މޮޔަހިތްމަގޭ 1

ލަސްލަހުން ދުރުކޮށްލި އެސްފިޔަތަކުގެ ތެރެއިން ކުޑަދޮރު ކައިރީ ހެލިލަހެލިލާ ހުރި ލޭސް ފޮތިގަނޑަށް އެޅިފައިވާ އިރުގެ ފުރަތަމަ ދޯދިތައް ފެނުނެވެ. މަޑުކަމުން ފުށްކަފަކޮޅެއް ފަދަ ތަންމަތީގައި އޮވެފައި ޒާނަ ފުރޮޅިލިއެވެ. އެވަގުތު އެނދާއި ދިމާ މަތީގައި ސީލިންގްގައި ހަރުކޮށްފައިވާ ވިންޑްޗައިމްގެ މިއުޒިކީ އަޑުއިވިފައި އޭނާގެ ތުންފަތަށް ލުއި ހިނިތުންވުމެއް ވެރިވެގެން ދިޔައެވެ. ކަންނެތްގޮތަކަށް ދެލޯމަރާ ތަގުޅިކޮށްލުމަށްފަހު އަނެއްކާވެސް ހުޅުވާލާފައި ޒާނަ ތެދުވިގޮތަށް ތިރީގައި ބަހައްޓާފައި ހުރި މަޑު ފައިވާނަށް ދެފައި ކޮށްޕާލައިގެން ގޮސް އެނދުގެ ބޯ ލާކޮޅުގައި ހުރި ސްވިޗަކަށް އޮބާލުމާއެކު، ހަމަ އެހިނދުން ކޮޓަރީގެ ދޮރުން ވަދެގެން އަންނާތީ ފެނުނީ ހުދު ޔުނީފޯމްގައި ތިބި ދެ އަންހެން ކުދިންނެވެ.

އެއް ކުއްޖެއްގެ އަތުގައި ހުރި ތަބަކުގައި އާވި އަރައަރާ ހުރި ހޫނު ކޮފީތަށްޓެއް ހުއްޓެވެ. އަނެއް ކުއްޖަކު އައިސް އަލަމާރި ކައިރިއަށް ޖެހިލާފައި، ހެދުން ފިހާރައެއް ފަދަ އަލަމާރި ތެރެއިން ހުދު ބާތްރޯބް އަކާއި ފައްޖަހާފައިވާ ތުވާޔެއް ނަގައިގެން ގޮސް ފާހާނާއަށް ވެއްދިއެވެ. ތަނަވަސް ކޮޓަރީގައި އެނދު ހުރި ފަރާތް ނޫން އަނެއް ފަރާތުގައި ޓީވީއާއި ކުރިމަތިވާގޮތަށް ބަހައްޓާފައިވާ ބީޗް ޗެއަރ ބައްޓަމަށް ހުރި ގޮނޑިއެއްގައި ޒާނަ އިށީނުމާއެކު ކުރިމަތީ ހުރި ބިއްލޫރި ވަށްމޭޒުމަތީ ކޮފީތަށި ބަހައްޓައިފި އެވެ. އެ އަންހެން ކުއްޖާ ޓީވީ ހުޅުވާލަދިނުމާއެކު ދެން ހުރި ކުއްޖާ ޒާނަގެ އެނދުގައި ބޮނޑިބޮނޑިވެފައިވާ ރަޖާގަނޑު ރަނގަޅުކޮށްފައި އެންމެ ރުލެއްވެސް ނީންނާނެހެން އެނދު ރީތިކޮށްދިނެވެ.

ޓީވީއިން ކަސްރަތު ކުލާހެއް ބަލަމުން ކޮފީތަށި ބޮއިހުސްކޮށްލާފައި ޒާނަ ގޮސް ފާހާނާއަށް ވަދެ ފެންވަރަން ފެށިއެވެ. ނިކުތްއިރު އެ ދެ އަންހެން ކުދިން އޭނާގެ އިންތިޒާރުގައި އަތާއި އަތްޖޯޑުކޮށްގެން ކޮޅަށް ތިއްބެވެ. އަލަމާރި ހުޅުވާލާފައި ސެޓިން ފޮތީގެ ފިޔާތޮށި ހެދުމެއްނަގާ އޭނާގެ ލޫޅާފަތިހަށިގަނޑަށް މަހާލާފައި ޑްރެސިން ޓޭބަލް ކުރިމަތީ ހުރި ގޮނޑީގައި އިށީންނަމުން އޭނާ ގޮވާލިއެވެ. އެވަގުތު ދެ އަންހެން ކުދީން ނިކަން ހަރުކޮށް ހިނގާފައި އައިސް ޒާނަގެ ދެފަރާތުގައި ހުއްޓި އެއްކުއްޖަކު އޭނާގެ އިސްތަށިގަނޑުގައި ފުނާއަޅައިދޭން ފެށުމާއެކު އަނެއްކުއްޖަކު އޭނާގެ ފަޔާއި އަތުގެ ނިޔަފަތި ތަކުގައި ކުލަޖައްސަން ފެށިއެވެ. ފުނާއަޅުވާ ނިމުމާއެކު އަންހެންކުއްޖާ ދުރުގައި ހުރި ފައިވާން ހަރުގަނޑުން ޒާނަ ބުނި ފައިވާން ނަގަންދިޔައެވެ. ހިސާބަކަށް ހުޅުވިފައިވާ ދޮރުން ވަދެގެން އައި ޒާނަގެ ހުދުބުޅާ އެތަން ބަލަންއޮވެފައި އެ އަންހެން ކުއްޖާއަށްވުރެ ކުރީން ފައިވާން ތުނބުލައިގެން ދޮރާއި ދިމާއަށް ދުއްވައިގަތެވެ. ޒާނައަށް އެމަންޒަރު ފެނިފައި އޭނާއަށް ފުންމައިގެން ތެދުވެވުނެވެ.

“އޭތް! އޭތް! އަހަރެންގެ ފައިވާން. އަހަރެންގެ ފައިވާން!” ހަޅޭތްލަވައިގަނެވުމާއެކު ޒާނައަށް ހަމަހޭވެރިކަން އަތުވެގެން ބަލާލުމާއެކު ހުރިހާ މަންޒަރެއް ބަދަލުވެގެން ދިޔައެވެ.

ރަނގަޅަށް ބަލާލިއިރު ދުމަށިމަތީ ދިލަޖައްސަން ބަހައްޓާފައިހުރި ވަޅޯމަސްތަކުތެރެއިން މަސްގަނޑެއް ނަގައިގެން މީދަލެއް ދުވެފައިދަނީއެވެ. އަގުބޮޑު ފަރުނީޗަރތަކުން ފުރިފައިވާ މުއްސަނދި ކޮޓަރީގެ ބަދަލުގައި އޭނާއަށް ހުރެވުނީ ފަން ބަދިގެއެއްގައެވެ. ފެންވަރާލައިގެން ނިކުމެ ލީ ރީތިހެދުމުގެ ބަދަލުގައި ޒާނަ ލައިގެންހުރީ ބާވެފައި އޮތް ކަކުލާއި ހަމައަށްއަންނަ ކުރުހެދުމެކެވެ.
“އަޅެ ކޮންދުވަހަކުންތަ މިގޮތަށް ހޭވެރިކަންވެގެން ހޭލެވޭއިރު މިނޫންގޮތަކަށް މަންޒަރު ބަދަލުވާނީ؟” ދެފައިތަޅައިގެންފައި ޒާނަ އެކަނިހުރެ ބޮޑައިހާކާލިއެވެ.

ދެވަނަ ފަހަރަށް މީދަލެއް ދިމާކޮށްލުމުގެ ކުރިން ހުރިހާ ވަޅޯމަސްތަކެއް ތަށްޓަކަށްއަޅާ މަތިޖަހާފައި އޭނާ ބަދިގެއިން ނިކުންނަން ދިޔައެވެ. ޖޯލިފަތީގައި ދުފާލަން އިން އޭނާގެ މަންމަ ހަނީފާ ބިންމައްޗަށް ކުޅުގަނޑެއްޖަހާ ފައިވާނުން ފަސްއަޅާލާފައި ތެދުވެގެން ދޮރާއި ދިމާއަށް ދާންފެށިއެވެ. ފަހަތުން ޒާނަގެ ފިޔަވަޅު އަޑުއަހާފައި އޭނާ ހުއްޓުނުގޮތަށް ފަސްއެނބުރި ބަލައިލިއެވެ.

“ޒާނަ ދަރިފުޅާ. މަންމަ ދާން މިނިކުންނަނީ. އަދި ބުނަން، ހަނދާންކޮށް ދުމަށިމަތީ ހުރި ވަޅޯމަސްކޮޅު މީދަލަށްނުދީ ފޮރުވަން ހަނދާންކުރާތި. އެމަސްކޮޅުގެ ދުވަސް ހިނގައްޖެއްޔާ މިހަފްތާ އެއްކޮށް ހުސްގަރުދިޔަ ކާންޖެހޭނީ.” ކަންތައްކުރަންވީގޮތް ކިޔައިދީފައި ހަނީފާ ނިކުމެގެން ދިޔައެވެ.

ހިރުނދުގަހުގެ އަނެއްކޮޅުގައި މުޑިޖަހައިގެން އެލުވާފައިވާ ބޮޑުއުނދޯއްޔަށް ފުންމައިގެން އަރާ އިށީންދެފައި ޒާނަ ބޮލުގައި އިން ވޫލް ނައްޓާލުމާއެކު ފަންއިސްތަށިގަނޑު ފުރަގަހަށް ވިހުރިގެން ދިޔައެވެ. އެއްއަތަށް ވޫލްކޮޅު އަމުނާލާފައި އުނދޯލިވަލުގައި ހިފާލަމުން ޒާނަ އުނދޯލި ހެއްލަން ފެށިއެވެ.

ޒާނަގެ އާއިލާއަކީ ކުޑަ އާއިލާއެކެވެ. ހަނީފާގެ ކުދިންގެ ބައްޕަ ހުސޭނު ނިޔާވީ ޒާނައަށް، އަށް މަހުގައި ކަނޑަށް ވެއްޓިގެންނެވެ. އާއިލާގައި ފިރިހެނުން ތިއްބެއްކަމަކު ދަރިންނާއި އަނބިންނަށް ޚަރަދުކޮށްފައި ލާރިފޮއްޗެއް ދިއްކޮށްލާވަރެއް އެމީހުންނަކަށްވެސް ނުލިބެއެވެ. ކޮންމެ މީހަކުވެސް އުޅެނީ އަމިއްލަ ބޭނުންތައްވެސް ރަނގަޅަށް ނުފުއްދިގެންނެވެ. ދެން ހަނީފާ ކުރަންފެށީ އަމިއްލަ މަސައްކަތެވެ. ވަލުތެރެއިން ދޮންމިދިލި އޮށް ހޮވައިގެން ގެނެސް އެހިއްކާ ފަޅައި ކަނަމަދު ވިއްކުމާއި ރޯނުވަށައި ފަންގިވިނުންފަދަ މަސައްކަތްތަކެވެ. ދޮށްޓަށްހުރި ސަދާ އާއި ޒާނަ ގޮވައިގެން ހަނީފާ އުޅުނީ ވަރަށް ދަތިހާލުގައެވެ. ހަތް އަހަރުގެ ސަދާއަށް ޒާނަ ހަވާލުކޮށްފައި މަސައްކަތުން އެނބުރި އަންނައިރު ޒާނަ އޮންނަނީ ގިނަފަހަރަށް ރޮއެރޮއެ ވަރުބަލިވެފައެވެ.

ޒާނަގެ ފިޔޮޅުގަނޑު ޖެހުނުފަހުން އޭނާ މަސައްކަތަށް ދަނީ ޒާނަ ގޮވައިގެންނެވެ. ގޭގައި މަސައްކަތްކުރާ ގަޑީގައިވެސް ބިސްކޯދު އުރައެއްކަހަލަ އެއްޗެއް ދީފައި ގޮނޑިއެއްގައި ބޭންދުމުން އެކުއްޖާ ހަނީފާ ކުރާކަމެއް ކޮށް ނިމޭންދެން ބަސްއަހައިގެން ބަލަން އިނދެއެވެ.

ދިރިއުޅުމުގައި ކަންތައްތައް ދިމާވިގޮތުން ފައިސާއަކީ ހަނީފާގެ ނަޒަރުގައި ވަރަށް މުހިންމު އެއްޗަކަށްވިއެވެ. އޭނާ އިންތިޒާރުކުރަމުން ދިޔައީ އޭނާގެ ދެ އަންހެން ދަރިން ބޮޑުވެ މުއްސަދި ފިރިހެނުންނާއި އިނދެގެން އެފައިސާއިން އޭނާއަށް ފައިދާކޮށްދޭނެ ދުވަހަކަށެވެ. އެކަމަކު އެ އުންމީދުތަކުގައި ސަދާ ފުރަތަމަވެސް ހުޅުޖެހީއެވެ. ރަށުގައި އުޅޭ ފަޤީރު ޒުވާނަކާއި ލޯބީގެ ގޮތުން ގުޅި އެންމެފަހުން ހަނީފާގެ އެދުމުގައި ކޮޅުފައިން ޖަހައި ކައިވެނިވެސް ކުރީއެވެ. ސަދާދެކެ ހަނީފާ ރުޅިއަންނަން ފެށީ ދެނެވެ. ޒާނައަށް އޭނާ ނިކަން ރަނގަޅަށް ދުނިޔޭގެ އޮއެވަރު ކިޔައިދެއެވެ. އޮޅިގެން ނަމަވެސް ފަޤީރެއްގެ މަޅީގައި ނުޖެހުމަށް ތަކުރާރުކޮށް ހަނދާންކޮށްދެއެވެ. ހަނީފާ ބުނެއެވެ. ޒާނައެވެ. ދަރިފުޅު އިންނަން ވާނީ ރަށުގައި ނެތްވަރުގެ ބޮޑު މުއްސަންޖަކާއެވެ. ބޮޑެތި ގެއާއި ފިހާރަތަކުގެ ވެރިޔަކާއެވެ. އެދުވަހަކުން ދަރިފުޅާއި މަންމަ އުޅޭނީ ރާނީންގެ ފެންވަރުގައެވެ.

