ތަޢުބާ

ރަފާގެ ބަނަވެފައިވާ ޙަޔާތަށް ދެން އަލިކަމެއް ލިބިދާނެ އެއްވެސް އުއްމީދެއް އޭނާ އަކަށް ނެތެވެ.މިއޮއް ހުރިހާ ދުވަހު އެއްވެސް ފިކުރެއް ޚިޔާލެއް ނެތި އަމިއްލަ އުފާތަކާއި ހެއްލުމުގައި ފިޔަވަޅަކަށްފަހު ފިޔަވަޅެއް އަޅަމުންދިޔަ ރަފާގެ ހިތަށް ބިރުވެރިކަން ވަދެގެން ދިޔައީ މިއަދު ނޫހުގެ ފަލަ ސުރުޚީގައި ޖަހާފައިވާ ކުއްލި ޚަބަރަކުންނެވެ.ޒުވާން ދިވެހި އަންހެން ކުއްޖަކު އަވަށްޓެރި އިންޑިޔާގެ ޓްރިވެންޑްރަމްގައި ހިނގާދިޔަ ނުރައްކާތެރި ކާރު އެކްސިޑެންޓެއްގައި ކުއްލި ގޮތަކަށް މަރުވި ޚަބަރުން ރަފާގެ ހިތަށް ވަނީ ބުނެދޭންދަތި ފުން އަސަރެއް ކުރުވާފައެވެ.އެއީ އޭނާ ދަންނަ ކުއްޖަކަށް ނުވިކަމުގައި ވިޔަސް އެ ކުއްލި މަރުން ރަފާގެ ހިތާއި ސިކުނޑިއަށްވަނީ އޭނާގެ އަމިއްލަ ޙަޔާތާއި ދޭތެރޭ ވިސްނާލަން މަޖުބޫރު ކުރުވާފައެވެ.އެފަދަ ޙާދިސާއެއް އޭނާ އަޑުއެހި މިއީކީ ފުރަތަމަ ފަހަރެއްވެސް ނޫނެވެ.ނަމަވެސް މީގެ ކުރިއަކުން މިފަދަ ބިރުވެރި އިޙްސާސެއް ހަމަ ޔަޤީނުންވެސް އޭނާއަކަށް ކުރެވިފައެއް ނުވެއެވެ.އިންސާނާގެ ޙަޔާތަކީ ވަގުތީ ފާލަމަކަށް ނޫނީ ނުވެއެވެ.އަދި މުސާފިރެއްގެ ގޮތުގައި ދުނިޔެ މަތީގައި ހޭދަކުރާ މި ކުޑަކުޑަ ވަގުތުކޮޅުގެ ނިމުން އަންނާނީ ފަހެ ކޮންގޮތަކުން ކިހިނެތް ކޮންއިރަކު ކަމެއް ހަމަ އެކަކަށްވެސް ނޭނގޭނެއެވެ.ނަމަވެސް އެނގޭހާވެސް ކަމަކީ ކޮންމެ ފުރާނައެއްވެސް މަރުގެ ރަހަ ދެކޭނެ ކަމެވެ.

އެ ޚަބަރު ކިޔުނު ފަހުން ރަފާގެ ދެލޯ ވަނީ ނިދިން މަޙްރޫމް ވެފައެވެ.އޭނާގެ ހިތާއި ސިކުނޑީގައި އެ ޙާދިސާ ބިންވަޅު ނެގިފައިވާއިރު،ދެން އޮތީ އޭނާގެ ފަހަރޭވެސް އެހިތް ބުނަމުން ދާކަހަލައެވެ.ރަފާއަށް އޭނާއަށް އުޅެވިފައިވާ ގޮތާއިމެދު ވިސްނެން ފެށީ މިއަދުއެވެ.އިންސާނަކަށް ވީތީ ކޮންމެ މީހަކަށްހެން ހުންނާނީ ކުދި ކުދި ކުށްތަކަށް އަރައިގަނެވިފައެވެ.ނަމަވެސް އޭނާއަށް ކުރެވިފައިވާ ފާފައިގެ ބޮޑު ކަމާއެވެ.އެ ދެލޮލުން ކަރުނަތައް ފައިބަމުން ދިޔައީ އެއްވެސް ހިފެހެެއްޓުމެއް ނެތިއެވެ.ރަފާއަށް މިއަދު އެވަނީ އޭނާގެ އަމިއްލަ އަތުން މަޅިއެއް ތައްޔާރު ކުރެވި އޭގައި ސަލާމަތް ނުވެވޭނެ ފަދައަކުން ހައްޔަރު ވެވިފައެވެ.ރޮއިރޮއި މޭގައިވެސް ވަނީ ދިލަ ތަދެއް ހިފައިލާފައެވެ.

