ހިތުގެ ވެރިޔާ

މިއީ ހަޤީޤީ ހާދިސާއެއްގެ މައްޗަށް ބިނާކޮށް ލިޔެފައިވާ އަސަރުގަދަ ވާހަކައެކެވެ. ލޯބީގެ މާތް ގުޅުމަކުން ގުޅިގެން އުޅުނު ދެ ހިތެއްގެ ދެމެދުގައި ހިނގައިދިޔަ ކަންތައްތަކެއްގެ މައްޗަށް ބިނާކޮށް، މާޒީގެ ސަފުހާތައް އުކާލަމުން މި ވާހަކަ ފަށަމެވެ.

އުޑުމަތި ސާފު، ހިތްގައިމު ދުވަހެކެވެ. މާސިންގާ ކަނޑު ވަނީ ތޭލާންލާފައެވެ. މާލޭގެ ކޮންކުރީޓް ޖަންގަލީގެ ހަލަބޮލިކަމުން އެއްކިބާވެ، އަތޮޅުތެރޭގެ ހަމަހިމޭން މާހައުލަކީ އެތައް ބައެއްގެ އަމާޒަކަށް ވެފައިވާ ފަދައިން، އަހަރެންގެ ހިތަށް ވެސް އެ ތަނުން ލިބެނީ ބަޔާންކުރަންދަތި ހިތްހަމަޖެހުމެކެވެ. އެއީ 2018 ވަނަ އަހަރުގެ ކުރީކޮޅެވެ. އަހަރެންގެ ދިރިއުޅުން އޭރު އޮތީ އުފާވެރިކަމާއި އުންމީދުން ފުރިފައެވެ. ސްކޫލް މާހައުލަކީ އަހަރެންގެ ދެވަނަ ގެއެވެ. އެއީ އަހަރެންގެ އުފަލާއި ގުޅިފައިވާ މާހައުލެކެވެ.

އޭރު ސްކޫލުގައި އުޅެމުންދިޔަ ކުދިންނަކީ އަހަރެންގެ އެންމެ ގާތް އެކުވެރިން ކަމުގައި ދެކިގެން، އިޚްލާޞްތެރިކަމާއެކު އުޅެމުންދިޔައީމެވެ. ޚާއްޞަކޮށް އޯލެވެލް އިމްތިޙާނުގެ ދުވަސްވަރު، އެންމެންނާއެކު މަސްބޭނުމަށް ދިއުމާއި، އެކި ކަހަލަ މަޖާ ކަންކަމުގައި ވަގުތުތައް ހޭދަކުރި ހަނދާންތައް މިއަދުވެސް ހިތުގައި އާވެއެވެ. އިމްތިޙާނުގެ ގަދަ ހޫނުގައި، ރޭގަނޑުގެ ގިނަ ވަގުތުތައް ހޭދަކުރަނީ ގްރޫޕް ސްޓަޑީ ކުރުމުގައެވެ.

އެގޮތުން ގްރޫޕް ސްޓަޑީ ކުރުމުގައި އެންމެން އުޅުނު އެއް ރެއަކީ އަހަރެންގެ ދިރިއުޅުން ބަދަލުކޮށްލި ރެއެކެވެ. ފޮތްތަކުގެ ތެރެއަށް ގެއްލިފައި އިންދާ، ކުއްލިއަކަށް އަހަރެންގެ ލޮލުގައި އަޅައިގަތީ ކުރިން ފާހަގަވެފައި ނުވާ ފަދަ އާދަޔާޚިލާފު ރީތިކަމެކެވެ. އެއީ ހަމަ އަހަރެމެންނާއެކު ކިޔަވަން އުޅުނު އަންހެން ކުއްޖެކެވެ. އެކަމަކު އެ ރޭ އޭނާގެ ހިނިތުންވުމާއި، ވާހަކަދެއްކުމުގެ ރީތި އުސޫލު ފެނިފައި އަހަރެންގެ ހިތް އޭނާއަށްޓަކައި ތެޅިލިއެވެ. ފުރަތަމަ ނަޒަރުންވެސް އަހަރެންގެ ހިތުގެ ވެރިޔަކީ އެއީކަން އިހުސާސް ކުރެވުނެވެ.

ނަމަވެސް، އެ ވަގުތު އެ އިހުސާސްތައް ފާޅުކުރުމުގެ ބަދަލުގައި، އަހަރެން ނިންމީ އެކަން ސިއްރުކުރުމަށެވެ. އެއީ އަހަރެންގެ ކިޔެވުމަށް ބުރުލެއް އަރާފާނެ ކަމަށް ބަލާފައެވެ. ކުރިމަތީގައި އޮތީ މުސްތަޤުބަލު ކަނޑައަޅާނެ އެންމެ މުހިންމު އިމްތިޙާނެވެ. ހިތުގައި އުފެދުނު ލޯބީގެ ރާޅުބާނިތައް ހިފަހައްޓަމުން، އަހަރެން މަސައްކަތް ކުރީ އާދައިގެ ގޮތަކަށް އުޅެވޭތޯއެވެ. އެކަމަކު ކޮންމެ ފަހަރަކު އޭނާގެ ލޮލާ އަހަރެންގެ ލޮލާ ސީދާވާ ހިނދު، ހިތުގެ ސިއްރު ބޭޒާރުވެދާނެތީ އަހަރެން ބިރުގަތެވެ. އެއީ މީހަކަށް ނޭނގޭނެ ފަދަ މާތް ސިއްރެއްގެ ގޮތުގައި އަހަރެން ހިތުގެ އެންމެ ފުންމިނުގައި ރައްކާކުރީމެވެ.

ކިޔެވުމަށްޓަކައި އަހަރެންނަށް ޖެހުނީ ހިތުގެ އެ އެދުންތަކާއި ޝުޢޫރުތައް ވަގުތީގޮތުން ކަފުންކުރާށެވެ. އޯލެވެލް ދުވަސްވަރުގެ ބުރަކަމާއި، ނަތީޖާއާ މެދު އޮތް ބިރުވެރިކަމުގެ ކުރިމަތީގައި ލޯބީގެ ބަސްތައް ބޭރުކުރުމަކީ އަމިއްލަ ނަފުސަށް ދެވޭ އަނިޔާއެއް ކަމުގައި އަހަރެން ދެކުނީމެވެ. ކޮންމެ ރެއަކު ގްރޫޕް ސްޓަޑީ ނިންމާފައި ގެއަށް ދާއިރު، އޭނާގެ ހަނދާންތައް ހިތުގައި ބިންވަޅު ނެގިފައި އޮތް ނަމަވެސް، އަހަރެން އިސްކަންދިނީ ފޮތްތަކަށެވެ.

ދުވަސްތައް ފާއިތުވަމުން ގޮސް އިމްތިޙާނު ނިމުނެވެ. ނަމަވެސް އަހަރެންގެ ހިތުގައި އޭނާއަށްޓަކައި އުފެދުނު އެ މާތް ލޯތްބަކަށް ބަދަލެއް ނައެވެ. ކަފުންކޮށްފައި އޮތް އެ އިހުސާސްތައް އަލުން ދިރި، މިއަދު އަހަރެންގެ ހިތުގެ ވިންދާ ގުޅިފައިވަނީ ހަމަ އެ “ހިތުގެ ވެރިޔާ” އެވެ. މާޒީގެ އެ ހަނދާންތަކަކީ އަހަރެންގެ ދިރިއުޅުމުގެ އެންމެ ފޮނި، އަދި އެންމެ އަސަރުގަދަ ސަފުހާތަކެވެ