އެދެނީ ލިބުމޭ ކަލާ… (ފުރަތަމަ ބައި)

“ބައްޕާ… އަހަރެން ނުވޭ ވަޒީފާއަށް ދާހިތެއް… އަހަރެން ވަޒީފާއަށް ނުދިޔަސް އަހަރެން ބޭނުން ހުރިހާ އެއްޗެއް ލިބޭ… ކީއްވެތަ ކޮންމެހެން އަހަރެން ވަޒީފާއަށް ފޮނުވަން ތިއުޅެނީ… ” ލޫނާ ޝަކުވާ ކުރަމުން ދިޔައެވެ.

” ދަރިފުޅާ.. ދަރިފުޅު ޖެހޭނެ ވަރަށް ޒިންމާދާރު ކުއްޖަކަށްވާން… ބައްޕަގެ ހަމައެކަނި ހުރީ ދަރިފުޅު.. ބައްޕަ ނެތް ދުވަހަކުންވެސް މި ވިޔަފާރިއާ ހަވާލު ވާންޖެހޭނީ ދަރިފުޅެއްނު… އެކަމަކު އަދި ބައްޕަ ބޭނުމެއް ނޫން ވިޔަފާރީގެ ހުރިހާކަމެއް ދަރިފުޅާ ހަވާލު ކުރާކަށް…” މަޑުމައިތިރި ރާގެއްގައި އާސިމް އޭނާގެ ބާވިސް އަހަރުގެ ދަރިފުޅަށް ވިސްނައިދެވޭތޯ މަސައްކަތް ކުރަމުންދިޔައެވެ.

…………………………………………………….

ލޫނާއަކީ އަލްވީޝް އާއި އާސިމްއަށް ލިބުނު ހަމައެކަނި ދަރިފުޅެވެ. ތަގުދީރުގައި ކަންތައް ދިމާވިގޮތުން އަލްވީޝް މިދުނިޔެއާއި އަލްވަދާއުކީ އާސިމްއާއި އަލްވީޝްގެ ލޯބީގެ ނިޝާން ކަމުގައިވާ ލޫނާ ވިހެއުމުގެ ތެރޭ ދިމާވި މައްސަލަ އަކުން އެތެރެ ހަށިން ލޭމަނާނުވެގެންނެވެ. ނަމަވެސް އެހާދިސާއަށްފަހު އާސިމް މަސައްކަތް ކުރީ ލޫނާއަށް ރަނގަޅު މުސްތަގުބަލެއް ހޯދާދިނުމަށެވެ. އެގޮތުން ވަޒީފާގެ އިތުރުން ހުސްވަގުތު ތަކުގައި އިތުރު މަސައްކަތް ކޮށްގެން ހޯދި ފައިސާއިން ކޮންސްޓްރަކްޝަން ދާއިރައިގައި އަމިއްލަ ކުންފުންޏެއް ހިންގަން ފެށީއެވެ. އެހުރިހާ މަސައްކަތެއް ކުރަން އުޅުނު އިރު ލޫނާގެ ކަންކަން ބަލަހައްޓަމުން ގެންދިޔައީ އަލްވީޝްގެ މަންމަ ޒުލޭހާއެވެ. ނަމަވެސް ލޫނާގެ އުމުރުން އަށްއަހަރުގައި ޒުލޭހާ ނިޔާވީ ގަދަޔަށް ހުންއައިސް ޖެހުނު ރޯގާއެއްގައި މާބޮޑަށް ހަށިގަނޑުން ލޭމަދު ވެގެންނެވެ. ކަންދިމާ ކުރި ގޮތުން އޭރު ލޫނާއަށް ކުޑަކޮށް ވިސްނެން ފަށާފައިވާތީ އާސިމް ވިޔަފާރީގެ ކަންކަން ކުރަންދަނީ ގޭގައި ކައްކަން ގެނެސްސަ ހުންނަ މީހާއާ ލޫނާ ހަވާލު ކޮށްފައެވެ. އެގޮތުގައި ގިނަ ދުވަސްތަކެއް ހޭދަކުރަމުންގޮސް ލޫނާ ގުރޭޑް ދިހައެއް ނިމުމުން އާސިމް ލޫނާ އޮސްޓްރޭލިއާއަށް ފޮނުވާލީ އިތުރަށް ކިޔަވާދިނުމަށެވެ. ނަމަވެސް ލޫނާ ދިޔައީ ކިޔަވާ ހިތަކުންނޫނެވެ. ލޫނާ ދެކޭގޮތުގައި ކިޔެވުމަކީ މާމުހިންމު ކަމެއް ނޫނެވެ. ބައްޕަގެ މުއްސަނދި ކަމުގައި އުޅެމުންއައި ލޫނާއަށް ފަގީރުންގެ ދިރިއުޅުމާމެދު ހިޔާލު ކޮށްލާނެ ފުރުސަތެއްވެސް ނުލިބެއެވެ. އެގޮތުގައި ފަސް އަހަރު އުޅުމައްފަހު ލޫނާ މާލެއައީ ބިޒްނަސް ދާއިރާއިން މާސްޓާޒް ނިންމައިގެންނެވެ.

…………………………………………………………..

