ލޯ މެރޭ ހިނދު ހީވޭ ގާތުގާ ވާހެން(13)

ޑްރާމާއަށް ހާއްސަ ކޮށްފައިވާ ހޯލަށް ވަތްއިރު ގިނަ ގުރޫޕުތައް ތިބީ ހަމަވެފައެވެ.މިފަހަރު ގުރުއަތު ނެގުމުން ޔުއާންމެން ގުރޫޕަށް ލިބުނީ ފަހަތުން ދެވަނައެވެ.އެކި ގުރޫޕުތަކުގެ ތަމްސީލްތަށް ނިމެމުން ގޮސް އެންމެފަހުން އެ މީހުންގެ ގުރޫޕަށްވެސް ޖެހުނެވެ.ޑްރާމާ ކުޅެން ފެށުމުން ޕްރެކްޓިސްއަށްވުރެ ދެގުނަ ރަނގަޅުކަން ހަމީހުންނަށްވެސް އިހުސާސްވިއެވެ.މިކަމުން އެ އެންމެންވެސް ތިބީ ޑްރާމާ ކުޅެމުން ދިޔައިރު އުފާވެ ހިތްހަމަ ޖެހިފައެވެ.

ޑްރާމާގެ އެކި މަންޒަރުތައް ނިމެމުންގޮސް ޔުއާންއާއި ދިމްރާގެ ލަވަކިޔުމުގެ ބާއި ޖެހުނެވެ.ދެމީހުންވެސް ގޮނޑިއެއްގައި އިށީންދެ ހަމަޖެހިލުމަށްފަހު ގިޓާއިން ރާގު ޖަހަން ފެށިއެވެ.މުޅިތަން ހަމަހިމޭންވެގެން ދިޔައީ ދެމީހުންގެވެސް ގިޓާ ޖެހުމުގެ ރީތީކަމުންނެވެ. ރާގަށްފަހު ފުރަތަމަ ލަވަކިޔަންފެށީ ޔުއާންއެވެ.

“ތީ އުއްމީދޭ މަގޭ، ނޭވާއޭ މަގޭ، ވިންދޭ ތީ މަގޭ، ހިތާ ފުރާނާއިގެ ދިރުމޭ، ތީ ނޫންހޭ ރޭދުއާ މަގޭ”

އެއާއެކު ދެން އިވިގެން ދިޔައީ ދިމްރާގެ އަޑެވެ.  “ތީ އުއްމީދޭ މަގޭ،މާޒީއޭ މަގޭ، ދެލޯ ފުރޭނޭ ދިިޔާމާ، ތީ ނޫންހޭ ލޯބިވާ މަގޭ، ހެޔޮނުވާނެ ރޮއްވާފާ ނުދާށޭ، ލޯބިވާއޭ އަންނާށޭ”

ދިމްރާ ލަވަ ކިޔަމުންދިޔައިރު ޔުއާން އިނީ އެ މޫނަށް ބަލަހައްޓައިގެންނެވެ.އޭރުވެސް ދިމްރާއާއި އެއްވަރަށް ޔުއާންވެސް ދިޔައީ ގިޓާ ޖަހަމުންނެވެ. ދެން އޮތީ ޔުއާން ކިޔަން ޖެހޭ ބައިކަން ހަނދާންވީ ދިމްރާ އެ މޫނަށް ބަލައިލުމުންނެވެ.

“އާދޭހޭ މީ ކުރާ، ހުއްޓޭށޭ، މާފު ދޭށޭ، ހީލާށޭ، ކުއްކުރެވިއްޖެޔޭ، ކުށްކުރީ މަށޭ..           ތީ ޔާރާއޭ މަގޭ، މިލްކޭ ތީ މަގޭ، ގޮވާނަމޭ ލޯބިވާތީ، ތީ ނޫންހޭ އާޝިގާ މަގޭ”

ދެމީހުން ލަވަ ކިޔަމުން ދިޔައިރު ހީވަނީ އެކަކު އަނެކަކަށް ނިސްބަތްކޮށް ހަޤީގަތުގައިވެސް ކިޔައި ދެމުން ދިޔަ ލަވައެއް ހެންނެވެ.އެހާވެސް ދެމީހުންގެ ރާގުގައިވެސް އެފަދަ އަސަރެއް އެކުލެވިގެންވިއެވެ. ޔުއާން އެހިސާބަށް ހުއްޓާލުމާއިއެކު އޭގެ ފަހަތުން ދިމްރާ ފެށިއެވެ.ލަވައާއި އެއްވަރަށް ރާގުވެސް ޖަހަމުންނެވެ.

“ހެޔޮނުވާނޭ ދޫކޮށްފާ ދިޔާމާ، ރޯލަ ރޯލަ ހުރެވޭނީ، އާދޭތޯ އިންތިޒާރު ކުރެވޭނީ، ހޯދަ ހޯދާ ހުރެވޭނީ، އިސްއުފުލާލަ ދީ، ހިތްމަގޭ ރޮނީ”         އެ ހިސާބަށް ކިޔާ ނިންމާލިއިރު ދިމްރާއަށްވެސް ބޭއިޙްތިޔާރުގައި ޔުއާންގެ މޫނަށް ބަލައިލެވުނެވެ. ޔުއާންގެ ލޮލުގައިވީ ނަޒަރަކުން ދިމްރާއަށްވެސް މިފަހަރު ނަޒަރު ވަކިކޮށެއް ނުލެވުނެވެ.

“ތީ މަންޒިލޭ މަގޭ، ރާސްތާއޭ މަގޭ، ނިޔާ އިިވޭތޯ ހުރީމޭ، ތީ ނޫންހޭ ސާހިބާ މަގޭ”

އެއާއެކު ދެން އޮތްބާއި ދިމްރާވެސް ޔުއާން އާއި އެއްވަރަށް ކިޔަން ފެށިއެވެ.ދެމީހުން އެއްރާގަކަށް ގިޓާ ޖަހަމުން ދިޔައީީ ފަރިތަކަމާއި އެކުއެވެ.

“ތީ ނޭވާއޭ މަގޭ، ވިންދޭތީ މަގޭ، ހިތާ ފުރާނާއިގެ ދިރުމޭ،ތީ ނޫންހޭ ރޭދުއާ މަގޭ، ތީ ނޫންހޭ ރޭދުއާ މަގޭ” ދެމީހުންވެސް އެކަކު އަނެކަކާ ނަޒަރު ވަކިކޮށްލުމެއްނެތި ފަހުބާއި ކިޔާ ނިންމާލިއިރު ހީވަނީ ހަމަ ލޯބީގެ ފިލްމެއްގެ މަންޒަރެއް ހެންނެވެ. އެހާވެސް އެ މަންޒަރު ފުރިހަމައެވެ. ދެމީހުންނަށްވެސް ހަމަހޭވެރިކަންވީ އެތައް ކުދިންނެއްގެ ހޫނު އަތްތިލަބަޑީގެ އަޑުއިވުމުންނެވެ. އެއާއެކު އަވަސްވެގަތީ ޑްރާމާގެ ދެންހުރި ބައިތަކާއިގެން ކުރިއަށް ދިއުމަށެވެ.

ހުރިހާ ޑްރާމާތަކެއް ތަމްސީލުކޮށް ނިމުމުން އަލީފްސާރ ބުރާސްފަތި ދުވަހު އޮންނަ އެސެމްބްލީގައި ނަތީޖާ އިއުލާން ކުރާނެ ވާހަކަ ބުންޏެވެ.އެހާލަހުން ކީއްވޭތޯ ސުވާލު ކުރުމުން ބުނީ އެހެން ކުލާސްތައްވެސް ޑްރާމާ ކުޅޭނެ ކަމަށެވެ.ނަތީޖާ އިއުލާން ކުރާނީ ހުރިހާ ކުލާހެއްގެ ޑްރާމާތައް ތަމްސީލުކޮށް ނިމުމުން ކަމަށެވެ.

ޑްރާމާތައް ތަމްސީލްކޮށް ނިމުމުން ހުރިހާ ކުދިންވެސް ކުލާހަށް ދިޔައީ ބާކީހުރި ގަޑިތަކުގެ ފިލާވަޅުތަށް ނެގުމަށެވެ.ގިނަކުދިންގެ ތައުރީފު ދިމްރާމެނަށް ލިބިގެން ދިޔައެވެ.ހާއްސަކޮށް ލަވައިގެ ރީތިކަމަށް ތައުރީފު ލިިބިގެން ދިޔައެވެ.

“އެހެންނޭނުން ވާނީ އެހާ ފީލިންގްސްގައޭ ދެމީހުންވެސް ލަވަކިޔާލީ..ހީވީ ހަމަ އެ ހާލާތުގަ ހުރެ ހިތުގެ ހާލު އެކަކު އަނެކަކަށް އިއްވަމުން ދިޔަހެން..ގޮވާނަމޭ ލޯބިވާތީ..ތީ ނޫންހޭ އާާޝިޤާ މަގޭ….ހީހީހީ” ރީމް ކުލާހުގައި އިނދެ ދިމްރާއާއި ދިމާކޮށްލިއެވެ.ބަދަލުގައި ދިމްރާ ރީމްއާއި ދިމާލަށް ދެލޯ އަޅާލިއެވެ.އެއާއެކު އުޝާއާއި ރީމް ޓަޗެއް ޖަހާލަމުން ފެށީ ހޭށެވެ.

