މަންޝާ (ފުރަތަމަ ބައި)

“އާހް… ނޫންންންން…. ދޫކޮށްފެލަ…. ދޫކޮށްފެލަ…. މީ ކޮންފަދަ ބޮނޑޮ ކަމަށް…. މަ ދޫކޮށްފެލަ…..”

އަޑުގެ ނެތްތަނަށް ހަޅޭއްލަވަމުން ނަވާރަ އަހަރުގެ ރޫހީ މަސައްކަތް ކުރަމުން ދިޔައީ އައްސާފައިވާ އޭނާގެ ދެއަތް މޮހާލެވޭތޯއެވެ. އެނދުގެ ދެފަރާތުގައިވާ ހޮޅިދަނޑީގައި ރޫހީގެ ދެއަތުގެ ކުޑަހުޅާ ހިސާބުންވަނީ އައްސާފައެވެ. ދެއަތުން ހޮޅިދަނޑީގައި ބާރަށް ހިފަހައްޓާލަމުން ރޫހީ ފުންމައިގެން ތެދުވެ އެނދުގައި އިށީނެވެ. އެނދުގެ ވަށައިގެން ތިބި މީހުންނާ ދިމާލަށް ނަޒަރު ހިންގާލިއެވެ. މޫނު މައްޗަށް ވެއްޓިފައި ހުރި އިސްތަށިތަކުގެ ނިވަލުން ރޫހީގެ ރުޅިވެރި މޫނު ފެންނަނީ ވަރަށްވެސް ބިރުވެރިކޮށެވެ. އެ ކޮޓަރީގައި ތިބި އެއްވެސް މީހަކު ވަކިކުރަން ރޫހީއަކަށް ނޭނގުނެވެ. އެއަށްވުރެ ބޮޑަށް އޭނާ އިނީ އެހެން ތާކަށް ދާން ބޭނުންވެފަައެވެ. އެހިސާބަކަށްދާން ކިތަންމެ ބޭނުންވި ކަމުގައިވީ ނަމަވެސް ރޫހީގެ އާއިލާ އޭނާ އެތަނަށް ދިޔަކަ ނުދޭނެކަން ކަށަވަރެވެ.

“ރޫހީ… ފެންފޮދަށް ބޯންވީނުން….” ރޫހީގެ ދޮންބެ ވާހަކަ ދައްކަމުން އައީ ފެންތައްޓެއް ހިފައިގެންނެވެ.

ފުން ނޭވާތަކެއް ބޭރުކުރަމުން ދިޔަ ރޫހީ އިނީ އިންތިހާއަށް ރުޅިގަދަވެފައެވެ. ނަމަވެސް ދޮންބެގެ އޯގާތެރި ފިރުމުންތަކަށް އޭނާ ބަލާލީ ތުއްތު ކުއްޖެއް ފަދައިންނެވެ. ފެންތަށި ތުނބުގައި ޖައްސަން މަސައްކަތް ކުރަން ފެށުމުން ރޫހީ ދެއަތަށް ބޯހޫރަން ފެށިއެވެ.

“ދޮންބޭ އަޅެ ޕްލީސް މިއަށް މޮހައި ދެރެފެލެ… އެޔާ ބޭހެއް… މަމިހެން އޮވެ ކެހެނަކަށް ސަލާމަށް ވޭނެއި… ޕްލީސް ދޮންބޭ…” ރޫހީ އޭނާގެ ދޮންބެއާއި ވާހަކަ ދެއްކީ ވަރަށް މަޑުމައިތިރިކޮށެވެ.