ލޯގަނޑު ކުރިމަތީގައި ހުރެ ލޫނާ ރީތިވަމުން ދިޔައީ ބައްޕައާއެކު އޮފީހަށްދާށެވެ. މަޑު ފެހި ކުލައިގެ ގަމީސް ކޮޅަކާއި ކަޅު ސްކިނީ ޖީންސްގައި ލޫނާ ވަރަށް ފުރިހަމަ ކަމަށް ދައްކައެވެ. އަދި މަޑު ބްރައުން ކުލައެއް ޖައްސާފައިވާ އިސްތަށިގަނޑު ފަހަތައް ވާގޮތަށް ރަބަރުން އައްސާލާފައިވުމުން ލޫނާގެ މޫނާއި ކަރުދަށުގެ ދޮންކަން ބޮޑަށް ފާހަގަވެއެވެ. މަޑު ފިޔާތޮށި ތުންފަތުގައި ހާކާފައިވާ ލިޕްބާމް އިން ތުންފަތަށް އިތުރު ތާޒާކަމެއް ގެނެސްދީފައިވެއެވެ.

އޮފީހަށްދާން ތައްޔާރުވެގެން ނިކުތް ލޫނާ ފެނިފައި އާސިމްހުރީ އަޖައިބު ވެފައެވެ. އަލްވީޝްއާ ލޫނާ ވަރަށް ވައްތަރެވެ. ހަމައެކަނި ތަފާތަކީ ލޫނާއަށް އާސިމްގެ ފަން އިސްތަށިގަނޑު ލިބިފައިވާކަމެވެ. ނަމަވެސް ބުރުގަލެއް އަޅައިފިއްޔާ އެދެމީހުންގެ އެއްވެސް ތަފާތެއް ނުހުންނާނެއެވެ. ” ބައްޕާ… ކިހިނެއް ވީ… އަހަރެން މިކަހަލަ ދިގު ޖީންސެއް ތިރިންލީމަ ވަރަށް ހަޑި ދޯ… ބައްޕަ ހިންހަމަ ނުޖެހިދާނެތީ ސްކާޓެއް ނުލީ..” އާސިމް ހުރިގޮތުން ލޫނާ އަހާލިއެވެ. ” ނޫނޭ ދަރިފުޅާ… ދަރިފުޅު މަންމައާ ވައްތަރު ކަމުން ބައްޕައަށް މި ބެލެނީ… އެކަމަކު ދަރިފުޅު ހިތަށް ނާރުވައްޗެ ދަރިފުޅު ލާ ހެދުމާމެދު ބައްޕަ ހިންހަމަ ނުޖެހޭނެއޭ.. އެއީ ދަރިފުޅު ގެ ކަމެއް.. ބައްޕަ ނުބެހޭނަން އެކަހަލަ ކަންކަމަކާ.. މިއަދު ވަރަށް ރީތި ދަރިފުޅު.. ތި ގަމީހުގެ ކުލަ ދަރިފުޅާ ވަރަށް ގުޅޭ… ދެންހިނގާ ސައިބޯން ދާން.. އޭރުން ގަޑިއަށް ދެވޭނީ..” ޑައިނިންގް ރޫމައަށް ވަންނަމުން އާސިމް ބުނެލިއެވެ.

އޮފީހަށް ވަދެވުމާއެކު އާސިމް ފުރަތަމަ ދިޔައީ އާސިމް މަސައްކަތްކުރާ ކޮޓަރިއަށެވެ. އަދި އެތަނަށް ގޮސް ލޫނާއަށް އޮފީހުގެ ކަންތައްތައް ކުރިޔަށް ދަމުންދާގޮތް ކިޔައިދިނެވެ. އެއަށްފަހު ފަހަރަކު ޑިޕާރޓްމަންތަކަށް ވަދެ ހުރިހާ މުވައްޒަފުންނަށް ލޫނާ ތައާރަފު ކޮށްދެމުން ދިޔައެވެ. އަދި އެންމެފަހުން އާސިމްގެ ސެކެޓްރީގެ މަގާމުގައި ހުރޮި މީހާއަށް ހާއްސަ ކެބިންއަށް ދިޔައެވެ. އަދި ސެކެޓްރީގެ މޭޒުކައިރިއަށް ހުއްޓުނެވެ. “ޒައިން.. މީ އަހަރެންގެ ދަރިފުޅު ލޫނާ… ދަރިފުޅާ… މީ ޒައިން… ބައްޕަގެ ސެކެޓްރީ.. މީގެ ފަހުން ދަރިފުޅު މަސައްކަތް ކުރަން ޖެހޭނީ ޒައިން އާއެކު…” އާސިމްއަށް އެހެން ބުނެވުނު އިރު ޒައިންއާ ލޫނާ ހުރީ ބުނާނެއެއްޗެއް ނޭނގިފައި އެކަކު އަނެކަކަށް ބަލަހައްޓައިގެންނެވެ. ބަލާބެލުމަށް ހީވަނީ މާ ކުރިން ފެށިގެންވެސް ދަންނަ ދެމީހުން ހެންނެވެ.

“ބައްޕާ… އަހަރެން މީނައާ އެކު މަސައްކަތެއް ނުކުރާނަން..” އެހެން ބުނުމާއެކު ލޫނާ ޒައިންގެ ކެބިންއިން ނިކުމެގެން ދިޔައެވެ. އާސިމް ހުރީ ވާނުވާނޭނގިފައެވެ. އަދި ޒައިންއަށް ބަލާލުމަށްފަހު ލޫނާ ފަހަތުން ދާން ހިނގައިގަތެވެ.