އާއެކޭ ލޯބިވޭ… ފަސްދޮޅަސްހަވަނަބައި (ލިޔެވި އެ ނިމުނީ ހަޤީޤަތެއް)

“ނަޒާން: ކުރަން ނޭނގޭ ހަމަ އެއްކަމެއްވެސް ނެތް. ހަމައެކަނި ބަލިމީހުންނަށް ޚިދުމަތްކުރާ ނަރުހެއް ނޫން، މޮޅު ލިޔުންތެރިއެއްވެސްމެ. އަދި ކޮބާ، އެހާ ކުޅަދާނަ ކުރެހުންތެރިއެއް، ފެހުންތެރިއެއް. އެހެރަ މޭކަޕްކުރުމެއްދޯ؟ ހާދަ މީރު ކާއެއްޗެހި ކައްކައޭ. ޅެންވެރިއެއް ނޫން، ޝާޢިރެއް! އޯ… ނެށުންތެރިއެއް!” އެ މޫނުމަތިން އުފާވެފައިވާވަރު ހާމަވެގެންދެއެވެ. އަޝްބާ އެ ފޮތަކަށްޓަކައި ކުރި ބުރަ މަސައްކަތް އޭނާއަށް ފެނިފައެވެ. ނުނިދާވެސް ލިޔުމުގައި އުޅޭނެއެވެ. ކާނީވެސް އެދުވަހަކު ލިޔަން އިންނަ ބައެއް ނިމުމުންނެވެ.

“އަޝްބާ: ދެން… ދެން ޒާން…” އަޝްބާއަކަށް ކެތެއް ނުވިއެވެ. ލަދުންގޮސް އޭނާ ރަތް ޓޮމާޓޯއަކަށް ވެއްޖެއެވެ.

ކޭކު ފެޅީ ދެމަފިރިން އެކުގައެވެ. ތަނުގެ ތަސްވީރުތައް އަޝްބާ ފޯނުގައި ރައްކާކުރިއެވެ. “ޓިކްޓޮކް”އަށް ވީޑިއޯ ލިއެވެ. “އިންސްޓަގްރާމް”ގައި ޖެހިއެވެ. “ފޭސްބުކް”ގައި “ޕޯސްޓް” ކުރިއެވެ. ލިބޭ އުފާތަކާއި ހިތާމަތައް ހިއްސާކުރުމަކީ މިއަދު އޭނާއަށް ލިބޭ އުފަލެކެވެ. މި މަންޒަރުތައް ފެނި ހަސަދަލާނެ މީހަކު ހުރިބާއެވެ؟ ނަފުރަތުގެ ލޯއަޅާނެ މީހުން ތިބެދާނެބާއެވެ؟ މި އުފަލުގައި ކުނި ނުޖެހި ދާނެބާއެވެ؟

**********************************************************************

އިރުއޮއްސެމުންދިޔަ ވަގުތެވެ. އަޝްބާ އިނީ “އިސްތަންބޫލް”ގެ ބޮސްފޯރަސް ކަނޑުއޮޅިން ދަތުރުކުރަމުންދިޔަ ފެރީގެ މަތީބައިގައެވެ. އޭނާއާއި ކުޑަތަންކޮޅެއް ދުރުގައި ނަޒާން ހުރީ ފޯނެއްގައެވެ.

