އިންތިހާއަށް އާދޭސް .. 1

ފެން ތިއްކަކަށްފަހު ފެންތިއްކެއް ޝަބުނަމް ތިކިތަކެއްގެ ސިފައިގައި ޖެހެމުންދިޔަ ދޮން ކަނދުރާއަށް ބަލަން މަނިކަށް ހުރެވުނީ އާޝޯހުވެފައެވެ. އެވަގުތު އެދޮން ކަނދުރާގައި އަތް ބީއްސާލާ ހިއްވީވަރު އެގޭނެ ދެވަނަ މީހަކު ނުހުންނާނެއެވެ. ހަވީރުގެ އެ ތުނިކޮށް ވެހެމުން ދިޔަ ވާރޭތެރޭން ފެންނަމުން ދިޔަ ހުވަފެން ވިއްސިވިހާލިވެގެން ދިޔައީ ނަދީމް އައިސް މަނިކުގެ ކޮނޑުގައި ޖަހާލުމުންނެވެ.

“ސާބަސް ކަލޭއަށް… ތިއޮށް ޗޮނި ފައިބަނީ.. ހަހަހަ” ނަދީމްގެ އެއަޑަށް އަސްކަނި ދަށުގައި އިން އަންހެން ކުއްޖާ މަނިކަށް ބަލާލިއެވެ. އެވަގުތު އެ އަންހެން ކުއްޖާގެ ތުންފަތަށް ޖައްސާލި ވައްތަރުން މަނިކު ލަދުން އިސްޖަހާލީ ކުރެވުނު ކަންތަކާ ލަދުންނެވެ. “ކަލޭ މިތާ ކީއްތިކުރަނީ.. ހިނގާ ދާން… ކުޅޭ އެއްޗެހި ލައިގެން ހުންނަ އިރުވެސް މީހުން ތެމޭތީ އުޅޭތަ.. ހިނގާ ދާން” މަނިކުގެ ކޮނޑަށް އެއްއަތް ވައްޓާލަމުން ނަދީމް ބުނެލީ މަލާމާތުގެ ރާގަށެވެ. “ތި އަނގަ ނުހުއްޓާތި ކޮންމެސް ކޮންމެސް” މަނިކު ހިތް ހަމަ ނުޖެހި ނަދީމްގެ އަތް ފޮޅުވާލިއެވެ. އަދި އަސްކަނި ދަށުގައި އިން އަންހެން ކުއްޖާއަށް ބަލާލުމައްފަހު ހިނގައިގަތީ ދަނޑަށް ދިޔުމަށެވެ.

“ދަރިފުޅާ ޝީރީން… ތިއޮށް ތެމެނީނު… ކީއްވެފަ މިތާ ތީނީ.. ދަރިފުޅު ބަލާ އަދި ބަނދަރަށް ދާން މަންމަ މިއުޅުނީ.. ނަސީބެއްނު މިހެން އާދެވުނުކަން… ހިނގާ ދާން… ކޮބާ ފޮށިތަށް…” ޝީރީނުގެ ކޮނޑު މަތީގައި ހުރި ފެންތަށް ފޮޅާލަމުން ސަމްސިއްޔަ ބުންޏެވެ. “ކޮން އިރެއް ބައްޕަ އޭޗެހި ގެންދިޔަތާ… މަންމަ އަންނަންދެން މިހުންނަނީ… އެހެން ނޫނަސް ރަށް އެވަރަށް ބަދަލެއް ނުވެއޭ މަންމަ ތިހާ ބިރުން އުޅޭކަށް… އަދި އަޅުގަނޑަށް އެނގެއޭ މިރަށުގައި ހިނގަން… ހެހެހ” ސަމްސިއްޔަގެ އަތުގެ ތެރެއަށް އަތް މަހާލަމުން ދެމައިން ހިނގައިގަތީ ގެއަށް ދިޔުމަށެވެ.

ގްރޭޑް ހަތަކުން ފަށައިގެން މާލޭގައި ޝީރީން ކިޔަވަމުން ދިޔައީ ބައްޕަގެ ރައްޓެއްސެގެ ގޭގައި ހުރެގެންނެވެ. ގްރޭޑް ބާރަ ކިޔަވައި ނިމިގެން ޝީރީން ރަށައް ބަދަލުވީ ހިތާ ދެކޮޅަށެވެ. ދ ބަނޑިދޫ އަކީ ތަރައްގީގެ ގޮތުންބަލާއިރު އެހާ ކުރިއަރާފައި އޮތް ރަށެއްނޫނެވެ. ބައްޔެއްވިޔަސް ދާންޖެހޭނީ އަތޮޅުގެ ވެރިކަން ކުރާ ރަށެއްކަމައްވާ ދ.ކުޑަހުވަދޫއަށެވެ. ޝީރީން ރަށްދެކެ ފޫހިވަން މެދުވެރިވީވެސް އެހެން ވެގެންނެވެ. ރަނގަޅު ވަޒީފާއެއް ރަނގަޅު ތައުލީމެއް ރަށުގައި އުޅޭބަޔަކަށް ހާސިލް އެއް ނުވާނެއެވެ. ޝީރީން ރަށައް އެރީ މާލެ އަލުން ބަދަލުވާން ނިންމައިގެންނެވެ. މާލޭގައި ވޭތުވެދިޔަ ހަ އަހަރުގައި ޝީރީންއަށް ވަނީ މާލެ ވަރަށް ކަމުގޮސްފައެވެ. މާލޭގައި ރަށަށް ވުރެއް “ސަޅި” ކޮށް އުޅެވޭނެ ކަމަށް ޝީރީން ގަބޫލު ކުރެއެވެ. ފޫކޮޅަށް ވުރެއް ދިގު ހެދުން ލައި އުޅުނު ޝީރީން މިހާރު ވަނީ ޒަމާނީ ފެޝަން ހެދުން ގަޔަށް ހެޔޮވަރުކޮއްފައެވެ.

