އިންސާފެއް ނެތް އަނިޔާ – 2

ދަރިފުޅުގެ އުމުރުން އަހަރަކަށް ވުރެ ބޮޑުވެފައިވާއިރު އެ ވިޔާނުދާ ޢަމަލުތައް ދެނެގަންނަން ނޭނގުނަސް ދަރިފުޅުގެ ލޮލަށް އެ ކަންކަން ފެންނާނެ ކަންކަށަވަރެވެ. އެއްވެސް ވަންހަނާކަމެއް ނެތި ދަރިފުޅުގެ ކުރިމަތީގައި ނަހަމަ އެތައް ކަމެއް ކުރާއިރު އެކަމުގެ ނުބައި އަސަރު އެއްވެސް ގޮތަކަށް ދަރިފުޅަށް ކުރުމަށް ޖާގަ ނުދިނުމަކީ އަހަރެންގެ ޒިންމާއެއް ކަމުން އެ ޒިންމާ އަދާ ކުރުމަކީ އަހަރެން ކުރަންޖެހޭނެ ކަމެއް ކަމުގައި އަހަރެން ގަބޫލް ކުރީމެވެ. އަދި އެޒިންމާ އަދާކުރުމުގައި ކިތަންމެ ބޮޑު އުނދަގުލެއް އުފުލަން ޖެހުނަސް ލޯބިވާ ދަރިފުޅުގެ ހައްގުގައި ކުޑަކޮށްވެސް ފަސްޖެހުމެއް ނެތި އެޒިންމާ އަދާކުރުމަށް އަހަރެންގެ ހިތުގައި އަޒުމް ކަނޑައެޅީމެވެ.

އަންހެނުން ވަރިކުރި އަސްލު ސަބަބު އަހަރެންގެ މަންމަ އަކަށްވެސް ނެގޭނެއެވެ. ވާނުވާ ނޭގޭ ހާލު ދަރިފުޅުދެން އެގެއަށް ނުފޮނުވަނީތޯ މަންމަ ކުރި ސުވާލަށް ވަރަށް ސާބިތުވެހުރެ އާނއެކޭ އަހަރެން ބުނީމެވެ. އަހަރެންގެ ޖަވާބު އަޑުއިވުމުން މަންމަ އައިސް ދަރިފުޅު އުރާލިއެވެ. އެހިސާބުން އަހަރެން ޔަގީން ކުރީ ދަރިފުޅު ބެލުމުގެ ޒިންމާއާ މަންމަ ހަވާލުވީ ކަމުގައެވެ. ކަންތައްވީވެސް އަހަރެން ހީކުރި ގޮތަށެވެ. މާގިނަ ވާހަކަތަކެއް ދައްކައި ސުވާލު ގިނަކުރުމުގެ ބަދަލުގައި މަންމަ ހަމައެކަނި ބުނީ އެގޭގައި ހުރި ދަރިފުޅުގެ އެއްޗެތި ގެނައުމަށެވެ. އެކަމު އެގޮތައް ކަންކުރާކަށް އަހަރެން ބޭނުމެއް ނުވިއެވެ. ކިތަންމެ ބޮޑު ޚަރަދެއް ދިޔަޔަސް އަހަރެން ބޭނުންވީ އޭނަގެ ފައިދަށަށް ތިރިނުވެ ދަރިފުޅަށް ބޭނުންވާ ހުރިހާ ސާމާނެއް ވަގުތުން ގަންނާށެވެ. އަހަރެން ކަން ކުރީވެސް އެގޮތަށެވެ.