“މަންމީ……މަންމީ….”ރޮއިރޮއި ގިސްލަމުން ދިޔަ ރަފާއަށް ހަމަ ހޭވެރިކަންވީ ކައިރީގައިހުރި ކުޑަކުޑަ ތިން އަހަރުގެ ސޯނާގެ އަޑަށެވެ.އެ މަޢުސޫމު ދެލޮލުގައިވި ހާސް ކަމަކުން އެ ކުޑަ ފުރާނަ އަތަށްލާ ބޮނޑި ކޮށްލަމުން އޭނާގެ ދެލޮލުގައިވި ކަރުނަތަށް ފޮހެލީ އެ ދަރިފުޅަށް އޭނާގެ ކަރުނަ ތަކުން ފުން އަސަރެއް ކޮށްފައި ވާތީއެވެ.އަދި ދަރިފުޅާއިއެކު ކުޑަކޮށް މަޖާކޮށްލާ ލޯބިކޮށްލީ އެ ޅަ ހިތް ހަމައަކަށް އެޅުވުމަށްޓަކައެވެ.

މެންދުރުގެ ހޫނުގަދަ ވަގުތެވެ.ރަފާ އަވަދިނެތި އުޅެނީ ދަރިފުޅު ސްކޫލަށް ގެންދަން ތައްޔާރު ކުރުމުގައެވެ.އެޕާޓްމެންޓް ދޮރުގައި ބެލް ޖެހި އަޑަށް ދަރިފުޅު ގޮނޑީގައި ބައިންދާލުމަށްފަހު ގޮސް ދޮރު ހުޅުވިއެވެ.ކުރިމަތީގައި ހުރި ރައުލް ފެނުމުން ރަފާގެ މޫނުމައްޗަށް ހިނިތުން ވުމެއް ވެރިވެގެން ދިޔައެވެ.ނަމަވެސް ޖެހިގެން އައި ސިކުންތުގައި އެ ހިނިތުންވުން ފަނޑުވެ ނިތްކުރިއަށް ރޫގިނަ ކޮށްލަމުން މިގަޑީގައި ތިއައީ އަނެއްކާ އެއްޗެއް ބާއްވާފައި ދެވިގެންތޯ ސުވާލު ކޮށްލިއެވެ.”ނޫން އެއްޗެއް ބާއްވާފަ ދެވިގެނެއް ނޫން.އެކަމަކު ބްރޭކް ގަޑިވީމަ ހިތަށްއެރީ ބައްޕިގެ ޕްރިންސެސް ސްކޫލަށް ގެންދާނީ މިއަދު ބައްޕިއޭ”.ގޮނޑީގެކައިރީގައި ދެކަކޫ ޖަހާ ތިރިވުމަށްފަހު ކުޑަކުޑަ ސޯނާގެ ކޮލުގައި ދެއަތުން ހިފައިލަމުން ރައުލް ޖަވާބު ދިނެވެ.ސޯނާވެސް ލަވްޔޫ ބައްޕީއޭ ކިޔައި އެ ކުޑަކުޑަ ދެއަތުން ބައްޕަގެ ބުރަކަށީގައި ވަށައިލީ ނުހަނު ލޯބިންނެވެ.ދަރިފުޅާއި ބައްޕަގެ ދެގޮތެއް ނުވާނެ އެ ސާފު ލޯބި ފެނިފައި ރަފާގެ ދެލޮލުންވެސް ކަރުނައިގެ މުތީތައް ދިއްލާލިއެވެ.

