ކަޅު ޞަފްޙާ

އާޒިމް އަށް ހޭލެވުނީ ފުދޭވަރަކަށް ލަސްވީ ފަހުންނެވެ. ހަމަ ހޭލެވުމާއެކު ރޭގެ ހާދިސާ މަތިން ހަނދާން ވިއެވެ.  އެއާއެކު ތެދުވެ އެނދުމަތި ބަލާލިއެވެ. ނަމަވެސް އީނާ އެއް ނެތެވެ. ކުޑަކޮށް ހާސްވި ނަމަވެސް ފަހުން ގުޅާލަން ނިންމާފައި ގޮސް ފެންވަރަން ވަނެވެ. ފެންވަރައިން ނިކުމެ ރީތިވެލައިން ބޭރަށް ނިކުމެނިކުމެ ހުރެ ފޯނުމަތިން ހަނދާން ވެގެން “ސައިޑްކަބަޑް”އާ ދިމައަށް ބަލާލިއެވެ. އެއާއެކު ފޯނަށް ހުއްޓެންވީ ނަޒަރު ގޮސް ހުއްޓުނީ ފޯނު ކައިރީ އޮތް ކުޑަ ގަނޑުކޮޅަކަށެވެ. ހިތަށް ވެރިވި ނޭނގޭ ބިރުވެރި ކަމެއްގެ ސަބަބުން ބާރު ހިނގުމެއްގައި ގޮސް އެ ގަނޑުކޮޅު ނަގާ ކިޔާލިއެވެ.

އާޒިމްގެ ފައިދަށުން ބިންގަނޑު ދެމިގަތް ފަދައެވެ. ދެލޯ ތަރަތަރަޖަހާ ހިތް ހުއްޓުނުހެން ހީވިއެވެ. އިރުކޮޅެއް ވަންދެން ގަނޑު އަރާފައި ހުރި އާޒިމް ގެ ދިރިުޅުން އެވަނީ ބަރުބާދުވެފައެވެ.މިހާދުވަހު އެކުގައި އުޅުނުއިރުވެސް އީނާގެ ފަރާތުން ދަސްނުވިތަންކޮޅަކީ މިއީއެވެ.އާޒިމްގެ ދިރިއުޅުމަށް މިފަދަ ވިހަގަދަ ހަރުފައެއް އައިސްދާނެކަމަކަށް އޭނަ ހީވެސް ނުކުރެއެވެ. އާޒިމްގެ ހިތް މިހާރު ވަނީ ފުނޑުފުނޑު ވެފައެވެ.

އީނާއަށް ގުޅަންފެށި އާޒިމްގެ ހިތަށް މާޔޫސްކަން ވެރިވީ އީނާގެ ފޯނު ނިއްވާލާފައި އޮތުމުންނެވެ. އާޒިމްގެ ހިތް ނިކަމެތިވީ މީހަކު ހީވެސް ނުކުރާނެހާ ބޮޑަށެވެ. އެތަށް އިރެއް ވަންދެން އީނާއަށް ގުޅަން އިނުމަށްފަހު އާޒިމް ބޭރަށް ނިކުމެ މިސްރާބުޖެހީ ރަސްފަންނާ ދިމާލަށެވެ. ރަސްފަންނަކީ އާޒިމް ހާސްވާ ގިނަ ފަހަރު ދާތަނެވެ. އާޒިމްގެ މިސްރާބަށް ބަދަލު ގެންނަން ޖެހުނީ އޭނަ މަންމަ ގުޅުމުންނެވެ. ވަގުތުން ކައިރީ ހުރި ހޮޓަލަކަށް ވަދެ ރިންގު ވަމުން ދިޔަ ފޯނަށް ޖަވާބު ދިނެވެ.

މަންމައާ ވާހަކަ ދައްކަމުން ދިޔަ އިރުވެސް އާޒިމްގެ ހިޔާލުގައި އެނބުރެނީ ހަމައެކެނިން އީނާއެވެ. އީނާގެ ފަރާތުން ލިބުނު ލޮތްބެވެ. އެވަރުގެ ބޮޑު ބޭވަފާތެރިކަމެއް އީނާގެ ފަރާތުން ލިބިދާނެކަމަކަށް އޭނަ ހުވަފެނުގައިވެސް ނުދެކެއެވެ. އާޒިމްގެ މަންމަ ވެސް އާޒިމްގެ އަޑުހުރިގޮތުން އެތަކެއް ސުވާލުތަކެއް ކުރިއެވެ. ނަމަވެސް މަންމައަށްވެސް އާޒިމް އޮޅުވާލީ، އާޒިމްގެ ބަނަވެފައިވާ ހަޔާތަށް މަންމައަށްވެސް އަލިމަގެއް ކޮށައިނުދެވޭނެކަން އެނގޭތީއެވެ. ފުދޭވަރަކަށް ގިނައިރުވަންދެން ވާހަކަ ދެއްކުމަށްފަހު މަންމައާ ވަކިވި ވަކިވުން އާޒިމް ގެންދިޔައީ ހިޔާލީ ދުނިޔެއަކަށެވެ.

