ޢެދެމޭ އުފާ….(27)

ގަޑިން އަށެއް ޖެހުމާއެކު މުހައްމަދު ހުރީ އަލްޔާ ބަލާ އައިސްއެވެ. އިދުރީސް އަންގާފަ އޮތީ އަށެއް ޖަހާއިރު އަލްޔާ ގެނެސް އޭނަގެ ކޮޓަރިއަށް ލުމަށެވެ. އެހެން ކަމުން އެ ގަޑިއަށް މުހައްމަދު އަތުވިއެވެ. އޭނަ އައި އިރު ވެސް އަލްޔާ ނުގެންދެވޭނެ ކަން އޭނަޔަށް އިނގެއެވެ. އެހެން ނަމަވެސް އޭނަގެ ވާޖިބު އަދާ ކުރުމަކީ ކުރަން ޖެހޭނެ ކަމެއް ވިއްޔާއެވެ. “އިދުރީސް ބުނެގެން މިއައީ…” އެތެރެއަށް ވަނދެ ބުނެލިއެވެ. “ހެހެ… ބަރާބަރު! މުހައްމަދުބެގެ މަސައްކަތް ވަރަށް ފުރިހަމަ، ދެން ގޮސް ބުނޭ އަލްޔާ ވެއްޓި އެކި ތަންތަން މަށައިގެން ގޮސްފައޭ އޮތީ… އޭނަޔަކަށް ހިރިލެވޭ ވަރު ވެސް ނުވެޔޭ…” ހެމުން ހެމުން ޒިއާދާ ބުނެލިއެވެ. “ހެހެ… އަދި އެއްވާހަކަ އަހަރުން ޕުލޭން ކުރި ގޮތަށް ފަހަރެއްގައި ނުވެދާނެ، ކުރަން ޖެހޭ މަސައްކަތް ވެސް އުނދަގޫ ވެދާނެ މިރޭ ކޮންމެވެސް ވަރަކަށް ގާޑުން އެބަތިބި އެހެން ރޭރޭގަ ނުހުންނާތީ މުހައްމަދުބެ ހީކުރީ މިރޭވެސް ނުތިބޭނެ ކަމަށް އެކަމަކު ދެތިން މީހަކު އެބައުޅޭ” މުހައްމަދު އޮޅުން ފިލުވައި ދިނެވެ. މުހައްމަދު އެހެން ބުނުމާއެކު ހުރިހާ ކުދިން މިލާމޯޅިވިއެވެ. “ދެން ކިހިނެއް ހަދާނީ؟” ޒިއާދާ ދެރަވެފަ ބުނެލިއެވެ. “މުހައްމަދުބެއަށް ކުރެވުނު ހުރިހާ މަސައްކަތެއް ކުރާނަން ތިކުދިން ތައްޔާރަށް ތިބޭތި! އިހަށް ގޮސްލާނަން އަލްޔާ ބަލިވާހަކަ ބުނަން ވާނެއްނުން…” އެހެން ކިޔާފަ މުހައްމަދު ދިޔައީ އަލްޔާ ބަލި ވާހަކަޔާ ނާދެވޭނެ ވާހަކަ ބުނާށެވެ. ” އަލް ހިތްވަރު އެލުވާ ނުލާތި! ރަނގަޅު ވާނެ އިރާދަ ކުރެއްވިއްޔާ މިފަހަރު އަހަރުންނަށް ކާމިޔާބު ވާނެ… އަލް ތިއޮތް ގޮތަށް އޮންނާތި ނުތެދުވާތި އެ ޖަނާވާރު އައިސްދާނެ ހަމަ ލޮލަށް ބަލަން ވެސް!” އެހެން ކުދިންނަށް ހިތްވަރު ދެމުން ޒިއާދާ ބުނެލިއެވެ.

