ތިޔަ އިންތިޒާރުގައި މަ ހުރީމޭ

މިއީ ހަގީގީ ހާދިސާއެއްގެ މައްޗަށް ބިނާކޮށް އަޅުގަނޑުގެ އަމިއްލަ ޚިޔާލުވެސް ހިމަނައިގެން ލިޔެފައިވާ ކުރު ވާހަކައެކެވެ.

** ** **

މެންދަމު ގަޑިން 2 ޖަހަނީއެވެ. ގޭގައި އުޅޭ އެންމެން ގަދަ ނިދީގައި ތިބިއިރު އަހަރެން އެއްވެސް ފޫހިކަމެއްނެތި ޕޯނުން އެކިއެކި ކުދިންނާ ޗެޓްކުރަމުން ދިޔައީމެވެ. އުމުރުން 20 އަހަރުވީއިރުވެސް އަހަރެންގެ ލޯބިވެރިއެއް ނުހުރެއެވެ. ހިތްކިޔާކަހަލަ ކުއްޖަކާ ދިމާނުވަނީއެވެ. އެކުވެރި ބައިވަރު އަންހެންކުދިން ތިބި ނަމަވެސް އޭގެތެރޭގައިވެސް އަހަރެންގެ ހިތްއެދޭފަދަ ސިފަތަކެއްގެ ވެރިއެއް ނެތެވެ.

އާފުރެން ފެށުމުން ޗެޓްކުރުން ހުއްޓައިލުމަށްފަހު އައިސް އެނދުގައި އޮށޯވެލީ ނިދައިލުމަށެވެ. މާކަގިނައިރުތަކެއްނުވެ އަރާމު ފުން ނިންޖެއްގެ ތެރެއަށް އަހަރެންނަށް ފީނައިގަނެވުނެވެ.

އިރުގެރަންދޯދި ކޮޓަރީގެ ކުޑަދޮރުގައި ހަރުކޮށްފައިހުރި ދޮރުފޮތިގަނޑުން ފޭދިގެން އައިސް އަހަރެންގެ މޫނަށް އެޅުމުން އުނދަގޫ ގޮތަކަށް ދެފަހަރަކު ލޯތަޅުވައިލުމަށްފަހު ދެލޯހުޅުވައިލީމެވެ. އެނދު ކައިރީގައި ހުރިކުޑަމޭޒުމަތީގައި ހުރި ގަޑިއަށް ބަލައިލުމަށްފަހު އަހަރެން ތެދުވީ ދެން ނުނިދޭނެކަން އެނގުމުންނެވެ. ފެންވަރައިލައިގެން ތިރިއަށް ފޭބިއިރު ގޭގައި ގެންގުޅޭ ކުއްޖާ ހެނދުނުގެ ނާސްތާ ތައްޔާރުކޮށް އުޅެއެވެ. ޓީވީ ބަލަންއިން މަންމަގެ މޫނަށް ބަލައިލުމަށްފަހު އަހަރެން ހިނިތުންވެލީމެވެ. އަދި ގޮސް އެތަނުން ސޯފާއެއްގައި ޖައްސައިލީމެވެ. އެތަންފެނި ގޭގައި ގެންގުޅޭ އެހެން ނޯކަރެއް އާވި އަރައަރާހުރި ކޮފީ ޖޯޑެއް ގެނެސް އަހަރެންގެ އަތަށް ދިއްކޮށްލިއެވެ.

“ދަރިފުޅާ މިފްޒާލް. ދަރިފުޅު އެޕްލައިކުރި ކޯހުގެ ކަންތައް މިހާރު ކިހިނެއް ކުރިއަށްދަނީ؟” ޓީވީ ސްކްރީނުން ނަޒަރު ވަކިކޮށްލަމުން މަންމަ އަހަރެން ގާތުގައި އަހައިލިއެވެ. “އޯ މަމް. ހަމަޖެހިބަލަ. އަދި އެޕްލައިއެއް ނުކުރަން. އަހަރެން ބޭނުން ކުޑަ ދުވަސްކޮޅެއް މަޖާކޮށްލާ ހިތްހަމަ ޖައްސައިލަން. އަންނަ އަހަރު އެޕްލައި ކުރާނީ.” ހަމަޖެހިލަމުން އަހަރެން ބުނީމެވެ. އެއާއެކު މަންމަ ދެފަރާތަށް ބޯހޫރުވައިލިއެވެ.

އަހަރެންގެ އާއިލާއަކީ މުއްސަނދި އާއިލާއެކެވެ. އަހަރެން ވަރަށް ކުޑައިރުގައި އަހަރެންގެ އާއިލާ ވަނީ އިންގްލޭންޑަށް ދިރިއުޅުން ބަދަލުކޮށްފައެވެ. އިންގްލޭންޑްއިން ބައްޕަ ގަތް ގެއެއްގައި އަހަރެންގެ އާއިލާ ދިރިއުޅެމުންދަނީ ވަރަށް އުފަލުގައެވެ. އަހަރެންގެ މައިންބަފައިންގެ އަހަރެން ފިޔަވައި އިތުރު ކުއްޖަކު ނުހުރެއެވެ. އެހެންކަމުން އެމީހުން އަހަރެންދެކެ އިންތިހާއަށް ލޯބިވެއެވެ. ބައްޕަ ވަޒީފާއަށް ދިއުމުން ގޭގައި ތިބެނީ އަހަރެންނާ އަހަރެންގެ މަންމަ އެކަންޏެވެ.

ދުވަސްތައް އޭގެ ހަލުވިމިނުގައި ފާއިތުވަމުން ދިޔައެވެ. އެއްރެއެއްގެ އިރާކޮޅުގެ ވަގުތެވެ. ފޫހިވެފައި އަހަރެން އޮންލައިންވެލިއިރު އާންމުކޮށް ޗެޓްކުރާ އެކަކުވެސް އޮންލައިގައެއް ނެތެވެ. ފޫހިކަމާއެކު އޮންލައިންގައި ތިބި މީހުންގެ ނަންތައް ކިޔަމުންދަނިކޮށް އަހަރެންގެ ލޮލުގައި އަންހެންކުއްޖެއްގެ ނަން އަޅައިގަތެވެ. “އެލީޝާ” އަހަރެންނަށް އެނަން ކިޔައިލެވުނެވެ. ހާދަ ލޯބިނަމެކޭ އަހަރެންގެ ހިތަށްއެރިއެވެ.

