ނަމަ…

މިހާރު ހިތަށް އަރައެވެ. އެ ހިތުގެ ޝަކުވާތައް އަޑު އެހުނު ނަމައެވެ. ވާހަކަ ދައްކަން އުޅުނު ވަގުތު އަޑު އެހުނު ނަމައެވެ. ރޮމުން އައި ވަގުތު މަސަލަސް ކުރެވުނު ނަމައެވެ. އަނިޔާވި ވަގުތު ޒަޙަމުގައި ބޭސް އެޅުނު ނަމައެވެ. ލޯބިން ކައްކައިދިން ދުވަހު ކެވުނު ނަމައެވެ. ކަމަކު އެދުނު ދުވަހު އެ ކަމެއް ކޮށްދެވުނު ނަމައެވެ. ނަމަވެސް ކުރާނީ ކީއްހެއްޔެވެ؟ ނަމައަކުން ކެއްކޭނެ ރިހައެއް މިއަދަކު ނެތެވެ. އަހަރެންގެ ފަރުވާކުޑަކަމާ ޖާހިލުކަމާ ހިތްހަރުކަމުން އެ ލޯބި ނެތި ދިޔައީއެވެ. އެންމެ ފަހު ވަގުތުވެސް އަހަރެންގެ ޚިދުމަތުގައި ހުރެފައެވެ. ބުނަންް ހެއްޔެވެ؟ އެއީ ހަމަ ޖަވާހިރެކެވެ. އެކަހަލަ މީހެއް ދުވަހަކުވެސް ނުލިބޭނެއެވެ.

މި ދައްކަނީ އަހަރެންގެ އަންހެނުންގެ ވާހަކައެވެ. އަހަރެންދެކެ ފުރާނަ ފަދައިން ލޯބިވި މަނާލްގެ ވާހަކައެވެ. އަހަރެންގެ ލޯބީގެ އިންތިޒާރުގައި ހުރެ މި ދުނިޔެ ދޫކުރި މީހާގެ ވާހަކައެވެ.

މަނާލްއަކީ އަހަރެން މާމިގިއްޔަށް ކުރި ދަތުރެއްގައި ދިމާވި ކުއްޖެކެވެ. މަގު އޮޅިގެން އުޅޭ ގެސްޓްހައުސްއަށް ނުދެވިފައި ހުއްޓާ އަހަރެންނަށް އެހީވީ މަނާލްއެވެ. އެދުވަހުވެސް މަނާލް ފެނިފައި އަހަރެންގެ ހިތުގައި ފޮނި ރާގެއް ކުޅެލެވުނެވެ. ވާނީވެސް އެހެން ނޫންހެއްޔެވެ. ހަމުގެ ކުލަ އައްޔެވެ. އާދަޔާ ޚިލާފަށް ދިގު އިސްތަށިގަނޑެވެ. ހެޔޮވަރެއްގެ އިސްކޮޅެކެވެ. ކުޑަކުޑަ ވަށް މޫނެކެވެ. ތުނި ތުންފަތެކެވެ. ފިޔާތޮށިކުލައިގެ ނާޒުކު މަލެއްފަަދައެވެ. ފުން ކަނޑެއްފަދަ ލޮލެކެވެ. ހިމަ ހޯލި އިނގިލި ތަކެވެ. އެއީހަމަ ރީތިކަމުގެ މިސާލެކެވެ. އައިބެއް ނުވާ ފުރިހަމަ އިންސާނެކެވެ.

ފުރަތަމަ ބައްދަލުވުމަކީ އެއީއެވެ. އޭގެ ފަހުން އަހަރެން އެ ރަށުގައި ހޭދަކުރި 2 ދުވަހުވެސް މަނާލްއެއް ނުފެނުނެވެ. މަނާލްއާ ބައްދަލުކޮށް ނުލާ ފުރަން ހިތް ނޭދުމުން ރައްޓެެއްސެއްގެ އެހީގައި މަނާލްގެ ނަންބަރު ހޯދީމެވެ. އަދި ގުޅާ ދިމާ ކުރަން އެދުނީމެވެ. ފަސްޖެހުމެއް ނެތި މަނާލްވެސް އެއްބަސްވީތީވެ އަހަރެން ހައިރާންވިއެވެ. އެހެންނަމަވެސް އުފާވެސް ވިޔެވެ. ފެހި ސިގުނަލް ލިބުނީތީއެވެ.

