އަލިމަގު ލިބިގަތުމަށް ވަގުތު ފާއިތުވީބާ؟

ޒުވާންވަމުން އާއި ވަރަކަށް އަހަރެންގެ ސިކުނޑި ކަމުން ދިޔައީ މީހުން އަޖައިބުކުރުވާނެފަދަ އެތައް އެތައް ސުވާލުތަކަކުންނެވެ.ހަމަޤައިމުވެސް އަހަރެންގެ ހިތަށް އަރާ ފައިބަމުން ދިޔަހާއި ސުވާލުތަށް އެނގޭނަމަ އެކަކު ދެރަ ނުވިއަސް އަހަރެންނަށް ދީނީ ތަރުބިއްޔަތު އުނގަންނައިދޭން މަސައްކަތް ކުރަމުންދިޔަ އަހަރެންގެ ބައްޕަ ދެރަވާނެކަމާއިމެދު އަހަރެންނަކަށް ޝައްކެއްނެތެވެ.އެހެނަސް ކުރާނީ ކީއްހެއްޔެވެ؟އަހަރެންނަށް ބައްޕަ ދެރަވާނެކަމާއިމެދު ވިސްނައެއް ނުލެވެއެވެ.އޭގެ ބަދަލުގައި އަހަރެންގެ ހިތުގައި އުފެދި ފުނިޖެހެމުންދިޔަ ސުވާލުތަކަށް އަހަރެންނަށް ޖަވާބު ނުލިބުނުތާނގައި ދިޔައީ ދުވަހަކަށްވުރެ ދުވަހެއް ހިތުގައި އުފެދޭ ސުވާލުތަށް ގިނަވަމުންނެވެ.އަހަރެންނަށް ވިސްނޭ ގޮތުގައި އަހަރެންފަދަ ޒުވާންވަމުން އަންނަ ކޮންމެ ކުއްޖެއްގެ ހިތުގައިވެސް އެސުވާލުތަށް އުފެދެމުން ދާނެއެވެ

އަހަރެންނަކީ އަންހެންކުއްޖެއްކަމަށް ވީތީވެސް ވެދާނެއެވެ.ޒުވާންވެ ދުނިޔެއަށް ލޯ ހުޅުވެމުން ދިޔަ ވަރަކަށް އަހަރެންނަށް ދީނުގެ މަގު ބުނެދޭން ހުރިހަމައެކަނި ބައްޕަ ދޭ ނަސޭޙަތްތަކާއި މުޖުތަމަޢުން އަންހެންކުދިންނަން ދެމުންދިޔަ ނަސޭޙަތްތަށްއިވި،އެސުވާލުތަށް ހައްތަހާ އިތުރުވެ ޖަވާބު ބޭނުންވަމުންދިޔަ ވަރަކަށް އަހަރެންގެ ހިތް ދިޔައީ ޝަކުވާތަކުންވެސް ފޯވަމުންނެވެ.އަހަރެންނާއި އަހަރެންގެ ކޮއްކޮ، ކައިރީ ބައިތިއްބައިގެން ބައްޕަވެސް ދެނީ ހަމަ އަންހެންކުދިންނަށް އާންމުކޮށް މީހުން އެދީއުޅޭ ނަސޭޙަތްތެކެވެ.އެ ނަސޭޙަތްތަކަކީ ކޮބައިކަން އެނގޭ ހެއްޔެވެ؟

“ދަރިފުޅުމެނެވެ!!ތިއަކީ އަންހެން ކުދިންނެވެ.އެހާ ވަރަށް ބޭރަށް ގޮސް ނުހަދާށެވެ.ގޭގައި ގިނަވަގުތު ތިބުމަށް އާދަކުރާށެވެ.ގަޔަށް ބާރު އަދި ކުރު ހެދުންލުމުން ދުރުހެލިވާށެވެ.ތިފަދަ ހެދުން އަޅައިގެން އުޅެނިކޮށް ހީނުކުރާވަރުގެ ދެރައެއްވެސް ލިބިދާނެއެވެ.ދީނުގައި އަންހެންކުދިންނަށް ޙާއްސަ އަޚައްމިއްޔަތުކަމެއް ދެނީވެސް އެހެންވެއެވެ.ވީއިރު ދީނުގައި އަންގަވާފައިވާ ގޮތަށް ހެދުން އަޅާށެވެ.ބައްޕަ ބޭނުންވަނީ ވީހާވެސް ނިވާކަންބޮޑު، ބޮޑެތި ދޫ ހެދުން ދަރިފުޅުމެން ލުމެވެ.ހިތްވަރެއް ހުރިއްޔާ މޫނުވެސް ނިވާކުރުމެވެ.ދީނަށްޓަކައި އެހާ ހިތްވަރު އަހަރެމެން ގައިގައި ހުންނަން ޖެހޭނެއެވެ.ދަރިފުޅުމެން ތިވަރަށް ދީނާ ދުރުވާތީ ބައްޕަ ހާދަ ދެރަވެއެވެ.”

މިފަދަ ނަސޭޙަތްތައް އަޑުއިވޭ ކޮންމެ ފަހަރަކު އަހަރެން ހިތްހަމަ ނުޖެހެނީ މީހުން އެފަދަ ވާހަކަތައް ދައްކާތީއެއް ނޫނެވެ.އަހަރެން ހިތްހަމަ ނުޖެހެނީ ހިތުގައި އެކަމުގެ ސަބަބުން ސުވާލުތަކާއި ޝަކުވާތައް އިތުރުވެ ފުނިޖެހެމުން ދާތީއެވެ. އަހަރެންގެ ހިތަށް އަރާ ސުވާލުތަށް އެނގޭ ހެއްޔެވެ؟

އަންހެންކުދިންނަށް ރަނގަޅަކަށްށޭ ބުނެ އެންމެންވެސް ހަމައެކަނި އަންހެންކުދިންނަށް ކަންކަމުން ދުރުހެލިވުމަށް ބުނަނީ ކީއްވެބާއެވެ؟ ހަމައެކަނި އަންހެންކުދިންނަށް އެފަދަ ނަސޭހަތްތައް ދޭކަށް ފާހަގަ ކުރެވޭއިރު އަހަރެންގެ ހިތުގައި ޝަކުވާތައް އުފެދެނީ އެކަމުގައި ފިރިހެންކުދިންނަށް ނަސޭހަތްދޭހެން ހީނުވާތީއެވެ.ވީއިރު މުސްލިމުންނަށް ވީތީއޭ ކިޔާފައި އެމީހުން ކައިރީވެސް އަންހެންކުދިންނަށް ނުބެލުމަށް ބުނެވެން ޖެހޭނެ ނޫން ހެއްޔެވެ؟އޭރުން އަންހެންކުދިން ކުރު ހެދުން ލިޔަކަސް އެކަން މައްސަލައަކަށް ނުވާނޭނުން ހެއްޔެވެ؟އެހެންކަމަށް ވާއިރު ހަމައެކަނި އަންހެންކުދިން ކައިރީ އެފަދަ ގޮތްގޮތަށް ހެދުން ނޭޅުމަށް ބުނުމުން އެއީ އިންސާފަކަށް ވޭ ބާއެވެ؟