ދިޔާންއާއި ޝާރިމްގެ ކަމަކަށްވެސް އޮތީ ޔުއާންއާއި ދިމާކުރުމެވެ.ކުލާހުގައި އިންއިރު އެތައް އަންހެން ކުދިންނެއްގެ ނޯޓުތައް ލިބެމުންދާތީ އެކަމާވެސް ޔުއާން އިނީ ބޯ ގޮވާ ވަރުވެފައެވެ. ގަޑިއަށް ބަލާލަ ބަލާލާ އިނީ އެތަނުން އަވަހަށް ސަލާމަތްވެގެން ނުކުންނަން ބޭނުންވެފައި އިން ވަރުންނެވެ.

ރޭގަނޑުގެ ވަގުތެވެ.ދިމްރާ ކޮޓަރީގައި އޮތީ ފޫހިވެފައެވެ.ދިޔާން އުޝާއާއި ބައްދަލުކުރަން ދިއުމުން ދިމްރާ އެމީހުންނަށް އެކަނިވެލަން ފުރުސަތެއް ދޭންވެގެން ދިޔާންއާއިއެކު ނުދިޔައީއެވެ. ނަމަވެސް މިހާރު ނުދެވުނު މޮޔަ ހިތަށް އެރިއެވެ. ގޭގާއި ޔުއާންގެ މަންމައެއްވެސް ނެތެވެ.އެހެންނޫންނަމަ ޔުއާންގެ މަންމައާއި ވާހަކަދައްކާލަން އިނދެވޭ ނަމަވެސް ފޫހިފިލާނެއެވެ. ކޮޓަރިންވެސް ނުނިކުންނަން ހުރީ ގޭގައި ޔުއާން އެކަނި އުޅޭތީއެވެ.ޔުއާންގެ ކުރި މައްޗަށް އަރާކަށް އޭނާ ބޭނުމެއްނޫނެވެ.ޔުއާންއާއިއެކު ގޭގައި އެކަނިވުމުންވެސް ދިމްރާ ހުރީ އެކަމާ ޖެހިލުންވެފައެވެ.އެކަނި ހުރުމުން ރުޅި ބާލާނެ ގޮތެއްވެސް އެނގެނީއެއް ނޫނެވެ.ސިޑިންވެސް ވައްޓާލަފާނެއެވެ.ޔުއާން ހުންނާނީ އެހާވެސް ދިމްރާދެކެ ރުޅިއައިސްފައެވެ

އާއި ނުބާއި ހިޔާލުން ދިމްރާ ރަނގަޅަށްވެސް ބިރުގަނެއްޖެއެވެ.އިތުރަށް އެންމެ މިނެޓެއްވެސް ޔުއާންއާއި އެއްފުރާޅެއްގެ ދަށުގައި ހޭދަ ކުރާކަށް ބޭނުމެއް ނުވިއެވެ.އެހެންކަމުން ދިމްރާ އަވަސް އަވަހަށް މަތިމަތިން ރީތީވެލައިގެން ކޮޓަރިން ނުކުތެވެ.އެއާއެކު ފުރަތަމަވެސް ބަލައިލީ އެއްވެސް ދިމާލަކުން ޔުއާންގެ ހިލަމެއް ވޭތޯއެވެ.ޔުއާން ފެންނަން ނެތުމުން ދިމްރާ މަޑުމަޑުން ސިއްރު ސިއްރުން ގޮސް ބޮޑުދޮރު ހުޅުވާލާފައި ބޭރަށް ނުކުތެވެ.ބޭނުމަކަށްވީ ރީމްގެ ގެއަށް ދިއުމެވެ. މަގުމައްޗަށް ނުކުމެވުމުން ދިމްރާއަށް ހަމަޖެހުމުގެ ނޭވާއެއް ލެވުނެވެ.ދެން ކުރިއަށް އޭނާ ހިނގައިގަތީވެސް އެއްވެސް ބިރެއްނެތި ހަމަޖެހިލައިގެން ހުރެއެވެ.ތުންފަތުގައި ހިނިތުންވުމެއްވެސް ވިއެވެ.

ނަމަވެސް ސިހުން ލިބި ހުއްޓެވުނީ ގޯޅިގަނޑުތެރޭ އޮންނަ ޤުރޫޕު ފެނުމުންނެވެ.އޭނާއަށް ކުރިން މިތަންކޮޅަށް ވިސްނާ ނުލެވުނީ ކީއްވެ ހެއްޔެވެ؟ ގެއިން ނުކުތްއިރު އޭނާ އެ ޤުރޫޕު މަތިން ކުޑަކޮންވެސް ހަނދާނެން ނެތެވެ.އެހެންކަމުން އެވަގުތު އެނބުރި އާއިކޮޅަށް ހިނގައިގަތީ އެމީހުންނަށް ފެނުމުގެ ކުރިން އެތަނުން ދެވޭތޯއެވެ.

“ހޭ ބޭބީ ގާލް..މަޑުކޮށްބަލަ” ދިމްރާއަށް ސިހުންލިބި ހުރިތަނަށް ހުއްޓިލެވުނީ ފަހަތުން ފިރިހެނަކު ވާހަކަ ދައްކާލުމުންނެވެ.މޭގަނޑު އަނގަޔަށް ނައީ ކިރިޔާއެވެ.ބިރުންގޮސް އޭނާއަށް ހިތްވެސް ދިރުވާލެވުނެވެ.ނަމަވެސް ދެވަނަ ސިކުންތުގައި ހަލުވި ފިޔަވަޅުތަކެއްގައި ކުރިއަށް ހިނގައިގަތުމަށް އަވަސްވެގަތެވެ.ނަމަވެސް ދެތިން ފިޔަވަޅު އަޅާލިތަނާ ފެނުނީ އެތަނުން އެކަކު އައިސް ދިމްރާގެ ކުރިމައްޗަށް އެރިތަނެވެ.

“ހާދަ އަވަހަކަށް ދާން ތިއުޅެނީ ސްވިޓީ”އެ ފިރިހެންކުއްޖާ އެއްމިޔަކަނުން ހީލަމުން އެހެން ބުނެލިއިރު ދިމްރާގެ މޫނަށް ވެރިވެގެން ދިޔައީ ހާސްކަމެވެ.

“ޕްލީޒް..ޕުލީޒް..އަހަރެން ދިޔަދީ” ހާސްވިވަރުން ދިމްރާއަށް ވާހަކަ ދެއްކުނީވެސް އަޅައިއަޅައި ގަންނަމުން ކަހަލަ ގޮތަކަށެވެ.

“އަދި ނެތޭނުން ނުދެވިފައެއް ދޯ ސްވިޓީ”ކައިރިން އިތުރު ފިރިހެނެއްގެ އަޑު އިވިގެން ދިޔައެވެ. އެއަޑަށް، ބަލައިލިއިރު ދެމީހުން އައިސް ދިމްރާ ވަށާލަނީއެވެ.އެވަގުތު ބިރައްވުރެ ދިމްރާގެ ގާތަށް އައީ ރުޅިއެވެ.އަންހެނަކަށް ވީތީ އެވަރުގެ މިނިވަން ކަމެއްވެސް ނެތީ ހެއްޔެވެ؟މަގަކީ ވަކި ފިރިހެނުންނަށް އެކަނި ހާއްސަ ކޮށްފައި އޮތް ތަނެއްނޫން ވިއްޔާއެވެ.ވީއިރު އަންހެނުންނަށްވެސް އަމާންކަމާއިއެކު ކޮންމެ އިރަކުވެސް އެމަގުތަކުން ހިނގެންޖެހޭނެ ނޫން ހެއްޔެވެ؟އަންހެންކުދިންނަށް އެކަނި ވަކި ދުނިޔެ ބިރުވެރި ތަނަކަށް ވާންވީ ކީއްވެ ހެއްޔެވެ؟

“ރީއްޗަށް މިބުނަނީ..އަހަރެން ދިޔަދީ..” ދިމްރާ އެހެން ބުނުމުން ފެނުނީ ބަދަލުގައި އެ އެންމެން ހޭންފެށި ތަނެވެ.ހީވީ ދިމްރާއަށް މާ މަޖާ އެއްޗެއް ބުނެވުނީ ހެންނެވެ.

