ހާޞިލް ނުވި ލޯބި

*7 އަހަރު ކުރި*

އަހަރަކީ 2010ވަނަ އަހަރުގެ ޖެނުއަރީ މަހުގެ 8ވަނަ ދުވަހެވެ. ސްކޫލް ބޮޑު ބަންދު ނިމެން ގާތްވެފައިވާތީ، އާއަހަރަށް ސްކޫލަށް ބޭނުންވާ އެއްޗެހި ގަންނަން މަސްއޫލުވެ މަގުމަތީގައި އުޅުނު މީހުން މަދެއް ނޫނެވެ. އޭގެ ތެރެއިން އެކަކަކީ ހައިފާއެވެ.

ހައިފާއަކީ އިސްކޮޅުން ދިގު ނޫނަސް ބައްޓަން ރީތި، ހަމުގެ ކުލަ އަލި، ބޮޑު ކަޅު ދެލޮލެއް ލިިބިފައިވާ ދިގު އެސްފިޔަތަކެއްގެ ވެރިއެކެވެ. ކޮނޑާ ހަމަޔަށް އަންނަ އެ ރާޅުބާނީ އިސްތަށިގަނޑު ފަހަތަށް އައްސާލެވިފައިވާއިރު، ލައިގެން ހުރީ ނޫކުލައިގެ ޓިޝާޓަކާއި ކަޅު ކުލައިގެ ޖިންސްއެކެވެ. އުމުރުން އެންމެ ނުވައަހަރު ކަމުގަވިޔަސް ހައިފާއަކީ ވިސްނުންތޫނު ކުއްޖެކެވެ.

މަންމައާއިއެކު ސްކޫލަށް ބެނުންވާ އެއްޗިހިގަންނަން ނިކުމެ އުޅޭތާ މިހާރު ގަޑިއެއްހާއިރުވެ ބޮޑު ވެއްޖެއެވެ. އަދިވެސް ހައިފާއަށް ކަމުދާ ދަބަހެއް ނުފެނުނެވެ. “މިހާރު އެއޮތް ނުވަގަޑި ބައިވަނީ…ތިދެން ރީތި ދަބަހެއް ނަގާބަލަ ދަރިފުޅާ…ދިހައެއް ޖަހާއިރަށް ފިހާރަތަށް ބަންދު ކުރާނެޔޭ” ހައިފާގެ މަންމަ ބަދޫރާ ބުނެލިއެވެ. “މަންމާ އަޅުގަނޑަށް ރީތި ދަބަހެއް ނެތޭ” ހައިފާ ބުނިއެވެ.

މިއީ ކޮންމެ އަހަރަކުވެސް ކުރިމަތި ލާންޖެހޭ ކަމެކެވެ. ހައިފާއަށް ރީތި ދަބަހެއް ފެންނާނީ މަޖީދީ މަގުގެ އެއްކޮޅުން އަނެއް ކޮޅަށް ހިނގީމައެވެ. އެންމެ ފަހުން ހައިފާ އެތާ ހުރި ރަތްކުލައިގެ އެޑިޑާސް ދަބަހެއް ނެގީ އޭގެ ނޫކުލަ ނަގައިފިއްޔާ އެހެން ކުދިން މަލާނާތް ކުރާނެތީއެވެ. އަދި މި ދަބަސް އެންމެ ރަނގުޅު ކަމަށް ބުންޏެވެ. ދަބަހަށް ލާރި ދެއްކުމަށްފަހު ދެމައިންނަށް އެރޭ ގެޔަށް ދެވުނީ ދިހައެއް ޖަހަނިކޮށެވެ. ވެފައި ހުރި ވަރުބަލިން ހައިފާ ބޭޭނުންވީ އަވަހަށް އޮށޯންނާށެވެ. ނަމަވެސް ފާޚާނައަށްވަދެ ގައި ދޮވެލީ އަރައިފައިވާ ހޫނެއްގެ ބޮޑުކަމުން ނުނިދޭނެކަން ޔަޤީންވީތިއެވެ. އެރޭ ހައިފާއަށް ނިދުން އިރު ގަޑިން ދިހަގަޑި ބައިވެ ބޮޑުވެއްޖެއެވެ.

