ކުށްވެރިޔަކީމޭ

އަތިރިމަތީގައިވީ މީހުންތައް މަދުވާން ފެށީ އިރު އޮއްސުމުގެ ދަޅަތައް ފެންނަން ފެށުމުންނެވެ. މީސްމީހުން އެމީހުންގެ ދަރިންތައް ގޮވައިގެން ގެއަށް ދާން ފެށި އިރު ކާޅާއި ކޮވެލިތައް ވެސް އެސޮރުމެންގެ ގޭތަކަށް ދިޔުމައް އުދުއްސައިގަނެއްޖެއެވެ. ހުރިހާ އެންމެން އެމީހުންގެ ގޭގެއަށް ދާން ފެށި އިރު ވެސް އުމުރުން 25 އަހަރުގެ އަޔާޒް އިންގޮތަށް އިނެވެ.

ސާފު ހުދު ވެލިގަނޑުގައި އިށީނދެލައިގެން އިން އިރު ކަކުލުގައި ދަތްދޮޅި ޖައްސާލައިގެން އިން އަޔާޒްގެ މޫނުމަތީގައި ވީ ހުސްކަމެވެ. އެކަނިވެރިކަމެވެ. ހިތާމައެވެ. އެ ރީތި މޫނު ވަނީ މިލާ މޯޅިވެފައެވެ. އެއީ ކީއްވެގެން ބާއެވެ؟ މިޒުވާނާ އެވަގުތު އެކަނިމައި އެކަނި އެތަނުގައި އިންނަން ޖެހުނު ސަބަބަކީ ކޮބާބާއެވެ؟

ނޭފަތް ދަމައިލަމުން އޭނާ ކުރިމަތީގައި އިން އިރާއި ދިމާލަށް ބަލައިލިއެވެ. އަދި ކައިރީގައި އޮތް ފޮތާއި ގަލަން ނަގާ އުނގުގައި ބާއްވާލިއެވެ. އޮރެންޖު ކުލައިގެ ވަށް ބޯޅައެއްފަދަ އިރާއި ދިމާލަށް ބަލަން އިރުކޮޅަކު އޭނާ އިނެވެ. ބަލާ ބަލާ ފޫހި ނުވާނޭ ފަދަ ހިތްގައިމު މަންޒަރެކެވެ. އިރުގެ ރަން އަލި މޫދަށް އެޅިފައި ވުމުން ވަކިން ރީއްޗެވެ. މާތް ﷲ ގެ ކުޅަދުންވަންތަ ކަމުގެ ލާމަސީލު މިސާލެކެވެ.

އެހެނަސް އޭނާގެ ޙިޔާލުގައިވީ އެހެން ކަމެކެވެ. އޭނާގެ ހިތި މާޒީ އެ ސިކުނޑީގައި ދައުރުވަމުން ދިޔަ އިރު ހީވަނީ އެއީ އިއްޔެ ވީ ކަމެއް ހެންނެވެ. ނަމަވެސް މިހާރު އެކަނަތައް ވެ ނިމުން ފަހުން އެތަކެއް އަހަރުތަކެއް ވެއްޖެއެވެ. ނަމަވެސް ތާޒާ ކަންމަތީގައި އެ ލަކުނު އޭނާގެ ހިތުގައިވިއެވެ. އެކަނިވެރިކަމުން އެ ހިތްވަނީ މިލާ މޯޅިވެފައެވެ. ނަމަވެސް އޭނާ ޝަކުވާ ކުރާނީ ކާކަށް ހެއްޔެވެ؟ ކުށްވެރިޔަކީ ހުދު އަމިއްލަ ނަފްސެވެ. އޮއްސެމުން ދިޔަ އިރާއި ދިމާލަށް ބަލަން އިން އަޔާޒް ދެލޯ މަރާލިއެވެ. އެއާއި އެކު ފިލްމެއް ހެން އޭނާ އަށް އޭނާގެ ހިތި މާޒީ ފެންނަން ފެށިއެވެ.