“ލީވް ހާރ..ނައު” ދިމްރާ ދެވަނަ ފަހަރަށް އެއްޗެއް ބުނަން އަނގަ ހުޅުވާލުމާއިއެކު އިވިގެން ދިޔައީ ޔުއާންގެ އަޑެވެ.އެއަޑަށް ބަލައިލިއިރު ޔުއާން އެމީހުންނާ އަރާ ހަމަ ކުރަނީއެވެ.ޔުއާން ފެނުމުން އެމީހުންނަށް ދިމްރާއާއި ދުރަށް ޖެހެވުނު ގޮތްވެސް ނޭނގުނެވެ.އެމީހުންގެ އެ އަމަލުން ހައިރާންކަމާއިއެކު ދިމްރާއަށް ބަލައިލެވުނީ ޔުއާން އާއި ދިމާލަށެވެ.ޔުއާންދެކެ އެމީހުން އެހާ ޖެހިލުންވާންވީ ކީއްވެބާއޭ އެވަގުތު ދިމްރާގެ ހިތަށް އެރިއެވެ.

ޔުއާން އެވަގުތު އާއިގޮތަށް އައިސް ފެނުނީ ދިމްރާގެ އަތުގައި ހިފާލިތަނެވެ.ގެއާއި ދިމާލަށް ހިނގައިގަތްއިރު ޔުއާންގެ ހަރަކާތްތަކުގައިވީ ހަރުކަށިކަން ދިމްރާއަށް ނަގައިގަނެވުނެވެ.އެކަމާ ދިމްރާ ޖެހިލުންވި ނަމަވެސް ބޭނުންވީ އެވަގުތު ހިތަށް އާއި ކަންތައް ކޮށްފަ ދާށެވެ.

“ވެއިޓް ޔުއާން”ދިމްރާ މިހެންބުނެ ގަދަކަމުން ޔުއާންގެ އަތުން އޭނާގެ އަތް ނައްޓުވާލިއެވެ.އަދި އެނބުރި އެމީހުންނާ ދިމާލަށް ބަލައިލިއެވެ.އޭރު އެމީހުންވެސް ތިބީ އެދެމީހުންނަށް ބަލާށެވެ.

“އަހަރެންނަށް އެނގޭ އަހަރެން ބުނާ އެއްޗަކުން ތި ހިތްތަކަށް އެއްޗެއް އެރުމަށްވުރެ ގާތީ ނޭރުންކަން..އެކަމުވެސް ބުނެލަން ބޭނުން..މި މަގުތައް ހަމައެކަނި ފިރިހެނުންގެ ތަނަކަށް ވީ ކީއްވެ ހެއްޔޭ؟އަންހެނުންނަކީ ހަމަ އެހާ އަގެއް ނެތް ބައެއްގެ ގޮތުގަތަ ތި ދެކެނީ..ތި މީހުންނަށް ހިނގޭއިރު އަންހެނުންނަށް ވަކި މި މަގުތަކުން ބޭނުން އިރަކު ނުހިގެންވީ ކީއްވެ؟ތި މީހުން ޒައްރެއްގެ މިންވަރުވެސް ޤަދަރެއް ކުރާނަމަ އަންހެނަކު މަގުމަތިން ހިނގާލާފަ ދާއިރު ތިމީހުން ކުޑަމިނުން ދޭނީ ބަދަލުގަ ހިނިތުންވުމެއްކަން އަހަރެންނަށް ޔަޤީން..ތި މީހުން ފަދައިން ކޮންމެ އަންހެނަކީވެސް ބައެއްގެ ދަރިއެއް، ކޮއްކޮއެއް ނުވަތަ ދައްތައެއް..ނޫނީ ކުދިންތަކެއްގެ މަންމައެއް.ތި މީހުން ފަދައިން އަންހެނުންނަކީ ވެސް އިންސާނުން..އެހެންކަމަށް ވީއިރު އަންހެނުންނަކީ އަގެއް ނެތް އެއްޗެއް ފަދައިން ތި މީހުން ދެކެންވީ ކީއްވެ؟ބުނާތީ އަޑުއަހަން އަންހެންކުދިންނަކީ ބައްޕައެއް ސުވަރުގެއަށް ދިއުމަށް މަގު ކޮށައިދޭ ދަރިއެކޭ.މީހަކާ އިނުމަށްފަހު ފިރިމީހާއަށް ސުވަރުގެއަށް ދާން މަގު އަލިކޮށްދޭ އަންބެކޭ.އަދި މަންމައަކަށް ވުމަށްފަހު ދަރިއަކަށް ސުވަރުގެއަށް ދިއުމަށް މަގުފަހި ކޮށްދޭނެ މަންމައެކޭ..ކަމެއް ވީމައޭނުން މައިމީހާގެ ފައިތިލަ ދަށުންނޭ ސުވަރުގެއަށް ދެވޭނީ އެ ބުނަނީވެސް..އެވަރު ބަޔަކަށް ތި މީހުން ވެލިފުކެއްގެ މިންވަރުގެ އިއްޒަތެއްވެސް ދޭން ލަދުގަންނަ ކަމަކަށް ވެގެން ތިއުޅެނީ..ނޭނގި ނަމަވެސް އެހުރިހާ އަންހެންކުދިން ވެފައިވަނީ ތި މީހުންނަކީ ބޭބެމެންނަށް ވީ ފަދައިން ދައްތަމެން ތަކަކަށް..ސަބަބަކީ އަހަރެމެން އެންމެންނަކީވެސް އާދަމުގެ ދަރިންނަށް ވީމަ” ދިމްރާ އަސަރާއިއެކު ބުނެލި ވާހަކަތަކުން ހީކުރި ގޮތާއި ހިލާފަށް ފެނުނީ އެ އެންމެންވެސް އިސްދަށަށް ޖަހާލިތަނެވެ.އެ ބުނެލި ބަސްތަކުން ލަދުވެތިވެގެން ކަމެއް ނޫނީ އަޑު އަހަން ބޭނުން ނުވީމަ ކަމެއް ނޭނގެއެވެ.

“އަހަރެންނަށް އެނގޭ އަހަރެން މިބުނި ވާހަކަތަކަކީ ތި މީހުންނަށް އަލަށް އަޑުއިވިފަ ހުންނާނެ ވާހަކަތަކެއް ނޫންކަން..މާ ކުރިން އެނގޭނެ ވާހަކަ ތަކެއްކަންވެސް..އެކަމުވެސް ހޭއަރާ..އަދި ވަގުތު އެބައޮތް..އަންހެންކުދިން ރައްކާ ކޮށްދޭން ތިބި ބަޔަކީ ތި..ދެންވެސް އެ ޤަދަރު އަންހެންކުދިންނަށް ދޭން މަސައްކަތް ކުރޭ..ޔަޤީން ތި މީހުންނަށްވެސް ހިތްހަމަޖެހުން ލިބޭނެކަން”

“އިނަފް ނައު..ލެޓްސް ގޯ” ދިމްރާ އިތުރަށް އެއްޗެއް ބުނަން އުޅުމުން ޔުއާން އެކަން ހުއްޓުވިއެވެ.އަދި ދިމްރާގެ އަތުގައި އަނެއްކާވެސް ހިފައިގެން ގެއާއި ދިމާލަށް ހިނގައިގަތެވެ.ދެންމެ ދިމްރާ ދެއްކި ވާހަކަތަކުން އެހިތް ތައުރީފުން ފުރުނަސް ދިމްރާ އެގޮތަށް ގެއިން ނުކުމެގެން އައީމަ އޭނާ ހުރީ އިންތިހާއަށް ރުޅި ގަދެވެފައެވެ.ސެކިއުރިޓީ ކެމެރާތަކުގެ ފޫޓޭޖުތައް ނޭނގި ނަމަވެސް ބަލައިލެވުންކަން ނަސީބެވެ.އެހެން ނޫންނަމަ އޭނާއަށް މިރޭ ދިމްރާ ރަނގަޅަށްވެސް ގެއްލޭނެއެވެ.އެއާއެކު ދިޔާންގެ އިތުބާރުވެސް އޭނާއަށް އޮންނަ ގެއްލޭނެއެވެ.އަދި ހަމަ އެހެންމެ ދިމްރާއަށް ކަމެއްވިނަމަ ދިޔާން ކީއްކުރަން އިތުރު މީހަކުވެސް އޭނާއަކަށް މައާފެއް ނުކުރާނެއެވެ.އެކަން އެހެން އޮތްއިރު އޭނާއަށް ރުޅިނައިސް ހުރެވޭނެ ހެއްޔެވެ؟ދިމްރާ ކުރާ ކަންތައްތަކުން އޭނާއަށް ރުޅި އާދެވެނީވެސް އެހެންވެއެވެ.ދިމްރާ މުޅިންވެސް ކުރަނީ އޭނާ ރުޅިއަންނަވަރުގެ ކަންތައްތަކެވެ. އަމިއްލަ ނަފްސަށް ބަލައިލުމެއްވެސް ނޯވެއެވެ. އެހެންނޫންނަމަ އެ ގޮތަކަށް ގެއިން ނުކުމެގެން ދާކަށް ނުކެރުނީސްއެވެ.

