖައްސާނެ ކަމެއް ނެތް.. މީ ހުސް އަޔާންގެ ކަންތަކޭ..” ނޭފަތް ދަމާލަމުން ޔާލް ދެލޯ އަޅާލިއެވެ. “ތިކަހަލަ މީހުނަށް ރަނގަޅުވާނީ ތިހެން ވިއްޔާ.. ދޭ އަވަށް.. އެތާ ހުންނާނެ ޓައިޕް ކުރަންވީ ލިޔުންތަށް..” ފޯނު ޖީބަށްލަމުން އަޔާން ބުނެލިއެވެ. ” ހެވޭ..” ޔާލް ގޮސް މަސައްކަތް ފެއްޓިއެވެ… އިރުކޮޅެއްފަހުން އަޔާންގެ ފޯނު ރިންގުވާން ފެށިއެވެ. ” ހަލޯ ދޫނީ.. ކިހިނެއްތަ؟؟ މިހާރު ހަނދާންވެސް ނުވޭދޯ..” އަޔާން ފޯނަށް ޖަވާބު ދިނެވެ. ” ހޫމް.. އޯކޭ.. ވަރަށް މިސްވޭ އިނގެ.. ލަވް ޔޫ.. ބާއި…” ޔާލް އެންމެ ހިނދުކޮޅަކުވެސް އެތާ މަޑުނުކޮށް ހިނގައިގަތެވެ. ގަނޑުތަކަށް ގެއްލިފައި އިން އަޔާންއަށް އެކަން ރޭކާލީ މާ ފަހުންނެވެ. ދުވެފައި ކަހަލަ ގޮތަކަށް ޔާލް ހުއްޓުވުމަށް ދިޔައީ ހުރިހާ މަސައްކަތެއް ނުނިންމާ ދިޔަ ކަމަށް ހީކޮށެވެ. އަޔާން ބޭނުންވަނީ ޔާލް އަށް ވީހާވެސް ބޮޑަށް ބުރަކޮށްލުމެވެ. އަދި އަމިއްލައަށް ވަޒީފާއިން ވަކިވާވަރު ކޮށްލާށެވެ. ” ބިޓާ ވާހަކަ ދެއްކިޔަސް މުޅިތާ މީހުން އެއްކުރާވަރަށް އަޑުވެސް.. ” ޔާލް އަށް ރުޅި އިސްކުރެވުނީ އަތުގައި އޮތް ކުޑައަށެވެ. ނަމަވެސް ދެވަނަ ސިކުންތުގައި ފަހަތް ބަލާލެވުނީ ދުވެފައި އަންނަ މީހެއްގެ ފިޔަވަޅުގެ އަޑުޖެހުމުންނެވެ. ގުދޭވަރަކަށް ބާރަށް ދުވެފައި އައި އަޔާންއަށް ހަށިގަނޑުން ބެލެންސް ނުކުރެވުނީ ތަށިމުށިމަތީނހުރި ފެންތަށް މަށްޗަށް އެރި ކައްސާލުމުންނެވެ. އެދިޔަގޮތަށްގޮސް އަޔާން ލައިގަތީ ފަހަތް ބަލާލި ޔާލްގެ ގައިގައެވެ. ކުއްލިއަކަށް އެހެންވުމުން ރެކެން ނޭނގި ހުރި ޔާލްވެސް އަޔާން އާއެއްކޮށް ބިންމައްޗަށް ވެއްޓުނެވެ. ޔާލްއަށް އޮވެވުނީ އަޔާންގެ ގައިމަތީ ކަހަލަ ގޮތަކަށެވެ. އަވަސް އަވަހާ ތެދުވި ޔާލްގެ ލޮލުގައި އަަޅައިގަތީ އަޔާންގެ ބޮލުގައި ފަޅައިގެންގޮސްފައިވާ ތަނެވެ. ދެންމެ އަޔާންދެކެ އެހާ ރުޅިއަިސްފައިހުރި ޔާލްގެ ރުޅިގަނޑު ދިޔަތަނެއް ނޭނގުނެވެ. ” އަޔާން.. ތިއޮއް ލޭ އަންނަނީ ބޮލުން… ހިނގާ ހޮސޕިޓަލަށް ދާން..” އަޔާންގެ ބޯ ޔާލްގެ އުނގުމަތީގައި ބާއްވަލަމުން ބުނެލިއެވެ. ނަމަވެސް އަޔާން ބޮލުގައި އަތް އަޅައިލަމުން ޔާލްގެ އުނގުމަތިން ތެދުވިއެވެ. ” ނުދާނަން… އެހެންނޫނަސް ޔާލްއަށް ކީއް..! މަސައްކަތްތަށް ނިންމަންދޭ..” މިހެން ބުނެލުމަށްފަހު ހިނގައިގަތް އަޔާންގެ ބޮލަށް އެނބުރުން އަރައިގެން ދިޔައެވެ. ޔާލްއަށް އަޔާން ވެއްޓުނަނުދީ ހިފަހައްޓާލެވުނީ ހަމަ ކިރިޔާއެވެ. “އަހަރެން މިއައީ ހުރިހާ އެއްޗެއް ނިންމާފައޭ.. ހޮސޕިޓަލަށް ނުދަންޏާ ހިނގާ ބޭސް އަޅަން..” އެ އަޑުގައި އެކުލެވިގެންވީ ހާސްކަން އަޔާންއަށްވެސް ސިއްރުވާނެހެނެއް ހިޔެއްނުވެއެވެ. ” އަޔާން ގޮނޑީގައި ބާންދާލަމުން ޔާލް އައީ ފަސްޓް އެއިޑް ބޮކްސް ހިފައިގެންނެވެ. ދެން އިތުރު ގޮތެއްނެތުމުން އަޔާން ޖެހުނީ ހަތިޔާރު ބަހައްޓާށެވެ. އަދި ދެލޯ މަރާލުމަށްފަހު ގޮޑީގައި ލެގިލައި ހަމަޖެހިލިއެވެ. ކަފަކޮޅަކުން އަޔާންގެ ނިއްކުރިމަތީ ފަޅައިގެން ގޮއްސަހުރިތަން ސާފުކުރަން އިން ޔާލް އަޔާން މޫނަށް ނަޒަރު ހިންގާލިއެވެ. އެހެން އޮންނައިރު ކިހާ މައުސޫމު ހެއްޔެވެ؟ ބޭސް އަޅައި ނިމުމުން ދެލޯ ހުޅުވާލި އަޔާންއާއި ޔާލްގެ ހަތަރު ކަޅި ހަމަވެގެންދިޔައެވެ. އަޔާން އަށް މިފަހަރު ޔަލްގެ ދެލޮލުން ފެނުނީ ތަފާތު އަސަރެކެވެ..