ރިޔާޒަށް މިއަޑުތައް އަހަން ވަރަށް ވެސް އުނދަގުލެވެ. މޭޒުމަތީ ފެންތަށި ބެހެއްޓުމަށްފަހު ފަސްއެނބުރި ބަލާވެސްނުލާ ރިޔާޒް ހިނގައިގަތީ ކޮޓަރިން ބޭރަށް ނުކުތުމަށެވެ. ދެރަވެ އިސްޖެހިފައި ރޫހީ އިނީ އޭނާގެ ދޮންބެގެ ފަރާތުން އެހީތެރިކަމުގެ އަތެއް ފޯރުކޮށްދޭނެ ކަމަށް އުއްމީދު ކޮށްގެންނެވެ. ނަމަވެސް ރިޔާޒްގެ ހަރަކާތް ހުރި ގޮތްފެނި ދޮންބެގެ ފަރާތުން އެހީއެއް ނުލިބޭނެކަން އެނގުމުން ރޫހީ ގާތަށް ވަރަށް ރުޅިއައެވެ. އިށީނދެގެން އިނދެ މީހާ ތެޅެމުން މިންޖުވާން ދެއަތަށް ލަކިޖަހަމުން ދިޔައިރު ރޫހީގެ އަތުގައި އައްސާފައިވާ ދިމާލުން ލޭގެ އަސަރު ފާޅުވޭވޭ ހުއްޓެވެ. އޭނާ މިހެން ތެޅޭއިރު ހީވަނީ ހަށިގަނޑުގެ އެތަން މިތަން ފުނޑާލަފާނެ ހެންނެވެ. އޭނާ ތެޅިފޮޅެމުން ދިޔަވަރަކަށް އެނދުގެ ދަގަނޑުތައް ތެޅޭ އަޑުވެސް އިވެމުން ދިޔައެވެ.

އައި.ޖީ.އެމް.އެޗްގެ ޕްރައިވެޓް ކޮޓަރިއެއްގައި އެނދުމަތި ކުރެވިފައިވާ ރޫހީގެ ހަށިގަނޑަށް އަރުވަމުން ދިޔަ ބާރު ފެނުނު ކޮންމެ މީހެއްގެ ހިތަށްވެސް ބިރުވެރިކަން ވަންނާނޭކަން ކަށަވަރެވެ. އެނދުމަތީގައި އޮތް ރޫހީގެ ހަށިގަނޑަށާއި މޫނަށް ޖައްސަމުން ދިޔަ ވައްތަރުތައް ބަލަންހުރި އާމިނަ ބަޑި ފަޅައިގެން ދިޔައެވެ. އެ މަންޒަރު ބަލަން އޭނާގެ މައި ލަގޮނޑިއަކަށް ކެތެއް ނުކުރެވުނެވެ. ކޮޓަރިން ބޭރަށް ނުކުތުމަށްފަހު، އެކޮޓަރިން ބޭރުގައި ފޯނުން މީހަކާ ވާހަކަ ދައްކަންހުރި ޟިރާރު ގާތަށް ގޮސް އާމިނަ ހުއްޓުނެވެ.

އާމިނަގެ މޫނަށް ބަލާލަމުން ޟިރާރު ފޯނު ކަނޑާލަމުން ޖަވާބުދިނެވެ. ” އާމިނާ…. އަލިބެ ތެބެއެއި… މިކަމާއި އަފިރިން ވޭނޑެނެލެއް މާ ލަސްވީ… ދެން މާގިނަ ވޭލާ ނިވޭހެއް… ރޫހީ ސަލާމަށް ކެރެވޭހެއް… ރިޔާޒް އެގެއި ސައިކަލާން އަލިބެ ނަގާ…” ޟިރާރުގެ އަތުގައި އާމިނަ ހިފާލީ އުއްމީދުން ފުރިގެންވާ ހާލުގައެވެ. އެމީހުންގެ ހުރި ހަމައެކަނި އަންހެން ދަރިފުޅު މި ހާލުގައި ނިމިގެންދާތަން ބަލަން ވަރަށްވެސް ހިތް ދައްޗެވެ.

ރޫހީގެ ބައްޔަކީ ނަފްސާނީ ބަލިކަމަށް ބުނަމުން ޑޮކްޓަރުން އެކިކަހަލަ ބޭސްފަރުވާ ދެމުންދިޔަ ނަމަވެސް މާ ބޮޑު ލުޔެއް ލިބޭތަނެއް އަދި ނުފެނެއެވެ. ކުރިން ހަށިގަނޑު ރަނގަޅުކޮށް ހުރި އުމުރުން ނަވާރަ އަހަރުގެ ރޫހީއަށް ބަލާލާ ކޮންމެ މީހަކުވެސް އެ މަންޖެގެ ހާލާމެދު ހަމްދަރުދީ ވާނެކަން ކަށަވަރެވެ. ހިކިގެންގޮސް އަނަރޫފަވެފައިވާ އެހަށިގަނޑުގައި އެއްވެސް ތާޒާކަމެއް ނެތެވެ. ލޯކައިރި ކަޅުވެ ވަޅުވަދެފައި ވާއިރު ލޮލުތެރެ ހީވަނީ ރަތްކަމުން އަނގުރު އަލިފާންހެނެވެ. ތުންފަތުގައި ތެތްކަމެއް ނެތުމުން ކުރަކިވެ ފަޅަފަޅައިގެން ގޮސްފައި ހުއްޓެވެ. އިސްތަށިގަނޑުވަނީ ފުސްބުރާފައެވެ. ހޭވިފައި އޮތްއިރު އިސްތަށިގަނޑުގެ ބަލިކަށިކަން ފާހަގަ ވެއެވެ. ރޫހީގެ މޫނާއި ހަށިގަނޑަށް ބަލާލާފައި މީހުން ބުނާނީ އޭނާއަކީ 25 އަހަރުން މަތީ އަންހެނެކޭ އެވެ.