ކުރު ހެދުން ނުލުމަށާއި،ގޭގައި ތިބުމަށް ބުނާއިރު އޭގައި އަންހެންކުދިންނަށް އޮތީ ކޮން ރަނގަޅުކަމެއް ހެއްޔެވެ؟ނުވަތަ ކޮންފައިދާއެއް ހެއްޔެވެ؟ގޭގައި ތިބިގެން އަހަރެމެން ހިތްއެދޭ ފަދަ ބައިވެރިއެއް ހޯދާނީ ކިހިނެއް ހެއްޔެވެ؟ޤައިމު އެންމެންނަށްވެސް، ރީތިވެގެން ނުކުމެ އުޅޭ ކުއްޖަކަށް ނޫނީ ބޭނުންވާފަދަ ބައިވެރިއެއް ނުލިބޭކަން ވިސްނާލިއަސް އެނގޭނެ ވަރަށް ހެކި ފެންނަން އެބަހުރި ނޫންހެއްޔެވެ؟ކުޑަމިނުން މިހާރުވެސް ގޮތް ބަލައިލަން ބުރުގާ އަޅައި ނިވާވެގެން ތިބޭ ކުދިންތަކަކާއިއެކު ރީތިވެ ނަލަހެދިލައިގެން އެއްކުއްޖަކު ދޭބަލާށެވެ.އޭނާއަށް ނޫނީ ފިރިހެންވެރިންގެ ސަމާލުކަން ނުހުއްޓޭނެކަން އަހަރެންނަކަށް ޝައްކެއްނެތެވެ.އެހެންކަމަށްވީއިރު ނިވާވެގެން އަންހެންކުދިންނަށް ލިބެން އޮތީ ކޮން މޮޅެއް ހެއްޔެވެ؟

އަނެއްކޮޅުން އަންހެންކުދިން އަބަދު ގޭގައި ބައިތިއްބުމަށް މަސައްކަތް ކުރުމަކީ އަންހެންކުދިންގެ މިނިވަންކަން އަތުލުން ކަހަލަ ކަމެއް ނޫން ހެއްޔެވެ؟ފިރިހެންކުދިން ފަދައިން އަންހެންކުދިންވެސް މަޖާކޮށްލާ ހިތްއުފާކޮށްލަން ބޭރަށް ނުކުމެ އުޅެން ބޭނުންވާނެތާއެވެ.އެކަމަކު އަހަރެންނަށް ވިސްނޭ ގޮތުގައި އެބާރުވެސް ދެނީ ފިރިހެންކުދިންނަށްށެވެ.ވީއިރު އަހަރެމެން ކަހަލަ އަންހެންކުދިންގެ ހިތުގައި ޝަކުވާ ނުއުފެދި ދާނެ ހެއްޔެވެ؟މިނިވަންކަން އަތުލައި ގަންނަކަން އިހްސާސް ނުކުރާނެ ހެއްޔެވެ؟އެހެންކަމަށްވީއިރު ގިނަވަގުތު ގޭގައި ތިބޭ ބަޔަކަށްވެ، ނިވާވެގެން ތިބުމަށް ބުނުމުގައި އަންހެންކުދިންނަށް ރަނގަޅަކަށޭ އެބުނާ ބުނުން އަހަރެންނަކަށް ނުވިސްނެއެވެ.މިހުރިހާ ސުވާލެއް ކޮޅެއްގައި ޖައްސަން ނޭނގި އަހަރެން ހައްތަހާ ޝަކުވާގެ ކަނޑަކަށް ގެނބިގެން ދިޔުން ނޫންކަމެއް ނުވިއެވެ.

ނަތީޖާއަކަށްވީ އެސުވާލުތަށް އަހަރެންނަށް ކޮއްކޮއާއި ހިސާބަށްވެސް ގެންދެވުމެވެ.އެހިސާބުން ކޮއްކޮއަށްވެސް ވިސްނާ ފިކުރުކުރެވޭ ސުވާލުތަކަކަށް އެސުވާލުތަށް ވެއްޖެއެވެ. ނަތީޖާއަކަށްވީ ކޮއްކޮވެސް އަހަރެންގެ ވިސްނުންތަކާއި އެއްކޮޅަށް ބުރަވާން ފެށުމެވެ. ކޮއްކޮވެސް އަހަރެން ފަދައިން ކުރު އެއްޗެހިލުމަށް ލޯބިކުރާ ކުއްޖަކަށްވީތީ އަހަރެމެން ދެމީހުންގެ ހިޔާލު އެކަމުގައި އެއްގޮތްވެގެން ދިޔައެވެ.ކޮއްކޮވެސް އަހަރެން އެ އޮޅުންބޮޅުންގަނޑުގެ ތެރެއަށް މިވެއްދީ ކުރެވެނީ ގޯސްކަމެއްކަމެއް ނުވަތަ ރަނގަޅުކަމެއްތޯވެސް ވިސްނާލުމެއްނެތިއެވެ.

އެކަންކަމުގައި އަހަރެންގެ ސުވާލުތަށް އިތުރުވެ ޝަކުވާތަށްވެސް އިތުރުވަމުން ދިޔުމުގެ ނަތީޖާއަކަށްވީ އަހަރެންގެ ހިތް މުޅިން ދީނާ ދޭތެރޭ ކިލަނބު ވުމެވެ.ކޮންމެކަމެއްގައިވެސް އަންހެންކުދިންނާ ފިރިހެންކުދިންނާ އަހަރެންނަށް އަޅާ ކިޔެމުން ދިޔައިރު އަހަރެންގެ ހިތް އެހިސާބުން ބުނަމުން ދިޔައީ ހުރިހާ މޮޅެއް އޮތީ ފިރިހެންކުދިނަށްކަމަށެވެ.ފިރިހެން ކުދިން ކުރާ ގޯސްކަމެއް ނުފެނެޔޭ އަހަރެންގެ ހިތް ބުނަމުން ދިޔައިރު ހުރިހާ ކަމެއްގައިވެސް ގޯސްވަނީ އަންހެންކުދިން ކަމަށްވެސް އަހަރެންގެ ހިތްދިޔައީ ބުނަމުންނެވެ.އޭގެ ނަތީޖާއަކަށްވީ އަންހެއްކުދިންނަށް އެއްވެސް އަަޙައްމިއްޔަތުކަމެއް ނުދޭ ކަމަށް އަހަރެންގެ ހިތް އެއްބަސްވުމެވެ.

އެހިސާބުން އަހަރެން ބޭނުންވީ ރާއްޖޭން ބޭރަށް ދިއުމަށެވެ.މިނިވަންކަމާއިއެކު އުޅެލާ މަޖާ ކޮށްލުމަށްށެވެ.އަންހެންކުދިންނަށް ބޭރު ޤައުމުތަކުގައި އެ މިނިވަންކަން އޮންނާނެކަމަށް އަހަރެންގެ ހިތް ބުނީއެވެ.ޤައިމުވެސް ލައި އުޅޭ އެއްޗިއްސަކަށް ފާޑެއް ނުކިޔާނެއެވެ.ގިނަވަގުތު ބޭރުގައި އުޅޭތީ އެއްޗެކޭ ނުބުނާނެއެވެ.އަހަރެންގެ ސިކުނޑިއަށް އެ ހިޔާލުތަށް ވެރިވެގެން ދިޔުމުން އިތުރަށް ރާއްޖޭގައި ހުންނާކަށް އަހަރެން ބޭނުމެއްނުވިއެވެ.އެހެންކަމުން އަހަރެން އެވާހަކަ ކޮއްކޮއާއި ހިއްސާ ކުރީމެވެ.

