ފިންގަރޕްރިންޓް

ނިޒްމާގެ ބައްޕަ އަލީ ނިޔާވީ ނިޒްމާގެ އުމުރުން ހަތްވަރަކަށް އަހަރުއެވެ. އެންމެ ކުޑައިރުއްސުރެ ފެށިގެން ނިޒްމާގެ ކޮންމެކަމެއްގައި އެހީތެރިކަމާއި އެއްބާރުލުން ދެމުން ލޯތްބާއި އޯގާތެރިކަމާއެކު ނިޒްމާ ބަލަމުންދިޔަ އަލީ ނިޔާވުން ވެގެން ދިޔައީ ނިޒްމާ އާއި އޭނާގެ މަންމަ ނިސްވާއަށް ލިބުނު އެންމެބޮޑު ހިތާމަ އާއި ހިތްދަތިކަމަށެވެ.
ނިޒްމާއަށް ޓަކައި ބައްޕައެއްގެ ލޯތްބާއި އަޅާލުމަކީ ވަރަށް މުހިންމު ކަމެއްކަމުގައި ދެކިގެން ނިސްވާ ދެވަނަ ކައިވެންޏެއް ކުރިއެވެ.
އުމުރުން އަށެއްކަ އަހަރުން ފެށިގެން ނިޒްމާގެ ބައްޕައެއްގެ ރޯލާއި ހަވާލުވި ފާއިދު ވެގެން ދިޔައީ ނިސްވާ އާއި ނިޒްމާ އުންމީދު ކުރި ފަދަ އޯގާތެރި މީހަކަށެވެ.
ދުވަސްތަކާއި ރޭތައް މާޒީއާ އެކުވަމުން ނިޒްމާގެ އުމުރުން ދުވަސްވަމުން ދިޔައިރު ފާއިދުގެ ފަރާތުން ލިބެމުންދިޔަ ލޯތްބާއި އަޅާލުމުގެ ސަބަބުން ނިޒްމާ ހުންނަނީ ވަރަށް އުފާވެ ހިތްހަމަ ޖެހިފައެވެ. އަލީ ނިޔާވުމުގެ ސަބަބުން ނިޒްމާއަށް ގެއްލުނު ބައްޕައެއްގެ ލޯބި އޭގެ އެންމެ ފުރިހަމަ ގޮތުގައި ތެދުވެރިކަމާ ވަފާތެރިކަމާއެކު ފާއިދު ދެމުން ދިޔައެވެ.
ފާއިދުގެ ފަރާތުން ލިބެމުންދިޔަ ލޯތްބާއި އަޅާލުމާ އެހީތެރިކަމުގެ ސަބަބުން އުފަން ދަރިއެއްގެ ފަރާތުން ބައްޕައަކަށް ދެވޭނެ އެންމެ ފުރިހަމަ ލޯތްބާއި އެހީތެރިކަން ނިޒްމާގެ ފަރާތުން ފާއިދަށް ލިބެމުން ދިޔައެވެ.
ބައްޕައެއްފަދަ ދޮންބައްޕަ އާއި މަންމަގެ އެހީތެރިކަމާއެކު ކޮންމެ ކުލާހަކުން ރަންވަނަ ހޯދަމުން ދިޔަ، ނިޒްމާ މިހާރު މަސައްކަތް ކުރަމުން ދަނީ ޖީސީއީ އޯލެވެލްގައި ވެސް ރަންވަނައެއް ހޯދާށެވެ. އެހެންކަމުން އޭނާގެ ހުރިހާ ވަގުތެއް ހުސްކޮށްފައިވަނީ އެކަމަށެވެ.
ރޭގަނޑު އެގާރަ ޖަހާކަން ހާއިރެވެ. ޓީވީ ބެލުމާއިގެން މަޝްޣޫލްވެ ފެންޑާތެރޭގައި ތިބި ނިސްވާ އާއި ފާއިދު ސިއްސައިގެން ދިޔައީ ގޭދޮރުގައި ޓަކިޖަހާލި އަޑަށެވެ. އެއާއެކު އެކަކު އަނެކަކަށް ބަލާލަމުން ކާކުތޯ އަހާލިއިރު ދެމީހުންގެ މޫނުމަތިން ވެސް ފާޅުވަމުން ދަނީ ހައިރާން ކަމާއި ނުތަނަވަސްކަމުގެ އަސަރުތަކެވެ.
