ޒާރާ (3)

ކުރީގެ އަދަދާއި ގުޅޭ: ދެކުދިންވެސް މަސައްކަތްކުރަމުން ދިޔައީ އޯލެވެލް އިމްތިހާނުން ރަގަޅު ނަތީޖާއެއް ނެރެވޭތޯއެވެ. އެހެންވެ ޗެޓްކުރުމާއި ފޯނުކުރުންވެސް އެދުވަސްވަރު މަދުކުރިއެވެ. ވާހަކަދެއްކިއަސް ގިނައިން ދައްކަނީ ކިޔެވުމުގެ ވާހަކަތަކެވެ. އާހިލްއާ ޒާރާގެ ނަސީބު ރަގަޅުކަމުން އެދުވަސްވަރު، އެއްވެސް   މައްސަލައެއްވެސް ނުޖެހެއެވެ. އެހެންކަމުން ދެކުދިންވެސް ކިޔަވަމުން ގެންދިޔައީ ވަރަށް ހިތްހަމަޖެހިގެންނެވެ.

” ރިޔާ.. މަގޭ ހިތް ބުނަނީ ދެން އަވަހަށް ރަށަކަށް ނާދެވޭނެއޭ.. ނޭނގެ ކީއްވެކަމެއް.. މާލެ ގޮއްސަ މަ، އެވާހަކަ އާހިލްއަށް ކިޔާދޭނަން.. މިހާރު ދެއަހަރު ވީ ވިއްޔަ.. މިހެން ހުރެގެން އެވާހަކަ ދުވަހަކުވެސް ކިޔައެއް ނުދެވޭނެ.. މަ ދާއިރަށް އޭނަ އަންނާނީ މިކޮޅަށް ކަންނޭނގެ.. މަވެސް ބަލާނަން އަވަހަށް މިކޮޅަށް އާދެވޭތޯ.. މާލެދިޔައަސް މަށެއް ބޭނުމެއް ނޫން އިންޑިޔާއަށް ދާކަށް.. މަންމަމެން ގޮއްސަ އަންނަންދެން މަ ބަލާނީ މާލޭގައި ހުރެވޭތޯ.. މާދަމާރޭ މިއުޅެނީ ފުރަން.. ” އިމްތިހާނު ނިމުމުން، ރަށުން ފުރަން ބޭރަށް ޖެހޭތީ ޒާރާ ހުރީ ކޮންމެވެސް ވަރަކަށް ކަންބޮޑުވެފައެވެ. އެހެނަސް ޒާރާގެ މަންމަގެ ބަލި ހާލަތު ހުރިގޮތުން، މަންމައަށް ފަރުވާކުރުމަށްޓަކައި ކޮންމެހެންވެސް ދާންޖެހެއެވެ.

” އެއްކަލަ ޒާރާދޯ.. މާ ބޮޑަށޭ ތިވިސްނަނީ.. މިއީ ހަމަސް ދުވަހުގެ ޗުއްޓީއެއްނު.. އެއްމަސްނޫނީ ދެމަސްކޮށްފަ އަޔަސް ދެންވެސް އެއޮތީ ހަމަ ދުވަހެއްނު.. ” ޒާރާ މާބޮޑަށް ވިސްނާހެން ހީވުމުން ރިޔާ ބުނެލިއެވެ.

” ހުމްމް.. ދެން ވިސްނޭނެއެއްނު.. މަ ވަރަށް ފޫހިވާނެ މާލެގޮއްސަ.. މާލޭގަ ނުހުންނާނެ ގާތް ރައްޓެއްސެއްވެސް.. ރިޔާމަތިން ވަރަށް ހަނދާންވާނެ އިނގޭ.. ދެންދަނީ.. މާލެ ގޮއްސަ މެސެޖް ކުރާނަން.. ރިޔާއާ އެކީ ހިނގާލާފައި އައިސް ގެއަށް ވަންނަމުން ޒާރާ ބުނެލިއެވެ. އާނ.. ހިތްހެޔޮކުރާތި.. ޒާރާ މަތިން މަވެސް ހަނދާންވާނެ.. ” އެހެންބުނެފައި ރިޔާވެސް އަނބުރާލީ ގެއާދިމާއަށެވެ.

