“މިއީ މާލޭގެ އާދައިގެ ގޭންގަކަށް ނުވަތަ މަގުމަތީގެ ކުދިކުދި ބަޔަކަށް ރާވައިލެވޭނެ ވަރަށްވުރެ މާ ފަންނީ، މާ ނުރައްކާތެރި ކަމެއް. މީގެ ފަހަތުގައި އޮތީ އަހަރުމެން ހީނުކުރާ ވަރުގެ ބިޔަ ބޮޑު ނެޓްވޯކެއް… އަދި އެއީ ވަރަށް ބާރުގަދަ ބައެއްކަން އިނގެނީ! އެކަމަކު އައިރާ އަށް އަހަރުމެން އިންސާފު ހޯދަ ދޭނަން”. އެންމެ ފަހު ޖުމްލަ ބުނެލިއިރު ފަރުހާންގެ އަޑުގައި ވީ ރުޅިވެރިކަމެވެ.
****
ނާއިލް އޭނާ ލައިގެން ހުރި ވާރޭގެ ތެތްކަން އެކުލެވޭ ކަޅު ކޯޓު ބޭލުމަށްފަހު ގޮނޑިއެއްގެ މައްޗަށް އެއްލާލައި، ގޮސް ޒަޔާންގެ ފުރަގަހުގައި މަޑުކޮށްލިއެވެ. އެވަގުތު އޭނާގެ ތެމިފައިވާ އިސްތަށިގަނޑުން ފައިބަމުންދިޔަ ފެންތިކިތައް މޫނުމަތިން ތިރިއަށް ސޮއްސައިގެން ދިޔައެވެ. ހިތުގައި އުފެދިފައިވާ ރުޅިވެރިކަން ކޮންޓްރޯލް ކުރަމުން ނާއިލް ސުވާލުކުރިއެވެ.
“ޒަޔާން، ކޮން ކަމެއް ހޯދުނީ؟ ފުލުހުންގެ ސިއްރު މައުލޫމާތުތަކުގެ ތެރެއިން އައު ކަމެއް ފެނުނުތަ؟ މި ހާދިސާއަކީ އެކްސިޑެންޓެއްގެ ގޮތުގައި ނިންމައި ފައިލް ބަންދުކޮށްލީ ކާކުގެ ބާރާއި ނުފޫޒުންކަން އެނގުނުތަ؟”. ޒަޔާން ފުން ނޭވާއެއް ދޫކޮށްލިއެވެ. އޭނާގެ އަތްތިލައަށް ތުރުތުރެއް އަރަމުން ދިޔަ ނަމަވެސް، ކީބޯޑު ބޭނުންކޮށްގެން އެންމެ ބޮޑު ސްކްރީނަށް ކަޅާއި ހުދުގެ ވީޑިއޯއެއް އެރުވިއެވެ.
ވީޑިއޯ ދައްކަމުން ޒަޔާން ބުންޏެވެ. “ގޮވުމުގެ ފަސް މިނެޓު ކުރިން ބަނދަރުގެ މައި ސެކިއުރިޓީ ކެމެރާތައް ވަނީ ވަރަށް ރޭވުންތެރިކަމާއެކު ހެކްކޮށް ހުއްޓުވާލާފައި. ނަމަވެސް، އެމީހުންނަށް ރޭކާނުލީ ރިޝްވާން ބުނެގެން ބަނދަރުގެ އެންމެ އުސް ކްރޭނުގައި ފަރުހާން ހަރުކޮށްފައި ހުރި ވަކި ވައިފައި ކެމެރާއެއް ހުރިކަން. އެ ކެމެރާގެ ފުޓޭޖް މިރޭ އަހަރެން ހޯދައިފިން”. ވީޑިއޯއިން ފެންނަމުން ދިޔައީ ގޮވުމުގެ ކުޑައިރުކޮޅެއް ކުރިން، ކަޅު ކުލައިގެ ބޯ ވާރޭކޯޓެއް ލައިގެން މޫނު ފޮރުވައިގެން ހުރި ދިގު އިސްކޮޅެއްގެ ފިރިހެނަކު އެ ކޮންޓޭނަރާ ދުރަށް ހިނގައިގަތް މަންޒަރެވެ. އޭނާގެ ފިޔަވަޅުތަކުން އެއްވެސް ބިރުވެރިކަމެއް ނުވަތަ ހާސްކަމެއް ނުފެނެއެވެ. ކޮންޓޭނަރާ ދުރަށް ދިއުމަށްފަހު ފަހަތަށް އެނބުރި ބަލައިލި ވަގުތު، ޖެހުނު ވައިރޯޅިއާއެކު އޭނާގެ ކޯޓުގެ ކަރުވަޅު ހުޅުވިގެން ދިޔައެވެ. އެހިނދު ޒަޔާން ވީޑިއޯ ހުއްޓުވާލުމަށްފަހު، އެމީހާގެ ކަރު ކައިރި ބޮޑުކޮށްލިއެވެ. ވީޑިއޯގެ ސާފުމިން ދަށް ނަމަވެސް، ޒަޔާން ބޭނުންކުރި ސޮފްޓްވެއަރގެ ސަބަބުން އެތަން ސާފުކޮށް ފެނުނެވެ. އެމީހާ އަޅައިގެން ހުރި ފަލަ ރިހި ފަށުގެ ފުލުގައި ވަނީ އާދަޔާ ހިލާފު ނިޝާނެކެވެ. އެއީ ދެ ކަނޑި ހުރަސްކޮށް، އޭގެ މެދުގައި ދަނބުކުލައިގެ ލޮލެއް ކުރަހާފައިވާ ބިރުވެރި ނިޝާނެކެވެ.
