އެވިއްސާރަ ރޭ… ފަހުބައި

އެހެނަސް މިދުވަސް މި ގޮތަށް އަންނާނެ ކަމަކަށް ފަހަރެއްގައި ވެސް އަހަރެން ހިޔެއް ނުކުރަމެވެ. ދަރިފުޅުގެ އެ އަމަލުން ނީޝާމް ވަރަށް ދެރަ ވިއެވެ. އެ ވަގުތު އަހަރެންނަށް ވެސް ބުނާނެ އެއްޗެއް ނޭންގުނެވެ.

ލިބުނު މާޔޫސް ކަމާ އެކު އަހަރެންނާ ދިމާލަށް ބަލައިލުމަށް ފަހު ނީޝާމު ހިނގައި ގަތީ ކޮޓަރިން ނުކުތުމަށެވެ. ވަގުތަކީ ޝާހިރު ވެސް އައިސް ގެޔަށް ވަތް ވަގުތެވެ. އެވަގުތު އަހަރެން ވަރަށް ހާސްވިއެވެ. ޝާހިރަށް ނީޝާމަކީ ކާކު ކަން ނޭންގި އޭނަޔަށް ގޮތެއް ހަދައިފާނެ ތީއެވެ.

ނީޝާމު ހިނގައި ގަނެފަ ވެސް މަޑުކޮށް ލިއެވެ. އެވަގުތު ކޮޓަރިޔަށް ވަންނަން އައި ޝާހިރަށް ނީޝާމު ފެނުމާ އެކު އެ ހުރި ފިޔަވަޅު މަތީ ހުއްޓެ ވުނެވެ. އަދި ހައިރާން ކަމާ އެކު އެއް ފަހަރު އަހަރެން ނަށް އަނެއް ފަހަރު ނީޝާމަށް ބަލައި ލިއެވެ. އަހަރެން ހުރީ ނޭވާ ހިފަހައްޓައި ލައިގެންނެވެ. ދެން ވާނީ ކިހިނެއް ކަން އަންދާޒާ ކޮށްލަން ވެސް ނޭންގި ފައެވެ. އެ ގޮތަށް އިރުކޮޅަކު ހުރުމަށް ފަހު ޝާހިރު އައިސް ނީޝާމުގެ ކުރިމަތީ ހުއްޓުނެވެ.

“ތީ ކާކު ކަން އަހަރެން ނަށް ބުނެދީ ފާނަން؟ އަދި ކަލެޔާ ޝާނީ އާ އޮތީ ކޮން ގުޅުމެއް؟” އަހަރެންނާ ދިމާލަށް ބަލައ ލަމުން އާދައިގެ ރާގެއްގައި ޝާހިރު ބުންޏެވެ. ހިތްހަމަ ޖެހުމުގެ ނޭވާއެއް އަހަރެން ނަށް ދޫކޮށް ލެވުނީ ދެނެވެ. އެވަގުތު ނީޝާމު އަހަރެންނާ ދިމާލަށް ބަލައި ލުމަށް ފަހު ވާހަކަ ދައްކަން ފެށިއެވެ.

އަހަރެންގެ ނަމަކީ ނީޝާމު އެވެ. އަދި ޝާނީ މަރުވި ކަމަށް ނިންމައިގެން ހުރި ޝާނީގެ ފުރަތަމަ ފިރިމީހާއެވެ. ދިމާވި ހިތާމަ ވެރި ހާދިސާ އެއްގައި އަހަރެމެން ދެމީހުން ވަކި ވީ އެވެ.

އެރޭ ފަހުން ވީ އެއްވެސް ކަމެއް ހަނދާ ނެތުނަސް އަހަރެންނަށް ތަންދޮރު ވަކިވެ ދެ ލޯ ހުޅުވާލި އިރު ލޮލުގައި ފުސްކަމެއް ހުރި ނަމަވެސް އަހަރެން އޮތީ ހޮސްޕިޓަލެއްގެ ތެރޭގަ ހުރި އެނދެއްގައި ކަން އަހަރެންނަށް އެނގުނެވެ.

އަހަރެން ރަނގަޅަށް އެތަނަށް ނަޒަރު ހިންގައި ލުމުން އަހަރެންނަށް މި އޮވެވުނީ އިނޑިއާގެ ހޮސްޕިޓަލެއްގެ އާންމުންގެ ވޯޑުގެ ތެރޭގަ ކަން އެނގުނެވެ. އޭރު ވޯޑަށް ވަންނަ ދޮރުމަތީ ކަހަލަ ގޮތަކަށް އަހަރެންނަށް ފުރަގަސް ދީގެން އަހަރެން ނުދައްނަ ބަހަކުން ދެ މީހަކު ވާހަކަ ދައްކަން ތިއްބެއެވެ. އަހަރެން ފިޔަވައި އެ ވޯޑުގެ ތެރޭގަ އެވަގުތު އިތުރު މީހަކު ވެސް ނެތެވެ.

