ނަސްލު

“ކަލޭގެ ކައިވެންޏަށް ބަފައެއްގެ ހައިސިއްޔަތުން ކަލެޔަށް ދޭނެ ވަލީއެއް ނެތް. މަގޭ ރުހުން ލިބޭނީ ތީ މަގޭ ހަމަ އަސްލު ދަރިއެއްކަން ޑީއެންއޭ (DNA) ޓެސްޓުން ޔަގީން ވެއްޖެއްޔާ!”

އާލިއާ ކަޅިޖަހާނުލާ އޭނަގެ ބައްޕަ އާއި ދިމާލަށް ބަލަހައްޓައިގެން ހުއްޓެވެ. އޭނަ ކައިރީގައި އޭނަގެ މާމަ ޚަދީޖާ އަދި މަންމަ ޒުލޭޚާވެސް ހުއްޓެވެ. އެމީހުންވެސް ތިބީ ބުނާނެ އެއްޗެއް ނޭންގިފައެވެ.

އިބްރާހިމްފުޅު އެތިންމީހުންނަށް ކަޅި ހިންގާލިއެވެ

“ކޯއްޗެއް ތިބަލަނީ؟ އަހަރެންގެ ދަރިއެއްކަން ޔަގީންނުވާ މީހަކަށް ކޮން ވަލީއެއް އަހަރެން ދޭނީ؟ ހަރާން ބަ…..”

އާއިލާ ލޯމަރާލިއެވެ. ހިފަހައްޓައިގެން ހުރި ކަރުނަތައް ލޮލުތެރެއިން ފޭދިގަތެވެ. އޭނަ ބައްޕަ އެބުނެލި ޖުމްލައަކީ އާލިއާ އަށް އާޖުމްލަ އެއް ނޫނެވެ. ކުޑައިރުއްސުރެ އޭނައަށް އިވެމުން އަންނަ ޖުމްލައެވެ. އޭނަ ވަނީ އެޖުމްލައަށް އާދަވެފައެވެ. ކައިރިން ގިސްލުމުގެ އަޑު އިވުމުން އޭނަ ލޯހުޅުވާ ބަލާލިއެވެ. އޭނަގެ މަންމަ ރޯތަން ފެނުމުން އޭނަގެ ހިތަށް ތަދުވިއެވެ. އެއީވެސް އާމަންޒަރެއް ނޫނެވެ. މަންމަ އެގޮތަށް ރޯތާ ފަންސަވީސް އަހަރުވީއެވެ. އޭނަގެ މާމަ، ޚަދީޖާ، އެއްޗެކޭ ނުބުނެ އިސްދަށަށް ޖަހައިގެން ހުއްޓެވެ. އެއީ މާމަގެ ގޮތެވެ. ބައްޕަ އެގޮތަށް އެއްޗެހި ގޮވައިގަތީމަ މާމަ އެއްވެސް މީހެއްގެ ދިފާއުގަ ވާހަކައެއް ނުދައްކާނެއެވެ. އާލިއާގެ މުޅި ހަޔާތް ގޮސްފައިވަނީ އެގޮތަށެވެ. ބައްޕަ އެއްޗެހި ގޮވުމާ މަންމަ ރުއިމާ މާމަ ހިމޭނުން އިނުމެވެ.

އާލިއާ އަކީ އިބްރާހީމްފުޅާއި ޒުލޭޚާގެ ކައިވެންޏަށް އެތައް އަހަރެއް ވީފަހުން ލިބުނު ހަމައެކަނި އަންހެން ދަރިފުޅެވެ. ނަމަވެސް، އާލިއާ އުފަންވި ދުވަހުން ފެށިގެންވެސް އިބްރާހީމްފުޅުގެ ހިތުގައި އޮތީ ބަޔާންކުރަން ދަތި ޝައްކެކެވެ. ސަބަބަކީ އާލިއާގެ ސިފަ ޒުލޭޚާއާ ވެސް އަދި އިބްރާހީމްފުޅާ ވެސް އެއްވެސް ވަރަކަށް ވައްތަރު ނުވުމެވެ. އޭނަގެ ހަނގަޑު އަލުވުމާއި އަދި ހާއްސަކޮށް، ދިވެހިންގެ ތެރޭގައި މަދުން ނޫނީ ނުފެންނަ ފަދަ ނޫކުލައިގެ ދެލޯ އާލިއާއަށް ލިބިފައިވުމަކީ އިބްރާހީމްފުޅުގެ ޝައްކު ޔަގީނަށް ބަދަލުވި ސަބަބެވެ. އޭނާ ހިތާހިތުން ނިންމީ ޒުލޭޚާ އެހެން ފިރިހެނަކާ އެކު ނަހަލާލު ގުޅުމެއް ހިންގައިގެން ވިހޭ ދަރިއެއް ކަމަށެވެ.

އެއީ އޭނާގެ ދަރިއެއް ކަމަށް ހިތުގެ އަޑިން ގަބޫލުނުކުރި ނަމަވެސް، އިބްރާހީމްފުޅު އާލިއާ ދުލެއް ނުކޮށްލައެވެ. އަދި ޒުލޭޚާ ވަރިއެއްވެސް ނުކުރެއެވެ. އޭނަގެ އެހެން ކުދިންނެކޭ އެއްފަދައިން އާލިއާއަށް ޚަރަދުކޮށް، ކިޔަވައިދީ ބެލެހެއްޓިއެވެ. ނަމަވެސް އެއީ އިބްރާހީމްފުޅުގެ މަންމަ، ޚަދީޖާގެ އާދޭހާއި އެދުމުގެ މަތިންނެވެ. ޚަދީޖާ އަބަދުވެސް ބުނަނީ އާލިއާ އަކީ ހަމަ އެ އާއިލާގެ ލޭކަމަށާއި އެ ކުއްޖާ ބާކީ ނުކުރުމަށެވެ.