ނަރުސްކުދިން ކޮޓަރިތެރެއަށް ވަދެގެން އައިސް ރޫހީގެ އައްސާފައިވާ އަތުގައި ހަރުކޮށްފައިވާ ކެނިއުލާގެ ތެރެއަށް އިންޖެކްޝަނެއް ޖަހާލިއެވެ. އޭރުވެސް ރޫހީގެ ކުރަކިވެފައިވާ ބަރުއަޑުން ވާހަކަ ދައްކަމުން ދިޔައީ މޮޔައެއް ހެންނެވެ. “މިއަށް މޮހެފެލަ… މިއަށް މޮހެފެލަ ޕްލީސް…..” އެ އިންޖެކްޝަން ޖެހުމަށްފަހު އެނދު ކައިރީ ހުރި ސްޓޭންޑްގައި އަޅުވާފައިވާ އައިވީ ފުޅި ނަރުސް ކުދިން އޭނާގެ އަތަށް ގުޅާލިއެވެ. މާގިނަ އިރުތަކެއް ނުވެ ރޫހީގެ އެސްފިޔަތަކަށް ބަރުވެ ދެލޯ މެރިއްޖެއެވެ. އޭރުވެސް އޭނާގެ ތުންފަތް ހަރަކާތް ކުރަމުން ދިޔައެވެ. ” މި އަށް… މޮހެ…ފެލަ… ޕްލީ….ސްސް”

*** *** *** *** *** ***

ފެންނަމުން ދިޔަ އިރުއޮއްސޭ ފުރިހަމަ މަންޒަރަށް ބަލަން މަންޝާއަށް އިނދެވުނީ އެ ފެންނަ ގުދުރަތީ ރީތި ކުލަތަކުގެ އަވައިގައި ޖެހިފައެވެ. ހަވީރުގެ ހިތްފަސޭހަ މާހައުލުގައި އެތައްބަޔަކު ކުޑަކުދިންނާ އެކީ ހިނގާލަން އައިސް އުޅުނެވެ. ޒުވާނުންގެ މަރުކަޒު ކައިރީގައި ހަދާފައިވާ ގޮނޑުދޮށުގައި އެއްބަޔަކު މޫދަށް އެރި މަޖާކުރަމުން ދިޔައެވެ. އެ މަންޒަރު ދުރުން ބަލަން އިން މަންޝާއަށް ފެންނަމުން ދިޔައީ އުފާވެރިކަމުގެ ކުލަތަކެވެ. ކުޑައެއްގެ ދަށުގައިވާ ބެންޗުމަތީގައި ހަމަޖެހިލައިގެން އިން މަންޝާ ފުންނޭވާއެއް ދޫކޮށްލިއެވެ. އޭނާގެ ހޭވިފައިވާ ކަޅު އިސްތަށިގަނޑު ވަޔާއި އެކީ ވިހުރެމުން ދިޔައެވެ. ދޭތެރެއަކުން އިސްތަށިގަނޑުގައި އަތް ހާކާލަމުން ކޮނޑުން އެއްފަރާތަށް އިސްތަށިގަނޑު ވައްޓާލައެވެ.