އެވަގުތު އަހަރެން އެތާނގަ އޮންނަން ޖެހޭ އެއްވެސް ސަބަބެއް އަހަރެން ނަކަށް ނުވިސް ނުނެވެ. އެހެން ކަމުން އެނދުން ތެދުވުމަށްޓަކައި އަތް ހިއްލައިލި ވަގުތު އަތަށް ގުޅާފަ އޮތް އައިވީ ފެނުމުން ހައިރާންވިއެވެ. އަދި އަހަރެން އައިވީ ނައްޓައިލަން އުޅެނިކޮން ދޮރުމަތީ ތިބި ދެ މީހުންގެ ތެރެއިން އެކަކަށް ފެނިގެން އައިސް އަހަރެންގެ އަތުގަ ހިފަހައްޓައި އެކަން މަނާކޮށް ހިނިތުން ވުމާއެކު ބޮލުގެ އިޝާރާތުން އެނދުގައި އޮށޯ ތުމަށް އެދުނެވެ. އަހަރެން ނަށް އޮވެވުނީ މި ވަނީ ކިހިނެއްކަން ނޭންގި ހައިރާން ވެފައެވެ.

އިރުކޮޅަކު އެހެން އޮށްވައި ވޯޑުގެ ތެރެޔަށް ވަދެގެން އައިސް އަހަރެން ކައިރީ ހުއްޓުނީ ނަރުހެކެވެ. އަދި ހިނިތުން ވުމާއެކު އިނގިރޭސި ބަހުން ކިހިނެއްހޭ އަހަރެން ކައިރި އަހާލިއެވެ. ޖަވާބުގައި އަހަރެން ވެސް ރަނގަޅޭ ބުނެލީމެވެ. އެހެނަސް އެޔަށް ވުރެން ބޮޑަށް އަހަރެން ބޭނުންވީ އަހަރެން އެތަނުގައި އޮންނަން ޖެހުނު ސަބަބު އޮޅުން ފިލުވާށެވެ. އެހެން ކަމުން އަހަރެން އެނަރުސް ކައިރީ އެވާހަކަ އެހީމެވެ. ސަބަބަކީ އަހަރެން ކައިރީ ހުރި މީހަޔައް އަހަރެން ކިޔާ އެއްޗެއް ނޭންގި ދާނެތީއެވެ. އެވަގުތު ނަރުސް އަހަރެން ކައިރީ ތިބި ދެމީހުންނާ އަހަރެންނަން ނޭންގޭ ބަހަކުން އެއްޗެހި ތަކެއް ކިއުމަށް ފަހު އަހަރެން އެތަނުގައި އޮންނަން ޖެހުނު ސަބަބު އަހަރެންނަށް އޮޅުން ފިލުވައި ދިނެވެ.

އެއީ އިނޑިޔާގެ ފަޤީރު ހިސާބެއް ގައި އުޅޭ ބައެއް ކަމާ އެ މީހުންނަށް އަހަރެން ފެނުނީ އެމީހުންގެ ގެ ކައިރީ އޮންނަ ކޯރެއް ކައިރީ އަށްގޮސް މަސް ހިފަން އުޅުމުގެ ތެރޭގައި އެ ކޯރުގެ ތެރޭގަ ހެދިފަ އޮތް ކިސަޑު ގަނޑެއްގެ ތެރެއިން ކަމަށެވެ. އެވަގުތު އަހަރެންނަށް ދެލޯ މަރާލެވުނީ ހެއްދެވި ފަރާތަށް ޝުކުރު ކުރަމުންނެވެ. އަދި ހަމަ އެދުވަހު އަހަރެން ހޮސްޕިޓަލުން ދޫ ވެސް ކޮށްލިއެވެ. އަދި ފަހުން ދައްކަން އައުމަށް ވެސް އެދިފައެވެ.

އެގޮތުން އެ ހާދިސާގަ އަހަރެންގެ ހަށިގަނޑަށް ވަނީ އެކި ވަރުގެ އަނިޔާ ތައް ލިބިފައި ކަމަށާއި އެކަން ރަނގަޅު ވުމަށް ހަތަރު ވަރަކަށް އަހަރު ނަގާނެ ކަމަށް ވެސް އެ ނަރުސް ކުއްޖާ ބުންޏެއެވެ.