އެހެންނަމަވެސް، އިބްރާހީމްފުޅުގެ ހިތުގައި އޮތް ރުޅިވެރިކަމާއި ނަފްރަތު ފޮރުވައިގެން ނުބަހައްޓައެވެ. ގޭތެރޭގައްޔާއި، ރަށު އެންމެންގެ ކުރިމަތީގައިވެސް އަބަދުހެން ޒުލޭޚާއަށާއި އާލިއާއަށް ވައްބަހުން ޖަހައި ހަދައެވެ. “މަގޭ ލެއެއް ނޫން” ކަމަށް ބުނެ އާލިއާގެ ހިތް ކުދިކުދި ކޮށްލައެވެ. ޒުލޭޚާގެ އިއްފަތްތެރިކަމާ މެދު އަބަދު ސުވާލު އުފައްދައި، ދެމައިންގެ އަގު މީސްތަކުންގެ ކުރިމަތީގައި ވައްޓާލައެވެ. އެންމެ ކުޑަމިނުން އޭނައަށް ބައްޕަ ކިޔުންވެސް އާލިއާއަށް މަނަލެވެ. މި ހިތްދަތިކަމުގައި އާލިއާ ބޮޑުވަމުން އައީ ކެތްތެރިކަމާ އެކުގައެވެ.

“މިހުރިހާ އަހަރުތަކަކަށް ފަހު ތި ޓެސްޓެއް ހަދަން ތިނިންމީ ކީއްވެ؟ ކުރިންވެސް ތިކަން ކޮށްފަ ހުރިހާ ކަމެއް ޔަގީން ކުރިނަމަ؟” ޒުލޭޚާ ސުވާލުކޮށްލިއެވެ. އިބްރާހިމްފުޅު އޭނަ މަންމަ އާއި ދިމާލަށް ބަލާލިއެވެ.

“މަންމައާ ހެދި. ކޮންމެ ފަހަރަކު އަހަރެން އެކަން ކުރަން ބޭނުންވާ ވާހަކަ ބުނާ އިރަށް މަންމަ ބުނާނެ ކުރާނެކަމެއް ނެތޭ. މަށާ އާލިއާ އާއި ވައްތަރެއް ނޫނޭ ބުނީމަވެސް ބުނާނެ އާއިލާގެ ކޮންމެވެސް ހިސާބެއްގަ އާލިއާގެ އެސިފަތައް ހުރި މީހެއްވެސް ހުރެދާނެއޭ. ދެން ނޭނގެ މަށަކަށް. އަހަންނަށް އިނގޭހާވެސް އެއްޗަކީ އަހަރެންގެ އެއްވެސް ސިފައެއް އާލިއާ ގައިގަ ނެތްކަން”

އިބްރާހިމްފުޅު އާލިއާ އާއި ދިމާލަށް އިނގިލިދިއްކޮށްލަމުން ބުނެލިއެވެ. “ކަލޭ މީހަކާ އިންނަން ބޭނުމިއްޔާ މަމިބުނި ކަންތައް ކުރޭ. އެހެން ނޫނީ ކަލޭ އަމާ ކައިރީ އަހައިގެން ކަލޭގެ އަސްލު ބަފާ ހޯދައިގެން އޭނަ ކައިރިން ވަލީ ހޯދާ”

“މައްސަލައެއް ނެތް” އާލިއާ އަޑުހަރުކޮށް އެހެން ބުނެލުމުން އެންމެނަށްވެސް ހައިރާންކަން ލިބުނެވެ.

“ދަރިފުޅާ….” މާމަ ގޮވާލުމުން އާލިއާ މާމަ ހުއްޓުވިއެވެ.

“އަހަރެން ތިކަން ކުރާނަން. ފަންސަވީސް އަހަރުގެ ތިކަންތައް މިފަހަރު އަހަރެން ނިންމާލާނަން. މާމަ ގޮވައިގެން އިންޑިއާއަށް ދާށެއްނު ބޭބެ ތިއުޅެނީ. އަހަރެން ދާނަން ބޭބެއާއެކު. އިންޑިއާއިން މިކަން ކުރާނީ.”

“މާމަ ޖެހިލުންވަނީ ރަށުމީހުންނަށް މިކަން ކުރަން އުޅޭކަން އިނގިދާނެތީ އެއްނުދޯ؟” މާމަ އާއި ދިމާލަށް ބަލާލަމުން އާލިއާ އަހާލިއެވެ. ޚަދީޖާ އެއްޗެކޭ ނުބުނެއެވެ.

“ރަށުމީހުންނަކަށް ނޭންގޭނެ. އެހެންވެ އިންޑިއާގަ ކުރަންވެސް މިބުނީ. ބޭބެ އޯކޭ ތަ މިގޮތަށް؟” އާލިއާ އިބްރާހިމްފުޅާ އަމާޒުކޮށް އަހާލިއެވެ. އިބްރާހިމްފުޅު ކުޑައިރުކޮޅަކު އާލިއާ އާއި ދިމާލަށް ބަލަން ހުރެފަ އެއްޗެކޭ ނުބުނެ ނިކުމެގެން ދިޔައެވެ.

އޭގެ 2 ދުވަސް ފަހުން 3 މީހުން އިންޑިއާއަށް ފުރިއެވެ. ޓްރެވެންޑްރަމްގެ ކިމްސް ހޮސްޕިޓަލް އިން އެންމެ ފުރަތަމަވެސް އާލިއާ އޮޅުންފިލުވީ ޕެޓާނިޓީ ޓެސްޓް ހެދޭނެ ގޮތެވެ. ބޭނުންވާ ހުރިހާ މައުލޫމާތެއް ހޯދުމަށްފަހު އިބްރާހިމްފުޅުކައިރީ ކަންތައް ކުރަންވީ ގޮތް އޭނަ ކިޔައިދިނެވެ. އަދި ދެމީހުން ލެބޯޓްރީއަށް ގޮސް ދެމީހުންގެ ސްވޮބް ސާމްޕަލް ދިނެވެ. ލެބޯޓްރީ އިން މައުލޫމާތު ދިން ގޮތުގައި ދެތިން ދުވަސް ތެރޭ ނަތީޖާ ލިބޭނެއެވެ. ހުރިހާ ކަމެއް ނިންމާފަ ހޮޓަލަށް ދިޔައިރު ޚަދީޖާ އެދެ މީހުންގެ އިންތިޒާރުގަ ތިއްބެވެ. އޭނަގެ މޫނުމަތިން ނުތަނަވަސް ކަން ފެންނަން ހުއްޓެވެ.