ހުރިހަމައެކަނި ބައްޕައަކީ ފޯރާ މީހަކަށްވީތީ އަހަރެން އުޅޭ ވަޒީފާއިން ލިބޭ ރުފިޔާތަށް ފުދޭވަރަކަށް ހުރީ ރައްކާ ކުރެވިފައެވެ.އެހެންކަމުން ކޮއްކޮއާއި އެވާހަކަތައް ހިއްސާ ކުރުމަށްފަހު އަހަރެން ފުރައިގެން ދިޔައީ އަހަރެންނަށް މަންމަ ނިޔާވި ދުވަހުއްސުރެ ހުރިހާ ޚިދުމަތެއްދީ ހުރިހާ ރަނގަޅު ތަރުބިއްޔަތެއް ދޭން މަސައްކަތްކުރަމުންދިޔަ ބައްޕައަށް ސިއްރުންނެވެ. ޤައިމު އެ ބައްޕަގެ ހިތަށް ކިހާ އަސަރެއް ކުރާނެ ހެއްޔެވެ؟އެކަމަކު އަހަރެންނަކަށް މިއަދަކު އެއެއް ނުވިސްނުނެވެ.އެއަށްވުރެ އަހަރެން ހުރީ ދުނިޔޭގެ އުފާ ހޯދަން ދާން ބޭނުންވެފައެވެ.

އެކަމުގައި ކޮއްކޮގެ ވަރަށް ބޮޑު އެހީއެއް ލިބުނީތީ އަހަރެން ވަރަށް ހިތްހަމަޖެހުނެވެ.އެކަމަކު ހަޤީގަތުގައި އަހަރެން އައީ އެކޮއްކޮއަށްވެސް އޮޅުވާލާފައެވެ.އަހަރެން ދަނީ އެއްހަފްތާއަށްކަމަށް ކޮއްކޮ ކައިރީ ބުންޏަސް އަހަރެން ރާއްޖެ ދޫކޮށް އައީ ވަކި ދުވަހެއްގެ ފަހުން އެނބުރި ދާން ކަނޑައަޅައިގެންނެއްނޫނެވެ.އެހެންކަމުން އަހަރެން ކޮއްކޮއަށް ފޯނު ނަންބަރެއްވެސް ނުދެމެވެ.ކުރީގެ ފޭސްބުކް އައިޑީ އަދި ވައިބާފަދަ ކޮއްކޮމެނަށް އެނގޭނެ ހުރިހާ އެއްޗެއްވެސް އަހަރެން ބޭނުންކުރުން ހުއްޓާލީމެވެ.އަހަރެންނާ ހިސާބަށް ބައްޕަމެނަށް ނާދެވޭވަރު ކުރުމަށްޓަކައެވެ.

އަހަރެން ދިޔައީ އިންޑިއާއަށެވެ.އުޅުނީ ކުއްޔައްދޭ އެޕާޓްމަންޓެއްގައި އިތުރު އެހެން ކުއްޖަކާއި އެކުއެވެ.އެއީ އަހަރެންނަށް އިންޑިއާއަށް ދިޔަތަނުން ލިބުނު ރައްޓިއްސެކެވެ.އެކުއްޖާއަކީވެސް ޒަމާނީ ކަންކަމަށް ލޯބިކުރާ ކުއްޖަކަށްވީތީ އަހަރެންނަށް އޭނާއާއިއެކު އުޅެން ވަރަށް ފަސޭހަވިއެވެ.އަދިހަމަ އެހެންމެ އަހަރެމެން އުޅޭ ހިސާބުގައި އުޅެނީ ހަމަ އަހަރެމެންކަހަލަ ޒަމާނީ ފެޝަނަށް ލޯބިކުރާ މީސްމީހުން ކަމުން އެމީހުންނާވެސް ގުޅުން ބަދަހިވެގެން ދާކަށް މާގިނަ ދުވަހެއް ނުނެގިއެވެ.

ދެޖިންސުގެ މީހުންނާއިއެކު އަހަރެން އުޅުނީ އެއްވެސް ހިޔާލެއް ފިކުރެއް ނެތިއެވެ.ދީނުގެ ކަންކަން އެއްގޮތަކަށްވެސް އަހަރެންގެ ސިކުނޑިއަށް ނުވަންނައިރު އަހަރެންގެ ހަބަރެއް ނުވެގެން ކަންބޮޑުވާނެ ބަޔަކު ތިބިކަންވެސް އަހަރެންގެ ހަނދާނަކަށް ނާދެއެވެ.ވާނީވެސް އެހެންތާއެވެ.އަހަރެން އުޅުނީ އެކަންކަން ހަނދާންވާ ވަރަށް ވުރެ އުފަލުގައެވެ.އެހެނަސް މަޖަލާ ފޯރީގައި ދެޖިންސުގެ މީހުންނާއިއެކު އުޅުނަސް އަހަރެން އެންމެ ބޮޑެތި ގުޅުމުން އެއްވެސް ފިރިހެންކުއްޖަކާއި ގާތްވެއެއް ނުހަދަމެވެ.ނަސީބަކުން ގަދަކަމުން އެމީހުންވެސް އަހަރެންނާއި އެފަދަ ގޮތަކަށް ގާތްވާކަށް މަސައްކަތެއްވެސް ނުކުރެއެވެ.

އުޅޭ އެޕާޓްމަންޓް ވަގުތީ ގޮތުން މަރާމާތުކުރަން ބަންދުކުރުމުން އަހަރެމެން ދެމީހުން އެހެންތާކަށް ބަދަލުވާންޖެހުނު ނަމަވެސް އެއްވެސް ރަހުމަތްތެރިއަކާއި ގުޅުމެއް ނުކެނޑެއެވެ.އެކަމާއި އަހަރެން ވަރަށް ހިތްހަމަ ޖެހުނެވެ.ނަމަވެސް އަހަރެމެން ބަދަލުވީ ހިސާބުގަނޑުވީ ބުދުދީނަށް ގޮސް ހުސްވެފައި ތިބި މީހުން އުޅޭ ހިސާބުގަނޑަކަށެވެ.އެކަމާ އަހަރެންހުރީ ރަނގަޅަށްވެސް ބޯ ހާސްވެފައެވެ.ނަމަވެސް އެނޫންގޮތެއް ނެތީީތީ ކެތްކޮށްލައިގެން ހުރީއެވެ.

ދުވަހަކަށްފަހު ދުވަހެއް ވޭތުވަމުން ދިޔައިރު ކަންދިމާކުރިގޮތުން އަހަރެންނާއި ހަމަ އެއްއިމާރާތެއްގައި އުޅޭ ކުއްޖަކާއި ރަޙުމަތްތެރިކަން އުފެދިގެން ދިޔައެވެ.ކުރިން ބުނިހެން ބުދު ދީނުގެ ކުއްޖެކެވެ.އަޅުކަމުގައި މުޅި ރެޔާއި ދުވާލު ހުސްކޮށްލައި އާއިލާއަކަށްވެފައިވާ އެ އާއިލާގެ މިކުއްޖާއާއި ރަހުމަތްތެރިކަން އުފެދިގެން ދިޔައީވެސް އޭނާ ބެލްކަނީގައި އަޅުކަމުގައި އިންނަ ވަގުތު ވަގުތު މަދުމަދުން ނަމަވެސް ދިމާވަމުން ދިޔުމުގެ ސަބަބުންނެވެ.ނަތީޖާއަކަށްވީ ފުރަތަމަ އާދައިގެ ވާހަކަ ވާހަކަ ދެކެވެމުން ގޮސް ފަހުން ފަހުން ހުރިހާ ސިއްރުތަކެއް ޙިއްސާ ކުރާހާ އަހަރެމެން ދެމީހުންގެ ގުޅުން ބަދަހިވެގެން ދިއުމެވެ.