ފުންނޭވާއެއް ދޫކޮށްލުމަށްފަހު އަހަރެން އެކުއްޖާއަށް ހާއި ޖަހައިލީމެވެ. މާކަ ގިނައިރެއްނުވެ އެކުއްޖާ އަހަރެންނަށް ރިޕްލައިކޮށްލިއެވެ. ހިނިތުންވެފައި އަހަރެން އެލީޝާއަށް ޗެޓްކުރަންފެށީމެވެ. ދެމީހުންގެ ދެމެދުގައި ނަން ފިޔަވައި ޒާތީ އިތުރު އެއްވެސް މައުލޫމާތެއް ހިއްސާއެއް ނުކުރަމެވެ. އެކިއެކި މަޖާ ވާހަކަދެއްކުމުގައި ވަގުތުތައްދިޔަ ގޮތްވެސް ނޭނގެއެވެ. އެލީޝާގެ މިޒާޖު އަހަރެންނަށް ވަރަށް ކަމުދިޔައެވެ.

ފާއިތުވެދާ ކޮންމެ ދުވަހަކާއެކު އަހަރެމެން ދެމީހުންގެ ދެމެދުގައި އޮތްގުޅުން ވަރުގަދަވެ ބަދަހިވަމުން ދިޔައެވެ. އެހެނަސް ކުރިއެކޭވެސް އެއްގޮތަށް ޒާތީ މައުލޫމާތުތަކެއް އަހަރެމެންގެ މެދުގައި ހިއްސާއެއް ނުކުރަމެވެ. ނަމަވެސް ފާއިތުވަމުންދިޔަ ދުވަސްތަކުގައި އަހަރެމެންގެ މެދުގައި ދެކެވެމުންދިޔަ ވާހަކަތަކުގެ އޮއިވަރު ބަދަލުވަމުން ދިޔައެވެ. އެލީޝާގެ ވާހަކަތައްހުންނަ ގޮތުން އޭނާ އަަހަރެންނާ ގަޔާވާކަން ސާފުކޮށް އެނގި ހާމަވަމުން ދިޔައެވެ.

އަހަރެންގެ ހިތުގައިވެސް އެލީޝާއާ މެދުގައި ގޮތްނޭނގޭ އާ އިހުސާސުތަކެއް އުފެދެން ފެށިއެވެ. ދަގަށްފާނު ދަނގަޑަށް ދަމާ އުސޫލުން އަހަރެންގެ ހިތްވެސް އެލީޝާގެ މަޑުމައިތިރި ހިތްހެޔޮ މިޒާޖުގެ ސަބަބުން އޭނާއަށް ލެނބެން ފެށިއެވެ. ލޯތްބަކީ މިއީހޭ އަހަރެންގެ ހިތަށް އެރިއެވެ. އަހަރެން ދުވަހެއްގެ ކޮޅުންވެސް އެލީޝާއެއް ނުދެކެމެވެ. ޚުދު އޭނާއަކަށްވެސް އަހަރެންނެއް ނުފެންނާނެއެވެ. އަހަރެމެން ދެމީހުންނަކީވެސް އަމިއްލަ ޕޮޓޯ ސޯޝަލް މީޑިއާއަށް ލާބައެއްނޫނެވެ. ނަމަވެސް މިހިތް އެގޮތްނޭނގޭ އަންހެންކުއްޖާއަށް ދެވިއްޖެއެވެ. އަހަރެންގެ ހިތް އެ އަންހެންކުއްޖާ ވަގަށް ނަގައިފިއެވެ. ލޯތްބަކީ މިހައި މޮޔަ އެއްޗެއް ބާވައެވެ؟ އަހަރެންގެ ހިތަށް އެރިއެވެ. ދުވަހަކު ލޮލުން ނުދެކޭ މީހުންދެކެވެސް ލޯބިވެވޭހެއްޔެވެ؟ އަހަރެންނަށް ހެވުނެވެ.

ދެންކުރާނެ ކަމެއްނެތެވެ. ފެނުނަސް ނުފެނުނަސް އަހަރެންނަށް އެލީޝާދެކެ ތެދުހިތުން ލޯބި ވެވިއްޖެއެެވެ. އާނއެކެވެ. އަހަރެންގެ ހިތްއަތުލީ އެ ހިތްހެޔޮކަމެވެ. މަޑުމައިތިރިކަމެވެ. ލަދުވެތިކަމާއި ކެތްތެރިކަމެވެ. ފުރިހަމަ އަންހެންކުއްޖެއްގެ ކިބައިގައި ހުންނަންޖެހޭނެ ހުރިހައި ސިފައެއް އެލީޝާގެ ކިބައިން އަހަރެން ދުށީމެވެ.

ފާއިތުވެގެންދާ ކޮންމެ ދުވަހަކާއެކު އަހަރެންގެ ހިތުގައި އެލީޝާއަށްޓަކައިވާ ތެދުވެލި ލޯބި ވަރުގަދެ ކުރިލައި ހެދެމުންދިޔައެވެ. ދުވަހަކުވެސް އެހެން މީހަކުދެކެ ލޯބިނުވެވޭވަރަށް އަހަރެންނަށް އެލީޝާދެކެ ލޯބިވެވިއްޖެއެވެ. އެއީ ހަމައެކަނި އަހަރެންގެ ހައްޤަކަށް ހަދާހިތުން މިހިތް ބޭގަރާފުވާންފެށިއެވެ. ހިތަށް ކެތްނުވާވަރުވުމުން އެންމެފަހުން ހުރިހައި ލަދެއް އެއްފަރާތް ކޮށްލުމަށްފަހު އަހަރެން އޭނާއަށް ލޯބި ހުށައެޅީމެެވެ. އެލީޝާވެސް ހުރީ އަހަރެންގެ ލޯބީގެ އިންތިޒާރުގައިކަމުން ވަގުތުން އަހަރެންގެ ލޯބި އޭނާ ގަބޫލުކުރިއެވެ.

ކީއްވެކަމެއް ނޭނގެއެވެ. އެލީޝާއަށް އިތުބާރުކުރުމަށް އަހަރެންގެ ހިތް އަހަރެންގެ ގާތުގައި ބުނަމުން ދިޔައެވެ. އެއީ އަހަރެންދެކެ ތެދުވެރި ލޯބިވާ އިންސާނެއްކަން އަހަރެންގެ ހިތް އަހަރެންނަށް ވިސްނައިދޭން މަސައްކަތްކުރަމުން ދިޔައެވެ. ހިތުގެ ބަސް އެހުނީ އެހެންވެއެވެ.

ރަށްޓެހިވީފަހުންވެސް ދެމީހުންކުރެ އެކަކުވެސް އަނެކަކުގެ ޕޮޓޯއެއްހައި ހިސާބުވެސް ފޮނުވައިލާކަށް ނުބުނަމެވެ. އެލީޝާ އެފަދަ ކަމަކަށް އަހަރެންގެ ކިބައިން ނޭދޭތީ އަހަރެންނަށްވެސް އެފަދަކަމަކަށް އޭނާގެ ކިބައިން އެދެން ނުކެރުނީއެވެ.

