ވަގުތުޖެހުމުން

ސަނީޒާއަކީ ހިމަތޮޅިކުލައަލި ހަށިގަނޑެއްލިބިފައިވާ ރީތި ޒުވާނެކެވެ. އޭނާގެ ކިބާގައިލޫޅާފަތިކަން ހުރިއިރު އިސްތަށިގަނޑު ފަންވެފައި ދިގެވެ. ހިތިފަތު ބުމަ އަކާއި ޖަންބުކުލައިގެ ކޯތާފަތެއްވެސް އޭނާއަށް ލިބިފައި ވެއެވެ.
ސަނީޒާއަށް ލިބިފައިވާ ރީތިކަމާއި ފުރިހަމަކަމުގެ ސަބަބުން އޭނާގެ ލޯތްބަށްއެދި އާދޭސްކުރާ ޒުވާނުންވެސް މަދެއްނޫނެވެ.
ސަނީޒާގެ ފަހަތުންމުގޯލިއަޅަމުންދާ ޒުވާނުންގެ އަދަދު ގިނަކަމާއިއެކު އެހެންކަމެއްވެސް ފާހަގަ ކުރެވެމުން ދިޔައެވެ. އެއީ ސަނީޒާގެ ހަޔާތަށްއަންނަ އެއްވެސްމީހަކުއޭނާއާއެކުގައި މާގިނަދުވަސް ހޭދަނުކުރާކަމެވެ. އެކަމުގެ ސިއްރުހޯދާކަށް މާގިނަމަސައްކަތެއް ކުރާކަށްވެސް ނުޖެހެއެވެ. އެއީ ރަށުގެ ގިނަބަޔަކުދަންނަ ބޮޑު ސިއްރެކެވެ.
ސަނީޒާގެ އުމުރުން ދިހަވަރަކަށް އަހަރުގައި އޭނާގެ މަންމަ އާއި ބައްޕަ ވަކިވިއެވެ. ސަނީޒާގެ ބައްޕައަކީ ހަރުކަށިމީހަކަށްވެފައި އޭނާގާތުހުންނައިރު ބޭނުންގޮތަކަށް ނޫޅެވޭތީ ސަނީޒާ އަމިއްލައަށް އޭނާގެ މަންމަގާތަށް ދިރިއުޅުން ބަދަލުކުރިއެވެ.
ސަނީޒާގެ މަންމަ ހަފީޒާގެ އުމުރުން ތިރީސްފަސްވަރަކަށް އަހަރުވެފައި ވާއިރު އޭނާއުޅެމުންދާ އުޅުމަށާއި ބަހާއިއަމަލަށް ބަލާއިރު އޭނާއަކީ ވިހި އެކާވީސްއަހަރުގެ ޒުވާނެއްފަދައެވެ. އެންމެމިހާރުގެޒުވާން ފިރިހެންކުދިންނާއި ގުޅިގެން އޭނާއުޅެމުންދަނީވެސް އެފަދަގޮތްގޮތަށެވެ.
މައިންބަފައިންގެ އުޅުން ދަރިންނަށް ވާރުތަވާފަދައިން ހަފީޒާގެ އުޅުން ވަރަށްފަސޭހަކަމާއެކުސަނީޒާއަށް ވާރުތަވިއެވެ. ސަނީޒާ ބޭނުންވިފަދައިންއުޅެން ފުރުސަތު ލިބުމުން އުފަލުން ހިނިތުންވެލިއެވެ. ލިބުނު މިނިވަންކަމާއެކު އުދުހޭންފެށި ކަހަލައެވެ.
ރަށަށް އައިސްގޮސްވާ ބީރައްޓެހިންނަކީ ހަފީޒާގެ ރައްޓެހިންކަމުގައިވަނީ ވަރަށްފަސޭހައިންނެވެ. އޭގެތެރޭގައިގިނައީ ޒުވާންފިރިހެންކުދިންނާއި މެދުއުމުރުގެ ފިރިހެނުންނެވެ. އޭގެތެރޭން ގިނަރައްޓެހިން ހަފީޒާއާ އެކުގައި ގެއަށްގޮސްއުޅޭ އުޅުމުގައި ސަނީޒާއާ ވެސްވާހަކަދައްކައެވެ. ހަމައެހެންމެ އޭގެތެރޭން ބައެއްމީހުންނަކީ ސަނީޒާގެވެސް ރައްޓެހިން ކަމުގައިވެއެވެ.