އެނދުގައި އޮށޯވެލައިގެން ނިތްކުރި މައްޗަށް އެއްއަތް އެއްލައިގެން އޮތް ރަފާއަށް ހަމަ ވިސްނެމުން ދިޔައީ ހަނަފަސް ދިރުމެއްނެތް ސަހަރާއަކަށް މިސްރާބު ޖަހާފައިވާ އޭނާގެ ޙަޔާތާއި ދޭތެރޭގައެވެ.އޭނާއަށް އެގޮތުގައި ކަރުނައަޅަން އޮވެވުނީ ކިހާއިރަކު ކަމެއްވެސް ނޭނގުނެވެ.އެ ވީރާނާ ކުރުވަނިވި ހިތި ޚިޔާލުތަކުން އޭނާއަށް ނިކުމެވުނީ އަޞުރު ނަމާދުގެ ބަންގީގެ އަޑަށެވެ.މީގެކުރިން ބަންގީގެ އަޑު އިވުނަކަސް އޭނާ ހިރުވާތާ ކަހާވެސް ނުލާނެއެވެ.ނަމަވެސް މިވަގުތު ކުރެވެމުންދާ އިޙްސާސް މީގެ ކުރިން ދުވަހަކުވެސް އޭނާއަށް ކުރެވިފައި ނުވާކަން ޤައިމެވެ.ހެއްދެވި ފަރާތްމަތިން ހަނދުމަވެ، ކުރެވުނު ފާފައިގެ ހަނދާންވެސް އައު ވަމުންއެދަނީ އިއްޔެ މެންދުރު ހިނގައި ދިޔަ ކަންތައްތަކެއް ފަދައިންނެވެ.ރަފާ ވުޟޫ ކޮށްލައިގެން އައިސް ނަމާދަށް އެރުމަށް އަވަސްވެގަތީ މިހާރުވެސް ވަގުތު ފާއިތުވެފައިވާލެއް ބޮޑު ކަމުން އިތުރަށް ހަމަ އެންމެ މިނެޓެއްވެސް ނަގައިލަން ބޭނުން ނުވާތީއެވެ.މިއަދަކީ ބަރަކާތްތެރި ރަމަޟާން މަހުގެ ދެވަނަ ދުވަހެވެ.ތަޢުބާ ވުމަށް މިއަށްވުރެ ވަކިން ރަނގަޅު މައްސަރެއް ވާނެ ހެއްޔެވެ؟އޭނާ ނަމާދުގައި އެތައް އިރަކު ސަޖިދައިގައި އޮވެ ރޮމުންދިޔައީ އޭނާގެ ވެރި ރައްބުގެ ކިބައިން އޭނާގެ ފާފަތަކަށް ޢަފޫ ދެއްވުން އެދޭ ޙާލުގައެވެ.އެކަލާނގެއީ އިންސާނާ ދުލުން ބޭރުކުރުމަކާއިނުލާ އިންސާނާގެ ހިތަށް އަރައި ފައިބަމުންދާ ޒައްރެއްގެ މިންވަރު ވިޔަސް ފުރިހަމައަށް ދެނެ ވޮޑިގެންވާ ގަދަ ކީރިތި ވަންތަ މާތް އިލާހެވެ.

ނަމާދުން އަވަދި ވެގެންވެސް މުޞައްލަ މަތީގައި ހިތާމައިގެ ކޮޅެއްވެސް ނެތް ރަފާ ދެއަތް އުފުލާ ތަކުރާރުކޮށް ﷲގެ ޙަޟްރަތުގައި ދުޢާ ކުރަމުން ދިޔައީ އޭނާގެ ފާފަ ފުއްސަވައިދީ އޭނާއަށް ހިދާޔަތް ދެއްވައި ފުރިހަމަ މުއުމިނަކު ކަމުގައިވާ ޙާލު އޭނާގެ ފުރާނަ ހިތްޕެވުމަށެވެ.ހިތާމައިން އޭނާގެ ދުލުން ބޭރުކުރެވެމުން ދިޔަ ބަސްތަކަށްވުރެ، އެދެލޮލުން ހިފެހެއްޓުމެއްނެތި ފައިބަމުން ދިޔަ ކަރުނަތަކުގެ މާނަ މާ ފުންވެފައި އަސަރު ގަދައެވެ.