އެހެން ކަމުން ފާއިތުވި ހަތަރު އަހަރުގެ ތެރޭގައި އަހަރެން މި އުޅުނީ އެ މީހުންގެ ހިތްހެޔޮ ކަމާ އެކު އެމީހުންގެ ކައިރީ އަހަރެންގެ ހަށިގަނޑަށް ލިބިފައިވާ އަނިޔާ ތަކަށް ފަރުވާ ހޯދުމުގައި ރާއްޖޭން ބޭރުގައެވެ.

އެގޮތުން އަހަރެންގެ އާއިލާ އަށް އަހަރެން ދިރި ހުރިކަން އަންގަން ވަރަށް މަސައްކަތް ކުރީމެވެ. ހަމަ އެހެންމެ ޝާނީގެ ޚަބަރެއް ވޭތޯ ވެސް އެކި ގޮތް ގޮތުން އަހަރެން ވަރަށް މަސައްކަތް ކުރީމެވެ. ނަމަވެސް އެކަން އަހަރެންނަށް ކާމިޔާބު ނުވީ އޭރު އަހަރެން ދިރިއުޅެން ޖެހުނު ހިސާބުގެ ގޮތުންނެވެ.

އެހެން ކަމުން ޝާނީ ދުނިޔޭގަ ހުރި ކަމެއް ވެސް އަދި ނޫން ކަމެއް ވެސް އަހަރެން ނަކަށް ނޭން ގެއެވެ. އަހަރެން އެކަމާ ދެރަވެ މާޔޫސް ވިއެވެ. ނަމަވެސް އަހަރެންނަށް ޝާނީގެ ހަނދާން ތަކާ ދުރަކަށް އެންމެ ހިނދު ކޮޅަކަށް ވެސް ނުދެވުނެވެ. ސަބަބަކީ އަހަރެން ޝާނީ ދެކެ ވީ ހަޤީޤީ ލޯބި ކަމަށް ވީތީ އެވެ.

ޝާނީގެ ހަނދާންތަށް އަހަރެންގެ ހިތުގައި ބިންވަޅު ނެގިފައި ވާ އިރު އަބަދު ހެން ޝާނީގެ އެ ރީތި ސޫރަ އަހަރެންގެ ލޯ މަތީ ކުރެހިފައި ވެއެވެ. ކޮންމެ ރެޔަކު ހެން ނިދެނީ ޝާނީގެ ޚިޔާލު ގައި އޮށް ވައެވެ. ހިތް ބުނަމުން އައީ އަދި އުއްމީދު ވެސް ކުރީ ޝާނީ މަރުނުވެ ދުނިޔޭގަ ހުރިއްޔާ އަހަރެންނާ އަދި ކޮންމެ ވެސް ދުވަހަކުން ބައްދަލް ވާނެ ކަމުގައެވެ.

އެގޮތުން އަހަރެން ރާއްޖެ އައުމަށް ކުރި މަސައްކަތުން އެތަނުން ދިވެހިންގެ ބަޔަކާ ދިމާވެ އެތައް މަސައްކަތަކުން އަހަރެންނަށް ރާއްޖެ އާދެވި އަހަރެންކުރި އުއްމީދު ހާސިލް ވެ އެ ނަސީބު ވެސް މިއަދު އަހަރެން ނަށް ވަނީ ލިބިފައެވެ. އެހެނަސް…..

ނީޝާމުގެ ވާހަކަ އެ ހިސާބަށް ދިޔަ އިރު ނީޝާމަށް ވަނީ ރޮވިފައެވެ. ހިން ދިރުވައި ލަމުން އަހަރެން އިސް ޖަހައިލީ އަހަރެން ދެރަވެފައި ހުރި ކަން ނީޝާމަށް އަދި ޝާހިރަށް ވެސް އަންގަން ބޭނުން ނުވާތީއެވެ.

އެވަގުތު ޝާހިރު ނީޝާމު ގެންގޮސް ކޮޓަރި ތެރޭގަ ހުރި ގޮނޑި އެއްގައި ބޭންދިއެވެ. އޭރު ޝާހިރުގެ މަންމަ ވެސް އައިސް ކޮޓަރި ޔަށް ވަންނަނީއެވެ. އެހިނދު ލޯ ފުހެލަމުން އަނެއްކާ ވެސް ނީޝާމު ވާހަކަ ކުރިޔަށް ގެންދިޔަ އެވެ.