އަލީއަކީވެސް ހަފީޒާގެ ރައްޓެހިންގެތެރޭގައި ހިމެނޭ ބީރައްޓެއްސެކެވެ. އަލީ އޭނާގެއާދައިގެމަތިން ހަފީޒާމެންރަށަށް އަންނަމުންދިޔައެވެ. އެގޮތުން އެއްދުވަހަކު އަލީ އެރަށަށް އައިއިރު އޭނާއާ އެކުގައި ޒުވާންފުރައިގެ ފިރިހެންކުއްޖަކުވެސް ގެނައެވެ.
ހަފީޒާއަށް ފަރީނު ފެނުމާއެކު އަލީގެކިބައިން އޭނާއާބެހޭ މަޢުލޫމާތު ހޯދިއެވެ. އަލީގެފަރާތުން ހަފީޒާއަށް އެނގުނުގޮތުގައި ފަރީނުއަކީ ވަރަށްގިނަ ފައިސާލިބޭ ވަޒީފާއެއް އަދާކުރަމުންދާ މަސައްކަތްތެރި ތަޢުލީމީ ޒުވާނެކެވެ.
ފަރީނުއާ ބެހޭ މަޢުލޫމާތުތައް ލިބުމާއެކު ހަފީޒާ ބޭނުންވީ ކޮންމެ ގޮތަކުން ނަމަވެސް ސަނީޒާ އާއި ފަރީނު ގާތްކުރުވުމަށެވެ.
ސަނީޒާއާއި ފަރީނު ގާތްކުރުމުގެ މަސައްކަތް ހަފީޒާފެށީ އޭނާގެ އެންމެ ގާތްރަހުމަތްތެރިޔާ އައިންތުއާއި ގުޅިގެންނެވެ. ހަފީޒާއާއި އައިންތު ފަރީނުއާ ވަރަށްގިނަ ވާހަކަދައްކާ ކޮންމެވެސްވަރެއްގެ ރަހުމަތްތެރިކަމެއް އުފެއްދިއެވެ.
ހަފީޒާމެނާ އެކުގައި ހަފީޒާމެންގެއަށް ފަރީނު ދިޔައެވެ. އެގެއަށް ފަރީނު ދިޔުމާއެކު ސަނީޒާ ފެނިއްޖެއެވެ. ފަރީނަށް ސަނީޒާ ދައްކައި އޭނާގެ ވާހަކަ ފަރީނު ގާތު ދެއްކީ އައިންތުއެވެ.
ސަނީޒާއަކީ ބަލާބެލުމަށްރީތި ފުރިހަމަޒުވާނަކަށްވާތި ފަރީނުގެ ހިތުގައި ވެސް ސަނީޒާއާ މެދުގައި ޝައުޤުވެރިކަންއުފެދުނެވެ. ބައެއްފިރިހެނުންނަކީ ފެންނަ ކޮންމެ އަންހެނެއްވެސް ރީތިވާބަޔަކަށްވާފަދައިން ފަރީނަށްވެސްވީ އެފަދަގޮތަކަށް ކަމަށް ވެސް ވެދާނެއެވެ.
ފަރީނު ފުރައިގެންދިއުމާއެކު ހަފީޒާއާއި އައިންތު އެދެމީހުންގެ ރޭވުން ކާމިޔާބުކުރުމުގެ މަސައްކަތް ފެށިއެވެ. ފަރީނަށް ފޯނުކޮށް ހާލުއަހުވާލު އޮޅުންފިލުވަމުން ސަނީޒާގެ ވާހަކަވެސް ދައްކަމުންގެންދިޔައެވެ. ހަމައެހެންމެ ފަރީނު ސަނީޒާއާގުޅިއްޖެނަމަ ފަރީނަށްލިބޭނެ އުފަލާއިހިތްހަމަޖެހުމުގެ ވާހަކަތަކުގެ އިތުރުން ފަރީނަށް މިރަށުގައި ވަރަށް ރަނގަޅުދިރިއުޅުމެއް ވޭތުކުރެވޭނެގޮތް ހަދައިދޭނެ ކަމަށްވެސް ބުނަމުންދިޔައެވެ. ހަފީޒާއަކީ ބޮޑުގޯއްޗެއްއޮންނަ މީހެއްކަމާއި ސަނީޒާއާގުޅިގެން އެގޯތީގައި ގެއަޅައިގެން ފަރީނު ބޭނުން ގޮތަކަށް އުޅޭންވީކަމަށްވެސް ބުނަމުންދިޔައެވެ.