ކުއްލިއަކަށް އެޕާޓްމެންޓް ދޮރުގައި ބެލް ޖެހި އަޑަށް މުޞައްލަ އޮޅައިލުމަށްފަހު ކަރުނަ ފޮހެލަމުން ގޮސް ދޮރު ހުޅުވާލިއެވެ.ރައުލްގެ އުރުގައި އިން ސޯނާ ރަފާގެ އަތުގެ ތެރެއަށް ވެއްޓިގަތެވެ.ރަފާގެ ރަތްވެފައިވާ ނޭފަތާއި، ދެލޯ ފެނިފައި އޭނާގެ މިލާފައިވާ މޫނު ފިރިމީހާއަކަށް ސިއްރެއް ނުވިއެވެ.ރައުލްއަށް ލިބުނު ހާސްކަމުގައި ރަފާގެ ނިތްކުރީގައި އަތްޖައްސާލަމުން ބަލީތޯ ސުވާލު ކޮށްލެވުނެވެ.ފިރިމީހާގެ މޫނުމަތިން ފައުޅުވަމުން ދިޔަ ކަންބޮޑުވުމާއި،އޯގާތެރިކަން ފެނިފައި ރަފާގެ ދެލޯ ފެންކަޅިވެގެން ދިޔައީ އޭނާގެ ކުށްވެރި ހިތަށް ކުރެވުނު އަސަރެއްގެ ބޮޑުކަމުންނެވެ.އެހާ ލޯބިވާ އަޅާލާނެ އޯގާތެރި ބައިވެރިޔަކު ލިބުމުންވެސް އޭނާއަށްވަނީ އެލޯބީގެ އަގު ވަޒަންކުރަން ނޭނގިފައެވެ.ވަފާތެރިކަމުގެ ބަދަލުގައި ބޭވަފާތެރި ވެވިފައެވެ.އެ އަޅާލުމާއި،އޯގާތެރިކަމުގެ ކުޑަ މިންވަރެއްވެސް އޭނާއަށް ޙައްޤުވެގެން ނުވެއެވެ.ބަލަބަލައި ހުއްޓައި ރަފާގެ ދެލޮލަށް ޖަމާވަމުންދިޔަ ކަރުނަތައް ފައިބައިގަތީ އޭނާގެ އެއްވެސް އިޚްތިޔާރަކާއި ނުލައެވެ.ރައުލްގެ ހާސްކަން ވީ އިތުރެވެ.ކުޑަކުޑަ ސޯނާ ރަފާގެ އަތުން އުރާލުމަށްފަހު ގެންގޮސް އެނދުމަތީގައި ބޭންދިއެވެ.އަދި ރަފާގެ ކޮނޑުގައި ދެއަތުން ހިފައިގެން ގެންގޮސް ކައިރީގައި ހުރި ސޯފާގައި ބޭންދުމަށްފަހު ކަރުނަތައް ފޮހެލައިދެމުން ވީ ކީއްތޯ ވަރަށް ލޯބިން ސުވާލު ކޮށްލިއެވެ.ރައުލްއަށް އޭނާގެ ގޮތްކުޑަކަން ހަމަ ކުޑަކޮށްވެސް އެނގޭނަމަވެސް އެހާ ލޯބިން އުޅޭނެ ބާވައެވެ.ނޫނެކެވެ.އެ ލޯބި ލިބުން އެއްފަރާތުގައި އޮއްވައި، އެފަދަ އަންހެނަކު ރައުލްގެ އަންބެއްގެ މަޤާމުގައިވެސް ނުބަހައްޓާނެކަން ގައިމެވެ.ފިރިމީހާއަށް އެފަދަ ދަރަޖައަކަށް އޮޅުވާލައިގެން އުޅެވުނަތީ ފިރިމީހާގެ ކިބައިން މަޢާފަށް އެދެން އޭނާ ކިތަންމެހާވެސް ބޭނުމެވެ.ނަމަވެސް އޭނާގެ ބަދު ނަސީބުކަން ނިކަން ދެކެބަލާށެވެ.އެކަން ސިއްރުކޮށްގެން އޭނާ ނެތް ހިތްވަރުން ކެތްކުރަމުން އެދަނީ ކައިވެނީގެ އެ މަތިވެރި ގުޅުމުގެ ގޮށް މޮހިގެންދާން ނޭދެވޭތީއެވެ.އޭނާއަށް ކުރެވިފައިވާ ކުށް އިޙްސާސްވެ އެކަމަށް ކަރުނަ ނުއަޅާ އެއްދުވަސް ވެސް ނުދެއެވެ.ކުޑަކޮށް ބޮލުގައި ރިއްސާ ހުންވައްތަރުވެފައި ހުރި ކަމަށްބުނެ ދޮގުހަދަން އޭނާއަށް މަޖުބޫރުވީ ފިރިމީހާ އިތުރު ހާސްކަމެއްގެ ތެރެއަށް ދޫކޮށްލަން އޭނާގެ ހިތް ނުރުހުނީތީއެވެ.