އެހިސާބުން އަހަރެން އިންޑިއާއަށް އާއި ސަބަބުވެސު ބުނެދިނީމެވެ.ދީނުގެ އެކަންކަމާއި ސުވާލު އުފެދެންފެށި ހިސާބުން އަހަރެންގެ ހިތް ބަދަލުވީ ގޮތްވެސް ބުނެދިނީމެވެ.އެހިސާބުން އޭނާ އެނގެން ބޭނުންވީ އަހަރެމެންގެ ދީނުގެ ވާހަކަތަކެވެ.އެހެނަސް ދީނުގެ ކަންތައްތަކާއި ބެހޭގޮތުން އޭނާ ސުވާލު ކުރަން ފެށުމުން އަހަރެންނަށް އެސުވާލުތަކަށް ދޭނެ ޖަވާބެއްވެސް ގިނަފަހަރަށް ނޭނގުނީތީ ޙުދު އަހަރެންވެސް އާޝޯހުވިއެވެ.އެހެނަސް އަހަރެން އެކަން މާބޮޑު ކަމަކަށް ނުހަދަމެވެ.

އެކަމަކު އަހަރެން ނުވިސްނިކަމެއް އެކުއްޖާ ވިސްނައިފިއެވެ.އާއެކެވެ.އެދުވަހަށްފަހު ބައްދަލްނުވެ ހުރެހުރެފައި ބައްދަލްވި ދުވަހު އޭނާ ދެއްކި ވާހަކަތަކުން އަހަރެންނަށް ސިހުން ގެނުވިއެވެ. އެނގޭ ހެއްޔެވެ؟އަހަރެމެންގެ އިސްލާމްދީނުގެ ކަންތައްތައް އެކުއްޖާ އައީ ހޯދާ ދިރާސާ ކޮށްގެންނެވެ.ކޮންމެ ކަމެއްވެސް އަދި އެހާ ތަފްސީލްކޮންނެވެ.އެކަމަކު މިކަންކަމަށްވުރެ އަހަރެންނަށް ލިބުނު ބޮޑު ޙަބަރަކީ ކޮބައިކަން އެނގޭ ހެއްޔެވެ؟އެއީ އޭނާ އިސްލާމްދީނަށް ވަތް ވާހަކައެވެ.އޭނާ މުސްލިމަކަށްވީއެވެ.

އަހަރެންނަށް އޭނާ ދައްކާ ވާހަކަ ޤަބޫލު ނުކުރެވިފައި ހުރިކަން އޭނާއަށް ވިސްނުނީ ކަންނޭނގެއެވެ.އަހަރެންގެ ކުރިމަތީ ހުރެ އޭނާ ޝަޚާދަތް ކިޔާލީ ފަރިތަކަމާއިއެކުއެވެ.ޤުރުޢާނުގެ ދެތިން ސޫރަތްވެސްމެއެވެ.އެކަމާއި އަޖައިބުވެފައިހުރެ އަހަރެން ސުވާލު ކުރުމުން އޭނާ ބުނީ އިސްލާމްދީނާއި ބެހޭގޮތުން ބަލާ ހޯދަން ފެށުމުން ހައްޤު ދީނަކީ އަހަރެމެންގެ ދީންކަން ވިސްނި ފުރަގަސްދޭން ނުކެރުނީކަމަށެވެ.އޭނާގެ ހިތް އެކަމަށް ބާރު އަޅަން ފެށުމުން އިސްލާމްދީނަށް ވަގުތުން ވަތް ވާހަކައެވެ.އަދިހަމަ އެހެންމެ، ކަމެއް ކުރަން އުޅެފިއްޔާ ކުޑަދުވަސްކޮޅެއް ކީއްކުރަން އެއްދުވަސްވެސް އެއީ ވަރަށް ގިނަވަގުތު ކަމަށް އޭނާ ބުނެލީ ފެންކަޅިވެފައި ހުރެއެވެ.

އެއަށްފަހު އޭނާ ރޮއެރޮއެފައި ކިޔަމުން ދިޔައީ އިސްލާމްދީނުގެ ފުރިހަމަ ވާހަކައެވެ. އަންހެންކުދިންނަށް އިސްލާމްދީނުގައި ދީފައިވާ ޤަދަރާއި އިއްޒަތުގެ މަތިވެރިކަމުގެ ވާހަކައެވެ.އަހަރެމެން ދީނުގައި އަންހެންކުދިންގެ ޤަދަރާއި އިއްޒަތަށް އަޚައްމިއްޔަތުކަން ދޭވަރާއި ގާތަށްވެސް އެދީން ކީއްކުރަން އެހެން ދީނެއްގައިވެސް އަޙައްމިއްޔަތެއް ނުދޭކަމަށެވެ. އެވަރުގެ ޤަދަރަކާއި ރައްކާތެރިކަމެއް ނުދޭ ކަމަށެވެ.އަމިއްލަ ބޭބެމެންނާއި ބައްޕަމެން އަންހެން ކުދިންގެ ޢިއްފަތްތެރިކަން ނަގާލާއި ވާހަކައާއި މުދަލަކަށް ހަދައިގެން އަންހެން ދަރިން ވިއްކާ ވާހަކައެވެ.އަންހެންދަރިން ދިރިހުއްޓާއި ވަޅުލާ ވާހަކައާއި މަގުމައްޗަށް ގިނަވެގެން އުޅޭ ފިރިހެނުންގެ ޝިކާރައަަށް އެތައްހާސް އަންހެން ކުދިންނެއް ވެގެންދާ ވާހަކައެވެ.އެފަދަ ކުދިން ކުރާނެ ހިތާމަ އެނގޭ ހެއްޔޭވެސް އޭނާ އަހަރެންކުރެ އެހިއެވެ.