އެ ޅައުމުރުގައި ދަރިފުޅުގެ މަންމައާ ވަކިކުރަން ޖެހުމުން ދަރިފުޅަށް ކަންތައްތަކެއް އުނިވާނެކަން ގަބޫލު ކުރެވުނަސް އެކަން އެގޮތަށް ކުރުން ނޫން އެހެން ގޮތެއް އޮތްކަމަކަށް އަހަރެންގެ ޟަމީރު ގަބޫލެއް ނުކުރިއެވެ. އެ އުނިވާ ކަންކަން ފޫބެއްދުމަށް ގޮތެއް ފޮތެއްނެތް އެ ވިޔާނުދާ އަންހެނާގެ ކައިރީގައި ދަރިފުޅު ބަހައްޓައިފިނަމަ ދަރިފުޅަށް ލިބޭ ގެއްލުން އެތައް ގުނައެއް ބޮޑުވާނެކަމަށް ގަބޫލްކުރެވޭތީއެވެ. މައިވަންތަކަމުގެ ލޯތްބެއް ކުލުނެއް އެހިތުގައި ވާނަމަ ދަރިފުޅު ހުއްޓާނުލާ ގޮވަމުން ދިޔައިރު އެކަމަށް ކުޑަވެސް ފަރުވާލެއް ނެތި އޭނަ ބޭނުންވާ އުފާ ނަހަމަ ގޮތުގައި ލިބިގަތުމުގައި މަސްޣޫލުވެގެން ނޫޅުނީސްކަން އަހަރެންނަށް ޔަގީން ކުރެވެއެވެ. ވީއިރު އެ ނުބައި ނުލަފާ އަންހެނާގެ ކައިރީގައި ދަރިފުޅު ބެހެއްޓުމުގެ އެއްވެސް ބޭނުމެއް އޮތްކަމަކަށް އަހަރެންނަކަށް ނުވިސްނުނެވެ.

އަހަރެންގެ މަންމައަކީ ހަރުދަނާ ގެވެހި މީހެއްކަމުން އަހަރެން އެންމެ ހިތްހަމަޖެހޭ މިންވަރަށް ދަރިފުޅުގެ ކަންކަން ބަލަހައްޓަމުން ގެންދިޔައެވެ. މައިވަންތަ ކަމުގެ ލޯބިން މަހުރޫމްވެފައި ވިޔަސް ދަރިފުޅަށް އެ އުނިކަން އިހުސާސް ނުވާނެގޮތަށް ވީ އެންމެ ރަނގަޅަކަށް ކަންކަން ކޮށްދެވޭތޯ މަންމަ ކުރާ މަސައްކަތް ފެނުމުން އަހަރެން ވަރަށް ހިތްހަމަޖެހުނެވެ. ހިތުގައި މާބޮޑު ލޯތްބެއް ކުލުނެއް ނެތަސް އުފަންދަރިފުޅު ކަމަށްވުމުން ދަރިފުޅު ދެކިލަން އޭނަގެ މަންމަ ދޭތެރެ ދޭތެރެއިން އަހަރެންގެ ގެއަށް އަންނަން ފެށިއެވެ. އަހަރެންނަކީ އެހާ ހަރުކަށި މިޒާޖުގެ މީހެއް ނޫންކަމުން ދަރިފުޅު ދެކިލަން ދަރިފުޅުގެ މަންމަ އައުން މަނާއެއް ނުކުރަމެވެ. އެހެނަސް ދަރިފުޅު އެގެއަށް ގެންދިއުން އަހަރެން މަނާ ކުރީމެވެ. އެކަން އެގޮތަށް ކުރީ ކީއްވެކަން އޭނައަށް އެނގޭނެއެވެ. އަދި އެކަމާ ޝަކުވާކުރުމުގެ އެއްވެސް ފުރުޞަތެއް އޭނައަށް ނެތުމުން ހިމޭންކަން އިހްތިޔާރު ކުރުން ނޫން ގޮތެއް އޭނައަށް ނޯންނާނެކަން އަހަރެންނަށް އެނގެއެވެ. ޝަކުވާ ކޮށްފިނަމަ އިތުރަށް ބޭޒާރުވެ ފަޟީހަތްވުން ނޫން ގޮތެއް ނޯންނާނެކަން ވިސްނޭތީ އޭނަވެސް އިތުރަށް ޝަކުވާއެއް ނުކުރެއެވެ.