ޖެހިގެން އައި ރޭ އަހަރެމެން ދެމީހުން ބައްދަލު ކުރީ އަތިރި މަތިންނެވެ. ގަޑި ކީ ދިހަގަޑި ބަޔަށެވެ. ނަމަވެސް އަހަރެންނަށް ދިމާވި ކުޑަ ކަމެއްގެ ސަބަބުން ދިމާވެވޭ ވަރުވީ ދަންވަރު ބާރަ ޖަހަން ވެފަ ހުއްޓައެވެ. ކުރަން އުޅުނު ކަންތައް ކޮށް ނިންމާފައި އަވަސް ފިޔަވަޅު ތަކެއްގައި އަހަރެން އަތިރިއަށް ދިޔައީމެވެ. އިންތިޒާރުގައި މަނާލް އިންތަން ފެނި އަހަރެންނަށް ހީލެވުނެވެ. އެހެން އިންނައިރުވެސް ހާދަހާވާ ރީއްޗެވެ. އިސްތަށިގަނޑު ވަޔާ ހޫރެން ދޫކޮށްލާފައި އިން އިރު ލައިން ހުރި ހުދު ގަމީސްކޮޅާ ޖިންސްގެ ސަބަބުން ހޫރެއްފަދައެވެ.

“ހެއި ބިއުޓިފުލް… ސޮރީ ލަސްވީމަ… މި އީތަންގެ ސަބަބުން ލަސްވީ…” މަނާލް ކައިރީ އިށީންނަމުން ލަސްވި ސަބަބު އޮޅުން ފިލުވައި ދިނީމެވެ. ޖަވާބަކަށް މަނާލް ހީލިއެވެ. އެ ހީލުން ފެނިފައިވެސް އަހަރެން މޮޔަވި ކަހަލައެވެ. “ކީއްވެ ދިމާ ކުރަން ބުނީ؟…” މަނާލް އަހާލިއެވެ. “މާ ދިއުޅި ދިގު ކުރާކަށް ނެތިން… އަހަރެންނަށް މަނާލް ވަރަށް ކަމުދޭ… ފުރަތަމަ ފެނިލުމުންވެސް މަނާލް އަހަރެންގެ ހިތުން ޖާގަ ހޯދައިފި… ތި ރީތިކަމާ ހިތްހެޔޮކަން އަހަރެންގެ ހިތް ފަހަތަ ކޮށްފި… ސޯ މަނާލް… ބީ މައިން…” މަނާލްއާ ހަތަރުކަޅި ހަމަކޮށްލަމުން އަހަރެން އިއްވީމެވެ. މަނާލްގެ މޫނުމަތިން ފުރަތަމަ ފެނުނީ ހައިރާން ކަމެވެ. ނަމަވެސް ދެވަނަ ސުކުންތުގައި ހިނިތުން ވެލައިފިއެވެ.

“ތަފާތު މީހެއްތީ… ފުރަތަމަވެސް ދިމާލަށް ބުނެލީ ވިއްޔަ… އަހަރެންނަށްވެސް ކަމުދޭ ޝަފްވާން… އަހަރެން ޝަފްވާންގެ ހައްގަކަށް ވާން ބޭނުން…” މަނާލްގެ ކޯތާފަތް ރަތް ކަމުން ހީވަނީ އެހެން ފަދަ ކަމެއްހެންނެވެ. އަހަރެން މަނާލްއާ ތަންކޮޅެއް ކައިރިއަށް ޖެހިލީމެވެ. އަދި އަތް ދަމާލީމެވެ. ހުއްދައަކަށް އަހާ ފަދައިންނެވެ. މަނާލް ބޯ ޖަހާލުމާއެކު އެންމެ ސުކުންތެއްވެސް ބޭކާރު ނުކޮށް އެ ހަށިގަނޑުގައި ބައްދާލީމެވެ. ދުރުވެލީ އިރުކޮޅެއް ފަހުންނެވެ. “އަހަރެން ރަށަށް ދެވުނުހާ އަވަހަކަށް މަންމަމެންނާ ވާހަކަ ދައްކާނެން… އެއަށްފަހު އަންނާނެން މަނާލް ބަލާ…” ލޯތްބާއެކު އަހަރެން ބުނެލީމެވެ.