ރަށް ދުރަށް އޮބަމުންދާ މަންޒަރު ބަލަން ޒާރާ ބޯޓުގައި އިނީ ދެރަވެފައެވެ. އަދިވެސް ޒާރާގެ ހިތް ބުނަމުން ދިޔައީ އެހެންނެވެ. ނުދާށެވެ. ގޮސްފިނަމަ ނާދެވޭނެއެވެ.

މާލެއަށް އުފަންވީކަމުގައި ވީނަމަވެސް ފުނަދޫއަކީ ޒާރާ އެރަށެއްގައި އުޅެ ބޮޑުވިރަށެވެ. ޒާރާގެ މަންމައާއި ބައްޕަަަަގެ ރަަަަަަަަަށަކީވެސް ފުުުުުުުނަދޫއެެެވެ. މާލެއަކީ ޒާރާއަށް އެއްގޮތަކަށްވެސް ކަމުދާ ރަށެއް ނޫނެވެ. ޒާރާދެކޭ ގޮތުގަަަައި ރަަށްރަށުގައި އުޅޭ އެެެއްވެސް މީހެއް މާލެއަށް ދާހިތަކުން ނުވެސް ދާނެއެވެ. މާާާާާާާލޭގެ ކާރޫބާރޫ ބޮޑުކަަަަަމާއި އަޑުގަދަކަމަަަކީވެެެސް ޒާާާރާއަަަށް ވަރަށް އުނދަގޫވާ ކަމެކެވެ.

މާލެއައިސް ރަނގަޅަށް ހަމަ ޖެހުމުން ޖެހިލުންވެފައި ހުރެގެންވެސް އާހިލްއަށް އެވާހަކަ ޒާރާ ކިޔައިދިނެވެ. އެވާހަކަ ކިޔާދީފައި އަނެއްކާވެސް މެސެޖްކުރާނީތޯ ނުކުރާނީތޯ ވިސްނަންވެސް އެތައްއިރަކު ޒާރާ ހުއްޓެވެ.

” އެކަމާ ވިސްނަންހުރީމަ، ފެންވަރައިގެން އައިސް މަށަށް ބޮލުގަ އެލެވުނީ ޖެލްގެ ބަދަލުގަ ލޯޝަން.. ކަޑަތަ ؟.. ” އަނެއްކާ ޒާރާ މެސެޖްކުރުމުން، އާހިލް ބުނީ އެހެންނެވެ. ޒާރާއަކަށްވެސް ދެން އިތުރަށް ބުނާނެ އެއްޗެއް ނޭނގުނެވެ.

ޒާރާއެކޭ އެއްފަދައިން އާހިލްވެސް އެކަމާ ވަރަށް ވިސްނައިފިކަން އެނގުމުން ޒާރާއަށް ކުށްވެރިކުރެވުނީ އަމިއްލަ ނަފްސެވެ. އާހިލްް ދެރަވާނެކަން ޒާރާއަށް މާކުރިންވެސް އެނގެއެވެ. އަަަދި އާހިލް ރުޅިވެދާނެކަމުގެ ބިރު އަނެއްކާވެސް ހީވާން ފެށިއެވެ.

މާލެ އައިތާ ދެތިންދުވަހެއްގެ ތެރޭގައި ޒާރާގެ މައިންބަފައިންވެސް އިންޑިޔާއަށް ފުރިއެވެ. އެމީހުން ފުރަމުން، ޒާރާ ބެހެއްޓީ އިޝާންމެން ގޭގައެވެ.