ހަފީޒާއާއި އައިންތު ވަރަށްހިތްވަރާއެކު ކުރިމަސައްކަތުން ފަރީނުގެހިތުގައި ވެސް ސަނީޒާއާމެދު ޝައުޤުވެރިކަން އުފެދެމުންދިޔައެވެ. ހަމައެހެންމެ ސަނީޒާ އާއި ވާހަކަދައްކާން ބޭނުންކަމަށް ބުނާންފެށިއެވެ.
ސަނީޒާއަށް ފޯނުކުރާން ފަރީނުގާތު ބުނުމަށްފަހު ސަނީޒާބަލާ އެގެއަށް ދަނީ އައިންތުއެވެ.
ސަނީޒާއަށް ފަރީނު ފޯނުކުރުމުން ސަނީޒާ ވެސް ފަރީނުއާ ވާހަކަދައްކައެވެ. އެގޮތުން ވާހަކަދައްކާންތިބޭ ވަގުތުތައް އިތުރުވަމުންދިޔައެވެ.
ފަރީނު އާއި ސަނީޒާ ގުޅުވުމަށްޓަކައި ކުރަމުންދާ މަސައްކަތުގެ ތެރޭން ސަނީޒާގާތުގައި ދައްކާންޖެހޭ ވާހަކަތައް ވެސް ދައްކަމުންދަނީ އައިންތުއެވެ. ހަމައެހެންމެ ހަފީޒާ އާއި އައިންތުގެރޭވުން ކާމިޔާބުވޭތޯ ވެސް އެދެމީހުން ވަރަށްރަނގަޅަށް ބަލަމުންދިޔައެވެ. އެހެނަސް އެކަމެއް ރަށުގެ އެހެންމީހުންނަކަށް ނޭނގެއެވެ.
ހަފީޒާ އާއި އައިންތުގެ މަސައްކަތަށް މަހެއްހާ ދުވަސްވީރު އެދެމީހުން ދެކެމުންއައި ހުވަފެންތަކުގައި ކުލަޖެހުމުގެ ކޮޅުމަތި ފެންނާންފެށިއެވެ.
ސަނީޒާއާއި ފަރީނުގެމެދުގައި ފޯނުންއުފެދުނު ރަހުމަތްތެރިކަމުގެ ގުޅުން ދުވަހަކަށްވުރެދުވަހެއް ބަދަހިވަމުން އައިސް އެގުޅުން ލޯތްބަށް ބަދަލުވިއެވެ. ހަމައެހެންމެ ފޯނުމެދުވެރިކޮށް ލޯބީގެއަހުދުތަކާއި ވައުދުތައްވަމުން އެގުޅުންތަރައްޤީކުރުމަށް ކުރެވޭންހުރި ހުރިހާކަމެއްކުރަމުން ކުރިމަގަށް ރޭވުންތައް ރާވަމުންދިޔައެވެ.
ސަނީޒާގަބޫލުކުރާގޮތުގައި ފަރީނަކީ އޭނާއާ ވަރަށްއެކަށީގެންވާ ރަނގަޅު ޒުވާނެކެވެ. ސަނީޒާގެ އެގަބޫލުކުރުންތަކުގެ އިތުރުން އައިންތު ވެސް ސަނީޒާގާތުގަ ބުނެފައިވަނީ ފަރީނަކީ ސަނީޒާއާ ވަރަށްއެކަށީގެންވާ ރަނގަޅުޒުވާނެއްކަމަށާއި ރަށުޒުވާނުން ނަށްވުރެ މާރަނގަޅުވާނެކަމަށެވެ.
ފަރީނުގާތުގަ އައިންތު ބުނެފައިވަނީ ސަނީޒާއަކީ ވަރަށް ކިޔަމަންތެރި އަހުލާގުރަނގަޅު މަޑުމައިތިރި ޒުވާނެއްކަމަށެވެ. ހަމައެހެންމެ ފަރީނު އޭނާއާ ގުޅިއްޖެނަމަ ފަރީނު ބުނާގޮތް ހަދައިގެން އުޅޭނެކަމަށެވެ.