ކުޑަކުޑަ ޒާނަ ބޮޑުވަމުން އައީ ހަނީފާ ބޭނުންވާ ހުރިހާ ޤަބޫލުކުރުންތަކެއް އެއީ އޭނާގެ މަޤްސަދުކަމުގައި ވެގެންނެވެ. ޒާނަގެ އަބަދުގެވެސް ހުވަފެނަކީ މުއްސަދި ދިރިއުޅުމެކެވެ. ބޮޑު ގެއެއްގައި ވަށައިގެން ނޯކަރުން އޭނާގެ ޚިދުމަތުގައި ހުރެ ރެއާއި ދުވާލު ހޭދަވެގެން ދިއުމެވެ. ހިތަށްއަރުވާލި ކޮންމެ އެއްޗެއް ހޯދޭވަރަށް ފައިސާލިބުމެވެ. ފުރާފުރިހަމަވަމުން ދިޔަވަރަކަށް ޒާނަ ދިޔައީ ދުވަހެއް ދުވަހަކަށް ރީތިވަމުން ޒުވާންވަމުންނެވެ. ހަނީފާ އެންމެ ފަހުރުވެރިވަނީ އޭނާގެ އަންހެން ދަރިފުޅުގެ ރީތި ސިފައާއި މެދުގައެވެ. ސޯޅަ އަހަރުގައިވެސް ޒާނަ ހީވަނީ އަށާރަ އަހަރުގެ އަންހެން ކުއްޖެއް ހެންނެވެ. ފައިސާއަށް ބޭނުންވާވަރުން އޭނާ އެއަންހެން ދަރިފުޅުގެ ރީތި ސިފަ ހަތިޔާރަކަށް ހަދައިގެން އެތައްބަޔަކު ލޫޓުވައެވެ. ރަށަށް އަރާ މުއްސަދިންނަށް ޒާނަގެ ކައިވެނި ދޭނަމޭ ކިޔައިގެން އެމީހުންލައްވާ އެތައް ޚަރަދެއްކުރުވައެވެ. އެކަމަކު އެންމެ ފަހުވަގުތު އެއީ ކައިވެންޏަށް އުމުރުވެސް ހަމަނުވާ ކުޑަކުއްޖެއްކަން އެނގުމުން އެމީހުން ނުރުހުން ފާޅުކޮށްފައި އެނބުރިދަނީއެވެ. ހަނީފާ ހުންނަނީ އެމީހުން ބޭނުންނަމަ އެ އުމުރުގައިވެސް ޒާނަގެ ކައިވެނިކުރުވަން ތައްޔާރަށެވެ. އެކަމަކު އެހާ ޅަކުއްޖަކާއި އިންނަން އެއިން އެކަކުވެސް ޤަބޫލެއްނުވެއެވެ. މުދަލަށް ދަހިވެތިވެފައި ވީނަމަވެސް ހަނީފާގެ ރަނގަޅު އެއް ސިފަވެއެވެ. އެއީ އޭނާ ފަހަރެއްގައިވެސް ޒާނަގެ އިއްފަތާއި އަނބުރަށް ކުޑަވެސް ގެއްލުމެއް ލިބުނަކަ ނުދެއެވެ. އަންހެން ކުއްޖެއްގެ އެންމެ އަގުބޮޑު ހަޒާނާއަކީ އެކުއްޖެއްގެ އިއްފަތްތެރިކަން ކަމުގައާއި އެ އިފަތްތެރިކަމަކީ އަލަތު ކައިވެންޏާއި ހަމައަށްވެސް ރައްކާތެރިކުރަންޖެހޭ އެއްޗެއްކަން އޭނާ ޒާނައަށް ވިސްނައިދެއެވެ.

ދޮރާށި ހުޅުވުނު އަޑުއަހާފައި ޒާނައަށް ބަލާލެވުނުއިރު އެތެރެއަށް ވަދެގެން އެދިމާއަށް އައި ދެ އެކުވެރިން ފެނިފައި އުފަލުން ހިނިތުންވެލިއެވެ. ސަމާ އާއި ނާޖިލާ ކޮންމެވެސް ވާހަކައެއް ދައްކާފައި ހެމުން އައިސް އުނދޯލީގެ އަނެއްކޮޅުގައި އަރާ އިށީނެވެ. ތިންމީހުން އެއްތަންވުމާއެކު ސަކަރާތްޖެހުމުގައި ވަގުތުތައް ކުރިއަށް ދިޔައެވެ.

“ދަރިފުޅާ ޒާނަ! ދަރިފުޅާ!” ހަވީރު މަސައްކަތް ނިންމާލާފައި އައިސް ގެއަށް ވަންގޮތަށް ހަނީފާ ޒާނަ ނުފެނިގެން ހޯދަންފެށިއެވެ.

“މަންމާ! އަހަރެން މިއުޅެނީއޭ.” ތުވާލިން ބޮލުގެ އިސްތަށިގަނޑު ހިއްކަމުން ޒާނަ ގޭތެރެއިން ނިކުމެގެން އައިސް ކުރިމައްޗަށް ހުއްޓުނެވެ.

“ތިއިސްތަށިގަނޑުގައި ފުނާއަޅާ ތަންކޮޅެއް ރީތިވެލައިގެން ދޭބަލަ ދޮރުމަތީ މަގު ކުނިކަހާލަން. ދެން ތިހެދުންވެސް ބަދަލުކޮށްފަ ތިއަށްވުރެ ރީތިހެދުމެއް ލާތި! އެންމެފަހުން ކުޑަޢީދަށް މަންމަ ގަނެދިން ހެދުން ކޮބާތަ؟ އެހެދުން ލައިގެން ނިކުންނަން ދޭ!” ޒާނަގެ ބުރަކަށީގައި އަތްއަޅާ ގެއާއި ދިމާއަށް ކޮށްޕާލަމުން ހަނީފާ އަވަސްއަވަހަށް ވާހަކަދެއްކިއެވެ.

“މިއަދު ހެނދުނުވެސް އެމަގުމަތި ކުނިކެހީމެއްނު. ދެން ކީއްކުރަން މިއޮތް ހަވީރު ވީމަ އަލުން އެތަން ކަހަނީ؟ މަންމައަށް އެނގެއެއްނު އެމަގުގައި ކުނިއެޅޭނެ ގަހެއްވެސް ނުހުންނަކަން. ޖެހިގެން ހުންނަގޭ ފޭރުގަހުން ފައިބާފަ ހުންނަ ދެތިންފަތެއް ވަޔާއިއެކު އައިސް އޮވެދާނެ. އެހެންނޫނީ އެތާކު ކުންޏެއް ނުހުންނާނެ.” ޒާނަ ދެކޮޅުހަދަމުން ވާހަކަދެއްކިއެވެ.

“ދެން މާގިނަ ވާހަކަ ނުދައްކާ ބުނީމަ ބުނާގޮތް ހަދަންވީ.” ހަނީފާ ދެބުމަ ގޮށްޖަހާލިއެވެ. މަންމަ ނުރުހުންވިތަން ފެނިފައި ޒާނަ އިތުރު ބަހަކާއިނުލާ އެތެރެއަށް ވަދެގެން ދިޔައެވެ.

ޒާނަ ނިކުތްއިރު ހަނީފާ ޖޯލިފަތި ކުރިމަތީ ހުރި ކޮޅުފިލާ ގޮނޑިއެއްގައި ކަޅުސަޔާއި ފާރޮށި ފޯކޮށްގެން ކާންއިނެވެ. ވަކިއެއްޗެއް ނުބުނެ މަގުމައްޗަށް ނިކުމެފައި ޒާނަ ކުނިކަހަން ފެށިއެވެ. މަގުގައި ފަތެއްނެތްތާގައި ހިރަފުސްކަމުން ހީވަނީ އެހެންކަމެއް ހެންނެވެ. ކުނިކަހަން އޮވެގެން ޒާނަ އަމިއްލައަށް ކުދިކިޔެވެ. ދުންގަނޑެއްހެން މުޅި ހިސާބުގަނޑަށް ހިރަފުސްގަނޑު ބުރުވަމުން ދަނިކޮށް ކުރިމައްޗަށް ހުންނަގޭ ގޯތިތެރޭ ހުރި ޖޯލިފަތީގައި މީހަކު އޮތްހެން ހީވެގެން އެދިމާއަށް ބަލާލެވުނެވެ. ޒާނައަށް ހީވީ ރަނގަޅަށެވެ. ޖޯލިފަތީގައި އެއޮތީ އޭނާ އަދި ނުދެކޭ ޒުވާނެކެވެ. ތެދުވެ ހިންދެމިލަމުން ޒާނަ އެޒުވާނާއަށް ރަނގަޅަށް ބަލާލިއެވެ. ބަލާބެލުމަށް މާލެމީހަކާއި ވައްތަރެވެ. ހަށިގަނޑު ވަރުގަދަ ބައިމަތި ފުޅާ ބިޔަ ޒުވާނެކެވެ. ބޮލުގެ އިސްތަށިގަނޑު ފަންވެފައި ނިކަން ކަޅެވެ. އަޅައިގެންހުރި ހެދުމުން މީހާ ތަނަވަސްވެފައި ބޮޑާކަމާއި ހައިބަތުހުރިކަން ދޭހަވެއެވެ. އެކަމަކު މިލާފައިވާ އެމޫނުން އޭނާ ކޮންމެވެސްކަހަލަ ހިތާމައެއް ތަހައްމަލް ކުރާކަހަލައެވެ.

ޖެހެމުންދިޔަ ވައިގެ އެހީގައި ހިރަފުސްގަނޑު އެނބުރެމުން އެދިމާއަށް ދިއުމާއެކު ޒުވާނާ ކުއްލިއަކަށް ކެއްސައިގެންފައި އަތުން ހިރަފުސްތައް ގަޔާއި ދުރަށް ފޮޅަމުން ކޮޅަށްތެދުވިއެވެ. އެވަގުތު އޭނާއަށްވެސް ޒާނަ ފެނިއްޖެއެވެ. ޒުވާނާ އަވަސްއަވަހަށް އަނެއްފަރާތަށް މޫނު އަނބުރާލާފައި ގޮސް ގެއަށް ވަނެވެ. ހީވީ އޭނާ ޒާނައަށް ފިލަންވެގެން ދިޔަހެންނެވެ. ހިތާއިހިތުން އެއީ ފޮނިމީހެކޭ ކިޔަމުން ޒާނަ އިލޮށިފަތި ހިފައިގެން ގެއަށް ވަންއިރު ހަނީފާ ފާރޮށިކޮޅު ކައިހުސްކޮށްލައިގެން ޖޯލިން ތެދުވަނީއެވެ.

“ޖޯލިފަތީ އެއޮތީ ކާކުކަން އެނގޭތަ؟” ހަނީފާ ޖޯޑުގެ ދެބަޔަށްވެފައިވާ ސައިތަށި އެތެރެއަށް ދަމާލާފައި ޒާނައަށް ބަލައިލިއެވެ.

“އެއީ ޒާނަގެ ކައިވެނިކުރުވަން މަންމަ ބޭނުންވާފަދަ ޒުވާނެއް. ރާކިން އަކީ ރަށުގައި ނެތްވަރުގެ މުއްސަދި މަހުޖަނެއް. މާލޭގައި ގެދޮރާއި އެތައް ފިހާރައެއްހިންގާ މަޝްހޫރު ވިޔަފާރިވެރިއެއް.” ހަނީފާ ވާހަކަދައްކަމުން އައިސް ޒާނަގެ ކުރިމައްޗަށް ހުއްޓުނެވެ.

މަންމަގެ ވާހަކަތަކުން ޒާނަގެ ހިތް އުފަލުން ފޮޅުނެވެ. ދެލޯ ވިދައިގަތެވެ. އުޑާއި ދިމާއަށް ނަޒަރު ހުއްޓާލަމުން ހިޔާލީ ފޮލާކައްކާލަން އޭނާ ހިނދުކޮޅެއްވެސް ނުނެގިއެވެ.

ކޮޓަރިއަށް ވަދެފައި ރާކިން އެނދުގައި ޖައްސާލިއެވެ. ނިތްކުރިމަތީގައި ކަނާއަތް ބާއްވާލައިގެން އޮތްއިރު އޭނާގެ ދެލޮލުން ކަރުނައިގެ އަސަރު ފާޅުވަމުން ދިޔައެވެ. ބޭރުފުށުން އެ ހަށިގަނޑު ކިތަންމެ ވަރުގަދަވެފައި ހެޔޮ ސިއްހަތެއްގައި ވީނަމަވެސް ރާކިންގެ އެތެރެހަށި ވަނީ ހިތާމައިން ކުދިކުދިވެފައެވެ. އެންމެ ގުނަވަނެއް ޒަހަމެއްވުމުން ހަށިގަނޑުގެ ހުރިހާ ހިސާބަކަށް އޭގެ ވޭން ފޯރައެވެ. ހަލާކުވެފައިވާ އޭނާގެ ހިތް އެހަށިގަނޑުގެ ދިރުން ނެތިކޮށްލައި ސިކުނޑިއަށްވެސް ބާރު ފޯރުވާފައިވެއެވެ. މާޒީގެ ކަޅު އަނދިރި ސޮފްހާތަކުން ރާކިންގެ މުޅިދުނިޔެ ބަނަކުރަމުން ދަނީއެވެ. ނޭނގުމުގެ ތެރޭގައި ހެދުނު އެންމެގޯހެއްގެ ސަޒާ އޭނާއަށް ލިބުނީ ބަރުދާސްތު ކުރެވޭ ވަރަށް ވުރެ ހިތިކޮށެވެ.

ކޮޓަރީގެ ދޮރު ހުޅުވާލި އަޑަށް ރާކިން ފުންމައިގެން ތެދުވިއެވެ. ދޮރުން ބޯދިއްކޮށްލި މަންމަ ފެނިފައި އޭނާ ހަމަޖެހޭގޮތް ދައްކަންވެގެން ލުއި ހިނިތުންވުމެއް ތުންފަތަށް ވެރިކުރުވިއެވެ.

“ޝާމް އައިސް އެބައިން.” މަންމަ އެތެރެއަށް ވަދެފައި އަތްމަތީހުރި ފަތްޖަހާފައިވާ ބެޑްޝީޓްތައް އަލަމާރިއަށްލިއެވެ.

މަންމަ އެނބުރި ދޮރާއި ދިމާއަށް ދާން ފެށުމާއެކު ރާކިންވެސް ތެދުވެގެން ފަހަތުން ގޮސް ކޮޓަރިން ނިކުތެވެ.