ދުވަސްތައް މާޒީއާ އެކުވަމުން ދިޔައެވެ. ދަރިފުޅުގެ އުމުރުން 4 އަހަރު ފުރިއްޖެއެވެ. ރަށުގައި ވަޒީފާ އަދާކޮށްގެން ލިބޭ އެއްޗަކުން އެންމެ ހިތްހަމަޖެހޭ މިންވަރަށް ދަރިފުޅަށާ އާއިލާއަށް ކަންކަން ނުކޮށްދެވޭކަން އިހްސާސް ކުރެވެން ފަށައިފިއެވެ. އެހެން ނަމަވެސް ރަށުން ބޭރަށް ވަޒީފާ އަދާކުރަން ގޮސްފިނަމަ ދަރިފުޅަށް ލިބޭނެ ހިތާމައާ އުނިކަން އިހްސާސް ކުރެވޭތީ ރަށުން ބޭރަށް ދާކަށް ބޭނުމެއް ނުވެއެވެ. ވަޒީފާގެ އިތުރުން އާމްދަނީ ހޯދުމަށް ޖެހުނު ކޮންމެ މަސައްކަތެއް އަހަރެން ކުރަން ފެށީމެވެ. ކައިވެންޏެއް ކުރުމަށް ރައްޓެހިން އެތައް ވަރަކަށް އާދޭސް ކުރިޔަސް ކައިވެންޏެއްވެސް ކުރާކަށް އަހަރެން ބޭނުމެއް ނުވެއެވެ. އިތުރު ކައިވެންޏަކުން ދަރިން ލިބުމުން ދަރިފުޅަށް ލިބިދާނެ އުނިކަމަކަށް ޓަކައެވެ. ދޮންމަންމަ އަކަށްވުރެ ހުރިހާ ގޮތަކުންވެސް އަހަރެންގެ މަންމަ ދަރިފުޅަށް ރަނގަޅު ވާނެކަން ޔަގީންވާތީއެވެ. އެހެން ނަމަވެސް ޒުވާން އުމުރު ކައިވެންޏަކާ ނުލާ ހޭދަކުރުމުގައި ހުރި އުނދަގޫ އަހަރެންނަށްވެސް އިހްސާސް ކުރެވެއެވެ. ހުރިހާ އުފާތަކަކުން މަހުރޫމްވެގެންވެސް އަހަރެން ބޭނުންވީ ދަރިފުޅަށް އުފާވެރި މުސްތަގުބަލެއް ހޯދަދޭށެވެ.