“މަންމަ ކޮންކަމަކާ ހާސްވެފަ ތިހުންނަނީ؟” އިބްރާހިމްފުޅު ފާހަނައަށް ވަންނަމުން އަހާލިއެވެ. “ދެތިން ދުވަހެއްގެ ތެރޭގަ ހުރިހާ ކަމެއް ސާފުވާނެ”

ޚަދީޖާ އާލިއާ އާއި ދިމާލަށް ބަލާލިއެވެ. އޭނަގެ މޫނުމަތިން ހިތާމަވެރިކަމާ ނުތަނަވަސްކަން ފާޅުވެއެވެ.

“ދަރިފުޅާ” ޚަދީޖާ މަޑުމަޑުން ގޮވާލިއެވެ. އާލިއާ ގޮސް ޚަދީޖާ ކައިރީ އިށީންދެލިއެވެ.

“ކީކޭ މާމަ؟”

ޚަދީޖާ ވާހަކަ ދައްކަން މަސައްކަތް ކުރިއެވެ. އެކަމު އޭނަގެ އަޑެއް ބޭރުވާގޮތެއް ނުވިއެވެ. އޭނަގެ ގައިގަ މަޑުމަޑު ތުރުތުރުލުމެއް ހުރިހެން އާލިއާއަށް ހީވިއެވެ.

“މާމާ ކިހިނެއްވީ؟” ހާސްވެފަ އާލިއާ އަހާލިއެވެ.

“ދަރިފުޅާ” ކުރެހިފައިވާ އަޑަކުން ޚަދީޖާ އަނެއްކާވެސް ވާހަކަ ދައްކަން ފެށިއެވެ. “ކޮންމެ ގޮތަކަށް ތި ޓެސްޓެގެ ނަތީޖާ އަޔަސް، މާމަ އަށް މާފްކުރާތި.”

ޚަދީޖާ އެބުނި ޖުމްލަ އާލިއާއަކަށް ނުވިސްނުނެވެ.

“މާމަ ކީއްވެ ތިހެން ތިބުނީ؟ މިކަމުގެ މާމަ މާފަށް އެދެން ޖެހެނީ ކީއްވެ؟”

ޚަދީޖާ ޖަވާބުދޭން އަނގަހުޅުވާލި ވަގުތު އިބްރާހިމްފުޅު ފާޚަނައިން ނިކުތުމުން އަނެއްކާވެސް ހިމޭންވިއެވެ. އިބްރާހިމްފުޅުގެ ގޮތް އިނގޭތީ އާލިއާވެސް އިތުރަކަށް ޚަދީޖާއަށް ސުވާލެއް ނުކުރެއެވެ.

ޕެޓާނިޓީ ޓެސްޓް ނަތީޖާ ތައްޔާރުވެއްޖެ ކަމުގެ މެސެޖް އާލިއާ ގެ ފޯނަށް އޭގެ ދެދުވަސް ފަހުން ލިބުމުން، އިބްރާހިމްފުޅާއި ދެމީހުން ހޮސްޕިޓަލަށް ނަތީޖާ ބަލާދިޔައެވެ. ލެބޯޓްރީއިން ނަތީޖާ ނެގުމާއެކު އިބްރާހިމްފުޅު ބޭނުންވީ އޭނަ އިޚްތިޔާރުކުރާ ޑޮކްޓަރެއް މެދުވެރިކޮށް އެކަރުދާސްކޮޅުގައިވާ އެއްޗެއް އިނގުމެވެ. އޭނަ ބުނާގޮތުން އޭގަ ވާ އެއްޗެއް އޭނަ ގަބޫލް ކުރާނީ ހަމައެކަނި ޑޮކްޓަރެއްގެ އަނގައިން ކަމަށެވެ. އާލިއާ އެކަމާ ދެކޮޅު ނަހަދާ އިބްރާހިމްފުޅު ބޭނުން ގޮތަކަށް އެކަން ކުރަން އެއްބަސްވިއެވެ. އަދި އެހޮސްޕިޓަލްގައި އިން ޖެނެޓިކް ޑޮކްޓަރަށް އެދުވަހުން އެދުވަހަށް ދެއްކޭގޮތަށް އެޕޮއިންޓްމެންޓެއެއް ހެއްދިއެވެ.

ގާތްގަނޑަކަށް 3 ގަޑިއިރެއްހާ ފަހުން އެމީހުންނަށް ޑޮކްޓަރުގެ ކޮޓަރިއަށް ވަދެވުނެވެ. ވެގެން އުޅޭ ގޮތް އާލިއާ ޑޮކްޓަރަށް ކިޔައިދިނުމަށްފަހު ނަތީޖާ ގަނޑުކޮޅު ޑޮކްޓަރަށް ދިނެވެ. ހޭދަވެގެން ދިޔައީ ދެމީހުންވެސް ނޭވާހިފަހައްޓާލަން ޖެހުނު 2 މިނެޓެވެ.

“ޕްރޮބަބިލިޓީ އޮފް ޕެޓާނިޓީ 99.99 ޕަސެންޓް” ނަތީޖާ ކިޔާލާފަ ޑޮކްޓަރު ބުނެލިއެވެ. އާލިއާ ފުންނޭވާއެއް ދޫކޮށްލިއެވެ. އެއީ އޭނަވެސް އުއްމީދުކޮށްގެން ހުރި ނަތީޖާއެވެ. އިބްރާހިމްފުޅުގެ ދަރިއަކަށް ވީމަ އޭނަ އުފާވީކީ ނޫނެވެ. އެކަމު މަންމަގެ ބޮލުގަ އެޅިފަ އޮތް ބަދުނާމުން މަންމަ ސަލާމަތްވީކަން އިނގުނީމަ ހިތްހަމަޖެހުނީއެވެ.

“ކީކޭތަ އޭނަ އެބުނީ؟” އާލިއާ ސިއްސައިގެން ދިޔައީ އިބްރާހިމްފުޅު ހަޅޭއްލަވައިގަތީމެވެ.

