މަންޝާ (އޮނަ ސާޅީސްވަނަ ބައި)

މަންޝާގެ ކަނދުރާގައި ބޮސްދެމުން ހަސަނާ މަންޝާގެ ގުޅުން ފެށުނު ހިސާބު ކިޔައިދޭން ފެއްޓިއެވެ. “ހަސަނުބެއަށް ކޮންކަހަލަ ސަޕްރައިޒެއް ތި ދިނީ… މީ ހާދަ ބޭނުންވި ދުވަހެކޭ.. މަންޝާ ހަސަންބެ ދެކެ ލޯބިވާނެކަން އިނގޭ… ކޮން ދުވަހެއް ހަސަންބެ މަންޝާ ގައިގަ ފިރުމާތާ.. އެންމެ ތުއްތު އިރުއް ސުރެ އަހަރެން މަންޝާ ގައިގާ ފިރުމާ ހަދަން… މަދީހާއާ މުނީރާއާ ދެބެން ކުނިކަހަން، ނޫނީ އެހެންވެސް މަސައްކަތްތަކުގައި ދިޔައިމަ މަންޝާ ބަލަން އަހަރެން ހުންނަނީ ގޭގަ… އަހަރެން މަންޝާ ގައިގާ ހާދަ ބީހެމޭ… ހީސްލީމަ ހީސް ދޮއްވާ އިރުވެސް ހާދަ ބަލައިގެން މަޑުމަޑުންނޭ ހަސަންބެ އެކަން ކޮށްދެނީ.. ދެން ހަސަންބެ މާލެ ބަދަލުވާން ޖެހުނީ.. އެއީ މަންޝާ ވަރަށް ކުޑައިރު… މަންޝާ ހަނދާންވެސް ނުހުންނާނެ… ދެން ހަސަންބެ ކައިރިއަށް މަންޝާ ކިޔަވަން އައިމަ ކިހިނެއް ދުރުގަ ބަލަން ހުރެވޭނީ…. މުނީރާއާ އަފްނާނުއާ ފުރައިގެން ދިޔުމުގެ ކުރިންވެސް މަންޝާ ގައިގަ ފިރުމަން… މަންޝާއަށް އެކަން ނޭނގޭކަން ހަސަންބެއަށް އެނގުނު.. އެހެންވެ ނިދާބޭސް ދީގެން ބެހުނީވެސް… އަސްލު ގަދަކަމުން ކުރީ މަންޝާ ގަދަ ހެދީމަ.. އެހެންނޫނީ ހަސަންބެ ނުލާހިކު ލޯބިން ފުއްދައިދޭނަމޭ… އަދޭ ހަސަންބެ ކައިރިއަށް…އާދޭ… މިރޭ ފުރަން ކައިރިވީމަ ދޯ ދާނީ…”

މަންޝާގެ ކަނދުރާ މައްޗަށް ވެއްޓިފައި ހުރި އިސްތަށިތައް އެއްކައިރިއަށް ޖައްސާލަމުން ހަސަނު ނޯށް ދަމާލިއެވެ. އެގަޑީ ހަސަނުގެ ނޭފަތުގަ ޖެހުނީ ފަރުހަކި ވަހެވެ.

ޖެހިލުންވެ ހުރެ ވަށައިގެންވާ މާހައުލަށް ހަސަނު ކަޅި ހިންގާލިއެވެ. އޭރު އެ ކަނދުފަތި ރަށު ފުއްޓަރު ފަރާތުން ބޭރުގައިވާ ފަރުތަކާ ގާތްވަަނީއެވެ. ދިޔަވަރު ހިކިފައިވާތީ މި ސަރަހައްދުން ފަރުވަސް ދުވާނެކަން ހަސަނަށް އެނގުނެވެ.

މަންޝާގެ ކޮނޑުގައި ހިފާ ކަނދުފަތި މަތީގައި ބާއްވާލަމުން ހަސަނު އޭނާގެ ހަށިގަނޑާ ގާތްވެލިއެވެ. އެވަގުތު ޖެހުނު ވައި ރޯޅިއާ އެކީ މަންޝާގެ ހޭވިފައިވާ އިސްތަށިގަނޑުން މޫނު ފޮރުވުނެވެ.

ހަސަނުގެ ކަޅި އަމާޒްވީ މަންޝާގެ ހަށިގަނޑަށެވެ. މަންޝާގެ ހެދުންވަނީ ތެމިިފައެވެ. ކޮނޑަށް ވާކޮޅެއް ލާފައިވާ ކުރު ހެދުން ފިޔަވާ އިތުރު ފޭރާމެއް މަންޝާގެ ހަށިގަނޑުގައި ނެތްކަން އެނގުނީ އެ ހެދުން ތެމިފައިވާތީއެވެ. ހަށިގަނޑުގެ ވަނާތައް ފުރިހަމަ ފާޅުވާން ހުއްޓެވެ. ކޮނޑަށް އައްސާފައިހުރި ވާތައް މޮހެލަމުން މަންޝާގެ ހަށިގަނޑުގައި ހަސަނު ފިރުމަމުން ދިޔައީ ފެން ބޮވައިގެންފައިވާ ހިޔަޅެއްހެނެވެ. މަންޝާގެ ކޮނޑުމަތިން ފާޅުވަމުން ދިޔަ ކަޅުކުލައިގެ ކެހެރިތައް ރޭގަނޑުގެ އަަނދިރިކަމުގެ ތެރެއިން ހަސަނުގެ ލޮލުގައި އަޅައެއް ނުގަތެވެ.

މަންޝާގެ މޫނާ ގާތްވަމުން ހަސަނު އޭނާގެ މޫނުމައްޗަށް ވެއްޓިފައިވާ އިސްތަށިތައް ދުރުކޮށްލިއެވެ. މަންޝާގެ މޫނުފެނި ބިރުން ހަސަނު ފަހަތަށް ޖެހުނެވެ. މަންޝާގެ ދެލޯވަނީ ރަތްކުލައިން ދިއްލިފައެވެ. ރަތްކަމުން ހީވަނީ ލޮލުން ލޭ އައިސްދާނެ ހެންނެވެ. ބަލަބަލާހުއްޓާ އިސްތަށިގަނޑުވެސް މުޅިން ބަދަލު ވެއްޖެއެވެ. އޭނާގެ އިސްތަށިގަނޑު ނުރަވިއެވެ. ވަަޔާ ވިހުރެމުން ދިޔަ އިސްތަށިގަނޑަށް ހަސަނު ބަލާލިއެވެ. އެވަގުތު މަަންޝާގެ މޫނުގެ ހަންގަނޑު ކަޅުވަމުން ދިޔައީ މުޅި މޫނުގައި ކެހެރި ފަޅަމުންނެވެ. މަންޝާގެ ސިފަ މުޅިންހެން ބަދަލު ވެއްޖެއެވެ.