އުފާވެރި މުސްތަގުބަލަކަށް އެޅޭނެ އެންމެ ވަރުގަދަ ބިންގަލަކީ ތައުލީމާ ތަރުބިއްޔަތުކަމަށް ވުމުން ރަނގަޅު ފެންވަރަކަށް ދަރިފުޅަށް ތައުލީމު ހާސިލްކޮށްދީ އެންމެ އެކަށޭނަ ތަރުބިއްޔަތު ދިނުމަކީ އަހަރެން އެންމެބޮޑަށް ސަމާލުކަން ދޭންޖެހޭ ކަންތައްކަން އަހަރެން ގަބޫލްކުރީމެވެ. އަދި އެކަމަށް ކުރަންޖެހޭ ހުރިހާ ހޭދައަކާ ހުރިހާ މަސައްކަތެއް ވަރުބަލިކަމެއް ނެތި އަހަރެން ކުރަމުން ދިޔައިމެވެ. އަހަރެންގެ މަސައްކަތުގެ ނަތީޖާ ދަރިފުޅުވެސް އަހަރެންނަށް ދައްކަމުން ދިޔައެވެ. ގްރޭޑް 5 ނިމެންދެންވެސް ކްލާހުން އެންމެ މޮޅު އެއްދަރިވަރަކީ އަހަރެންގެ ދަރިފުޅު ކަމުގައި ވުމުން އަހަރެން ހުރީ ވަރަށް އުފަލުންނެވެ. އުމުރާ އެކަށޭނަ މިންވަރަށް ދީނީގޮތުންނާ ދުނިޔެވީ ގޮތުންވެސް ދަރިފުޅަށް އެނގެންޖެހޭ ކަންކަން އަންގައިދީ ރަނގަޅު ތަރުބިއްޔަތެއްގެ މަތީގައި ދަރިފުޅު ބޮޑުކުރުމަށް އަހަރެން ވަރަށް މަސައްކަތް ކުރަމުން ދިޔައިމެވެ. ހުރިހާ ކަމެއްވެސް އެންމެ ރަނގަޅަށް ދާތީ އަހަރެން ހުންނަނީ އުފަލުންނެވެ. އާމްދަނީ ހޯދުމަށް ޖެހުނު ކޮންމެ މަސައްކަތެއް އަހަރެން ކުރަނީ ހިއްލާ ދަލަކަށް ވާ ވަރުބައްޔަކަށް އަޅާ ވޭނަކަށް ބެލުމެއްނެތި ދަރިފުޅުގެ ހައްގުގައެވެ.

ދުވަސްތައް މާޒީއާ އެކުވަމުންގޮސް ދަރިފުޅުގެ އުމުރުން 10 އަހަރު ފުރިއްޖެއެވެ. ކޮންމެ އިންސާނަކަށްވެސް އެމީހެއްގެ މައިންބަފައިންގެ ލޯބި ބޭނުންވާ ފަދައިން ދަރިފުޅުވެސް އޭނަގެ މަންމަގެ ލޯބި އިންތިހާއަށް ބޭނުންވާކަން އަހަރެންނަށް ޔަގީންވެއެވެ. އަދި ގިނަ ވަގުތުތަކެއް މަންމައާއެކު ހޭދަ ކުރަންވެސް ބޭނުންވާކަން އެނގެއެވެ. ހުރިހާ ހިތާމައަކާ އުނިކަމެއް އިހްސާސް ކުރަމުންވެސް ދަރިފުޅުގެ މަންމަގެ އެއްވެސް ގޯސް ވާހަކައެއް ދަރިފުޅުގެ ކައިރީގައި ދުވަހަކުވެސް އަހަރެން ނުދައްކަމެވެ. ވަރަށް ކުޑަ އިރުއްސުރެވެސް މަންމަ އެހެން ގެއެއްގައި އުޅެނީ ކީއްވެތޯ ދަރިފުޅު ސުވާލުކުރުމުން އަހަރެން ބުނަނީ އެންމެ ވާހަކައެކެވެ. ބައްޕަ ދެކެ މަންމަ ކުޑަކޮށް ރުޅިއައިސްގެން މިގެއަށް ނާންނަނީ ކަމަށެވެ. މަންމަ ގެނައުމަށް ދަރިފުޅު އެތައް ޝަކުވާއެއް ކުރެއެވެ. އެހެނަސް އެ ހިތި ހަގީގަތް ދަރިފުޅަށް ހާމަކޮށް ދޭނީ ކިހިނެއް ހެއްޔެވެ. ދަރިފުޅުގެ މަންމައަކީ އެންމެ ވިޔާނުދާ ހަޑިމުޑުދާރު އަމަލުތަކަށް ހައްދު ފަހަނަޅާފައިވާ މީހެއްކަން ދަރިފުޅަށް އެނގޭކަށް އަހަރެން ބޭނުމެއް ނުވެއެވެ. އެކަން ދުވަހަކު ކޮޅުން އެނގުނަސް ދަރިފުޅު ގަންނާނެ ލަދާ ކުރާނެ ހިތާމަ ވިސްނޭތީއެވެ. އެހެންވެ އެންމެ ފަހުން އަހަރެން ޖެހެނީ އަމިއްލަ ނަފުސު ކުއްވެރިކޮށް އަހަރެންގެ ސަބަބުން މަންމަ ރުޅިއައި ކަމަށް ހަދާފައި ދަރިފުޅުގެ ހިތްހަމަޖެއްސޭތޯ ބަލާށެވެ.