ލޯބި ހުށައެޅީއްސުރެ އަހަރެމެން ދެމީހުންގެ ދެމެދުގައިވަނީ ބަޔާންކުރަން ދަތި ގާތްގުޅުމެއް އުފެދިފައެވެ. ކިތަންމެދުރުގައި ވިޔަސް ދެހިތަށް ދެހިތުގެ ތެޅުން އިހުސާސުވާކަހަލައެވެ. ދެމީހުންނަށް ދެމީހުންގެ ގޮތް ދަސްވެ އެއްވެސް އެއްޗެއް ބުނުމަކާއި ނުލައިވެސް އެކަކު އަނެކަކު ބޭނުންވާ ކަންތަކާއި، އެކަކު އަނެކެއްގެ އުފަލާއި ހިތަހަމަޖެހުން ބިނާވެފައިވާ ކަންތައް ދެނެގަނެވެއެވެ. އެއް އިންސާނަކަށް އަނެއް އިންސާނެއްގެ ގޮތް އެހައި ރަނގަޅަށް އެނގެނީ ކިހިނަކުންބާއޭ އަހަރެންގެ މޮޔަހިތަށް އެރިއެވެ.

އެގޮތުގައި ބަރާބަރު 4 މަސްދުވަސް ފާއިތުވެގެންދިޔަފަހުން ކުއްލިއަކަށް އެލީޝާ އަހަރެންނަށް މެސެޖްކުރުން ހުއްޓައިލައިފިއެވެ. އަހަރެން ކުރާ އެއްވެސް މެސެޖެކަށް ރިޕްލައި ނުކުރާ ތާނގައި މެސެޖްތައް ބަލައިލައިފައިވެސް ނުހުރެއެވެ. އަހަރެންގެ ހިތް ތެޅެންފެށީ އެއެއް މިއެއް ބަލއިފައެއް ނޫނެވެ. އަނެއްކާ އަހަރެންގެ އެލީއަށް ކަމެއްވީ ބާވައެވެ؟ އެލީ އަހަރެންނަށް ރިޕްލައި ނުކުރަނީ ކީއްވެބާވައެވެ؟ ކުއްލިއަކަށް އަހަރެންނާ ވާހަކަދެއްކުން ހުއްޓައިލީ ކީއްވެބާވައެވެ؟

ފާއިތުވެދާ ކޮންމެ ދުވަހަކާއެކު އަހަރެން ނާއުއްމީދުވަމުން ދިޔައެވެ. ދުވާލަކު އެތައްފަހަރަކު އެލީޝާގެ މެސެޖެއް އައިސްފައި ހުރިތޯބަލަން އަހަރެން އޮންލައިން ވަމެވެ. ރޭނގަނޑު ނިދެނީވެސް އެލީޝާގެ މެސެޖެއްގެ އިންތިޒާރުގައި އޮއްވައެވެ. ހެނދުނު ހޭލުމަށްފަހު އެންމެފުރަތަ ކަމަށްވެސް އަހަރެންނަށް ޗެކްކޮށްލެވެނީ އޭނާގެ އެއްވެސް ރިޕްލައިއެއް ލިބިފައިހުރިތޯއެވެ. ޖަވާބު ނުލިބޭނެކަން އެނގޭއިރުވެސް ހުއްޓުމެއްނެތި އަހަރެން އެލީޝާއަށް މެސެޖްކުރަމުން ދިޔައީމެވެ. އަހަރެންގެ އިންތިޒާރުގެ ދުވަސްތައް ދިގުވާން ފަށައިފިއެވެ. ނަމަވެސް އަހަރެންގެ ހިތުގެ މަލިކާގެ ފަރާތުން ހަމަ އެއްވެސް ޖަވާބެއް ނުލިބުނެވެ.

އަހަރެންގެ މުޅި މިޒާޖު އެއްކޮށް ބަދަލުވިއެވެ. ކުރިން އަބަދު ހީހީފައި އުޅުނު ނަމަވެސް މިހާރު ހިނިތުންވުމަކީ އަހަރެންނާ ބީރަށްޓެހި އެއްޗަކަށްވަނީ ވެފައެވެ. މަޑުމައިތިރިކަމާއި އެކަނިވެރިކަމަށް އަހަރެން ލޯބިކުރަންފެށީ އެދުވަހަށްފަހުގައެވެ. އަހަރެންގެ މިޒާޖަށްއައި މިކުއްލި ބަދަލު އަހަރެންގެ މަންމައަށް ފާހަގަނުވެ ނުދިޔައެވެ. އެކިފަހަރުމަތިން ތަކުރާރުކޮށް މަންމަ ސުވާލުކުރަން ފެށުމުން އެންމެފަހުން މަންމަގެ އުނގުގައި ބޯއަޅައިލައިގެން އޮވެ އަހަރެންގެ ހިތުގެ އުދާސްތައް މަންމައާ ހިއްސާކުރީމެވެ. ރޮމުން ގިސްލަމުންނެވެ. ހުރި ހަމައެކަނި ދަރިފުޅުގެ އެހިތާމަ ދެކޭކަށް މަންމައަކަށް ކެތެއްނުވިއެވެ. ކޮންމެ ގޮތަކުން ނަމަވެސް އެލީޝާ ހޯދަން މަންމަ ބޭނުންވިއެވެ. ނަމަވެސް އެލީޝާގެ ނަންފިޔަވައި އިތުރު އެއްވެސް މައުލޫމާތެއް އަހަރެންނަށް ނޭނގުމުގެ ސަބަބުން މަންމަ ޖެހުނީ ހަތިޔާރު ބަހައްޓާފައި ބަލިގަބޫލުކުރާށެވެ. ހުރި ހަމައެކަނި ދަރިފުޅުގެ ހިތާމަތަކާއި ކަރުނަތައް ދެކެން ހުންނާށެވެ.

ދުވަހަކަށްފަހު ދުވަހެއް ފާއިތުވަމުން ދިޔައެވެ. އަހަރެންގެ އިންތިޒާރަކަށް ނިމުމެއް ނައެވެ. ހިތުގެ ހަމަޖެހުމަށްޓަކައި ކޮންމެ ރެއަކު ނިދުމުގެ ކުރިން އަހަރެމެން ދެމީހުންގެ ލޯބީގެ މެސެޖުތައް ކިޔަންފެށީމެވެ. އެއާއެކު މިދެލޯ ފުރިގެން ބަންޑުންވަނީ ހޫނު ކަރުނައިންނެވެ. ހަޔާތުގައި ވެވުނު ފުރަތަމަ ލޯބިވެސް ވީނުވީއެއް ނޭނގި ގެއްލުނީއެވެ. އަހަރެންގެ އަތުން ބީވެގެން ދިޔައީއެވެ. ހިތް ފޮތިފޮތިކޮށްލައި ލޭކަރުނަ އޮހޮރުވާލައިފަައެވެ. އެލީޝާ އެނބުރި ނާނާނެކަން އަހަރެންގެ ހިތަށް ވިސްނުނެވެ. ކަރުނަތަކާއެކުވެސް އަހަރެންގެ ހަޔާތާއިވެގެން ކުރިއަށްދާންވެއްޖެކަން އިހުސާސުވިއެވެ. ހިތްވަރުކޮށްފައި އަހަރެން އަބަދުވެސް އެންމެ ދާންބޭނުންވި ޔުނިވާރސިޓީއަށް އެޕްލައިކުރީމެވެ. އަބަދު އެކަނި ހުންނަންވުމުން އެލީޝާގެ ހަނދާންތަކުން މިހިތަށް އުނދަގޫވާތީ އަހަރެން ނިންމީ ކިޔެވުމުގައި ގިނަވަގުތު މަސްއޫލުވުމަށެވެ.