“ކޮބާ އާދެވިއްޖެދޯ؟ އަހަރެން ހީކުރީ ކައުންސިލަރ ސާހިބަށް މިކޮޅަށް ދުރުވެވޭނެ ވަގުތެއް ނުވާނެކަމަށް.” އެކުވެރިޔާ ފެނިފައި ރާކިންގެ މޫނުން ފުރަތަމަ ފަހަރަށް އުފާވެރިކަން ފެނިގެން ދިޔައެވެ.

“ހެހެ ދެން ރިކް ދައްކާ ވާހަކަ. ޝާމް ހީލިއެވެ.

އެވަގުތު ދޮރާއި ދިމާއިން ސަލާމް ގޮވާލިއަޑަށް ދެމީހުންނަށް އެއްފަހަރާ އެދިމާއަށް ބަލާލެވުނެވެ.

“ހަނީފާތަ؟ އާދޭ އެތެރެއަށް!” ސަލާމް ބަލައިގަންނަމުން އެތެރެއިން ނިކުތް ރާކިންގެ މަންމަ ވަސީމާ ހިނިއައިސްފައި ކާގެއާއި ދިމާއަށް އިޝާރާތްކޮށްލާފައި އަނެއްކާވެސް އެތެރެއަށް ވަނެވެ. ހަނީފާ އެދިމާއަށް ދިޔަނަމަވެސް ސިއްރު ލޮލަކުން ރާކިންއަށް ބަލާލިއެވެ.

“ކަންތަކާއިޖެހުނީ.” ޝާމް ހަނީފާ ވަދެގެން ދިޔަ ދޮރާއި ދިމާއަށް ބަލަން އިނދެފައި އަނގައަށް ނުބައި ވައްތަރެއް ޖައްސާލިއެވެ.

“ކިހިނެތްވީ ތިހެން ތިބުނީ؟” ރާކިން ޝާމްގެ ކައިރީގައި ސޯފާގައި އިށީންދެފައި އަހާލިއެވެ.

“ރާކިންއަށް އަދި ވިސްނޭނެ.” ޝާމް އިތުރަށް އެވާހަކަ ނުދައްކަންވެގެން ކުރުކޮށްލިއެވެ.

ހަނީފާ ކަމަކުތަ ތިއައީ؟” ވަސީމާ ޒިންކުތެރޭގައި ހުރި ތަށިތައް ދޮންނަމުން ހަނީފާއަށް ގޮވާލާފައި އަހާލިއެވެ.

“މިގެއަށް ނުވަންނަތާ ގިނަ ދުވަސްވެގެން ހަމަ ހިތަށްއެރީ ވަސީމާމެން ހާލު ބަލާލަން އައިސްލަންވީއޭ. މަސައްކަތް ހުންނަގޮތުން މިކަހަލަ ކަމެއް ކޮށްލާކަށްވެސް ވަގުތެއް ނުވޭވިއްޔަ.” ހަނީފާ ހިނިތުންވެފައި ކާމޭޒުކައިރިން ގޮނޑިއެއް ދަމާލާފައި އިށީނެވެ.

“ހާދަ ރަނގަޅޭ. ދެން މިހާރު ޒާނަ ކޮބައިތަ؟ އޭނާ ކީއްވެ ރަށުންބޭރަށް ކިޔަވަން ނުފޮނުވަނީ؟ އޯލެވެލް ހެދުނަކަސް މިރަށުގައި ކިޔެވުމުގެ ފެންވަރު ކިހާދަށް.” ތަށިތަށް ހަރުގަނޑުގައި ބަހައްޓާފައި އަތްފުހެލައިގެން ވަސީމާ ކެރެޓް ގާނަންފެށިއެވެ.

“ރަށުން ބޭރަށް ފޮނުވައިގެން ކިޔަވައިދެވޭނެހާ ފެންވަރެއް އަހަރެންގެ ނެތް. ސަދާވެސް މީހަކާއި އިނެއްކަމަކު ހުރިހާ ޚަރަދެއް ކުރަންޖެހެނީ މަށަށް. އަނެއްކޮޅުން އަހަރެންނަކަށް ނުކެރޭނެ ޒާނަ އެކަނި ބޭރުރަށަކަށް ފޮނުވާކަށް. އަންހެންކުދިން ނުކިޔެވިއަސް މީހަކާއި އިނީމަ ބަލާނެއެއްނު..” ހަނީފާ އޭނާގެ ހިޔާލުހުރިގޮތް ހާމަކުރިއެވެ.

“އެއްގޮތަކުން ބަލަންޏާ ތީވެސް ރަނގަޅުވާހަކައެއް. އެކަމަކު މިޒަމާނުގައި ވަޒީފާއެއްނެތި ފިރިމީހާއަށް ބަރޯސާވެގެން އުޅޭ ވަރަށްވުރެ މީހުން ނުބައިވެއްޖެ. އިނދެފަ އެންމެ ދަރިއަކު ވިހާއިރަށް ދެން ފެންނާނީ އެހެން އަންހެނެއް.” ވަސީމާ ބުނެލިއެވެ.

“އަހަރެންގެ ދަރިފުޅު ދެވާނީ އެވަރަށް އިތުބާރުކުރެވޭ މީހަކާއިއޭ. ވަސީމާގެ ރާކިން އައިސް އެއުޅެނީ ޗުއްޓީއެއްގައިތަ؟ ” ހަނީފާ އެހިސާބުން ވާހަކަ ބަދަލުކޮށްލިއެވެ.

“ތީވެސް އަނެއް ވާހަކަ. އިނދެގެން ހަ އަރުވީފަހުން ރާކިންގެ އަންހެނުންނާއި މައްސަލަޖެހިގެން އެންމެފަހުން ވަރިއާއި ހިސާބަށްވެސް ދިޔައީ. އެހެންވެ އެކަމާއި ބޯގޮވައިގެން އައިސް އެއުޅެނީ. މީހުން ބުނެއެއްނު ހިތާމައެއް ކުރިމަތިވާ ހިނދު ކޮންމެ މީހަކުވެސް އުޅެބޮޑުވި ގެއާއި މައިންބަފައިން މަތިން ހަނދާންވާނެއޭ.” ވަސީމާ މަސައްކަތް ހުއްޓާލާފައި ހިތާމަވެރިގޮތަކަށް ކަރު އެލުވާލިއެވެ.

“ހަމަތެދެއްތަ؟ ހަނީފާއަށް އުފަލުން ބާރަށް އަހާލެވުނެވެ. ދެވަނަ ސިކުންތުގައި ވަސީމާ ބަލާލިތަން ފެނިފައި އޭނާ ދެރަވާ ކަމަށް ހެދުނެވެ.

“މަންމަ ކޮންތާކުން ތިއައީ؟” ހަނީފާ އެނބުރި އައިސް ގެއަށް ވަނުމާއެކު ޒާނަ ސުވާލުކުރިއެވެ. އޭނާ އިނީ އުނދޯލިމަތީގައި ތެލުލި ބަނބުކެޔޮ ތައްޓެއް ބަހައްޓައިގެން ކާލަކާލައެވެ.

“މިއައީ ވަސީމައްތަގެއަށް ގޮސްލާފަ. ދަރިފުޅަށް އެނގޭތަ ރާކިން އައިސް އެއުޅެނީ އޭނާގެ އަންހެނުން ވަރިކޮށްފަޔޯ. ބުނަން މީ ރަނގަޅު ފުރުޞަތެއް. މިފުރުޞަތުގެ ބޭނުން ހިފަން އެނގިއްޖެއްޔާ އެރާކިން މާލެދާނީ ޒާނައާއި އިނދެގެން..” ވަސީމާ އައިސް ހެއްލަހެއްލާ އިން އުނދޯއްޔަށް ފުންމައިގެން އަރާ އިށީންދެފައި ތެލުލި ބަނބުކެޔޮ ފޮއްޗެއް ނަގައިގެން ހަފާލިއެވެ. މަންމަގެ ވާހަކަ އިވިފައި ޒާނަގެ އަނގައިގާވާ ކުދިކުދި ހުރިހާ ދަތެއް ފެނިލިއެވެ.

ޖެހިގެން އައި ދުވަހު ޒާނަ ހެނދުނު ހެނދުނާ އިލޮށިފަތި ހިފައިގެން މަގުމަތި ކުނިކަހަން ނިކުތެވެ. އެވަރުން ނުވެގެން މެންދުރަށް ކައްކަންވާއިރަށް ފެން ގެނައުމުގެ ބަހަނާގައި އަންހެނުން ނަމާދުގެއަށް ބަނޑިޔާހިފައިގެން ފެންބަލާދިޔައެވެ. ޒާނަގެ ހުރިހާ އަމަލެއްހުރީ ހަނީފާ ބޭނުންވާގޮތަށެވެ. އެތަކެއްފަހަރުމަތީން އެގޭ ދޮރުމަތީން ހުރަސްކޮށްގެންވެސް އޭނާއަށް ރާކިން ފެންނަވަރެއް ނުވިއެވެ. ޒާނަގެ މަޤްޞަދަކީ ކޮންމެގޮތަކުންވެސް ރާކިންގެ ސަމާލުކަން ހޯދުމެވެ.

މެންދުރު ކައްކަން އުނދާފައި ފިނިކޮށްލަންވެގެން އުނދޯއްޔަށް އެރިތަނާ ޒާނައަށް ރާކިން ފެނުނެވެ. ހުދުކުލައިގެ އަތްދިގު ޓީޝާޓާއި ކަޅުޖިންސްގައި އޭނާ ނިކުތީ މެންދުރު ނަމާދަށް ދާންވެގެންނެވެ. ޒާނައަށް އެކަން އެނގުނީ އަތުގައި އޮތް ތާކިހާ ޖިންސްގެ ޖީބަށްކޮށްޕާލިތަން ފެނިފައެވެ. ނޫންކަމަށްހަދާފައި ޒާނަ ބާރަށް ކެއްސަންފެށިއެވެ. ރާކިންގެ ކަންފަތުގައި އެއަޑުޖެހުމާއެކު އޭނާއަށް އިޙުތިޔާރަކާނުލާ ބަލާލެވިއްޖެއެވެ. އެވަގުތު ދެމީހުންގެ ހަތަރުކަޅި ބައްދަލުވިއެވެ. ޒާނަ ވަގުތުން ލަދުރަކި އަންހެންކުއްޖެއްގެ އެކްޓިންދައްކާފައި އޮޅިގަތެވެ. މަންމަ ކިޔައިދީފައިވާގޮތުން ފިރިހެނުން އެންމެ ގަޔާވާނީ ލަދުރަކި އަންހެން ކުދިންނާއެވެ. ކުއްލިއަކަށް ރާކިންގެ މޫނުމަތިން ފާޅުވެގެންދިޔަތަން ފެނުނީ ފޫހިކަމެވެ. އޭނާއަށް ޒާނަގެ އެއަދާއިން އެއްވެސް އަސަރެއްނުކުރިއެވެ. އަނެއް ފަރާތަށް މޫނު އަނބުރާލިގޮތަށް ހުއްޓިވެސް ނުލާ އޭނާ ދިޔަގޮތަށްގޮސް ޖެހިގެން އޮތް ގޯޅިން ލަނބާލައިފިއެވެ. ކުރި ހުރިހާ ކަމެއް ހުހަށް ދިއުމުން ޒާނަ ރުޅިއައެވެ. ރާކިންއަކީ އަދި އެހާފަސޭހައިން ދަލުގައި ޖެއްސޭނެ ޒުވާނެއްނޫންކަން އޭނާއަށް ކަށަވަރުވެއްޖެއެވެ.

“އައްސަލާމް އަލައިކުމް!” އިރުއޮއްސެން ދަނިކޮށް ޒާނަ ރާކިން އުޅޭގެއަށް ދިޔައެވެ. އެތެރެއަށް ވަނުމުގެ ބަދަލުގައި އޭނާ ދޮރުމަތީހުރެ ސަލާމްގޮވާލިއެވެ.

“ވައަލައިކުމް ސަލާމް.” ސަލާމް ބަލައިގެންފައި ކާގެއިން ނިކުތީ ވަސީމާއެވެ. “އަހަ. ޒާނަތަ؟ އާދޭ އާދޭ! ކަމަކުތަ ތިއައީ؟ ހާދަ ދުވަހެއްވެއްޖެއޭ މިގެއަށް ނުވަންނަތާ. ވަސީމައްތަމެންނާއި ރުޅީދޯ؟” ވަސީމާ ހިނިތުންވެފައި އައިސް ކައިރިއަށް ހުއްޓުނެވެ.

“ރިހަ ކައްކަން އުޅެފަ ލޮނުމެދުކޮޅެއް ނެތިގެން ލޮނުމެދުކޮޅެއް ދޭތޯ މިއައީ. މިގަޑީގައި ފިހާރަތައްވެސް ހުންނާނީ ބަންދުކޮށްފަ. “ސިއްރު ލޮލަކުން ދެފަރާތް ހޯދާލާފައި ޒާނަ އޮޅުންފިލުވައިދިނެވެ.

“ލޮނުމެދު ލިބިދާނެ. އާދޭ އެތެރެއަށް. ޒާނަ ސައިބޯންވީނު.” ވަސީމާ ޒާނަގެ އަތުގައި ހިފައިގެން ގޮސް ކާގެއަށް ވަނެވެ. އެވަގުތު މޭޒުދޮށުގައި އިން ރާކިން ފެނިފައި ޒާނަގެ މެޔަށް ފިނިވެލިއެވެ.

“ވަސީމައްތާ ސައެއް ނުބޮވޭނެ މިގަޑިއަކު. މަންމަ އަންނަންވާއިރަށް ރިހަކޮޅު ނުކެކިހުރިއްޔާ ރުޅިއަތުވެދާނެ.” ޒާނަ އުޒުރުވެރިވިއެވެ. ވަސީމާ ލޮނުމެދުބޮނޑިއެއް ގެނެސް އަތަށް ލައިދިނުމާއެކު އޭނާ ނިކުންނަން ހިނގައިގަތެވެ. ރާކިން އަޅާނުލިތާގައި ކުޑަމިނުން އިސްއުފުލާ ބަލާވެސްނުލިއެވެ.