މަޑުމަޑުން ޖެހެމުންދިޔަ ފިނިރޯޅިއާއެކު، އުޑުމަތި ވަނީ ރަންރަތްކުލައާއި އޮރެންޖު ކުލައިން ފަވައިލެވިފައެވެ. ދުރުން ފެންނަންހުރި އުސް މުންނާރުތަކުގެ ފަހަތުން އިރު އޮއްސެމުންދިޔައިރު، އެއީ ސުލްތާނު އަހުމަދު މިސްކިތެވެ. މުޅި އެ ސަހަރު ވަނީ އޮރެންޖުގެސާލެއް ފަދައިން ފޮރުވާލެވިފައެވެ. ކަނޑުގެ ވަޔާއި އޮޔާއެކު ދޫނިތައް ފެރީގެ ވަށައިގެން އުދުހެމުންދިޔައެވެ. ތަނުން ދުވަމުންދިޔަ ތާޒާ ތުރުކީ ކޮފީގެ ވަހުން ދިރުން ގެނެސްދިން ކަހަލައެވެ. “ލުގުމް” ގެ ތާޒާ ފިނި ފޮނި މީރު ވަސް ވައިގެ ތެރެއަށް ބޭރުވަމުންދިޔައެވެ.

ޖެހިގެން އައި ދުވަހުގެ ހެނދުނެވެ. ނަޒާނުމެންނަށް ހޭލެވުނީ “ކަޕަޑޯކިއާ”ގެ ހިތްގައިމު ފަރުބަދަތަކުގެމެދަށެވެ. ހެނދުނުގެ ފަތިސްއަލީގައި، ރީނދޫކުލައާއި ރަތްކުލައާއި ރިހިވިދުމުގެ އެތައް ސަތޭކަ ހޮޓް-އެއާ ބެލޫންތަކެއް އުޑުމައްޗަށް އަރައިގެންދިޔައީ ކުއްލިއަކަށެވެ. ހީވީ ބޮޑު އީދެއްގެ ފެށުންހެންނެވެ.

އެ ގަދީމީ ހިލަ ގުހާތަށް ހެއްޔެވެ؟ އެ ބިމުން އުފެދިފައިވާ ނަލަ ފަރުބަދަތަށް ހެއްޔެވެ؟ މައްޗަށް އެޅިފައިވާ މަޑު އަލީގެ ތެރެއަށް އަޝްބާ ބަލާލިއެވެ. އޭނާއަށް ޚަމްދުކޮށްލެވުނެވެ. ކަޮންފަދަ އިޚްސާސެއް ހެއްޔެވެ؟ ހާދަހާވައި ފުރިހަމައެވެ. ވަގުތު ހުއްޓިފައިވާ ފަދަ އަމާންކަމެކެވެ.

މަގުމަތީގެ ކުޑަ ކެފޭއެއްގެ ދަށުގައި ނަޒާން މަޑުކޮށްލިއެވެ. ހެނދުނު ހިތްގައިމު ކަމާއެކު އިށީނދެލައިގެން، ސައިފޮދެއްގެ ރަހަ ބަލާލާށެވެ. ކުޑަ ބިއްލޫރި ތައްޓަކަށް ހޫނު ތުރުކީ ސައިފޮދެއް އަޅާފައި ދިއްކޮއްލުމާއެކު، ޒާން ހިފިއެވެ. ބޯލުމުގެ ބަދަލުގައި އެ ދިއްކޮށްލީ ކައިރީ ހުރި އަނބިމީހާއަށެވެ. އަޝްގެ ހިތަށް ލިބުނު އެހަމަޖެހުން ބަޔާންކުރަންވެސް ދަތިވިއެވެ. މިއީ އޭނާ ދެކުނު ފަދަ ޖަޒުބާތުތައް ގިނަ ލޯތްބެކެވެ. އަޅާލުމާއި އޯގާތެރިކަން އޭގެ ނިހާޔީ ލޯތްބެކެވެ.

“ނަޒާން: މީރު ދޯ؟ ” މޫނަށް ވައްތަރެއް ޖައްސާލި އަޝްބާއަށް ނަޒާނު ދޯ އެއްލިއެވެ.

އަޝްބާ ބޯ އަނބުރާލިއެވެ. ” އަޝްބާ: ތުރުކީއަކީ ސައިގެ ތަނެއް ނޫން، ސަޔަކީ ބެންކޮކް.”