އެގޮތުން ކުރީ ދުވަހު ހޮސްޕިޓަލް ކައިރިން ޝާނީ އާ ދިމާ ވީ އަހަރެންގެ ހަށިގަނޑަށް ލިބުނު ގެއްލުން ތަކަށް ބޭސް ކޮށް ރަނގަޅު ވުމަށް ފަހު މާލެ އައިތާ ދެވަނަ އަށްވީ ހަފުތައިގަ ހޮސްޕިޓަލް ގައި ބާއްވާފަ އޮތް ރައްޓެއްސަކަށް ގޮވައި ލައިފަ ގެޔަށް ދާން ދިޔަ މަގު މަތިން އިއްތިފާޤަ ކުންނެވެ. އެދުވަހު އަހަރެން ވަރަށް އުފާ ވިއެވެ. ޝާނީ ވެސް ދުނިޔޭގައި ހުރެ އަހަރެންނާ ބައްދަލް ވީތީއެވެ.

އެހެނަސް އެހާމެ ހާއިރާން ވެސް ވިއެވެ. ސަބަބަކީ އެތަށް އަހަރެއް ފަހުން ފެނިފަ އަހަރެން ގޮވައި ލީމަ ވެސް ޝާނީ އަހަރެންނާ ވާހަކަ ނުދައްކާ އައިތީއެވެ. އެހެންވެ އަހަރެން ބޭނުންވީ ޝާނީ އާ ބައްދަލް ކޮށް އެރޭ އަހަރެންނަށް ކަންތަށް ވެގެން ދިޔަ ގޮތާ މިހާރު އަހަރެން ނިންމާފަ އޮތް ނިންމުން ޝާނީ އަށް ކިޔައި ދޭށެވެ.

އެގޮތުން ޝާނީ އުޅޭ ތަނެއް ހޯދަން ކުރި މަސައްކަތުން އަހަރެންނަށް ޝާނީ އުޅޭ ގެ އެނގުނީ އަހަރެންގެ ޒަމާންވީ އެކުވެރިއެއް ކަމަށްވާ ވާފިރު ގެ ފަރާތުންނެވެ. އަދި އޭނަޔަށް އެނގިފައި އޮތް ގޮތުގައި ޝާނީ އުޅޭނީ ޝާހިރު ކިޔާ މީހަކާ އިނދެގެން ކަމުގައި ވެސް ބުންޏެވެ.

ޝާނީ އެވެ. އަހަރެން މިއުޅެނީ ރަށަށް ބަދަލު ވާށެވެ. މަންމަ އާ ބައްޕަ ގާތަށެވެ. އަހަރެމެންގެ ދަރިފުޅު ރަނގަޅަށް ބަލަށްޗެވެ. އެއީ އަހަރެން ޝާނީގެ ފަރާތުން އެދޭ ވަރަށް ބޮޑު އެދު މެކެވެ.

އެ އަށްފަހު ގޮނޑިން ތެދު ވެގެން ގޮސް ލީޝް އުރާލައި ބޮލުގައި ބޮސް ދިނުމަށް ފަހު ބެހެއްޓިއެވެ. ޝާނީ އާ ދޭތެރޭ އަހަރެންގެ ހިތުގައި އެއްވެސް ބުރަކަމެއް ނެތެވެ. ޝާނީ ޝާހިރަށް ވަފާތެރި ވަށްޗެވެ. އަހަރެން ދެކެ ލޯބި ވީ ފަދައިން ޝާހިރު ދެކެ ވެސް ލޯބި ވައްޗެވެ. ހުރިހާ އެންމެންނަކީ އަހަރެން ފަދަ ބަދު ނަސީބު ވެރި އެއް ނޫނެވެ. ނީޝާމު ވާހަކަ ދައްކަމުން ދިޔަ އިރު ޝާހިރުގެ އިތުރުން މަންމަ ވެސް ހުރީ ބުނާނެ އެއްޗެއް ނޭންގި ފައެވެ.

ޝާނީ އެވެ. ހިތްހެޔޮ ކުރަށްޗެވެ. އަހަރެން ދެން ދަނީއެވެ. ނީޝާމު އެހެން ބުނުމަށް ފަހު ކޮޓަރިން ނުކުތް ގޮތަށް މަޑު ވެސް ކޮށް ނުލައި ނުކުމެގެން ދިޔައީއެވެ.

އެވަގުތު އަހަރެންނަށް ބުނެވުނެވެ. ނީޝާމު އެވެ. އަހަރެންނަށް މާފު ކުރާށެވެ. އެހެނަސް މިހާރު މިވަނީ ވަގުތު ފާއިތު ވެފައެވެ.

“ނީޝާމު.”

އެންމެ ފަހު ފަހަރަށް ވެސް އަހަރެންނަށް ގޮވައި ލެވުނެވެ. އެވަގުތު ޝާހިރު އަހަރެންގެ ގާތަށް އައެވެ. އެހިނދު އަހަރެން ޝާހިރުގެ ކޮނޑުގައި ބޯ އަޅައި ލުމަށް ފަހު ރޯން ފެށީމެވެ.

ނިމުނީ