“ރިކް. ރަށަށް އައިސް ކަމެއްފެށީތަ؟” ދޮރުން ވަދެގެން އައި ރާކިންގެ އެކުވެރިޔާ ޝާމްއަށް ޒާނަ ފެނިގެން އައިގޮތަށް އައިސް އަހާލިއެވެ. އޭރު ވަސީމާ އުނދުންކައިރީގައި ރިހަތެއްޔެއް ކައްކަން އުޅެއެވެ. އޭނާއަށް އަޑުއިވިދާނެތީ ޝާމް ވާހަކަދެއްކީވެސް އާދައިގެ ވަރަށްވުރެ މަޑުންނެވެ.

“ކީއްވެތިހެން ތިބުނީ؟” ރާކިންއަށް ނުވެސް އެނގޭ ކަހަލައެވެ.

“ދެންމެ މިގެއިން ނިކުމެގެން އެދިޔަ އަންހެންކުއްޖާގެ ވާހަކަ މިދައްކަނީ.” ޝާމް ޖަވާބުދިނެވެ. ރާކިން ކޮންމެވެސް އެއްޗެކޭ ބުނަންވެގެން އަނގަ ހުޅުވާލިތަނާ ވަސީމާ އަނެއްފަރާތަށް އެނބުރިފައި ޝާމްއަށް ސައިބޯން ދައުވަތުދިނެވެ.

“އަހަރެން ބުނަންތަ ރަނގަޅު ވާހަކައެއް. ރީތި ދިރިއުޅުމެއް އުޅެން ބޭނުމިއްޔާ ޒާނަކަހަލަ ކުއްޖަކާއި ނުގުޅޭތި. އޭނާ ބޭނުންވާނީ ހަމައެކަނި މުއްސަނދިކަމާއި ފައިސާ.” ކޮޓަރިއަށް ވަދެފައި ޝާމް އެމައުޟޫއަށް ވާހަކަ ގެންދިޔައެވެ.

“ކިހިނެތް ޝާމްއަށް އެކަން އެނގުނީ؟” ފުރަތަމަ ފަހަރަށް ރާކިންގެ މޫނުމަތިން ޝައުޤުވެރިކަން ފެނިގެންދިޔައެވެ.

“އަހަރެން އެކަންޏެއްނޫން. އެއީ މިރަށު އެންމެންވެސް ދަންނަކަމެއް. މިރަށަކަށް ނާރާ އެދެމައިން އަތުއަޅުވާނުލާ މުއްސަންޖެއް. އެހާ ހަގު އުމުރުގައި އޭނާގެ ކައިވެނި ދޭނަމޭ ކިޔައިގެން ރަށަށްއަރާ މުއްސަދިންއަތުން އެތަކެއް ފަހަރު ފައިސާތަކެއް އަތުލާފައި ތިބި ބައެއް އެއީ. ހަނީފާ ބޭނުންވަނީ ޒާނަގެ ކައިވެނި މުއްސަދި މަހުޖަނަކާއި ކުރުވަން. ދިރިއުޅުމަކީ އެމީހުންނަށް މުހިންމު އެއްޗެއް ނޫން. މުއްސަދިކަމާއި ޤަދަރުނޫން އެއްޗަކަށް އެދެމައިންގެ ހިތުގައި ޖާގައެއްނެތް.” ޝާމް އިތުރަށް އޮޅުންފިލުވައިދިނެވެ. އަނގައިން އިތުރު ބަހެއް ނުބުނިކަމުގައިވިއަސް ރާކިން ވިސްނަމުން ދިޔައީ ޝާމް ދެއްކި ވާހަކައާއި މެދުގައެވެ.

އިރުއޮއްސި ނުވައެއްޖަހާކަށް ހާއިރެވެ. ފެންވަރާ ތާޒާވެލައިގެން ރާކިން ބޭރަށް ނިކުމެލިއެވެ. އެވަގުތު ދޮރާށި ކައިރީގައި ވަރުގެކޮޅަށް ނަލަހެދިގެން ހުރި ޒާނަ ފެނިފައި އޭނާ ފުރަތަމަ ފަހަރަށް އެ އަންހެންކުއްޖާއަށް ރަނގަޅަށް ބަލާލިއެވެ. އިސްކޮޅުން ދިގުވެފައި ހިމަތޮޅިކޮށް ހުއްޓަސް ޒާނަގެ މޫނުމަތީގައިވަނީ ކުޑަކުއްޖެއްގެ މައުސޫމްކަމެވެ. ބަލާބެލުމަށް ރީތިމެއެވެ. ރާކިން ބަލަހައްޓައިގެން ހުރިތަން ފެނުމުން ޒާނަގެ ހިތް އުފަލުން ފޮޅުނެވެ. އޭނާ ކުރަމުންދާ މިންނެތް މަސައްކަތުގައި އުންމީދުގެ ހުޅުކޮޅު ރޯކޮށްލައިފިކަމުގެ އިހްސާސް ހިތަށް ކުރެވުނެވެ. ރާކިން އެގޮތަށް އޭނާއަށް ބަލާލި މީ ފުރަތަމަ ފަހަރެވެ. އެހެން ދުވަސްދުވަހާއި ހިލާފަށް މިއަދު އެމޫނުން ފޫހިކަމެއް ނުފެނެއެވެ.

ދެމީހުން އެކަކު އަނެކަކަށް ބަލަންތިއްބާ ދޮރާށި ހުޅުވާލާފައި ހަނީފާ ނިކުތެވެ. އެވަގުތު ރާކިން އަވަސްއަވަހަށް އިސްޖަހާލައިފިއެވެ.

“ރާކިން. ކޮއްކޮ ކޮންއިރަކުންތަ ފުރަނީ؟” ހަނީފާ ދަތްޕިލާ އެއްކޮށް އިޝްތިހާރުކޮށްލާފައި ސުވާލުކުރިއެވެ.

“މިހަފްތާ ނިމުނީމަ.” ރާކިން ލުއި ހިނިތުންވުމެއް ވެރިކުރުވަމުން އިސްއުފުލާލާފައި ހަނީފާއަށް ބަލާލިއެވެ.

“މާދަމާ މެންދުރު ކާން އަންނާތި އިނގޭ! ދައްތަ ވަރަށް ރަނގަޅު ކެއުމެއް ތައްޔާރުކުރާނަން.” ފުރުޞަތުގެ ބޭނުންކޮށްފައި ހަނީފާ ރާކިންއަށް ދައުވަތުދިނެވެ. އޭނާ ހީކުރިވަރަށްވުރެވެސް ފަސޭހައިން ރާކިން އެއްބަސްވިއެވެ. ޚުދު ރާކިންވެސް ހުރީ އެފަދަ ފުރުޞަތެއް ބޭނުންވެފައެވެ. ފޯން ރިންގް ވާންފެށުމާއެކު އަދި ބައްދަލުވާނެކަމަށް ބުނަމުން ރާކިން މަގުހުރިގޮތަށް ހިނގައިގަތެވެ. އުފަލުން ފޮޅިފައިހުރި ހަނީފާ އާއި ޒާނަ ހިނިތުންވެފައި އެތެރެއަށް ވަދެއްޖެއެވެ.

ޖެހިގެން އައިދުވަހު ހެނދުނު ސައިން ނިމުނުގޮތަށް ޒާނަ މެންދުރަށް ތައްޔާރުވާން ފަށައިފިއެވެ. ފިޔާކޮށުމާއި ހުނިގޭނުމާއި މިފަދައިން ފުރަތަމަ ކުރަންޖެހޭ ކަންތައްތަކަށް އޭނާ އެންމެ ފުރަތަމަ އިސްކަން ދިނެވެ. މަސައްކަތަށް ނިކުމެ އުޅުނެއްކަމަކު ހަނީފާވެސް ދޭތެރެއަކުން ގެއަށް އައިސް ވާނުވާ ބަލާލައެވެ. ކެއްކުމުގައި އިތުރަށް ފަސޭހަކަން ހޯދުމަށްޓަކައި ޒާނަގެ އެކުވެރި ނާޖިލާ އާއި ސަމާވެސް ގެނައެވެ.

މެންދުރު ނަމާދުން ފައިބަންވާއިރަށް ހުރިހާކަމެއް ނިމި ސުފުރާ ތައްޔާރު ވެއްޖެއެވެ. އޭރު ޒާނަވެސް ހުރީ ފެންވަރާލައިގެން ނިކުމެއެވެ. ރާކިން ގެއަށް އައުމުގެ ކުރީން ޒާނަގޮސް ވަސީމާ ކައިރީގައި އޭނާއަށް އަންނަން އަންގައިދިނުމަށް އެދިފައި އެނބުރި އައެވެ. ސަމާ އާއި ނާޖިލާ ފޮނުވާލާފައި ބޮޑު އުނދޯއްޔަށް އަރާ ހެއްލާލަ ހެއްލާލާ އިނދެގެން މިނިޓަކު ދެ ފަހަރު ކަހަލަގޮތަކަށް ދޮރާއި ދިމާއަށް ބަލަބަލާ އިންދާ ދޮރު ހުޅުވިއްޖެއެވެ. ޒާނައަށް އުނދޯލިން ފުންމާލެވުނެވެ. އެވަގުތު ދޮރުން ވަން ހަނީފާ ފެނިފައި އޭނާ ހަމަޖެހުމުގެ ނޭވާއެއް ދޫކޮށްލިއެވެ.

“ރާކިން. އާދޭ އެތެރެއަށް!” އެތެރެއަށް އަންނަމުން ހަނީފާ ގޮވާލިއެވެ.

ޒާނަގެ ނަޒަރު އަނެއްކާވެސް ދޮރާއި ދިމާއަށް ދަތުރުކުރިއެވެ. އޭރު ރާކިން ހަނީފާގެ ފަހަތުގައި ހުރެގެން އެތެރެއަށް ވަންނަނީއެވެ. ބަލާކަށްނުހުރެ އޭނާ ހަލުވިކޮށް ހިނގާލާފައި ގޮސް ކާގެއަށްވަދެ ތަށިތަކުގެ މަތިނަގާފައި ރާކިންއަށް ޖޫސްތައްޓެއް އަޅައިދިނެވެ. ދެޖީބަށް އަތްޖަހައިގެން އިސްޖައިގެން އައިސް އެތެރެއަށް ވަދެފައި ރާކިން ހުސްގޮނޑިއެއްގައި އިށީނެވެ.

“އެންމެ މީހަކު ކާން ހާދަ ބައިވަރު ކާއެއްޗެއް ހަދާފަ މިއޮތީ.” މޭޒުމަތި ފުރޭންދެން އަތުރާފައިވާ ވައްތަރު ވައްތަރުގެ ކާނާތައް ފެނިފައި ރާކިންއަށް ބުނެވުނެވެ.

“އެއީ ޒާނަގެ މަސައްކަތް. ޒާނަ ވަރަށް މޮޅުވާނެ ކައްކަން.” ހަނީފާ މޭޒުގެ އެއްކަނެއްގައި ހުއްޓިހުރެފައި ފަހުރުވެރިކަމާއިއެކު ޖަވާބުދިނެވެ. ޒާނަ އިނީ ރާކިންގެ ފުރަގަހުގައެވެ.

“އަސްލުވެސް ވަރަށްމޮޅު.” ރާކިން އެނބުރިފައި ޒާނައަށް ތައުރީފްކޮށްލިއެވެ. ވީ އުފަލެއްގެ ބޮޑުކަމުން ޒާނަ ތަންމިނަށް ހިނިތުންވެލިއެވެ.

ޒާނަ ކައިރިވެލާފައި ތައްޓަށް ކާއެއްޗެހި އަޅައިދިނުމާއެކު ރާކިން ކާންފެށިއެވެ. ކުރިމަތީގައި ހުރެގެން ހަނީފާ އެކިއެކި ވާހަކަދައްކަމުން ދިޔައެވެ.

“ރާކިން ދެން ކޮންއިރަކުން މީހަކާއި އިންނަނީ؟” ވާހަކައިގެ ތެރެއިން ހަނީފާ އަހާލިއެވެ. އެވަގުތު ރާކިންގެ އަތުގައި އޮތް ސަމްސާ ދޫވެގެން ތަށިތެރެއަށް ވެއްޓިއްޖެއެވެ.

“ތިހެން ބުނީމަ އަހަރެންވެސް ވާހަކައެއް ބުނެފާނަން. އަހަރެން މިއަދު މިތަނަށް އައީ އިތުރު އެހެން މަޤްޞަދެއްވެސް އޮވެގެން.” މޫނުމަތިން ހަމަޖެހޭގޮތް ދައްކާލާފައި ރާކިން ވާހަކަދެއްކިއެވެ. އެވަގުތު ހަނީފާއަށާއި ޒާނައަށް އެކަކު އަނެކަކުގެ މޫނަށް ބަލައިލެވުނެވެ. އަނެއްކާ ރާކިން ދައްކަން އެއުޅެނީ ކޮންވާހަކައެއް ބާވައޭ ދެމީހުންގެ ހިތަށްވެސް އެރިއެވެ.

“އަހަރެން ބޭނުން ޒާނައާއި ކައިވެނިކުރަން.” ކުޑައިރުކޮޅެއްގެ ހިމޭންކަމަށްފަހު ރާކިން އިއްވާލިއެވެ.

ދެމައިންގެ ހިތްވެސް އުފަލުން ފޮޅިގެން އައެވެ. ޤަބޫލުނުކުރެވޭ ގޮތަކަށް ދެމީހުން އެކަކު އަނެކަކުގެ މޫނަށް ބަލާލިއެވެ. ބޭނުންވެގެން އުޅުނު ކަންތައް އެހާ ފަސޭހައިން ކާމިޔާބު ވެދާނެކަމަށް އެމީހުން އުންމީދުވެސް ނުކުރެއެވެ.

“ދައްތަ ކީކޭ ބުނަނީ؟ ޒާނަގެ ކައިވެނި އަހަރެންނަށް ދޭނަންތަ؟” ޖަވާބެއް ނުލިބި ގިނައިރު ވާންފެށުމުން ރާކިން ހަނީފާގެ މޫނަށް ނަޒަރު ހުއްޓާލިއެވެ.