“ތީ… ތީ ކާކު؟؟… މީހެކޭ މަ ސަލާމަތް ކުރޭ….. މީހެކޭ…” މަންޝާއާ ދުރަށް ޖެހެމުން ހަސަނު ވާހަކަ ދެއްކީ ވަށައިގެން ވާ މާހައުލަށް ބަލަމުންނެވެ.

ފަސްފަހަށް ޖެހެމުންދިޔަ ހަސަނުގެ ފައި އެ ކަނދުފަތިން ބޭރަށް ކައްސާނުލީ ހަމަ ކިރިޔާއެވެ. ހަސަނު ވަށައިގެން ހޯދަމުން ދިޔައީ ކާށިދޫ ފެނޭތޯއެވެ. ނަމަވެސް އެހިސާބުން ރަށެއް ނުފެނުނެވެ. ރަށާ އެހާ ދުރަށް ދެވޭނެހާ ވަގުތެއްވެސް ނުވެއެވެ. ކަނޑު މެދުގައި އެމީހުން ތިބި އިރު ކައިރި އެއްވެސް ހިސާބަކުން ރަށެއް ފެންނާކަށް ނެތެވެ. ހަސަނު ހާސްވިއެވެ. ކަނދުފަތިމަތީ ކޮޅަށް ހުރި ހަސަނު އަނެއްކާވެސް ބަލާލީ މަންޝާ އޮތް ދިމާއަށެވެ. މިފަހަރު އެތަނުން އެއްވެސް މީހަކު ފެންނާކަށް ނެތެވެ. އެ ކަނދުފަތި މަތީ ހުރީ ހަސަނު އެކަންޏެވެ. ބިރުން ހަސަނު ތުރުތުރު އަޅަަން ފެށިއެވެ.

ދުންފިނީގެ އަސަރު ފާޅުވަމުން ދިޔައެވެ. ވަށައިގެންވާ މާހައުލު ނުފެންނަހާ ފުސްވެއްޖެއެވެ. ދުންގަނޑެއްހެން އެ ކަނދުފަތި ވަށާލާފައިވަނީ ނާމާންކަމާއި ބިރުވެރިކަމެވެ. ބިރުން ހަސަނު ދެފައި ކުރުކޮށްލައިގެން ހިމޭނުން ކަނދުފަތި މަތީ އިނީ ހަދާނެގޮތް ހުސްވެފައެވެ. ލޯމަތިން އެއްޗެއް ފެންނަހެން ހީވިއެވެ. ހަސަނު ދެލޯ ހަނިކޮށްލަަމުން ކުރިއަށް ބަލާލީ ފުސްގަނޑުގެ ތެރެއިން އެ ފެންނަ އެއްޗެއް ޔަގީންކުރާށެވެ. އެ ކަނދުފައްޗާ ދިމާއަށް އޮޔާއެކީ އެ އަންނަނީ ބޮޑު ފޮށިގަނޑެކެވެ. ރަނގަޅަށް އެ މަންޒަރު ބަލަން ހަތަރު މޮށްގަނޑުޖަހާ ހަސަނު ކުރިއަށް ޖެހިލިއެވެ. އެއީ ފޮށިގަނޑެއް ނޫނެވެ. އެއީ ސަންދޯކެކެވެ. ވަށައިގެން އެކި ހިސާބުތަކުން ލޮނުގަނޑުމަތިން ދަތުރު ކުރަމުން ދިޔަ ސަންދޯއްތަައް ފާޅުވިއެވެ. ހަސަނުގެ ހިތް ބާރުބާރަށް ތެޅެމުން ދިޔައެވެ.

ކަނދުފަތި މަތީ އޮތް ދިގު ދަނޑި ބުރިއެއް ފެނުމުން އެ ދަނޑިބުރި ނަގާ މޫދުގެ ލޮނުގަނޑަށް ކޮށްޕާލަމުން ފަލި ޖަހަން ފެށިއެވެ. ހަސަނަށް ދާންވީ ވަކި މަންޒިލެއް ނޭނގޭތީ ފަލިޖެހީ އެ ސަންދޯއްތަކާ ދުރަށްދާށެވެ. ނަަމަވެސް ފަލި ޖަހާ ޖަހާ ވަރުބަލި ވީއިރުވެސް އެ ކަނދުފަތި ދިމާލަކަށް ގުޑާލިހެންވެސް ހިއެއް ނުވިއެވެ. ދެން ފެނުނީ ދިމަދިމާލުން ރަތްކުލައިގެ އަލިގުޅަ ތަކެކެވެ. ހަސަނު ބިރުން ސިހުންވި ވަރުން އަތުގައި އޮތް ދަނޑިބުރި މޫދުގެ ތެރެއަށް ދޫވިއެވެ. ކަނދުފަތި ކައިރިން ރެނދަންގެ އަސަރުވެސް ފާޅުވަމުން ދިޔައެވެ.

ކުއްލިއަކަށް އިވިގެން ދިޔައީ ބާރު ހިނިގަނޑެއްގެ އަޑެވެ. އެއަޑު ވަރަށް ވެސް ބަރެވެ. ބިރުވެރިއެވެ. ފަޒާގެ ތެރޭގައި އެ އަޑު ގުގުމާލިއެވެ. “ތީ ކާކު؟… ތީ ކާކުހޭ؟..” ތުރުތުރު އަޅާ ހާލުގައި ހަސަނު އަހާލިއެވެ.