ބެންޗުމަތީގައި އިށީނދެލައިގެން ފޫހިކަމެއް ނެތި އެ މަންޒަރަށް ބަލަން އިނދެވުނީ އެ މަންޒަރުން މަންޝާއަށް ހިތްހަމަ ޖެހުމެއް ލިބެމުން ދާތީއެވެ. މަންޝާގެ އަތްދަބަހުގައިވާ ފޯނު ވައިބްރޭޓް ވާން ފެށުމުން ބެންޗުމަތިން ތެދުވީ ވަރަށް މަޑުމަޑުން ބަލައިގެންނެވެ. ފޯނަށް ބަލާލިއިރު މަންޝާ ގެއަށް ނައިސްގެން ލަސްވެގެން އެ ގުޅަނީ އޭނާގެ ފިރިމީހާކަން އެނގުމުން އަވަހަށް ޖަވާބު ދިނުމަށް ފޯނު ނަގާ ކަންފަތުގައި ޖައްސާލިއެވެ. “ހެއި ދޫނިގަނޑާ… ދެން އަވަހަށް ގެއަށް އާދެބަލަ… އެއޮއް އިރުއޮއްސެނީ….”

އިރުއޮއްސެމުން ދިޔަ މަންޒަރަށް ފަހު ފަހަރަށް މަންޝާ ފަސް އެނބުރި ބަލާލީ ހިތާ ދެކޮޅަށެވެ. ނަމަވެސް ފިރިމީހާ ގުޅުމުން އިތުރަށް އެތާ ހުންނަން އޭނާ ފަސްޖެހުނެވެ. މަންޝާއަކީ އަބަދުވެސް އެނާގެ ފިރިމީހާގެ ބަސް އަހާ ކިޔަމަަންތެރި އަންބެކެވެ. ރަސްފަންނުން ބޭރަށް ނުކުމެވެން އޮތްމަގުން ކުރިޔަށް ހިނގައިގަތީ ބަނޑުގައި ފިރުމާލަމުންނެވެ. މަންޝާ ލައިގެން ހުރީ ކަކުލާ ހަމަޔަށް އަންނަ ގަޔަށް ދޫ ޓީޝާޓު ފޮތީގެ އަތްކުރު ހެދުމަކާއި ސްކިނީއެކެވެ.

ފަސް މަހަށްދާ ބަނޑުގައި ފިރުމާލި އިރު މަންޝާގެ މޫނު މަތިން އުފާވެރިކަމުގެ ކުލަވަރު ފެންނަމުން ދިޔައެވެ. ” ހޫން… މިހާރު މިދަނީ…. ބައްޕި ގެއަށް ނައިސްގެން ބޭބީ ފޫހިވާތީ ހިނގާލަން ނުކުތީ…. މިދަނީ އިނގޭ…” ބަނޑުގައިވާ ތުއްތު ދަރިފުޅު ތޮޅިލުމުން ކުރި އިހްސާސް ބުނެދޭން ވަރަށް އުނދަގުލެވެ. ހީވީ މަންޝާ ދެއްކި ވާހަކައިގައި އެ ތުއްތު ކުއްޖާވެސް ބައިވެރިވެލީ ހެންނެވެ. ގެއާ ދިމާލަށް ދިޔުމަށް މަންޝާގެ ފިޔަވަޅު އަވަސް ކޮށްލިއެވެ. ތޮށިގަނޑާ ވީ ފަރާތުގައި ހުރެފައި މަގުގެ އަނެއްފަރާތު ދުވާރު މައްޗަށް ދިޔުމަށް މަގު ހުރަސް ކުރަން މަސައްކަތް ކުރިއިރު ފޯނުގައި ހުރެ އަޒީމް ދައްކަމުން ދިޔަ ވާހަކަތަކުން މަންޝާއަށް ހެވެމުން ދިޔައެވެ.

އެ ދަނޑިވަޅުގައި އެ މަގުން ބާރު ދުވެއްޔެއްގައި ދުއްވާފައި ނުކުތް ސައިކަލެއް އައި ނައި ދިމާލެއް ނޭނގި ދިޔައީ މަންޝާއާއި ދިމާލަށެވެ. މަންޝާއަށް ލިބުނު ހައިރާންކަމާއި އެކީ ދުއްވައިގަންނަންވެސް ނޭނގި އެހުރި ފިޔަވަޅު މަތީ ގަނޑުވެފައި ހުރެވުނެވެ. އެސްފިޔަ ޖަހާ ހާ އަވަސް މިނެއްގައި އެ ސައިކަލު އައިސް މަންޝާ ގައިގާ ޖެހި ދިހަ ފޫޓެއްހާ ދުރަށް މަންޝާ ވިއްސައިގެން ދިޔައެވެ. ބިރުން ތެޅިތެޅި އޮތް ހިތާކާއި އެކީ މަންޝާ އޭނާގެ ބަނޑުގައި ހިފަހައްޓާލަމުން އަޑުގެ ނެތްތަނަށް ހަޅޭއް ލަވައިގަނެވުނެވެ. “މަންމާ….”