“މަންމާ ބައްޕަ ބުންޏެއްނު ގެ އަދި އެއްބުރިއަށް ނަގާވާހަކަ.. ” ދެބުރިއަށް ނަގާފައިވާ ގެއާ ދިމާލަށް ބަލާލަމުން ޝީރީން ސަމްސިއްޔަ ކުރެން އަހާލިއެވެ. ” އާން ދަރިފުޅާ.. ހުއްދަ ނުލިބުނީ… ދަރިފުޅު ދޭބަލަ ކޮޓަރި ބަލާލަން.. ދަރިފުޅު ބޭނުން ވާގޮތަށް އިންނާނެ މަރާމާތުކޮށް ނިންމާފަ.. ” މަތީގައި އިން ކޮޓަރި ދައްކާލަމުން ސަމްސިއްޔަ ބުންޏެވެ. ކުޑަކުއްޖެއްހެން ދުވެލާފައި ގޮސް ޝީރީން ކޮޓަރީގެ ދޮރު ހުޅުވާލިއެވެ. “ވާއު މަންމާ…. ވާއު” ކޮޓަރި ތެރޭގައި އެނބުރެމުން ޝީރީން ކިޔަމުން ދިޔައެވެ. ފެހި ކުލައިގެން ޖަރީކޮއްފައިވާ ކޮޓަރި ފެނި ޝީރީންއަށް ވަމުން ދާނެ ގޮތް ނުވާނެ އެއްވެސް އަންހެން ކުއްޖަކު ނުހުންނާނެކަން ޔަގީނެވެ. ފެހިކުލައިގެ ޑިޒައިން ދޮރު ފޮތިގަނޑު ކަހާލުމުން ފެންނަނީ ބިއްލޫރި ބޮޑު ކަހާލެވޭ ދޮރެކެވެ. ބިއްލޫރި ދޮރުގެ ބޭރުން ފެންނަމުން ދިޔައީ ރަށުގެ އެކިއެކި ތަންތަނެވެ. ތަންކޮޅެއް ދުރަށް ބަލާލައިފި ނަމަ ފެންނަމުން ދަނީ ކުލަ ގަދަ ރީތި މޫދެވެ. ހުވަފެނީ މަންޒަރުތަކެއްކަށް ގައިމެވެ. ދޮރާޖެހިގެން ބަހައްޓާފައިވާ ބޮޑު ކުއީން ސައިޒުގެ އެނދު ފެންނަނީ ނުލާހިކު ޝާހީ ކޮށެވެ. ހަތަރު ދޮރުފަތްލީ އަލަމާރިފެނި ޝީރީން އުފަލުން ފޮޅުނެވެ. ފާރުގައި ލަކުނޑިން ޒީނަތް ތެރިކޮއްފައިވާ ކަބަޑުތަކެއް ހުއްޓެވެ. “މަންމާ ވަރަށް ރީތި… އަޅުގަނޑު ބައްޕައަށް ފޮނުވި ފޮޓޯގަ އިން ގޮތަށް ދޯ ހަދާފަ މީ… މަންމަ ހާދަ ރަނގަޅޭ… ކޮބާ ބައްޕަ” ޝީރީން އުފަލުން އުޅެވޭ ގޮއްވެސް ނޭނގެއެވެ.

“ބައްޕާ… ޝުކުރިއްޔާ” އަފީފް ގައިގައި ކުޑަކޮށް ބައްދާލަމުން ޝީރީންއަށް އެހެން ބުނެވުނީ ވީ އުފަލެއްގެ ބޮޑުކަމުންނެވެ. “ހެހެހ ދަރިފުޅަށްޓަކާ ކޮންމެ ކަމެއްވެސް ބައްޕަމެން ކޮއްދޭނު… ދެން ހިނގާ ދޯ ކާން..” ޝީރީންގެ ބުރަކަށީގައި ފިރުމާލަމުން އަފީފް ބުނެލީ ހިނިތުންވަމުންނެވެ. ހަމަ އެކަނި ހުރި ދަރިފުޅުގެ މޫނުމަތިން ފެންނަމުން ދިޔަ އުފާވެރިކަމުން އެ ހިތަށްވެސް ހަމަޖެހުން ގެނުވައިފިއެވެ.