އެ ވަގުތު ހަސަނު ގެ ކުރިމައްޗަށް ފާޅުވީ އިންސާނެއް ފަދައިން ދެއަތާއި ދެފައި ލާފަ ހުރި އެއްޗެކެވެ https://erektilemed.de/. އެނާ ހުރީ މޫދުގެ ލޮނުގަނޑުގައި ފައި ނުޖެހި ވައިގެ ތެރޭގައެވެ. އޭނާގެ ހަމުގެ ކުލަ ކަޅެވެ. ރަތްކުލައިން ދިއްލިފައިވާ ދެލޮލެވެ. އިސްތަށިގަނޑު އޮތީ ކަނދުރާއާ ހަމައަށް ކުރުކޮށެވެ. ވަޔާއެކު އޭތީގެ ހުދު އިސްތަށިގަނޑު ވިހުރެމުންދާ އިރު ހީވަނީ ދުންކޮޅެއް ހެންނެވެ. އެއީ ބިރުވެރި ސޫރައަކަށް ހުރި ވަރަށް ބިޔަ އެއްޗެކެވެ. އިސްކޮޅުގައި ދިހަވަރަކަށް ފޫޓު ހުންނާނެއެވެ. ކަނދުފަތި މަތީ އިން ހަސަނު ކަރު މައްޗަށް ޖަހައިގެން އެ މަޚްލޫގާ ދިމާއަށް ބަލާލިއެވެ.

“ކަލޭ…. ހަހަހަ … ކަލެއަަށް އަހަރެން އެހާ ދުއްތުރާ ކުރީމަވެސް މަންޝާއާ ބެހުން ހުއްޓޭ ގޮތެއް ނުވިދޯ… އެގޭ ސިޑިން ކަލޭ ވައްޓާލީވެސް އަހަރެން…. ބަލަ މުނީރާ ކައިރިން ކަލޭ ސަލާމަތް ކޮށްދިނީ މަންޝާއެއް ނޫން… އެކަންވެސް ކުރީ އަހަރެން… އަހަރެން ބޭނުން ނުވީ މުނީރާ އަތުން ނުބައެއް ހަދަން… ކަލޭ މަރާލަން އަހަރެން ބޭނުންވީ އަހަރެންގެ އަތުން…. ކަލޭ ހީކުރީތަ ބޭނުންހާ ގޮތަކަށް އުޅެވޭނެ ކަމަށް… މަންޝާއަށް ތިހާ ދުއްޕާންކޮށްފަ ކަލޭގެ ލަދުހަޔާތްކުޑަކަމުން އަމިއްލަ ދަރިއާވެސް ބެހެފި… ކަލޭތީ އިންސާނެއްގެ ސިފައިގަ ހުއްޓަސް ޝަައިތޯނެއް…” ބަރު އަޑަކުން ވާހަކަ ދައްކަމުން ދިޔަ އިރު ޒިބާންގެ ލޮލުން އަލިފާން ކަނި ބުރަމުން ދިޔައެވެ.

“ތިހެން ނުހަދާ… އަހަރެންނަށް މާފް ކުރޭ.. އަހަރެން ދެން އެކަހަލަ ކަމެއް ދުވަހަކުވެސް ނުކުރާނަން… އަންހެނަކާ ދިމާއަށް އެފަަދަ ނަޒަރަކުން ނުވެސް ބަލާނަން…. އަހަރެން ދޫކޮށްލާ….” ދެކަކޫ މައްޗަށް ތިރިވެގެން ހުރެ ހަސަން އާދޭސްކުރަން ފެށިއެވެ. ވިދާލި ވިދުވަރާ އެކީ ލޯމަތިން ފެންނަން ހުރި މަޚްލޫގު އެތަަނުން ގެއްލުނެވެ. ހަސަނު ވަށައިގެން އެ މާހައުލަށް ބަލާލިއެވެ. ވަށައިގެން ވަނީ އަނދިރިކަމެވެ. މާ ގިނައިރެއް ނުވެ ވައިބާރުވެ ކަނޑު ގަދަވެއްޖެއެވެ. ނަގަމުން ދިޔަ ބިޔަ ރާޅުތަކުގެ ތެރޭގައި ހަސަނު ކަނޑަށް ނުވެއްޓި ކަނދުފަތިމަތީ ހުންނަން ވަރަށް މަސައްކަތް ކުރިއެވެ. ބަނޑުން އޮށޯވެގެން ކަނދުފަތީގެ އެއް ފަރާތުގައި ހަސަނު އެލިގެން އޮންނަަ ފަހަރު ގިނައެވެ.

ހަސަނު ލައިގެން ހުރި ފަޓުލޫނު ތެރޭ އެއްޗެއް އުޅޭކަމުގެ އިހްސާސްވުމުން ހަސަނު އޭނާ ލައިގެން ހުރި ފަޓުލޫނު ބޭލިއެވެ. އެވަގުތު ފަޓުލޫނު ޖީބުން ވެއްޓުނު ފިޔޮހި މޫދަށް ނުވެއްޓެނީސް ހަސަނު ނެގިއެވެ. ނަމަވެސް ވަޔާއި އެކީ ހަސަނު ބޭލި ފަޓުލޫނު މޫދަށް ހިނގައްޖެއެވެ. މިހާރު ހަސަނު އެހެރީ ރޯ އޮރިޔާމުންނެވެ. ރޭގަނޑުގެ ފީނީގައި ކަނޑުމަތީ ތެމިފޯވެގެން ހުންނަން ޖެހުުމުން ހަސަނު ހީކަރުވަން ފެށިއެވެެ. ތުރުތުރު އަޅާ ވަރުން ސީދަލަށް ހުރެވޭ ގޮތެއް ނުވިއެވެ. ދެފައި ކުރުކޮށްގެން ހަސަނު ކަނދުފަތިމަތީ އޮށޯތެވެ.

ދެން ފެށީ ގުގުރާށެވެ. ވިދާ ގުގުރާ ވާރޭވެހެން ފެށިއެވެ. ވާރޭގެ ބޮޑެތި ކަނިތައް ގައިގައި ޖެހުމުން ހަސަނުގެ ހަންގަނޑުން ތޫނު ދިލައެއް ނަގަމުން ދިޔައެވެ. ނަމަވެސް ކެތްކޮށްގެން އޮތީ ސަލާމަތުގެ އައްސޭރިއަކަށް ފޯރަން ދެނެވެ. ލޮލުކޮޅަށް ރަށެއްގެ މަލަަމަތި ފެނުމުން ހަސަނު އުފަލުން ފޮޅުނެވެ. މޫދުގެ ތެރެއަށް ގުދުވެ އަތް ކޮށްޕާލައިގެން ފަލިޖަހަން ފެށީ އަވަހަށް އެރަށާ ހަމައަށް ދިއުމުގެ ބޭނުމުގައެވެ.