“އެއްގޮތަކަށްވެސް ތިހެނެއް ނޫން. ދައްތައަށް ވަރަށް ކަމުދޭ ރާކިން. ޒާނަގެ ހަޔާތަށް ގެންނަން އެންމެ ބޭނުންވާ ފަދަ ޒުވާނެއްތީ. އެކަމަކު އަދި އޭނާގެ އުމުރު ހަމަނުވާތީވެ މައްސަލައަކީ. އެކަމަކުވެސް މައިންބަފައިން ޤަބޫލިއްޔާ ސޯޅަ އަހަރުގައިވެސް ކައިވެނި ކުރެވޭނެ. ރާކިން ބޭނުންވަންޏާ ދައްތަ ހިތުން ރުހުމުން ޤަބޫލު. ކޮންއިރަކުން ކައިވެނިކުރަން ގަސްތުކުރަނީ؟” ފުރަތަމައިނުންވެސް އާއެކޭބުނެ އެއްބަސްވާން ހިތަށް އަރާފައިވެސް ހަނީފާ ކަމުގެދެކޮޅަށް ވިސްނިއެވެ. މާ އަވަސްއަރުވާލާފައި އުޅެންވެއްޖެއްޔާ ރާކިން ހިތްހަމަނުޖެހިގެން ހިޔާލު ބަދަލުވެދާނެތީ އޭނާ ބިރުގަތެވެ.

“ވީހާވެސް އަވަހަކަށް ކައިވެނިކުރަން އަހަރެން ގަސްތުކުރަނީ. އެކަމަކު ދެން އަހަރެން ފުރުމުގެކުރީން އެކަންވާންނެތީމަ ފުރުން އަދި އެއް ހަފްތާއަށް ލަސްކޮށްލާނީ. އަހަރެން ހަމަ މިއަދު އާއިލާއާއި ހަމައަށް މިވާހަކަ ގެންދާނަން.” ޖޫސްތަށި ހުސްކޮށްލާފައި ރާކިން ތެދުވިއެވެ. ފެންކޮޅަކުން ދެއަތްދޮވެލާފައި ޓިޝޫއެއްނަގައިގެން ނިކުންނަން ދަމުން އަދި އެއްފަހަރު އެނބުރިފައި އޭނާ ޒާނަގެ ކެއްކުމަށް ތައުރީފު ކޮށްލިއެވެ.

ޒާނަގެ ހަޔާތަށް ބަހާރު މޫސުމް އަތުވެއްޖެއެވެ. ރާކިން ނިކުމެގެން ދިޔައީއްސުރެ އެންމެ ހިނދުކޮޅަކަށްވެސް އޭނާގެ ތުންފަތުން ހިނިތުންފިލާނުދެއެވެ. އެރޭ ނިދަން އޮވެގެންވެސް އޭނާއަށް ހިޔާލުކުރެވުނީ ރާކިންގެ އަންބެތްގެ މަޤާމުގައި ހުރެ އޭނާ އުޅޭނެ އަރާމު ދިރިއުޅުމުގެ މަތިންނެވެ.

އަނެއް ދުވަހު ހެނދުނު ހެނާ ރާކިން އޭނާގެ އާއިލާއަށް ކައިވެނީގެ ޚަބަރު ދީފިއެވެ. ވަސީމާއާއި ސައްތާރަށް ލިބުނީ ޝޮކެކެވެ. އެހާ ކުއްލި ނިންމުމެއް ރާކިން ނިންމަފާނެކަމަށް އެމީހުން ހީވެސްނުކުރެއެވެ. އަނެއްކޮޅުން އޭނާއަށް ވިސްނަދޭން އެމީހުން ދެއްކި ހުރިހާ ވާހަކައަކަށް ރާކިން ދިނީ ބީރު ކަންފަތެކެވެ.

“ކޮބާ އެމަނިކުފާނު؟” ޝާމް އެތެރެއަށް ވަދެގެން އައިސް ވަސީމާ ފެނިފައި ސުވާލުކުރިއެވެ.

“އެބައޮތް ކޮޓަރީގައި. ޝާމް އޭނާއަށް ވިސްނައިދީބަލަ. ޝާމް ބުނީމައިވެސް ޤަބޫލުކޮށްފާނެ ކަންނޭނގެ. ހިތަށްއަރާ ރާކިންއަށް ލިބިފައި އެހުންނަނީ ކާކުގެ ގޮތްދޫނުކުރުމެއްބާވައޭ.” ވަސީމާ ގޮތްހުސްވެފައިވާ މީހަކު ފަދައިން ވާހަކަދެއްކިއެވެ. ކަރުގައި އޮތް ޓައީދޫކުރަމުން ޝާމް ގޮސް ކޮޓަރީގެ ދޮރު ހުޅުވާލާފައި އެތެރެއަށް ވަނެވެ. އެވަގުތު ކުޑަދޮރުކައިރީގައި ފޮޓޯގަނޑަކަށް ބަލަހައްޓައިގެން ހުރި ރާކިން ތެޅިގެންފައި އަވަސްއަވަހަށް އެ ފޮޓޯގަނޑު ޖިންސްގެ ޖީބަށް ކޮށްޕާލިއެވެ.

“އަހަރެންނަށް މިއިވުނީ ތެދު ޚަބަރެއްތަ؟” ޝާމް ގޮސް ރާކިންގެ ކައިރިއަށް ހުއްޓުނެވެ. ރާކިން ބޯޖަހާލާފައި ގޮސް އެނދުގައި އިށީންދެއްޖެއެވެ.

“ޝާމް ތިއައީ އަހަރެންނަށް ވިސްނައިދީގެން މިނިންމުން ބަދަލުކުރަން ކަމަށްވާނަމަ ތިދައްކަންއުޅޭ އެއްވެސް ވާހަކައެއް އަހާކަށް ބޭނުމެއްނޫން.” ރާކިން ބުނެލިއެވެ.

“ރިކް ޕްލީޒް. ހަމައެންމެ ފަހަރަކު އަހަރެން މިދައްކަންއުޅޭ ވާހަކަ އަޑުއަހާބަލަ. އެކުވެރިއެއްގެ ހައިސިއްޔަތުން މީ އަހަރެން ކޮންމެހެން ބުނަންޖެހޭ ވާހަކަތަކެކޭ. އަހަރެން މަސައްކަތެއް ނުކުރާނަން ރިކްގެ ނިންމުން ބަދަލުކުރާކަށް. މިވާހަކަތައް ދެއްކުމަށްފަހުވެސް ހުރިހާ ނިންމުމެއް ނިންމާނީ ރިކް އަމިއްލައަށް.” ޝާމް މަޑުމައިތިރިކަމާއިއެކު އެކުވެރިޔާގެ ސަމާލުކަން ހޯދޭތޯ މަސައްކަތްކުރިއެވެ. ދެކޮޅުހެދުމުގެގޮތުން ރާކިން އިތުރު އެއްޗެކޭ ނުބުނުމުން އޭނާއަށް ވިސްނުނީ ރާކިން އޭނާ ދައްކަން އުޅޭ ވާހަކަތައް އަހަން ތައްޔާރުވީކަމުގައެވެ.

“ރިކް. ދިރިއުޅުމަކީ ކުޅޭ ކުޅިވަރެއްނޫން. ދިރިއުޅުމުގައި ނިންމާ ނިންމުންތައް ވާންޖެހޭނީ އެއާއިމެދު ވަރަށް ރަނގަޅަށް ވިސްނުން ހިންގުމަށްފަހު އެއީ ރަނގަޅު ނިންމުމެއްކަމަށް ސަތޭކަ ޕަސެންޓް ޔަޤީންކަން އޮންނަ ނިންމުންތަކަކަށް. ތިގޮތަށް ކުއްލިއަކަށް ނިންމާ ނިންމުމަކުން ފަހުން ހިތާމަކުރަންޖެހޭފަހަރު ދިމާވަނީ މަދަކުންނޫން. އެންމެ ފަހަރަކުވެސް އަމިއްލަ ހިތާއި ސުވާލުކޮށްލަބަލަ. އާރިއާދެކެ ވީ ލޯބި ޒާނަދެކެ ވެވިދާނެތަ؟ ޒާނަ ނިކަމެތިކޮށްނުލާ އުމުރުދުވަހު ގެންގުޅެވޭނެތަ؟ ކައިވެންޏަކީ ހަމައެކަނި ދެވޭ ނަމެއްނޫން. އެއީ ކޮނޑުގައި އެޅޭ ބޮޑު ޒިންމާއެއް. އަންހެން ކުއްޖެއްގެ މުޅިހަޔާތް ތިމާގެ މައްޗަށް ބަރޯސާވެގެންދާނެ. ހަމައެކަނި ކާންދީ އުޅޭނެތަން ހޯދައިދިނީމަ ނިމުނީއެއްނޫން. އަނބިމީހާގެ އުފަލާއި ހިތްހަމަޖެހުމަކީވެސް ކައިވެންޏަށްފަހު ފިރިމީހާގެ ޒިންމާއެއް. އަނެއްކޮޅުން ބަލާއިރު ޒާނައާއި އޭނާގެ މަންމަ އެއުޅެނީ ރިކްގެ މުއްސަނދިކަމުގެ ދަހިވެތިކަމުގައި. އެދެމީހުންގެ ހަމައެކަނި މަޤްސަދަކީ އަރާމު ދިރިއުޅުމެއް.” ޝާމްގެ ވާހަކަ އެހިސާބަށް ދިއުމާއެކު ރާކިން ފުންމައިގެން ތެދުވިއެވެ.

“އަހަރެންގެ އެއްވެސް ޝަކުވާއެއްނެތް. ޒާނަ އާއި އޭނާގެ މަންމަ ބުނިވަރަކަށް ފައިސާދޭން އަހަރެން ތައްޔާރު. އުމުރު ދުވަހަށް އެދެމައިން މުއްސަނދިކަމުގައި ގެންގުޅެފާނަން. ބަދަލުގައި އަހަރެން ބޭނުންވަނީ އެންމެ ކަމެއް. އެއީ ޒާނަ އަހަރެންގެ އަންބެއްގެ މަޤާމުގައި އިނުން.” ރާކިން ދިޔަގޮތަށް ގޮސް ކުޑަދޮރުން ބޭރު ބަލަންފެށިއެވެ.

“ރިކް. އަހަރެން އަދިވެސް ބުނަން އޮތީ ހަމަ އެއް ވާހަކައެއް. ތީ މޮޔަކަމެއް. ތީ ރިކްގެ ގޮތްދޫނުކުރާކަން. އާރިއާއަށް ކޮންކަމެއް ސާބިތުކޮށްދޭން ތިމަސައްކަތްކުރަނީ؟ ބަދަލުގައި ރިކްއަށް ލިބޭނީ ކޯއްޗެއް؟ ކޮންމެގޮތެއްވިއަސް ވީކަމެއް ނުވާކަމަކަށް ނުވާނެ. ދެންވެސް ތިހިޔާލު ދޫކޮށްލާފައި އާރިއާ އާއި ދެމެދުއޮތް މައްސަލަ ހައްލުކޮށްގެން އޭނާ ގެންނަން އުޅުނިއްޔާ ތިއަށްވުރެ ރަނގަޅުވާނެ. މީހުން މީހުންނާއި އިންނަނީ ލޯބިން. ދިރިއުޅެން. މީހަކަށް ދައްކާކަށް، ކަމެއް ސާބިތުކުރާކަށް ނޫން.” ޝާމް އަދިވެސް އޭނާގެ މަސައްކަތުގައި ދެމިހުއްޓެވެ. އެކުވެރިޔާ ހެޔޮމަގަށް އެޅުވުމަށްޓަކައި އޭނާ ހުރީ އަތުކުރި އޮޅާލައިގެންނެވެ.

“ހެހެ އެންމެފަހުން ތިބުނީ “ރަމްލާ” ޑްރާމާގެ ޑައިލޮގެއް ދޯ؟ “މީހުން މީހުންނާއި އިންނަނީ ލޯބިން. ދިރިއުޅެން. މީހަކަށް ދައްކާކަށް ކަމެއް ސާބިތުކުރާކަށް ނޫން.” ޝާމްވެސް ދެން ހާދަ ފިލްމީއޭ.” ރާކިން ކުއްލިއަކަށް ހޭންފެށިއެވެ. ގޮތްހުސްވެފައިވާ މީހަކުފަދައިން ޝާމްއަށް ނިއްކުރީގައި އަތްހާކާލެވުނެވެ. މުހިންމު ފޯނެއް އައިސްގެން ނިކުމެގެން ދަމުން އޭނާ އަދި އެއްފަހަރު ރާކިންއަށް ބަލާލިއެވެ. އޭނާ އޭރުވެސް ހެނީއެވެ.

ދޮރު ލެއްޕުނުއަޑަށް ރާކިންގެ ހުނުންވެސް ހުއްޓިއްޖެއެވެ. ދެވަނަ ސިކުންތުގައި އޭނާގެ މޫނުން ފެނިގެން ދިޔައީ ސީރިއަސްކަމެވެ. ޖިންސްގެ ޖީބުގައި އޮތް ފޮޓޯގަނޑު ނަގާ ހިއްލާލުމަށްފަހު ރާކިން އެއަށް ބަލާލިއެވެ. ހިނިތުންވެފައިވާ އާރިއާގެ މޫނު ފެނިފައި އޭނާގެ ދެލޮލުން އަލިފާންކަނި ބުރައިގަތެވެ. ބަލާކަށްނުހުރެ ފޮޓޯގަނޑުގެ ދެފަރާތުގައި ހިފާ މެދުން އިރާލާފައި ކުޑަދޮރުން ބޭރަށް ވައްޓާލުމާއެކު އަނެއްއަތުން ދޮރުކަނީގައި ބާރަށް ހިފަހައްޓާފައި އޭނާ ލޯމަރާލިއެވެ.

“އަހަރެން ބަލާނަން ރާކިން އާއި އިންނާނެ އެހެން އަންހެންކުއްޖަކުވޭތޯ. އަހަރެން ބަލާނަން ޝަކުވާއެއްނެތި އެކަނިމާއެކަނި މިގޭގެ ހަތަރުފާރުތެރޭގައި އިންނާނެ ދެވަނައަންބަކު ގެނެވޭތޯ. ބަލާނަން ކިހާދުވަހެއް ވާންދެން ރާކިންއާއި އިނދެގެން އެކުއްޖަކަށް އުޅެވޭތޯ.” އާރިއާގެ ޖުމްލަތައް ރާކިންގެ ކަންފަތުގައި ގުގުމާލިއެވެ. ދެންމެ ވީކަމެއްހެން އެހަނދާންތައް އަދިވެސް އޭނާގެ ހިތަށް ކަށިހަރައެވެ. ރުޅިގަނޑު ގަދަވެ ދެލޯފެންކަޅިވާ ހިސާބަށް ދިއުމުން އޭނާ ގޮސް ފާޚާނާއަށް ވަދެ ފެންވަރަން ފެށިއެވެ.

ވަސީމާ އާއި ސައްތާރުގެ އެތައް މަސައްކަތަކުންވެސް ރާކިންގެ ނިންމުން ބަދަލުނުވާނެކަން ޔަޤީންވުމުން އެމީހުން އެކަން ހުއްޓާލިއެވެ. ޒުވާން ދަރިފުޅުގެ ހަޔާތަށް އަލުން އުފާވެރިކަން ގެނައުމަށްޓަކައި ދެވަނަ ފުރުސަތެއް ހޯދައިދިނުމަކީ ނެތްކަމެއްނޫން ކަމުގައި ސައްތާރުވެސް ފަހުން ޤަބޫލުކުރިއެވެ. ކައިވެނީގެ ތައްޔާރީތައް ކުރިއަށް ދާންފެށުމާއެކު ރާކިންގެ މޫނުމަތިން ފެންނަމުންދިޔަ ހަމަޖެހުމުގެ ކުލަވަރު ، އެނިންމުމަކީ ރަނގަޅު ނިންމުމެއް ކަމުގައި އަންގައިދިނެވެ. ހިތް ނޭދުނު ނަމަވެސް ޝާމްވެސް އޭނާގެ ހުރިހާ ވަގުތެއްހެން ރާކިންގެ ދެވަނަ ކައިވެނީގެ ތައްޔާރީތަކަށްޓަކައި ހުސްކޮށްލިއެވެ.

ރާކިން ފޮނުވައިގެން އަންނަ ހެކިވެރީންގެ އިންތިޒާރުގައި އިން ހަނީފާ ، އެމީހުން އައުމާއެކު އެތެރޭގައި ބައިތިއްބާފައި ގޮސް ކޮޓަރިއަށް ވަނެވެ. އޭރު ޒާނަ ހުރީ ލޯގަނޑު ކުރިމަތީގައި ރީތިވާށެވެ.

“ދަރިފުޅާ! މަންމަ ބުނިވާހަކަ ހަނދާންއެބަހުރިތަ؟ ދިހަ ހާހަށްވުރެ ކުޑައަގެއްނުކިޔާތި!” ހަނީފާ ހިތާއިހިތުން އޭނާގެ އަންހެން ދަރިފުޅުގެ ރީތިކަމަށް ތައުރީފްކޮށްލާފައި ބުނެލިއެވެ.

“ކިހިނެތް ހަނދާން ނެތޭނީ؟ މަންމަ މިއަދު އިރުއެރީއްސުރެ އެނޫން ވާހަކައެއް ނުދައްކާވިއްޔަ.” ޒާނަގެ ގާތަށް ހިނިއައެވެ. އޭނާ ބޮލުގެ އިސްތަށިގަނޑު ރީތިކުރަމުން ދޮރާއި ދިމާއަށް ހިނގައިގަތެވެ.

ދެމައިން ނިކުމެގެން އަންނަތަން ފެނިފައި ޝާމްގެ މޫނުމަތިން ފެނުނީ ފޫހިކަމެވެ. ރާކިން ބުނެގެން ހެކިވެރިޔަކަށް އައިސް އިނެއްކަމަކު އޭނާ އެދެމައިންދެކެ އަންނަނީ އަމަށަކު ރުޅިއެއްނޫނެވެ. ޝާމް އަށް ޔަޤީނެވެ. ކައިވެންޏަކީ އެމީހުންގެ ނަޒަރުގައި ވިޔަފާރިއަކަށް ވީފަދައިން ކައިވެނީގެ ރަންވެސް އެމީހުންކިޔާނީ އެކަށީގެންނުވާވަރުގެ ބޮޑު އަގަކަށެވެ. ދީނުގައި އެކަން އިދިކޮޅަށް އޮތެއްކަމަކު އެދެމައިންނަށް ފައިސާއަށްވުރެ މުހިންމު އެކައްޗެއްވެސް ނުވެއެވެ. ކަންތައްވީވެސް އޭނާ ހީކުރިގޮތަށެވެ. ނިކުމެގެން ދަމުން އޭނާ އަނގައަށް ނުބައިވައްތަރެއް ޖައްސާލިއެވެ. އޭރު ހަނީފާ އާއި ޒާނަ ހެވިފައި އެކަކު އަނެކަކަށް ބަލަން އިނެވެ.

“އެއީ ތެދެއް ޒާނަ މީހަކާއި އިންނަނީތަ؟” ހަވީރު އެގެއަށް ދިޔަތަނާ ސަދާ އަހާލިއެވެ. އުރުގައި އިން ސަދާގެ ދަރިފުޅު އިބާން އާއި ލޯބިކޮށްލަމުން ޒާނަ ބޯޖަހާލިއެވެ.

“ޒާނަގެ އުމުރުން އަދި އަށާރަވެސް ނުފުރެއެއްނު. އެހާ އަވަސް އަރުވާނުލިއްޔަކާ ނުވާނެތަ؟ މިރަށުން އިންނާނެ މީހުން ހުސްވީއެއްނޫންވިއްޔަ. އެހެންނޫނަސް ޒާނަ ބޭނުން ކޮންމެމީހަކު ޒާނައަށް ލިބޭނެ.” ސަދާ ހިތްހަމަނުޖެހިފައި އަނެއްފަރާތަށް މޫނު އަނބުރާލިއެވެ.

“އެއީ ދެން މައްސަލައެއްތަ ދައްތާ؟ އެހެންނޫނަސް ރާކިންއަކީ ހާދަ މުއްސަނދި މީހެކޭ. މީހުން ބުނެއެއްނު ގެއްލިއްޖެ ވަގުތަކީ އަނބުރާ ލިބޭ އެއްޗެއްނޫނޭ. ކިހިނެތް އެނގެނީ މިކަހަލަ ދެވަނަ ފުރުސަތެއް ލިބޭނެކަމެއްވެސް.” ޒާނަ ހުރީ އޭނާގެ ނިންމުމާއިމެދު ރުހިފައެވެ.

“ޒާނައަށް ތިކަން އެނގުނުއިރު ދިރިއުޅުމަކީ ހަމައެކަނި ފައިސާއިން ލިބޭނެ އެއްޗެއްނޫންކަން ނޭނގުނީތީ ދެރައީ.” ސަދާއަށް ދެފަރާތަށް ބޯހޫރުވާލެވުނީ މޮޅިވެގެންނެވެ. ކޮއްކޮގެ ސިކުނޑީގައިވަނީ އޭނާގެ މަންމަގެ ވިސްނުންކަން އޭނާއަށް އެނގުނެވެ. ޒާނައަކީ މަންމަ ބޭނުންވާފަދަ ކުއްޖެކެވެ. އެމައުޟޫއަށް އިތުރަށް ވާހަކަ ނުދައްކަންވެގެން އޭނާ ހުއްޓާލިއެވެ.

ރާކިން މަސައްކަތް ކުރަމުންދިޔައީ ރަށުގައި ދުވަހަކުވެސް ބާއްވާފައިނުވާފަދަ ބޮޑު ޕާޓީއެއް ބޭއްވުމަށެވެ. އެކައިވެންޏަކީ އޭނާ ވަކި މަޤްސަދެއްގައި ކުރާ ކައިވެންޏެއްކަން އެހެން މީހުންނަށް އެނގެން ބޭނުން ނުވަނީ ކަންނޭނގެއެވެ. އެކަމަކު އޭނާ ފެންނަނީ އަބަދުވެސް ސީރިއަސްވެފައި އިންނަތަނެވެ. ބަސްމަދުވެފައި މީހުން ފެންނަ ހިސާބަށް ނިކުމެއުޅޭލެއްވެސް މަދެވެ. ކުޑަމިނުން ޒާނައާއިވެސް ރާކިން މާބޮޑު ގުޅުމެއް ނޯވެއެވެ. ރަންކިއުނު ދުވަހުއްސުރެ ދެއާއިލާ ހީވަނީ އެއްއާއިލާއެއް ހެންނެވެ. އަނެއްކޮޅުން ޒާނަމެންގެއިން މީރު ކާއެއްޗެހި ހުސްނުވެއެވެ. ވާންއުޅޭ ފިރިމީހާ ގޭގައި މީރު ކާއެއްޗެއް ހަދާއިރަށް އެއިން އެއްބައި ހިފައިގެން ނޯކަރަކު އަންނާނެއެވެ. ކައިވެންޏަށް ތައްޔާރުވާން ފެށިފަހުން އަމިއްލަ މަސައްކަތް މެދުކަނޑާލާފައި މީރުކޮށް ކައިއުޅޭތީ ހަނީފާ މިހާރު ފަލަވެސް ވާންފަށައިފިއެވެ.

ދުވަހުގެ އިރުއަރައިގެން އައިއިރު ޒާނަގެ ހިތް އޮތީ ތެޅިތެޅިއެވެ. ސަމާ އާއި ނާޖިލާ އައިސް ދައްކަންފެށި ވާހަކައަކުން އޭނާ ވަކިންބޮޑަށް ނުތަނަވަސްވިއެވެ.

“ތީ ކާކު ދެއްކި ވާހަކައެއް؟ އަހަރެންނަށް އިނގޭ ކަލޭމެން ތިއުޅެނީ އަހަރެން ބިރުގަންނަވަން ވެގެންކަން. އެއީ ތިބުނާވަރުގެ ބިރުވެރިކަމަކަށްވަންޏާ މީހުން މީހުންނަކާއި ނީންނާނެ.” ޒާނަ ގަދަކޮށްލިއެވެ. އެކަމަކު އޭނާގެ ހިތްވެސް ވަނީ ހިސާބަކަށް ބިރުގެންފައެވެ. އުނދޯލި ވަލުގައި ހިފަހައްޓާލައިގެން އިނދެ އޭނާ ދުރުބަލަން ފެށުމާއެކު ސަމާ އާއި ނާޖިލާ އެކަކު އަނެކަކަށް ބަލާލާފައި ސިއްރުން ހީލިއެވެ.

“ދެން މި ނާޖީ ހާދަ ގޯހޭ. އެވަރަށް ޒާނަ ބިރުގަންނަންވަން ވާނެތަ؟ އަހަރެމެންނާއި ހެދި ކައިވެނި ހުއްޓިއްޖެއްޔާ ރާކިން ރުޅިއަތުވެދާނެ. އެހެންނޫނަސް ތަޖުރިބާ ހުއްޓޭކިޔާފައި ރާކިން ޒާނައަށް ނުބަލާއުޅޭނެތަ؟ އޭނާ ނުލާހިކު ބޭނުންވެގެންވިއްޔަ އިންނަން އެއުޅެނީ.” ސަމާއަށް ޒާނަގެ ހާސްކަން ބަލަން މާގިނައިރު ވާންދެނެއް ނުއިނދެވުނެވެ. ދެ އެކުވެރީން އެއްބައިގައި ހޭންފެށުމުން ޒާނަވެސް ހިސާބަކަށް ހިތްހަމަޖެހިލައިފިއެވެ. އެމީހުން އެމަސައްކަތްކުރީ އޭނާ ތަޅުވަން ވެގެންނެވެ.

“އޭ ޒާނަ. ދެން އެކަމަކު ވާނުވާ އަންގާލައްޗޭ! މިބުނީ އަހަރެމެންނަށްވެސް ކުޑަކޮށް ޝެއަރކޮށްލަން ވާނެއޭ.” ނާޖިލާ އެހެން ބުނެފައި އަނގަމަތީގައި އަތް އަޅައިގެން ހޭންފެށިއެވެ. ޒާނަ ގަތީ ލަދެއްނޫނެވެ. އަނެއްފަރާތަށް އެނބުރިފައި އޭނާ ނާޖިލާގެ ބުރަކަށީގައި ތަޅައިގަތެވެ.

“އެއީ ތެދެއް ޒާނައެއްނު ފުރަތަމަ މެރީކުރަން ތިއުޅެނީ. އެހެންވީމަ ޒާނަ ވާނެ އަހަރުމެން ނޭނގޭ ކުދިންނަށް ކިޔައިދޭން. މާކުރިން ތިންމީހުން އެއްބަސްވެފައި އޮތްކަމެއްނު މީ. މިހާރު ހަނދާންނެތުނީ ދޯ.” ސަމާވެސް އެންމެފަހުން ނާޖިލާ އާއި އެއްބައިވެގެން ޒާނައާއި ދިމާކުރަން ފެށިއެވެ. އެވަގުތު ދޮރާށި ހުޅުވާލާފައި ވަދެގެން އައި ހަނީފާ ފެނިފައި ތިންމީހުން ހިމޭންވިއެވެ.

“ދަރިފުޅާ. ވަސީމައްތަ ބުނެގެން ދަރިފުޅު ހޯދަން މިއައީ. ” ހަނީފާ ފުރަތަމަވެސް ބުނެލިއެވެ. އޭނާ ހުރީ ވަރަށް ހިނިއައިސްފައެވެ.

“އެއީ ކީއްކުރަން؟ ” ޒާނަ އުނދޯލިން ފުންމާލައިގެން އައިސް މަންމަގެ ކުރިމައްޗަށް ހުއްޓުނެވެ.

“ކައިވެނި ހެދުން ލައްވަންވެގެން.” މަންމަގެ ޖަވާބު އަހާފައި ޒާނައަށް ހެވުނެވެ. އެއަޑަށް އޭނާގެ ދެ އެކުވެރީންވެސް ދުވެފައި އަތުވެއްޖެއެވެ.

“އޭ ކަލޭމެންވެސް ދާންވާނެ.” ސަމާގެ އަތުގައި ހިފައިގެން ޒާނަ ހިނގައިގަތެވެ. ފަހަތުން ނާޖިލާވެސް ދިޔައެވެ. ހަނީފާ ދިމާކުރީ ކާގެއާއި ދިމާއަށެވެ.