އަލްޔާ ބަލިވާހަކަ ބުނުމާއެކު އިދުރީސް ދިޔައީ ރުޅިއައިސް ރަތް ވެގެންނެވެ. “ތިދެން ކިހާ ބޮޑު މުސީބާތެއްތަ؟ އޭނަގެ ފަރާތުން އެއްވެސް ފާއިދާއެއް ނުވޭ އަދިއެއް ހާދަ ގިނަ ލާރިއެއް ދީފައޭ މަ އޭނަ ގެނައީ ކަލޭ ދައްކާ ވާހަކައެއް މަ ގަބޫލެއް ނުކުރާނަން… މަބޭނުން ހަމަ ލޮލަށް ބަލަން” މުހައްމަދުބެއާ ދިމާލަށް ރުޅި އައިސްގެން ހަޅޭއްފަޅޭއް ޖަހަމުން އިދުރީސް ގޮސް ވަނީ ސީދާ އަލްޔާ އުޅޭ ކޮޓަރިއަށެވެ. އޭނަ ހަޅޭއްލަވަމުން އަންނަ އަޑަށް ހުރިހާ ކުދިން ވެސް ސައްލާ ކުރަން ތިބެފަ އެކި ކުދިން އެކި ކަންތަކުގަ ޝާމިލް ވެގަތެވެ. އަލްޔާ އޮތީ މަރުވެފަ އޮތް މީހެއްހެން، ދެލޯ މަރާ ތަގުޅި ކޮށްގެން ނިދާ ކަމަށް ހެދިގެންނެވެ. “ކޮބާތަ އެ އަލްޔާ؟” އެތެރެއަށް ވަން ގޮތަށް އަޑުގަ ނެތްވަރަށް ބާރު ލައިފަ އިދުރީސް އަހައިލިއެވެ. “އެއޮތީ..!” ބިރުން ތިބެ އަލްޔާ އޮތް އެނދާ ދިމާލަށް އިނގިލި ދިއްކުރަމުން ހުރިހާ ކުދިން އެއްފަހަރާ ދައްކާލިއެވެ. އިދުރީސް މަޑު ކުރުމެއް ނެތި ގޮސް ހުއްޓުނީ އަލްޔާ އޮތް އެނދާ ދިމާލަށެވެ. ” ކީއްވެތަ އަލްޔާ ވެއްޓުނީ؟، ހާދަ ބޮޑު ވަރުވެފައޭ އެއޮތީ!” ކިތަންމެ ރުޅި އައިސް ހުއްޓަސް އަލްޔާއަށް ވެފަ އޮތް ވަރު ފެނުމުން އިދުރީސް އަހައިލިއެވެ. “ފާހަނަޔަށް ވެއްޓުނީ، އަލްޔާ ބުނީ ކައްސާލީޔޯ…” މަޑު މަޑުން ޒިއާދާ ބުނެލިއެވެ. “ކަލޭމެން މައިތިރި ވެގެން ނުތިބޭ ވިއްޔާ! ވާވަރު އަދި ކުޑައެއްނުން މުހައްމަދު މިތަނުން ހަތަރު ވަރަކަށް އަންހެން ކުދިން ގެނޭ މަގޭ ކޮޓަރިއަށް… މިރޭ ބޮޑު ލަނޑެއް ނޫން މިލިބުނީ!” އެތާ ތިބި އަންހެން ކުދިންނާ ދިމާލަށް އެހެން ބުނެފަ ހަތަރު ކުދިން ގެންނަން ބުނެފަ އިދުރީސް ދުން ޖަހާފަ ހިނގައްޖެއެވެ. އިދުރީސް ދިއުމާއެކު ހުރިހާ އަންހެން ކުދިންތަށް ފެށީ ޕަކަ ޕަކަ ލާފަ ހޭންށެވެ. ހޭނެތާއެވެ. މިފަހަރު އެކުދިންގެ މަގުސަދު ހާސިލް ވާނެ ކަމުގެ ސިގުނަލް ފެނުނީ ވިއްޔާއެވެ. “ހޫމް… ދެންވެސް އަވަސް ކޮއްބަލަ ކޮންބައެއްތަ ދާނީ؟” އިތުރު ވަގުތު ނަގާލަން ބޭނުން ނުވާތީ މުހައްމަދު ބުނެލިއެވެ. އޭނަވެސް ބޭނުން ވަނީ ވީހާ އަވަހަކަށް އޭނަގެ މަސައްކަތް ނިންމާލާށެވެ. “އޯކޭ! އޯކޭ… މަށާ ޖީޒް އާ ފަރީ އާ މައިއާ ދާނީ…” ޒިއާދާ ވަގުތުން ބުނެލިއެވެ. “ތިއީ އެންމެ ރަނގަޅު ގޮތް… އަވަސްކޮއްލައިގެން ހިނގާ ދާން އޭރުން އަވަސް ވާނީ!” މުހައްމަދު ބުނެލިއެވެ. “ހިނގާ ދާން އަހަރުން ރެޑީ..” ޒިއާދާ ބުނެލިއެވެ. “ބުނަން، ތިމީހުން ހަނދާންކޮށް ޅަ އެއްޗެއް ނާޅާތީ ހަމަ ޖެހިގެން އަވަހަށް އަލްޔާ ބޭރު ކުރާތި!” ނިކުންނަމުން ޒިއާދާ ބުނެލިއެވެ. ޒިއާދާމެން ނިކުތުމާއެކު އަލްޔާ ފުއްމާފަ އެނދުން ތެދުވިއެވެ. އަދި އޭނަގެ ފޮށި ނަގާ އެގެއިން އޭނަޔަށް މުހިއްމުވާ ބައެއް ކަރުދާސް ތަކެއް ނަގާ އަވަހަށް ތައްޔާރު ވެލީ އެތަނުން ނިކުތުމަށްޓަކައި މަސައްކަތް ފަށާށެވެ. ޒިއާދާމެން އިދުރީސްގެ ކޮޓަރިއަށް ލުމަށް ފަހު އަވަހަށް މުހަމްމަދު ދިޔައީ އެތާތިބި އައުވާނުންގެ ހާލަތަކީ ކޮބާތޯ ބަލާށެވެ. އެމީހުންގެ ހަރަކާކަތްތައް ހުރި ގޮތެއް ބަލާފަ ނޫނީ އިތުރު ފިޔަވަޅެއް އަޅާކަށް އޭނަޔަކަށް ނުކެރޭނެއެވެ.

“ސުހޭލްއަށް އަޑުވެސް އިވިފަ ހަމަ ނެތީތަ؟ އެ އިދުރީސް އެއްގެ ނަންވެސް..!” ހައިރާންވެފަ މާކިން އަހައިލިއެވެ. “އާއެކޭ… މަ އަނެއްކޮޅުން ވަރަށް އާ އަދި މިކަމަށް” ސުހޭލް ބުނެލިއެވެ. “ދެން ކިހިނެއްތަ މިކަން ކުރާނީ؟” ވިނާން ހާސްވެފަ އަަހައިލިއެވެ. ވިނާން ކައެ ހާސް ނުވޭ މަ އަލަކަސް އެތާ އެބަ ތިބި ތިކަމުގެ ތަޖުރިބާ ހުރި މީހުން! މަ އެބަބަލަމޭ…” ވިނާން ހާސްވެފަ ހުރުމުން ސުހޭލް ބުނެލިއެވެ. “އޭގެ މީހެއްގެ ފޮޓޯ ގަނޑެއްހާ ވަރު ހުރި ނަމަވެސް ތަން ކޮޅެއް ފަސޭހަވާނެ އެވަރު ވެސް ނެތް ވިއްޔާ… ކަލޭމެން ތި ގޮލާގެ ނަން ހޯދި ގޮތަށް ފޮޓޯ އެއްވެސް ލިބޭތޯ ބަލާބަލަ” ސުހޭލް ބުނެލިއެވެ. ވިނާންމެން އަތުގަ ހުރި ވީޑިއޯއެއްގެ ވާހަކަ އެއްގޮތަކަށް ވެސް ސުހޭލް ކައިރި ބުނާކަށް އެމީހުން ބޭނުން ނުވެއެވެ. ސަބަބަކީ އަފީފާ ކިތަންމެ ގޯހަސް އޭނައަށް ދެރައެއް ލިބެން ވިނާން ނޭދޭތީއެވެ. އަނެއްކޮޅުން އެމީހުންނަށް އެހެން މީހުން ކުރާ އިހުތިރާމް ގަދަރު ގެއްލިގެން ދާކަށް ވިނާން ނޭދެއެވެ. ކުށް ކުރި މީހަކީ މަންމައެވެ. ބަދުނާމުވެ އެެހެންމީހުންގެ އިނގިލި ދިއްކުރާނީ ކުށެއް ނުކުރާ ބައްޕަޔާ ދިމާލަށެވެ. އެހަންވީމަ މަންމަ ކުރި ނުބާ ކަމަކުން