އެރަށާ ފުދޭ ވަރަކަށް ގާތްވެއްޖެއެވެ. ހަސަނުގެ ހިތަށް ކޮންމެވެސް ވަރެއްގެ ފިނިކަމެއް ލިބުނެވެ. އުފަލުންގޮސް ހަސަނަށް ރޮވެން ފެށުނީ އެއީ ކާށިދޫކަން ހަސަނަށް ރޭކާލުމުންނެވެ. ރަށާ ފުދޭ ވަރަކަށް ކައިރިވުމުން ހަސަނު މޫދަށް ފުންމާލިއެވެ. ހީކަރުވާފަ ހުރުމުން އެހާ ބާރަށް ފަތައިގަންނަހާ ހިތްވަރެއްވެސް ނެތެވެ. ކަށިން ހިތްވަރު ނެރެ ހަސަނު ހަތަރެސްފައި ފަލިޖަހާލިއެވެ. ރަށުގެ ގޮނޑުދޮށާ އަރާ ހަމަވުމުން ހަސަނު ތެދުވެ މޫދުން އެއްގަމަށް އެރުމަށް ހިނގައިގަތެވެ. ނަމަވެސް އެވަގުތު ހަސަނުގެ ފައިގައި އެއްޗެއް އޮޅާލި ކަމުގެ އިހުސާސް ވުމުން ފަޔަށް ބަލާލިއެވެ.

ފިޔަވަޅު މަޑުކޮށްގެން ހުރި ހަސަނުގެ ދެލޯ ބޮޑުވެގެން ދިޔައީ އޭނާއަށް ފެނުނު އެއްޗަކުންނެވެ. ކަޅުކުލައިގެ ވިދުމެއް ހުރި ނަންނުގައްޗެއް ކަހަލަ އެއްޗެކެވެ. ހަސަނު ގަނެފައި ހުރި ބިރުން ހަޅޭއްލަވަމުން އޭތިން މިންޖުވާން ތެޅިގަނެވުނެވެ. ކުއްލިއަކަށް އަތުގައި އޮތް ފިޔޮހިމަތިން ހަނދާންވިއެވެ. ފިޔޮހި ހުޅުވާލުމަށްފަހު އޭއްޗަށް ހަމަލާ ދޭން ހަސަނު މަސައްކަތް ކުރިއެވެ.

މޫދުގެ ރާޅުޖަހާ ހިސާބަށް ހަސަނަށް އާދެ ވުނީ ވަރަށް ހިތްވަރުންނެވެެ. ދުއްވައިގަންނަން ފިޔަވަޅު އެޅި ވަގުތު އެ ނަންނުގަތި ހަސަނުގެ ފައިގައި ބާރަށް އޮޅާލިއެވެ. ދޮންވެލިގަނޑު މައްޗަށް ބަނޑުވަތަށް ހަސަނު ވެއްޓުނެވެ. ހަސަނު ފޮރޮޅެމުން އެއްގަމަށް އެރީ ވަރަށް ހާލުންނެވެ. އެ ނަންނުގަތި ފައިގައި އޮޅެމުން މައްޗަށް އަރަން ފެށި އިރު އޭތީގެ އަނގަވަނީ ތަންމިނަށް ހުޅުވާލާފައެވެ. ހަސަނަށް އޭތީގެ ކުޑަދޫ ފެންނަހާ އެ ނަންނުގަތީގެ އަަނގަ ފުޅާ ކޮށްލިއެވެ. ހަސަނުގެ ބަނޑާ ހަމައަށް އޭތި އަރައިފިއެވެ. ބިރުން ހުރި ހަސަނަށް ހިފުނީ އޭތީގެ ބޮލުގައެވެ. ތެޅެމުން ފޮޅެމުން ހަސަނުގެ އަތުން މިންޖުވާންް އޭތި މަސައްކަތް ކުރިއެވެ. ބަލާކަށް ނުހުރެ އޭތީގެ ބޮލުގައި ހިފާފައި ހުރި ދިމާލު ބުޑުގައި އަތުގައި އޮތް ފިޔޮހި ޖައްސާ ހަސަނު ބާރު ބާރަށް ކާއްތާލިއެވެ. މުޅިތަނަށް ލޭ ބުރައިގެން ދިޔައިރު ހަސަނުގެ ހާޅޭކުގެ އަޑުން އެ ސަރަަހައްދު ގުގުމާލިއެވެ.

*** *** *** *** *** ***

އަވަސް ފަރުވާދޭ ކޮޓަރިއަށް ޑޮކްޓަރ ޝީލާ ވަދެ މީރާ އެނދުމަތި ކޮށްފައިވާ އެނދާ ދިމާއަށް އަވަސް ވެގަތީ ކައުންޓަަރުން ހަވާލުކުރި ލިޔެކިޔުންތަކާއި އެކީގައެވެ.

“ހައި މީރާ…. މިއަދު ޑޮކްޓަަރަށް ދައްކަން އައިން ދޯ… ކިހިނެއްވީ ސިޑިން ވެއްޓުނީ؟؟…” މީރާގެ އަތުގެ ވިންދު ބަލާލަމުން ޑޮކްޓަރ ވާހަކަ ދެއްކީ ލޯތްބާއި އޯގާތެރިކަމާ އެކުގައެވެ.

“ކުޑަކޮށް ބޯ އެނބުރީ… އެންޑް ޓަަޔަޑް… ބޭބީ ރަނގަޅުތޯ…” މީރާ ބަލަން ބޭނުންވީ ބަނޑުގައިވާ ދަރިފުޅުގެ ހާލެވެ.

“އެންމެ ފަހުން ހެދި ސްކޭން ތަކުން 6 ހަފްތާ ދެއްކިއަސް… މިހާރު ބަނޑަށްވީ 8 ހަފްތާ…. ސިސްޓަރ ބްރިންގް ދަ ޑޮޕްލަރ…” މީރާގެ ހެދުން މައްޗަށް އަރުވާލަމުން ޑޮކްޓަރ ޝީލާ މެޝިންގައި ޖެލްކޮޅެއް އުނގުޅާލިއެވެ. އަދި ދަށްބަނޑުގައި ޖައްސާލިއެވެ. ވަރަށް ފަސޭހައިން ކުޑަ ދަރިފުޅުގެ ވިންދު ލިބިއްޖެއެވެ.