އިޝާންއަކީ ޒާރާގެ ކަޒިން ކޮއްްްްްްކޮއެކެވެ. އިޝާން މެންގޭގައި ހުރި ނަމަވެސް ޒާރާ އަބަދު ހުންނަނީ ފޫހިވެފައެވެ. އެގޭ މީހުން ހަވީރު ބޭރަށް ނުދާތީ ޒާރާވެސް އޮންނަނީ ގޭގައެވެ. ރަށުގައި ހަވީރު ބޭރަށް ގޮސް އުޅެފައި މާލޭގައި ނުދެވޭގޮތް ވުމުން ޒާރާ ގާތަށް އަންނަނީ ނިންޖެވެ. އެހެންވެ ކޮންމެ ދުވަހަކު ހަވީރު ޒާރާއަށް ހަމަ ނިދެނީއެވެ. މާލޭގައި އުޅުމެކޭ ޖަލެއްގައި އިނުމެކޭ ޒާރާއަށް އެއްގޮތެވެ.

ރަށުގައި އާހިލްއާ އެހެން ބައްދަލުކޮށް އުޅުނަސް މާލޭގައި އެގޮތަށް ބައްދަލުކުރެވޭ ގޮތެއް ނުވެއެވެ. މާލެއާ ރަށާ ހާސްބައި ތަފާތެވެ. ޒާރާގެ މަންމަމެން މާލޭގައި ތިބިއިރު ދެދުވަހަކު އާހިލް އެގޭ ދޮށަށް ދިޔައެވެ. ޒާރާ ތިރިއަށް ފައިބުމަށް އާހިލް އެދުނު ނަމަވެސް މަންމަމެންނާއި، އެގޭގައި އުޅޭ އެހެން މީހަކަށް ފެނިދާނެތީވެސް ޒާރާއަށް އެކަން ކުރާކަށް ނުކެރުނެވެ. އެެެންމެެފަަަހުންް ޒާރާއަށް ބަލަން ހުުުުުުުރެހުރެފަަަައި އާހިިިލް ދިިިިިިިިިިޔައީއެވެ.

ޒާރާގެ ވާހަކަ އާހިލްއަށް އެނގުނުފަހުންވެސް ދެމީހުން ވާހަކަ ދައްކައެވެ. އެހެންނަމަވެސް އެއްގޮތަކަށްވެސް މަޖާކޮށް ވާހަކަ ދެއްކޭ ގޮތެއް ނުވެއެވެ. އަބަދުވެސް ތިބެވެނީ ސީރިއަސްވެފައެވެ. ޒާރާއަށްވެސް އެކަން އިހްސާސްކުރެވެއެވެ. އެހެނަސް އެކަމުގައި އެއްވެސް ޝަކުވާއެއް ކުރެވޭކަށްވެސް ނެތެވެ.

ހަފްތާއެއް ފަހުން އާހިލްވެެެސް ދިޔައީ ރަށަށެވެ. މަންމަމެންނަށް ނާދެވޭތީ އޭރުވެސް ޒާރާ ހުރީ މާލޭގައެވެ. ޒާރާގެ މަންމަމެންނަށް އާދެވުނީ ތިން ހަފްތާ ހަމަވަން އުޅެނިކޮށެވެ. ޒާރާ ހީކުރީ ދެން މަންމަމެން އަވަހަށް ރަށަށް ދާން ފުރާނީކަމުގައެވެ.

އެހެންނަމަވެސް ކަންތައްވެގެން ދިޔައީ ޒާރާ ހީކުރި ގޮތަކަށް ނޫނެވެ. ޒާރާގެ މައިންބަފައިން ނިންމައިގެން ތިބީ ދެން ރަށަށް ނުދިއުމަށެވެ. ޒާރާއަށް ކިޔަވައިދިނުމަށްޓަކައި މާލޭގައި ތިބުމަށެވެ.