ކަންކަން ވާނުވާ އެނގޭ ހިސާބަށް ދަރިފުޅުގެ ޢުމުރު ދިޔައިރު ދަރިފުޅުގެ މަންމަ އެހެން މީހަކާ ކައިވެނިކޮށްގެން ވަނީ ދެ ކުދިން ލިބިފައެވެ. ކޮއްކޮމެންނާއެކު މަޖާކޮށް ހެދުމަށް ދަރިފުޅު ބޭނުންވާތީ އެގެއަށް ދިއުމަށް ވަރަށް އެދެއެވެ. ކޮންމެ ފަހަރަކު ދަރިފުޅުގެ އެދުމަށް ނޫނެކޭ ބުނަން އުނދަގޫވާތީ ދަރިފުޅުގެ އެދުމަށް އިޖާބަދީ އެގެއަށް ދަރިފުޅު ފޮނުވަން ފެށީމެވެ. އެހިސާބުން ދަރިފުޅުގެ ކިޔެވުމަށް ނުރަނގަޅު އަސަރުތަކެއް ކުރާކަން އަހަރެންނަށް ފާހަގަވިއެވެ. އެވާހަކަ ދަރިފުޅުގާތުގައި ދެއްކުމުން އެކަށޭނަ ހައްލެއް ނުލިބޭނެކަން އަހަރެންނަށް ވިސްނުނެވެ. ސަބަބަކީ އެއްވެސް ކަމެއްގެ އެންމެ ރަނގަޅުގޮތް ދެނެގަނެވޭ ވަރަށްވުރެ ދަރިފުޅު ޅަވީމައެވެ. އެހެނަސް އެވާހަކަ ދަރިފުޅުގާތުގަ އަހަރެން ދެއްކީމެވެ. ކޮއްކޮމެން ގާތަށް ފޮނުވާނީ ކިޔެވުމަށް ފަރުވާކުޑަ ނުކުރާނަމަ ކަމަށް އަހަރެން ބުނީމެވެ. އެހެން ބުނި ދުވަހަކީ ދަރިފުޅުގެ ފަރާތުން ފުރަތަމަ ފަހަރަށް އަހަރެންނަށް ނުރަނގަޅު ރައްދެއް ދިން ދުވަސް ކަމަށް ވިއެވެ. ބައްޕަ ރުޅިއަޔަސް ނުކިޔެވުނަސް ކޮއްކޮމެން ކައިރިއަށް ދާނެކަމަށް ދަރިފުޅު ބުނި އަޑު އިވުމުން ވަރަށް ދެރަވިއެވެ. ގިސްލާ ރޮވުނެވެ. ކަމުގެ އަސްލު ހަގީގަތް ނޭގޭހާލު ދަރިފުޅު ދިން ރައްދުގެ ސަބަބުން ކިތަންމެ ބޮޑު ވޭނެއް އުފުލަން ޖެހުނަސް އަހަރެންގެ ހިތް އެދަރިފުޅުގެ މައްޗަށް ހަމަސާފެވެ. އެއްވެސް ނަފުރަތެއް ރުޅިވެރިކަމެއް ދަރިފުޅާމެދު އަހަރެންގެ ހިތުގައި އުފެއްދުމަކީ ދުވަހަކުވެސް އަހަރެން ކުރާނެކަމެއް ނޫނެވެ.