ރޭގަނޑުގެ ވަގުތެވެ.ރައުލް ތަރާވީސްކޮށްގެން ގެއަށް އައި އިރު ގޭތެރެއިން އިވެމުންދިޔަ ޤުރުޢާން ކިޔެވުމުގެ އަޑުން އެހިތަށް ހަމަޖެހުން ލިބިގެންދިޔަ ކަމުގައިވިޔަސް އޭނާ ހުރީ ހައިރާންވެ އަންތަރީސްވެސް ވެފައެވެ.ވާނީވެސް އެހެންތާއެވެ.ކައިވެންޏަށް މިވީހާ ދުވަހުވެސް އޭނާ ރަފާ ޤުރުޢާން ކިޔަވާ އަޑު އަހާފައެއް ނުވެއެވެ.ނަމަވެސް ކިޔަވަމުން ދިޔަލެއް ފަރިތަކަމާއި ކިޔެވުމުގެ ރާގާއި އަކުރުތަކުގެ މަޚްރަޖުތައް އަދާކުރަމުން ދިޔަލެއް ފުރިހަމަ ކަމުން މައިންބަފައިން އެމީހުންގެ ވާޖިބު އަދާކޮށްފައި ވާކަން އެނގި ހާމަވެއެވެ.

އެނދުމަތީގައި ކިޔަވަން އިން ރަފާގެ ކައިރީގައި އޮތް ސޯނާއަށް ދޮރުން ބޯދިއްކޮށްލި ރައުލް ފެނުމުން މަޑުމަޑުން އެނދުން ފާބައިގެން ގޮސް ބައްޕަގެ އަތު ތެރެއަށް ވަނެވެ.ދަރިފުޅުގެ ދެލޮލުގައި ނިދީގެ އަސަރު ހުރި ކަމުގައި ވިޔަސް އޭނާ ދަރިފުޅު ގޮވައިގެން އިހަށް ސިޓިންގ ރޫމަށް ނިކުތީ ރަފާ ކިޔަވައި ނިމެންދެންނެވެ.އަނބިމީހާއަށް އައިސްފައިހުރި ހެޔޮ ބަދަލުން އޭނާއަށް އެވަގުތު މާތް ﷲއަށް ޙަމްދު ކޮށްލެވުނެވެ.

ކިޔަވައި ނިމިގެން ކޮޓަރިން ނިކުތް ރަފާ އަވަސްވެގަތީ ފިރިމީހާއަށް ކާން މޭޒުމަތި ތައްޔާރު ކުރުމަށެވެ.އޭރު ބައްޕައާއި މަޖާކޮށްކޮށް ސޯނާގެ ލޮލުގައިވާ ނިދިވެސް ވަނީ ފިލައިފައެވެ.ރަފާވެސް ފިރިމީހާއާއި އެކު އަރައި ކެއުމަށް އިންސާފުކުރިއެވެ.ނަމާދު ކޮށްލައިގެން ޤުރުޢާން ކިޔަވާލުމުގެ ސަބަބުން އޭނާގެ ހިތަށްވެސް ވަނީ ކޮންމެވެސް ވަރެއްގެ ލުޔެއް ލިބިފައެވެ.ކައި ނިމިގެން ރައުލް ދިޔައީ ދަރިފުޅު ގޮވައިގެން ކޮޓަރިއަށެވެ.ރަފާވެސް މޭޒުމަތީގައި ހުރިތަށިތައް ނެގުމަށްފަހު ކޮޓަރިއަށްދާން ހިނގައިގަތްތަނާ ދޮންބެދައްތަ ގުޅައިގެން ގޮސް ސޯފާގައި އިށީނދެލިއެވެ.އެހާ ދުވަސްކޮށްފައި ގުޅާލުމުން ތަންކޮޅެއް ގިނައިރު އަނގަ ތަޅައިލަން ފޯނުގައި މަޑުކޮށްލުމަށްފަހު ގޮސް ކޮޓަރި ދޮރު ހުޅުވާލިއިރު ފެނުނީ ދެބަފައިން ނިދާފައި ތިއްބައެވެ.ރަފާ އެތެރެއަށް ވަދެގެން ގޮސް ރިމޯޓް ނަގައި އޭސީގެ ފިނި މަޑުކޮށްލުމަށްފަހު ދެމީހުންގެ ގައިމަތީގައި ރަޖާ އަޅައިލަ ދިނެވެ.އެއަށްފަހު އޭނާވެސް ފާޚާނައަށްވަދެ ނިދާ ހެދުން ލައިގެން ނިކުމެ ދަރިފުޅުގެ ބިއްދަށަށް އަރައި އޮށޯތެވެ.