ގުޅަވަރަކަށް މަގު މެދަށް މަންޝާ ބަންޑުން ވެއްޓި ޖެހުނެވެ. މަންޝާގެ އަތުގައިވާ ފޯނު ބިމުގައި ޖެހުނު ގޮތަށް އެ ފޯނުގެ ޑިސްްޕްލޭ ކުދި ކުދި ވިއެވެ. ކޮންޓްރޯލެއް ނެތި ދިޔަ ސައިކަލާއި އެކު އޭގައި ތިބި ދެމީހުންގޮސް އެރީ ތޮށިގަނޑަށެވެ. ތޮށިގަނޑުގައި ޖެހުމާއި އެކީ ސައިކަލުގެ ފަހަތުގައި ހުރި ޒުވާނާ ބުރައިގެން ދިޔަ ގޮތަށް ތޮށިގަނޑުން ބޭރުގައި އަތުރާފައިވާ ބަޖިޔާ ގާތަކުގެ މައްޗަށް ވެއްޓުނެވެ.

މަގު މަތީގައި ތިބި މީހުންތަކާއި ގޮނޑުދޮށުގައި ތިބި މީހުންތައް އެދިމާލަށް އެއްވަމުން ދިޔައެވެ. މަންޝާގެ ހަށިގަނޑަށް ގުޑުމެއްވެސް ގެންނާކަށް ނުކެރުނެވެ. ބަނޑުގައި ވާ ދަރިފުޅު ކުއްލި ކުއްލިއަށް ތެޅެމުން ދިޔަކަން މަންޝާއަށް ފާހަގަވިއެވެ. ބޮލުގެ އިސްތަށިގަނޑު ތެރެއަށް އާދަޔާޚިލާފަށް ފިނިވަމުން ދިޔައެވެ. ލޯ ކަރުނުން ފުރިގެން ދިޔައެވެ. ބޮލުގެ ބައެއް ފަޅައިގެން ގޮސްފައި ވުމުން މަންޝާގެ ބޮލުން ލޭ ފައިބަމުން ދިޔައެވެ. ވަށައިގެން ފެންނަމުން ދިޔަ މަންޒަރު މަންޝާގެ ލޯމަތިން ފުސްވަމުން ދިޔައެވެ. ބިންމައްޗަށް ޖެހުނުލެއް ބާރުކަމުން ކަންފަތް ބަށްވިއެވެ. ކަންފަތަށް ތޫލިއަޑެއް އިވިއިވި ހުރިއިރު އެ ސަރަހައްދަށް އެއްވަމުން ދިޔަ މީހުން ދައްކަަމުން ދިޔަ ވާހަކަތައް ސާފުކޮށް މަންޝާއަކަށް އަޑެއް ނީވެއެވެ. އެ ވަގުތު މަންޝާގެ ހަށިގަނޑާ ގާތްވި އަންހެނަކާއި ފިރިހެނެއް މަންޝާގެ ގައިގައި ފިރުމާލިއެވެ.

އެ ފިރިހެން މީހާ އޭނާގެ އަތުގައިވާ ފޯނުން އަވަހަށް އެމްބިއުލަންސަށް ގުޅާލިއެވެ. އަންހެން މީހާ މަންޝާއަށް ގޮވާލިއެވެ. “ކޮއްކޯ…. ކޮން ނަމެއް ކިޔަނީ؟…. ކާކަށް ގުޅަންވީ؟… އެމްބިއުލަންސް މިހާރު އެބަ އާދޭ… ހިތްވަރުކުރާތި…” މަންޝާއަށް އެ އަންހެންމީހާ ދައްކަމުން ދިޔަ ވާހަކަ އަޑު އިވުނީ ވަރަށް ނުސާފުކޮށެވެ. އެ އަންހެންމީހާ ދައްކަމުން ދިޔަ ވާހަކަ ރަނގަޅަށް ސާފުވާވަރުވީ، އެ އަންހެންމީހާގެ ތުންފަތުގެ ހަރަކާތަށް މަންޝާ ބަލަން އޮތުމުންނެވެ.