“އެއީ ކޮން އެއްޗެއްގެ ނިޝާނެއް؟” ސްކްރީނާ ކައިރިވަމުން ނާއިލް އަހައިލިއެވެ. ބަޑި ސާފުކުރަން އިން ރިޝްވާންގެ ހަރަކާތްތައް އެއްކޮށް ހުއްޓުނެވެ. އޭނާ ސްކްރީނަށް ބަލައިލިއިރު، އެ ދެލޮލުން ފެންނަމުންދިޔައީ ސިހުމާއި ނުތަނަވަސްކަމެވެ. އޭނާ ގޮނޑިން ތެދުވެގެން ގޮސް މަޑުމަޑުން ސްކްރީން ކައިރީގައި ހުއްޓުނެވެ.
“މިއީ ތާރިޤުގެ ބައިވެރިންނެއް ނޫން،” ރިޝްވާން އުނދަގުލުން ބުނެލިއެވެ. “އެއީ އާދައިގެ ގޭންގުތަކުގެ ނިޝާނެއް ނޫން. އެއީ ‘ޝެޑޯ ކާޓެލް’. އަހަރެން ކޯސްޓްގާޑުގައި އުޅުނުއިރު އެމީހުންގެ ވާހަކަ އަޑުއެހިން. މުޅި ދެކުނު އޭޝިއާ ސަރަހައްދުގައި ހަތިޔާރާއި، މަސްތުވާތަކެތި އަދި މީހުން ޓްރެފިކްކުރުމުގައި ހަރަކާތްތެރިވާ އެންމެ ބާރުގަދަ، އަނިޔާވެރި ސިއްރު ޖަމާއަތެއް އެއީ. ފުލުހުންގެ ތެރޭގައްޔާއި ސަރުކާރުގެ އެންމެ މަތީ ފަންތީގައިވެސް އެމީހުންގެ ނުފޫޒު އޮންނާނެ”.
ނާއިލްގެ ދެލޮލުން ރުޅިވެރިކަން އިތުރަށް ފާޅުވެގެން ދިޔައެވެ. އޭނާގެ ހިތުގައިވި ހިތާމައިގެ ޝުއޫރުތައް، ހިފެހެއްޓުމެއް ނެތް ވަރުގަދަ އަލިފާނެއްގެ ސިފައަށް ބަދަލުވެގެން ދިޔައެވެ. މާލޭގައި އެންމެންގެ އިހުތިރާމް ލިބިފައިވާ ޒުވާން ވިޔަފާރިވެރިޔާގެ ސިފަ އޭނާގެ ކިބައިން މުޅިން ފޮހެވިގެން ދިޔައެވެ. އޭގެ ބަދަލުގައި އޭނާގެ މޫނުމަތިން ފެންނަން ފެށީ، ލޯބިވާ މީހާ ވަކިވެދިޔުމުން މާޔޫސްވެ، ބަދަލުހިފުމުގެ އަޒުމުގައި ހުރި ނުރައްކާތެރި ޝިކާރަވެރިއެއްގެ ސިފައެވެ. ނާއިލް މޭޒުމަތީގައި އަތުގެ ކޮޅަށް ޖަހައިލިއެވެ. އެއާއެކު މުޅި ކޮޓަރީގައި އޮތް ހަމަހިމޭންކަން ގެއްލިގެން ދިޔައެވެ.