ނުނިދިގެން ދެފަރާތަށް ފުރޮޅި ފުރޮޅި އޮތް ރަފާގެ ހިތަށް އެ ހިތި މާޒީ އަނެއްކާވެސް ކުލަވަމުން ދިޔައެވެ.އެއީވެސް ހަމަ މިފަދަ ރެއެކެވެ.ފިރިމީހާ އޮފީސް ދަތުރެއްގައި އަތޮޅު ތެރެއަށް ގޮސްފައި ވުމުން ނިދި ނައިސްގެން ފޯނާއި ކުޅެލަ ކުޅެެލައި އޮތް ރަފާގެ ފޯނަށް ނޭނގޭ ނަމްބަރަކުން ގުޅިއެވެ.އެކޮޅުން ގުޅި ޒުވާނާ ގުޅުނީ އޮޅިގެން ކަމަށް ބުނެ މަޢާފަށް އެދުމުން، ރަފާވެސް އެއީ އެވަރުގެ ކަމެއް ނޫންކަމަށް ބުނެލި ރާގުންވެސް، ނޭނގި ނަމަވެސް އޭނާއަށް ދަޢުވަތު ދެވިގެން ދިޔައީ ނުޙައްޤު ގުޅުމަކަށެވެ.އެކޮޅުން ވާހަކަ ދެއްކި ޒުވާނާގެ އަޑުވެސް އެހާ ރީތި ވިއްޔާއެވެ.ޝައިޠާނާގެ ވަސްވާހަށް އިޖާބަ ދެމުން ދިޔަ ރަފާއަށް ކުށެއް ނެތް ފިރިމީޙާގެ މަތިން ކުޑަކޮށްވެސް ވިސްނާ ނުލެވުނެވެ.އެޒުވާނާގެ އަޑުގައި އެވީ ފިރިހެން ވަންތަކަމަކުން އޭނާގެ ހިތް ކިލަނބުވެގެން ދާކަށް ފަޅި ސިކުންތެއްވެސް ނުނެގިއެވެ.އެ ނަމްބަރު ފޯނުގައި ސޭވް ކޮށްލުމަށްފަހު ވައިބާއަށް ވަދެ ބަލައިލީ އެޒުވާނާގެ ފޮޓޯއެއް ކޮންޓެކްޓް ޕިކްޗަރ އަށް ލާފައި އިނދެދާނެ ކަމަށެވެ.ކަންތައްވީވެސް ހަމަ އޭނާ އުއްމީދުކުރި ފަދައިންނެވެ.ދެ ޖީބަށް އަތް ޖަހައިލައިގެން ހުރި އެ ރީތި ޒުވާނާ ފެނުމުން އޭނާާއާއި ގުޅުން ބަދަހި ކުރުމަށް ހިތުގެ ކަނަކުން ގޮވާލިއެވެ.ހިތުގެ އެދުމަށް އިޖާބަދެމުން އެ ޒުވާނާއަށް ހައި ޖަހާލީ ކޮންޓެކްޓް ޕިކްޗަރ އަށް އޭނާގެ ރީތި ފޮޓޯއެއް ލުމަށް ފަހުގައެވެ.ޝައިޠާނާގެ ބަހަށް ހެއްލެނިވެވި އޭނާ ނެގި ފުރަތަމަ ފިޔަވަޅުވެސް ކާމިޔާބު ވީއެވެ.އޭނާގެ ފޮޓޯ ފެނި އެ ޒުވާނާވެސް އިސާހިތަކު އޭނާގެ ރީތިކަމުގެ ޖާދޫގައި ޖެހުނެވެ.ފިރިމީހާއަށް ސިއްރުން ދެމީހުންގެ އެ ގުޅުން ހަރުފަތަކަށްފަހު ހަރުފަތެއް ގިރާކުރަމުން ދިޔައެވެ.ނަމަވެސް އެޒުވާނާއަކީވެސް މީހެއްގެ ފިރިއެއް ކަމުން ރަފާ ފޮނުވި ލޯބީގެ މެސެޖު އޭނާގެ އަނބިމީހާއަށް ފެނުމުން ރަފާއަށް ގުޅާފައި އޭނާގެ ދެކުދިންނާއި،ބަނޑުގައިވާ ދަރިފުޅުގެ ޙައްޤުގައި އޭނާގެ ފިރިމީހާގެ ޙަޔާތުން ދުރަށް ދިޔުމަށްއެދި އާދޭސްކޮށް ރުއި ވަރުން އެގުޅުން ކަނޑާލަން އޭނާއަށް މަޖުބޫރުވީއެވެ. އެދުވަހުވެސް ކުރެވެމުން އެދިޔައީ ކިހާބޮޑު ފާފައެއްކަން އޭނާއަށް ކުޑަކޮށްވެސް އިޙްސާސް ނުވެއެވެ.ނަމަވެސް ކިތަންމެ ލަހުންވިޔަސް މިހާރު އޭނާ އެވަނީ އެކަމުގެ ނުބައިކަން އިހްސާސްވެ ތަޢުބާ ވެފައެވެ.

