ބޭނުންވަނީ ކަލާ (ފުރަތަމަ ބައި)

“ދަރިފުޅާ… ދެންހޭލަބަ… މިހާރު އެހަތެއް ޖެހީ… މިއަދުވެސް އެހެންނޫނީ ސައިނުބޮވެ އޮފީހަށް ދާާންޖެހޭނީ…” ޒަލަފްގެ ކޮޓަރި ދޮރުގާ ޓަކިޖަހަމުން އަޒްމާ ގޮވަމުން ދިޔައެވެ. އިރުކޮޅަކުން ޒަލަފް ކޮޓަރި ދޮރުހުޅުވާލުމަށްފަހު މަންމާ މިހޭލީއޭ ބުނެ ތުވާލިނަގާ ކޮނޑަށް ލަމުން ފާހަނައަށް ވަނެވެ.

ޒަލަފްއަކީ މާހިރުއާއި އަޒްމާގެ އެންމެ ހަގުދަރިއެވެ. ޒަލަފްގެ ބޮޑަށް ހުންނަ ޒިޔާން އުޅެނީ އޮސްޓްރޭލިއާ ކުއްޖަކާ އިނދެގެން އޮސްޓްރޭލިއާގައެވެ. އެހެންވެ އަޒްމާއާއި މާހިރު ޒަލަފް ގެންގުޅެނީ ކުޑަކުއްޖެއްހެންނެވެ.

އުމުރުން ތޭވިސް އަހަރުވިޔަސް ޒަލަފްގެ ގިނަ ކަންތައްތައް ކޮށްދޭނީ އަޒްމާއެވެ. ކޮންމެދުވަކު އެއްގަޑިއަކަށް އޮފީހަށްދާން ޖެހުނަސް އަޒްމާ ގޮވަންދެން ޒަލަފް ނިދަން އޮންނާނެއެވެ. އަދި އަޒްމާ ގޮވީމަވެސް ކަންނެތްވެފަ ނުތެދުވަން އޮންނާތީ ގިނަދުވަސް ދުވަހު އޮފީހަށް ދާންޖެނީ ސައިވެސްނުބޮއެއެވެ.

އަޒްމާގެ އެދުމަށް މާލޭގައި ހުރި ދިހަބުރީގެ އިމާރާތް ކުއްޔަށް ދޫކޮށް އެކުޑަ ކުޑަ އާއިލާ ހުޅުމާލެއަށް ބަދަލުވީ ހިތްފަސޭހަ މާހައުލެއްގާ ދިރިއުޅުމުގެ ބޭނުމުގައެވެ. ނަމަވެސް ޒަލަފްއާއި މާހިރު އޮފީހަށްދާން ޖެހެނީ މާލެއަށެވެ. އެހެންކަމުން ޒަލަފްވެސް ކޮންމެ ދުވަކު ހެނދުނު ކުރިން ތައްޔާރުވެގެން ބަސް ސްޓޮޕަށް ދާންޖެހެއެވެ. ޒަލަފްއަށް މާހިރު ހުޅުމާލޭގައި ދުއްވަން ސައިކަލެއް ގަނެދޭން އުޅުމުންވެސް ޒަލަފް އެކަމާ އެއްބަސްނުވީ އޭނާދާންޖެހޭ މާގިނަ ތަންތަން ނެތުމާއެކު މާލޭގައި ދުއްވާނެ ސައިކަލެއް ހުންނާތިއެވެ.

“ދަރިފުޅާ… އަޔާނީ… މަންމައަށް ފެންތަށްޓެއް ގެނެސް ދީބަ” ލޯގަނޑު ކައިރީ ރީތިވާންހުރި އަޔާނީއަށް އޭނާގެ މަންމަގެ އަޑުއިވުމާއެކު މަންމައަށް ފެންތަށްޓެއް ގެނެސްދިނެވެ. އޮފީހަށްދާން ލަސްވާތީ އުޅުނަސް އަޔާނީއަށް އޭނާގެ މަންމަގެ ކަންތައްތައް މާމުހިންމެވެ. ވާނީވެސް އެހެންތާއެވެ. ބޯޓު ދަތުރުކުރަންގޮސް އުޅެނިކޮށް ބައްޕަ ނިޔާވިފަހުން އަޔާނީއަށް ކިޔަވާދީ އަޔާނީގެ ހުރިހާކަމެއް ބެލެހެއްޓީ އެމަންމަ އެކަނިމާ އެކަންޏެވެ. ގޭގޭގައި މަސައްކަތް ކޮށްގެން ރައްޓެއްސެއްގެ ގެއިން ކުޑަ ކޮޓަރިއެއްގައި ހުރެވެސް އަޔާނީގެ މަންމަގެ ބުރަ މަސައްކަތުން މިއަދު އަޔާނީ އެވަނީ ބިޒްނަސް ދާއިރާއިން ޑިޕްލޮމާއެއް ފުރިހަމަކޮށް ރަނގަޅު ވަޒީފާއެއް ހޯދާފައެވެ. ނަމަވެސް މާލޭގައި ދިރިއުޅުނު ކުޑަ ކޮޓަރި ހުސްކުރަން އެންގުމުން މިހާރު އަޔާނީއާއި އާނާގެ މަންމަ ދިރިއުޅެމުންދަނީ ހަތަރުހާސް ރުފިޔާދީގެން ހުޅުމާލެއިން ކުއްޔައް ނެގި ކުޑަ ކޮޓަރިއެއްގައެވެ.