ޔުއާން އެ ދިޔަގޮތަށްގޮސް ދިމްރާ ހޫރާލީ ސިޓިންރޫމަށެވެ.ހޫރާލިލެން ބާރުކަމުން ދިމްރާ ނުވެއްޓުނީވެސް ކިރިޔާއެވެ.އެއައްފަހު ދެން ފެނުނީ ޔުއާން އެ ފަން އިސްތަށިގަނޑުގެ ތެރެއަށް ދެއަތް މަހާލުމަށްފަހު އަނެއްފަރާތަށް އެނބުރިލިތަނެވެ. ޔުއާން މަސައްކަތް ކުރަމުން ދިޔައީ ރުޅިގަނޑު ކޮންޓްރޯލް ކުރެވޭތޯއެވެ.

“ޔުއާން ކިހިނެއް ވެގެންތަ ތިއުޅެނީ” ދިމްރާ ޔުއާންގެ އަތުގެ އުޅަބޮށީގައި ހިފާއި އޭނާއާއި ދިމާލަށް އަނބުރާލަމުން ބުނެލިއެވެ.

“އަހަރެންތަ ކަމެއް ވެގެން މިއުޅެނީ..ދިމްރާ ތިއުޅެނީ މޮޔަވެގެންތަ..އެކަނި ރޭގަނޑު ތަންތަނަށް ދާއިރު އެހެން މީހުންނަށް ވާނެ ގޮތެއް ވިސްނާލުމެއްވެސް ނެތްތަ” ޔުއާން ދިމްރާގެ ދެ ކޮނޑުގައި ހިފާއި ތަޅުވައި ގަތުމަށްފަހު ދުރަށް ކޮއްޕާލިއެވެ.

“ކޮބާތަ ޔުއާންގެ މައްސަލައަކީ..މީ އަހަރެންގެ އަމިއްލަ ނަފްސު..އެހެންވީމަ އަހަރެން އުޅޭނެ ގޮތެއް އެނގޭނީވެސް އަހަރެންނަށް.ޔުއާންއަކަށް ނޫން”

“ތިކަމެއް ތި ހެންނެއް ނުވާނެ..ދިމްރާ މިގޭގަ ހުރިހާ ހިނދަކު، ޔާން އަހަރެންނަށް ދިމްރާ ބަލަން ހަވާލުކޮށްފަ ހުރިހާ ހިނދަކު ތީ އަހަރެންގެ ޒިންމާއެއް” ޔުއާން ދެކުޅުގައި އަތްވިދެލަމުން އެހެން ބުނެލީ ހިތްހަމަ ނުޖެހިފައި ހުރެއެވެ.

“އޯވ!ތީގެ މާނައަކީ އަހަރެން މިގޭގަ އުޅޭތީވެސް ޔުއާންއަށް އުނދަގޫވަނީއޭދޯ..ބުނަން..އަހަރެންވެސް އަންނަ ހިތަކުންނެއް ނޫން މިގެއަށް މިއައީކީއެއް.. ދޮންބެ ބުނީތީ ނައިސް ނުވެގެން އަހަރެން މިއައީ.. އެނގޭ ޔުއާން އަހަރެންނަށް ނަފްރަތުކުރާކަން.. އެހެންވެ އަންނަން ބޭނުން ނުވަނީވެސް..އެކަމު ޔުއާން ތިހާ ރުޅި އަންނަން ޖެހޭވަރު ކަމަކަށް އަހަރެންނަށް ކީއްތަ ކުރެވުނީ” ދިމްރާ އަތް އުކައުކާފަ ވާހަކަ ދައްކަމުން ދިޔަ ގޮތުން އޭނާވެސް ހިތްހަމަނުޖެހިފައި ހުރިވަރު އެނގިގެންދެއެވެ.

“އަހަރެންނަށް ނުކުރެވޭ ޔުއާންއަށް ރަނގަޅުވާނެ ގޮތަށް އެއްކަމެއްވެސް..ޔުއާން އާ ކައިރިވިޔަސް ޔުއާން ރުޅިއާދޭ..ޔުއާން އާ ދުރުގަ ހުއްޓަސް ޔުއާން ރުޅިއާދެ..އަހަރެންނަށް ބުނެދީބަލަ ކޮބާކަން އަސްލު ޔުއާންގެ މައްސަލައައީ..ޔުއާންގެ އަޅެއް ނޫނޭ މީ” އޭރު ދިމްރާއަށް ހުރީ ޔުއާންއާއި ވަރަށް ގާތަށް އާދެވިފައެވެ.ހަތަރުކަޅި ހަމަވެގެން ދިޔަ ވަގުތު ޔުއާން ހިތްހަމަނުޖެހިފައި ހުރިވަރު ދިމްރާއަށް އެނގިގެން ދިޔައެވެ.އެހާ ކައިރިން ޔުއާންގެ ރުޅިވެރި ނަޒަރު ފެނުނު ހިނދު މީހާ ދިޔައީ ފިނިވެގެންނެވެ.

“އެނގެން ބޭނުންތަ..އެހެނަސް ރަނގަޅަށް އަޑުއަހާ..ދިމްރާ ކިތަންމެ ރުޅި އަޔަސް އަހަރެން ދިމްރާ އުޅޭ ގޮތަށް ބަލާނަންވެސްމެ..ބުނަންޖެހޭ އެއްޗެއް ބުނާނަންވެސްމެ..ދިމްރާ އުޅޭ ގޮތުން، އަހަރެންނަށް އެއްޗެހި ކިޔެނީވެސް” ޔުއާންވެސް ދިމްރާއާއި އިތުރަށް ގާތްވެލާފައި ދަތްކުނޑި ވިކާލަމުން ބުނެލިއެވެ.

“މީ ޔުއާންގެ އަޅެއް ނޫނޭ ބުނެފީމޭނުން..އަހަރެން ދާން ބޭނުންތަކަށްވެސް ދާނަން..ކުރަން ބޭނުން ކަމެއްވެސް ކުރާނަން..ޔުއާން އަހަރެން ބަދުނާމު ކުރުމަށްފަހު އަދިވެސް ތިއުޅެނީ އަހަރެން ހައްޔަރުގަ ބަހައްޓަންތަ..ހުރިހާ ކަމެއްވެސް ވާންޖެހެނީ ޔުއާން ބޭނުންވާ ގޮތަށް ދޯ..ނޯ ޔުއާން..މީ އަހަރެންގެ ލައިފް..އަދިވެސް އެއްފަހަރު ބުނެލަން އެރޭ އަހަރެން ޔުއާންގެ ބޮލުގަ ވަގު ތުހުމަތު އެޅުވީ ނޭނގިހުރެ..އެކަމު ޔުއާން އެގޮތަށް ބަދަލުހިފާނެ ކަމަށް އަހަރެން ހުވަފެނެއްގަވެސް ހިއެއް ނުކުރަން..ވެދާނެ ޔުއާންގެ ތި ސްޓައިލް ހުރިއިރުވެސް އަހަރެންނަށް ޔުއާން އެތެރެފުށުން ރަނގަޅުކަމަށް ދެކެވުނީކަމަށްވެސް..ސޯ ޔުއާންވެސް އަހަރެންނާ ދުރުގަ ހުރެދީ..އަހަރެންވެސް މިހާރު މި މަސައްކަތް ކުރަނީ ޔުއާންއާ ދުރުގަ އުޅުމަށް”

ދިމްރާ މިހެންބުނެ އެނބުރި ހިނގައިގަތީ އަނެއްކާވެސް ގެއިން ނުކުތުމަށެވެ.އެއާއެކު ދިމްރާގެ ބަސްތަކުން ޝޮކެއް ލިބިފާއި ހުރި ޔުއާންއަށް ދިމްރާގެ އަތުގައި ހިފާއި ދަމާލުމަށްފަހު ގެންގޮސް ކައިރީ ހުރި ފާރުގައި ޖެއްސުނު ގޮތެއްވެސް ނޭނގުނެވެ.ޔުއާންގެ މި ކުއްލި އަމަލުން ދިމްރާވެސް ހުރީ ސިހުންލިބި ޝޮކެއްގައެވެ. ޔުއާންގެ ފަރާތުން މިފަދަ އަމަލެއް ފެނިދާނެކަމަށް ދިމްރާއަށް ހީކުރެވިފައިވެސް ނެތެވެ.

ޔުއާން ބޯ ތިރިކޮށްލީ ދިމްރާގެ މޫނާ އޭނާގެ މޫނު ސީދާ ވާނެ ވަރަށެވެ.އެވަގުތު ޔުއާންގެ އެ ކައިރިކަމުން ދިމްރާއަށް ހީވީ ނޭވާ ކަރުގާއި ތާށިވި ހެންނެވެ.އެތެރެއަށް ދަމާލި ނޭވާ ބޭރަށް ދޫކޮށްލާކަށްވެސް ހަނދާނަކަށް ނައެވެ.