” ނަޒާން: ނުސީދާކޮށް ތިބުނީ ބެންކޮކަށް ދަމާހޭތަ.” ނަޒާން އެއްލޯ މަރާލަލިއެވެ.

” އަޝްބާ: އާ ދާހިތްވަނީއޭ ދޯ ލޯބިވެރިންގެ އެ މަޤުބޫލު ޖަންކު ސިލޯނަށް.” ދެރަނުވާން ވެގެން އަޝްބާވެސް ދެ ލޯ އަޅާލިއެވެ.

“ކަޕަޑޯކިއާ”ގެ ހިތްގައިމު މަންޒަރުތަކަށް ގެއްލިފައި ދެމަފިރިންނަށް ތިބެވުނީ ކިހާ އިރަކު ކަމެއްވެސް ނޭނގެއެވެ. ރީތިކަމުގެ ވާހަކަ ނުދައްކަމާހެވެ. އެއީ މާތް ﷲ ގެ ކުޅަދުންވަންތަކަމުގެ ހެކިތަކެވެ. ދެން އަޝްމެން ދިޔައީ މަޝްހޫރުވެފައިވާ ޕަމުއްކަލޭ އަށެވެ. “ޝުވަރުގޭގެ ފެންކުޅީގެ” ނަމުގައި މީހުން ފާހަގަކުރާ މިތަނަކީ ތުރުކީގެ އެއް ނަލަކަމެވެ. ދުރުން ފެންނައިރު މުޅި ސަރަހައްދު ދޯ އެވެ. “ވާވާ” ސިފަކޮށްދޭނީވެސް ކިހިނެއް ހެއްޔެވެ؟

ހުދުކުލައިގެ ސްނޯއިން ފޮރުވިފައިވާ ފަރުބަދައެއް ދުށިން ހެއްޔެވެ؟ ލޮލަށް ފެނުނީ އެފަދައިންނެވެ. އެކަމަކު އެއީ ކެލްސިއަމްއިން އުފެދިފައިވާ ހުދު ފަރުބަދަތަކެކެވެ. ގުދުރަތުގެ ލާމަސީލު މިސާލެކެވެ.

ބޫޓު ބާލައިގެން، އެ ހުދު އުސްފަސްގަނޑުތަކުގެ މަތީގައި އަޝްބާ ނަޒާންގެ އަތުގައި ހިފާލައިގެން ހުރެ ހިނގަމުންދިޔައެވެ.

މަޑު ނޫކުލައިގެ ހޫނު ފެންތިކިތައް ފައިތިލައިގައި ބީހެމުން ދިޔައީ ހީލިކަރުވާލާފައެވެ. އެއިން ކޮންމެ ފަހަރަކު އެ ލިބޭ އަރާމަކީ އަޝް ދުވަހަކުވެސް ތަޖުރިބާކޮށްފައިވާ ކަމެއް ނޫނެވެ. އިރުގެ އަލި އެ ފެންގަނޑުތަކަށް އެޅުމުންދިޔަ ޖާދުވީ ގޮތް ހެއްޔެވެ؟ އަލިކަން ފެނާއެކު ބަބުޅަމުންދިޔަ މަންޒަރު ބުނެދޭންވެސް ދައްޗެކެވެ. އޭނާގެ ހިތް އުފަލުން ދިޔައީ ހަމަ ފުރިގެންނެވެ. ފުރިބަނޑުންވެެގެން ޝުއޫރުތައް އޮހޮރެމުން ދިޔަފަދައެވެ.

ހަފްތާ ބަންދެވެ. އާދިއްތައެވެ. މިއަދުގެ މިސްރާބު ހުރީ  އިސްތަންބޫލްގެ ތާރީޚީ “ގްރޭންޑް” ބާޒާރަށެވެ.