ްކުރެވުނު ކުށަށް ކަރުނައަޅާ ޙާލުގައި ވަނިކޮށް ފޯނު އެލާމް ވާން ފެށުމުން ގަޑި ބަލައިލިއިރު ތިނެއް ޖެހީއެވެ.އަވަހަށް ތެދުވެގެންގޮސް ފާޚާނައަށްވަދެ ވުޟޫ ކޮށްލައިގެން ނިކުމެ ނަމާދަަށް އެރިއެވެ.ރަމަޟާން މަސް ފެށުނު ފަހުން އެއީ ކޮންމެ ރެެއެއްގެވެސް އާދައެވެ.މިހާރު އެއީ ބޭކާރު ގޮތުގައި ޢުމުރު ނަގާލަމުން ދިޔަ ރަފާއެއް ނޫނެވެ.ދިރިއުޅުމުގެ މައިދާނުގައި އޭނާއަށް އަރައިގަނެވުނު ބޮޑު ފާފައިގެ ސަބަބުން އޭނާވަނީ އެއިގެން ޢިބްރަތެއް ޙާސިލްކޮށް އެފަދަ ކަމެއް ތަކުރާރު ނުކުރުމަށް ހިތުގެ އަޑިން ވަޢުދުވެފައެވެ.ކޮންމެ ނަމާދެއްގެ ފަހުގައި ކެތްތެރިކަމާއިއެކު ﷲގެ ޙަޟްރަތުގައި ދަންނަވަމުން އެދަނީ އޭނާގެ ތަޢުބާ ޤަބޫލު ކޮށްދެއްވުން އެދިއެވެ.

ނަމާދުކޮށް އަވަދިވެގެން ސިޓިން ރޫމަށް ނިކުމެ ޤުރުޢާން ކިޔެވުމުގައި ބައިގަޑިއެއްހާއިރު ހޭދަ ކުރުމަށްފަހު ޚަތިމް ބާއްވާލުމަށްފަހު، ކާކޮޓަރިއަށް ވަދެ ހާރަށް ތައްޔާރު ކޮށްފައިވާ ހަނާކުރިމަސްކޮޅު ހޫނު ކޮށްލާފައި، ކާން ތައްޔާރު ކޮށްލުމަށްފަހު، ގޮސް ރައުލްއަށް ގޮވައިގެން އައިސް ފަތިސް ނަމާދު ބަންގިއަށް ގޮވުމުގެ ކުރިން ދެމަފިރިން އެކުގައި ހާރުކައި ނިންމާލިއެވެ.