ބައްޕަގެ ނަން ކިލަނބު ވާކަށް ވިނާން ނޭދެއެވެ. “އަހަރުން އެބަ ބަލަމޭ ފޮޓޯއެއްވެސް ލިބޭތޯ… ދޯ ވިނާން؟!” ވިނާންއަށް ދޯ ދެމުން މާކިން ބުނެލިއެވެ. “އާ… ތިކަން ވެސް ކުރާނަން އަދި އިރާދާ ކުރެއްވިއްޔާ މިކަން ކާމިޔާބު ވާނެ!” ޔަގީން ކަމާއެކު ވިނާން ބުނެލިއެވެ. މީހުން ކުރިމަތީގަ ކިތަންމެ ގަދަބެ ވެގެން އުޅުނަސް ވިނާންގެ ހިތް ހީވަނީ ފަޅައިގެން ގޮސްދާނެ ހެންނެވެ. އަލްޔާގެ ހާލެއް ނޭނގޭތީ ވިނާން ހުންނަނީ ނެގިމަޑުވެ އާވާރާއެއް ހެންނެވެ. އެކަމަކު ރައްޓެހިން ކުރިމަތީ އުޅެނީ ވަރަށް ހިތްވަރު ކޮއްގެނެވެ. “އެ ގުޅަނީ އޮފީހުން މަ ނައްޓާލީ ހަބަރެއް ކޮއްލާނަން…” ސުހޭލްގެ ފޯނަށް ފޯނެއް އައުމުން އޮފީހުން ގުޅީ ކަމަށް ބުނެ ސުހޭލް ހިނގައްޖެއެވެ. މާކް ދެން ކިޔާބަލަ ގޮތެއް، މަ މިހެން ހުރެ ހަނާ އޭ މިވަނީ!” ސުހޭލް ދިއުމާއެކު ވިނާން ބުނެލިއެވެ. “ބުރަދާރ… މަ ހަނާ ނުވިއެއް ކަމަކު މަވެސް ހަމަ ތިޔަފަދަ މަވެސް ހާދަ މަސައްކަތެއް އެބަ ކުރަމޭ…” މާކިން ދެރަވެފަ ބުނެލިއެވެ. “އިނގެޔޭ މާކު މަސައްކަތް ކުރާކަށް އެކަމަކު ހަމަ ހިތް އަވަސް ވާތީ ކިޔެނީއޭ” ވިނާން މަޑު ހިނިތުން ވުމަކާއެކު ބުނެލިއެވެ. “މިހާލް ބުނި ވަރަށް އަވަހަށް މާލެ އަންނަ ވާހަކަ މަންމަވެސް ރަނގަޅޯ ބުނީ!” ވިނާން ބުނެލިއެވެ. “މަށަށް ވެސް ގުޅި… މަގޭ ކައިރީގަ ވެސް ބުނި އަންނަ ވާހަކަ، ޝިޓް! އަދި ކިރިޔާ މި ހަނދާން ވީ ލީޒާ ފުރާ ގަޑި އެޖެހެނީ އޭނަ ފުރުވަން ނުގޮސް ފިއްޔާ ހަ ކަންތަކާ ޖެހޭނެ ހިނގާ އަވަހަށް ނައްޓާލަން…” ވާހަކަ ދައްކަމުން ގޮސް ކުއްލިއަކަށް ހަނދާން ވުމުން ފުއްމާފަ ތެދު ވަމުން މާކިން ބުނެލިއެވެ. “އެހެންތަ؟ ކީތް ކުރަންތަ؟” ވިނާން ހައިރާންވެފަ އަހައިލިއެވެ. “އޭނަ ޑޮކްޓަރަށް ދައްކަން ދަނީ، ވީކަކަށް އެދަނީ” އޮޅުން ފިލުވާ ދެމުން މާކިން ބުނެލިއެވެ. އެހެން ކިޔާފަ ބިލަށް ފާއިސާ ދެއްކުމަށް ފަހު ދެމީހުން ވެސް ނިކުތީ އަވަހަށް ގެއަށް ދިއުމަށެވެ. ލީޒާ އަކީ މާކިންގެ ކޮއްކޮކަން ވިނާންއަށް އެނގުނީ ތިލަފުއްޓަށް ކުރި ދަތުރުގެ ފަހުންނެވެ. ވިނާންއާ މާކިން އާ ކިތަންމެ ގާތަކަސް އެގެއަށް ގޮސް އުޅޭ މީހެއް ނުން ކަމުން ނޭނގޭނެތާއެވެ.