މައިންބަފައިން، ޒާރާއަށް އަންގާވެސް ނުލާ ކުއްލިއަކަށް މި ނިންމި ނިންމުމެއްގެ ސަބަބުން އެންމެ ބޮޑު ހިތާމައެއް ލިބުނީ ޒާރާއަށެވެ. ޗުއްޓީ ނިމެންދެން ރަށުގައި މަޑުކޮށްލާފައި އައުމަށްވެސް ޒާރާގެ މައިންބަފައިން ބޭނުމެއް ނުވިއެވެ.

އާހިލްވެސް، ފުނަދޫގައި 4 މަސްދުވަހު ހުއްޓެވެ. މި ހަތަރު މަސްދުވަހު ޒާރާ އުޅުނީ އެކަނިވެރިކަމުގައެވެ. ރަށަށް ނުދެވުމުން ޒާރާ ހުރީ ވަރަށް ބޮޑަށް މާޔޫސްވެފައެވެ.

ޒާރާއަށް ރަށަށް ނާދެވުނަސް އާހިލްވެސް ޝަކުވާތަކެއް ނުކުރެއެވެ. އާހިލް އުޅެނީ ދަތުރުގޮސްފައި މަޖާކުރުމުގައެވެ. ޒާރާ ނެތުމުން އާހިލް ފޫހިވާހެންނެއްވެސް ހިޔެއް ނުވެއެވެ. ޒާރާގެ ހިތަށްއަރައެވެ. އާހިލް މިހާރު ޒާރާދެކެ ފޫހިވަނީއެވެ. ކުރީގައި ކިރިޔާ ބައްދަލު ނުކޮށްލެވޭ ދުވަހެއް ދިޔައަސް އާހިލް އެކަމާ ޝަކުވާކުރާނެއެވެ. އެހެނަސް އެކަމާ ޒާރާއަށް ކުރެވޭނެ ޝަކުވާއެއްވެސް ނެތެވެ. އަދި އާހިލް ޝަކުވާ ކުރިކަމުގައިވިއަސް ޒާރާގެ މައިންބަފައިން ބޭނުންނުވާއިރު ރަށަށް ދެވޭކަށްވެސް ނެތެވެ.

ފާޑެއްގެ މަޖްބޫރީ ކޮއްޓެއްގެ ތެރޭގައި ޒާރާ ހުރީ ހައްޔަރުވެފައެވެ. ޒާރާގެ މައިންބަފައިން، ޒާރާ ރަށަށް ނުފޮނުވިތާގައި ވަޒީފާއަކަށްވެސް ނުފޮނުވައެވެ. އަދި އެއްވެސް ކޯހެއްގައިވެސް ޒާރާ ބައިވެރިވެސް ނުކޮށްދެއެވެ. ޒާރާގެ ބައްޕަ އެކަމާ ނުގަބޫލުވުމުން އެފަދަ ކަމެއް ކޮށްދޭން ޒާރާގެ މަންމައަށްވެސް ނުކެރުނީއެވެ.

އޯލެވެލްގެ ނަތީޖާ ލިބުނުއިރު ގާތްގަނޑަކަށް ހުރިހާ މާއްދާއަކުންހެން އާހިލްއަށް ލިބިފައި ހުރީ އޭ ގްރޭޑެވެ. ޒާރާވެސް ހުރިހާ މާއްދާއަކުން ފާސްވެ ބައެއް އޭ ހޯދާފައި ހުރިނަމަވެސް ޓޮޕްޓެންއަށް އެރޭވަރެއް ނުވިއެވެ.

މާލޭގައި، އޭލެވެލް ކިޔަވަންވެސް ޒާރާއަށް ދާންޖެހުނީ އެހާ ދާހިތްވާ ސްކޫލަކަށް ނޫނެވެ. އެއީވެސް ޒާރާގެ ބައްޕަގެ ނިންމުމެކެވެ. އެކަންވެސް ޒާރާގެ ބައްޕަ ހަމަޖެއްސީ ޒާރާއާ ވާހަކަދައްކާވެސް ނުލައެވެ.