“އައި ކާންޓް..ކިތަންމެ ބޭނުންވިޔަސް އަހަރެންނަކަށް ދިމްރާއަކާ ދުރުގައެއް ނުހުރެވޭނެ..ދިމްރާ ކިތަންމެ ރުޅި އަޔަސް ދިމްރާއަކަށްވެސް އަހަރެންނަކާ ދުރުގައެއް ނޫޅެވޭނެ” ދިމްރާއާއި ހަތަރުކަޅި ހަމަކޮށްގެންހުރެ ޔުއާން އިއްވަމުން ދިޔަ ބަސްތަކުން ދިމްރާއަކަށް އެކައްޗެއްވެސް ފަހުމެއް ނުވިއެވެ.ޔުއާންގެ އެ ބަސްތަކުގައި އެކުލެވިފައިވަނީ ކޮންކަމެއްކަމެއް ދިމްރާއަކަށް ނަގައިގަންނާކަށް ނޭނގުނެވެ. އެނގުނުހާވެސް އެއްޗަކީ އެ ބަސްތަކުގާއި ފުންމާނައެއް އެކުލެވިފާއި ވާކަމެވެ.ހުދު ޔުއާންއަށްވެސް އެބުނެވުނު ބަސްތައް އެބުނެވުނީ ވިސްނާފައި ހެންނެއް ހިއެއް ނުވެއެވެ.ޔުއާންގެ ލޮލުގައިވެސް ވީ އެފަދަ އަސަރެއް ކަމަށްވީއިރު އެ ލޮލުގައިވީ ތަފާތު ނަޒަރުފެނިވެސް ދިމްރާ ހުރީ ވިސްނަންވީ ކޯއްޗެއްކަން ނޭނގިފައެވެ.

“އަހަރެން މިއޮއްހާ ދުހު މި މަސައްކަތްކުރީ ދިމްރާއާ އެކަނިވެލާނެ ފުރުސަތެއް ނުލިބިގެން.. ކޯޒް އައި ވޯންޓް ޓު ސޭ ސޮރީ..ބަޓް ދިމްރާ އަހަރެންނަށް އެ ފުރުސަތު ދިނިންތަ..ޑެމިޓް.. ބަދަލުގަ ދިމްރާ އައީ އަހަރެން އިގްނޯރ ކުރަމުން.. އެދުވަހު އެކަން ކުރި މީހަކީ ލިމް..ބަޓް ޝީ އިޒް މައި ކަޒިން..އެހެންވެ އޭނަ ދިފާއު ކޮށްދޭން އަހަރެން އެ ކުށުގަ އެޅުނީ..އެއީ އަހަރެންނަށް މާފު ކުރިޔަސް ލިމް އަށް ދިމްރާ މާފު ނުކުރާނެތީ.. މިހާރު އެނގިިއްޖެއްތަ އެދުވަހު ކީއްވެކަން އަހަރެން އެގޮތަށް ކަންތައްކުރީ” ޔުއާން މިހެންބުނެ އަނެއްކާވެސް ދިމްރާއާއި ހަތަރުކަޅި ހަމަކޮށްލިއެވެ.

ދެލޯ ބޮޑު ކޮށްލައިގެން ހުރި މައުސޫމު ގޮތް ފެނިފާއި ޔުއާންއަށް ވެގެން ދިޔައީ ތަފާތު ގޮތްތަކެކެވެ.ކުރެވެމުން ދިޔަ އިހުސާސްތަކުން ނަފްސު ކޮންޓްރޯލް ކުރަން އުނދަގޫ ވަމުން ދިޔައެވެ.ހަށިގަނޑުގައި ހިނގަމުން ދިޔަ ލޭ ދައުރުވުން އަވަސްވެގެން ދިޔައިރު ހިތް އާދަޔާ ހިލާފަށް ތަފާތު ވިންދެއް ޖަހަމުންދިޔަކަން އިހްސާސް ކުރެވުނެވެ.ދިމްރާގެ މޫނުގައި އަތް ޖައްސާލެވުނީވެސް އަމިއްލަ އިޙްތިޔާރަކު ނޫނެވެ. އޭރު ދިމްރާގެ ލޮލުންވެސް ޔުއާންއަށް ފެންނަމުން ދިޔައީ ތަފާތު އަސަރެކެވެ.

ޔުއާންގެ އެ ބީހިލުމުން ދިމްރާއަށްވެސް ކުރެވިގެން ދިޔައީ ބުނެދޭންދަތި އިހުސާސެކެވެ.ޔުއާން އެކޭ އެއްފަދައިން އޭނާގެ ރުޅިވެސް އެވަގުތު ދިޔަތަނެއް ނޭނގުނެވެ.ޔުއާންގެ އަތް ފޮޅުވާލާކަށްވެސް އެވަގުތު އޭނާގެ ހަނދާނަކަން ނައެވެ.ހުރެވުނީ ޔުއާންގެ އެ ބީހިލުމަށް އިޖާބަދޭ ފަދަޔަކުންނެވެ.ޔުއާންގެ އަތުގެ ތެރެއަށް އޭނާ ވަންނަން އެހިތް ބާރު އަޅަމުން ދިޔުމުން ދިމްރާ ހުރީ ގަބޫލު ނުކުރެވިފައެވެ. އެދެލޮލުން އޭނާއަށް ޖެއްސީ ކޮންފަދަ ސިހުރެއް ހެއްޔެވެ؟މިނޫނީ އޭނާއަށް މިފަދަ ތަފާތު އިހުސާސްތަކެއް ކުރެވިފައެއް ނެތެވެ.ހިތް ބިރުގަތީ އެހެންވެއެވެ.ނަމަވެސް އެ ބިރު ހިތުގާއި ވީ އިރުވެސް ޔުއާންގެ ނިއްކުރިމައްޗަށް ފައިބާފައިވާ އިސްތަށިކޮޅާއި އޭނާއަށްވެސް ކުޅެލެވުނީ ހިތް އެކަމަށް މަޖުބޫރު ކުރުމުންނެވެ.އަމިއްލަ އިޙްތިޔާރަކު ނޫނެވެ.

ދިމްރާގެ ފަރާތުން އެފަދަ އޯގާތެރިކަމެއް ލިބުމުން ޔުއާންއަށް ދެލޯ މަރާލެވުނީ ލިބުނު އާދަޔާހިލާފު ހިތްހަމަޖެހުމަކުންނެވެ.އިރުކޮޅަކު އެހެން ހުރެލުމަށްފަހު ޔުއާން ދެލޯ ހުޅުވާލީ ދިމްރާ އަތްދުރުކޮށްލުމުންނެވެ.ދިމްރާގެ މޫނަށް ނަޒަރު ހުއްޓާލެވިފައިވާއިރު އެހިތް ބާރު އަޅަމުން ދިޔައީ ދިމްރާއާއި އިތުރަށް ގާތްވެލުމަށެވެ.އެ ފިޔާތޮށި ތުންފަތުގައި ބޮސްދިނުމަށް އެހިތް ގޮވަން ފެށުމުން ޔުއާންއަށް އިތުރަށް ނަފްސު ކޮންޓްރޯލެއް ނުކުރެވުނެވެ.މަޑުމަޑުން ދިމްރާގެ މޫނާ މޫނު ގާތްކޮށްލެވެމުން ދިޔައެވެ.

“މަންމީ…..”                     ދިމްރާއަށް ހޭވެރިކަންވެ ސިހުން ލިބުނީ އުދުހިލާފަ އާއި ކުރައްޕެއް ޔުއާންގެ ކޮނޑުގައި އިށީންތަން ފެނުމުންނެވެ.ދިމްރާ ހަޅޭއްލަވައި ގަތުމުން ޔުއާންވެސް ދިޔައީ ސިއްސައިގެންނެވެ.ޔުއާންއަށް ލިބުން ސިހުމުގައި ފަހަތަށް ޖެހިލެވުނީ ވާނުވާވެސް ނޭނގި ހުރެއެވެ.ނަމަވެސް ދިމްރާ އަތުގެ އިޝާރާތުން ޔުއާންގެ ކޮނޑު ދައްކަން ފެށުމުން ޔުއާންއަށް ކޮނޑާދިމާލަށް ބަލައިލެވުނެވެ.ދިމްރާއަށް ވެގެން އުޅޭގޮތް ޔުއާންއަށް ނަގައިގަނުވުނީ ދެނެވެ.

ޔުއާން އަތުން އެ ފޮޅާލުމާއިއެކު ދެން ފެނުނީ ދިމްރާ ހުރި ދިމާލަށް ކުރަފި އުދުހިގަތްތަނެވެ. އެއާއެކު ކުރިއަށްވުރެ ބާރަށް ހަޅޭއްލަވައިގެންފާ ދިމްރާ ދުއްވައިގަތީ ސޯފާތަކާ ދިމާލަށެވެ.އެތާހުރެ ކަންފަތުގައި އަތްއަޅައިގެން ހުރެ ހަޅޭއްލަވަމުން ދިޔައިރު ދެލޯ ހުރީ މަރިއިގެންނެވެ.