އެތަނުގެ އެތެރެއަށް ވަދެވުމާއެކު، އޭނާއަށް އިހުސާސްވީ ޒަމާންތަކެއްގެ ފަހަތަށް ވެއްޓުންހެންނެވެ. ނަވާރަސަތޭކައިގެ ކުރީކޮޅަށް ދެވުންހެންނެވެ. އުސްކޮށް ހަދާފައިވާ ފުރާޅުތަކެވެ. ކުދިކުދި ގޯޅިތަކެވެ. ތަނުގައި ހިފާލަފައި ވަނީ މަދާއި، ކަރަންފުލާއި، ޒާތްޒާތުގެ ހަވާދުގެ ތާޒާ ވަހެވެ. ކުކުޅު ހަވާދެވެ. ގެރި ހަވާދެވެ. ބިރިޔާނި މަސާލާ އެވެ. ހިއްކި މޭވާ ހެއްޔެވެ؟ ތަރުކާރީ ހެއްޔެވެ؟

ކުލަކުލައިގެ ތުރުކީ ޘަޤާފަތު ހެދުމެވެ. އަތުން ފެހުމުގައި ތިބި ފެހުންތެރިންގެ މޫނުމަތިން ހިނިތުންވުން ފިލައި ނުދެއެވެ. ކާއެއްޗެހި ވިއްކާ ކުދިކުދި ހޮޓާ ތަކެވެ.

ރީތި (ކާޕެޓް) ތައް ދައްކާލަން ތިބި ވިޔަފާރިވެރިންގެ ހެޔޮފާޅު ކަމާއެވެ. ގޮވައި ގޮވައިގެންވެސް ގެންދަނީއެވެ. އެއްޗެހިތައް ނިއުޅަނީއެވެ. ދައްކަނީއެވެ. ނިއުޅަން ޖެހިގެން ކަންބޮޑުވުމެއް ނެތެވެ. ދިވެހިންނާއި އެތައް ގޮތަކުން ތަފާތެވެ. އަޝްބާ ހިތަށް އެރިއެވެ. އެއްޗެހި ނިއުޅާ ހެދުމަކީ ދިވެހިން ރުހޭ ކަމެއް ނޫނެވެ. އެކަމަކު ދެކިބަލާށެވެ. މިވެރިންނަށް މިއީ ލިބޭ އުފަލެކެވެ.

ހިމަ ދިގު މަގުމަތީގެ ކުޑަ ކެފޭއެއްގެ ކައިރީގައި ނަޒާން މަޑުކޮށްލީ، ކަރުހިއްކުން ފިލުވާލާށެވެ. މިގަދަ ހޫނުގައި ފިނި ބުއިމެއްގެ އަޖުމަ ބަލާލާށެވެ. އޭނާ އެތަނުން ނެގީ ފިނި ދެ ކުރުނބާއެވެ. އެތާ ކައިރީ ހިސާބެއްގައި ނިދާފައި އޮތް ބުޅަލެއް އޮތެވެ. ނަޒާން ހިތާހިތުން ބުނެލިއެވެ. ” ނަޒާން: ތުރުކީއަކީ ހަމައެކަނި ޤުދުރަތުގެ ނިޢުމަތެއް ނޫން. އެއީ ދިރުމާއި، ތާރީޚާއި، ހިތްހެޔޮކަމުގެވެސް ނަމޫނާއެއް.”

” އަޝްބާ: އޭ.. އޭ… ކޮން ކަމަކަށް ގެއްލިފައި. ބެންކޮކަށް ދާންތަ.” ފިކުރަކަށް ގެއްލިފައި އިން ނަޒާނަށް އަޝްބާ ދިމާކޮށްލިއެވެ.

އެ ދުވަސް ނިމުނީ އެފަދަ ގޮތަކަށެވެ. އުފަލާއި މަޖަލުގައެވެ. ހުނުމާއި ސަމާސައިގައެވެ.