“އައިރާ މަރާލުމުން އަހަރެމެން ބިރުން ފަހަތަށް ޖެހި ފިލާނެ ކަމަށް އެމީހުން ހީކުރަނީ؟”. ނާއިލްގެ އަޑުގައި ތުރުތުރެއް ހުރި ނަމަވެސް، އެ އަޑުގައިވަނީ ފަސްޖެހުމެއް ނެތް ވަރުގަދަ އަޒުމެކެވެ. “ތާރިޤުގެ މައްސަލައިގައި އަހަރެމެން އަމަލުކުރީ ގާނޫނީ އިމުގެ ތެރެއިން. ފުލުހުންނަށާއި ސިފައިންނަށް ހެކިތައް ފޯރުކޮށްދީގެން. ނަމަވެސް އޭގެ ނަތީޖާއަކަށްވީ ކޮބައި؟ އަހަރެން އެންމެ ލޯބިވާ މީހާ މިއަދު އެވަނީ ވަޅުލެވިފައެވެ. އެހެންކަމުން މިފަހަރު އަހަރެމެން ކުރާނެ ކަމެއް ކުރާނީ ގާނޫނުން ބޭރުން! މިފަހަރު ފުލުހުންނާއި ކޯޓުތަކުގެ އެހީއެއް ނުހޯދާނަން!”. ނާއިލް ބުނެލިއެވެ.
ރިޝްވާން އޭނާގެ އަތުގައި އޮތް ބަޑީގެ ސްލައިޑް ފަހަތަށް ދަމާލައި، ވަޒަން ތައްޔާރުކޮށްލިއެވެ. “އަހަރެންގެ ބެލުމުގެ ދަށުގައި އޮތް ތަނެއްގައި އައިރާއަށް އެވަރުގެ ގެއްލުމެއް ލިބުމުން، އެކަމުގެ ފުރިހަމަ ޒިންމާ އަހަރެން އުފުލާނަން! އެމީހުންގެ ނިމުން ގެންނާނީ ސީދާ އަހަރެންގެ އަތުން!”.
ފަރުހާން އޭނާގެ ބަރު ރެންޗު ނަގައި، މޭޒުމަތީގައި ބާރަށް ބޭއްވިއެވެ. “އަހަރެން މިހުރީ ތައްޔާރަށް! އެމީހުން އެ ކޮންޓޭނަރު ގޮއްވާލި ފަދައިން، އެމީހުންގެ މުޅި ނެޓްވޯކް ސުންނާފަތިކޮށްލާނަން!”.
ޒަޔާން ސްކްރީނުގައި ‘ޝެޑޯ ކާޓެލް’ ގެ ނަމުގައި އައު ފައިލެއް ހުޅުވައި، ކީބޯޑުގައި ފަހު ފިތަށް އޮބައިލިއެވެ. “އެމީހުންގެ މުޅި ވިއުގައާއި، ފައިސާ ދައުރުވާ މަގުތަކާއި، އަދި އެ ނިޝާން ޖެހި ފަށް އަޅައިގެން ހުރި މީހާ އަހަރެން ހޯދާނަން! މާލޭގައި އެކަންޏެއް ނޫން، މި މުޅި ރާއްޖެއިންވެސް އެމީހުންނަށް ފިލައިގެން އުޅޭނެ އެއްވެސް ތަނެއް ނޯންނާނެ!”. ނާއިލް އޭނާގެ އެކުވެރިންނާ ދިމާއަށް ބަލައިލިއެވެ. އައިރާ ވަކިވެދިޔުމުން އެމީހުންގެ ތެރެއިން އެންމެ އަގުބޮޑު ބައިވެރިޔާ ގެއްލުނު ނަމަވެސް، އެ ހިތާމައިގެ ސަބަބުން ބާކީ ތިބި ހަތަރު މީހުންގެ އެކުވެރިކަން ދަގަނޑަށްވުރެ ވަރުގަދަވެގެން ދިޔައެވެ.
“އައިރާގެ ފުރާނަ ދުއްވާލި ކޮންމެ މީހަކަށް…” ނާއިލްގެ ދެލޮލުން ފެންނަމުންދިޔައީ ބަދަލުހިފުމުގެ ކަނު އަނދިރިކަމެވެ. “އޭގެ ބަދަލު އެމީހުންގެ އަމިއްލަ ލެއިން ދައްކުވާނަން. މިއީ ކުޅިވަރެއް ނޫން. މިއީ ސީދާ ހަނގުރާމައެއް!” ނާއިލްގެ ހިތަށް އަރަމުން ދިޔައެވެ. (ނުނިމޭ).
Other Articles
މަލަކް