ޑޮކްޓަރު އިބްރާހިމްފުޅާ ދިމާލަށް ހައިރާންކަމާއި އެކު ބަލާލިއެވެ. އަދި އޭނައާއި ދިމާލަށް އިނގިލި ދިއްކޮށްލިއެވެ.

“ބައްޕަ ތީ….99 ޕަސެންޓް” ކޮށި ދިވެހިން އޭނަ ބުނެލިބަހުން އިބްރާހީމްފުޅުގެ ދެލޯ ބޮޑުވެ، މޫނުމަތީގެ ކުލަވަރު އޮއްސުނެވެ. އޭނާއަށް ލިބުނީ ބަޔާންކުރަން ދަތި ހައިރާންކަމެކެވެ. އަމިއްލަ ދަރިއެއް ވެއްޖެއްޔާ ދެމަފިރިންގެ ގައިގައި ނެތް ނޫކުލައިގެ ލޮލެއް އާލިއާއަށް ލިބުނީ ކިހިނެއް ހެއްޔެވެ؟

“ޔޫ ލައިންގް….ދިސް ނޮޓް ޓްރޫ!” ކޮށި އިނގެރޭސިން އިބްރާހިމް ޑޮކްޓަރާ ދިމާލަށް ހަޅޭއްލަވައިގަތެވެ. ޑޮކްޓަރ ސިހިފައި އާލިއާ ދިމާލަށް ބަލާލިއެވެ.

“ވައި އިޒް ހީ ސޯ އެންގްރީ؟” ޑޮކްޓަރ އާލިއާ އާއި ސުވާލު ކޮށްލިއެވެ. އާލިއާ ކައިރިއަށް ހިނި އައެވެ. އެކަމު އޭނަ ކޮންޓްރޯލް ކޮށްފަ ޑޮކްޓަރަށް ހުރިހާ އެއްޗެއް ކިޔައިދިނެވެ. އޭނަގެ ހަމުގެ ކުލަޔާއި ލޮލުގެ ކުލަ ތަފާތު ވުމުން އިބްރާހިމްފުޅަށް އާލިއާ އެއީ އޭނަގެ ދަރިއެއް ކަމަށް ޤަބޫލު ނުކުރެވޭ ވާހަކައެވެ.

“ދެޓްސް އަންޑަސްޓޭންޑަބަލް. ބަޓް އިޓްސް ނޮޓް އިމްޕޮސިބަލް. ޖެނެޓިކްސް ވޯކްސް އިން މިސްޓީރިއަސް ވޭސް. ޔޫ މޭ ހޭވް ގޮޓޮން ދެޓް ފީޗާސް ފްރޮމް ޔޯ ގްރޭޓް ގްރޭޓް ގްރޭޓް ޕޭރެންޓްސް. އިޓް މައިޓް ހޭވް ސްކިޕްޑް ޖެނެރޭޝަންސް. ޕްލީޒް އެކްސްޕްލެއިން ދިސް ޓު ހިމް. (ތިކަން އަންޑަސްޓޭންޑްވޭ. އެކަމު އެއީ ނުވާނެ ކަމެއް ނޫން. ވާރުތަވުމުގެ ނިޒާމު ނުވަތަ ޖެނެޓިކްސް މަސައްކަތް ކުރަނީ ވަރަށް ހައިރާންކުރުވަނިވި ގޮތްތަކަކަށް. ތިޔަ ފެންނަ ސިފަތަކަކީ މާކާފަ ނުވަތަ މާމަގެ ފަރާތުން ވާރުތަވެފައިވާ ސިފަތަކަކަށް ވެދާނެއެވެ. ބައެއް ފަހަރު ވަކި ޖީލުތަކަކަށް އެ ސިފަތައް ނުފެނި، އޭގެ ފަހުގެ ޖީލަކަށް ފެންމަތިވުމަކީ އާންމު ކަމެކެވެ. އެހެންކަމުން، މިކަން ބައްޕައަށް އޮޅުންފިލުވައިދީ.)

ޑޮކަޓަރު ދެއްކި ހުރިހާ ވާހަކައެއް އާލިއާ އިބްރާހިމްފުޅަށް ކިޔައިދިނެވެ. ނަމަވެސް އޭނާ ގަބޫލުކުރާކަށް ބޭނުމެއް ނުވިއެވެ. ރުޅިއައިސްގެން އެތަނުން ނިކުމެގެން ދިޔައީއެވެ. ޑޮކަޓަރު ކައިރިން މާފަށް އެދެމުން އާލިއާވެސް އިބްރާހިމްފުޅު ފަހަތުން ނިކުތެވެ. ހޮޓަލަށް ދިޔަ މަގުމަތީ ދެމީހުންކުރެ އެކަކުވެސް ވާހަކަ އެއް ނުދައްކައެވެ. އާލިއާ އޭނަ މަންމަ އަށް މެސެޖްކޮށް ހުރިހާ ވާހަކަ އެއް ކިޔައިދިނެވެ. އޭނަގެ މަންމަގެ ހިތަށް ލުޔެއް ލިބޭތޯއެވެ.

ހޮޓެލްގެ ރޫމަށް ވަދެ އިބްރާހިމްފުޅު ދިޔަގޮތަށްގޮސް ކޮޓަރި ބެލްކަންޏަށް ނިކުމެ ސިނގެރޭޓެއް ރޯކޮށްލިއެވެ. އާލިއާގޮސް އޭނަ މާމަ ކައިރީ އިށީންދެލިއެވެ.

“ކޮންގޮތަކަށް ނިމުނީ ދަރިފުޅާ؟” ޚަދީޖާ ސުވާލުކޮށްލިއެވެ.

ހޮސްޕިޓަލްގަ ދިމާވި ހުރިހާ ކަމެއް އާލިއާ ކިޔައިދިނެވެ. ޚަދީޖާ ފެންކަޅިވެ މަޑުމަޑުން ރޯން ފެށިއެވެ. އާލިއާ ޚަދީޖާ ގައިގާ ބައްދާލާފައި އޭނަ މަސަލަސް ކުރެވޭތޯ އުޅުނެވެ.