ދުވަސްތައް މާޒީއާ އެކުވަމުންދާވަރަކަށް ސަނީޒާ އާއި ފަރީނުގެ ލޯބި ތަރައްޤީވަމުން އާރާސްތުވަމުން ދިޔައެވެ. ދުވަހަކު ވަކިނުވެ އެކުގައިވުމަށާއި ސަނީޒާގެ ތަޢުލީމީހަޔާތްނިމުމުން ކައިވެނިކުރުމަށްވެސް ރާވަމުންދިޔައެވެ. ދެމީހުންގެފަރާތުންވެސް ފެންނަމުންދަނީ އުފަލާއި ހިތްހަމަޖެހުމުގެ އަސަރުތަކެވެ.
ހަފީޒާގެ ރޭވުން ކާމިޔާބުވުމުން އޭނާ ހުންނަނީ ވަރަށް އުފާވެ ހިތްހަމަ ޖެހިފައެވެ.
ދުވަސްތައް މާޒީއާއި އެކުވަމުން އައިސް ކުއްލިއަކަށް ސަނީޒާ ވަރަށް ބަލިވެއްޖެއެވެ. ރަށުގެ ސިއްހީހާލަތުހުރިގޮތުން ބޭސްކުރުމަށްޓަކައި މާލެދާން ޖެހިއްޖެއެވެ. އެހެންވެ ފަރީނަށް ފޯނުކޮށްފައި ހަފީޒާ އެވާހަކަ ދެއްކިއެވެ. ހަމައެހެންމެ އެދެމައިންނަށް މާލޭގައި ތިބެވޭނެގޮތް ހަމަޖައްސައިދީ، ވާންއުޅޭއަނބިމީހާއަށް ބޭސްކުރުމަށް އެހީތެރިވުމަށް އެދުނެވެ.
ހަފީޒާބުނިފަދައިން ކަންތައްކުރުމަށް ފަރީނު ނިންމީ އޭނާ ސަނީޒާދެކެވާ ލޯތްބެއްގެ ބޮޑުކަމުން ކަންނޭނގެއެވެ.
ހަފީޒާ އާއި ސަނީޒާ މާލެދިޔައިރު ފަރީނުހުރީ މާލޭގައެވެ. ހަފީޒާ އާއި ސަނީޒާ މާލޭގައި ތިބުމުގެ ހުރިހާކަމެއް ހަމަޖައްސަމުންދިޔައީ ފަރީނުއެވެ. ހަމައެހެންމެ ސަނީޒާއަށް ބޭސްކުރުމަށާއި އެހެންވެސް ބައެއްކަހަލަ ކަންކަމަށް ފަރީނު ހަރަދުކުރިއެވެ. ހަފީޒާގެ މޮޅުރޭވުމުގެސަބަބުން ސަނީޒާއަށްހޯދައިދެވުނު ބައިވެރިޔާއަށްޓަކާ ހަފީޒާ އުފާކޮށް ފަހުރުވެރިވަމުން ދިޔައެވެ. ހަމައެހެންމެ އެކަމުގައި ކުރިޔަށްދިއުމަށް ސަނީޒާއަށް ހިތްވަރު ދެމުން ފުރުސަތުތައްދެމުން ދިޔައެވެ. ދުނިޔޭގެ އުފަލާއި އަރާމާ ތަނަވަސްކަމަށް ފެން ބޮވައިގެންފައިވާ ހަފީޒާ، ސަނީޒާ އާއި ފަރީނަށް ފުރުސަތާއި މިނިވަންކަން ދެމުންދިޔައީ އެކަމުގެ ސަބަބުން ފަހުންނުކުމެދާނެ ނަތީޖާއަކާމެދު ކުޑަކޮށްވެސް ވިސްނާލުމެއްނެތިއެވެ.
މާލޭގައި ހަތަރުވަރަކަށްދުވަސް ހޭދަކޮށް ބޭހުގެކަންތައް ނިންމާލުމަށްފަހު ރަށަށްއައިއިރު ސަނީޒާގެ މޫނުމަތިންފާޅުވަމުންދަނީ އުފަލާއި ހިތްހަމަޖެހުމުގެ އަސަރުތަކެވެ.