* 6 ދުވަސްފަސް *

ދުވަހަކީ ދިރާސީ އާއަހަރު ފެށޭ ދުވަހެވެ. ހައިފާ ހެނދުނު އަށެއް ޖެހިއިރު ތެދުވިގޮތަށް ފެންވަރަލައިގެން ތައްޔާރުވެލައިގެން ނުވައެއް ޖަހާއިރަށް ދިޔައީ ޓިއުޝަނަށެވެ. ޓިއުޝަން ނިންމާލާފަ އައިސް ސައިބޮއިގެން ފެންވަރައިލައިގެން ސްކޫލަށް ދާން ތައްޔާރުވިޔެވެ. މަންމައެކީ ސްކޫލަށް ދިޔައީ ބާރަގަޑި ފަންސާހަށެވެ.

ހައިފާއަށް ކުލާހަށް ދެވުންއިރު ގަޑިޖެހެން އަދި ފަސް މިނެޓު އޮތެވެ. ކުލާސް ޓީޗަރާއި ކުދިން ބައްދަލުވާނީ ހޯލުގައި އޮންނަ އެސެމްބްލީ އިންކަން ވަނީ ހުރިހާ ކުދިންނަށްވެސް އެންގިފައެވެ. ހައިފާ ގޮސް ކުލާހުގެ އެންމެ ފަހަތުން ކަނެއްގައި ހުރި ސީޓުގައި އިށީންދެ ހަމަޖެހިލިޔެވެ. ހައިފާއިން ސީޓުން މުޅި ކުލާސް ފެނުމުގެ އިތުރުން ކުޑަދޮރުން ބޭރުވެސް ފެނެއެވެ. މި ސީޓުގައި އޭނާއަށް މުޅި އަހަރު އިނދެވޭނެ ނަމައޭ އެވަގުތު ހައިފާގެ ހިތަށްއެރީ އެއީ އޭނާއަށް އެތާ އިނުމުން ހިތަށް ހިތްހަމަޖެހުން ލިބޭނެކަން އިނގޭތީއެވެ.

އިރުކޮޅަކު ބޭރު ބަލަން އިނދުމަށްފަހު ހައިފާ ކުލާސް ތެރެއަށް ނަޒަރު ހިންގާލިއެވެ. އަދި އެވަގުތު ކުލާހަށް ވަދެގެންއައި އަހުޝަމް ހައިފާގެ ލޮލުގައި އަޅައިގަތެވެ. ހައިފާއަށް އަހުޝަމްއިން އޭނަގެ ނަޒަރު ވަކިކުރަން އުނދަގޫވިއެވެ. އަދި ހިތާހިތުން އަހުޝަމްގެ ސޫރައަށް ތައުރީފް ކުރެވުނެވެ.

އަހުޝަމް ގޮސް ގޮނޑިއެއްގައި ހަމަޖެހިލަމުން ކުލާސްތެރެއަށް ބަލާލިއެވެ. ހަމައެޔާއެކު ކުލާހުގެ އެންމެ ފަހަތުން ކަނެއްގައި އިން އަންހެންކުއްޖެއް އޭނާގެ ލޮލުގައި އަޅައިގަތެވެ. އަދި އެކުއްޖާއަށް ފުން ނަޒަރަކުން ބަލާލެވުނެވެ. އަދި އެ ރީތިކަމަށް ހިތުގެ ފުންމިނުން ތައުރީފުތަށް އޮއްސާލެވުނީ އޭނާގެ އިޙްތިޔާރަކާއި ނުލައެވެ. އަދި އެންމެ ފަހަރަކު އެ ރީތި މޫނަށް ބަލާލަނަމޭ ހިތައި ބަލާލި ހިނދު ދެމީހުންގެ ނަޒަރު ބައްދަލުވި ވަގުތު ދެމީހުންގެ ހިތުގައި އާގޮތަކަށް ވިންދެއް ޖަހާލައިގެން ދިޔައެވެ.

-ނުނިމޭ