އެ ދަރިފުޅު އުފާކޮށް އެކުގައި ކުޅެހަދާނެ ކޮއްކޮމެން ބައްޕަގެ ނަސްލުން ދުނިޔެއަށް އުފަން ނުކުރީ ކީއްވެކަން ދަރިފުޅަށް ވިސްނޭނެ ނަމައޭ ހިތަށް އެރިއެވެ. ހަމައެކަނި އެ ދަރިފުޅުގެ ހައްގުގައި މި އިހްސާސްކުރާ އުނިކަމާ ވޭނާ ކެކުޅުމާ ހުސްކަން ދަރިފުޅަށް ވިސްނޭނެނަމަ ކޮންފަދަހޭ ހިތަށް އެރި ނަމަވެސް ހަގީގަތް ދަރިފުޅުގެ ކުރިމަތީގައި ހާމަކުރާނީ ކިހިނެއް ހެއްޔެވެ. އެ ޅަ ސިކުނޑިއަށް ވިސްނޭ ގޮތައް އެވާހަކަތައް ކިޔައިދޭނެ ރަނގަޅު އެއްވެސް ގޮތެއް އަހަރެންނަކަށް ނުވިސްނުނެވެ. ހަމަ އެކަނި އޮތް ގޮތަކީ ދަރިފުޅުގެ މަންމަ ކަންކުރި ގޮތް ސާފުކޮށް ކިޔައި ދިނުން ނަމަވެސް އެކަން ކުރާކަށް އަހަރެންގެ ޟަމީރު އެއްބަހެއް ނުވިއެވެ. އެ ހަގީގަތް ދަރިފުޅަށް އެނގުމުން ލިބޭނެ މާޔޫސްކަމާ ހިތްދަތިކަމާ، އިހްސާސް ކުރަން ޖެހޭނެ ލަދުވެތިކަން އަހަރެންނަށް ވިސްނޭތީ އަހަރެން ބޭނުންވީ އިތުރު ހިތާމަތަކަށް ކެތްކުރަމުންވެސް ހަގީގަތް ވަންހަނާ ކުރާށެވެ. އަހަރެން އުއްމީދުކޮށްގެން ހުންނަނީ ކޮންމެވެސް ދުވަހަކުން ދަރިފުޅަށް ކަމުގެ ހަގީގަތް އެނގި ދަރިފުޅުގެ ހައްގުގައި ބައްޕަ ވީ ގުރުބާނީ ވިސްނޭނެ ދުވަހެއް އަންނާނެ ކަމަށެވެ.

އަހަރެންގެ ދުލުން ރައްޓެއްސެއް ކައިރީވެސް އެ ވާހަކަތަކެއް ނުދައްކަމެވެ. އަދި ޢާއިލާގެ އެއްވެސް މީހެއް ކައިރީގައިވެސް އެވާހަކަތަކެއް ނުދައްކަމެވެ. އަހަރެމެން ދެމީހުން ވަކިވަން ޖެހުނު އަސްލު ސަބަބު ހަމަ ޔަގީނުންވެސް އަހަރެންގެ ފަރާތުން އެއްވެސް މީހަކަށް އެނގިފައެއް ނުވާނެއެވެ. މި ބީދައިން އަހަރެން ކަންކުރީ ހަމަ އެކަނި ދަރިފުޅުގެ ހައްގުގައެވެ. ދަރިފުޅުގެ މަންމައަކީ އަގެއް ގަދަރެއް ނެތް މީހެއްކަން އެންމެނަށް އެނގިއްޖެ ނަމަ އެކަމުގެ އުނިކަން ދަރިފުޅުވެސް އިހްސާސް ކުރަން ޖެހޭނެ ދުވަހެއް އަންނާނެކަން އަހަރެންނަށް ވިސްނޭތީއެވެ.