****

ލަސް ފިޔަވަޅުތަކެއްގައި ގެއަށް އައިސް ވައިން އުމުރުން 14 އަހަރުގެ އަޔާޒް ހުރީ ހޫރި ހޫރިއެވެ. މީހާ އެކީހެން އޮށްދާ ހިތްލާފައި ހުރި އިރު ދެލޯ ވެސް ވަނީ ވަޅުވަދެފައެވެ. މުޅި ހަށިގަނޑުގައި ވެސް ދުވަމުން ދިޔައީ އޭނާ ބޭނުން ކުރި މަސްތުވާ ތަކެތީގެ ވަހެވެ. އޭނާގެ ކޮންމެ ހަރަކާތަކުން ވެސް މަސްތުވެފައިވީ ވަރު ދޭހަ ވަމުން ދިޔައެވެ.

ގެއަށް ވަދެގެން އައި ފާތުންއަށް ނޭފަތުގައި އަތް ޖައްސާލެވުނީ ދުވަމުން ދިޔަ ނުބައި ވަހުން ކެތްނުކުރެވިގެންނެވެ. ސޯފާ އަށް ވެއްޓިގަނެގެން އޮތް އަޔާޒް ފެނި ބޯހޫރުވާލެވުނީ އެ ދޮވާ ވަހުގެ ސިއްރު އެނގުމުންނެވެ.

“އަޔާޒް؟” އަޔާޒް ގާތުގައި އިށީނދެލަމުން ފާތުން ގޮވާލިއެވެ.

“ހޫމް. މިހާރު ކިހިނެތްވީ؟” އަޔާޒްގެ އަޑުގައިވީ ހިތްހަމަ ނުޖެހުމެވެ.

“އަޔާޒް ދެން ތިއުޅުން ދޫކޮށްލަންވީނުން؟ އަޔާޒްއަށް އެބަ އިނގޭ އަޔާޒްގެ މަންމައާއި ބައްޕަ ވެސް މިދުނިޔެ ދޫކުރީ މަސްތުވާ ތަކެތީގެ އަވާގައި ޖެހިގެންކަން. އަޔާޒްވެސް ބޭނުމީ އެހެންތަ އުޅެން؟ ހެޔޮނުވާނެ އަޔާޒް. ތިއުޅުން ދޫކޮށްލާ…” ފާތުންގެ އަޑު ކުރެހުނެވެ. ފާތުންއަކީ އަޔާޒްގެ ބޮޑުދައިތައެވެ.

“އޭ! ބުނަންތަ ވާހަކައެއް؟؟ ދިރިއުޅުން ބިނާކުރުވާނީ އެމީހެއްގެ މަންމައާއި ބައްޕަ. މަށަށް އެންމެ ކުޑައިރުން ސުރެ ފެނުން މަންޒަރަކީ މިއީ. މިއީ އަހަރެން އަމިއްލަ އަށް އިޙްތިޔާރު ކުރި މަގު. މި މަގު އަހަރެންނަށް މާ ކަމުވެސްދޭ” ހޫރެމުން ކަހަލަ ގޮތަކަށް ތެދުވެ އިށީންނަމުން އަޔާޒް ބުނެލިއެވެ.

“ހެޔޮނުވާނެ. ނޫން. ތި އުޅުން ދޫކޮށްލާ. ތިއީ މާތް ﷲ ހަރާމް ކުރައްވާފައިވާ ކަމެއް…”

“ކިހާ ދެރަކަމެއްތަ؟ ރައްކާވޭ މިތަނުން. އަހަރެން ނެތިން ކަލޭ ތި ދައްކާ ބޭކާރު ވާހަކަ އަޑު އަހާކަށް” އަޑަށް ބާރު ކުރަމުން އަޔާޒް ބުނެލިއެވެ. އަދި ހޫރެމުން ހޫރެމުން ކަހަލަ ގޮތަކަށް ގޮސް ކޮޓަރިއަށް ވަނެވެ.