އަޝްބާގެ އެންމެ ބޮޑު އެއް ހުވަފެން އެދަނީ ކާމިޔާބީގައި ނަށަން ތައްޔާރުވަމުންނެވެ. ފޮތުގެ ބަނޑޭރި ގަނޑު ކުރަހައިދިނީ ފިރިމީހާ ނަޒާންއެވެ. “ލޭއައުޓް” ހަދައި އެންމެ ފުރިހަމަ މަސައްކަތަކަށް ހަދައިދިނީ ނަޒާންނެވެ. ޖުމްލަ ފަންސާހެއްހައި ބާބު ހިމެނޭ ބޯ ވާހަކައެވެ. މުހިންމު އެތައް ކަމަކަށް ނަޒަރު ހިނގާފައިވާ ފޮތެކެވެ. ކައިވެނި ވަރިއެވެ. ބޮޑެތި ފާފަތަކާއި އެކަންކަމުގެ އުގޫބާތްތަކެވެ. ހުކުމްތަކާއި ދަލީލުތަކެވެ.

ޖިންނިން އުޅޭކަން ޤަބޫލުކުރަން ހެއްޔެވެ؟ އެވެސް އުޅޭ ބައެކެވެ. ޤަބޫލުކުރަށްޗެވެ! މި ވާހަކައިން ބުނެދޭނެއެވެ. އެވެސް އުޅޭބައެކެވެ.

ލޯބިވިން ހެއްޔެވެ؟ ތިނެސްކަން ހަތަރެސްކަން ލޯބީގެ ވާހަކަ އަހަން ހެއްޔެވެ؟ އާދެހެވެ. އެފަދަ ލޯބިވެސް ހުރެއެވެ. މިވާހަކަ ކިޔަންވީ އެހެންވެއެވެ. އެކަކު ދެކެ ދެމީހުންވެސް ލޯބި ވެދާނެއެވެ. މިއީ ތޯތޯ ވާހަކަތަކެއް ނޫނެވެ. ފޮތް ކިޔާލުމުން އެނގޭނެއެވެ.

ވަރިއަށް އެދެން އުޅުނީން ހެއްޔެވެ؟ އެއީ ކިހާ ވަރެއްގެ ފާފާއެއްކަން އެނގޭ ހެއްޔެވެ؟ އެކަމަށްވެސް މި ވާހަކަ އަލިއަޅުއްވާލާފައިވެއެވެ.

ކައިވެނީގެ މަތިވެރިކަން ހަނދުމަކުރާށެވެ. އަނބިދަރިންނަކީ ތިބާގެ އަތްމަތީގައިވާ އަގުނުކުރެވޭ އަމާނާތެކެވެ. އެއަށް ރައްކާތެރިވާން ޖެހޭނެއެވެ.

މަސްތުވާތަކެތީގެ ވާހަކައާއި ޒުވާނުން މަގު ގެއްލިފައިވާ ވާހަކަ ދައްކައި ނުނިމޭނެއެވެ. ޒުވާން ޖީލެއް ނެތިގެން އެވަބާގައި ހަގަންޖެއެވެ. ބަޔަކު އިހުމާލުވެއްޖެއެވެ.

އިންސާފު، އިންސާފު ހެއްޔެވެ؟ އޭގެ ވާހަކަ ދައްކާނީ ކޮން ހައިސިއްޔަތަކުން ކަމެއް ނޭނގެއެވެ. މިދުނިޔޭގައި އިންސާފު ގާއިމުކުރާނެ ދުވަހެއްގެ އިންތިޒާރުގައި ހުރީމެވެ. މިތާކު ހަމަ ތެދެކެވެ. އިންސާފެއް ނެތެވެ. އެތައް ބަޔަކު ރޮއެ އާދޭސްކުރަނީއެވެ. ސަލާމްޖަހަނީއެވެ.