ވަރަށް ހިތްވަރުކޮށްފައި މަންޝާގެ ދުލުން ބޭރުކޮށްލެވުނީ އޭނާ ދެކެން ބޭނުންވާ ހަމައެކަނި އިންސާނާގެ ނަމެވެ. “އަޒީމް…އަޒީމް…” އެހިސާބުން މަންޝާގެ ދެލޯ މެރިގެން ދިޔައެވެ. އޭރު މަޑުމަޑުން އިވެމުން ދިޔަ އެމްބިއުލަންސްގެ އަޑު ކަންފަތުގައި ގުގުމަމުން ދިޔައެވެ. ފަހަރެއް ފަހަރެއް އެ އަޑު ދިޔައީ ގަދަވަމުންނެވެ.

*** *** *** *** *** ***

ސޯފާގައި ނިދިފައި އޮތް މަންޝާއަށް ލޯ ހުޅުވާލެވުނީ އޭނާގެ ފިރިމީހާ އަޒީމް، އެނާއަށް ގޮވާތީއެވެ.

“އަޒީމް… މަގޭ ދަރިފުޅު…” ބަނޑުގައި ފިރުމަމުން މަންޝާ ތެދުވީ ބިރެއް ފެނިގެން ހެން ހީވިއެވެ. މިހުރެވުނީ ގޭގައިކަން އެނގުމުން މަންޝާއަށް އެ ފެނުނީ ބިރުވެރި ހުވަފެނެއްކަން އެނގުނެވެ. ލޯ ހަނިކޮށްގެން ހުރެ ފާރުގައި ހަރުކޮށްފައިވާ ގަޑިއަށް މަންޝާ ބަލާލިއެވެ. “އޯހް… ހައެއް ޖަހަނީ….”

މަންޝާ އަވަސްވެގަތީ އަޒީމްގެ ޔުނީފޯމް އިސްތިރި ކުރުމަށެވެ. ކޮޓަރިއަށް ވަދެ އަލަމާރިން އަޒީމްގެ ޔުނީފޯމް ނެގިއެވެ. އަދި އިސްތިރިކުރާ ބޯޑު ފަތުރާލުމަށްފަހު އިސްތިރިކުރަން ފެށިއެވެ. އަޒީމް ލައިގެންހުރި ސޯޓާއި ޓީޝާޓް ބޭލުމަށްފަހު އޭރު ފާޚާނާއަށް ވަނީ އަވަހަށް ފެންވަރާށެވެ. މަންޝާއަށް ބިރުވެރި ހުވަފެނެއް ފެނުނީކަން އަޒީމަށް އެނގުނެވެ. ނަމަވެސް މިގަޑީގައި އެވާހަކަ ދައްކަން ބޭނުންނުވީ އަޒީމް ޑިއުޓީއަށް ދާން ގަޑި ޖެހޭތީއެވެ.

“މިހެންވެ އަހަރެން މެންދުރުފަހު ކައިގެން ޓީވީ ބަލަން ނޫޅެނީ…. ނިދުނީ ވިއްޔަ…. ދެންވެސް އަވަސްކުރޭ.. އެހެންނޫނީ ގަޑި ޖެހިދާނެ…” އަޒީމްގެ ޔުނީފޯމް އިސްތިރި ކުރުމަށްފަހު ކޮނޑުގައި އަޅުވަމުން މަންޝާ ވާހަކަ ދެއްކީ ފާޚާނާގައި ފެންވަރަން ހުރި އަޒީމާއެވެ.