އެހުރިހާ ކަމަކުން އިސްލާމްދީނުގައި އަންހެންދަރިން ރައްކާތެރިކޮށްދޭން މަސައްކަތްކުރާއިރު އެވަރުގެ ފުރިހަމަ ދީނެއް ނެތްކަމަށް އޭނާ ބުނަމުން ދިޔައެވެ.އަމިއްލައަށް ފޮރުވިގެން އުޅެން އޭނާއަށްވެސް ކުރިން ވިސްނުނުނަމަ ކޮންފަދަ ހެއްޔޭވެސް އޭނާ ބުންޏެވެ.އިސްލާމްދީނަށް ވަދެވުނީތީ އެ ލިބުނު ހިތްހަމަޖެހުން އޭނާ އެއޮއްހާ ދުވަހު ހުއްޓާނުލާ ކުރި އަޅުކަމުންވެސް ނުލިބުނު ކަމަށްވެސް އޭނާ ރޮވިފައި ހުރެ ބުންޏެވެ.ހަމައެހެންމެ، އަންހެންކުދިން ގޭގާއި ތިބުމަށާއި، ނިވާކަންބޮޑު ހެދުން އެޅުމަށް ބާރުއެޅުވުމަކީ އަންހެންކުދިންގެ މިނިވަންކަން އަތުލައިގަތުމަށް މަސައްކަތްކުރުން ނޫންކަމަށްވެސް އޭނާ އަހަރެންނަށް ވިސްނައިދޭން މަސައްކަތް ކުރިއެވެ.ދުނިޔޭގެ އެހެން ތަންތާނގައި ކަންތައްވަމުން ދާގޮތް ނޭނގޭތީ އަހަރެންނަށް ދީނާއި ދޭތެރޭ އެހެން ވިސްނެނީ ކަމަށްވެސް އޭނާ އަހަރެންނަށް ބުނެދޭން މަސައްކަތް ކުރަމުން ދިޔައިރު އަހަރެމެން ދީނުގައި އެވަރުން އަންހެންކުދިން ޙިމާޔަތް ކޮށްދެން މަސައްކަތް ކުރާތީ އަހަރެމެން ފަޙްރުވެރިވެސް ވާންޖެހޭނެ ކަމަށްވެސް އޭނާ ބުނަމުން ދިޔައެވެ.

އަހަރެމެންގެ ދީންވަރު ފުރިހަމަ ދީނެއް ނެތްކަމަށް ވިސްނައިދޭން މަސައްކަތް ކުރަމުން އެދަނީ ބުދު ދީނުގައި ރެއާއި ދުވާލު އަޅުކަމުގައި ވަގުތުތަށް ހުސްކޮށްލި އަންހެންކުއްޖެއްކަމަށްވީއިރު އަހަރެން އެކަމާ ހައިރާންނުވާނެ ހެއްޔެވެ؟އަހަރެންގެ ދީނުގެ ފުރިހަމަކަން އަހަރެންނަށް ބުނެދޭން ނޭނގޭއިރު އޭނާ އެހުރިހާ އެއްޗެއް ތަޖުރިބާހުރި މީހެއްފަދައިން އަހަރެންނަށް ކިޔައިދެމުންދިޔައިރު އަހަރެން އާޝޯހު ނުވާނެ ހެއްޔެވެ؟

އެދުވަހަށްފަހު އެހެންކަމުން އަހަރެން އޭނާއާއި ބައްދަލެއް ނުކުރަމެވެ.އެހެނަސް އޭނާ އެރޭ ކިޔައިދިން އެންމެ ބަހެއްވެސް އަހަރެންގެ ހިތާ ސިކުނޑިން ފިލާ ދާގޮތެއް ނުވިއެވެ.ތިން ހަތަރު ދުވަސް އޭގެ ފަހުން ފާއިތުވެގެން ދިޔައިރުވެސް އެކަމާ ވިސްނި އަހަރެންނަށް ހުރެވެނީ ހިތްނުތަނަވަސްވެ ހާސްވާގޮތްވެފައެވެ.ހުންނަނީ ފާޑަކަށް ހިތް ބިރުވެސް ގެންފައެވެ.ނަމަވެސް ދެރައީ އެއީ ސީދާ ކީއްވެކަމެއް އަހަރެންނަށް ނުވިސްނޭތީއެވެ.އެހެންކަމުން އެންމެފަހުން އަހަރެން ނިންމީ އެރޭ ބޯހަމަ ޖައްސާލަން ރައްޓެހިންނާއިއެކު މަޖާކޮށްލައި ސަކަރާތްޖަހާލަން ދިއުމަށެވެ.

ކާރެއްގެ އިންތިޒާރުގައި ހުރެހުރެވެސް ކާރެއް ނުލިބުމުން އަހަރެން އެންމެ ފަހުން އެމީހުން ބުނެދިން އެޑްރެހަށް ދިއުމަަށް ހިނގައިގަތީމެވެ. އެކަމު އޭރުވެސް އަހަރެންނަށް ފާޑަކަށް ހުރެވުނީ ނެގި މަޑުވެފައެވެ.އަދިވެސް އެބަސްތައް ހިތުން ފިލާ ނުދާތީ ވާނީވެސް އެހެންތާއެވެ.އެ ހާސްކަމުގައި ހުރެ އަހަރެން ކުރިއަށް ހިނގަމުން ދަނިކޮށް ދިމާވީ އަހަރެން ހީވެސް ނުކުރާވަރުގެ ކަމަކާއެވެ.ކަމެއްވާނީ ބުނެފައެއް ނޫނޭ މީހުންވެސް ބުނެ އުޅޭތާއެވެ.ހީވެސް ނުކޮށް ހުއްޓާ ބޮޑު ޤުރޫޕެއް އައިސް އަހަރެން ވަށާލުމުން ބިރުން ހަލާކުވާވަރު ވިއެވެ.އެހާ އަވަސް ގޮތެއްގައި އެމީހުން އަހަރެންގެ ދެއަތުގައި ހިފެހެއްޓުމުން ދުއްވައިގަންނަން ކުރި މަސައްކަތްވެސް ވީ ބޭކާރެވެ.އެ އަނދިރި މަގުގައި މީހެއްގެ ހިލަމެއްވެސް ވާން ނެތުމުން ބިރުންގޮސް ހަޅޭއްލެވުން ނޫންކަމެއް އަހަރެންނަށް ނުވެސް ކުރެވުނެވެ.

މި ހާލަތުގައި އަހަރެން ޤައިދުވެފައި ހުރެ ފުރަތަމަ ފަހަރަށް ބަޔަކު އަހަރެންގެ ހަށިގަނޑަށް ބަލަމުންދިޔަ ދަހިވެތި ނަޒަރުން އަހަރެންނަށް އުނދަގޫވެއްޖެއެވެ.މިހާލަތަށް އަހަރެން ވެއްޓުމުން އެހެންކުދިންނަށް ކުރެވޭނެ އިހްސާސް އަހަރެންނަށްވެސް އިހްސާސް ކުރެވިއްޖެއެވެ.ޙުދު އަހަރެންނަށްވެސް މިފަދަ ގޮތަކަށް ބައެއްގެ އަތްދަށުވާން ނުރުހެވުނެވެ.ވީއިރު އަދި ރަހުމެއް ނެތް ގޮތެއްގައި ޢިއްފަތްތެރިކަން ގެއްލިގެން ދާން އެދޭނީ ކޮން އަންހެންކުއްޖެއް ހެއްޔެވެ؟

އެމީހުން އަހަރެންގެ ހަށިގަނޑަށް ދަހިވެތި ބެލުމެއްގައި ކައިރިވަމުން ދިޔައިރު ފުރަތަމަ ފަހަރަށް ލެވިފައިވާ ހެދުމާއިމެދު އަހަރެންނަށް ހިތްހަމަ ނުޖެހެވުނެވެ.މިއައްވުރެ ހަމަ ތަންކޮޅެއްވެސް ދިގުހެދުމެއް ލެވިފައި ހުރިނަމަ ކޮންފަދަ ހެއްޔޭ ހިތަށް އަރަމުން ދިޔައިރު ލެވިފައި ހުރި ހެދުމުގެ ފަސްބައިގައި ހިފައި ތިރިއަށް ދަމާލަން ބޭނުންވި އަދަދެއްވެސް ބުނާކަށް ނޭނގެއެވެ.