އެގޮތުގައި ބަރަކާތްތެރި ރަމަޟާންމަހުގެ ދުވަސްތައް ހަލުވި ދުވެލީގައި ފާއިތުވަމުން ދިޔައެވެ.އެގޮތުން މިރެއަކީ ރަމަޟާން މަހުގެ ހަތާވީސް ވިލޭރޭއެވެ.އެހެން ރޭ ރެއެކޭވެސް އެއްފަދައިން މުޞައްލަ މަތީގައި އިނދެ ރޮއިރޮއި ގިސްލެވެމުންދިޔަ ޙާލު ރަފާ ތަކުރާރުކޮށް ދުޢާ ކުރަމުންދިޔައީ އޭނާގެ ފިރިމީހާއަށް އޮޅުވާލެވިފައިވާތީ އޭނާގެ ތަޢުބާ ޤަބޫލު ކުރައްވާ އޭނާގެ ލޯބިވާ ފިރިމީހާގެ ހިތް ޙަލާލު ލިބޭނެ ގޮތެއް ހުސް ޠާހިރުވަންތަ މާތް ރަސްކަލާނގެ އިރާދަފުޅުން މިންވަރު ކުރެއްވުން އެދިއެވެ.އެ ދުޢާގައި އެވާ އަސަރަކުން އެނދުގައި ލޯމަރާލައިގެން ނަމަވެސް ހޭލާ އޮތް ރައުލްގެ ލޮލުގެ އެސްފިޔަތަކާއި ހަނގުރާމަކޮށް ގަދަކަން ހޯދައިގެން އެސްފިޔަތަކުގެ ތެރެއިން ފާއްދާލި ކަރުނަ ތިކީގައި އެތައް އަސަރެއް އެކުލެވިގެންވިއެވެ.ދެލޯ ހުޅުވާލާފައި އަނބިމީހާއަށް ބަލައިލި ރައުލްގެ ހިތްވަނީ ކުދިކުދިވެފައެވެ.ލޯބިވާ އަނބިމީހާއަށް އަރައިގަނެވިފައި އެވާ ފާފައަށް މަޢާފް ދިނުމަކީ އާދައިގެެ އިންސާނަކަށްވެ ހުރެ ކުރަން މާ ފަސޭހަ ކަމެއް ނޫނެވެ.ނަމަވެސް މޯޅިއަކަށް ދެމިލި ކުޑަކުޑަ ލޯބިލޯބި ސޯނާ ފެނުމުން އެދަރިފުޅުގެ ލޯބިން އޭނާގެ ހިތް މަޑު ފުށްކޮޅަކަށް ވެގެން ދިޔައެވެ.އޭނާގެ ލޮލުގެ ނޫރު ފަދަ ދަރިފުޅުގެ ޙައްޤުގައި ނިހާޔަތަށް ލޯބިވާ އަނބިމީހާއަށް ހިތުގެ ފުންމިނުން މަޢާފްކޮށްދިނެވެ.އަދި ރޮއިރޮއި ވަރުބަލި ވެފައިވާ ޙާލު ދުޢާކުރުމަށް ދެއަތް މައްޗަށް ނަގައިގެން އިން ރަފާގެ ގާތަށް ގޮސް ފުރަގަހުން އޭނާގެ ކޮނޑުގައި އަތް އަޅައިލިއެވެ.ރަފާއަށް ސިހިފައި ފަހަތް ބަލައިލެވުނު ކަމުގައި ވިޔަސް ޤިބުލައަށް އެނބުރި އޭނާގެ ދުޢާ ފުރިހަމަ ކުރުމަށްފަހު ބިރުންގޮސް ތުރުތުރުއަޅާ ޙާލު ފިރިމީހާއާއި ކުރިމަތި ލިއެވެ.ނަމަވެސް ހިތަށް ކުރަމުން ދިޔަ ފުން އަސަރާއިއެކުގައިވެސް ރައުލްގެ ދުލުން ރަފާައަށް ދިން މަޢާފުން އޭނާގެ ތަޢުބާ ފުރިހަމަ ވެފައިވާ ފަދައެވެ.މާތް ރަސްކަލާނގެ ކުޅަދުންވަންތަކަން ނިކަން ދެކިބަލާށެވެ.ކެތްތެރިކަމާއި އެކު އެކަލާނގެ ހަޟްރަތުގައި ކޮންމެ ނަމާދެއްގެ ފަހުގައި އޭނާ ކުރަމުން ދިޔަ ދުޢާ އިޖާބަ ކުރެއްވީއެވެ.ރަފާއަށް އެވަގުތު ލިބުނު އުފަލެއްގެ ބޮޑުކަމުން ޝުކުރުގެ ސަޖިދައެއް ޖެހުނެވެ.

**ނިމުނީ**