އެރޭގެ ބައްދަލުވުން ނިމުނީ އަހަރެމެން ދެމީހުންގެ ލޯބީގެ ވާހަކަ ލިޔަން ފަށައިގެންނެވެ. މަނާލް އަހަރެންގެ ހައްގަކަށް ހެދުމުގެ ފޮނި އުންމީދުގައި ޖެހިގެން އައި ދުވަހު އަހަރެންގެ ރަށަށް އަހަރެން ދިޔައީމެވެ. އަދި މައިންބަފައިންނާ މަނާލްގެ ވާހަކަ ހިއްސާކޮށް ވީހާވެސް އަވަހަކަށް ކައިވެނި ކުރަން ބޭނުންވާ ވާހަކަ ބުނެލީމެވެ. މައިންބަފައިންގެ އެއްބާރުލުން އެންމެ ފުރިހަމައަށް ލިބުނެވެ.

ޖެހިގެން އައި ދެމަސް ތެރޭ އަހަރެންނާ މަނާލްގެ ކައިވެނި ކުރެވި މަނާލް ގޮވައިން އަހަރެންގެ ރަށަށް ބަދަލުވީމެވެ. ކައިވެނީގެ ފަހުން އަހަރެން ބޭނުންވީ ވަކިން އުޅެންކަމުން ވަކިން އެޕާޓްމެންޓަކަށް ބަދަލުވީމެވެ. ކައިވެނީގެ ހަދިޔާއެއްގެ ގޮތުން ބައްޕަވަނީ އަހަރެންނަށް އެ އެޕާޓްމެންޓް ގަނެދީފައެވެ.

ކައިވެނިކޮށްގެން އުޅުނު ފުރަތަމަ ދުވަސްކޮޅު އަހަރެންނަށް މަނާލްގެ ކިބައިން އާ ކަމެއް ފާހަގަވިއެވެ. އެއީ މަނާލް ނިދީގައި ސިއްސަ ސިއްސައިގެން ދާ ކަމެވެ. ނިދީގައި ރޮމުން ހޭލާކަމެވެ. އެކަންތައްތައް ތަކުރާރުވާން ފެށުމުން އަހަރެން މަނާލް ކައިރީ އަހާލީމެވެ. “އަހަރެން ކުޑައިރު ސިހުރު ކަންތައް ޖެހުނު… އޭގެ ފަހުން ވާ ގޮތެއް މީ…” މީ މަނާލްގެ ޖަވާބެވެ. މަނާލްގެ އެ ޖަވާބަށް ފަހު އަހަރެން ދެން އެކަމަކާ ނުވަމެވެ. އެހެނީ ސިހުރު ކަންކަމަކީ އަހަރެން އެހާ ގަބޫލު ކުރާ ކަމެއް ނޫނެވެ. މިބުނީ ސިހުރު ގަބޫލު ނުކުރާ ވާހަކައެއް ނޫނެވެ. ސިހުރުން ރަނގަޅު ވުމަށްފަހުވެސް އޭގެ އުނދަގޫ ވާކަމަށް ގަބޫލު ނުކުރާ ވާހަކައެވެ.

އާންއެކެވެ. އަހަރެން މަނާލްގެ އެ ވާހަކައެއް ގަބޫލެއް ނުކުރަމެވެ. އަހަރެން ހިތުން އެއީ މަނާލް، އަހަރެންގެ ސަމާލުކަން ހޯދަން ކުރާ ކަމެކެވެ. މަނާލް ދެކެ ވީ ލޯބި، އެ ވިޔާނުދާ ޙިޔާލުން ފަނޑުވާން ފެށިއެވެ. މަނާލްއަކީ ކަންދައްކަން އުޅޭ މީހެއްގެ ގޮތުގައި އަހަރެންގެ ސިކުނޑި ވިސްނައިދޭން ފެށި ހިސާބުން މަނާލްގެ ކަންކަމުގައި އަހަރެން ފަރުވާކުޑަ ކުރަން ފެށީމެވެ. އޮފީހުގައި އުޅޭ ވަގުތު ގިނަ ކުރީމެވެ. ގެޔަށް އަންނަނީ މަނާލް ނިދާނެހާ އިރު ކޮށްފައެވެ. ބައެއް ރޭރޭ މަނާލް އަހަރެންގެ އިންތިޒާރުގައި ކާ މޭޒު ދޮށު އިންދާ ނިދިފައި އިނދާ ފެނެއެވެ. އަހަރެން ގޮވާލީމާ ލޯތްބާއެކު ކާން ބުނާނެވެ. ލަހުން އައީތީ ޝަކުވާ ކުރުމަކީ މަނާލްގެ ކަމެއް ނޫނެވެ. އެގޮތަށް މަނާލް ކާން ބުނާ ރެޔަކު އަހަރެން އަބަދުވެސް ބުނަނީ މިއައީ ބޭރުން ކައިގެން ކަމަށެވެ. “މީގެ ފަހުން މަނާލް މިހާ ދަންވަންދެން އަހަރެން ކެއީމަ ނިދަންނޭ ކިޔާފަ ނީންނާތި… ލަހުން އަންނަންޔާ އަހަރެން އަންނާނީ ކައިގެން…” މިއީ އެއްރެޔަކު އަހަރެން މަނާލްއާ ދިމާލަށް ބުނި އެއްޗެކެވެ. އަހަރެންނާ އިނދެގެން ވީހާ ދުވަހެއްގައި މަނާލް އަލަށް ޝަކުވާކޮށް ރުއި ރޭވެސް މެއެވެ.