ނަމަވެސް އަހަރެންގެ ހިތުން އެހަނދާންތައް ފިލުވައިލުންވީ ދަތި އުނދަގޫކަމަށެވެ. ކެތްތެރިކަމާއެކު ކޮންމެ ނަމާދަކަށްފަހު އަހަރެންގެ ވެރިފަރާތުގެ ހަޟްރަތުގައި އަހަރެންގެ ގެއްލިފައިވި ލޯބި އަނބުރައި އަހަރެންނަށް ދެއްވުންއެދި އަހަރެން ދުޢާކުރަމެވެ.

އެލީޝާއަށްފަހު އަހަރެންގެ ހަޔާތަކަށް އިތުރު އަންހެންކުއްޖަކު ނާދެއެވެ. އެނޫން އިތުރު ލޯތްބެއް މިހިތެއް ބޭނުމެއް ނުވިއެވެ. އިސްއުފުލައިލައި އަންހެންކުއްޖެއްގެ މޫނަށް ބަލައިލާކަށްވެސް އަހަރެންގެ ހިތެއް ނޭދެއެވެ. އެލީޝާ ދުވަހަކު ފެނިފައި ނުވިއަސް އޭނާގެ ޚިޔާލީ ތަސްވީރެއްވަނީ އަހަރެންގެ މިހިތުގައި ބިންވަޅުނެގިފައެވެ. އަދިވެސް އަހަރެން މިހުރީ ކުރިއެކޭވެސް އެއްފަދައިން އަހަރެންގެ އެލީގެ އިންތިޒާރުގައެވެ.

ދުވަސްތައް ހަފްތާތަކަށް، ހަފްތާތައް މަސްތަކަށް ބަދަލުވަމުން ގޮސް އެހާދިސާ ހިނގިފަހުން އެއްއަހަރު ފާއިތުވީއެވެ. އަދިވެސް އަހަރެންގެ އެލީޝާގެ ޚަބަރެއް އަހަރެންނަކަށް ނުވެއެވެ. ނަމަވެސް މިހިތް އަދިވެސް ހުރީ އެލޯބީގެ އިންތިޒާރުގައެވެ. އަނބުރައި ނާންނާނެކަން އެނގޭއިރުވެސްއެވެ. ލޮލުން އޮހޮރޭ ކަރުނަތަކަކަށް އެއްވެސް ބަދަލެއް ނާދެއެވެ. ކަރުނައަކީ މިހާރު އަހަރެންގެ އެންމެ ގާތް އެކުވެރިޔާއަށްވަނީ ވެފައެވެ.

އާދައިގެމަތިން ކްލާސްތައް ނިންމައިލުމަށްފަހު ގެއަށް ދިއުމަށްޓަކައި އަހަރެން ކްލާހުން ނުކުތީމެވެ. އަތުގައި އޮތް ގަނޑަކަށް ބަލަމުން އަހަރެން ކްލާހުން ނުކުތްވަގުތު ކުއްލިއަކަށް ކުއްޖެއްގެ ގައިގައި އަޅަައިގަތެވެ. އަހަރެންގެ ގައިގައި ޖެހިފައި ވެއްޓެންދިޔަ އަންހެންކުއްޖާގެ އަތުގައި ހިފައި އެކުއްޖާ ވެއްޓުނަނުދީ އަހަރެން ސަލާމަތްކުރީމެވެ. މޫނުމައްޗަށް ފައިބައިފައި ހުރި އިސްތަށިތައް އެއްއަތުން ރީތިކޮށްލަމުން އެކުއްޖާ އަހަރެންގެ މޫނަށް ބަލައިލިއެވެ.

“ސޮރީ. އަހަރެން ގަސްތުގައެއްނޫން.” އެކުއްޖާ ބަލައިލުމާއެކު އަވަސް އަވަހަށް އިނގެރޭސިން އަހަރެން ބުނީމެވެ. ހިނިތުންވެލައިފައި އެއީ އެއްވެސްކަމެއް ނޫންކަމަށް އެކުއްޖާ ބުނެލިއެވެ. ” ތީ ދިވެހި ކުއްޖެއްތަ؟” އެކުއްޖާ ދިވެހިން އެހެން ބުނެލުމުން އަހަރެން ހައިރާންވެލައިފައި އަހާލީމެވެ. “ހޫމް. ތީވެސް ދިވެއްސެއްދޯ.” އެހެންބުނެލަމުން އެކުއްޖާ އަހަރެންނަށް ބަލައިލައިފައި ލޯބިގޮތަކަށް ހީލިއެވެ. އަދި ލަސްވަނީ ކަމަށްބުނެ ދާން ހިނގައިގަތެވެ. އެގޮތްނޭނގޭ އަންހެންކުއްޖާ ދިޔަދިމާއަށް ކަޅިޖަހައިނުލާ ބަލަހައްޓައިގެން އަހަރެންނަށް ހުރެވުނީއެވެ. އެކުއްޖާގެ ކިބައިގައި ކޮންމެވެސް ޚާއްސަކަމެއް އެބަހުރިކަމަށް އަހަރެންގެ ހިތް އަހަރެންނަށް ވިސްނައިދެން މަސައްކަތްކުރަމުން ދިޔައެވެ. އެއީ އަހަރެންނާ ވަރަށް ގާތްކުއްޖެއްގެ ގޮތުގައި އަހަރެންނަށް އިހުސާސުވަމުން ދިޔައެވެ.

ޖިންސުގެ ޖީބުގައި އޮތް ފޯނު ރިންގްވާންފެށިއަޑަށް ސިހިފައި އަހަރެން ދެފަރާތް ބަލައިލީމެވެ. އެއްވެސް މީހެއްގެ ހިލަމެއް ނެތެވެ. އަހަރެންނަށް އެތަނުގައި އެގޮތަށް ހުރެވުނީ ކިހައި އިރަކުކަމެއްވެސް ނޭނގެއެވެ. ދެފަރާތަށް ބޯހޫރައިލުމަށްފަހު ފޯނުނަގައި ކަންފަތުގައި ޖަހައިލަމުން އަހަރެން ޔުނިވާރސިޓީއިން ނުކުންނަން ހިނގައިގަތީމެވެ.