ރޫޅެންދިޔަ ކައިވެންޏެއް ހަމަ މަގަށް އަޅުވައެވެ. އަންހެނަކު އަހަރެއް ވަރު ވަންދެން ކޮޓަރިއެއްގައި ބަންދުކޮށްފައި އިނދެއެވެ. ޖިންނިއެއްގެ ދަރިއަކަށް ބަނޑުބޮޑުވެެގެންނެވެ. އިފުރީތެއްގެ ދަންތުރައިގައިވި ބަޔަކު ސަލާމްކުރަން ފަންޑިތަ ހަދައެވެ. އެޅޭ ޅައެއްޗަކުން ތިންމީހެއްގެ ފުރާނައާއެކު ފަންޑިތަވެރިޔާ މިދުނިޔެ ދޫކުރެއެވެ. އެކަކު ދުނިޔެއިން މޮޔަވެއެވެ. މޮޔައިންގެ މަރުކަޒެއްގައި އަޅާލާނެ މީހަކު ނެތި ގިނަވެއެވެ.

މިއީ އެކުވެރިންގެ ގުރޫޕެއްގެ ދެމެދުގައި ހިނގައިދައި ލޯބީގެ އާރެކެވެ. މިއާރު ނިމިގެންދަނީ އެކަކަށްވެސް އެކަކުގެ ލޯބިވެސް ކާމިޔާބުނުވެއެވެ. ފަސްކުދިންގެ މި ރަހުމަތްތެރިން ބެހިގެންނެވެ. ރޫޚާނީ ރޫޚެއްގެ އަނިޔާގައި އެކަކު މަރުވަނީއެވެ. ފަންޑިތައިގެ އިހުމާލުން އެކަކު މަރުވެ އަނެކަކު މޮޔަވަނީއެވެ. ދެމީހުންނަށް ފަސްމީހުންގެ ފަލްސަފް ބަދަލުވީއެވެ. ރޭގަނޑެއްގެ ހިމޭންކަމާއެކުއެވެ. މިކިޔައިދެވުނީ ގާތްގަނޑަކަށް ފޮތުގެ ޚުލާޞާއެކެވެ.

ރަތްކުލައިގެ ވަށްތިރިއެއްގައި ހުރި ޒުވާންފުރާގެ އަންހެން ކުއްޖެކެވެ. ހަމަ އެ ފުރާގެ ފިރިހެނެކެވެ. އަންހެން ކުއްޖާގެ އަތުގައި ފިނިފެންމަލުގެ މާ ބޮޑިއެއް އޮތެވެ. ފުރަގަހުގައި ރުޅިގަދަވެގެން ފުފިހައި ހުރި ހިޔަންޏެއްފަދަ ރޫޚެއްވިއެވެ. މިބުނެދެވުނީ ފޮތުގެ ބަނޑަވެރިގަނޑުގެ މިސާލެކެވެ. އަތްތެރިލިޔުމުގެ ފުރިހަމަކާމާއެކު ޖަހާފައިވާ އެނަމުން އެކަނިވެސް ކިޔާހިތުން މޮޔަވާހާވާނެއެވެ. އެފަދަ ފުރިހަމަކަމެއް ދެކޭހިތްވޭ ނޫންހެއްޔެވެ؟ ކޮންމެ ޞޮފްހާއަކުން ފެނިގެންދާނީ ފަރުމާއެއް ނޫނެވެ. އަޝްބާ ބިންތު ނިހާނުގެ އަމިއްލަ އަތުލިއުމެވެ. “އަޝްބާތު” ކިޔާ މި އަތުލިޔުންވެސް ފޮތާއެކު ނުކުންނާނެއެވެ.

“ލެޕްޓޮޕް” ދަށުގައިން އަޝްގެ ކަންފަތްދަށުގައި ސިއްރެއް ބުނާހެން މީހަކު އެއްޗެއް ބުނެލިއެވެ. އޭނާ ކޮޅުކޮޅު ބަލާލިއެވެ. އެއްވެސް މީހަކުނެތެވެ. އަނެއްކާވެސް، މަސައްކަތައިގެން އަޝްބާ ކުރިއަށްދިޔައިރު، އެކަން ތަކުރާރުވެއްޖެއެވެ. އެ ސިއްރު ކަންފަތްދަށުގައި ބުނެފިއެވެ.