“ދަރިފުޅު ބަނޑުހައި ނުވޭދޯ މިހާރު” ސަމްސިއްޔަ އެހެން ބުނުމުން ޝީރީން މޫނަށް ގޮތެއް ހަދާލީ ލަދުންނެވެ. އެވަގުތު އަފީފްގެ ހުނުމުގެ އަޑު މުޅި ގޭގައި ގުގުމާލިއެވެ.

………………………………

“ބުރޯ ސޮރީއޭ.. މަށަށް އެނގޭތަ ކަލޭ ހުރީ ހަމަ އަސްލުވެސް އެމަންޖެއަށް ބަލަންކަން” މަނިކުގެ މޫނުމަތިން ހިތްހަމަ ނުޖެހުން ފާޅުވުމުން ނަދީމް މާފަށް އެދުނެވެ. “އޯކޭއޭ. ކަލޭ ނުވާނެ ބަދަލެއް.. އެކަމް އެމަންޖެ ހާދަ ރީޗޭ… މިރަށު ކުއްޖެއް ނޫން އެއީ.. އެއީ ކާކޫބާ” ކުޅެނިންމައިގެން އައިސް ގޭ ބޭރު ޖޯލީގައި ހަށިގަނޑު ދަމާލަމުން މަނިކު ބުނީ ހިޔާލީ ދުނިޔެއަށް ދަތުރުކުރަމުންނެވެ. “އޭ ސާބަހޭ…. ލަވް އެޓް ފަސްޓް ސައިޓު ދޯ.. މަހީކުރީ ކަލޭއަށް ލޯބިވެވޭނީ އެކަކުދެކެ ކަމަށް… ހަހަހ” ނަދީމް ވާހަކަ ދެއްކީ ހެމުންނެވެ. ” މަމިރޭ މިގެއަށް އަންނާނީ އެއީ ކާކުކަން ހޯދައިގެން.. ބަލައްޗޭ… ” ޖޯލިން ތެދުވަމުން ނަދީމް ޔަގީން ކަމާއެކު މަނިކު ކައިރީގައި އެހެން ބުނެ މިސްރާބު ޖެހީ ގެއަށް ދިޔުމަށެވެ. ނަދީމް ދިޔުމުން މަނިކު ބޮލުގެ އިސްތަށި ގަނޑަށް ވާންކޮއްލިއެވެ. “ޝިޓް ޝިޓް.. މި ނަދީމް އާ ހެދި ދެން ނުކެރޭނެ އޭނަ ކުރިމައްޗަށް އަރަންވެސް.. އޭނަ ހީކުރާނީ ކީކޭ” ޝީރީން މަނިކް އާއި ދިމާލަށް ބަލަން އިން ގޮތް ސިފަވުމުން މަނިކު ދެފަރާތަށް ބޯ ތަޅުވާލިއެވެ.

******

“އޭ އޭ މަނިކޫ… ދޮރުހުޅުވަބަލަ” ކޮޓަރީގައި ހިޔާލީ ދުނިޔޭގައި އޮތް މަނިކު ހޭވެރިކަމެއްވީ ނަދީމް ދޮރުގައި ތަޅަން ފެށުމުންނެވެ. “ސާބަހޭ އަނެއްކާ ކިހިނެއްވީ… ކޮން ކަމެއް ލައިގަތީ.. ނަސީބެއް މަންމަ ނެތްކަން.. އެހެން ނޫންނަމަ ހިތަށް އަރާނެ ތަނެއްގަ ރޯވީއޭ…” ދޮރު ހުޅުވިގޮތަށް މަނިކު ކުދި ކިޔާލިއެވެ.

“އޭ ކަލޭ އައިސްބަލަ… ހަމަ އެއީ ޝީރީން ކަން އެނގިގެން ދޯ އެވަރަށް ބެލީ… އަދި މަހިތަށް އަރައިފިއޭ މީނަ އެހެންޏާ އަންހެން ކުއްޖަކަށް ނުބަލާ މީހަކަށް ވެފަހުރީ ކީއްބާއޭ… ” ނަދީމް އެނދުމަތީގައި އިށިންނަމުން ކިޔަމުން ދިޔަ އެއްވެސް އެއްޗެއް މަނިކުގެ ސިކުނޑިއަކަށް ނުވިސްނުނެވެ. “އޭ ކީކޭ… ކީކޭ ތިކިޔަނި.. ކޮން ޝީރީންއެއް. އަނެއްކާ.. އަނެއްކާ އަހަރެންގެ..” މަނިކު ހިތުގައި އަތް އަޅާލިއެވެ. “އާން.. ކަލޭގެ ފުރަތަމަ ލޯބި… މިއުޅޭ މުއްސަދިގޭ އަފީފްގެ ހަމަ އެކަނި ހުރި ދަރި.. ކަލޭގެ ޝީރީން.. ލައިލާ..” ނަދީމް އެނދަށް ވެއްޓިގަންނަމުން ކިޔަމުން ދިޔައެވެ. “މަގޭ ލައިލާއޭ….” މަނިކުގެ ތުންފަތިގައި ދުވެލީ މިއިން ޒަމާނަކުވެސް ނުފެންނަ ހިނިތުންވުމެކެވެ.

ނުނިމޭ…