ޖެހިގެންއައި ދުވަހު ޔުނިވާރސިޓީއަށް ގޮސްވެސް އަހަރެންނަށް ހޯދެނީ އެއަންހެންކުއްޖާއެވެ. މަޑުހިނގުމެއްގައި މޭގައި ފޮތްތައް ޖައްސައި ބާރުކޮށްލައިގެން ހުރެ ހިނގައިފައި އަންނަ އެއަންހެންކުއްޖާ އަހަރެންގެ ލޮލުގައި އަޅައިގަތުމާއެކު ބޭއިޚްތިޔާރުގައި އަހަރެންނަށް ހިނިތުންވެލެވުނެވެ. އެކި ފަރާތް ފަރާތް ހޯދަމުން އެއަންހެންކުއްޖާ ގޮސް އޭނާގެ ކްލާހަށްވަނެވެ.
މާޔޫސްވެފައި އަހަރެންވެސް އަހަރެންގެ ކްލާހާ ދިމާއަށް ހިނގައިގަތީމެވެ.

އެއްހަފްތާ ވޭތުވެގެން ދިޔައިރުވެސް އެއަންހެންކުއްޖާއާ ވާހަކަދައްކައިލާނެ ރަނގަޅު ފުރުސަތެއް އަހަރެންނަކަށް ނުލިބުނެވެ. އަހަރެންގެ ހިތުގައި އެކުއްޖާއަށް ޚާއްސަ މަޤާމެއް ދެވިއްޖެކަން ކަށަވަރެވެ. އަބަދު އެސޫރަ ދެކޭހިތްވަނީއެވެ. އެނުދަންނަ ކުއްޖާއާ ވާހަކަދައްކައި ގުޅުން ބަދަހިކުރާހިތްވަނީއެވެ. އަހަރެންގެ ފުރަތަމަ ލޯބިފަދައިން މިލޯބިގެއްލިގެންދާކަށް އަހަރެންގެ ހިތެއް ނޭދެއެވެ. މިފަހަރު އަހަރެންގެ ލޯބި ހާސިލްކުރަން ދެއަތްކުރި އޮޅައިލީ ގަދަ އަޒުމަކާއެކީއެވެ.

ޖެހިގެންއައި ދުވަހު ކްލާސްތައް ނިންމައިލައިފައި އަހަރެން ބޭރަށް ނުކުތްއިރު އެކުއްޖާ ޔުނިވާރސިޓީގެ ގޯތިތެރޭގައި ބެހެއްޓިފައިވާ ބެންޗެއްގައި އިނށީދެލައިގެން އިނެވެ. އެތަންފެނި އަހަރެންގެ ތުންފަތްމައްޗަށް ހިނިތުންވުން ވެރިވެގެން ދިޔައެވެ. މިއަދު ކޮންމެ ގޮތެއްހަދައިފައިނަމަވެސް އޭނާއަށް ލޯބިހުށައަޅަން އަހަރެންގެ ހިތް ނިންމިއެވެ.

މަޑުހިނގުމެއްގައި ގޮސް އަހަރެން އެކުއްޖާ ގާތުގައި އިނށީނީމެވެ. “ހައި” އަހަރެން އެހެން ބުނެލުމާއެކު އޭނާ އިސްއުފުލާލައި އަހަރެންގެ މޫނަށް ބަލައިލިއެވެ. އެދެލޮލުގައިވި ހިތާމައާ މަޔޫސީ ކިތަންމެ ރަނގަޅަކަށްވެސް އަހަރެންނަށް ފެނުނެވެ. އަހަރެންގެ ހިތުގައި ރިއްސައިލިއެވެ.

“އޫމް… އަހަރެންނަކަށް ނޭނގެ ތީ ކޮންކުއްޖެއް ކަމެއްވެސް. އެނގޭ އަހަރެމެން ދެމީހުން ބައްދަލުވީވެސް އަދި ކުރިން ދުވަހަކުކަން. އަދި އަހަރެމެންނަކީ އެކަކު އަނެކަކު ނުދަންނަ ދެބީރަށްޓެހިންކަންވެސް. އެކަމަކު އަހަރެންނަކަށް ނޭނގެ އެދުވަހު ތިކުއްޖާ ފެނުނީމަ ވީ ގޮތެއް. އަހަރެންގެ އިޚުތިޔާރުގެ ދަށުން ބޭރުވެ އަހަރެންގެ ހިތް މުޅިން ތިކުއްޖާއަށް ދެވިއްޖެ. ނޭނގެ ކީއްވެކަމެއް؟ އެކަމަކު އަހަރެންނަށް އިހުސާސުވަނީ ތީ އަހަރެންގެ ހިތާ ވަރަށް ގާތް ކުއްޖެއް ގޮތުގަ. އަހަރެންނަށް ވަރަށް ޚާއްސަ ކުއްޖެއް ގޮތުގަ. އައި.. އައި ލަވް ޔޫ.” ވަރަށް ހިތްވަރުކޮށްފައި ކެރިހުރެ އަހަރެން ބުނީމެވެ.

އަހަރެންނާ ދިމާއަށް ދެލޯބޮޑުކޮށްލައިގެން ބަލަން އެކުއްޖާ އިނެވެ. އިވުނު ވާހަކަތައް ގަބޫލުނުކުރެވިފައެވެ. ދެން ފެނުނީ އެއްވެސް ހިފެހެއްޓުމެއްނެތި އެކުއްޖާގެ ދެލޯ ކަރުނުން ފުރިގެން ބަންޑުންވާންފެށިތަނެވެ.އަހަރެން ވަރަށް ހާސްވިއެވެ. އަނެއްކާ އަހަރެންނަށް އެކުއްޖާގެ ހިތުގައި ޖެހޭފަދަ އެއްޗެއް ބުނެވުނީބާވައެވެ؟

“ސޮރީ. ބަޓް އައި ކާންޓް ލަވް ޔޫ.” ލޮލުން އޮހޮރެމުންދިޔަ ކަރުނަތައް ފުހެލަމުން އެކުއްޖާ ދެރަވެލައިފައި ބުނެލިއެވެ. އަހަރެންގެ މޫނުމަތީގައި ހީވީ މީހަޖު ބާރުއެތިފަހަރެއް ޖެހިހެންނެވެ. “އޯހް. ސޮރީ. އަހަރެން ލޯބިވާ ވާހަކަ ބުނުމުން ތިކުއްޖާ ހިތްހަމަނުޖެހުނުނަމަ އަހަރެންނަށް މައާފު ކުރޭ. މީ ނުދައްކާ ވާހަކައެއް ގޮތުގަ ވިސްނާފަ ހަނދާންނައްތާލާ.” އިސްޖަހައިލަމުން އަހަރެން ބުނީމެވެ. “ނޫން. ތިހެން ހީނުކުރޭ. އަހަރެން ރުޅިއެއްނާދޭ. އަސްލު އަހަރެން.. އަހަރެން ލޯބިވާ ކުއްޖެއް ހުރޭ. އެހެންވެ.” މަޑުމޮޅި ރާގަކަށް އެއަންހެންކުއްޖާ ބުނެލިއެވެ. “އެހެންތަ. ސޮރީ.” އެހެންބުނުމަށްފަހު އަހަރެން އިންތަނުން ތެދުވެ ހިނގައިގަތީމެވެ. ފަސްއެނބުރި ބެލުމެއްނެތިއެވެ. ލޯތްބަކީ މިހާ ވޭންދެނިވި އެއްޗެއްކަން އެނގުނުނަމަ އަހަރެން ދުވަހަކުވެސް ލޯތްބެއް ނުވީހެވެ.