ދަރިފުޅުގެ އުމުރުން ހޭދަވާ ކޮންމެ ދުވަހަކާއެކު ހަރުކަށިކަމާ ރުޅިވެރިކަން މިޒާޖުގައި އަށަގަނެ ކަންކަން ގޯހުން ގޯހަށްދާތަން ފެންނަން ފެށިއެވެ. އަހަރެންގެ މަންމައަށް އެކަން ފާހަގަ ކުރެވެން ފެށުމުން އެވާހަކަ އަހަރެންނާ ދެއްކިއެވެ. އަދި އެހާ ގިނައިން އެގެއަށް ދަރިފުޅު ނުފޮނުވުމަށް އެދުނެވެ. ފަހަކަށް އައިސް ދަރިފުޅުގެ ބަސްމަގުވެސް އުމުރާ ނުގުޅޭވަރަށް ހަރުކަށިވެ ހުތުރުވާތަން ފެންނަން ފެށުމުން އެކަން ހަޖަމްކުރުމަކީ އަހަރެންގެ މަންމައަށް އެހާ ފަސޭހަ ކަމަކަށް ނުވިއެވެ. ރުޅިވެރިކަމާއެކު މަންމަވެސް ދަރިފުޅަށް ރައްދުދޭ މަންޒަރު މަދުން ނަމަވެސް އަހަރެންނަށް ފެންނަމުން ދިޔައެވެ. މިކަން ހައްލު ވާނެ ގޮތަކާމެދު އަހަރެން ވިސްނަން ފެށީމެވެ. އެގެއަށް ނުދާށޭ ބުނި ނަމަވެސް އެކަން ދަރިފުޅު ގަބޫލް ނުކުރާނެކަން އަހަރެންނަށް ވިސްނެއެވެ. އަހަރެން ބޭނުންވީ ދަރިފުޅަށް ވީވަރަކުން ކަންކަން ވިސްނައިދޭށެވެ.

ރޭގަނޑުގެ ކެއުން ނިމިގެން ދަރިފުޅުގޮސް ކޮޓަރިއަށް ވަނެވެ. ފަހަތުންގޮސް އަހަރެންވެސް ވަނީމެވެ. އަހަރެން ވަތްކަން އެނގުމުން ދަރިފުޅު އެނބުރި ބަލާލިއެވެ. ލޯތްބާ ކެއްތެރިކަމާއެކީ އަހަރެން ދަރިފުޅަށް ނަސޭހަތްދޭން ފެށީމެވެ. ނަމަވެސް ދަރިފުޅުގެ މޫނުމަތިން ފެންނަންފެށީ ދެކޮޅުހެދުމާއި ގޮތްދޫނުކުރުމުގެ ކުލަތަކެވެ. އޭނާ ކުޑައިރުއްސުރެ ބަލާބޮޑުކުރި ބައްޕަ ކުރިމަތީގައި ހުރެ ކުރަމުންދިޔަ އާދޭހަށް ދެމުން ދިޔައީ ބީރުކަންފަތެކެވެ. އެންމެފަހުން އަހަރެންގެ ވާހަކަ މެދުކަނޑާލާފައި ދަރިފުޅު އޭނާ ބޭނުންވަނީ އޭނާގެ މަންމައާ ކޮއްކޮމެންނާއެކީ ދިރިއުޅެންކަމަށް ބުންޏެވެ. އޭނާއަށް މިހާރު އެ ނިންމުން ނިންމޭނެކަމަށާއި އަދި އޭނާގެ މަންމައާއި ކޮއްކޮމެންނާއި ވަކިކޮށްގެން ގެންގުޅޭތީ އެކަމާ އަހަރެމެންދެކެ ނަފްރަތު ކުރާ ކަމަށް ބުންޏެވެ.