މަންޝާއާއި އަޒީމަކީވެސް އަތޮޅުތެރޭ ދެމީހުންނެވެ. އަޒީމްގެ މަންމަގެ ނުގަބޫލުގައި އޭނަ މަންޝާއާއި ކައިވެނިކުރީ މަންޝާ ދެކެ އިންތިހާއަށް ލޯބިވާތީއެވެ. ކައިވެނިކޮށްގެން އެދެމަފިރިން ދިރިއުޅެމުން އަންނަނީ މާލޭގައެވެ. ޚަރަދުތައް ބޮޑުވެދާނެތީ މަންޝާ ރަށުގައި މަޑުކުރަން ބޭނުންވި ނަމަވެސް އަޒީމް އެ ގޮތެއް ނޭދެއެވެ. ލޯބިވާ އަނބިމީހާއާއި ދުރުގައި ގިނަ ދުވަހު އުޅުމަކީ ބޮޑުވޭނެކެވެ. އެހެން ކަމުން މާލޭގައި އެދެމަފިރިން އުޅެނީ އެއް ކޮޓަރީގެ ކުޑަ އެޕާޓްމަންޓެއްގައި ކުއްޔަށެވެ. ހަތްހާސް ރުފިޔާ މަހުކުއްޔަށް ދައްކައިގެން އެދެމަފިރިން އުޅެނީ ވަރަށް އުފަލުގައެވެ. ނަމަވެސް އެ ދެމީހުންގެ ކައިވެންޏަށް ހަތް އަހަރުވީ އިރުވެސް ދިރިއުޅުން ފަޅުފިލުވައިދޭނެ ދަރިއަކު ނުލިބެއެވެ. މިހާރު މި ދެމަފިރިން ޑޮކްޓަރަށް ދައްކައިގެން އެކަމަށް ބޭސްކުރަމުން ދާތާ އަހަރެއްވީއެވެ. ޑޮކްޓަރުން ހެދި ޓެސްޓުތަކުން ދަރިން ލިބުމުގެ މައްސަލަ ހުރީ މަންޝާގެއެވެ.

ފުރާވަރަށް އެޅީއްސުރެ މަންޝާއަކީ ޤަވާއިދުން ޕީރިއަޑްވާ ކުއްޖެއް ނޫނެވެ. އެއީ މާބޮޑު ކަމަކަށް ނުހަދާ ޑޮކްޓަރަށް ނުދައްކާ ހުރެ ފަރުވާކުޑަ ކުރެވުނީތީ މިއަދު އެކަމާ މަންޝާ ހިތާމަކުރެއެވެ. މިކަމަށް ބޭސްކުރަން ފެށިތާ އަހަރެއް ވީއިރު ކޮންމެ މަހަކު ބަނޑުބޮޑުތޯ ޓެސްޓު ހަދާ ސްކޭން ކުރުމުންވެސް ލިބެމުން ދިޔައީ އެއް ޖަވާބެކެވެ. ކައިވެންޏަށްފަހު މަންޝާ އިތުރަށް ފަލަވެ ގައިގައި މަސްޖަހާ ހުންނަނީ ބިސް ގޮތަކަށެވެ. ޑޮކްޓަރުން ބުނާ ގޮތުގައި މިހުރިހާ ކަމަކީ ހަށިގަނޑުގެ ހޯމޯންސްތަކަށް އަންނަ ބަދަލުތަކުން ދިމާވާ ކަންކަމެވެ. މަންޝާ ދަރިއަކު ބޭނުމެވެ. މަންޝާއާއި އެއްއުމުރެއްގެ ހުރިހާ ރަހްމަތްތެރިންގެ ލޯބިލޯބި ދަރިން ތިބޭ އިރު މަންޝާވެސް އޭނާއަށް މަންމާއޭ ކިޔާފަ ގޮވާލާނެ ތުއްތު ކުއްޖެއް ބޭނުމެވެ.

ކައިވެންޏަށް ހަތް އަހަރުވީ އިރު މަންޝާގެ އުމުރަކީ ހަތާވީސް އަހަރެވެ. އަޒީމަކީ މަންޝާއަށް ވުރެ ދެ އަހަރު ދޮށީ ޒުވާނެއް ކަމުން އަޒީމް މިހާރު ތިރީހަށް އަޅަން އުޅެނީއެވެ. އަޒީމް މަސައްކަތް ކުރަނީ ހުޅުލޭގައި އިމިގްރޭޝަން އޮފިސަރެއްގެ ވަޒީފާގައެވެ. އެހެންކަމުން ބައެއް ހަފްތާތަކު ރޭގަނޑު ޑިއުޓީ، އަދި ދަންވަރު ޑިއުޓީވެސް ނަގަން ޖެހެއެވެ. އެއީ މަންޝާ އެންމެ ފޫހިވާ ދުވަސް ތަކެވެ. އަޒީމް ރޭގަނޑު ޑިއުޓީއަށް ދާ ދުވަސްތަކަކީ މަންޝާ އެކަނިމާ އެކަނި ގޭގައި އިންނަން ޖެހޭ ދުވަސްތަކެވެ.