އެލީޝާއަށްފަހު އަހަރެންގެ ހިތް ދެވުނު އަންހެންކުއްޖާވެސް އަހަރެންނަށް ގެއްލުނީއެވެ. އެލޯބީގައިވެސް އަހަރެން ނާކާމިޔާބުވީއެވެ. އެދުވަހު އެލީޝާ މަތިން އަހަރެން ވަރަށް ހަނދާންވިއެވެ. އެނބުރި އަހަރެން ގާތަށް އަންނާނެ ނަމައޭ ހިތަށްއެރިއެވެ. ފާއިތުވެދިޔަ 7 މަސްދުވަސް ތެރޭގައި އަހަރެން އެއްގޮތަކަށްވެސް އޮންލައިނެއް ނުވަމެވެ. ނަމަވެސް އެދުވަހު އެލީޝާގެ ހަނދާންތައް އަނެއްކާވެސް އާވާންފެށުމުން ތުރުތުރުލަމުންދިޔަ އަތުން ފޯނުނަގައި އޮންލައިންވެލީ އެ މެސެޖުތައް ކިޔާލާހިތްވި ވަރުންނެވެ.

އެއާއެކު އަހަރެންނަށް ލިބުނީ ޝޮކެކެވެ. ފުލުފުލުން އަންނަންފެށި އެލީޝާގެ މެސެޖުތައްފެނި އަހަރެންގެ ދެލޯ ބޮޑުވެގެން ދިޔައެވެ. އުފަލުންގޮސް ރޮވެންފެށިއެވެ. ކޮންމެ މެސެޖެއް ލޯތްބާއެކު ކިޔަން ފެށުނެވެ. އޭނާއަށް ފާއިތުވެދިޔަ ދުވަސްތަކުގައި ހަބަރެއް ނުވެވުނީތީ މައާފަށް އެދިފައި އެތައް މެސެޖެއް ފޮނުވައިފައި އޮތެވެ. އަދި އޭނާ މިހާރު ހުރީ އިންގްލޭންޑްގައި ކަމާއި އަހަރެންނާ ބައްދަލުކޮށްލަން ބޭނުންވާ ވާހަކަވެސް ބުނެފައި އޮތެވެ. ބައްދަލުވިހައި އަވަހަކަށް ހުރިހައި ވާހަކަތަކެއް ކިޔައިދޭނެކަމަށްވެސް އެލީޝާ ބުނެފައިވެއެވެ. އަހަރެންގެ ހަބަރެއް ނުވާތީ އޭނާދެކެ ރުޅީއައިސްފައިތޯ އާއި ހަބަރެއް ނުވެވުނީ ވަރަށް ބޮޑުކަމެއްވެގެން ކަމަށްވެސް އެލީޝާ ބުނެފައިވެއެވެ.

ވީއުފަލުންގޮސް އަހަރެންނަށް ރޮވުނެވެ. ރޮމުންރޮމުންގޮސް އިންތަނަށް އަހަރެންނަށް ތިރިވެވުނެވެ. އެެތެއްދުވަހެއްގެ ދިގު އިންތިޒާރު ނިމުމަކަށް އަންނަނީއެވެ. އެލީޝާގެ މެސެޖްތައްފެނި ފާއިތުވެދިޔަ ދުވަސްތަކުގައި އަހަރެންކުރި ހުރިހައި ހިތާމައެއް ކުއްލިއަކަށް މިހިތުން ފިލައި ދިޔައެވެ. އެހުރިހައި ހިތާމަތަކެއްގެ މަތިން އަހަރެން ހަނދާންނެތުނު ކަހަލައެވެ. އެލީޝާއާ ބައްދަލުކޮށްލަން ބޭނުންވެފައި ހުރިވަރުން އަހަރެން އަވަހަށް އޭނާއަށް މެސެޖްކުރީމެވެ. އެއާއެކު އޭނާގެ ރިޕްލައި އައެވެ. ދެމީހުން އެތައްއިރަކު ވާހަކަ ދެއްކުމަށްފަހު އެރޭގައި ބައްދަލުކުރަން ނިންމީ އެލީޝާ ބުނި ރެސްޓޯރެންޓެއްގައެވެ. އަދި އެކަކު އަނެކަކަށް ދުވަހަކުވެސް ފެނިފައިނުވާތީ ދެމީހުން އެކަކު އަނެކަކު ފާހަގަކުރަން ރަނގަޅުގޮތެއް ރާވައިލީމެވެ.

މަންމައަށް މިއުފާވެރި ހަބަރު ދިނުމާއެކު އުފަލުންގޮސް އަހަރެންގެ ގައިގައި ބައްދައިލިއެވެ. އަދި މިރެއަށް އަހަރެން ލާން އެލީޝާ ޝަރުތުކުރި ފަދައިން ކަޅުކުލައިގެ ކޯޓްފަޓުލޫނަކާއި އެތެރެއިން ލާނެ ރަތް ގަމީހެއް ހޯދިއެވެ.

ތައްޔާރުވެ ނިމިގެން ކޮޓަރިން ނުކުމެ ތިރިއަށް ފޭބިއިރު ސޯފާގައި މަންމައާއި ބައްޕަ އިނެވެ. އަހަރެން ފެނުމުން އަހަރެންގެ ރީތިކަމަށް ތައުރީފުކޮށްފައި ބެސްޓް އޮފް ލަކްއޭ ބުނެލިއެވެ. އަތުގައި އޮތް ރަތްކުލައިގެ ފިނިފެންމަލަށް ބަލައިލަމުން އަހަރެން ގެއިން ނުކުތުމަށް ހިނގައިގަތީމެވެ.