މާތްކަލާކޯއެވެ.އަޅެފަހެ ދިގު ހެދުމެއްލެވި ހަށިގަނޑު ފޮރުވިފައި ވީނަމަ ކޮންފަދަ ހެއްޔެވެ؟މިމީހުންގެ ޝިކާރައަކަށް އެހެންނޫންނަމަ އަހަރެން ނުވީސް ކަންނޭނގެއެވެ.އެއާއެކު ހިތަށް ކުރި އަސަރުގައި އަހަރެންނަށް މަދަދަށް އެދި ފުރަތަމަވެސް ދެންނެވުނީ ކޮންފަރާތަކަށްކަން އެނގޭ ހެއްޔެވެ؟ އާއެކެވެ.މިއޮއްހާ ދުވަހު އަހަރެންގެ ސިކުނޑިއަށް އަރާފައިނުވާ އަހަރެން އުފެއްދި ކަލާނގެ މަތިންނެވެ.އެވަގުތު މާތްﷲ ގެ މަތިން އަހަރެންނަށް ޚަދުމަ ކޮށްލެވުނީތީ އަހަރެންނެއް ހައިރާނެއް ނުވެއެވެ.ކީއްވެކަން އެނގޭ ހެއްޔެވެ؟

އެއީ އަހަރެންނަށް، އަހަރެން މިއޮއްހާ ދުވަހު ކުރަމުން އާއި ސުވާލުތަކުގެ ޖަވާބު ލިބުނީމައެވެ. އެވެސް މީހަކު ބުނެ ކިޔައިގެންނެއް ނޫނެވެ. އަމަލުން ފެނިގެންނެވެ.ވީއިރު އަހަރެންނަށް މިއަދު ޖަވާބު ނުލިބެންވީ ސަބަބެއް ނެތްތާއެވެ.ބައްޕައާއި އަދި ރަހުމަތްތެރިޔާ އެއޮއްހާ ދުވަހު ބުނެދޭން މަސައްކަތްކުރި ވާހަކަތަށް އަހަރެންނަށް ވިސްނިއްޖެއެވެ.ނިވާވުމަށް ދީނުގައި ބާރުއަޅުއްވަނީ ކީއްވެކަމާއި ގޭގައި ތިބޭ ބަޔަކަށް އަހަރެމެން ވުމަށް ބުނަނީ ކީއްވެކަން އަހަރެންނަށް މިހާރު ވިސްނިއްޖެއެވެ.އަހަރެމެންގެ މިނިވަންކަން އަތުލުމުގެ ނިޔަތުގައި ނޫންކަމާއި އަހަރެމެންގެ ޢިއްފަތްތެރިކަން ރައްކާތެރި ކޮށްދެންކަންވެސް އަހަރެންނަށް މިހާރު ވިސްނިއްޖެއެވެ.

ރީތިވެގެން ނުކުތީމައި މީހުން ބަލާނޭ ކިޔާފައި އަހަރެންނަށް ވިސްނުން ގެންގުޅެވުނީ ގޯސް މަގުންނެވެ.އެކަންކަން އެގޮތަށް ހިނގަމުން ދިޔުމުގައި އެއީ އަހަރެމެންގެ ދީނުގެ މައްސަލައެއް ނޫންކަމާއި އެއީ އެދީނުގައި އަމަލު ކުރަން ތިބި މީހުންގެ އީމާންތެރިކަން ކުޑަވެގެންކަން އަހަރެންނަށް މި ވިސްނުނީވެސް އަދިކިރިޔާއެވެ.

މާތްކަލާކޯއެވެ!އަހަރެންނަށް މިފަހަރު ރަނގަޅަށްވެސް ގިސްލާ ރޮވިއްޖެއެވެ.ވިސްނުނު ނަމަވެސް ވަގުތު ފާއިތު ވެއްޖެކަމަށް ހިތް ބުނީތީއެވެ.ވީއިރު އެފަރާތުން ދެން އަހަރެން ކުރާ ދުޢާ އިޖާބަ ކޮށްދެއްވާނެ ކަމެއްވެސް ނޭނގެއެވެ.

ސުބުޚާނަށްﷲ އެވެ.އަހަރެން މިވީ ހާދަ ނުބައި، ދުވަހަކު މައާފު ހައްޤުވެސް ނުވާވަރުގެ އިންސާނަކަށްށެވެ.އެހާވެސް ބޮޑަށް އަހަރެންނަށް މިވަނީ ދީނުގެ މަގަށް ފުރަގަސްދެވިފައެވެ. ދީނަށްޓަކައި ހިތްކިލަނބު ކޮށްފައެވެ.އެވެސް މީހަކު މަޖުބޫރު ކޮށްގެންނެއް ނޫނެވެ.އަމިއްލައަށްށެވެ. ވީއިރު ކުރާނެ ޝަކުވާއެއް އެބަ އޮތް ހެއްޔެވެ؟ ހިނގަމުން މިދާ ކަންތަކުގައި ޒިންމާ ނަގަންޖެހޭނެ ފަރާތަކީ ޙުދު އަހަރެން އެކަންޏެވެ.އިތުރު އެހެން މީހެއް ނޫނެވެ.މިއަށްވުރެ އަޅެ ފަހެ ކުރިން ވިސްނުންނަމަ ކޮންފަދަ ހެއްޔެވެ؟ތަޢުބާވުމަށް އެންމެ ފުރުސަތެއްވެސް ލިބޭނެ ނަމަ ކޮންފަދަ ހެއްޔެވެ؟

އަހަރެންގެ ރުއިމުގެ އަޑަށްވިއަސް އެވަގުތު ޕޮލިސް ޖިޕެއް އެތަނަށް އައުން އެއީ މާތްﷲ އަހަރެންނަށް ލެއްވި ރަޙުމަތެއްކަމަށް އަހަރެން ކުޑަކޮންވެސް މިފަހަރަކު ޝައްކެއް ނުކުރަމެވެ.އެމީހުންގެ އަތްދަށުން ސަލާމަތްވެވުމުން މިފަހަރު އަހަރެން ދިޔައީ އެ ރައްޓެހިން ހޯދާކަށް ނޫނެވެ.އަހަރެން އައީ އަނބުރާ އެޕާޓްމަންޓަށްށެވެ.އަދި އައިސް ވަތްގޮތަށް އަހަރެން ފުރަތަމަވެސް ފޯނު ނަގައި އަވަސްވެގަތީ މެއިލް ޗެކު ކުރާށެވެ.

މިޤައުމަށް އައީއްސުރެ މީ އަހަރެން މެއިލްތަށް ޗެކު ކުރާ ފުރަތަމަ ފަހަރެވެ.ކީއްކުރަންކަން އެނގޭ ހެއްޔެވެ؟އެއީ ކޮއްކޮގެ ކުޑަ ނަމަވެސް ހަބަރެއް ލިބިދާނެކަމުގެ އުއްމީދުގައެވެ.އިރާދަފުޅުން ވީވެސް އެހެންނެވެ.ހުޅުވައި ބަލައިލިއިރު ކޮއްކޮގެ މެއިލްއެއް އަހަރެންނަށް ލިބިފައި އޮތެވެ.އެވެސް މީގެ ދެހަފްތާ ކުރިން ފޮނުވާފައިވާ މެއިލްއެކެވެ.އެހެންކަމުން އެންމެ ސުކުންތެއްވެސް ލަސްކުރަން ނުހަދާ އަހަރެން އެ މެއިލް ހުޅުވާލުމަށްފަހު ކިޔަން ފެށީމެވެ.