ދެތިން ފަހަރަކު ޓަކިޖަހާލުމާއެކު ފާއިދު ތެދުވެގެން ގޮސް ދޮރުހުޅުވާލިއެވެ. ގޭ ދޮރުކައިރީގައި މަޑުކޮށްލައިގެން ތިބި ޕޮލިހުންގެ ތިން ބޭކަލުން ފެނުމާއެކުހެން ނިސްވާ އާއި ފާއިދުގެ ނުތަނަވަސްކަން އިތުރުވެ އެއްފަހަރާ އެތައް ސުވާލެއް އުފެދިގެން ދިޔައެވެ. ކަންބޮޑުވުމާއެކު އެކަކު އަނެކަކަށް ބަލާލީ ސުވާލުތަކުން ފުރިގެންވާ ނަޒަރަކުން ނެވެ.
ޕޮލިހަށް ލިބިފައިވާ މަޢުލޫމާތަކާއި ގުޅިގެން އެގޭގައި ދިރިއުޅެމުންދާ ނިޒްމާގެ ކޮޓަރި ބަލައި ފާސްކުރާން ބޭނުންކަމަށް ޕޮލިހުންގެ ބޭކަލުން ބުނުމުން ނިސްވާގެ ކަންބޮޑުވުން އިތުރުވެގެން ދިޔައެވެ. އަދި އެއީ ކީއްވެގެންތޯ އަވަސް އަވަހަށް ސުވާލު ކުރިއިރު އޭނާގެ ދެލޮލުން ކަރުނަ ހިލިއްޖެއެވެ. އެހެނަސް ފާއިދު ދެމުންދިޔަ ހިތްވަރާއި ނަސޭހަތުގެ ސަބަބުން ނިސްވާ ކޮންމެވެސް ވަރަކަށް ހަމައަކަށް އެޅޭގޮތް ވިއެވެ.
ނިސްވާއަށް އެތައް ހިތްވަރަކާއި ނަސޭހަތްދީ އޭނާ ކޮންމެވެސް ވަރަކަށް ހަމައަކަށް އެޅުވުމަށްފަހު، ގެންގޮސް ގޮނޑީގައި ބޭންދިއެވެ. އަދި އެޢާއިލާގެފަރާތުން ޕޮލިހުންނަށް ދޭންޖެހޭ އެހީތެރިކަމާއި އެއްބާރުލުން ދިނުމުގެ މަސައްކަތް ފާއިދު ފެށިއެވެ.
ކޮންޕިއުޓަރުން ނެޓުން ކޮންމެވެސް މަޢުލޫމާތެއް ހޯދުމުގެ މަސައްކަތް ކުރަމުންދިޔަ ނިޒްމާ ސިއްސައިގެން ދިޔައީ ކޮޓަރީ ދޮރުފަތުގައި ޓަކި ޖަހާލަމުން ކޮންމެ ވެސް މީހަކު އޭނާއަށް ގޮވާލިއަޑަށެވެ. ކަންފަތުގައި އަޑުޖެހުމާއެކުވެސް އެއީ އޭނާގެ ދޮންބައްޕަ ފާއިދުގެ އަޑުކަން ނިޒްމާ އަށް ޔަގީންވިއެވެ.
މިގަޑީގައި ފާއިދު ގޮވުމުން ކޮންމެވެސް ވަރަކަށް ހައިރާންވެ ސުވާލު އުފެދުނު ނަމަވެސް ނިޒްމާ މަޑުމަޑުން ތެދުވެގެން އައިސް ދޮރު ހުޅުވާލިއެވެ.
ކޮޓަރީ ދޮރުކައިރީގަ ތިބި ޕޮލިހުންގެ ބޭކަލުން ފެނުމާއެކުހެން ނިޒްމާ ސިއްސައިގެން ދިޔައެވެ. އެކަމުގެ ސަބަބުން ލިބުނު ހައިރާންކަމާއި ނުތަނަވަސްކަމާއެކު އެއްފަހަރާ އެތައް ސުވާލެއް ވެސް އުފެދިގެން ދިޔައެވެ.