“ބޭބީ އިޒް ފައިން… ބަނޑުގަ ރިއްސާތަ؟… އެއްވެސް ވަރަކަށް މުށިކުލަ ނޫނީ ރަތް ފާޑު ކުލައަކަށް ހުންނަ ޑިސްޗާޖެއް އަންނަންޏާ ލަސްނުކޮށް ހޮސްޕިޓަލަށް އަންނާތި…. ގައިގަ ނޫވެފަ ހުރިތަންތަނުގަ އުނގުޅަން ބޭސް އަދި ކާންވެސް ބޭސްް އެބަ ލިޔަން… ޕްލީސް ބީ ކެއަރފުލް އިނގޭ… އެންޑް އެތަންތަނުގަ އައިސް އަޅާތި…” ޑޮކްޓަރ ވާހަކަ ދައްކާ ނިންމާލަމުން ކައިރީހުރި ނަރުސް ކުއްޖާ ގާތު ބޭސްތަކެއްގެ ނަންތައް ކިޔަމުުން ކައުންޓަރާ ދިމާއަށް ހިނގައިގަތެވެ.

ދުރުގައި ބަލަން ހުރި ޞަފޫރާ ހިތްހަމަޖެހުމުގެ ނޭވާއެއް ދޫކޮށްލިއެވެ. އޭރު ޞަފޫރާއަށް ވަނީ ރޮވިފައެވެ. މީރާ އެކަނި މައްޗަށް ފޮނުވުނީތީ އޭނާ އެހުރީ އަމިއްލަ ނަފްސު ކުށްވެރި ކޮށްގެންނެވެ. މީރާއަށް ދެރަގޮތެއް ނުވުމަށް ހިތުގެ އަޑިން ދުޢާ ކޮށްލަކޮށްލާ އެ ހުރީ އޭނާގެ ލަގޮނޑިއަށް ކެތްނުވާތީއެވެ.

ޓޮޕްކޮޅު ތިރިކޮށްލުމަށްފަހު ޓައިޓް މައްޗަށް އަރުވަމުން މީރާ އެނދުގައި ހަމަޖެހިލިއެވެ. އެވަގުތު މިރާގެ ބަނޑުގައި ރިޔާޒް ފިރުމާލިއެވެ. “އަހަރެން ހީކުރީ ސިކްސް ވީކްސް ކަމަށް…. އަލްހަމްދު ލިއްލާހި… ބޭބީ އޯކޭދޯ…” މީރާގެ ބޮލުގައި ރިޔާޒް ފިރުމާލިއެވެ.

“ސާބަސް… ސްކޭން ކުރިފަހުންވެސް ޓޫ ވީކްސް ވެއްޖެ… މަގޭ ހިތަށްވެސް އެރިއޭ ރިޔާއަށް އޮޅުނީއޭ…” މީރާ ހިނިގަނޑެއް ޖަހާލިއެވެ.

“ނޯޅޭ ވަރެއްތަ؟… އަހަރެން ހާދަ ބިރުގަތޭ… މީރާއަށް ގޮތެއް ވެއްޖިއްޔާ…. ކީއްކުރާކަށްތަ ސިޑިން އެރީ… ދެން ބުނެބަލަ.. ހަމަ ބޮލަށް އެނބުރުން އެރީތަ؟…” މީރާ ސިޑިން ވެއްޓެން ދިމާވި ސަބަބު އޮޅުން ފިލުވަން ރިޔާޒް ބޭނުންވިއެވެ.

އެނދު ވަށާ ދަމާފައިވާ ފަރުދާ ކަހާލި އަޑަށް ރިޔާޒާ މީރާއަށް ބަލާލެވުނީ އެ ދިމާއަށެވެ. ޟިރާރު ކުރިއަށް ޖެހިލަމުން މީރާ ކިހިނެއްތޯ އަަހާލިއެވެ. “ރަނގަޅު… ޑޮކްޓަރ ޑިސްޗަރޖް ކޮށްލީމަ ގެއަށް ދާންވީދޯ….” މީރާގެ ބޮލުގައި ފިރުމާލަމުން ރިޔާޒް ވާހަކަ ދައްކަމުން އެނދުކައިރިން ފޫހިއްލާލިއެވެ.

“އެހެންވިއްޔާ މަންމަ ގެއަށް ގޮސްލަނީ… ކަމެއް ވިޔަސް މަންމައަށް ނުގުޅާ ނުހުއްނައްޗޭ… ދެން ދަނީ…” މީރާގެ އަތުގައި ފިރުމާލަމުން ޞަފޫރާ ވާހަކަ ދެއްކިއެވެ.

*** *** *** *** *** ***

މިރޭ މާލެއަށް ފުރަން ގަޑި ކިޔާފަ އޮތީ އެގާރަ ޖަހާއިރަށެވެ. އެގާރަ ޖެހުމުގެ އެއްގަޑިއިރު ކުރިން މަންޝާމެން ގެއަށް މަޖުދީ އައިސް އެންމެންގެ ފޮށި ތަންމަތިތައް ޕިކަޕަށް އަރުވައިގެން ދޯނި އޮތް ދިމާއަށް ގެންދިއުމަށް އަވަސް ވެގަތެވެ. މަންޝާއާ އެކީ އަފްނާނު ހުރީ މަންޝާގެ ކޮޓަރީގައެވެ. އަފްނާނު ލައިގެން ހުރީ ގަޔަށް ދޫ ކަޅުކުލައިގެ ޖިލްބާބަކާ ކަޅު ބުރުގާއެކެވެ. މަންޝާ ލައިގެން ހުރީ ކަޅު ކުލައިގެ މައްޗަކާ ޖީންސެކެވެ. އެކޮޓަރި އެނދުމަތީ ދެމީހުން ތިބިއިރު އިރުއިރުކޮޅުން އަފްނާން އެނާގެ ފޯނަށް ބަލާލައެވެ.