ބިރުން ހުރެ އަޝްބާ ސީލިންގަށް ބަލާލިއެވެ. ބޮކިތައް ހުރި ދިއްލާފައެވެ. ލޯ މޭޒަށް ތިރިވިއިރު އަޝްގެ ލޮލުގައި އަޅައިގަތެވެ. ކުރިން އެތައި ނެތް ކަރުދާސް ގަނޑެއް އޮތެވެ. އެއަތަށް ނަގައި އަޝްބާ ނިއުޅާލިއެވެ. ޗާލު އަތުލިއުމެއްގެ ފުރިހަމަ ލިޔުންތެރިކަމެކެވެ. ދެލޯ ރަނގަޅަށް ހުޅުވާލަމުން ކިޔަން ފެށިއެވެ.

” ތީ، އަޝްބާ ބިންތު ނިހާނު ދޯއެވެ. އަޝްބާއަށް އަހަރެން ނޭނގިދާނެއެވެ. ފަސްފަހަތުގައި ހުއްޓަސް ނުފެނިދާނެއެވެ. އަޝްއާއި ދާދި ގާތުގައި އަބަދުވެސް ވަމެވެ. ތި ލިޔުނީ ޚިޔާލީ ވާހަކައެއް ނޫންކަން އިނގޭ ހެއްޔެވެ؟ ތި ލިޔެވުނީ ހަޤީޤަތެއްކަމުގެ އިޙްސާސް ކުރެވޭ ހެއްޔެވެ؟ ” ޢަޝްބާ ފުންކޮން ނޭވާއެއް ބޭރުކޮށްލިއެވެ.

” އަހަންނަކީ ކާކުކަން އެގެން ޖެހިއްޖެއެވެ. އެ ޒިންމާ ނިމިއްޖެއެވެ. ދާން ޖެހިއްޖެއެވެ. އަހަންނަށް ލިބުނު ވަގުތު ހަމަވެއްޖެއެވެ. ތި ހީކުރެވުނީ ރަނގަޅަށެވެ. އަހަރެންމީ އިންސިއެއްނޫނެވެ. ޖިންނިއެކެވެ. ތިލިޔުނު ވާހަކައަކީ އަހަރެންގެ މަންމަ މިލީހަމް އާއި ބައްޕަ މާއިޒު ޖިންނީގެ ވާހަކައެވެ. ދޮންބައްޕަ މަންމަގެ ފިރިމީހާ ޚުބާބާއި އެކުވެރި ސާއިލާއި ބާސީލު ކިއެއްތަ އެ ލީނިޔާގެ ވާހަކައެވެ. ” މާބޮޑަށް އަޝްބާ ބިރުގަންނަ ގޮތްވިއެވެ. ހަޤީޤަތެއް ކަން އިޙްސާސްކުރެވުނީއެވެ.