ޕޮލިހަށް ހުށަހެޅިފައިވާ މައްސަލައަކާއި ގުޅިގެން ނިޒްމާގެ ކޮޓަރި ބަލައި ފާސްކުރާން ބޭނުންކަމަށް ޕޮލިހުން ވިދާޅުވުމާ އެކުހެން ނިޒްމާގެ ހައިރާންކަމާއި ނުތަނަވަސްކަން އިތުރުވެ ސުވާލުތައް ވެސް އިތުރުވެގެން ދިޔައެވެ.
ޕޮލިހުން ބޭނުންވިފަދައިން އޭނާގެ ކޮޓަރި ބަލައި ފާސް ކުރުމާމެދު އެއްވެސް އިޢުތިރާޒެއްނެތް ކަމަށް ނިޒްމާ ބުންޏެވެ. ހަމައެހެންމެ ނިޒްމާއަކީ ތިޔަބޭކަލުން ތިޔަ ހީކުރައްވާފަދަ އަހުލާގު ގޯސް ހަޑިހުތުރު ގޮތްތަކަށް އުޅޭ، ދީނާއި ހިލާފު ތަކެތި ބޭނުންކުރާ މީހެއް ނޫންކަމަށް ތަކުރާރުކޮށް ބުނަމުންދިޔައެވެ. އަދި މިގެއަށް ތިޔަ އާދެވުނީ އޮޅުކަމުން ކަމަށް ހީވާ ކަމަށާއި ރަނގަޅު މަޢުލޫމާތު ހޯދައި ދާން ބޭނުންވާ ގެއަށް ދިއުމަށް ބުނަމުންދިޔައެވެ.
ނިޒްމާގެ ރަނގަޅު އަހުލާގާއި އޭނާއަށް ކުރާ އިތުބާރާއި ޔަގީންކަމުގަ އެކޮޓަރިއާ ދިމާއަށް ބަލަހައްޓައިގެން ނިސްވާ އިނެވެ. އޭރު އޭނާގެ މަގަތުން އިށީންދެލައިގެން އޭނާއަށް ހިތްވަރާއި ނަސޭހަތް ދިނުމުގަ ފާއިދު އިނެވެ.
ނިޒްމާގެ ކޮޓަރި ބަލައި ފާސްކުރަމުން ދިޔަ ޕޮލިހުންގެ ބޭކަލުންނަށް އެކޮޓަރީގައިވާ އެނދުގެ ގޮދަޑިދަށުން ފެނުނު ޕެކެޓްތަކާއެކު ނިޒްމާ ވެސް ދިޔައީ ސިއްސައިގެން ނެވެ. ހައިރާންވެ ސުވާލު އުފެދުނު އިރު، ވީ ދެރައާއެކު ދެލޮލުން ކަރުނަ ހިލިއްޖެއެވެ. ނޫނެކޭ ބުނެ ދެއަތަކަށް
ބޯ ހޫރާލަމުން ރޮއިގަނެވުނީ އެއްވެސް އިހްތިޔާރަކާ ނުލައެވެ.
ނިޒްމާ ރޮއިގަތްއަޑާއެކު ދުވެފައި ކަހަލަގޮތަކަށް ނިސްވާ އައިސް ކޮޓަރިއަށް ވަތްއިރު އޭނާގެ ފަހަތުން ކަހަލަގޮތަކަށް ފާއިދު ވެސް އައިސް ވަނެވެ.
ކޮޓަރިތެރޭން ފެނުނު މަންޒަރާއެކު ނިސްވާއަށް ވެސް ރޮއިގަނެވިއްޖެއެވެ. ނުރޮއި ހިތްވަރުކުރުމަށް ނިސްވާގާތު ފާއިދު ބުނަމުން ދިޔައެވެ. ހަމައެހެންމެ އެމީހުނަށް ހިލަމެއް ވެސް ވެނުލާ ނިޒްމާ އެވަރުގެ ބޮޑުކަންތައްގަނޑެއް ހިންގާލީތީ ދެރަވެ ހިތާމަކުރާ ކަމަށާއި ހައިރާންވާ ކަމަށް ތަކުރާރުކޮށް ފާއިދު ބުނަމުން ދިޔައެވެ. އަދި ނިޒްމާގެ އެޢަމަލުތަކުގެ ސަބަބުން ޢާއިލާ ބަދުނާމްވުމާއި މަންމަ އާއި ބައްޕައަށް ލިބުނު ހިތާމަ އާ ހިތްދަތިކަމުގެ ޒިންމާ ވެސް ނިޒްމާ އުފުލާން ޖެހޭނެކަމުގައި ތަކުރާރުކޮށް ބުނަމުންދިޔައެވެ.