ހިތް އަވަސްވެފައި އިން އަފްނާނުގެ ލޮލަށް ކަރުނަ ޖަމާވާތަން މަންޝާއަށް ފެނެއެވެ. “ދޮނާ އަދިވެސް ބައްޕަ ނުގުޅާ….” އަަފްނާނަށް ކެތްނުކުރެވިގެން ބުނެވުނެވެ. އަބަދު އެއް ވާހަކައެއް އަޑު އަހައަހާ އިން މަންޝާގެ ބޮލުގައިވެސް ރިއްސަން ފެށިއެވެ. މަންޝާގެ ފޯނުން ހަސަންބެގެ ނަންބަރަށް ގުޅަން ޑައަލް ކޮށްލީ އަފްނާނު އޭނާގެ މަންމަ ނުރުހޭނެ ކަމެއް ނުކުރާނެކަަން މަންޝާއަށް އިނގޭތީއެވެ. ފޯނު ރިންގް ވޭވޭ ގޮސް ކެނޑުނު އިރުވެސް ހަސަންބެ ފޯނަކަށް ޖަވާބެއް ނުދެއެވެ. މަންޝާ ފުލުފުލުން ހައެއްކަ ފަހަރު ގުޅި އިރުވެސް ވީ ހަމަ އެހެންނެވެ. ހަސަނުގެ ފޯނަށް އެއްވެސް ޖަވާބެއް ނުދެއެވެ.

ފޯނު ކަންފަތުގައި ޖަހައިގެން އިން މަންޝާއަށް ތެޅިގަނެވުނީ ކުއްލިއަކަށް މީހަކު ދޮރު ހުޅުވާލުމުންނެވެ. ފޯނު ކަންފަތުން ދުރުކޮށްލަމުން ދޮރާ ދިމާއަށް މަންޝާ ބަލާލިއެވެ.

“އާދޭ… ޕިކަޕު އަތުވެއްޖެ… ހިނގާ.. އެއްވެސް އެއްޗެއް ބެހެއްޓިފަ އެބަހުރިތަ؟… ރަނގަޅަށް ބަލާތި؟…” މަދީހާ ކޮޓަރި ތެރެއަށް ވަދެ މުޅި ކޮޓަރިއަށް ނަޒަރު ހިންގާލިއެވެ. އޭރު އަފްނާނާ މަންޝާ އެނދުމަތިން ތެދުވެ ކޮނޑުގައި އަަތްދަބަސް އަޅުވާލިއެވެ. އަފްނާން ޗޫސް ދަމާލި އަޑަށް މަންޝާ ބަލާލިއެވެ. އަދި އަފްނާނުގެ އަަތުގައި އޮތް ދަބަސް މަންޝާ ޖަހައިގަތެވެ.

“ތި ހާލުގަވެސް ދަބަސް އަަޅާތި… ދީބަލަ ދޮނާ އަތަށް…” މަންޝާ އާ އެކީ އަފްނާނު އެގެއިން ނުކުތް އިރު އެހެން އެންމެން ތިބީ ޕިކަޕުގައެވެ. ގެއިން އެންްމެން ނުކުތުމުން ހުރިހާ ދޮރުތައް ތަޅުލުމަށްފަހު މަދީހާ އައިސް ޕިކަޕަށް އަރަމުން މަޖުދީ އަތަށް ތަޅުދަނޑި ހަވާލުކުރިއެވެ. މަޖުދީއާ އެކީ ކުރީ ސީޓުގަ އިނީ މަންޝާގެ މާމަ ހަދީޖާއެވެ. ދެން ތިބި އެންމެން އެރީ ޕިކަޕުގެ ފަހަތަށެވެ.

މަޑު ދުވެލީގައި އައިސް ފާލަން ދަށަށް ޕިކަޕު ގާތްކޮށްލުމުން އެންމެން ޕިކަޕުން ފޭބިއެވެ. ދޯންޏަށް އަރާނީ އަދި ފަހުންނޭ ކިޔާ މަންޝާއާ އަފްނާން މަޑުކުރީ އަތިރި ކައިރީ ހުރި ހިލަ ގޮނޑިއެއްގައެވެ. “އަފޫ… ދޮނާ ވަރަށް ގުޅައިފިން ހަސަންބެއަށް… ހަސަންބެ ފޯނެއް ނުނަގާ…” ކައިރީގައި މީހަކު ނެތް ވަގުތެއް ބަލާފައި ހަސަންބެއަށް ގުޅި ވާހަކަ އަފްނާނު ގާތު މަންޝާ ބުންޏެވެ.

އޭރުވެސް އެ މާހައުލަށް ވަށައިގެން ކަޅި ހިންގަމުން އަފްނާނު ހޯދަމުން ދިޔައީ އޭނާގެ ބައްޕައެވެ. އޭނާގެ ބައްޕައާ ބައްދަލުކޮށްލަން ބޭނުންވެފައި ހުރިލެއް ބޮޑުކަމުންނެވެ. އަފްނާނު ފޮނުވި މެސެޖް ބައްޕައަށް ލިބުނުތޯ ޔަގީންކުރަން އޭނާ ބޭނުމެވެ. އަފްނާން ފުރާ އިރު މިތަނަށް އަައިސް ދާނެ ކަމަށް އަފްނާންގެ ހިތް ބުނަމުން ދިޔައެވެ.

ބޯޓު ނައްޓާލާ ގަޑި ކައިރި ވުމުން މަޖުދީ އައިސް މަންޝާއާ ސަަލާމް ކޮށްލިއެވެ. އަފްނާނާ މަންޝާއާ އެކީ ގޮސް ތޮށިގަނޑު ކައިރީގައި އޮތް ބޯޓަށް އެރިއެވެ. އަދި މަތީ ޑެގުގައި ތިބި އާއިލާ މީހުންގާތަށް އެމީހުން ދިޔައެވެ. ބޯޓުގައިވާ ކުޑަދޮރުތަކުން ބޭރުބަލަން ހުރި އަފްނާނުގެ ހިތް ތެޅި ފޮޅެނީއެވެ. ނޭނގޭ ބިރުވެރިކަމެއް އޭނާގެ ހިތުގައިވަނީ އަށަަގެންފައެވެ. ފޯނަށް ބަލަން ހުރުމަށްފަހު އެންމެފަހު ފަހަރަށް ބައްޕަގެ ނަންބަރަށް ގުޅާލަން ފިއްތާލީ ހިތާ ދެކޮޅަށެވެ. ވަށްކަޅިން މުނީރާއާ ދިމާއަށް ބަލަމުންނެވެ.

އެފޯނު ކެނޑުނު އިރުވެސް ހަސަނު އެކޯލަކަށް ޖަވާބެއް ނުދިނެވެ. އަފްނާނުގެ ލޯ ކަރުނުން ފުރުނެވެ.