ޔުއާންއަށް ދިމްރާގެ ކައިރިއަށް ދެވުނީ ދިމްރާ ހަޅޭއްލަވާވަރުން ބޮލަށް އުނދަގޫ ވީވަރުންނެވެ. ނަމަވެސް ޔުއާން އައިސް ކަންފަތުން އަތް ނައްޓާލުމުގެ ކުރިން ދިމްރާ ދެލޯ ހުޅުވާލިއެވެ. އެއާއެކު އަނެއްކާވެސް ދެލޯ ހުޅުވާލުމާއިއެކު ދިމްރާގެ ލޮލުގައި އަޅައިގަތީ އެދިމާލަށް އުދުހިފާއި އަންނަ ކުރައްޕެވެ.އެހެންކަމުން ޔުއާންގެ ގަމީހުގައި ހިފާ ދަމައި ގަނެވުނީީ އެ ކުރަފި އެ އަންނަ ގޮތަށް އައިސްފި ނަމަ އަނެއްކާވެސް އިށީންނާނީ ޔުއާންގެ ގައިގައި ކަމަށް ވީތީއެވެ.ނަމަވެސް ޔުއާންގެ ގަމީހުގައި ހިފާއި ދަމައިގަތުމާއިއެކު ސޯފާ ކޮޅުގާއި އަޅައިގެންފާ ދިމްރާ އަރިއަޅާލިއެވެ.މިކަމަށް ނުވިސްނާހުރި ޔުއާންވެސް ދިމްރާއާއިއެކު ވެއްޓެން ދިޔައެވެ.ދިގު ސޯފާ މައްޗަށް ދިމްރާ ވެއްޓުނުއިރު ޔުއާން އޮތީ ދިމްރާގެ ގައިމައްޗަށް ވެއްޓިފައެވެ.

އެވަގުތަކީ ދޮރު ހުޅުވާފައި ޔުއާންގެ މަންމަ ގެއަށް ވަތް ވަގުތެވެ.ފަހަތުން ދިޔާންވެސް ވަދެގެން އައެވެ.ފެނުނު މަންޒަރުން ދެމީހުންގެވެސް ދެލޯ ދިޔައީ ބޮޑު ވެގެންނެވެ.ހުރިތަނަށް ގާވެފާއި ހުއްޓާ ފަހަތުން އުޝާއާއި ރީމް އަދި ޝާރިމްވެސް ވަދެގެން އައެވެ.ދިޔާންއާއި ޔުއާން މަންމަ ހުރިގޮތުން އެމީހުން ފުރަތަމަ ތިބީ ވާނުވާ ނޭނގިފައެވެ.އެމީހުންނަށްވެސް ދިޔާންމެނަށް ފެނުނު މަންޒަރު ފެނުނީ ދިޔާންމެން ކައިރިއަށް އައިސް ހުއްޓިލުމުންނެވެ.އެ ތިން މީހުންނަށްވެސްވީ ދިޔާންމެނަށް ވީ ވަރެވެ.ހުރިތަނަށް ހުއްޓި ލެވުނީއެވެ.ފެނުނު މަންޒަރު ޤަބޫލުކުރަން ދަތިވިއެވެ. އޭރު އަދި ޔުއާންއާއި ދިމްރާއަކަށް އެތާ ބަޔަކު ތިބި ކަމެއްވެސް ނޭނގެއެވެ.އެކަމަށް ވިސްނޭ ވަރަށްވުރެ ދެމީހުންވެސް ތިބީ އަމިއްލަ ދުނިޔެއެއްގައެވެ.

“ޔުއާން” ދިޔާންގެ ބާރު ހަޅޭކުގެ އަޑަށް ދެމީހުންވެސް ދިޔައީ ސިއްސައިގެންނެވެ. ހަމަހޭވެރިކަން ވުމާއިއެކު ދެމީހުންނަށްވެސް ފުންމައިގެން ތެދުވެވުނު ގޮތްވެސް ނޭނގުނެވެ.އޭރު ދިޔާންވެސް ބާރު ހިނގުމުގައި އެމީހުން ކައިރިއަށް އައިސް ހުއްޓިލަނީއެވެ.ހީނުކޮށް ހުއްޓާ ޔުއާންގެ މޫނު މައްޗަށް އަރައިގެން ދިޔައީ ދިޔާންގެ އަތުގެ ހޫނު ހަމަލާއެކެވެ.ޔުއާންއަށް ސިހުންލިބިގެން ދިޔައިރު ދިމްރާއަށް ދެލޯ ބޮޑު ކޮށްލަމުން އަނގަމަތީ އަތްއަޅާ ލެވުނެވެ.ދިޔާންގެ މޫނުމަތިން ފެންނަމުން ދިޔައީ ރުޅިވެރިކަމެވެ.ދެވަނަ ފަހަރަށްވެސް ދިޔާންގެ އަތް އުފުލާލެވުނީ ޔުއާންގެ މޫނުމަތީ ޖެހުމަށެވެ.

ދިޔާންގެ އަތް އުފުލުނީ ޔުއާންގެ ގައިގަ ޖަހަންކަން އެނގުމުންވެސް ޔުއާންއަށް ދުރަށް ޖެހިލާކަށް ހިތަކަށް ނައެވެ.ނަމަވެސް ހީކުރި ގޮތާއި ހިލާފަށް އެ އަތުގެ ހޫނު ހަމަލާއެއް ޔުއާންގެ މޫނު މައްޗަކަށް މިފަހަރަކު ނޭރިއެވެ.މިފަހަރު އެ ހަމަލާ އެރީ ޔުއާންގެ ދިފާއުގައި އެދެމެދަށް ވަތް ދިމްރާގެ މޫނު މައްޗަށެވެ.ދިޔާން ޖެހިލެން ބާރުކަމުން ދިމްރާގެ ހެއަށްވެސް ގޮތްވެގެން ދިޔައެވެ.ރުޅީގައި ދިޔާންއަށް އަތުން ޖެހުނީ އެހާވެސް ބާރަށެވެ. ދިމްރާގެ މޫނުމަތީގައި ޖަހާލެވުމުން ދިޔާންއަށްވެސް އެހެންމީހުންނެކޭ އެއްފަދައިން ލިބިގެން ދިޔައީ ޝޮކެކެވެ.ފަހަތަށްވެސް ޖެހިލެވުނެވެ.އެވަގުތު ޔުއާންއަށް ދިމްރާގެ ދެކޮނޑުގައި ހިފާއި ގައިގައި ޖައްސާލެވުނީ ދިމްރާ ވެއްޓިދާނެހެން ހީވުމުންނެވެ. ނޭނގުމެއްގައިވިޔަސް ދިޔާންއަށް ޖެހުނީ އެހާވެސް ބާރަށެވެ.

“ޔާން..ޔާންއަށް ތި ހީކުރެވުނީ އަދި ރަނގަޅަކަށް ނޫނޭ..ޔުއާން އުޅުނީ ތި ހީކުރާ ކަހަލަ ގޯސްކަމެއް ކުރާކަށް ނޫން..އުދުހޭ ކުރައްޕެއް ފެނިގެން އަހަރެންނަށް ޔުއާން ގައިގަ ނޭނގި ހުއްޓާ ހިފާއިގަނެވުމުން އަހަރެންނާއެކު ޔުއާންވެސް ވެއްޓުނީއޭ” ދިމްރާއަށް ވާހަކަ ދެއްކުން ވެގެން ދިޔައީ އުނދަގޫ ކަމަކަށެވެ.އަނގައިގަ ލޭ ރަހަ ލީ ހެންވެސް ހީވިއެވެ.ބާރުގަދަ ފިރިހެނަކު ރުޅި އައިސްގެން ޖަހާއިރު ކިހާ ބާރަކަށް ޖަހާނެ ހެއްޔެވެ؟

ދިޔާންގަތީ ލަދެވެ.އޭނާއަށް އެންމެ ގާތް ރަހުމަތްތެރިޔާއަށް އިތުބާރެއް ނެތޭ ޔުއާން މިހާރު ހީކުރާނެއެވެ.އަނެއްކޮޅުން ޔުއާންގެ މަންމަ ހުއްޓަ މޫނުމަތީ އެގޮތަށް ޖެހުމުން ޔުއާންވެސް ކިހާ ލަދެއް ގަންނާނެ ހެއްޔެވެ؟އޭނާއަށް ފެނުނު މަންޒަރަށް އެހާ އަވަހަށް ގޮތް ނިންމުނީ ކީއްވެ ހެއްޔެވެ؟ފުރަތަމަ ރީއްޗަށް އަހާލެވުންނަމަ މިހެންނެއް ނުވީސްއެވެ.އެދެމީހުންނަކީ އެވަރަށް ފައިޓްކޮށް އުޅޭ ދެ މީހުންނަށްވީއިރު އެފަދަ ކަންތައް ހިނގާފާނެ ކަމަށް ކުރިން އެ ސިކުނޑިއަށް ނުވިސްނުނީ ކީއްވެ ހެއްޔެވެ؟ މަންޒަރު ބަލަންތިބި އެންމެންވެސް މިހާރު އޭނާއާއި ދޭތެރޭ ދެކޭގޮތް ބަދަލުވާނެކަން ޔަޤީނެވެ.އޭނާއަށް އަމިއްލަ ނަފްސު ދެކެވެސް ރުޅި އާދެވިއްޖެއެވެ.