ބައެއްފަހަރު ޒާރާގެ ހިތް އެކަމާ ޝަކުވާ ކުރެއެވެ. މައިންބަފައިންގެ ބަސް އަހަންޖެހޭނެކަން ޒާރާ ދަނެއެވެ. އެކަމަކު ހަމަ ހުރިހާކަމެއްގައިމެ ޒާރާގެ މައިންބަފައިން ހަދަނީ އެގޮތަށެވެ. ބޭނުންނުވާ ސުކޫލަކަށް ލުމުން ޒާރާ ހިތްހަމަނުޖެހޭނެ ވަރު އެމީހުންނަށް އިހްސާސެއް ނުކުރެވެއެވެ. އެއީވެސް ބައެއް މައިންބަފައިންނަށްވާ ގޮތެކެވެ.

ކަންދިމާކުރިގޮތުން ޒާރާ ދާން ހަމަޖެހިފައި އޮތް ސުކޫލްވީ އާހިލްވެސް ދާން ހަމަޖެހިފައި އޮތް ސްކޫލަށެވެ. ޒާރާ، ކިރިޔާވެސް ހިތްހަމަޖެހުނީ އެކަން އެގުމުންނެވެ. ކްލާސްތައް ބެހިފައިވާ ލިސްޓު ނުކުތްއިރު، އާހިލްވެސް އިނީ ޒާރާގެ ކިލާހުގައެވެ.

” އަހަރެމެން ދިޔައީ އެއް ކްލާހަކަށްދޯ.. ޒާރާ އުފަލެއް ނުވޭތަ ؟ ” ޗެޓްކުރުމުން އާހިލް އަހައިލިއެވެ. ” ނޫނޭ.. އަހަރެންވެސް އުފާވޭ..” ޒާރާ އުފާވިއަސް, އޭރު ވިސްނަމުންގެންދިޔައީ މުޅިން އެހެން ކަމަކާއެވެ. އެހެންވެ އާހިލް ދައްކާ ވާހަކައަށް އެހާ ބޮޑު ސަމާލުކަމެއް ދެވޭ ގޮތެއްވެސް ނުވިއެވެ. އެކަން އާހިލްއަށްވެސް ފާހަގަވީ ކަންނޭނގެއެވެ.

ފަހަކަށް އައިސް އާހިލްއާ ޒާރާގެ ދެމެދުގައި ލެވެން ފެށީ ބީރައްޓެހިކަމުގެ ފާރެކެވެ. އާހިލްއަށް މެސެޖް ކުރާއިރު އޮންނަނީ އާހިލް ހުންނަނީ ކޮންމެވެސް ކަމެއްގައި ބިޒީވެފައެވެ. އެއީ އާހިލްއާ ދިމާނުވާތާ މާގިނަދުވަސް ވެފައިވާތީ ވާކަމެއް ކަމަށް ޒާރާ ގަބޫލްކުރިއެވެ. އެކަމަކު، ގުޅުން ނިމުމަކަށް އަންނަނީކަމަށް ޒާރާއަށް ވިސްނައިދިނީ ސިކުޑިއެވެ.

ސުކޫލް ފެށެން ދެހަފްތާއަށް ވެއްޖެއެވެ. ވޭތުވެދިޔަ ހަފްތާގައި އާހިލްގެ އެއްވެސް މެސެޖެއް ނުލިބުނެވެ. އިންޓަރނެޓް ބެލިއިރު ކޮންމެ ދުވަހަކުވެސް އާހިލް އޮންލައިންވެފައި ހުރިކަންވެސް އެނގެން ހުއްޓެވެ.