“ދައްތާއެވެ!ހާލު ރަނގަޅު ހެއްޔެވެ؟ދައްތަގެ ހާލު ރަނގަޅުވާނެކަމަށް އުއްމީދު ކުރަމެވެ.އަހަރެން މި މެއިލް މިފޮނުވީ ދައްތައަށް މި މެއިލް ފެންނާނެ ކަމުގެ ކުޑަވެސް ޔަޤީންކަމެއް ނެތިއެވެ. އެކަމަކުވެސް ކޮންމެވެސް ދުވަހަކުން މި މެއިލް ދައްތައަށް ފެންނާނެ ކަމުގައި އުއްމީދު ކުރަމެވެ.

ދައްތާއެވެ!މިވޭތުވި ދުވަސްތަކުތެރޭ އެތައްކަމެއް ބަދަލު ވެއްޖެއެވެ.ދައްތަ ދިޔަތާ މާގިނަ ދުވަހެއްނުވެ ބައްޕަ ވަނީ މަރުކަޒުގައި އެޑްމިޓު ކުރަން ޖެހިފައެވެ.މިއަދާ ހަމައަށްވެސް ބައްޕަ ދޫކޮށެއްނުލައެވެ.އެވަރުވީއިރުވެސް ދައްތަ ހޯދަން ނޫޅުނީ ބައްޕަ ބުނީތީއެވެ.ބައްޕަ ބުނި އެއްޗެއް އެނގޭ ހެއްޔެވެ؟ބައްޕަ ބުނީ ދައްތައަށް ވަގުތު ދިނުމަށެވެ.އަދި ދައްތަ ވިސްނިގެން އަހަރެމެން ކައިރިއަށް އަންނާނެ ކަމަށެވެ.

ދައްތާއެވެ.އެކަނި އުޅެން ޖެހުނީތީ އަހަރެން ވަނީ ބައެއްގެ ޝިކާރައާއި ކުރިމަތިލާން ޖެހިފައެވެ. މިބުނަނީ މުސްލިމް ފިރިހެންވެރިންތަކެއްގެ އަތްދަށުވީ ވާހަކައެއް ނޫނެވެ.ބޭރު ބިދޭސީ ބައެއްގެ އަތްދަށުވީ ވާހަކައެވެ.އަޑުއިވުނު ގޮތުންވިއްޔާ މުސްލިމް ނޫން ބައެކެވެ.ދައްތާއެވެ.އެރޭ ދައްތަގެ އެއްސުވާލުގެ ޖަވާބު އަހަރެންނަށް ލިބުނެވެ.ފިރިހެން ކުދިންވެސް މުސްލިމުންނަށްވެހުރެ އަމުދުން ބަލައިގެން ނުވާނެ ކަމަށް ދައްތަ ބުނީމޭނުން ހެއްޔެވެ؟ދައްތާއެވެ.އަހަރެމެންގެ ހަށިގަނޑަށް ބަލަބަލާ ތިބޭނީ ހަމައެކަނި ދީނުގެ މީހުންނެއް ނޫނެވެ.އެއްވެސް ދީނަކަށް ތަބާ ނުވާ މީހުންވެސްމެއެވެ.ވީއިރު އަހަރެމެންގެ ދީން، އަހަރެމެން އެފަދަ މީހުންގެ އަތްދަށުން ހިމާޔަތް ކޮށްދޭން ބޭނުން ނުވާނެ ހެއްޔެވެ؟

ދައްތާއެވެ!އަހަރެން މިހާރު މީހަކާވެސް އިނދެފީމެވެ.ކުރު އެއްޗެހި ލާން އުޅުުން އަހަރެމެން ހިތްއެދޭ ކަމަކަށް ވީއިރު އަހަރެމެން ޝަކުވާ ކުރަމުންވެސް އައީ އެކަމާއި ނޫން ހެއްޔެވެ؟އެކަމަކު މިއަދު އަހަރެން ބުނަން ހެއްޔެވެ؟އަލަތު ކައިވެނި ކުރިއިރު ހަށިގަނޑު ހިލޭ މީހުން ކުރިމަތީ ފޮރުވައިގެން އުޅުން އަންބެއް ގޮތުގައި ހުރެ ފިރިމީހާގެ ހައްޤަކަށް ވެވުން ނަމައޭ އަހަރެންގެ ހިތަށް އެރި އަދަދެއް ބުނާކަށް ނޭނގެއެވެ.ހަމަ ޤައިމުވެސް އެހެންނޫންނަމަ ފިރިމީހާގެ ހައްޤަކަށް ވެވުނީތީ ލިބުނު އުފަލުގެ ތިންގުނަ އުފާ ލިބުނީސްކަން އަހަރެންނަށް ޔަޤީނެވެ.އެކަމަކު ދެން ވެފައި އޮތް ކަމެއްގެ ވާހަކައެއް ދެއްކުމުގެ ބޭނުމެއް ނެތް ދޯއެވެ.

މާތްﷲއިރާދަފުޅުން އަހަރެން މިއަދު މިވަނީ ޞާލިޚު އަންބަކަށް ވެފައެވެ.ނިވާވެގެން ހުރި ބަރާބަރަށް އަޅުކަން ކުރާ އަޅަކަށްވެސް އަހަރެން ވެއްޖައީމެވެ. މިކަމުގެ ހުރިހާވެސް ތައުރީފެއް ހައްޤުވަނީ އަހަރެންނަށް ލިބުން ދީންވެރި ފިރިމީހާއަށެވެ.

ދެން އޮތީ އަހަރެން ދައްތައަށް ބުނެދޭން ބޭނުންވާ އެންމެ ބޮޑު ވާހަކައެވެ.ދައްތައަށް މިހާރު ދައްތަގެ ހިތުގައި އުފެދުނު ހުރިހާ ސުވާލުތަކަކަށް ޖަވާބު ލިބިއްޖެކަމަށް އަހަރެން އުއްމީދު ކުރާތީ މިވާހަކަ ކިޔައިދޭން ބޭނުންވީއެވެ.

އެއްރޭ ވަގުތީ ހިޔާވަހިކަމަކަށް އެދިގެން އަހަރެމެން ގެއަށް އާއި ކުޑަކުޑަ އާއިލާ މަތިން ދައްތަ ހަނދާން އެބަހުރި ހެއްޔެވެ؟އަހަރެމެންނަށް އެމީހުންނަށް ކަންތައް ކުރެވުނީ ކިހާ އިހާނެތިކޮންކަން ހަނދާން އެބަހުރި ހެއްޔެވެ؟އެރޭ އެކަނި އެމީހުން ބައިތިއްބަން އެދުނީތީވެސް އަހަރެމެން މީ ފާޅުގައި އެކަމަށް އިންކާރު ކުރި ބައެކެވެ.ބައްޕަ ބުނީތީވެސް އަހަރެމެން އެކަމަށް އެއްބަހެއް ނުވަމޭނުންތާއެވެ.ކުޑަމިނުން އެދެއަންހެން ކުދިންނާއި ހުރިހަމައެކަނި މަންމަ އެކަނި ބަހައްޓައިދޭންވެސް އެ ފިރިހެންކުއްޖާ އެދުމުން އަހަރެމެން ކުރީ އިންކާރެވެ.ހަޑިކޮށް ތިބީތީއޭ ކިޔާފައެވެ.އަހަރެމެންގެ އެއްޗެހި ވަގަށް ނަގާފާނެތީއެވެ.