*** *** *** *** *** ***

ރޭގަނޑު ދިހަގަޑި ބައިވީއެވެ. ހޮސްޕިޓަލުން މީރާ ޑިސްޗަރޖް ކޮށްލީ ދެ ހަފްތާ ފަަހުން ޑަކްޓަަރަށް ދައްކަން އައުމަށް އެޕޮއިންޓްމަންޓް ހަމަޖައްސާފައެވެ. ހޮސްޕިޓަލުން ބޭރަށް ނުކުންނަށް މީރާއާ އެކީ ރިޔާޒާ ޟިރާރު ހިނގައިގަތެވެ. ގެއަކީ އޭ.ޑީ.ކޭ ހޮސްޕިޓަލާ މާ ދުރުގައި ހުރިތަނަކަށް ނުވުމުން އެމީހުން ގަސްތުކުރީ އެންްމެން އެކީގައި ހިނގާފައި ގެއަށް ދާށެވެ. މީރާގެ އަތުގައި ހިފަހައްޓައިގެން ހުރެ ސިންދިތާއާ ދިމާއަށް އެމީހުން ހިނގައިގަތެވެ.

ގެއަށް ވަދެ ލިފްޓްގެ ސްވިޗަށް ރިޔާޒް ފިއްތާލިއެވެ. ލިފްޓު އޭރު ވަނީ ހަތްވަަން ބުރީގައި ކަމުން ތިރިއަށް އަންނަން ކުޑަ ވަގުތުކޮޅެއް ނެގިއެވެ. މީރާ ހުރީ ލިފްޓް އަންނަ ސްޕީޑް ލަސްވެފައެވެ. އިރުއިރުކޮޅުން ލިފްޓަށް މީރާ ބަލާލައެވެ. އެއަށްފަހު ސިޑިއާ ދިމާއަށް މީރާ ބަލާލީ މިއަދު ދިމާވި ހާދިޡާ ލޯ މައްޗަށް ސިފަވުމުންނެވެ. ކުއްލިއަކަށް އެސިޑިއާ ދިމާއަށް ހުރި ހޮޅިބުރި ކަނިޖަހާފައި ނިވި ދިއްލުނެވެ.

މީރާގެ ދެލޯ ބޮޑުވެގެން ދިޔައެވެ. ބިރުގަނެ ހިތް އަވަސްވިއެވެ. ފަހަތަށް ފިޔަވަޅެއް އަޅާލީ ސިޑިއާ ދިމާއަށް ރަނގަޅަށް ބަލާލާށެވެ. މީރާގެ ދެލޯ އިތުރަށް ބޮޑުވެގެން ދިޔައީ ސިޑިމަތިން އޭނާއަށް ފެންނަމުންދިޔަ މީހާ ހުރިގޮތުންނެވެ. އުއްޑުން އޮވެ ހަތަރު މޮށްގަަނޑު ޖަހައިގެން ސިޑިން ފައިބައިގެން އެ އަންނަނީ މާބަނޑު އަންހެނެކެވެ. އެނާގެ އިސްތަށިގަނޑުވަނީ ހޭވިފައެވެ. ސިޑިން ފައިބަމުން އައި އިރު އޭނާ ލައިގެން ހުރި ހުދުކުލައިގެ ގަޔަށްދޫ ޓޮޕްކޮޅުވަނީ މައްޗަށް އަރާފައެވެ. ބަނޑުގެ ބޮޑުބައި އޮތީ ހާމައަށް ފެންނާށެވެ. ބަނޑުގައި ތަންތަަންގަނޑު ހުރީ ކަޅުވެފަައެވެ. ހީވަނީ މުޅި ގައިގަ ކިސަޑު އުނގުޅާފަ ހުރިހެނެވެ. ސިޑި މައްޗަށް އަލިވާގޮތަށް ހުރި ބޮކީގެ އަލި ނިވި ދިއްލުނު ވަގުތު މީރާއަށް އެ އަންހެން މީހާގެ މޫނު ރަަނގަޅަށް ފެނުނެވެ. އެއީ ދެވަނަ މީހެއް ނޫނެވެ. އެއީ މީރާގެ ގާތްް އެކުވެރިޔާއެވެ.

“މަންޝާ…” ވައިއަޑުން މީރާ ގޮވާލީ ލޮލަށް ފެންނަމުންދިޔަ މަންޒަރު ގަބޫލު ނުކުރެވޭތީއެވެ.

“ހިނގާ ދާން… މަންޝާއަށް ގުޅާނީ މައްޗަށް ގޮއްސަ…” ރިޔާޒްގެ އަޑަށް ސިހިފައި މީރާ ބަލާލީ ލިފްޓާ ދިމާއަށެވެ. އޭރު ޟިރާރު ލިފްޓު ތެރޭގައި ދޮރު ހިފަހައްޓަައިގެން ހުއްޓެވެ. ރިޔާޒް އައިސް މީރާގެ އަތުގައި ހިފިއެވެ. މީރާއަށް ބަލާލެވުނީ ސިޑިއާ ދިމާއަށެވެ. މަންޝާ ހުރި ގޮތް ރިޔާޒަށް ދައްކަން ބޭނުންވެފައި ހުރެއެވެ. ނަމަވެސް އޭރު ސިޑި މަތީ އެއްވެސް މީހަކު ފެންނާކަށް ނެތެވެ. ވާހަކަ ދައްކަން އަަނގަހުޅުވި  މީރާގެ އަތް އޭރު އަމާޒްވެފަައިވަނީ ސިޑިއާ ދިމާއަށެވެ. މީރާގެ އަނގައިން އެންމެ ބަހެއްވެސް ނުނިކުތެވެ.

މީރާއަށް ވަމުންދާ ގޮތް ރިޔާޒަށް ނޭނގޭނެކަން ކަށަވަރެވެ. އެ ފެންނަ ރޫހާނީ އެއްޗިސް އެ ފެންނަނީ މީރާއަށް އެކަންޏެވެ. ރިޔާޒަށް ވިސްނުނީ އެއީ މީރާ ސިޑިން ވެއްޓުނީމަ ވީ ގޮތެއް ކަމަށެވެ. ގެއަށް ވަދެ އަރާމު ކޮށްލަނިކޮށް މީރާ ހަމައަކަށް އެޅިދާނެކަމަށް ރިޔާޒްގެ ހިތް ގަބޫލުކުރިއެވެ. އަތުގައި ހިފައިގެން ގެނެސް ލިފްޓަށް މީރާ އެރުވީ ރިޔާޒެވެ. ލިފްޓުގެ ލެއްޕި ލެއްޕި ހުރި ދޮރު ދޭތެރެއިން ސިޑިއާ ދިމާއަށް މީރާ ހުރީ ބަލާށެވެ. ދެލޯ ބޮޑު ކާއްޓެއްހެން ހަދައިގެން ބަލަބަލާ ހުއްޓާ ލިފްޓްގެ ދޮރު މުޅިން ލެއްޕިިއްޖެއެވެ.