“އަހަރެން އަޔާޒް ރީހެބަށް ފޮނުވަންވީބާ…؟” ހިތާހިތުން ފާތުން އަމިއްލަ ނަފްސަށް ސުވާލު ކޮށްލިއެވެ. “ނޫން… އެހެނެއް އަޔާޒްގެ އަބުރާ އިއްޒަތް މޮޑެ ނުލެވޭނެ…” ފާތުންގެ ބުއްދި އެގޮތް ބޭނުންވީ ނަމަވެސް އޭނާގެ ހިތް އެކަމާ ދެކޮޅު ހަދަމުން ދިޔައެވެ.

ތަފާތު އެކި އެކި ޙިޔާލުތަކުގައި އޮވެފައި ފާތުންއަށް ނިދުން އިރު 3 ޖަހަން އުޅެޔެވެ. ނަމަވެސް ނިދުންހެން ހީނުވަނީސް އޭނާއަށް ހޭލެވުނީ އޭނާގެ ދަރިފުޅު ފަރީޝާ ރޯއަޑަށެވެ. ވަގުތުން އޭނާގެ ނިދިގަނޑު ދިޔައީ ކޮންތަނަކަށް ކަމެއްވެސް ނޭނގެޔެވެ. ދުވެފައި ކަހަލަ ގޮތަކަށް ގޮސް ފަރީޝާގެ ކޮޓަރިއަށް ވައިން އިރު ކަމަކު ދާކަށް ނެތެވެ. ހައިވެފައި އޮތް ސިންގާއެއްފަދައިން ފަރީޝާގެ ގައިގައި ތަތްވެގެން އެއޮތީ އަޔާޒެވެ. “އަޔާޒް!!!” ފާތުން ބަރުހެލި ހިނގާފައި ގޮސް އަޔާޒް އުގަނޑުގައި ހިފާ ކޮއްޕާލިއެވެ.

***

“ބޮޑުދައިތަ އަހަރެން ރީހެބަށް ފޮނުވަން މެދުވެރިވީ ސަބަބަކީ އެއީއެވެ. އަހަރެން މިއީ ކިހާ ހަޔާތް ކުޑަ މީހެއް ހެއްޔެވެ…؟” ފޮތުގައި އެތަންކޮޅު ލިޔެލި އިރު އަޔާޒަށް ގިސްލަ ގިސްލާފައި ރޮވެމުން ދިޔައެވެ.

އަޔާޒް ފަރީޝާ ދެކުނީ އަމިއްލަ ކޮއްކޮއެއް ފަދައިންނެވެ. ލޯބިވީވެސް އެނަޒަރުންނެވެ. ނަމަވެސް މަސްތުވާ ތަކެތީގެ އަވާގައި ޖެހި، ފަރީޝާގެ ދިރިއުޅުން ހަލާކު ކޮށްލީ އަޔާޒްގެ އަތުންނެވެ. އަންހެން ކުއްޖެއްގެ އަތުގައިވާ އެންމެ އަގު ބޮޑު ގަހަނާ ކަމުގައިވާ އިއްފަތްތެރިކަންވެސް ފޭރިގަތީ ހުދު އަޔާޒެވެ. މިއަދު އަޔާޒް ފަރީޝާއަށް ކުރިމަތި ލާނީ ކިހިނެތް ހެއްޔެވެ؟ ދައްކާނީ ކޮން މޫނެއް ހެއްޔެވެ؟ ދައްކާނީ ކޮން ވާޙަކައެއް ހެއްޔެވެ؟

ރީޙެބަށް ވަދެ އަޔާޒް ކިޔެވިއެވެ. މިހާރު އޭނާ އެތަނުން ދޫކޮށްލައިފިވެސްމެއެވެ. ނަމަވެސް އަލުން މުޖުތަމައަށް ނިކުންނާނެ ހިތްވަރެއް ނުލިބުނެވެ. ވަޒީފާގެ މަގަށް ވެސް އަޔާޒް އިހުތިޔާރު ކުރި ތަނަކީއެއީއެވެ. އެއީ އޭނާ ކުރި ކުށުގެ ޝަޒާ ކަމަށް އަޔާޒް ހިތުގެ އެންމެ ފުނުން ގަބޫލު ކުރެޔެވެ.

(ނިމުނީ)