ގާތް މީހުންނަށްވެސް އޭނާއަށް ފުރިހަމަ އިތުބާރު ނުކުރެވެނީ ހެއްޔެވެ؟ނޫނެކެވެ.އޭނާއަށް އެ މަންޒަރު ބަލަން އުނދަގޫވީ ދިމްރާ އޮތީމައެވެ.ޔުއާން އެ މަޤާމުގައި އޮތީމަކާ ނޫނެވެ.ދިމްރާއަށް ގޮތެއް ވެއްޖެނަމަ އޭނާއަކަށް ދުވަހަކުވެސް އަމިއްލަ ނަފްސަކަށް މައާފެއް ނުކުރެވޭނެއެވެ.ޔުއާންގެ މަގާމުގާ ކޮންމެ މީހަކު އޮތް ނަމަވެސް އޭނާއަށް އަތް އިސްކުރެވުނީހެވެ.އެހާވެސް އޭނާ ދިމްރާދެކެ ލޯބިވެއެވެ.ޖެއްސުންކޮށް ހެދިޔަސް އޭނާގެ އަމަލުތަކުގައި ދިމްރާއަށް ލޯބިނޫން އެއްޗެއް ނުވާނެއެވެ.

ހިތަށް ވެރިވެގެން ދިޔަ ހިޔާލުތަކުން ދިޔާންއަށް ދެއަތުން ބޮލުގައި ހިފަހައްޓާ ލެވުނެވެ.ދުވެފާއި ޓެރަހަށް އަރަން ދެވުނީ އެއްވެސް މީހަކާ މޫނު ދިމާކުރަން ނުކެރިގެންނެވެ.ދިޔާން ޓެރަހަށް އެރިގޮތަށް ދިޔައީ މަގުމަތި ވެންނަ ފަރާތުގެ ރެއިލިން ކައިރިއަށެވެ.ރެއިިލިންގައި އެ އަތުން ތަޅަމުން ދިޔައީ އެއަތުން އެންމެ ލޯބިވާ ދެފަރާތަށް އަތްއިސްކުރެވުމުންހެން ހީވެއެވެ.ފަހަރަކަށްވުރެ ފަހަރެއް ރެއިލިންގާއި އަތުން ޖަހާލާލެން ބާރެވެ. ނަމަވެސް ފަސް ހަބުރު ޖަހާލުމުންވެސް އެ ހިތަށް ހަމަޖެހުން ލިބުނު ކަމަކަށް ނުވިއެވެ.އެހެންކަމުން ދެންވެސް އަތްނެގީ ރެއިލިންގައި ޖަހާލުމަށެވެ. ނަމަވެސް އޭގެ ކުރިން މީހަކު އޭނާގެ އަތުގައި ހިފިއެވެ.

“ޔާން ސްޓޮޕިޓް” ޔުއާން ދިޔާންގެ އަތުގައި ހިފަހައްޓާލައިގެން ހުރެ ބުނެލިއެވެ.

“އާން..އައިމް ސޮރީ..ޖަސްޓް ސޮރީ..އަހަރެންނަށް މާއަވަހަށް އަތް އިސްކުރެވުނީ..އެވެސް އަދި ޒީނައްތަ ކުރިމަތީ..ޕްލީޒް..އާންއަށް ޓްރަސްޓް ނެތީއޭ ހީ ނުކުރައްޗޭ..އަސްލު ދިމްއަށް ގޮތެއް ވެދާނެތީ އަހަރެންނަށް އަބަދުވެސް ހުރެވެނީ ބިރުން..އެހެންވެ ކަންނޭނގެ ސިކުނޑިއެހާ ރަނގަޅަށް މަސައްކަތްނުކުރީ..އަހަރެން….” ދިޔާންއަކަށް އިތުރަކަށް ވާހަކައެއް ނުދެއްކުނެވެ. އިތުރަށް އެއްޗެއް ބުނަން އުނދަގޫވެގެން ދިޔައިރު ލޮލުން ވެއްޓިގެން ދިޔައީ ކަރުނަ ތިއްކެކެވެ. އެހާވެސް އޭނާ މިރޭ ދެރަވެއްޖެއެވެ.ޔުއާންއަކީ އޭނާގެ އެންމެ ދުވަސްވީ އެކުވެރިޔާއެވެ. ދެގޮތެއްނުވެ މިއަދާ ހަމަޔަށް އޭނާކައިރީ ހުރެދިން އެއްފަރާތެވެ.އެފަދަ މީހަކަށް ކުޑަވަގުތު ކޮޅަކަށްވިޔަސް އިތުބާރު ގެއްލިގެން އަތް އަތްއިސްކުރެވުނީތީ އޭނާ ލަދުގަނެއްޖެއެވެ.އެހާމެ ދެރަވެސް ވެއްޖެއެވެ.

“ޔާން!ކަމޯން..އަހަރެން ރުޅިއެއް ނާދެޔޭ.. އަހަރެންނަށްވެސް ޔާންގެ މަޤާމުގަ ހުރިނަމަ އެފަދަކަމެއް ކަންނޭނގޭ ކުރެވޭނީ..މޯމްވެސް ނާންނާނެ ރުޅިއެއް..ސޯ ޖަސްޓް ލީވްއިޓް. އަހަރެން ހަމަ ކޫލްއޭ” ޔުއާން މިހެންބުނެ ދިޔާންގެ ގައިގަ ކުޑަކޮން ބައްދާލިއެވެ.އަދި ކުޑަކޮށް ދިޔާންގެ ގުދުގައި ތަޅާލިގޮތުން ދިޔާން މަޑުމަޑުން ހޭންފެށިއިރު ޔުއާންގެ މޫނުމަތީގައިވެސް ވަނީ ހިނިތުންވުމެކެވެ.އޭރު ދިމްރާމެންވެސް އައިސް ޓެރަހަށް އަރައިފިއެވެ.

“އަހަރެންނަށްވެސް ދީބަލަ ތިކަހަލަ ހަގެއް” ދިމްރާ އެދެމީހުންނާ ކައިރިއަށް އަންނަމުން ބުނެލިއެވެ. ދިމްރާގެ އަޑަށް ދިޔާންއަށް ދުރަށްޖެހިލެވުނެވެ.އަދި އަވަސް ހަރަކާތަކާއިއެކު ދެންފެނުނީ ދިޔާން ދިމްރާގެ ގައިގައި އޮޅުލައިގަތްތަނެވެ.ހީވީ ބެއިޙްތިޔާރުގައި ދިޔާންއަށް ކޮށްލެވުނު ކަމެއް ހެންނެވެ.ދިޔާންގެ މި އަމަލުންވެސް ދިޔާން ދެރަވެފައިވާ ވަރު ހާމަކޮށްދިނެވެ.އަދި ހަމަ އެހެންމެ ކޮއްކޮއަށްޓަކައި އެ ހިތުގައިވާ މަތިވެރި ލޯބިވެސް ސިއްރެއް ނުވެއެވެ.

“އޭ ސުޕަރމޭން..ތިހެން މާ އިމޯޝަނަލްވީމަ ނުވެސް ގުޅޭނުން..ދެން އެއްކަލަ ލޯބިލޯބި ރީތި ހިނިތުންވުން ދީބަލަ..އެ ނުފެނިގެން މިރޭ ހޯދާތާ ކޮންއިރެއް” ދިމްރާ އެހެންބުނުމުން ދެރަވެފަ ހުރި ނަމަވެސް ދިޔާންއަށް ހެވުނެވެ.އަދި ބޮޑަށް ދިމްރާ ގާތް ކޮށްލިއެވެ.

“ސޮރީ ޕްރިންސެސް”               “އިޓްސް އޯކޭ އޭ ޔާން..އެހެންނޫނަސް ތިކަހަލަ ޕްރޮޓެކްޓިވް ބޭބެމެން ތިބެންޔާ އެކަހަލަ ހަމަލާތައް ލިބޭނެތާދޯ..އަހަރެންތާ އެހެންވީމަ ހޭނެއް ޖެހޭނީ” ދިޔާން ދެރަވެފައި ހުރީތީ ދިމްރާ ބެލީ ވީހާވެސް މަޖާ މާޙައުލެއް ޤާއިމު ކުރެވޭތޯއެވެ.ހަޤީގަތުގައި ދިޔާން ދެރަވީތީ ދިމްރާވެސް ދެރަވެއްޖެއެވެ. ދިޔާންއަކީ އޭނާގެ ހަޔާތަށް ވަރަށް މުހިންމު މީހެކެވެ.ދިޔާން އޭނަދެކެ ވާ ލޯބި އޭނާއަށް ސިއްރު ވެފައެއް ނެތެވެ.އެހެންމެ އޭނާވެސް ދިޔާންދެކެ އިންތިހާއަށް ލޯބިވެއެވެ.