“އޭނަ ދައްކާ ވާހަކަ މަންމަ ޤަބޫލު ނުކުރާތި” ކޮޓަރި ތެރެއަށް ވަންނަމުން އިބްރާހީމްފުޅު ބުނެލިއެވެ. “މަށަށް ޔަގީން އޭނަ ހޮސްޕިޓަލްއަށް ރިޝްވަތު ދީގެން ތިކަން ކޮށްފަ ތިއޮތީ.”

އާލިއާއަށް ބުނާނެ އެއްޗެއް ނޭންގުނެވެ. އިބްރާހިމްފުޅު އެބުނި ޖުމްލައިގެ ދިފާއިގާ އޭނާ ދައްކާނެ ހެއްކެއްވެސް ނޭންގުނެވެ. އާލިއާ ޖަވާބު ނުދީ ހުރުމުން އިބްރާހިމް ފުޅަށްވިސްނުނީ އޭނަ އެދެއްކި ވާހަކައަކީ ހަޤީޤަތް ކަމަށެވެ.

“ބަލާބަލަ ހުންނަ ނުލަފާކަން. އަމައެކޭ މީނައެކޭ ކޮބާ ތަފާތަކީ؟ މަކަރާ ހީލަތް ހެދުމުގެ އެއްވަނަ. ހަރާން ބަ…..”

“ހުއްޓާލާ!”

މަންޒަރު ބަލަން ހުރި ޚަދީޖާ ހަޅޭއްލަވައިގަތެވެ. އިބްރާހިމްފުޅަށް ހުއްޓުން އެރިއެވެ. އާލިއާވެސް ހައިރާންވެ ހުރެ ޚަދީޖާއާއި ދިމާލަށް ބަލަން ހުއްޓެވެ. ޚަދީޖާ ފުން ނޭވާއެއް ދޫކޮށްލުމަށްފަހު، އެތައް އަހަރަކު ހިތު އަޑީގައި ފޮރުވާފައި އޮތް ސިއްރުގެ ދޮރު ހުޅުވާލިއެވެ. ކަރުނައިން ފުރިގެންވާ ދެލޮލާއެކު ޚަދީޖާ ބުންޏެވެ.

“އިބްރާހިމްފުޅާ، މިއަދު ހަޤީޤަތް އަޑުއަހާ. ތި ކުރާ ޝައްކަކީ ޒުލޭޚާ ފަކީރަށާއި އާލިއާއަށް ހައްގު އެއްޗެއް ނޫން. ކުށްވެރިއަކީ އަހަރެން. ކަލޭގެ ބައްޕައާ އިންއިރު، އަހަރެން އިނީ އަހަރެންގެ ކުރީގެ ލޯބިވެރިޔާގެ ދަރިއަކަށް ބަލިވެ. އެ ދަރިއަކީތީ. ކަލޭގެ އަސްލު ބައްޕައަކީ ބޭރު ގައުމެއްގެ، ނޫކުލައިގެ ދެލޯ ލިބިފައިވި ދޮން ނަސްލުގެ މީހެއް. ކަލޭގެ ލޮލުގައި އެ ކުލަ ނެތް ނަމަވެސް، އެ ލެޔާއި އެ ޖީންސް ކަލޭގެ ހަށިގަނޑުގައިވޭ. ކަލޭ ދުނިޔެއަށް އައިރު އަހަރެން ހުރީ ބިރުން އެ ފިރިހެންމީހާގެ ސިފަތަށް ކަލޭގައިގަ ހުރެދާނެތީ. ނަމަވެސް ކަންދިމާކުރި ގޮތުން ކަލޭ ވައްތަރީ އަހަންނާ. އެހެންވެ އާދަނަށް އެއްވެސް ވަރަކަށް ޝައްކެއް ނުވޭ. އެދުވަހު އަހަރެން ﷲ އަށް ހަމްދުކުރިން ލަދެއްގަ ނުބެދި އަހަރެން ސަލާމަތްވިކަމަށްޓަކައި. އެކަމު އަހަރެން ހިއެއް ނުކުރަން އަހަރެން ކުރި ކުށުގެ އަދަބު އަހަރެންގެ މާމަ ދަރިއަށް ލިބޭނެކަމަކަށް. މާތް ﷲ ގެ ކުޅަދުންވަންތަކަން ދެކިބަލަ. އެ ނަސްލުގެ އަސަރު ފާޅުވީ ކަލޭގެ ދަރިފުޅުގައިން. އާލިއާ އަކީ ހަމަ ކަލޭގެ އަމިއްލަ ލޭ. އަހަރެން އަބަދުވެސް އެހެން ބުނަމުން އައީ. އަބަދު އޭނަ ދިމާލަށް ހަރާން ދަރިއެކޭ ތި ގޮވަނީ، އަސްލު ހަރާން ދަރިއަކީ ކަލޭ”

ޚަދީޖާގެ ވާހަކަތައް އަޑުއަހާފައި އިބްރާހީމްފުޅު ހުރިތަނަށް ގަނޑުވިއެވެ. މުޅި އުމުރު ދުވަހު އަނބިމީހާއާއި ދަރިފުޅަށް ކުރި އަނިޔާއާއި ބަދުބަސްތަކުގެ ހިތިކަން އަމިއްލަ ނަފްސަށް އިހުސާސް ކުރެވި، ލަދުން އިސްދަށަށް ޖަހަން މަޖުބޫރުވިއެވެ. ނަސްލުގެ ހަގީގަތް ފޮރުވިފައި އޮވެ، ފާޅުވީ ދުވަހު އޭނާއަށް ލިބުނީ ދުވަހަކު ފިލައިގެން ނުދާނެ ފަދަ އިބުރަތެކެވެ.

ޚަދީޖާ އާލިއާ ގައިގާ އަތްޖައްސާލަން އުޅުމުން އާލިއާ ދުރަށް ޖެހިލިއެވެ.