“ޝަފްވާން… އަހަރެންނަށް ޝަފްވާން ހިތްހަމަ ނުޖެހޭ ކަމެއް ކުރެވުނީތަ؟… ވާހަކަ ދައްކައިން މައްސަލައެއް ހައްލުވާނީ… އަނގައިން ނުބުނެ ތިހެން އަހަރެން ދުރުކޮށްލީމަ މިހިތަށް ކުރާ އަސަރު ނޭންގެނީތަ؟… އަހަރެން ޝަފްވާން ދެކެ ވާ ލޯބި އިހުސާސް ނުކުރެވެނީތަ؟…” ރޮމުން މަނާލް އެނދުމަތީގައި އިށީންދުނެވެ. “މަނާލްގެ ތި ޑްރާމާ ބެލުމަށްވުރެ އަހަރެންނަށް މާ ރަނގަޅު އޮފީސްތެރޭ އިންނަންވެސް…” އެނދުގެ އެއްފަޅީގައި އޮށޯންނަމުން އަހަރެން ބުނެލީމެވެ. “ޝަފްވާން… ޕްލީސް…” މަނާލް އަހަރެންގެ އަތުގައި ހިފައި ތަޅުވާގަތެވެ. އެއާއެކު އެރި ރުޅިން އަހަރެން ހުރި ބާރެއްލާ މަނާލް ފޮޅުވާލީމެވެ. އެ ބާރުމިނުގައި ވެއްޓި މަނާލްގެ ބޯ ޖެހުނީ އެނދު ކައިރީ އިން ސައިޑް ޓޭބަލްގައެވެ. ޖެހުނުލެއް ބާރުކަމުން ފަޅައިންގޮސް ހޯސްލާފައި ލޭ އަންނަން ފެށިއެވެ. އެހެންނަމަވެސް އަހަރެން ކަހާތަން ހިރުވާވެސް ނުލާ އަނެއްފަރާތަށް އެނބުރުނީއެވެ. މިހާރު ހިތަށް އަރައެވެ. އެރޭ ވާހަކަދައްކަން އުޅެވުނު ނަމައެވެ. ބޯ ފަޅައިން ދިޔަވަގުތު ބޭސް އަޅައިދެވުނު ނަމައެވެ. އެރޭ މޮޑެދިން ބަތްތަށި ކެވުނު ނަމައެވެ.