“ޖަޔާ މާދަން ބޭބެ އެބަޖެހޭ ފުރަން… ބޭބެގެ ބޭގު ޕެކު ކޮއްލައްޗޭ” ކާމޭޒު ދޮށުގައި ހުރެ ސައުދު ބުނެލިއެވެ. އެއަޑު އިވުމުން އަފީފާއަށް ހީވީ އޭނަގެ މޭމައްޗަށް ފެން އެއްޗެއް އޮއްސާލި ހެންނެވެ. ވާނީ އެހެން ނޫން ހެއްޔެވެ. މިވީހާ ތަނަށް ސައުދުގެ އެފަދަ އެއްވެސް ކަމެއް އެހެން މީހަކުގެ އަތުން ކުރުވާކަށް އަފީފާ އެ ފުރުސަތެއް ނުދޭ ވިއްޔާއެވެ. އެކަމަކު އޭނަޔަށް ކުރެވުނު ކުށަކުން ވަނީ އެހުރިހާ ކަމެއް އަތުން ބީވެފައެވެ. ގިނަ ފަހަރު ސައުދު އެހެން ކުރާ ދަތުރު ތަކުގަ ދާނީވެސް އަފީފާ ގޮވައިގެންނެވެ. އެކަމަކު މިފަހަރު ސައުދު ދަނީ ވެސް އެކަންޏެވެ. އެކަންވެސް އަފީފާއަށް ވީ ބޮޑު ވޭނަކަށެވެ. ކުރާނެ ކަމެއް ނެތެވެ. އެހުރިހާ ކަމަކީ އޭނަ އަމިއްލަޔަށް ހޯދި ގޮއްވިއްޔާއެވެ.

އަފީފާއަށް ޖެހޭނީ ކޮންމެ ގޮތެއް ވިޔަސް ފިއްތާލައިގެން ހުންނަން ކަމުން ކިތަންމެ ދެރަވިޔަސް އެނޫން ގޮތަށް ނެތީމަ އަފީފާ ހުރިީ ހަޖަމު ކޮއްލައިގެންނެވެ. އެވަގުތަކީ ވިނާން ވެސް ބޭރުގަ އުޅެފަ ގެއަށް އައިސް ވަން ވަގުތު ކަމުން އޭނަވެސް އަވަހަށް ދިޔައީ ބައްޕަ ކާން ހުންނާނެ ކަން އިނގޭތީ ކާހިތް ނުވިއެއް ކަމަކު ބައްޕާޔާ އެކު އެއް ސުފުރާއެއްގަ އެއްޗެއް ކެވޭތޯ ބަލާށެވެ. “އަހަ ދަރިފުޅު ނުފެނިގެން އުޅެނިކޮށޭ ތިއައީ އަވަހަށް އިށީނދބަލަ ދަރިފުޅާ” ވިނާން އައިސް ކާމޭޒު ދޮށަށް ހުއްޓުމާއެކު ސައުދު ބުނެލިއެވެ. “އެހެންތޯ ބައްޕާ އަޅުގަނޑު މިއައީ ރައްޓެއްސަކާއަކު ކޮފީއެއް ވެސް ބޮއެގެން އަކަމަކު ބައްޕަޔާ އެކު ކުޑަ ގޮތެއް ހަދާލައިފާނަން…” ތަށި ކައިރި ކުރަމުން ވިނާން ބުނެލިއެވެ. “ކޮބާތޯ ވަޒޫ؟” ވަޒުނާ ފެންނަން ނެތުމުން ވިނާން އަހައިލިއެވެ. އޭރު ވެސް އަފީފާ ހުރީ ފެންކަޅިވެފަ އެދެބަފައިން ވާހަކަ ދައްކާތަން ބަލައިގެންނެވެ. މިހާރު އެ ގޭތެރޭ އެއްވެސް ކަމަކާ ގޮތް ކިއުމަކީ އަފީފާއަށް މަނާ ކަމެކެވެ. އެއީ ސައުދު އޭނަޔަށް އަންގާފަ އޮންނަ ގޮތެވެ. އެހަން ކަމުން އެގޭ ތިންބަފައިން ކޮންމެ ވާހަކަ އެއް ދެއްކިއަސް އަފީފާ ހުންނަން ޖެހޭނީ ހިތްދަތި ކަމާއެކު ބަލާށެވެ. “ވަޒޫ ދިޔައީ އޭނަގެ ރައްޓެހި ކުއްޖެއް ގެއަށް…” ސައުދު ބުނެލިއެވެ.