އެގެއަށް ގޮސް ވަނުމާއެކު ވަސީމާއަށް ތިން ކުދިން ފެނިފައި އަވަހަށް އެތެރެއަށް ދިއުމަށް އިޝާރާތްކޮށްލިއެވެ. ރަތްކުލައިގެ ވެޑިންޑްރެސް ލައިގެން ޒާނަ ނިކުތްތަން ފެނިފައި އެންމެންގެ ލޯތައް ހައިރާންކޮށްލިއެވެ. އިތުރު ތައްޔާރީއަކާއި ނުލާ ހަމައެކަނި އެހެދުމުގައިވެސް ރީތިކަމުން އޭނާ މިސާލެއްނެތެވެ.

“ވަރަށް ފުރިހަމަ.” ވަސީމާއަށް ވެސް ތައުރީފްކޮށްނުލައެއް ނުދެވުނެވެ. ހިނިތުންވުމަކާއިއެކު ޒާނަގެ ކޯތާފަތުގެ ހިފަހައްޓާލާފައި އޭނާ އެހެންދިމާއަކަށް ދާންވެގެން ހިނގައިގަތެވެ.

“އޭ އާދެބަލަ!” ވަސީމާ ގޮސް ގެއްލުމާއެކު ޒާނަ އޭނާގެ ދެ އެކުވެރީން ގޮވައިގެން ކޮޓަރިތެރެއަށް ވަނެވެ. ހުޅުވާލާފައިވާ ބޮޑު އަލަމާރި ފުރިފައިވާ ރީތި ހެދުންތައް ފެނިފައި އެ ދެ މީހުންވެސް ލޯބޮޑުކޮށްލިއެވެ.

“މީ ކާކުގެ ހެދުންތަކެއްބާ؟” ނާޖިލާ ހެދުންތަކުގެ އެއްކޮޅުން އަނެއްކޮޅަށް އަތް ހިންގާލިއެވެ.

“ތިއެއް ބަލާނެކަމެއް ނެތެއްނު. ހިނގާބަލަ ހެޔޮވަރު ހެދުމެއް ހުރިތޯ ލާން. ހާދަ ސަޅިއޭ. މަ ދީފާނަން އައިޑިއަރ އެއް. ހިނގާ ފެޝަން ޝޯވް އެއް ބާއްވަން.” ޒާނަ ނާޖިލާގެ ވާހަކައާއި ގަޔާނުވެފައި ބުނެލިއެވެ.

ފާޚާނާއަށްވަދެ ފަހަރަކު ހެދުމެއްލައިގެން ނިކުމެ ތިން އަންހެން ކުދީން ފަރިއަށް ހިނގަހިނގާފައި މަޖާނަގަމުން ދިޔައެވެ. ދޮރުފޮތިތައް ދަމާފައިހުރުމުން ކުޑަދޮރުތައް ހުޅުވާފައި ހުރިކަން އެމީހުންނަކަށް ނޭނގެއެވެ. އޭގެ އިރުކޮޅެއްފަހުން ފޯން ކަންފަތުގައި ޖަހައިގެން ކުޑަ ދޮރުތައް ކައިރިން ހިނގާފައިދިޔަ ރާކިންގެ ކަންފަތުގައި އެކުދީންގެ ހުނުމުގެ އަޑުޖެހިފައި އެދިމާއަށް ބަލާލެވުނެވެ. ޖެހިލި ވައިރޯޅިއަކާއިއެކު ދޮރުފޮތިގަނޑު ހިއްލިލުމާއެކު ރާކިންގެ ދެފައި ހީވީ ބިމުގައި ތަތްލިހެންނެވެ. އޭނާގެ ހަތަރެސްފައި އާދަޔާހިލާފަށް ފިނިވެގެން ދިޔައެވެ.

އާރިއާގެ ހެދުމުގައި އޭނާއަށް ފުރަގަސްދީގެން ހުރި ޒާނަގެ ކައިރިއަށް ދިއުމަށްޓަކައި ރާކިން ހިނގައިގަތީ ޗާބީދީފައިވާ ބުދެއްފަދައިން އަތެއްތަނެއް ހަލުވާނުލައެވެ. ދޮރުކައިރިއަށް ހުއްޓިފައި ދޮރުފޮތިގަނޑު އެއްފަރާތް ކޮށްލުމަށްޓަކައި އުފުލާލި އަތުގައިވެސް ވަނީ މަޑު ތުރުތުރެކެވެ. އެވަގުތު ޒާނަ އެނބުރިލިއެވެ. ރާކިންއަށް ދޫކޮށްލެވުނީ ހަމަޖެހުމުގެ ނޭވާއެކެވެ. ކުރެވުނު ކުށްހީއާއިމެދު އޭނާ އަމިއްލަ ނަފްސަށް މަލާމާތްކޮށްލިއެވެ. އާރިއާ އަންނަންވީ ކީއްވެ ހެއްޔެވެ؟ އޭނާ ރާކިންމަތިން ހަނދާންވެސް ނުކުރާނެއެވެ.

އިޝާނަމާދުން ފައިބައިގެން ޒާނަ ތައްޔާރުވާން ފަށައިފިއެވެ. ކައިވެނި ހެދުން ހެއުވަރުކުރަން އައިސް ވަން ކޮޓަރީގައި އޭނާ އިނެވެ. ޑްރެސިން ޓޭބަލް ކުރިމަތީގައި ލޯގަނޑުން އަމިއްލަ ސޫރައަށް ބަލަހައްޓައިގެން އިންދާ ދެފަރާތުގައި ތިބި އަންހެންކުދީންތައް އޭނާ ތައްޔާރުކޮށް ނިންމައިފިއެވެ. ޒާނަގެ ހިތްވަނީ އުފަލުން ފުރިފައެވެ. މީ އޭނާ އަބަދުވެސް ދެކެމުން އައި ހުވަފެނެކެވެ. މިރެއަށްފަހު އޭނާ ވާނީ މުއްސަނދި ކުއްޖަކަށެވެ.

ކައިވެންޏަށް ވަގުތު ކުޑަތަންވަމުން ދިޔައެވެ. ކަޅުކުލައިގެ ކޯޓްފަޓްލޫނުގައި ހުރި ރާކިން އިސްކޮޅާއި އެއްވަރުގެ ލޯގަނޑު ކުރިމަތީ އަމިއްލަ ސޫރައަށް ބަލަހައްޓައިގެން ހުއްޓެވެ. ހިތަށް އޭނާ ވިސްނައިދޭން މަސައްކަތް ކުރަމުން ދިޔައީ އެ ނިންމުމަކީ ރަނގަޅު ނިންމުމެއް ކަމުގައެވެ. އެ ނިންމުމާއިމެދު އޭނާ ހިތް ރުއްސަނީއެވެ. އާރިއާގެ ވާހަކަތަކީ ހުސް ކުށްހީކަން އޭނާ މިރޭ ސާބިތުކޮށްދޭނެއެވެ. އެފަދަ ކިތަންމެ އާރިއާއެއް ރާކިންގެ ހަޔާތަށް އަންނާނެއެވެ. އޭނާ އަކީ ރީތި ފިރިހެނެކެވެ. މުއްސަނދިވެފައި ޤަދަރުވެރިއެވެ. އިތުރަށް އަންހެންކުއްޖަކު ބޭނުންވާނީ ކޮންކަމެއް ހެއްޔެވެ؟

ވަގުތުޖެހުމާއިއެކު ކައިވެނި ކުރެވިއްޖެއެވެ. ދެން އޮތީ ޕާޓީއެވެ. މެހުމާނުން ވަންނަން ހަދާފައިވާ ދޮރާއި ދިމާލުގައި ހަދާފައިވާ ކުޑަކުޑަ ސްޓޭޖްގައި އެކަކުއަނެކަކާއި ޖެހޭނުޖެހޭ ހިސާބުގައި އަލަތު ދެމަފިރިން ތިއްބެވެ. ރާކިންގެ ތުންފަތްމަތީގައިވަނީ ދެއްކުމުގެ ހިނިތުންވުމެކެވެ. އެހެނަސް ޒާނަ ހުރީ އުފަލުން ފުރިފައެވެ. އެކަމަކު އެއީ ކޮންމެހެން ރާކިންއާއި ކައިވެނިކުރެވުނީތީ ވާ އުފަލެއް ނޫނެވެ. މިއަދު އެމަޤާމުގައި އިތުރު އެހެންމީހަކު ހުއްޓަސް ޒާނަ ހުންނާނީ އުފަލުންނެވެ.

ދޭތެރެއަކުން ވަގުތު ހޯދައިގެން ހަނީފާ އަވަސްއަވަހަށް ގޮސް ގެއަށް ވަދެފައި ދޮރުލައްޕާލިއެވެ. ގާޒީގެ ކުރިމަތީގައި ރާކިން ހަވާލުކުރި ރުފިޔާބޮނޑި ލިބުނީ އޭނާއަށެވެ. ޕާޓީއަށް ނިކުންނަންވެގެން ޒާނަ އޭނާއާއި ހަވާލުކުރީއެވެ. ނޫޓްތައް ފެނުމާއެކު ހަނީފާގެ ދެލޯ ވިދައިގަތެވެ. ބަންޑެލިން ވަކިކޮށްލާފައި އޭނާ އެހުރިހާ ފައިސާ އެނދުމަތީ އަތުރާލިއެވެ. އެއްތާކުން އެހާ ގިނަ ފަސްސަތޭކައިގެ ނޫޓްތަކެއް ހަނީފާ ހުވަފެނަކުންވެސް ނުދެކެއެވެ. ލިބުނު އުފަލެއްގެ ބޮނޑުކަމުން އޭނާގެ ލޮލުން ކަރުނަތިއްކެއް ނީރާލައިގެން އައިސް ކޯތާފަތްމައްޗަށް ވެއްޓިއްޖެއެވެ. އަވަސްއަވަހަށް ފައިސާބޮނޑި އަލަމާރިއަށްލާ ފޮރުވާފައި އޭނާ އަނެއްކާވެސް ޕާޓީގައި ބައިވެރިވުމަށްޓަކައި ދިޔައެވެ. އޭރު އެހެން އެންމެން ފޮޓޯނެގުމުގައި އުޅެއެވެ. ހަނީފާ ފެނުމާއެކު ވަސީމާ އޭނާއަށް ގޮވައިގެންގޮސް އެންމެންގެ މެދުގައި ބަހައްޓައިފިއެވެ. މިރޭ އެހެން އެންމެންނަށްވުރެ އޭނާގެ މޫނު އުފާވެރިއެވެ.

ކޮންމެ ފެށުމަކަށްވެސް ނިމުން އަންނާނެއޭ ބުނާބީދައިން އެއުފާވެރި ޕާޓީއަށްވެސް ވަކިވުމުގެ ވަގުތާއި ކުރިމަތިވެއްޖެއެވެ. މެހުމާނުން ހުސްވެފައިވާ ހޯލުގައި ހުރި ވަސީމާ އައިސް އަލަތު ދެމަފިރީންގެ ކައިރިއަށް ހުއްޓިފައި ޒާނަގެ އަތުގައި ހިފައިގެން ދާން ހިނގައިގަތެވެ. ރާކިން ހުރީ ޝާމްއާއި ވާހަކައެއް ދައްކަންވެގެންނެވެ. އާއިލާގެ އެހެންމީހުންނާއި ގޭގެ ނޯކަރުންގެ އިތުރަށް ދެންތިބި ހުރިހާ އެހީތެރިންވެގެން އެތަން ހަމައަކަށް އަޅުވަން މަސައްކަތް ކުރަމުން ދިޔައެވެ.

ޒާނަގެ އަވަސްވެފައިވާ ހިތް ކުރިއަށްވުރެވެސް ބޮޑަށް ތެޅެންފެށީ ވަސީމާ އައިސް އޭނާ ކޮޓަރިއަށް ލާފައި ދިއުމުންނެވެ. އެނދުގައި އިނދެގެން އޭނާ ދެފަރާތަށް ލޯ ހިންގިއެވެ. ރީތިކަމުން އެއީ ދުނިޔެމަތީގެ ސުވަރުގެއެއް ފަދައެވެ. އެއީ މިފަދަ ރެއެއްގައި ދެމަފިރިއަކު އެންމެ ބޭނުންވާފަދަ މަސްތީ މާހައުލެކެވެ. އެހެނަސް ޒާނަގެ ހިތާއި ހަށިގަނޑުގައި ހިލިފައިވަނީ މުޅިން އެހެން އިހްސާސްތަކެކެވެ. އޭނާ ވަނީ ނުތަނަވަސްވެފައެވެ. ހުއްޓުވަން މަސައްކަތްކުރަމުން ދިޔައިރުވެސް ހަށިގަނޑުގައި ހިފާފައިވާ މަޑު ތުރުތުރަކަށް ބަދަލެއް ނައެވެ.

ޒާނަ އެތާ އިންނަތާ ބައިގަޑިއެއްހާއިރު ފާއިތުވެދިޔަފަހުން ކޮޓަރީގެ ދޮރުހުޅުވުނު އަޑު އިވުނެވެ. އެގަޑީގައި އަންނާނީ ކާކުކަން އެނގިހުރެވެސް ޒާނައަށް ދޮރާއި ދިމާއަށް ބަލާލެވިއްޖެއެވެ. ރާކިން ފެނިފައި އޭނާގެ މެއަށް ފިނިވެގެން ދިޔައެވެ. ދޮރުލައްޕާ ތަޅުލާފައި އޭނާގެ ކައިރިއަށް އަންނަން ފެށުމުން ޒާނައަށް ދެކަކޫ ގެނެސް މެޔާލައި ބޮނޑިކޮށްލެވުނެވެ. އެސްފިޔަތައް ތިރިކޮށްލައިގެން އިނދެވެސް އޭނާ ސިއްރުން ރާކިންގެ ފިޔަވަޅުތަކަށް ބެލިއެވެ. ރާކިން އައިސް ކައިރިއަށް ހުއްޓިފައި އެނދުގެ މަގަތުގައި އިށީނެވެ. ހިމޭންކަމުގެތެރޭގައި ރާކިންއަށް އޭނާގެ ހިތުގެ ތެޅުން އަޑުއިވޭނެއޭ ޒާނަގެ ހިތަށް އެރިއެވެ. އެނދުމަތީގައި ރާކިން އަތް ބާއްވައިލިތަން ފެނިފައި ޒާނައަށް އޭނާގެ ހާމަވެފައިވާ ދެފައިތިލަ ހެދުމުގެ ބޮޑު ފަސްބައިގެ ތެރެއަށް ދަމައިގަނެވުނެވެ. ރާކިން ގޮވާލީ ދެނެވެ. ހިމޭންކަމުގެ ތެރެއިން އެ ފިރިހެންވަންތަ އަޑު އޭނާގެ ކަންފަތުގައި ޖެހުނީ އެއީ ހުވަފެނެއްކަމުގައި ހީކުރުވާފަދަ ގޮތަކަށެވެ.