“އެ އޯކޭއޭ ހީރޯ..މިހާރު ތިއުޅެނީ އަހަރެންގެ ކަށިކޮޅުވެސް އުފުރާލަންހެން ހީވަނީ..ތީ އާދައިގެ ލޯތްބެއް ނޫން އެނގޭ” ދިމްރާ މިހެންބުނެ ހޭންފެށިއެވެ.ދިޔާންއަށްވެސް ދުރަށްޖެހިލެވުނީ އޭނާއަށް ދިމްރާގެ ގައިގައި ހިފަހައްޓާލެވިފައިވަނީ ވަރަށް ބާރަންކަން އިހުސާސްވުމުންނެވެ.އޭރު އެ ތުންފަތުގައިވެސް ވަނީ ހިނިތުންވުމެވެ.

“ލާނެއްގަނޑު” ދިޔާން ދިމްރާގެ އިސްތަށިގަނޑު ހާވާލަމުން ބުނެލިއެވެ.

“ލަވް ޔޫ ޓޫ ޔާންބޭ” ދިމްރާ ރުޅިއައުމުގެ ބަދަލުގައި ކުރިއަށްވުރެ ފުޅާ ހިނިތުންވުމެއް ވެރިކުރުވަމުން ބުނެލިއެވެ.

“ހީހީ..ލަވް ޔޫ ބޭބް” ދިމްރާ އެހެން ބުނުމުން ދިޔާން އެއްމިޔަކަނުން ހީލަމުން ބުނެލިއެވެ.އެތާ ހުރި އުޝާވެސް ދިޔާންގެ ލޮލުގައި އަޅައިގަތީ އެވަގުތުއެވެ.ހަތަރުކަޅި ހަމަވެގެން ދިޔުމާއިއެކު ދިޔާންގެ ހަރަކާތްތަކަށް ހުއްޓުމެއް އައެވެ.ވީގޮތް އެންމެންނަށްވެސް ނަގައިގަނެވުނެވެ.އެހެންކަމުން އުޝާއާއި ދިޔާންއަށް ވަގުތުކޮޅެއް ދީފައި އެމީހުން އެތަނުން ނުކުންނަން ހިނގައިގަތެވެ.ދިޔާން ހުރި ފިޔަވަޅު މަތީ ހުއްޓިލައިގެން ހުރިއިރު ކުރިއަށް ހިނގައިގަތީ އުޝާއެވެ.މަޑުމަޑުން ދިޔާންއާއި ދިމާލަށް ފިޔަވަޅު އަޅަމުން ދިޔައިރު އެ އެދެލޯ ސީދާވެފައި ހުރީ ދިޔާންގެ ލޮލަށެވެ.ކައިރިއަށް ހުއްޓުނު އިރުވެސް ނަޒަރު ވަކިކޮށެއް ނުލައެވެ.

“ލަވްޔޫއޭ”                     “ބޭބީއޭ” އުޝާ ކޮންމެ ލަފުޒެއް ބުނަމުން ދިޔައީ ދިޔާންގެ މޭގައި އަތްއަޅާ މަޑުމަޑުން ކޮއްޕާލަމުންނެވެ.ފަހަތަށް ފިޔަވަޅު އެޅެމުން ދިޔައިރު ދިޔާން މަސައްކަތްކުރީ އަނގައިން އެއްޗެކޭ ބުނެވޭތޯއެވެ.

“ޕްރިންސެސް އޭ”                 “އުޝް..އަހަރެން…”                 “އަހަރެން ކޯއްޗެއް ޔާން؟”             “އުޝް އެއީ އަހަރެން ލޯބިވާތީއޭ..ކޯޒް ޝީ އިޒް މައި ބޭބީ ސިސް” ދިޔާން އެހެން ބުނުމާއިއެކު ފެނިގެން ދިޔައީ އުޝާ ދިޔާންގެ ގައިގައި ބައްދައިގަތްތަނެވެ.ހީނުކޮށް ހުއްޓާ އުޝާގެ ފަރާތުން ފެނިގެން ދިޔަ އަމަލުން ދިޔާންއަށް ލިބިގެން ދިޔައީ ސިހުމެކެވެ.

“ލަވްޔޫ ސޯ މަޗް..ތިވަރުގެ ޕްރިންސެއް ދުވަހަކުވެސް ދެން އަހަރެންނަކަށް ނުލިބޭނެ.. އަހަރެން ވަރުގެ ލަކީގާލްއެއް ހުރި ކަމަކަށް އަހަރެން ނުވެސް ދެކެން..ކޯޒް ޔާން އަހަރެންގެ ލައިފްގަ ހުރީމަ..އިރާދަކުރެއްވިއްޔާ މި ގުޅުން އަބަދު މި ގޮތުގަ ލަހައްޓަވާނެ” އުޝާ މިނޫނީ އިސްވެ “އައިލަވްޔޫ” ބުނެފަކާއެއް ނެތެވެ.އެހެންކަމުން ދިޔާންއަށް އެވަގުތު ކުރެވުނު އުފާވެރި އިހްސާސް ބަޔާންކުރަންވެސް ދައްޗެވެ. މަޑުމަޑުން ދިޔާން އުޝާގެ ގައިގައި ދެއަތް ވަށާލިއެވެ.ލޯބިވެތި ކަމާއި އެކުއެވެ.

“އަހަރެން ދުވަހަކުވެސް ރުޅިއެއް ނާންނާނެ ޔާން ދިމްއަށް ކިތަންމެ ވަރަކަށް ލޯބިދިނަސް..އޭގެ ބަދަލުގަ އަހަރެންގެ އެންމެ ގާތް އެކުވެރިޔާއަށް ތިފަދަ ބޭބެއެއް ލިބުނީތީ އަހަރެން އުފާކުރަން.. އަހަރެންވެސް އެހާ ވަރަށް ދިމްދެކެ ލޯބިވޭ..ހަމަ ކޮއްކޮއެއް ގޮތަށް އަބަދުވެސް ދެކެވެނީ..ރީ އާ ދިމް އެއީ އަހަރެންގެ ހަޔާތުން ދުވަހަކުވެސް ބަދަލު ނުކުރެވޭނެ ދެމީހުން..ސޯ އަހަރެންނަށް ދޭ ވަރަށް ދިމްއަށް ލޯބިދީގެން އަހަރެން ޕްރައުޑް ވާނީ” އުޝާ އިތުރަށް ދިޔާންގެ މޭގައި ބޮނޑިވެލަމުން ބުނެލިއެވެ.އުޝާގެ ކޮންމެ ބަހަކުން ދިޔާންގެ ހިތް އުފަލުން ފޮޅިގެން ދިޔައެވެ.އުޝާ އޭނަދެކެ ވާ މަތިވެރި ލޯބި އެކަމުންވެސް އޭނާއަށް ހާމަ ކޮށްދީފިއެވެ.

“ލަވް ޔޫ ޓޫ މައި ޖާން” ދިޔާން މިހެންބުނެ އުޝާ އުރާލަމުން އެނބުރިގަތެވެ.އެއާއެކު ފަޒާގާއި އެކުވެގެން ދިޔައީ އުޝާއާއި ދިޔާންގެ ހުނުމުގެ އަޑެވެ.އުޝާ ތިރި ކޮށްލަމުން ދިޔާން ބިންމަތީ ބަހައްޓާލިއިރު ދިޔާންގެ ލޮލުން އުޝާއަށް ފެނިގެން ދިޔައީ އުޝާއަށްޓަކާ ދިޔާންގެ ހިތުގައިވާ ސާފު ލޯތްބެވެ.

“އެންޑް ލަވް ޔޫ ސޯ މަޗް..ފޯރ އެވާރ އެން އެވާރ” ދިޔާން މިހެންބުނެ އުޝާގެ ނިއްކުރީގައި ދިޔާންގެ ނިއްކުރިވެސް މަޑުމަޑުން ޖައްސާލިއެވެ.އެއާއެކު ދެމީހުންގެ މޫނު މަތިންވެސް ފެނިގެން ދިޔައީ އުފާވެރި މާނަފުން ހިނިތުންވުމެކެވެ.ޓެރަހުގެ ބޭރު ދޮރުކައިރީ ތިބި ހަތަރު މީހުންނަށްވެސް ފުން ނޭވާއެއް ލެވުނީ ލިބުނު ހިތްހަމަޖެހުމުންނެވެ. އިތުރަށް އެތާ މަޑުކުރަން ނުހަދާ ހަތަރު މީހުންވެސް އަވަހަށް ބެލީ ތިރިއަށް ދެވޭތޯއެވެ.އެއީ އެމީހުންގެ ސަބަބުން އެދެމީހުންގެ އެ އުފާވެރި ވަގުތު ކޮޅަށް ހުރަސް އެޅެން ނޭދޭތީއެވެ.