“ދަރިފުޅާ ބައްޕަ މިއުޅެނީ މާދަން ފުރަން ވެގެން ކޮންމެހެން ވެސް ބެންކޮކަށް ދާން އެބަޖެހޭ އެހެންވީމަ ދަރިފުޅު ވާނެ މި ދެތިން ދުވަހު ތަން ކޮޅެއް ރަނގަޅަށް އޮފީސް ބަލަން… އާ ދެކުދިން ވެސް މިހާރު ތިބޭނެ، މިހާރު ކަރަމް ކިޔާ ސޮރެއް އުޅޭނެ އޭ ވަރަށް މަސައްކަތަށް ބަރާބަރު ސޮރެއް ދަރިފުޅު އަދިވެސް އިތުރަށް އެސޮރަށް ކަންތައްތައް ކިޔާލަދޭތި ބައްޕަ ވެސް ވަރަށް ކިޔާދެން!” ސައުދު އޮޅުން ފިލުވާ ދިނެވެ. “ލައްބަ ބައްޕާ އަޅުގަނޑު ބަލާނަން… ވަރަށް ދެރަވޭ މިހާރު އޮފީސް ކަންތައް ބައްޕަ އެކަނި ކުރަން ޖެހޭތީ!” ވިނާން ދެރަވެފަ ބުނެލިއެވެ. “ހެހެ… ދަރިފުޅު ތިކަމާ ނުވިސްނާ ބައްޕަޔަށް އިނގޭ ދަރިފުޅުގެ ހާލަތު އެހެންވެ ބައްޕަ އެހެނެކޭ ނުކިޔަމެއްނުން އެހެން ނޫނަސް ދަރިފުޅުމެންނަށް ލިބިފަ މިހިރަ އަމަޔަކީ ދަރިފުޅުމެންގެ ހަލާކު ވިއްޔާ” ވިނާންއާ ވާހަކަ ދައްކަމުން އަފީފާޔާ ދިމާލަށް އެއްޗެއް ނުބުނެ ނުހުރެވިގެން ސައުދު ބުނެލިއެވެ. ސައުދު އެހެން ބުނުމުން އަފީފާ ރޮމުން ރޮމުން ހިނގައްޖެއެވެ. “ބައްޕާ ތިހާވަރަށް މަންމަ ދެރަކުރާކަށް ނުވާނެއް ނުން!” ވިނާން ދެރަވެފަ ބުނެލިއެވެ. ހަގީގަތުގައި ވެސް އަފީފާ ކިތަންމެ ގޯސްކޮށް ކަންތައް ކުރިއަސް އޭނަ ދެރަވެފަ ހުންނަ ތަން ފެންނާތީ ވިނާން ވަރަށް ދެރަވެއެވެ. “ދަރިފުޅާ ބައްޕަ ވެސް ބޭނުމެއް ނޫނޭ މަންމަ ދެރަ ކުރާކަށް… އެކަމަކު ބައްޕަ މިއުޅެނީ އެ މަންމައަށް އެއްޗެއް ވިސްނޭތޯ ދެން އެކަހަލަ ކަމެއް ނުކުރޭތޯ…” ސައުދު ދެރަވެފަ ބުނެލިއެވެ. ހަގީގަތުގައި ސައުދު ވެސް އެހެން ކަންތައް ކުރަންވީމަ ދެރެވެސް ވެއެވެ. އެކަމަކުވެސް އަފީފާ އިސްލާހުވޭތޯ އެހުރިހާ ކަމެއް ވެސް ކުރަނީއެވެ. ސައުދު އާ ވިނާން އާ ދެބަފައިން އެތައް އިރަކު ވާހަކަ ދައްކަން ތިބެފަ ދިޔައީ ބޭރަށެވެ. އަފީފާ އޮންނާނީ ރޯންކަން އެނގި ހުރެ ވެސް އަޅާލުމެއް ނެތިއެވެ.