“ފަންސަވީސް އަހަރު،” އާލިއާ މަޑުމަޑުން ބުނެލިއެވެ. “އަހަރެންގެ މަންމަ އާއި އަހަންނަށް ފަންސަވީސް އަހަރު ހިތްދަތިކަން ލިބެމުން އައި އިރު ތިހަޤީޤަތް ކޮބާ؟ މާމަ ކުރި މުޑުދާރު އަމަލުގެ އަދަބު އަހަރުމެން ދެމައިނަށް ލިބޭތަން ބަލަން ހުންނަން މާމަ އަށް ކެއްވީ ކިހިނެއް؟”

ޚަދީޖާ ރޯން ފެށިއެވެ. އޭނާ ބުނި ގޮތުގައި މުޖުތަމައުގެ ތެރޭގައި އޭނާއަކީ އިއްފަތްތެރި، ގަދަރުވެރި އަންހެނެއްގެ ގޮތުގައި އޮތް ނަން ކިލަނބުވެ، އުމުރުން ދުވަސްވީ ދުވަހު މުޅި ރަށަށް ފަލީހަތްވެދާނެ ކަމުގެ ބިރު އޮތުމުންނާއި، އިބްރާހީމްފުޅު އޭނާގެ މުޅި އުމުރު ހޭދަކުރީ އޭނާގެ ބައްޕައަކީ އާލިއާގެ ކާފަ އާދަނު ކަމަށް ގަބޫލުކޮށްގެންކަމަށާއި އެހެންކަމުން، އަމިއްލަ ނަސްލާއި އަސްލު ބައްޕައަކީ ކާކުކަން އެނގިއްޖެނަމަ އިބްރާހީމްފުޅަށް ލިބޭނެ ޝޮކާއި، މައިވަންތަކަމުގެ ގުޅުމަށް އަތުވެދާނެ ބޮޑު ބަދަލަކަށް ޚަދީޖާ ޖެހިލުންވުމެވެ.

“އަހަރެންގެ ޒުވާން ދުވަސްވަރު ކުރެވުނު ކުށުގެ ވާހަކަ އަމިއްލަ ދަރިފުޅި ކުރިމަތީގައި އެއްބަސްވާން ކެރޭވަރުގެ ހިތްވަރެއް އަހަރެން ކިބައިގަ ނެތީ” ޚަދީޖާ ގިސްލަމުން ވާހަކަ ދައްކަމުން ގެންދިއައެވެ. ” އިބްރާހީމްފުޅު ރުޅިއައިސްގެން އެއްޗެހި ކިޔަސް، އަހަރެންގެ  އެދުމަށް އާލިއާއަށް ޚަރަދުކޮށް ބަލަމުން ދާތީ، ދުވަސްވީ ވަރަކަށް ކަންކަން ހަމައަކަށް އެޅިދާނެ ކަމަށް އަހަންނަށް ހީކުރެވުނީ.”

އިބްރާހިމްފުޅަށް ބުނާނެ އެއްޗެއް ނޭންގުނެވެ. އޭނާ އާލިއާ އާއި ދިމާލަށް ބަލާލެވުނީ މުޅިން އެހެން ގޮތަކަށެވެ. ފަންސަވީސް އަހަރު ވަންދެން ދަރިއެއް ނޫންކަމަށް ހިތުލައިގެން ހުރި ކުއްޖާ އަކީ އަމިއްލަ ދަރިކަން އިނގުމުން އޭނާއާއި ދޭތެރޭ އަމަލު ކުރެވުނު ގޮތް ހިތަށް އަރާފަ ރޮވުނެވެ.

“އަހަރެން އެދެމައިންނަށް އެހާ އިހާނެތިކޮށް ހިތިއިރު މަންމަ ހުރީ ހަމައެއްވެސް އެއްޗެއް ނުބުނެ. އޭރު މި ޓެސްޓް ހަދަން އަހަންނަށް ހުއްދަ ދިން ނަމަ މިހާ ހިސާބަކަށް ނުދިޔައީހެއްނު.”

“ދަރިފުޅާ” އިބްރާހީމްފުޅު އާލިއާ އަށް ގޮވާލިއެވެ. އާލިއާ ލޯ މަރާލިއެވެ. ފަންސަވިސް އަހަރު ވަންދެން އޭނަގެ ބައްޕަގެ އަނގައިން އެލަފްޒު އަޑުއަހަން ބޭނުންވިއެވެ. ނަމަވެސް މިއަދު އެލަފްޒުގެ އެއްވެސް މާނައެއް ނެތެވެ.

“އަހަންނަށް ދަރިފުޅާއޭ ކިޔާފަ ނުގޮވާ. މިހުރިހާ ދުވަހު ދެކުނު ގޮތަށް އަހަންނާ ދޭތެރޭ އަދިވެސް ދެކޭ. މިކަމުގަ ކުއްވެރިޔަކީ މާމަ އެކަންޏެއް ނޫން. ބޭބެ ވެސް އަހަރެންގެ މަންމަ އަށް އިތުބާރު ކުރިނަމަ މިހިސާބަކަށް މިކަން ނުދާނެ. އަހަރެންގެ ސިފަ ކޮންމެ ގޮތަކަށް ހުއްޓަކަސް ބޭބެ އެންމެ ފުރަތަމަވެސް ނިންމީ މަންމަ އެހެން މީހަކާ އެކީ ނަހަމަ ގުޅުމެއް ހިންގީކަމަށް. އެހާ ދުވަހު ކައިވެނި ކޮށްގެން އެއްކޮށް އުޅުނު އަނބިމީހާއަށް އިތުބާރު ނުކުރެވުން އެއީ ބޭބެގެ މައްސަލަ” ރުންކުރުކޮށް އާލިއާ ބުނެލިއެވެ.

އިބްރާހިމްފުޅު އެއްވެސް އެއްޗެއް ނުބުނެ އިނެވެ. އޭނަކައިރީ ޚަދީޖާ ރޯން އިނެވެ. އެދެމީހުންނާ ދިމާލަށް ކުޑައިރުކޮޅެއް ވަންދެން ބަލަން ހުރުމަށްފަހު އާލިއާ ފޯން ނަގާ އެއާލައިން އަށް ގުޅިއެވެ. އަދި އެދުވަހުން ދުވަހަށް ރާއްޖޭ ދާގޮތަށް އޭނަގެ ޓިކެޓް ބަދަލުކޮށްލިއެވެ.