ސައިބޮއެނިމުމާއެކު ދުވަމުން ދުވަމުން ޒަލަފްގެއިން ނިކުތީ ބަސް ސްޓޮޕްއަށް ބަސް އައުމުގެ ކުރިން ދެވޭތޯއެވެ. ނަމަވެސް ޒަލަފްއަށް ދެވުނީ ބަސްނައްޓާލަން އުޅެނިކޮށެވެ.

އަވަހަށް ބަހަށް އަރާއިށީންނަން ބަލާލިތަނާ ޒަލަފްއަށް ފެނުނީ ކުރިމަތީ އިންގޮނޑީގައި އިން އަންހެން ކުއްޖެކެވެ. އެކުއްޖާފެނިފާ ޒަލަފްއަށް އިތުރަށް އެހެންދިމާލަކަށްވެސް ބަލާވެސް ނުލެވުނެވެ. އެދޮންއަންހެންކުއްޖާގެ މޫނަށް ކަޅިޖަހާނުލާ ބަލަން ހުއްޓާ ޒަލަފްއާ ދިމާލަށް އެއަންހެން ކުއްޖާބަލާލިއެވެ. އެވަގުތު ޒަލަފްގެ މެއަށްހީވީ އެތައަހާސް ތިރެއް އެއްފަހަރާ ހަރާލިހެނެވެ. ނަމަވެސް އެއަންހެން ކުއްޖާބަލާލީ ކީއްވެކަން ޒަލަފްއަށްއެނގުނީ މާފަހުންނެވެ. ހަގީގަތުގައި ޒަލަފްއަށް ހުރެވުނީ ފެރީޓާމިނަލްއަށް ބަސްހުއްޓުނު އިރުވެސް ނޭނގިފައެވެ. ގަތްލަދުން އެކުއްޖާ ފޭބުމަށް ތަންކޮޅެއް ދައްކާލުމަށްފަހު ޒަލަފް ގަޑިއަށް ބަލާލިއެވެ.އެވަގުތު ފައިގާ އެއްޗެއް ޖެހުނުހެން ހީވެގެން ޒަލަފްއަށް ތިރިޔަށް ބަލާލެވުނެވެ. ޒަލަފްގެ ފަޔާދިމާލަށް ބަލާލިއިރު  ވެއްޓިފަ އޮތީ އޭފޯސައިޒްގެ ސިޓީއުރައެކެވެ. ކާކުއަތުން ވެއްޓުނު އެއްޗެއްތޯ ބަލާލިއިރު ފެނުނީ ބަހުން ޒަލަފްއަށް ފެނުނުއަންހެން ކުއްޖާއަތުގާ އޮތްފައިލެވެ. އިތުރުމީހެއް އަތުން އެކަހަލަ އެއްޗެއް އޮތްތޯ ޒަލަފް ބަލާލިއެވެ. ނަމަވެސް ފައިލެއް ނޫނީ ފޮތެއް ހިފައިގެން މީހަކު ހުރި ތަނެއް ނުފެނުނެވެ. އެހެންވީމާ އެ ސިޓީއުރައަކީ އެއަންހެން ކުއްޖާގެ އެއްޗެއް ކަމަށް ނިންމާ އެ ހަވާލު ކުރަން ވެގެން ޒަލަފް ބަލާލި ވަގުތު އެއަންހެން ކުއްޖާއެއް ނުފެނުނެވެ. ދެން ލަސްވާތީ ފެރީޓާމިނަލް ތެރެއަށް ކުޑަކޮށް ބަލާލުމަށްފަހު އަވަހަށް މާލެދެވޭތޯ ޒަލަފް އުޅުނެވެ.

ފެރީއަށް އަރާ ހަމަޖެހިލެވުމުން ޒަލަފް އެސިޓީއުރައަށް ބަލާލިއެވެ. އެވަގުތު ޒަލަފްއަށް އެސިޓީއުރައިގެ ބޭރުގާ ފަންސުރުން ޖަހާލާފައިވާ ނަން ފެނުނެވެ. “އަޔާނީ”.. އެނަން ކިޔާލުމަށްފަހު ޒަލަފްގެ ތުންފަތް މައްޗައް ފަނޑު ހިނިތުންވުމެއްވެރި ވިއެވެ.