ކުއްލިއަކަށް ކަހަލަގޮތަކަށް މިދިމާވި ކަންތައްގަނޑުގެ ސަބަބުން ލިބުނު ހިތާމައާ ހިތްދަތިކަމުގަ ރޯލަ ރޯލަ ހުރި، ނިޒްމާއަށް ފާއިދުގެ އެ ވާހަކަތަކުގެ ސަބަބުން ލިބެމުންދިޔަ ހިތާމައާ ހިތްދަތިކަން އިތުރުވަމުން ދިޔައެވެ.
ވަގުތުތައް ފާއިތުވަމުންދިޔައިރު ޕޮލިހުން އެބޭކަލުންގެ މަސައްކަތާއިގެން ކުރިޔަށް ދިޔައެވެ.
ނިޒްމާގެ ކޮޓަރި ބަލާންވީ ވަރަށް ބަލައި ފާސްކުރާންވީ ވަރަށް ފާސްކޮށް ނިންމާލުމަށްފަހު ނިޒްމާ ގޮވައިގެން ޕޮލިހުން އެގެއިން ނުކުތްއިރު މެންދަމުން އަލިވެ ދޭއް ވެސް ޖަހައިފިއެވެ.
ލިބުނު ހިތާމައާއި ހިތްދަތިކަމުގެ ސަބަބުން ރޯލަރޯލަ އޮތް ނިސްވާ ހަމައަކަށް އެޅުވޭތޯ ފާއިދު މަސައްކަތް ކުރަމުން ދިޔައެވެ.
ޕޮލިހުން ކުރަމުންދިޔަ ތަހުގީގަށް ބަރާބަރަށް އެހީތެރިކަމާއި އެއްބާރުލުން ދެމުންދިޔަ ނިޒްމާ، އޭނާއާ ދެކޮޅަށް ކުރަމުންދިޔަ ދައުވާއަށް ދެކޮޅު ހަދަމުންދިޔައެވެ. ހަމައެހެންމެ އޭނާއަކީ ދުވަހަކު ވެސް އެފަދަ ޢަމަލެއް ހިންގާފައިވާ މީހެއް ނޫންކަމާއި އެފަދަ ޢަމަލެއް ހިންގާން ގަސްދު ވެސް ކުރާ މީހެއް ނޫންކަމަށް ބުނަމުން ދިޔައެވެ.
ނިޒްމާގެ ޓެސްޓްތަކުގެ ނަތީޖާތަކުން ދައްކާގޮތުން އޭނާ އެފަދަ އެއްވެސް އެއްޗެއް ބޭނުންކޮށްފައި ނުވާކަން ޔަގީންވިއެވެ. އެހެނަސް އެތަކެތި ފެނުނީ އޭނާގެ ކޮޓަރިން ކަމަށްވާތީ އެކަން އިތުރަށް ތަހުގީގުކުރަމުން ދިޔައެވެ.
ނިޒްމާގެ ކޮޓަރީ އެނދުގޮޑިދަށުން ފެނުނު ތަކެތި ޗެކްކުރަމުންދިޔަ ފަރާތްތަކަށް އެތަނުން ޕެކެޓެއްގެ އެއްކަނުންއިން ފިންގަރޕްރިންޓެއް ފާހަގަ ކުރެވުމާއެކުހެން އިތުރު ވިސްނުމަކަށް ދާން ޖެހިއްޖެއެވެ. އެއާއެކުހެން މަސައްކަތްތަކަށް ބަދަލުތަކެއް ގެނައެވެ.