ސަނީޒާއެކޭ އެއްފަދައިން ހަފީޒާ ވެސް ހުރީ ވަރަށް ހިތްހަމަޖެހިފައެވެ.
ދުވަސްތައް މާޒީއާއެކުވަމުންދިޔައިރު ކުރިއެކޭވެސްއެއްފަދައިން ފަރީނާއި ސަނީޒާ ފޯނުމެދުވެރިކޮށް ލޯބީގެއަހުދުތަކާއި ވައުދުތައްވަމުން ރޭވުންތައްރާވަމުން ދިޔައެވެ.
ކުއްލިއަކަށް ކަހަލަގޮތަކަށް ސަނީޒާއަށް ވާންފެށިގޮތްތަކުގެ ސަބަބުން އޭނާ ހާސްވާންފެށިއެވެ. ހަމައެހެންމެ އެކަމާމެދު ވިސްނަމުން ވިސްނަމުންގޮސް ސިކުނޑި ސުމަކަށްދާވަރު ވެއްޖެއެވެ. ހަދާނެގޮތްހުސްވެ ތެޅިފޮޅޭންވެސް ފެށުނެވެ.
ކަންތައްތައް ވަމުންދާގޮތުގެ ވާހަކަ ހަފީޒާގާތު ސަނީޒާ ބުނުމުން ހަފީޒާ ވެސް ވަރަށްހާސްވެއްޖެއެވެ. ހަމައެހެންމެ އެކަމާ އޭނާކަންބޮޑުވިވަރު އޭނާގެ ޢަމަލުތަކުން ފާޅުވަމުން ދިޔައެވެ.
ހަފީޒާގެ މޮޅުރޭވުމުގެ ފައިދާފެނުނުފަދައިން އެކަމުގެގެއްލުންވެސް ފެންނާން ފަށައިފިއެވެ. ސަނީޒާގެފަރާތުން ފެންނަމުންދާ ކަންތައްތައް އެފަދައިން ވަމުންދާނަމަ އޭނާގެ މުޅިދިރިއުޅުން ބަނަވެގެންދާނެކަން ހަފީޒާއަށް ޔަގީންވެއެވެ.
ސަނީޒާއަށް ދިމާވެފައިވާ ކަންތަކުގައި ޒިންމާވާންޖެހޭ ފަރާތަކީ ފަރީނު ކަމުގައި ގަބޫލުކުރާ ހަފީޒާ، ފަރީނަށް ފޯނުކޮށް އެވާހަކަދެއްކިއެވެ. އަދި އެކަމުގައިއެހީވެ އެލަދުން ސަނީޒާ ސަލާމަތްކުރުމަށް ބުންޏެވެ.
ހަފީޒާގެ އެވާހަކަތައް ފަރީނަކަށް ގަބޫލެއްނުކުރެވުނެވެ. ނުވަތަ ގަބޫލެއް ނުކުރިއެވެ. އޭނާ އެކަމާ ކަނޑައެޅިގެން ދެކޮޅުހެދިއެވެ. އެކަމުގެސަބަބުން ހަފީޒާ ވަރަށް ރުޅިއައެވެ. އެހެންވެ ފަރީނާއިދިމާއަށް ވަރަށް އެއްޗެތިކިޔުމަށްފަހު ފޯނުކަނޑާލިއެވެ. އެއީ އެކަމުގެ ހައްލު ނޫންނަމަވެސް މިއަދަކު އެހެންގޮތެއްވެސް ނެތެވެ.
ސަނީޒާގެ ހާލަތުސިއްރުކުރުމަށް ސަނީޒާ އާއި ހަފީޒާ ކިތަންމެވަރަކަށް މަސައްކަތްކުރި ނަމަވެސް ވަގުތުޖެހުމާއެކު އެކަން ފަޅާއަރައި، މުޅިރަށަށް ބޭޒާރުވެއްޖެއެވެ. ހަމައެހެންމެ އެކަމުގެ ހިތްދަތިކަމާއި ހިތާމަ ތަހައްމަލްކުރާން ޖެހިއްޖެއެވެ.

( ނިމުނީ )