” އާހިލް ކިހިނެއްވީތަ ؟ އަހަންނަށް އެނގޭ ކޮންމެސް ކަމެއް ވެއްޖެކަން.. އަބަދު ބިޒީވެފަ އާހިލް ތި އޮންނަނީ..  އެކަމަކު ދެން އަބަދު ބިޒީއެއްނުވާނެއެއްނު.. ” ޒާރާ އެގޮތަށް މެސެޖްކޮށްލިއިރު ހިތްވެސް ވަރަށް ބާރަށް ތެޅެއެވެ. ” އައިމް ސޮރީ ޒާރާ ” އާހިލްގެ އެމެސެޖްގެ މާނަ ޒާރާ ދެނެގަތެވެ. ޒާރާ އެންމެ ބިރުން އުޅުނު ކަންތައް އެންމެ ފަހުން ވީތާއެވެ. އެހެންނަމަވެސް މީހާ ބަލިކަށިވެ އެކަމާ ހިތާމަކޮށް ރޮވެންވާއިރަށް، ހިތްވަރުކޮށްފައި އަނެއްކާ މެސެޖެއް ކޮށްލިއެވެ. “ދެން މެސެޖްކުރުމުގެ ބޭނުމެއްވެސް ނެތެއްނު.. ބައި..”

އެހެންބުނެފައި އިރުކޮޅަކުން އޮންލައިންވިއިރު ފުރަތަމަވެސް ފެނުނީ އާހިލް އޭނަގެ ރިލޭޝަންޝިޕް ސްޓޭޓަސް ސިންގަލްއަށް ބަދަލުކޮށްފައި އިންދައެވެ. ޒާރާގެ ހިތަށްއެރިއެވެ. އެހާ އަވަހަށް އާހިލް އޭނަގެ ސްޓޭޓަސް ބަދަލުކޮށްލީތާއެވެ. ގަދަ ކަލޭއޭ ކިޔާފަ ވަރަށް ގިނަ މީހުން ކޮމެންޓްކޮށްފައިވެސް ހުއްޓެވެ. އާހިލްވެސް އެމީހުންނަށް ޖަވާބުދީފައި ހުރީ ވަރަށް އުފާވެރިކޮށެވެ.

ޒާރާއަށް ކެތްކޮށްލެވުނީ އެހިސާބަށެވެ. އިރުކޮޅެއްނުވަނީސް ޒާރާގެ ދެލޮލުން އެއްވެސް ހިފެހެއްޓުމެއްނެތި ކަރުނަތައް ފައިބަންފެށިއެވެ. ދެން އިތުރަށް މޭޒުކައިރީ ނީދެވިގެން ޒާރާ އެނދުމައްޗަށް ވެއްޓިގަތެވެ. އެނދުމަތީ އޮވެގެން އެތަށް ގަޑިއިރެއްވީއިރެއްވަންދެން ޒާރާ ރުޔެވެ.

ރޮއިރޮއިފައި އެނދުންތެދުވެގެން ގޮސް ޒާރާ ހުއްޓުނީ ލޯގަނޑުކުރިމައްޗަށެވެ. ލޯގަނޑުން ރަގަޅަށް މީހާ ހުރިގޮތް ބަލާލިއެވެ. ޒާރާގެ ރީތި ދެލޯ ހުރީ މާގިނައިރު ރުއިމުގެ ސަބަބުން ދުޅަވެފައެވެ. ނޭފަތާއި ކޯ ހުރީ ރަތްވެފައެވެ. ބޮލުގެ އިސްތަށިގަނޑުވެސް ހުރީ ހޭވިފައެވެ.