އާޒިމްއަށް ވިސްނެނީ ކުރިން އީނާއާއެކު އުޅުނުއުފާވެރި ދުވަސްތަކާމެދުގައެވެ. 4 އަހަރަށް އީނާ ކިޔަވަން ރާއްޖެއިން ބޭރަށް ގޮސް އައީ އިއްޔެއެވެ. އީނާގެ އުޅުމަށް އެއްވެސް ބަދަލެއް އައިކަމަށް އާޒިމްއަކަށް ފާހަގައެއް ނުކުރެވެއެވެ. މާލެ އައިގޮތަށް ވާހަކައެއް ބުނަންވެފައި އޮތް ވާހަކަ ބުންޏެވެ. އެ ގަނޑުކޮޅުގައި އެވަނީ އެވާހަކަ ކަންނޭނގެއެވެ. އީނާ ރާއްޖެއިން ބޭރަށް ދިޔައީ ޑޮކްޓަރުކަން ކިޔަވާށެވެ. ހާއްސަވީ ކޮން ދާއިރާއަކުން ކަމެއް އަދި ނޭނގެއެވެ. އީނާ ފަދަ މީހަކަށް އެފަދަ ޒިންމާދާރު ވަޒީފާ އެއް އަދާކުރެވޭނެ ކަމާމެދު  އާޒިމް އަށް ޝައްކެވެ. އީނާ އެވަނީ އާޒިމް  ފުންވަޅުގަނޑަކަށް ވައްޓާލާފައެވެ. ތަޤުދީރުގައި ލިޔެވިފައިވާ ގޮތެއް އެކަކަށްވެސް ބަދަލެއް ނުކުރެވޭނެއެވެ. އީނާގެ ގަނޑުކޮޅުގައިވަނީ “އާޒިމް! އަހަރެންނަށް މަޢާފް ކުރޭ! އަހަރެންނަކީ އެއިޑްސްބަލި…” މިހިސާބަށެވެ.

އާޒިމް އަށް ހަމަ ބިމަށް އާދެވުނީ އަނިއްކާވެސް ފޯނުރިންގުވާ އަޑަށެވެ. ފޯނަށް ބަލާލުމާއެކު އެންމެ ސިކުންތެއްވެސް ބޭކާރުކޮށް ނުލާ ޖަވާބުދިނެވެ. އަދި ވާހަކަ ދައްކަން ފެށިއެވެ. “އީން! ކީއްވެ؟ ކީއްވެ އަހަރެންނަށް އޮޅުވާލީ؟ އަހަރެންގެ ކުށް ބުނެދީފަ ދިޔަނަމަވެސް އޯކޭ..” ފުން ނޭވާއެއް ދޫކޮއްލުމަށްފަހު އީނާ ވާހަކަ ދަށްކަން ފެށިއެވެ. ” ޒިމް! އަސްލު ވަރަށް ބޮޑަށް މަޢާފަށް އެދެން ޒިމް ތަޅުވާލެވުނީމަ. އަހަރެންގެ އެފަދަ ބައްޔެއް ނުހުރޭ. ޑޮކްޓަރސް ގެ ތެރެއިން އަހަރެން ހާއްސަވީ އެދާއިރާއިން. ދެން ހިތަށްއެރީ ކުޑަ ސަމާސާ އެއް ކޮށްލަން. ސޮރީ ބޭބީ..!” އީނާގެ ވާހަކައިން އާޒިމްގެ ހާސްވެފައިވާ މޫނަށް ހިނިތުންވުން ވެރިވިއެވެ. ފަޒާއަށް ދޫކޮށްލި ފުންނެވާގެ ސަބަބުން ހީވީ  ދުވަސް ތަކަކަށްފަހު ފެންގަނޑެއްގެ ތެރޭގައި އޮތް މީހަކުތެދުވެ ނޭވާއެއް ދޫކޮއްލިހެންނެވެ. އާޒިމްގެ ދިރިއުޅުން އިހުގެ އުފާވެރި ދިރިުޅުމަށް ވާސިލްވީ އެދުވަހުގެ ކަޅުޞަފްޙާ އާއެކުއެވެ.

ނިމުނީ

( މިވާހަކަ އަކީ އަޅުގަނޑުގެ ރަޙުމަތްތެރިއަކަށް ދިމާވި ކަމެކެވެ. މިވާހަކައިގައި ބޭނުންކޮށްފައި އެވަނީ އަސްލު ތަންތަނާ މީހުންނަށް ކިޔާ ނަންނަމެއް ނޫނެވެ.)