އޭގެ ދުވަސްތަކެއް ފަހެވެ. ބޮލުގައި ރިއްސާތީ އިރުވެސް ނޯއްސެނިސް އަހަރެން ގެޔަށް އައީމެވެ. އެހެން ދުވަސް ތަކާ ޚިލާފަށް މިއަދު މޭޒު މައްޗަކު ކާން ނަގާފައެއް ނެތެވެ. ޓީވީން ލަވައެއްގެ އަޑު އިވޭކަށް ނެތެވެ. މުޅިތަން އާދަޔާ ޚިލާފަށް ހިމޭންވެފައިވާ ކަހަލައެވެ. ހައިރާންވެ ހުރެ އަހަރެން ކޮޓަރިއަށް ބޯ ދިއްކޮށްލީމެވެ. އެއާއެކު ފެނުނު މަންޒަރުން ފައިދަށުން ބިންގަނޑު ދެމިގެން ދިޔަކަހަލަ އިހުސާހެއް ކުރެވުނެވެ. ބިންމަތީގައި ހަރަކާތެއް ނެތިފައި އޮތް މަނާލް ކައިރިއަށް އަހަރެންނަށް ދެވުނީ ދުވެފައެވެ. “މަނާލް… އޭތް… މަނާލް…” މަނާލްގެ ބޯ ނަގާ އަހަރެންގެ އުނގަށްލަމުން އަހަރެން ގޮވަން ފެށީމެވެ. އެހެންނަމަވެސް މަނާލް ލޯ ހުޅުވާ ނުލި ތާންގާއި ކުޑަވެސް ހަރަކާތެއް ކޮށެއް ނުލައެވެ. އެއާއެކު އަހަރެންގެ ހިތުގައި ބިރު ވެރިކަމުގެ ފުން ރާޅެއް ދުވެލިއެވެ. ތުރުތުރު އަޅާ ހާލު މަނާލްގެ ނޭފަތާ އަހަރެންގެ އިނގިލި ކައިރި ކޮށްލީމެވެ. އެއާއެކު އަހަރެންނަށް ބާރަކަށް ރޯން ފެށުނެވެ. އާންއެކެވެ. މަނާލްގެ ފުރާނައެއް ނެތެވެ.

ހަދާނެ ގޮތް ހުސްވެފައިވާ ހާލު އަހަރެން ފޯނުނަގާ މަންމައަށް ގުޅާލީމެވެ. “ކިހިނެއްވީ ދަރިފުޅާ؟… މީހަކަށް ކަމެއް ވީތަ؟…” އަހަރެން ހުއްޓާ ނުލާ ރޮމުން ދާތީ މަންމަ ހާސްވެފައި ސުވާލު ކުރިއެވެ. “މަންމާ… މަނާލް… މަނާލް…” ރޮވޭ ވަރުން އަހަރެންނަކަށް ވާހަކައެއް ނުދެއްކުނެވެ. މަންމަ ފޯނު ކަނޑާލިއެވެ. އޭގެ ފަނަރަ ވަރަކަށް މިނެޓުފަހުން މަންމައާއި ބައްޕަ ހުރީ އަހަރެން އުޅޭ އެޕާޓްމެންޓް ތެރޭގައެވެ. “ދަރިފުޅާ ޝަފްވާން…” ބައްޕަ އަަހަރެން ބިންމަތިން ނެގިއެވެ. އަދި މަނާލްގެ ހަށިގަނޑުވެސް ނަގާ އެނދުމަތީ ބާއްވާލިއެވެ. އެއަށްފަހު އެމްބިއުލޭންސްއަށް ގުޅިއެވެ. އެއިރު މަންމަ ހުއްޓުން އަރާފައި ހުއްޓެވެ. ބައްޕަ ގޮސް މަންމަގައިގާ ބައްދާލުމާއެކު މަންމަގެ ބަޑި ފަޅައިގެން ދިޔައެވެ. ހިތްހަމަ ޖެހޭ ވަރަށް ރޮއެ ނިމުމާއެކު މަންމަ ފޯނުނަގައި މަނާލްގެ މައިންބަފައިންނަށް ޚަބަރު ދިނެވެ.

އޭގެ އިރުކޮޅެއްފަހުން މަނާލް ހޮސްޕިޓަލަށް ގެންދެވުނެވެ. ޑޮކްޓަރުން ބަލާފައި ބުނީ މަނާލްއަށްވަނީ ހާޓްއެޓޭކެއް ޖެހިފައި ކަމަށެވެ. އެވަގުތު އަހަރެންގެ މޭ ފިތުނުކަހަލަ އިހުސާސެއް ކުރެވުނެވެ. އަހަރެންގެ ސަބަބުން ހިތާމަ ކޮށްކޮށް މަނާލްއަށް ހާޓްއެޓޭކެއް ޖެހި ނިޔާވުމަކީ އަހަރެންގެ މުޅި ނަފްސަށް ސިހުން ގެނުވި ކަމެކެވެ.