“އަހަރެން މިދަނީ މާލެ ދާން. ތިދެމީހުން އަންނަން އޮތް ދުވަހަށް އާދޭ. އަހަރެން މިތަނަށް އައި ބޭނުން މި ނިމުނީ. ހޯދަން ބޭނުންވި ކަންތައް އިނގުނީ. ދެން މިތާ މަޑުކުރާކަށް އަހަރެން ބޭނުމެއް ނޫން.” އާލިއާ އިބްރާހިމްފުޅާ ދިމާލަށް ބަލާލިއެވެ.

“އަހަންނަށް ވަލީ ދޭން ކުރި ޝަރުތު އަހަރެން މި ފުރިހަމަ ކުރީ. އެކަމު މިހާރު އަހަރެންތި ވަލީ އެއް ބޭނުމެއް ނޫން. ރަށު އެންމެއް ކައިރީ ކުޑައިރުއްސުރެ ކިޔަމުން އައީ އަހަންނަކީ ބޭބެގެ ދަރިއެއް ނޫނޭ. އެހެންވީމަ އަހަރެން ހާކިމްވަލީ ހޯދިޔަސް މައްސަލަ އެއް ނުޖެހޭނެ. އަހަރެން ކައިވެނިކޮށްގެން ދިރިއުޅުން ބޭރަށް ބަދަލުކުރަން ނިންމައިގެން ހުރީ. އެކަން މަންމަ އަށް އިނގޭނެ. އަހަރެން ދަމުންދާނީ މަންމަ ވެސް ގޮވައިގެން. އެކަމަށް ބޭބެ އެއްބަސް ނުވަންޏާ މަންމަ ނިންމައިގެން ހުރީ ބޭބެ ކައިރިން ވަރިވެގެންވެސް އަހަންނާއެކީ ދާގޮތަށް” ފަތިވަރަކަށް ހުރިހާ އެއްޗެއް ކިޔާލާފައި އާލިއާ އޭނަގެ ދަބަހަށް ހުރިހާ އެއްޗެއް އަޅާ ޕެކޮށްފަ، ޕެޓާނެޓީ ޓެސްޓްގެ ފޮޓޯ އެއް ނަގާފަ އެއާޕޯޓަށް ދާން ނިކުތެވެ. އިބްރާހިމްފުޅާ ޚަދީޖާ އޭނައަށް ގޮވާއަޑަށް ބީރު ކަންފަތެއް ދީގެންނެވެ.

އެ ދުވަހު އާލިއާ އެނބުރި ރަށަށް ދިޔައެވެ.

ގިނަ ދުވަހަކަށް ފަހު، އާލިއާއަށް ހީވީ ހަމަ ނޭވާލެވުނުހެންނެވެ. ޙަޤީޤަތް ފާޅުވެއްޖެއެވެ. ނަމަވެސް، ޙަޤީޤަތް ފާޅުވުމަކީ އޭނާ އެހުރިހާ އަހަރުތަކެއްގެ ތެރޭ ތަޙައްމަލުކުރި ހިތާމައާއި އޭނާގެ މަންމަ ތަޙައްމަލުކުރި އަނިޔާ ފުހެލާނެ ކަމެއް ނޫނެވެ. އެދުވަހު އޭނަ މަންމައަށް ހުރިހާ އެއްޗެއް ކިޔައިދިނެވެ. ދެމައިން އެކަކު އަނެކަކު ގައިގަ ބައްދާގަނެގެން ތިބެ ރުޔެވެ.

ތިން ދުވަސް ފަހުން، އިބްރާހިމްފުޅާ ޚަދީޖާ ރަށަށް އައެވެ.

ދެމީހުންގެ މޫނުމަތިން ފެންނަނީ ހިތާމައާއި އުދާސްކަމެވެ.

އިބްރާހީމުފުޅު ގިސްލަމުން ޒުލޭޚާ ފައިބުޑަށް ވެއްޓި ރޮއިގަތެވެ.  އޭނާގެ ޝައްކާއި ރުޅިން އޭނާ ޒުލޭޚާއަށާއި އާލިއާ އާއި ދެމެދު ހުރި ގުޅުން ހަލާކުކޮށްލި ކަމަށް އިޤުރާރުވިއެވެ. އާލިއާ އަބަދުމެ އޭނާގެ ދަރިއެއް ކަމާއި، ކުށެއް ނެތް ދަރިއަކަށް އޭނާ އެތަށް އަހަރެއް ވަންދެން ދިން ވޭނުގެ ބުރަ އޭނާއަށް އަދި އުފުލަން ޖެހޭނެ ކަން އޭނާއަށް އެނގުނެވެ.

ޒުލޭޚާ ދެމީހުންނަށް މާފުކުރިއެވެ. ނަމަވެސް އެއީ އެއް ޝަރުޠެއްގެ މަތިންނެވެ.

އާލިއާ އާއިއެކު ރާއްޖޭން ބޭރަށް ދިރިއުޅުން ބަދަލުކުރުމަށް އިބްރާހީމުފުޅު ހުއްދަ ދިނުމެވެ.

އިބްރާހީމުފުޅު އެ ޝަރުޠަށް އެއްބަސްވިއެވެ.

ޒުލޭޚާ އެދެމީހުންނަށް މާފް ކުރިނަމަވެސް، އާލިއާއަށް އެމީހުންނަށް މާފުކުރުން އެހާ ފަސޭހައެއް ނުވިއެވެ.

އިބްރާހިމްފުޅުގެ މޫނުމަތީގައި ހުރި ތައުބާވެރިކަން އޭނާއަށް ފެނުނެވެ. ނަމަވެސް، ގިނަ އަހަރު ތެރޭ ހިތުގައި ޖެހުނު ޒަޚަމްތައް ތިން ދުވަހުން ރަނގަޅެއް ނުވާނެއެވެ.

ޚާއްޞަކޮށް މާމައަށް މާފުކުރުން އާލިއާއަށް އަދިވެސް ދަތިވިއެވެ.