ރެސްޓޯރެންޓް ތެރެއަށް ވަނުމަށްފަހު އަހަރެން ވަށައިގެން ހޯދައިލީ އަހަރެންގެ ހިތުގެ މަލިކާ ފެނޭތޯއެވެ. ކުއްލިއަކަށް އަހަރެންގެ ލޮލުގައި އަޅައިގަތީ ކަނެއްގައި ހުރި މޭޒެއްގައި އިނށީދެލައިގެން އިން އަންހެންކުއްޖާއެވެ. އެއީ އަހަރެންނަށް ޔުނިވާރސިޓީއިން ދިމާވި ކުއްޖާއެވެ. އަހަރެންގެ ހިތް ދެވުނު ކުއްޖާއެވެ. ނަމަވެސް ހައިރާންވީ އޭނާ ލައިފައިވާ ހެދުން ފެނިފައެވެ. އެއީ އަހަރެން އެލީޝާ ގާތުގައި ލައިގެން އައުމަށް ބުނިކަހަލަ ހެދުމެކެވެ. ރަތްކުލަ އާއި ކަޅު ކުލައިގެ ދިގު ހެދުމެކެވެ. އެހެދުމުގައި އެއަންހެންކުއްޖާގެ ރީތިކަން އިތުރުވެފައި ވިއެވެ. އެކުއްޖާގެ އަތުގައި އޮތް ރަތް ފިނިފެންމާ އަހަރެންނަށް ފެނުނީ އެވަގުތުއެވެ. އަހަރެންނަށް ދެލޯބޮޑުކޮށްލެވުނެވެ. “އެލީޝާ” މަޑުމަޑުން އަހަރެންނަށް ކިޔައިލެވުނެވެ.

އަވަސް ހިނގުމެއްގައި ގޮސް އަހަރެން އޭނާ ގާތުގައި މަޑުކޮށްލީމެވެ. އަހަރެން ފެނުމާއެކު ދެލޯ ބޮޑުކޮށްލަމުން އެކުއްޖާވެސް އިންތަނުން ތެދުވިއެވެ. ގަބޫލުނުކުރެވިފައި އޭނާ އަހަރެންނާ ދިމާއަށް ބަލަމުން ދިޔައެވެ.

“ތީ.. ތީތަ އެލީ؟ އެލީޝާ؟” އަޅައަޅައި ގަންނަމުން ރޮވިފައި ހުރެ އަހަރެން އަހައިލީމެވެ. އޭރު އެކުއްޖާގެ ދެލޯވެސްވަނީ ފެންކަޅިވެފައެވެ. “އާން. ތީ އަހަރެންގެ.. އަހަރެންގެ މިފޫތަ؟ މިފްޒާލް.” އެލީޝާއަށް ބާރަށް ރޮއެގަނެވުނެވެ. އަހަރެންނަށް ބޯޖަހައިލެވުނީ އާނއެކޭ ބުނުމަށެވެެ. އުފަލުގެ ކޮޅެއް ނެތެވެ. އެހެންވީމައި އަހަރެންނަށް ދެވަނަ ފަހަރަށްވެސް ލޯބިމިވެވުނީ އަހަރެންގެ އެލީޝާ ދެކެ ތާއެވެ. އެދުވަހު އެލީޝާ ފެނިފައި އަހަރެންނަށް އެއީ ގާތް ކުއްޖެއްގެ ގޮތުގައި އިހުސާސުވީ މިހެންވެތާއެވެ. އެއްވެސް އިޚުތިޔާރަކާ ނުލައި އަހަރެންގެ ހިތް އަތުން ދޫވީވެސް އެއީ އަހަރެންގެ ހިތުގެ ވެރިޔާކަމަށްވީމައެވެ. އަހަރެންނަށް އެލީޝާ ދެނެ ނުގަނެވުނަސް އަހަރެންގެ ހިތް އެލީޝާ ދެނެގަތެވެ.

ދެމީހުން ރޮމުން ރޮމުންގޮސް އެކަކު އަނެކަކުގެ ގައިގައި އޮޅުލައިގަނެވުނެވެ. ބާރަށް ބައްދައިލައިގެން ތިބެ ގިސްލަގިސްލާފައި އަހަރެމެން ދެމީހުން ރޮމުން ދިޔައީމެވެ. އެތަނުގައި އިތުރު ބަޔަކު ތިބިކަމުގެ އިހުސާސްވެސް އަހަރެމެންނަށް ނުވާފަދައެވެ. އަމިއްލަ ދުނިއެއްގައި ތިބެ ދެހިތުގެ ޝަކުވާތައް ކަރުނައިގެ ސިފައިގައި ބޭރުކުރަމުން ދިޔައީމެވެ.

އިރުކޮޅެއް އެގޮތުގައި ވޭތުވުމަށްފަހު އަހަރެން އެލީޝާ ކުޑަކޮށް ދުރުކޮށްލީމެވެ. އަދި އިސްޖެހިފައިވާ އެލޯބި މޫނު އުފުލައިލުމަށްފަހު ސީދާ އޭނާގެ ލޮލަށް ބަލައިލީމެވެ. “އައި ލަވް ޔޫ އެލީ. އައި ލަވްޔޫ ސޯ ސޯ ސޯ މަޗް. ވިލްޔޫ މެރީ މީ؟” ހުރިތަނަށް އެއްކަކޫ މައްޗަށް ތިރިވުމުށްފަހު އަތުގައި އޮތް ފިނިފެންމާ ދިއްކޮށްލަމުން އަހަރެން އަހައިލީމެވެ. އެންމެންގެ ލޯތައް އަހަރެމެންނަށް އަމާޒުވެފައި ވީއިރު އަހަރެން ހުރީ އެލީޝާގެ ޖަވާބެއްގެ އިންތިޒާރުގައެވެ. ލޮލުން އޮހޮރެމުން ދިޔަ ކަރުނަތައް ފުހެލުމަށްފަހު ހިނިތުންވެފައި އެމަލުގައި ހިފައިލަމުން އެލީޝާ ލޯތްބާއެކު ޔެސްއޭ ބުނެލިއެވެ. އެއާއެކު އަހަރެންނަށް އުފަލުންގޮސް ހުރެވުނުތަންވެސް ނޭނގުނެވެ. އެލީޝާގެ ޖަވާބާއެކު އެމަންޒަރުތައް ބަލަންތިބި އެންމެން އަތްޖަހަން ފެށިއެވެ.

ރެސްޓޯރެންޓްއިން ކެއުން ނިންމާލުމަށްފަހު އަހަރެމެން ދިޔައީ ހިނގައިލާށެވެ. އެލީޝާގެ އަތުގައި ހިފައިގެންގޮސް ޕާރކެއްގެ ތެރޭގައިހުރި ބެންޗެއްގައި އަހަރެން އިނށީނީމެވެ. ގާތުގައި އެލީޝާވެސް އިނށީދެ އަހަރެންގެ ކޮނޑުގައި ބޯއަޅައިލިއެވެ. “އެލީ ވަރަށް ލޯބި މިރޭ.” އަހަރެން އެހެން ބުނުމާއެކު ލަދުވެތި ގޮތަކަށް އޭނާ ހީލިއަޑު އިވުނެވެ. “އެލީ ދެން އަހަރެންނަށް ކިޔަދީ ހުރިހައި ވާހަކައެއް. ކީއްވެ ކުއްލިއަކަށް އެލީގެ ހަބަރެއްނުވެ އެހައި ގިނަދުވަސް ދިޔައީ؟ ކީއްވެ އަހަރެންގެ މެސެޖުތަކަށް ޖަވާބެއް ނުދެނީ؟ ނުބަލަނީ؟ ކީއްވެ އެލީ؟” އެލީޝާގެ މޫނަށް ބަލައިލަމުން އަހަރެން އަހައިލީމެވެ. އެއާއެކު ފުންނޭވާއެއް ލުމަށްފަހު އެލީޝާ އޭނާގެ ވާހަކަފެށިއެވެ.

