މިހިތަށް ލޯބިދޭށޭ… 1

“ރިޝްމީ..ރިޝް” ހިޔާލަކަށް ގެއްލިފައި އިން ރިޝްމީ ސިހުނީ ދޮރުގައި މީހަކު ޓަކި ތެޅުމުންނެވެ. އަވަސް އަވަހަށް އަތުގެ ނުފުށުން ލޯ ފުހެލުމަށްފަހު ދޮރު ހުޅުވާލިއެވެ.

“ސާބަހޭ ކަމަނާފުޅަށް..އަބަދުވެސް ކޮޓަރިކޮޅުގަ ދޯ..ފޫއްސެއް ވެސް ނުވޭތަ..؟ ކޮޓަރިތެރެއަށް ވަންނަމުން ރިޝްމީގެ އެންމެ ގާތް އެކުވެރިޔާ ސާރާ އަހާލިއެވެ. ކޮޓަރިއަށް ނަޒަރު ހިންގާލުމަށްފަހު ސާރާ ވަރަށް ރަނގަޅަށް ރިޝްމީއަށް ބަލާލިއެވެ.

“މިއަދުވެސް ރުއީ ދޯ އަނެއްކާ..؟ އެކަމަކު ރިޝް..ކީއްވެތަ އަބަދު އެކަމާ ތިވިސްނަނީ..ޕްލީޒް މޫވް އޮން ކޮށްބަލަ..” ސާރާ ހުރީ ހިތްހަމަ ނުޖެހިފައެވެ. އެންމެ ގާތް އެކުވެރިޔާ ހިތާމަކޮށް ރޮއެ ހެދުމަކީ އެއްގޮތަކަށްވެސް ސާރާ ހިތްހަމަޖެހޭ ކަމެއް ނޫނެވެ.

“ސާރާ ތިހެން ބުނާއިރުވެސް އެނގޭ ދޯ މަށަށް އެކަމެއް ނުވާނެކަން..މަވެސް ހާދަ ޓްރައި ކުރަމޭ މޫވް އޮން ކުރެވޭތޯ..އިޓް އިޒް ނޮޓް ދެޓް އީޒީ ސާރާ” ރިޝްމީ އަށް ރޮވޭގޮތްވިއެވެ.

ރިޝްމީ ގަބޫލުކުރާ ގޮތުގައި މިއަދު އޭނާއަކީ ބޭކާރުވެފައިވާ އަންހެން ކުއްޖެކެވެ. ލޯބިން މަޙްރޫމްވެފައިވާ އިންސާނެކެވެ. ހަގީގަތުގައިވެސް ރިޝްމީގެ ހިތް ވަނީ ކުދި ކުދި ވެފައެވެ. ހިތާމަކޮށްކޮށް އެފަކީރުގެ މޭ ވަނީ ފާރުވެފައެވެ. ރޮއެ ރައެ އެދެލޯ ވަނީ ރަތްވެފައެވެ.

“ރިޝްމީ..ޕްލީޒް.. އަހަރެން ވަރަށް ދެރަވޭ ރިޝް އަބަދު ތިގޮތަށް ރޯތީ..ތަންކޮޅެއް ސްޓްރޯންގް ވެބަލަ.. ހިނގާބަލަ މަށާއެކީގަ ރަސްފަންނަށް ހިނގާލަން ދާން.. އޭރުން ކޮންމެވެސް ވަރެއްގެ ލުޔެއް ތިހިތަށް ލިބިދާނެ..ދޭ ފްރެޝް ވެލަން.. އިނގޭ..” ސާރާ ބޭނުންވީ ރިޝްމީ ގޮވައިގެން ހިނގާލަން ދާށެވެ. ރިޝްމީ ދާނެކަމުގެ ޔަގީން ކަމެއް ނެތެވެ. ނަމަވެސް ސާރާ އެހާ ލޯބިން ބުނީމަ ރިޝްމީއަށް ދެކޮޅު ހަދާކަށް ނުކެރުނެވެ.

އަރާމު ނިންޖަކުން ނިދާލާފައި އޮތް އަޒާންއަށް ހޭލެވުނީ ފޯނު ރިންގްވުމުންނެވެ. ކަންނެތް ގޮތަކަށް މޯޅިއަށް ދެމިލިއެވެ. ލޯ އުނގުޅަމުން ފޯނު ކަންފަތުގައި ޖައްސާލިއެވެ.

“އޭ ބްރޯ..ކޮންތާކު…އާދެބަލަ މާބްލް ހޮޓެލްއަށް ކޮފީއަކަށް.. ރިއްޕެ ވެސް އެބައިނޭ..” އެކޮޅުން ވާހަކަ ދެއްކީ ނާޝިދުއެވެ. ނާޝިދަކީ އަޒާންއާ އެއް އޮފީހެއްގައި މަސައްކަތްކުރާ މީހެކެވެ. ރިފާއުއަކީ ނާޝިދުއާ ދެބެންގެ ދެދަރި ކުއްޖެކެވެ. މި ތިން މީހުންނަކީ ވަރަށް އެއްކޮށް އުޅޭ ގާތް ތިންމީހުންނެވެ.

“ދެންމެއޭ ހޭލެވުނީ..މިދަނީ ރެޑީ ވެލައިގެން..10 މިނެޓްސް އިނގޭ މޭން..އޯކޭ..” އަޒާން ފޯނު ކަނޑާލުމަށްފަހު އެނދުން ތެދުވިއެވެ.