އަޒީމް ފާޚާނާއިން ނުކުމެ މަންޝާ ގައިގައި ބައްދާލިއެވެ. “ހޫންން.. ދެން މީ ކޮންގަޑިއެއް….” މަންޝާގެ އުނަގަނޑުގައި ވަށާލާފައިވާ އަޒީމްގެ އަތް ނައްޓާލުމަށްފަހު ފާޚާނާއަށް ވަނެވެ. މަންޝާ ފާޚާނާއިން ނުކުމެ އަތް ދިގު ގަމީހަކާ ސްކިނީއެއް ލިއެވެ. އަދި ބޮލުގެ އިސްތަށިގަނޑުގައި ފުނާ އަޅާލުމަށްފަހު އިސްތަށިގަނޑު ނިއުޅުވާލިއެވެ. މޫނުގައި ފުށްމާ ހާކާލުމަށްފަހު ތުންފަތުގައި ރަތްކުލައިގެ ލިޕްސްޓިކެއް ޖައްސާލިއެވެ. ބުޑުމަތި ނިވާވާ ވަރުގެ ދިގު ގަމީސް ރީތިކޮށްލަމުން ލޯގަނޑު ކުރިމަތީ ހުރެ ދެފަރާތަށް އެނބުރެމުން ބަނޑުގައި އަތްހާކާލީ މިއަދުގެ ނަތީޖާއަށް ވާނެ ގޮތަކާމެދު ވިސްނަމުންނެވެ.

އެވަގުތު އަޒީމް ޔުނީފޯމް ލައިގެން އައިސް މަންޝާގެ ފަހަތުގައި ހުއްޓެމުންް ފުން ނަޒަރަކުން މަންޝާއަށް ބަލާލިއެވެ. މަންޝާގެ ފަހަތުން އައިސް ބައްދާލަމުން ބަނޑުގައި ފިރުމާލިއެވެ. މަންޝާގެ ކޯތާފަތަށް ބޮސްދެމުން ކަންފަތް ދޮށުގައި އަޒީމް ބުނެލިއެވެ. “ލެޓްސް ހޯޕް ފޯރ ދަ ބެސްޓް…”

މަންޝާގެ ލޮލުން ވިދަމުން ދިޔަ ކަރުނަތައް ހިންދަން މަސައްކަތް ކުރަމުން އަޒީމާ ކުރިމަތިލާން އެނބުރިލިއެވެ. އަޒީމްގެ ގަމީހުގެ ގިރުވާން ރީތިކޮށްލުމަށްފަހު ޑްރެސިންގް ޓޭބަލް މަތީ އޮތް އަތްދަބަސް މަންޝާގެ ކޮނޑުގައި އަޅުވަމުން އަޒީމާއެކީ އެ އެޕާޓްމަންޓުން ބޭރަށް ނުކުތެވެ. ދޮރު ތަޅުލުމަށްފަހު މަންޝާގެ ތަޅުދަނޑި ދަބަހަށް ލަމުން ސިޑިން ފޭބީ އަޒީމްގެ ފަހަތުންނެވެ.

އެގޭ ދޮރު ކުރިމަތީގައި ޕާކްކޮށްފައިވާ އަޒީމްގެ ސައިކަލަށް ދެމީހުން އެރިއެވެ. އަޒީމްގެ މިސްރާބު ހުރީ އައި.ޖީ.އެމް.އެޗް އަށެވެ. މާލޭގެ ހަލަބޮލި މަގުތަކުން ދުއްވާފައި ދިޔައިރު ފިހާރަތައް ވަނީ ބަންދުކޮށްފައެވެ. ދެނަމާދު ދޭތެރެ ކަމުން އެއްވެސް ފިހާރައެއް ހުޅުވާފައި ނެތެވެ. އައި.ޖީއެމް.އެޗް ގޭޓު ކުރިމައްޗަށް ސައިކަލް މަޑުކޮށްލާފައި މަންޝާ އަތަށް އަޒީމްގެ ވޮލެޓުން ނެގި އެއްހާސް ރުފިޔާގެ ނޫޓު ދިއްކޮށްލަމުން ބުނެލިއެވެ. “7:30 ގަ ރިޕޯޓް ދޫކުރަނީ… ސްލިޕްކޮޅު ގެނައިންދޯ…. ކޯލްމީ އިނގޭ…”

(ނުނިމޭ)