ބައްޕަ އުޅުނީ ޝައްކެއްގެ މަތީގައެވެ. ނަމަވެސް މާމައަށް ހުރިހާ ކަމެއް ފެނުނެވެ. އާލިއާ އާއި އޭނާގެ މަންމައަށް ލިބުނު އަނިޔާ މާމައަށް ފެނުނެވެ. ޙަޤީޤަތް އެނގި ހުރެމެ އޭނާ ހަނުހުރިއެވެ.

އެ ހަނުހުރުން އަލިއާއަށް އިބްރާހިމްފުޅުގެ ބަސްތަކާއި އެއްވަރަށް ތަދުވިއެވެ.

“މާމައަށް މާފުކުރެވޭނެ ދުވަހެއް އަންނާނެ. އެކަމަކު އަހަރެންނަށް ވަގުތު ބޭނުން،” އާލިއާ ބުނެލިއެވެ.

ޚަދީޖާ އިސްދަށަށް ޖަހާލިއެވެ. އެ ފަހަރު އޭނާ އެއްވެސް އުޒުރެއް ނުދައްކައެވެ.

ބައެއް މާފުތަކަށް ވަގުތު ބޭނުންވެއެވެ. ހިތް ކުދިކުދިކޮށްލި މީހަކަށް މާފުކުރުން ލަސްވުމަކީ ނުބައި ކަމެއް ނޫނެވެ. ބައެއް ޒަޚަމްތަކަށް ރަނގަޅުވާން ވަގުތު ދޭން ޖެހެއެވެ.

އެއަށް ފަހު ގިނަ ދުވަހެއް ނުވެ އާލިއާ ކައިވެނި ކުރިއެވެ. ހިތާ ދެކޮޅަށާ އަދި މަންމަގެ އެދުމަށް އިބްރާހިމްފުޅު ވަލީ ދޭގޮތަށް އޭނާ އެއްބަސްވިއެވެ. އެއަށްފަހު ދެދުވަހެއްގެ ތެރޭގަ އޭނާއާއި އޭނަ ފިރިމީހާ ސަމީރު އަދި މަންމަ، ރާއްޖެއިން ބޭރަށް ދިރިއުޅުން ބަދަލުކުރުމުގެ މަސައްކަތް ފެށިއެވެ.

ދަތުރުމަތީ އުޑުން ރާއްޖެގެ ރަށްތައް ކުޑަވެގެން ދިޔައިރު އާލިއާ ބޭރަށް ބަލާލިއެވެ. އޭނާ މި ދަނީ އޭނާގެ އާއިލާއަށް ނަފުރަތުކޮށްގެން ނޫނެވެ. އޭނާ ދަނީ އާ ފެށުމެއް ފަށައި، ހިތުގެ ޒަޚަމްތައް ރަނގަޅުކުރަންށެވެ.

އިބްރާހިމްފުޅާ ޚަދީޖާ އޭނާގެ ދިރިއުޅުމުގެ ބައެއްކަމުގައި ދެމިހުރިއެވެ. ނަމަވެސް، އެ ގުޅުން އަލުން ބިނާކުރުމަށް ވަގުތު ބޭނުންވިއެވެ. އެއް މާފުކޮޅަކުން އަހަރުތަކެއްގެ ވޭން ނުފުހެވެއެވެ. އެއާޕޯޓްގައި ހޭދަވި އެންމެ ފަހު ވަގުތު ކޮޅާ ދޭތެރޭ އާލިއާ ވިސްނާލިއެވެ. އެދުވަހު އިބްރާހިމްފުޅު ވަރަށް ރުޔެވެ. އާލިއާއަކީ އޭނަގެ ހުރި ހަމައެކަނި އަންހެން ދަރިކަމާ އަދި ދުވަހަކުވެސް އޭނަގެ އަނގައިން ބައްޕާ ބުނެލާ އަޑު ނީވޭކަމެވެ.

“ދަރިފުޅާ، ބައްޕަ އާ ދުރަށް ދިއުމުގެ ކުރިން އެއްފަހަރުވެސް ބައްޕާ އޭ ކިޔާފަ ގޮވާލަބަލަ” ރޮމުން އިބްރާހިމްފުޅު ބުންޏެވެ.

“އެހައްގު ބޭބެ ވަނީ ވަރަށް ކުޑައިރު އަހަރެންގެ އަތުން ނިގުޅައިގެންފަ. އެހައްގުދޭން އަދި ދުވަސްނުގާނެ” އާލިއާ ހަމަޖެހިލާފައި ބުންޏެވެ.

މި ހާދިސާއިން އެ އާއިލާއަށް އެނގުނު އެންމެ ބޮޑު ދަރުސަކީ، މީހުން ކިޔާނެ ވާހަކައާއި މުޖުތަމަޢުގައި އަބުރު ދެމެހެއްޓުމަށް ޙަޤީޤަތް ފޮރުވައި ދޮގު ހެދުމަކީ އާއިލާއަކަށް ރައްކާތެރިކަމެއް ލިބޭނެ ކަމެއް ނޫންކަމަވެ.

ދޮގަކުން ބޭރުފުށުން އާއިލާއެއްގެ އަބުރު ރައްކާވެދާނެއެވެ. ނަމަވެސް، އެ ދޮގު ގެއެއްގެ ތެރޭގައި ބޮޑުވަމުން ގޮސް ޝައްކާއި، ރުޅިއާއި، އަނިޔާއަށް ބަދަލުވެދާނެއެވެ. އަދި ޙަޤީޤަތް އެނގޭ މީހުން، އާއިލާގެ އަބުރު ރައްކާކުރުމަށޭ ކިޔާފަ ހަނުހުރުމުން، އެ ހަނުހުރުންވެސް އަނިޔާ ދެމިގެންދިއުމަށް ހުއްދަދޭ ކަމަކަށް ވެދާނެއެވެ.

އާއިލާއެއް ރައްކާކުރެވޭނީ ދޮގާއި ހަނުހުރުމުން ނޫނެވެ.

އާއިލާއެއް ރައްކާކުރެވޭނީ ޙަޤީޤަތާއި، އިންޞާފާއި، އެކަކު އަނެކަކުގެ ދިފާއުގައި ތެދުވެ ހުރުމުންނެވެ.