ލިފްޓު މައްޗަށް ދާން ނައްޓާލި ވަގުތު މީރާގެ ބޮލަށް ތޫނު ރިހުމެއް ވިއެވެ. ކަންފަތް ބަށްވީހެންވެސް ހީވިއެވެ. ފަސްވަނަ ބުރިއަށް ލިފްޓް އައިސް މަޑުކޮށްލި ވަގުތު މީރާގެ ހިތް ބާރުބާރަށް ތެޅިގަތެވެ. ފަހަތަށް ފިޔަވަޅެއް އެޅުނީ ބޭއިޚްތިޔާރުގައެވެ. ފުން ނޭވާތަކެއް ލަމުން ދެލޯ ބޮޑުކޮށްގެން މީރާހުރީ ލިފްޓްގެ ދޮރު ހުޅުވޭތޯ ބަލަބަލައެވެ. ލިފްޓުގެ ދޮރު ހުޅުވުމާއި އެކު ރިޔާޒް ލިފްޓުން ނުކުތެވެ. މީރާ އެހުރި ފިޔަވަޅުމަތީ ގުޑިވެސް ނުލާ ހުރީ ސިޑިއާ ދިމާއަށް ބަލާށެވެ. ލިފްޓު ތެރޭ ޟިރާރު ހުރީ މީރާ ނުކުންނަން ދެނެވެ.

“ދަރިފުޅާ… ނުކުންނަންވީނު… މި އާދެވުނީއްޔޭ…” މީރާގެ ކޮނޑުގައި ހިފާލަމުން ޟިރާރު ވާހަކަ ދެއްކީ މީރާއަށް ހިތްވަރު ދިނުމުގެ ގޮތުންނެވެ. އޭރު މީރާގެ ހަށިގަނޑު އެކީ ރޫރޫ އަޅަމުން ދިޔަކަަން ޟިރާރަށް އެނގުނެވެ. ދެލޯ ބޮޑުކޮށްލަމުން ރިޔާޒާ ދިމާއަށް ޞިރާރު ބަލާލިއެވެ.

މީރާއަށް އެތަނުން އެއްވެސް މީހަކު ނުފެންނަ ކަހަލައެވެ. ޟިރާރާ ރިޔާޒް އެތާ ތިބިތަން ވަނީ މީރާގެ ލޮލަށް ވަންހަނާ ވެފަައެވެ. މީރާއަށް ފެންނަނީ ސިޑިކައިރީ ފުރަގަސްދީގެން ރޯ އޮރިޔާމުން ހުރި އަންހެން ކުއްޖާއެވެ. އެކުއްޖާގެ ފަލަމަސްގަނޑާ ހަމައަށް އަންނަ ބުޅި ދިގު އިސްތަށިގަނޑުން ފުރަގަސް ނިވާވެފައި ހުއްޓެވެ. އޭރު އެ އަންހެން ކުއްޖާ މަޑުމަޑުން މީރާއާ ދިމާއަށް އެނބުރެނީއެވެ. މީރާއާ ދިމާއަށް ސީދާ ބަލަހައްޓައިގެން ހުރުމަށްފަހު އޭނާގެ ނަޒަރު ތިރިކޮށްލީ މީރާގެ ބަނޑާ ދިމާއަށެވެ. ބިރުން ހުރި މީރާއަށް ހޫނުވެ ދާހިއްލަން ފެށިއެވެ. ދެބުމަ ގޮށް ޖަހައިގެން މީރާ ހުރި އިރު ތުންފަތުގައި ތުރުތުރެއް ހުއްޓެވެ. މީރާގެ ކަންހުޅިތެރެއިން ދާތިކި އޮހޮރެމުން ދިޔައިރު މީރާ ހާސްވެ ބިރުގެންފައިވާކަން އޭނާގެ މޫނުމަތިން ދޭހަވެއެވެ.

ކަޅި ޖަހާނުލާ މީރާ ހުރީ އެ ފެންނަ މަޚްލޫގާ ދިމާއަށް ބަލާށެވެ. ދެން ފެނުނީ އެ އަަންހެން ކުއްޖާގެ ކުދި ބުޅި އިސްތަށިތައް ފޯލި ފޯއްޔަށް ވައިގެތެރޭ ވިހުރެން ފެށިތަނެވެ. އޭނާގެ އިސްތަށިގަނޑެކޭ ބޯވަ ފައިތަކެކޭ ތަފާތެއް ނެތެވެ. ގައިގެ ހަންގަނޑު ހުދުވެގެން ދިޔައެވެ. މުޅިގައިގަ ހުޅުނބު ފަޅަން ފެށިއެވެ. އޭނާގެ ދެލޯ ވަނީ ނޫކުލައިން ދިއްލިފައެވެ. މީރާ ހާސްވެ ދެލޯ ބޮޑުވީ އެ މަޚްލޫގު މީރާއާ ދިމާއަށް ކުރިއަށް ޖެހުމުންނެވެ. އޭރު އެ މަޚްލޫގު ހުރީ އުޑަކު ބިމަކު ނުޖެހިއެވެ. މީރާ ގައިން ހީބި ހިލުވާލިއެވެ. މީރާގެ ގައިގައި އޭތީގެ އަތް ޖައްސާލުމާއެކީ ރޯމަހެއްހެން މީރާ ތެޅެން ފެށިއެވެ.

ދެއަތުން ތަޅަމުން މީރާ ހަޅޭއްލަވާ ރޯން ފެށިއެވެ. “ނޫން.. ނޫން… އަހަރެން ގައިގަ އަތް ނުލާތި… މިތަނުން ދޭ… ނޫން… އަތްނުލާށޭ…. ކަލޭ ތިއުޅެނީ އަހަރެން ކޮށްޕާލަން… އަހަރެން މަރާލަން… އަހަރެންގެ ކުއްޖާވެސް މަރާލަން… ނޫން.. ނޫން…”

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.