“އަލްޔާ އަވަހަށް އާދޭ… އަވަސް! އަވަސް! ދޮރު ގާޑުން ވެސް ވަނދެއްޖެ އިދުރީސް ކޮޓަރިއަށް މަށަށް ހީވަނީ ބޮޑު ރޭއެއް ހެން މިއީ! އެންމެ ސިކުންތެއް ވެސް ލަސް ނުކޮށް އަވަހަށް ހިނގާ…” މުހައްމަދު ތެޅެމުން ފޮޅެމުން އައިސް ބުނެލިއެވެ. އަލްޔާ ވަގުތުން މުހައްމަދުގެ ފަހަތުން ދާން ހިނގައިގަތެވެ. “އަދި އެއްވާހަކަ، މިރޭ ދެން ތިބި ކުދިން ނިދާ އަވަހަށް އެހެން ނުނީ ފަޅާ އަރާފާނެ… އަހަރެންވެސް އަލްޔާ ބޭރު ކޮއްފަ ނިދާނީ އެެހެން ނޫނީ ޝައްކު ވެދާނެ! މިތާ އެބަތިބި އޭނަގެ ބައިވަރު ރައްޓެހިން ވެސް އަދި ފަހަރެއްގަ ތިތަނުން ކުއްޖަކު ވެސް ބަލާ އައިސް ދާނެ! އެހެންވީމަ ނިދާފަ ތިބީމަ އެންމެ ބުއްދިވެރި ވާނީ އެހެން ނޫނީ ހުރިހާ ކަމެއް ފަޅާ އަރާނެ! ނިދާފަ ތިބީމަ ބުނެވޭންނުން ތިމީހުން ތިބީ ނިދާފައޭ އެހެން ވީމަ އޭނަ ދިޔަ ގޮތެއް ނޭނގެޔޭ މަށަށް ވެސް ބުނެވޭނެއެއްނުން..!” މުހައްމަދު އެހެން ބުނުމުން ހުރިހާ ކުދިންތައް އެކުއްޖެއް ނިދާ ތަނަކަށް ވަނދެ އޮށޯތެވެ. މުހައްމަދު ވެސް ވަގުތު ނަގާނުލާ އަލްޔާ ގޮވައިގެން ނިކުތީ އަވަހަށް އޭނަ ނެރެވޭތޯއެވެ. މަޑުމަޑުން އަލްޔާ ގޮވައިގެން މުހައްމަދު ދިޔައީ އެގެއަށް ވަންނަން ހުންނަ ދަގަޑު ގޭޓާ ދިމާލަށެވެ. އޭރު އެގޭޓް ކުރިމަތީ ފާރަ ވެރިއަކު ހުއްޓެވެ. އެެހެން ކަމުން މުހައްމަދު ހުރީ ދެން ހަދާނެ ގޮތަކާ މެދު ވިސްނާށެވެ. އޭނަ ހީކުރި ގޮތުން ވިއްޔާ އެއްމެން ވެސް ވީ އިދުރީސް ކައިރީގައެވެ. އެެހެން ކަމުން އޭނަޔަށް އެޖެހުނީ ދެވަނަ ވިސް ނުމަކަށް ދާށެވެ. “އަލްޔާ މިތާ މަޑުކުރޭ ބޭބެ އެބަ އަންނަން އޭނަޔާ ވާހަކަ ދައްކާފަ… ބޭބެ ބަލާނަން އޭނަ ގޮވައިގެން ތަން ކޮޅެށް ދުރަށް ދެވޭތޯ ކޮއްކޮ ބަލައިގެން ހުންނާތި ބޭބެ އޭނަ ގޮވައިގެން އެފަރާތަށް ގޮސްފިއްޔާ މަޑު ނުކޮށް އަވަހަށް ނިކުންނާތި މިރޭ ނޫނީ ފުރުސަތެއް ނުލިބޭނަ މިއީ މަދުން ނޫނީ ނުލިބޭ ފުރުސަތެއް!” ކަން ކުރަންވީ ގޮތް ވަރަށް ރަނގަޅަށް ކިޔާދީފަ މުހައްމަދު ދިޔައީ ގޭޓު ކައިރީގަ ހުރި މީހާޔާ ވާހަކަ ދައްކައިގެން އެތަނުން ދުރަށް ދެވޭތޯ އެވެ. އަލްޔާ ހުރީ އެސްފިޔަ ވެސް ޖަހާ ނުލާ އެމީހުން ދާ ދިމާލަށް ބަލަ ހައްޓައިގެންނެވެ. އޭރު އޭނަގެ ގައިގަ މަށައިގެން ގޮސް ހުރި ތަން ތަނުން ދިލަ ވެސް ނުނަގާ ކަހަލައެވެ. ވާނީ ވެސް އެހެންތާއެވެ. ދިލަޔަށް ވުރެ މުހިންމު ކަމެއް ޖެހުނީމަ އޮންނާނީ ކޮން ދިލައެއް ހެއްޔެވެ.

އަލްޔާ ބަލަން ހުއްޓާ އެމީހާ ގޮވައިގެން މުހައްމަދު ދިޔައީ އެގެ އަނެއްފަރާތަށެވެ. އެހެން ކަމުން އަލްޔާ އެންމެ ސިކުންތަކަށް ވެސް މަޑު ކޮއްނުލާ ގޮސް އެގޭޓު ހުޅުވުމަށް ފަހު މަޑު މަޑުން ގޭޓު ލައްޕާލައިފަ ދުއްވާގަތީ އެތަނާ ވީ އެންމެ ދުރަކަށް ދެވޭތޯއެވެ. އެއީ އެއްމެން ރޭވި ގޮތް ކަމަށް ވާތީއެވެ. އެހިސާބުން ފެނުނަސް އަބުރާ ގެނެސް ހޭހަދާލާނެ ކަން އިނގޭ ވިއްޔާއެވެ. އަލްޔާ ދުއްވާގަތް ގޮތަށް ގޮސް ހުއްޓުނީ މަޖީދީ މަގު މެދެއްހާ ތަނަށެވެ. އަލްޔާ އެ މަގަށް ހުއްޓުނީ އެމަގަކީ އެއްވެސް ވަގުތެއްގައި މީހުން މަދު މަގަކަށް ނުވާތީއެވެ. އޭރު އަލްޔާއަށް ހުރީ މާނޭވާ ލެވިފައެވެ. ނޭވާ ހީވަނީ ހުއްޓިދާނެެންނެވެ. ވާނީ އެހެންތާއެވެ. އެވަރަށް ދުވިއްޖެ ވިއްޔާއެވެ. އެތާ ހުރި ފިހާރައެއްގެ ދޮރުމަތީ ގާގަޑު މަތީ އިށީންނަމުން އަލްޔާ ވިސްނާލީ ދެން ހަދަންވީ ގޮތަކާ ދޭތެރޭގައެވެ. ދާނީވެސް ކޮންތާކަށް ހެއްޔެވެ. ކޮންމެ ގޮތެއް ވިޔަސް ދެނެއް އަބުރާ އަފީފާމެން ގެއަށް ދާކަށް އޭނަޔަކަށް ނުކެރޭނެއެވެ. އެވަގުތު އަފީފާ ކީ ހުރިހާ އެއްޗެއް އަލްޔާގެ ސިކުނޑިތެރޭ އެބުރެން ފެށިއެވެ. އެހެން ހިޔާލުތަކަށް ގެއްލިފަ އިންދާ މީހަކު އައިސް އަލްޔާގެ ކޮޑުގައި ފުރަގަހުން އަތް ލުމުން އަލްޔާ ދިޔައީ ސިއްސައިގެންނެވެ.

…..ނުނިމޭ…..

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.