“ޝަފްވާން… މަނާލްގެ ބޮލަށް ކިހިނެއްވެފަ އެއިނީ؟…” ކުއްލިއަކަށް މަންމަ ކުރީ އަހަރެން އުންމީދުވެސް ނުކުރާ ކަހަލަ ސުވާލެކެވެ. ދޭނެ ޖަވާބެއް ނޭންގިފައި އަހަރެން ހުންނަން ފެށުމުން މަންމަ އައިސް އަހަރެންގެ މޫނުމަތީގައި ޖެހިއެވެ. ސިއްސައިގެން ދިޔަ ވަރުން އަހަރެންނަށް މަންމާއޭ ކިޔާފައި ގޮވާލެވުނެވެ. “މަންމާ އޭ؟… ލަދެއް ނުގަނޭތަ؟… ބަލަ އަހަރެން ޝަފްވާނަށް ދިން ތަރުބިއްޔަތު ހަމަ އެހާވެސް ގޯހީތަ އަންހެނަކަށް އަތް އިސްކުރާ ވަރެއްވީ؟… ކީކޭ ހިތަށް އަރައިން މަނާލް ގަޔަށް އަތް އިސްކުރީ؟…” މަންމަގެ އަޑުގައިވީ ނަފްރަތެވެ. “އަހަރެންނަށް… މާފު ކުރޭ މަންމާ…” އަހަރެން ރޮއެ ގަންނަމުން މަންމަގެ ފައިބުޑަށް ތިރިވީމެވެ.

“ޝަފްވާން…” އެވަގުތު ހޮސްޕިޓަލަށް ވަދެގެން އައީ މަނާލްގެ އާއިލާއެވެ. މަނާލްގެ މަންމައާއި ދޮންތަގެ ރުޔުމުގެ އަޑު އިވިފައި އަހަރެންގެ ހިތް ފިސްފިސް ވަމުން ދާހެން ހީވިއެވެ. އަހަރެންގެ ސަބަބުން މަރުވެ އެދިޔައީ ބައެއްގެ ފުރާނައެވެ. ލޯބިވާ އަންހެން ދަރިފުޅެވެ.

މަނާލްގެ އާއިލާއިން އަހަރެންނާ ދިމާލަށް ވަރަށް އެއްޗެހި ކިޔެވެ. މަނާލްއާ މެދު އަހަރެން ފަރުވާކުޑަ ކުރީއޭ ކިޔާފައެވެ. އާންއެކެވެ. އަހަރެންނަށް އެ ލޯތްބާމެދު ފަރުވާކުޑަ ކުރެވުނެވެ. އަނިޔާވެސް ކުރެވުނެވެ. ޖިސްމާނީ ގޮތުންނާއި ނަފްސާނީ ގޮތުންވެސް މެއެވެ. އަހަރެންނަކީ ޤާތިލެކެވެ. އަހަރެންނަކީ އަހަރެންގެ އަންހެނުންގެ ޤާތިލެވެ.

“ދަރިފުޅާ ޝަފްވާން… އާދޭކާން… ތިހެން އުޅުނެއް ކަމަކު ދެން މަނާލްއެއް ނާންނާނެ…” ޙިޔާލީ ދުނިޔޭގައި ގެންބެނިކޮށް ހޭވެރިކަން ވީ މަންމަގެ އަޑުންނެވެ.

އަހަރެން މަނާލްގެ ކަންމަކުގައި ފަރުވާކުޑަކޮށް ހެދީ މަނާލްދެކެ ލޯބި ނުވާތީއެއް ނޫނެވެ. އަހަރެންގެ ސިކުނޑި އަހަރެންނަށް ވިސްނައިދިން އެއްޗަކުންނެވެ. ބައެއްފަހަރު ސިކުނޑިއަކީ ތިމާގެ އެންމެ ބޮޑު ދުޝްމިނަށް ވަނީ މިހެންވެއެވެ. އެ ސިކުނޑީގެ ސަބަބުން އަހަރެން މަނާލްދެކެ ވާ ލޯބި ހިތުގައި ފޮރުވާ، ޖާހިލުކަން ދައްކަން ޖެހުނީއެވެ. އަހަރެންގެ ލޯބިވާ މަނާލްގެ ހަށިގަނޑުގައި ލަކުނު ލައްވަން ޖެހުނީއެވެ.

މަނާލްއެވެ. ލޯބިވާ މަނާލްއެވެ. އަހަރެންނަށް އަދި އެއް ފުރުސަތު ދޭށެވެ. ތި ދެއަތުން ކައްކާ އެއްޗެއްގެ ރަހަ ބަލާލަން ދޭށެވެ. ޝަކުވާ ކުރަމުން އަންނާށެވެ. އަހަރެން މިހިރީ މި ހުރިހާ ކަމެއް ކުރަން ތައްޔާރަށެވެ. މަނާލްއެވެ. ވަރަށް ލޯބިވެއެވެ…

=ނިމުނީ=