ލޯބިވާ މީހަކު ރުޅިވުމުން ދެން އަނެއް މީހާ އުޅެންޖެހޭ ގޮތުގެ ވާހަކަ ޒާރާ ވެސް ވަނީ އަޑުއަހާފައެވެ. ޒާރާގެ ރަހުމަތްތެރިންނަށް އެކަން ދިމާވުމުން ދެރަނުވާށޭ ބުނެފައި ޒާރާވެސް އެ ރަހުމަތްތެރިންނަށް ހިތްވަރުދިނެވެ. އެކަމަކު، ކަމުގެ ހުރި ވޭނާއި ކެކުޅުމަކީ ކިހާވަރެއްގެ އެއްޗެއްކަން ޒާރާއަށްވެސް އެނގެންފެށީ އަދި ކިރިޔާއެވެ.

އެރޭ، އެއްގޮތަކަށްވެސް ޒާރާއަކަށް ނުނިދުނެވެ. ނިދޭތޯ ޝަހާދަތް ކިޔުނު ވަރެއްގެ އަދަދެއްވެސް ޒާރާއަކަށް ނޭނގުނެވެ. ޒާރާ ހަނދާންވަމުން ދިޔައީ އާހިލްއާ އެކީ އުޅުނު ވަގުތުތަކެވެ. ޒާރާއަށް ޖެއްސުންކޮށްކޮށްފައި އާހިިލް އުޅޭގޮތެވެ.

ފަހަރެއްގައި އާހިލްއަށް، ޒާރާ މަތިން ހަނދާން ނައްތާލެވިދާނެއެވެ. އެކަމަކު، އާހިލް އެއީ ޒާރާގެ ފުރަތަމަ ލޯތްބެވެ. އެހެންވެ އެހާ ފަސޭހައިން އާހިލްގެ ހަނދާންތައް ޒާރާއާ ދުރަށްނުދާނެކަންވެސް ޒާރާއަށް އިނގެއެވެ. އެހެންވިއަސް، އާހިލްގެ މަތިން ހަނދާންނެއްތޭތޯ މަސައްކަތްކުރަން ޒާރާ ބޭނުންވިއެވެ.

ޖެހިގެން އައިދުވަހެވެ. ޒާރާއަށް ހެދުނުގެ ނާސްތާ ކުރެވުނީވެސް އެތަށްއިރަކު މޭޒު ދޮށުގައި އިނދެގެންނެވެ. އިރުކޮޅަކުން، ޒާރާގެ މަންމަ ޓީވީ ހުޅުވާލިތަނާ ޓީވީއެމްއިން ދައްކަން ފެށީ ލޯބީގެ ހިތާމަވެރި ލަވައެކެވެ.

މިކަންވީ ޒާރާއަށް ބޮޑު ވޭނަކަށެވެ. ޒާރާއަށް މިހާރު ހީވަމުންދިޔައީ ލަވައިގައި ދެރަވެފައި އިންނަ އަންހެން ކުއްޖާއަކީވެސް ޒާރާ ހެންނެވެ. އެލަވަޔާ ޒާރާގެ ހިތާމަޔާ ހުރީ ގުޅިފައެވެ. ޒާރާ ބޭނުންވީ އަވަހަށް ޓީވީ ނިވާލާށެވެ. އެކަމަކު މަންމަ ޓީވީ ބަލަން އިނީތީ ސައިބޮއިގެން ގޮސް އަނެއްކާވެސް އޮށޯތީއެވެ. އެހެންޏާ ތެދުވެ އުޅޭހެން އެކިކަންތައް ކޮށްލައި އުޅޭނެ ހިތްވަރެއްވެސް މިހާރު ޒާރާގެ ނެތްކަހަލައެވެ. ޒާރާ އޮށޯވެގެން އޮތްއިރުވެސް ޓީވީއިން ލަވަތައް އަންނަމުން ދިޔައެވެ. ލަވައާމެދު ނުވިސްނަން އުޅުނަސް ހަމަ ވިސްނެނީ އެއާއި މެދުއެވެ. މިކަމާހެދި ބޮލަށް އުނދަގޫވެގެން، އެންމެފަހުން ޒާރާގެ ބޮލުގަވެސް ރިއްސަން ފެށިއެވެ.