އެކަމަކު ދައްތާއެވެ.އަހަރެން ހާލުގައި ޖެހުން އިރު އެހިީވީ ހަމަ އެ އާއިލާއެވެ.އެދުވަހު ހިތުގައި ޖައްސާ ދެރަކޮށްފައި ފޮނުވާލި އެ އާއިލާއެވެ.އެރޭ އަހަރެންގެ ސަލާމަތަށް އައިސްދިނީވެސް ހަމަ މިބުނާ ފިރިހެންކުއްޖާއެވެ.އެނގޭ ހެއްޔެވެ؟އަހަރެން އެގެއަށް ގެންދިއުމުން އެމީހުން އަމަލުތަށް ބެހެއްޓި ގޮތުން އަހަރެން ލަދުން ހަލާކުވާ ވަރުވިއެވެ. މެހެމާންދާރީ އެމީހުންނަށް ވީ އެންމެ ފުރިހަމައަކަށް އަދާކުރަން މަސައްކަތް ކުރީތީއެވެ.އެންމެން އަހަރެންނާ ހިނިތުންވެލާފައި ފިރުމަ ފިރުމާފައި ވާހަކަ ދެއްކި ގޮތުން ދުވަހަކު ކަމެއް ވީ ހެންވެސް ހީނުވެއެވެ.ވީއިރު އަހަރެން ކިހާ ލަދެެއް ގަންނާނެ ހެއްޔެވެ؟

އެންމެފަހުން ލަދުވެތިވާ ހާލު މައާފަށް އެދުނީ އަހަރެންނެވެ.ބަދަލުގައި އެމީހުން ހިތުގައި އެކަމަށް ކުޑަވެސް ހިތްބުރަކަމެއް ނެތޭ ބުނެލީ ކުރިއެކޭ އެއްފަދައިން އެ ފަނޑުވުމެއްނެތް ހިނިތުންވުމުގައި ތިބެއެވެ.އެ އުޖާލާވި މޫނުތަށްފެނި އަހަރެންގެ ހިތަށް ކުރުވި އަސަރު ބޮޑެވެ.އެހާ ހިތްތިރި މީހުންވެސް ދުނިޔޭގައި އުޅޭ ހެއްޔޭ އަހަރެންނަށް އެވަގުތު ބުނެވެސް ލެވުނެވެ.

ދައްތާއެވެ!އަހަރެން މިހާރު ކައިވެނި ކޮށްގެން މިއުޅެނީ އެ ފިރިހެން ކުއްޖައާއެވެ.އެ އާއިލާއަކީ ދީންވެރިކަމުގެ ފުރިހަމަ ނަމޫނާއެކެވެ. ހިތްތިރިކަމުގައި ހައްދެއް ނެތް ބައެކެވެ.މިއަދު އެ އާއިލާ އުޅެނީ އަހަރެމެން ގޭގައެވެ.މި އާއިލާގެ އުފާވެރިކަން އެއީ އަހަރެންނަށް ބުނެދިނުމަށް ކުޅަދާނަ ކަމެއް ނޫނެވެ.

ދައްތާއެވެ!އަހަރެން ބުނެދޭން މިއުޅޭ އެއްޗެއް ވިސްނޭ ހެއްޔެވެ؟ދައްތައަށް ވިސްނޭ ދުވަހަކުން އެކަލާނގެ ދައްތަގެ ތަޢުބާ ބަލައި ނުގަންނާނެކަމަށް ދައްތަގެ ހިތަށް އަރާނެކަމުގެ ކުޑަވެސް ޝައްކެއް އަހަރެންނަކަށް ނެތެވެ.ވީއިރު ބުނަން ހެއްޔެވެ؟ އަހަރެމެން ނިކަމެތި ކޮށްލާފައި ފޮނުވާލި މީހުން އަހަރެންނަށްވެސް މައާފު ކުރީއެވެ.އެވެސް ހިތުގައި އެއްވެސް ހިތްބުރަކަމެއް ނުބާއްވައެވެ.އެކަމަކު އަދި އަހަރެން މިދައްކަނީ ހަމަ އަހަރެމެންފަދަ އިންސާނުންތަކެއްގެ ވާހަކައެވެ.ވީއިރު އެކަލާނގެ ދައްތައަށް މައާފު ނުކުރައްވަންވީ ކީއްވެ ހެއްޔެވެ؟

އެކަލާނގެއީ އަދި އަހަރެމެން އިންސާނުންނަށްވުރެ ދީލަތިވެވޮޑިގެންވާ ގިނަގިނައިން އަހަރެމެންގެ ކުއްތަށް ޢަފޫ ކުރައްވާ ރަސްކަލާނގެއެވެ.ވީއިރު ދައްތަ ތަޢުބާވެ ކުށްތަށްވުމުން ހުރިހާ ކަމަކަށް ކުޅަދުންވަންތަ އެކަލާނގެ ދައްތަގެ ކުށް ޢަފޫނުކުރައްވާނެހެން ދައްތައަށް ހީވޭ ހެއްޔެވެ؟

މިހާރު ދައްތައަށް އަހަރެން އެވާހަކަ މިކިޔައިދިނީ ކޯއްޗެއް ވިސްނައިދޭންކަން އެނގޭނެ ކަމަށް އުއްމީދު ކުރަމެވެ.ވީއިރު ދައްތާއެވެ.އަދި ވަގުތު އެބައޮތެވެ.ހިތްވަރުކޮށްލާފައި ތަޢުބާވެ ކުށް އަފޫކޮށްދިނުމަށް އެދި ދުޢާ ކުރާށެވެ.އަދި ތަޢުބާވެ ސާލިޚު މީހަކަށްވެގެން އެނބުރި އަންނާށެވެ.ބައްޕައާއި އަހަރެންވެސް މިހުރީ ދައްތަ އެނބުރި އަންނާނެ ދުވަހެއްގެ އިންތިޒާރުގައެވެ.”

ކޮއްކޮގެ އެ މެއިލް ކިޔާފައި އަހަރެންނަށް ރަނގަޅަށްވެސް ގިސްލާފައި ރޮވުނެވެ.އެކަލާނގެއި ދީލަތިވަންތަ އަދި ގިނަގިނައިން އަހަރެމެންގެ ކުށްތަށް ޢަފޫ ކޮށްދެއްވާނެ ކަލާނގެކަން ވިސްނުނު ހިނދު އަހަރެން އަވަސްވެގަތީ ތަޢުބާވެ އެކަލާނގެ ހަޒްރަތަށް ކުށް ޢަފޫކޮށްދެއްވުމަށް އެދި ދުޢާ ދެންނެވުމަށްށެވެ.އޭރު އަހަރެންގެ ހިތުގައިވަނީ އެނބުރި އަމިއްލަ ވަޒަނަށް ފުރިހަމަ ގޮތުގައި ދީންވެރި ކުއްޖަކަށް ވެގެން ދިއުމުގެ އަޒުމެވެ.އާއެކެވެ.އަހަރެންގެ ހިތަށް އެރި ހުރިހާ ސުވާލެއްގެ ޖަވާބު އަހަރެންނަށް މިއަދު ލިބިއްޖެއެވެ.