ރިޝްމީ އާއި ސާރާ މަޑުކޮށްލައިގެން ތިބީ ރަސްފަންނުގައި ހުންނަ ހަޓެއްގައެވެ. އެތާނގައި ތިބި ދެތިން ފިރިހެން ކުއްޖެއްގެ ނަޒަރު ގޮސް ހުއްޓިފައިވަނީ ރިޝްމީ އަށެވެ. ވިލު ނޫކުލައިގެ އަތްދިގު މީހެއްގައި ރިޝްމީ ފެންނަލެއް ނުހަނު ރީއްޗެވެ. އެއްވެސް މޭކަޕަކާނުލައި ހުރި އިރުވެސް ފިރިހެން ކުދިންގެ ހިތްތައް ކަތިލާ ވަރުވެއެވެ. ކޮނޑާ ހަމައަށް އަރާ އެފަންފަން އިސްތަށިކޮޅު ވަނީ ވޫލުކޮޅަކުން އައްސާލެވިފައެވެ.

އޭރު އެތާނގައި ދުވެ ސަކަރާތްޖަހާ ކުޑަކުދިންގެ އަދަދު މަދެއް ނޫނެވެ. މާހައުލަށް ވެރިވެފައިވަނީ ހަލަބޮލިކަމެވެ. ސާރާ ހުރީ ކުޑަކުދިން އުޅޭ ގޮތް ފެނި މަޖާވެފައެވެ. ބައެއް ކުދިން ގައިގައި ވެލި އުނގުޅަމުންދާއިރު އެހެން ކުދިން މަޖާވެފައި ފީކޮއެ ކުޅެނީއެވެ. ދޭތެރެއަކުން އެކުދިންނަށް ބަލާލާފައި ރިޝްމީވެސް ހީލައެވެ.

“ރިޝް..ހާދަ މަޑުންނޭ ތިހުންނަނީ..ކިހެއްނެވީ..ގެއަށް ދާންވީތަ..؟ ރިޝްމީ މާގަޔާވެފައި ހުރިހެން ހީނުވާތީ ސާރާ ސުވާލުކޮށްލިއެވެ.

“ކަމެއް ނުވޭ..މީހުން މާވަރަކަށް ބަލާތީ އުނދަގޫވެފަ..” ރިޝްމީ ހުރީ ގެއަށް ދާން ބޭނުންވެފައިކަން އޭނަގެ ވާހަކައިން އެނގެއެވެ.

“ކޮންމެ ތާކަށް ދިޔަސް މީހުން ބަލާނެ..އަމުދުން ރިޝްމެން ކަހަލަ ރީތި ކުދިންނަށް..ތީ ހަމަ ރީތި ހުސްކޮށްގެން ހުރި ޕަރީއެއް” ސާރާ ސަމާސާކޮށްލިއެވެ. ނަމަވެސް ރިޝްމީ އަކަށް އެސަމާސާ ކަމަކު ނުދިޔައެވެ.

“އަހަރެންގެ ރީތި ކަމަކީ އަހަރެންގެ ބަދު ނަސީބު..ރީއްޗަކީ އެއްވެސް އެއްޗެއް ނޫން..” ރިޝްމީ ހިތްހަމަނުޖެހިފައި ހުރުމުން ސާރާ ދެރަވިއެވެ.

“އެއީ އެހެން ބުނި އެއްޗެއް ނޫން..ހިނގާ ގެއަށް ދާން..ރިޝްގެ މާމަ ހުންނާނެ ލަސްވެފަ ދޯ..” ސާރާ ހިނގައިގަންނަމުން ބުނެލިއެވެ.

ކޮފީ ނިންމާލުމަށްފަހު މާބްލް ހޮޓްލް ކައިރީ މަޑުކޮށްލައިގެން ހުރި އަޒާން އެއްލި ކަޅިއަކުން ފެނުނު މަންޒަރުން ދެލޯ ބޮޑުވިއެވެ. މިއީ ހަމަ ހަގީގަތެއްބާއޭ ހިތާހިތާ ކިޔާލެވުނެވެ. އެހާ ދުވަސްފަހުން ފެނުމުން ގަބޫލުކުރަންވެސް ދަތިވިއެވެ. އެއީ ހަމަ އެ އަންހެންކުއްޖާއެވެ. އެއް އިރެއްގައި އަޒާންގެ ހަޔާތަށް އައި އަންހެންކުއްޖާއެވެ. އެދުވަހެކޭ އެއްގޮތަށް މިއަދުވެސް އެރީތި ކަމަކަށް ބަދަލެއް ނާދެއެވެ.

“އޭއި..ކިހިނެއްވެފަ ތިހުރީ..ކޯއްޗެއް ފެނިގެން އަނގަ ތަންމިނަށް ހުޅުވައިގެން..ފަތްމިންޏެއް ފެނުނީތަ..؟” ރިފާއު ލާނެއްގޮތަކަށް މަލާމަތްކޮށްލިއެވެ. ނާޝިދުވެސް މަގަށް ނަޒަރު ހިންގާލިއެވެ. ފެނުނު މަންޒަރުން އޭނަގެވެސް ދެލޯ ބޮޑުވިއެވެ.

“އަނގަވެސް ހުޅުވޭނެ..ސޮނިވެސް ވެއްޓޭނެ..ލޮލުގެ ކަޅިވެސް ވެއްޓޭނެ.. ރިއްޕެ ކަލެއަކަށް ނުފެނޭތަ އަޒާން އެއްއިރެއްގަ ގެންގުޅުނު ވަތުކިބައެއް..” ނާޝިދު މިހެން ބުނުމުން ރިފާއުވެސް އެކި އެކި ދިމާއަށް ކަޅި އުކައިގަތެވެ.