“ޒާނައަށް އެނގޭދޯ އަހަރެމެން ދެމީހުންގެ އުމުރުގައި ދިހަ އަހަރުގެ ތަފާތެއް ހުރިކަން؟” ރާކިން ބުނެލި އެއްޗަކުން ޒާނަ އިސްއުފުލާލިއެވެ.

“އެއީ ދެން މާބޮޑު މައްސަލައެއްވެސް ނޫން.” ޒާނަ އެއްޗެކޭ ނުބުނުމުން ރާކިން އިތުރުކޮށްލިއެވެ. އެޖުމްލައިގެ މާނަ ޒާނައަށް ނެގުނީ އެހެން ގޮތަކަށެވެ. އޭނާ އިތުރަށް ނުތަނަވަސްވީ އެހެންވެގެންނެވެ.

“އަހަރެންނަށް އިނގޭ މިއީ ކޮންމެ އަންހެންކުއްޖެއްގެ ހަޔާތަށްވެސް އަންނާނެ އެންމެ ހާއްސަ ރޭކަން. އަދި މިރެއަށްޓަކައި ޒާނަވެސް ފޮނިއުންމީދުތަކަކާއި ކުލަ ހުވަފެންތަކެއް ދެކޭނެކަން ވިސްނޭ. އެކަމަކު…” ރާކިން ޖުމްލަ ފުރިހަމަނުކޮށް ޒާނައަށް ބަލައިލިއެވެ. އެވަގުތު ޒާނަވެސް އަނެއްކާ އިސްއުފުލާލައިފިއެވެ. ދެޒުވާނުންގެ ހަތަރުކަޅި ހަމަވުމާއެކު ރާކިން ދުރުބަލަން ފެށިއެވެ.

“ސޮރީ ޒާނަ. އަހަރެން ބޭނުމެއްނޫން ޒާނައަށް އަށާރަ ނުފުރެނީސް މިދެމެދުގައި ކައިވެނީގެ އެއްވެސް ގުޅުމެއް ކުރިއަށް ގެންދާކަށް.” ރާކިން ތެދުވެގެން ގޮސް ކުޑަދޮރު ކައިރިއަށް ހުއްޓިފައި ބޭރުބަލަންފެށިއެވެ. ޒާނައަށް ހީވީ ގެނބެމުންދަނިކޮށް ފެނުމަތީ އޮތް ލަކުނޑި ގަނޑެއްގައި އަތްޖެހުނުހެންނެވެ. އޭނާގެ ހިތާއި ހަށިގަނޑުގައިވި ނުތަނަވަސްކަން ފިލައިދިޔައީ ކުއްލިއަކަށެވެ. ރާކިންގެ ވިސްނުން ހުރިގޮތުން އޭނާ ހިތާއި ހިތުން އުފާކުރިއެވެ. ހަމަޖެހުމުގެ ނޭވާއަކަށްފަހު ދެފައި ތިރިކޮށްލާފައި ޒާނަ އެނދުގެ އެއްފަރާތެއްގައި ދިގުދިގަށް އޮށޯވެލިއެވެ. ލޯމެރެމުން ދިޔައިރުވެސް އޭނާއަށް ކުޑަދޮރުކައިރީ ހުރި ރާކިން ފެނުނެވެ.

“ރިކް!” ރާކިންގެ ކޮނޑުމަތީގައި މަޑުމަޑު އަތަކުން ހިފަހައްޓާލިއެވެ. އެވަގުތު އޭނާގެ ތުންފަތަށް ލުއި ހިނިތުންވުމެއް ވެރިވިއެވެ. ލަސްލަހުން އެނބުރުނުއިރު އާރިއާ ހުރީ އިސްޖެހިފައެވެ. ސެޓިންފޮތީގެ މަޑުފިޔާތޮށި ކުލައިގެ ނިދާ ހެދުމާއިއެކު އެމޫނަށް ވެރިވެފައިވާ ލަދުރަކިކަމަކުން ރާކިންގެ ހިތް މަސްތުކޮށްލިއެވެ. ކައިރިއަށްދާން ފުރަތަމަ ފިޔަވަޅު ނެގިތަނާ އާރިއާ އަނެއް ފަރާތަށް އެނބުރިފައި މޫނުގައި ދެއަތްއެޅިއެވެ. އެވަގުތު ރާކިން މަޑުމަޑުން ހީލިއެވެ. ކައިރިވެލާފައި އޭނާގެ ބާރުގަދަ ދެއަތުގެތެރޭގައި އާރިއާ ބޮނޑިކޮށްލުމާއެކު އަވަސްވެފައިވާ އެރީތި އަންހެންކުއްޖާގެ ހިތުގެ ތެޅުން ކަންފަތާއި ހަމައަށްވެސް ފޯރިއެވެ.

ދާދިކައިރިން ބުޅަލެއް ހޭރިގަތް އަޑުއަހާފައި ރާކިންގެ ހިޔާލުތައް ވިއްސިވިހާލި ކޮށްލައިފިއެވެ. ތެޅިގެންފައި އަނެއްފަރާތަށް އެނބުރުނުއިރު ޒާނަ ފުން ނިންޖެއްގައި އޮތެވެ. ބަލަހައްޓައިގެން ހުރެހުރެފައި ރާކިން ކުޑަދޮރު ލައްޕާލިއެވެ. ބާލީހެއް ނަގައިގެން ގޮސް ދުރުގައިހުރި ސޯފާގެ އެއްކޮޅުގައި ބާއްވާފައި ކުޝަންއެއް މޭމަތީ ބާއްވާލައިގެން އޭނާ އޮށޯތެވެ. މޯބައިލް ނަގާ އޭގެ ސްކްރީނުން އާރިއާގެ ނަންބަރަށް ބަލަހައްޓައިގެން އޭނާ އޮތީ ދެ ފިކުރެއްގައެވެ. ދެލޮލަށް ޖަމާވަމުންދިޔަ ކަރުނައިން މަންޒަރު ފުސްވާގޮތްވުމުން އޭނާ ފޯން ގެނެސް މޭމަތީ ޖައްސާލަމުން ބިތްދޮށަށް އެނބުރި ލޯމަރާލިއެވެ. އެސްފިޔަތަކުގެ ފުރަގަހަށް ޖަމާވެފައިވާ ކަރުނަތަށް އޭގެ މަޤާމުގައި ކެތްނުވެގެން ފައިބަންފެށީ ދެނެވެ. އެކަމަކު އެއަށްވުރެ އަވަހަށް އޭނާ ލޯފުހެލާފައި ނޭފަތް ދަމާލިއެވެ. ހީވީ ކަރުނައަކީ ރާކިންއަށް މަނާ އެއްޗެއް ހެންނެވެ.

ޖެހިގެން އައި ދުވަހު ހަވީރުގެ ވަގުތެއްގައި ރާކިން ޒާނަ ގޮވައިގެން މާލެދާން ނައްޓާލައިފިއެވެ. ފްލައިޓަށް އަރަން ދިޔައިރުވެސް ޒާނަ ހުރީ ބިރުގެންފައެވެ. އެއަރ ޕޯޓްގައި އެވަގުތު އާއިލާގެ މީހަކު ނެތީ ނަސީބެވެ. އެހެންނޫން ނަމަ ޒާނައަށް އޭނާގެ ކަރުނަތައް ހިފަހައްޓައެއް ނުލެވުނީހެވެ. ރަށުން އަންނަމުން އަތިރިމަތީގައިވެސް އޭނާ ހަނީފާގެ ގައިގައި އޮޅުލައިގަނެގެން ހުރެ ބާރަށް ރުޔެވެ. ފްލައިޓް ނައްޓާލުމާއެކު ޒާނަ އަށް ތެޅިގެންފައި ހިފެހެއްޓުނީ ރާކިންގެ އަތުގައެވެ. އެވަގުތު ރާކިން ބަލާލިއެވެ. އެމޫނުން ފެންނަން ހުރި ބީރަތްޓެހިކަމަކުން އޭނާ ރަކިވެގެން އަތް ދުރަށްލާފައި ބޭރުބަލާކަމަށް ހެދުނެވެ. ރާކިން އަނެއްފަރާތަށް މޫނުއަނބުރާލިކަން ޔަޤީންވުމާއެކު އޭނާ ދެލޯމަރާ ތަގުޅިކޮށްގެން ސީޓުގައި ބުރަކަށި ޖައްސާލިއެވެ. ހުޅުލެއަށް ބޯޓު ޖައްސަންދެންވެސް ޒާނަ އިނީ ސަލާމަތަށް އެދި ހިތާއިހިތުން ދުޢާކޮށްލަ ކޮށްލައެވެ.

ރާކިންގެ މުއްސަނދި ގޭގެ ގޭޓުން އެތެރެއަށް ވަދެގެން ދިޔަ ކާރުގައި އިން ޒާނަ ދެލޯބޮޑުކޮށްގެން ބޭރު ބަލަން އިނެވެ. ޕޯޓިކޯއަށް ކާރު މަޑުކުރުވާފައި ޑްރައިވަރ ފައިބައިގެން އައިސް ދޮރުހުޅުވާލިއިރުވެސް އޭނާ އިނީ ހުއްޓުން އަރާފައެވެ. ޒާނައަށް ފޭބުނުއިރު ރާކިން އެތެރެއަށް ވަދެގެން ދިޔަތާ ކިތަންމެ އިރެކެވެ. އެތަންމިތަން ބަލަމުން އޭނާ ގޮސް ގޭގެ ދޮރުން ވަންތަނާ ބޭރު އަންހެނަކު ނިކުމެފައި ފަހަތުން ދިއުމަށް ބުންޏެވެ. އަންހެންމީހާ ދެއްކި މަގުން ގޮސް އޭނާއަށް ވަދެވުނީ ހުވަފެނުން ދުށް ކޮޓަރިއަށް ވުރެވެސް ފުރިހަމަ ތަނަކަށެވެ. އެރޭ ނިދަންދެން ޒާނަގެ ހުރިހާ ވަގުތެއް އޭނާ ހޭދަކުރީ ގޭގައި އުޅޭ ނޯކަރ ރޫބީގެ ފަހަތުގައެވެ. ރާކިން މަތިން އޭނާ ހަނދާންވެސް ނެތެވެ. އެއްތަނަކަށް ވަދެފައި އަނެއްތަނެއް ބަލާފައި އުޅޭއިރު ޒާނަ ހުރީ އުފަލުން ފޮޅިފައެވެ.

ނުވައެއްޖެހި ތަނާ ޒާނަ ނިދިއައިސްގެން ހަލާކުވިއެވެ. ރަށުގައި އުޅޭއިރުވެސް އޭނާއަކީ އަވަހަށް ނިދާ ކުއްޖެކެވެ. އެރޭވެސް އޭނާ އުންމީދުކޮށްގެން ހުރީ އެގޮތަށެވެ. ޒާނަ އޮށޯތީ ދުވަހަކުވެސް އިހްސާސްކޮށްފައިނުވާފަދަ އަރާމު ތަންމައްޗެއްގައެވެ. އެހެނަސް އޭނާއަކަށް ނުނިދުނެވެ. ލޯމަރާލާއިރަށް އަންނަ ނާންނަތަނެއް ނޭނގި ރަށުގެ ހަނދާންތައް އޭނާގެ ސިކުނޑި ވަށާލައެވެ. ލޮލުން ކަރުނަ އައީ އޭނާގެ އަމިއްލަ އިޙުތިޔާރަކު ނޫނެވެ. މިނޫނީ ދުވަހަކުވެސް ރަށާއި އާއިލާ ދޫކޮށްފައިނުވާ ޒާނައަށް އެމީހުންގެ ފަޅުކަން މާބޮޑަށްވެސް އިހްސާސް ކުރެވެން ފެށިއެވެ. އެނދުގައި ފުރޮޅި ފުރޮޅި އޮތްވާ އޭނާއަށް ނިދުނުއިރު ބާރަވެސް ޖަހައިފިއެވެ.

ލިފްޓުން ނިކުމެގެން ރާކިން އޭނާގެ ކެބިންއާއި ދިމާއަށް ހިނގަމުން ދިޔައެވެ. ވިލުނޫ ކުލައިގެ އަތްދީގުގަމީހާއި ފަޓްލޫނުގައި އޭނާގެ ވަރުގަދަ ޝަހުސިއްޔަތުގެ އިތުރަށްވެސް ކޮންމެ ހަރަކާތަކާއި ބެލުމެއްގައި ޝާހީކަމެއް އެކުލެވިފައިވިއެވެ. ހެނދުނަށް ފޮޅިފައިވާ މޫނުތަކާއިއެކު ފެންނަ ކޮންމެ މުވައްޒިފަކު ނުހަނު އިޙުތިރާމާއިއެކު ސަލާމް ގޮވާލައެވެ. އެކަމަކު އެހެން ދުވަސްދުވަހާއި ހިލާފަށް އެމީހުންގެ ބެލުމުގައި ތަފާތުކަމެއް ވާކަމުގައި ރާކިންގެ ސިކުނޑި ވިސްނައިދިނީ ކީއްވެކަމެއް ނޭނގުނެވެ.

ކެބިންގެ ދޮރާއި އަރާހަމަވެފައި ކާޑް ކަނޑާލުމާއެކު ދޮރުހުޅުވުނެވެ. ހިޔާލެއް ފިކުރެއްނެތް ރާކިން އެތެރެއަށް ވަދެފައި އޭނާގެ ގޮނޑިއާއި ދިމާއަށް ހިނގަހިނގާ ހުއްޓާ މާކުރިން އައިސް އެތާއިން މީހަކު ގޮނޑި މަގަތަށް އަނބުރާލިއެވެ. ރާކިންގެ ފައިދަށުން ބިންގަނޑު ދެމިގަތްކަހަލައެވެ. ހުރި ފިޔަވަޅުމައްޗަށް ހުއްޓެވުނު ގޮތަށް ބުނާނެ އެއްޗެއްވެސް ނޭނގިފައި އޭނާ ބަލަހައްޓައިގެން ހުއްޓެވެ. ( ނުުު ނި ިމޭ )