“އަހަންނަކީ އެރޭ ސަލާމަތް ވެވުނު ހަމައެކަނި ފަރާތެވެ. މިލީހަމްގެ ބަނޑުގައިވި އެ އިފުރީތެވެ. މިއަދު މި ތަންދޫކޮށް އަހަރެން މިދަނީ ބައްޕަގެ ހާންދާނަށެވެ. ތަނުގެ ވެރިކަން އަހަންނަށް މާމަ ހިބަކޮށްދީފިއެވެ. މިވާހަކަތައް ޤަބޫލު ނުކުރެވެންޔާއި މޮޔައިންގެ މަރުކަޒު ބަލާބަލާށެވެ. އެތައިގައި ލީނިޔާއި އަދިވެސް ދިިރިއެބަހުއްޓެވެ. އުމުރުން ސާޅީސްއަށްއަހަރު ވަރު ވެދާނެއެވެ. ހުރެވޭކަށް ނެތެވެ. ދާން ޖެހުނީއެވެ. މިތަން ދޫކޮށް މިދަނީ ދާހިތަކުން ނޫނެވެ. މަންމައަށް އިންސާފު ހޯދުމުގެ ދަތުރުގައި އަހަންނަށް މިއަދު ކާމިޔާބު ލިބިއްޖެއެވެ. ލިޔުންތެރިކަމުގައި ކާމިޔާބު އެދެމެވެ. ފޮތުގެ ޗާޕެއް ޚުބާބަށްވެސް ހަދިޔާ ކުރައްޗެވެ. އޭނާ އަދިވެސް ފޮތްކިޔަން ލޯބި ކުރެއެވެ. ލޯބޯ އެހާ ފަނޑެއް ނުވެއެވެ. ޢިލްމު އުގެނެތް އުޅެއެވެ.” ކޮޅުކޮޅު އަޝްބާ ބަލައިލިއެވެ. ދުމެއްގެ ވަސް ނައިފަތުގައި ޖެހުމުން އެ ޖިންނި ދިޔައީކަން ޔަޤީންކުރެވުނެވެ. އެކަމަކު އޭނާ އިންތިހާ ބިރުގަނެއްޖެއެވެ. ކަން ކުރަންވީ ކިހިނެއް ހެއްޔެވެ؟ އެސިޓީ ނަޒާނަށް ދޭންވީ ބާއެވެ؟ ފޮތް ނެރުން ލަސްކޮށްލަންވީ ބާއެވެ؟

ނުނިމޭ

(ކިޔުންތެރިންގެ ސަމާލުކަމަށް)

މިވޭތުވެދިޔަ ދުވަސްތަކުގައި ވާހަކަ ނުގެނެސްދެވުނިތީ ހިތުގެ އެންމެ ފުނުން މާފަށް އެދެމެވެ. އަޅުގަނޑު ބަލިވެއުޅުމުން ވާހަކަ ގެނެސްދެވޭގޮތް ނުވީއެވެ. މާތް ﷲ ގެ ތަނަވަސް ރަޚުމަތާއެކު ދެން އިރާދަކުރެއްވިޔާ ލަސްނުވެ ގެނެސްދެވޭތޯ މިދަނީ މަސައްކަތް ކުރަމުންނެވެ. އަނެއްކޮޅުން އަލަށް ނިކުއިން ދިވެހި ވާހަކަ.ކޮމްއަށްވެސް އަޅުގަނޑުގެ ވާހަކަ ލިޔަން ފަށައިފީއެވެ.  އަޅުގަނޑު ތަފާތު އަސަރުތަކެއްގެ ވާހަކައެއް ވާނީ ލިޔަން ފަށާފައެވެ.  ވާހަކައިގެ ފުރަތަަމަ ދެބައި މިހާރުވެސް ކިޔާލަން ލިބޭނެއެވެ. ތިން ވަނަބައި މާދަމާގެ ވަގުތެއްގައި ކިޔާލަން ލިބޭވަރު ވާނެކަމަށް އުންމީދުކުރަމެވެ. ކުރުވާހަކައެއްވެސް ވާނެއެވެ. ކިޔަން ފޫހިވާއި ކުދިންނަށް އެތަނުން އަޑުއަހާލުމުގެ ފުރުސަތުވެސް ލިބޭނެއެވެ. މި ވާހަކަ ގެނެސްދޭނީ ހަފްތާއަކު ދެދުވަހުއެވެ. ހޯމަ ބުދައިގައެވެ.  މިބައިވެސް ކިޔުންތެރިންނަށް ކަމުދާނެ ކަމަށް އުންމީދުކުރަމެވެ. ތިދޭ ލޯތްބާއި ތަރުހީބަށް ނިހާޔަތަށް ހެޔޮ ހިތުން ޝުކުރުވެރިވަމެވެ.

🫶🥰♥️🥀😊