“އެއްދުވަހު ޝޮޕިންގްއަށް ގޮސްފައި އަންނަނިކޮށް އަހަރެން ކާރެއްގަ ޖެހި އެކްސިޑެންޓްވީ. ވަރަށް ނުރައްކާތެރި އެކްސިޑެންޓެއްވީ. އެންމެން ހީކުރީ އަހަރެން މަރުވާނީކަމަށް. އެކަމަކު ތިލޯބީގެ ސަބަބުން އަހަރެން ދިރި ދުނިޔޭގަ އޮތީ. ނަމަވެސް އަހަރެންގެ މުޅި ހަށިގަނޑު ވާގިނެތުނީ. އެއްއަހަރު އެހާލުގަ އަހަރެން ހޮސްޕިޓަލުގައި ހޭދަކުރިން. އޭރު އަހަރެންނަކީ ދިރި ހުއްޓަސް ފުރާނަނެތް މަސްގަނޑެއް. އެންމެ ދުވަހެއްނުދޭ އަހަރެންގެ ހިތުން މިފޫގެ ހަނދާންތައް ފިލައިގެންދާ. ބައްޕަމެންގެ ބުރަ މަސައްކަތުންނާއި އަހަރެންގެ ހިތްވަރުން ރަނގަޅު ވެވޭތޯ އަހަރެން މަސައްކަތް ކުރިން. ތެދަށް ބުނާނަމަ ތިލޯތްބަށްޓަކައި ރަނގަޅު ވެވޭތޯ އަހަރެން ކެނޑިނޭޅި މަސައްކަތްކުރިން. ﷲ ގެ އިރާދަފުޅުން އަހަރެންނާ އަހަރެންގެ އާއިލާގެ ބުރަމަސައްކަތް ކާމިޔާބުވެ މީގެ ހަމަސްކުރިން އަހަރެން އެއްކޮށް ރަނގަޅުވި. އަހަރެންނަށް އަނެއްކާވެސް މިހަށިގަނޑު ހަރަކާތްކުރަން ފެށުނު. ކުޑަކޮށްވެސް އަހަރެން ރަނގަޅުވެލުމުން އަހަރެން ބޭބުންވީ މިފޫއަށް ސަޕްރައިޒެއް ދޭން މިކޮޅަށް އަންނަން. މިފޫ އަބަދުވެސް އެންމެ ދާހިތްވީ އެ ޔުނިވާރސިޓީއަށްކަން އެނގޭތީ ކިޔެވުމުގެ ބަހަނާގަ މިކޮޅަށް އައިސް އަހަރެން އެޔުނިވާރސިޓީއަށް އެޕްލައިކުރީ ހަމަ އެންމެ ބޭނުމަކު. މިފޫ ހޯދަން ބޭނުންވެފަ ހުރިވަރުން. އަހަރެން އަސްލު ހީކުރީ މިހާރު މިފޫ އަހަރެންމަތިން ހަނދާންނައްތައިލާނެ ކަމަށް.” އެހިސާބަށް ބުނެވުނުތަނާ އެލީޝާއަށް ރޮވުނެވެ. “ޝޫޝް. ދެން ހުއްޓާލާ. ނުރެއި. އެލީ އަށް އެނގޭތަ؟ އަހަރެން ހާދަ އިންތިޒާރެއް ކުރީމޭ އެލީއަށް. އަހަރެންގެ ހިތްބުނި އެލީއަށް ކަމެއް ވީއޭ. އަހަރެންގެ އެލީ އެނބުރި އަހަރެންގާތަށް އަންނާނޭ. ކޮންމެ ރެއަކު އަހަރެންނަށް ނިދެނީ އެލީމަތިން ހަނދާންކުރާ ހާލު ގިސްލާ ރޮމުން. އަބަދު އެލީގެ މެސެޖެކަށް މިހިތް އިންތިޒާރު ކުރޭ. ޔުނިވާރސިޓީއިން އެލީ ފެނުނު ފުރަތަމަ ދުވަހުވެސް އަހަރެންގެ ހިތް ބުނި ތިއީ އަހަރެންނާ ވަރަށް ގާތްމީހެކޭ. އެހެންވެ އެލީއަށް ލޯބިހުށައެޅީވެސް. އަހަރެން އޭރުވެސް އަދި މިހާރުވެސް ހަމަ ހުރީ ތިޔަ އިންތިޒާރުގަ. މިހިތް އެލީނޫން ކުއްޖަކަށް ނުދެވޭ.” ލޯތްބާއެކު އަހަރެން އެހެން ބުނުމަށްފަހު އެލީޝާގެ ގައިގައި ބައްދައިލީމެވެ. އެތެއް އިރަކު ކަރުނަ އޮއްސުމަށްފަހު ދެމީހުން ވަކިވީ ޔުނިވާރސިޓީއިން ބައްދަލުކުރުމަށް ވައުދުވަމުންނެވެ.

އޭގެ ތިންމަސްފަހެވެ. ކައިވެނީގެ ހެދުމުގައި އަހަރެންނާ އެލީޝާ މެހެމާނުންނަށް މަރުހަބާކިޔަމުން ދިޔައީ ހިނިތުންވެތިބެއެވެ. ހުދުކުލައިގެ ކައިވެނީގެ ހެދުމުގައި އެލީ ހީވަނީ ހޫރު ޕަރީއެއް ހެންނެވެ. މިއަދު އަހަރެން މިއީ ދުނިޔޭގައި ހުރި އެންމެ ނަސީބުގަދަ އެންމެ އުފާވެރި އިންސާނާގެ ގޮތުގައި އަހަރެންނަށް އިހުސާސުވަމުން ދިޔައެވެ. އަހަރެންގެ އެލީއަށްޓަކައި އަހަރެންކުރި ދިގު އިންތިޒާރުގެ ނިމުން ކިހައި ފޮނިހެއްޔެވެ؟ މީހުން ބުނަނީ ތެދެކެވެ. ތެދުވެރި ލޯބިވާ ދެމީހެއް ވަކިވި ނަމަވެސް އެލޯބި ކޮންމެވެސް ގޮތަކުން އޭނގެ މަގު ހޯދައި އެދެމީހުން އަލުން ގުޅުވައިދެއެވެ.

= ޓްރޫ ލަވް ވިލް އޯލްވޭސް ފައިންޑް އިޓްސް ވޭ=

ނިމުނީ