މިވާހަކަ އަޑުއަހާފައި އަހަރެންނަށް ކުރި އަސަރު ބަޔާން ކުރަންވެސް ދައްޗެވެ. މިއީ އެ އުޅުމެއްނެތް އަޑިނުބައި އަންހެނާގެ ރޭވުމެއްކަން އަހަންނަށް އެނގުނެވެ. އަހަރެން އޭނާގެ މުޑުދާރު އަމަލުތައް ސިއްރުކުރީ ޚުދު އަހަރެމެންގެ ދަރިފުޅުގެ ހިތް އެފަދަ ހަބަރަކުން ކިލަނބުވެ އޭނާގެ އުފަން މަންމައާދޭތެރޭ ގަދަރުކުޑަވެގެން ދިއުމަށް ބޭނުންނުވާތީ ކަމަށްވިޔަސް އެ ކަމުގެ ނާޖާއިޒް ފައިދާ އެ އަންހެނާ ނަގައި އަހަރެންގެ ދުނިޔެ ބަނަކޮށްލީއެވެ. އަހަރެންގެ މަންމަ މާމަދަރިފުޅުގެ އަމަލުތަކާހެދި ކިތަންމެ ހިތްހަމަނުޖެހުނު ނަމަވެސް އެންމެ ޅަދުވަހުން ފެށިގެން މަންމައެއްގެ ވާޖިބު ފުރިހަމައަށް އަދާކުރަމުން ދިޔައީ އަމިއްލަ ދަރިއެއްފަދައިން ލޯބި ދީގެންނެވެ. އެހެންކަމުން އަހަރެން ކުރާވަރުގެ ހިތާމައެެއް އަހަރެންގެ މަންމަވެސް ދަރިފުޅުގެ މި ނިންމުމާމެދު ކުރާނެ ކަން އަހަރެންނަށް އިނގެއެވެ.

އަހަރެންނަށް އިތުރު ހިތްދަތިކަމެއް ލިބުނީ ދަރިފުޅު އެ ނުރައްކާތެރި ހާއްޔަށް ދިއުން ހުއްޓުވުމަށްޓަކައި ނަމަވެސް ދެން އޭނާގެ މަންމަގެ ހަގީގަތް ކިޔައިދީގެން އޭނާ ގަބޫލު ނުކުރާނެކަން އިނގޭތީއެވެ. ކޮންމެ މީހަކުވެސް ހީކުރާނީ އެއީ އަހަރެން އެ އާއިލާއިން އޭނާ ވަކިކޮށްލުމަށް ހަދާލި ދޮގުތަކެއް ކަމުގައެވެ. ހުދު އަހަރެންގެ އެންމެ ގާތް ރައްޓެހިން  އަދި އަހަރެންގެ މަންމައަށް ވެސް އަހަރެން ވަނީ އެ ހަގީގަތް ވަންހަނާކޮށްފައެވެ.

ހުރިހާކަމެއް އަމިއްލަ ސިކުނޑީގައި ރައްކާކޮށް އާއިލާއާއި ރައްޓެހިންނަށް އަހަރެންނަށް އެހީއެއްފޯރުކޮށްދެވޭނޭގޮތް ބަންދުކުރީ ހަމަ އަމިއްލައަށެވެ. އަހަރެންގެ އަނބިމީހާގެ ވިޔާނުދާ އުޅުމުގެ ވާހަކަ ހިއްސާކުރަން ޖެހިލުންވީ އޭގެއިން އަހަރެންގެ ނަމަށް ވެސް ހުތުރުކަމެއްލިބިދާނެތީއެވެ. ދަރިފުޅުވެސް ކަންކަން ވިސްނޭ އުމުރަށް އެޅުމުން ހަގީގަތް ކިޔާދެވުނީހެވެ. ނަމަވެސް ދެން މިހާރު ކުރާނެކަމެއްނެތެވެ. ދަރިފުޅުގެ ހަޔާތައް އެއްވެސް ހިޔަންޏެއް ނޭޅުމަށް އެދި އަހަރެން ނިންމި ނިންމުން އަހަންނަށް މިއަދު މިވީ އަނިޔާއަކަށެވެ.

(ނިމުނީ)