ޕޮލިހުން ކުރަމުންދިޔަ ތަހްގީގުތަކާއި އެތަނުން ފެނުނު ތަކެތިން ފެނުނު ފިންގަރޕްރިންޓް ނިޒްމާއާ ދިމާނުވާތީ އިތުރަށް އެކަން ދިރާސާ ކުރުމުގެ ގޮތުން ނިސްވާ އާއި ފާއިދު ޕޮލިހަށް ހާޒިރުކުރުމުން، ފާއިދު ވަރަށް ހިތްހަމަ ނުޖެހުނުކަން އޭނާގެ ހަރަކާތްތަކާއި ބަސްމަގުން ވަރަށް ރަނގަޅަށް އެނގުނެވެ.
ނިޒްމާގެ ކޮޓަރިން ފެނުނު މަސްތުވާތަކެތިން ފެނުނު ފިންގަރޕްރިންޓަކީ ފާއިދުގެ ފިންގަރޕްރިންޓްކަން ޕޮލިހުންކުރި ޓެސްޓްތަކުން ޔަގީން ވިއެވެ. އެވާހަކަތައް ޕޮލިހުން ދެއްކުމުން ފާއިދު ރުޅިގަދަވެ އެކަމާ ދެކޮޅަށް އަޑުގަދަކޮށް ޒުވާބު ވެސް ކުރިއެވެ.
ޕޮލިހުންގެ ވާހަކަތަކާއި ދެކޮޅުހަދައި ޒުވާބުކޮށް އަޑުގަދަކުރަމުންދިޔަ ފާއިދަށް، ކުރިއެރޭނެ އެއްވެސް ގޮތެއްނެތި އަނގަ ބެދޭގޮތް ވެއްޖެ އެވެ. ގަބޫލު ކުރާން ބޭނުންނުވި ނަމަވެސް އެއްބަސް ނުވާން މަސައްކަތް ކުރަމުންދިޔަ ނަމަވެސް އެއީ އޭނާގެ ފިންގަރޕްރިންޓެވެ. އެކަން އެއޮތީ ވަރަށް ރަނގަޅަށް ފެންނާށެވެ.
ހަދާނެގޮތް ހުސްވެ ހަތަރުއުދަރެސް ފެނުޖެހި ކުރިއެރޭނެ އެއްވެސް ގޮތެއް ނެތުމުން ފާއިދު އޭނާގެ ކުށަށް އިޢުތިރާފު ވިއެވެ. އަދި ނިސްވާ އާއި ނިޒްމާގެ ކިބައިން މަޢާފަށް އެދެމުން އެކަންކުރީ އޭނާ ކަމަށް ބުންޏެވެ. ހަމައެހެންމެ އޭނާ އެކަން ކުރި ގޮތާއި އެގޮތަށް އޭނާ އެކަން ކުރީ ކީއްވެގެންކަން ވެސް ބުނެދިނެވެ.
ނިސްވާ އާއި އަލީ ލިބިފައިވާ ހަމައެކަނި ދަރިއަކީ ނިޒްމާއެވެ. ނިޒްމާ އާއި ނިސްވާ އަދި ފާއިދު މިހާރު ދިރިއުޅެމުންދާ ގެއަކީ ނިޒްމާގެ ބައްޕަފަރާތުން ނިޒްމާއަށް ވާރުތަވެ ނިޒްމާގެ އެދުމުގެމަތިން ނިސްވާއަށް ރަޖިސްޓްރީކޮށްފައިވާ ގެއެކެވެ. އެހެންކަމުން ފާއިދު މަސައްކަތް ކުރީ ނިޒްމާގެ ދުވަސް ދުއްވާލާ، ނިސްވާގެ ބޮލަށް އެރިގެން އެގެ ހޯދާން ނަމަވެސް އެކަން ކާމިޔާބު ވާގޮތެއް ނުވިއެވެ.
އެ ފިންގަރޕްރިންޓް ނެތްނަމަ އޭނާއަށް ކާމިޔާބުވާނެކަން ފާއިދަށް ޔަގީނެވެ. އެހެނަސް ހެދުނު އެންމެ ކުޑަކުޑަ ގޯހަކުން މުޅި ރޭވުން ނާކާމިޔާބުވެ މީހާ ފަލީހަތްވީއެވެ.
( ނިމުނީ )