ތަޖުރިބާ

ލޯތްބަކީ ބާރުގަދަ އެއްޗެކޭ މީހުން ބުނާ އަޑު އަހަމެވެ. އެހެނަސް އެ ލޯތްބަކީ ތޫފާނެއްފަދަ އެއްޗެއްކަން އަހަރެން ނުދެނަހުރީމެވެ. އެއީ އަހަންނަށް އެކަން ތަޖުރިބާ ކުރެވުމުގެ ކުރިންނެވެ.

އަހަރެންގެ ޢުމުރުގެ އެހެނިހެން ފިރިހެންކުދިންނެކޭ އެއްފަދައިން ޙަޔާތުގެ ބައިވެރިއަކަށް ހަދާނެ ރީތި އަންހެން ކުއްޖަކު ހޯދަން އަހަރެން ބޭނުންވިއެވެ. ކަން ދިމާވީވެސް އެހެންނެވެ. އަހަރެން ކައިވެނީގެ ގޮތުން ގުޅުނީ އެހެން އަންހެން ކުދިން ޙަސަދަވެރިވާފަދަ ރީތި ކުއްޖަކާއެވެ. އެ ކައިވެނި ކުރެވުނީ ދެ ޢާއިލާގެ ވެސް ރުހުމުގައެވެ.

އެއީ އަހަރުމެން ރައްޓެހިވެގެން ތިން އަހަރު ހޭދަ ކުރުމަށްފަހު ކުރި ކައިވެންޏެކެވެ. ކައިވެނި ކުރެވުނީ ރަނގަޅަށް އެކަކު އަނެކަކު ދަސްވެއްޖެކަން ދެމީހުންނަށްވެސް ޤަބޫލު ކުރެވުމުންނެވެ. އަހަރެންގެ ޢާއިލާގައި އުޅެނީ އަހަރެންގެ މަންމައާއި ދިހަ އަހަރުގެ ކުޑަކުޑަ އަންހެން ކޮއްކޮއެވެ. އަހަރެންގެ ޢާއިލާއަށް އިތުރުވި އާ މެންބަރާއިއެކީ ދުވަސްތައް ވޭތުވަމުން ދިޔަދިޔަހެން އަހަރެން ކަންބޮޑުވުމެއްނެތި ހޭދަކުރި ދުވަސްތަކަށް ނިމުމެއްއައެވެ. ކޮންމެ ދުވަހަކުހެން އޮފީހުން ގެއަށް އައިސް އަންހެނުންގެ ޝަކުވާތަކާއި ކުރިމަތިލާ މީހަކަށް އަހަރެންވިއެވެ. އަހަރެންގެ މަންމަ ކަންތައް ކުރާ ގޮތުންނޭ ބުނެ އަންހެނުން ރޮއި ހެދިއެވެ. އަހަރެންގެ އަންހެނުންދެކެ ވާ ލޯތްބެއްގެ ބޮޑުކަމުން، އެ މަންޒަރު ބަލަން އަހަންނަކަށް ކެތްނުވިއެވެ.

މަންމައަށްޓަކައި ހިތުގައި ނަފްރަތްތެރިކަން ވާ ޙާލު މި މައްސަލައަށް ޙައްލެއް ގެންނަން އަހަރެން ނިންމީމެވެ. އަންހެނުންނާއެކު ވަކި ދިރިއުޅުމެއް އުޅެން ގެއިން ނިކުމެގެން ދިޔައީމެވެ. ދުވަސްތައް ފާއިތުވަމުން ދިޔަދިޔަހެން އަހަރެންގެ ހާސްކަމާއި ހިތާމަތައް އިތުރުވަމުން ދިޔައެވެ. ވަކިން އުޅެން ފެށިފަހުން އަހަންނަށް ގެއިން ކާން ލިބެނީ ވެސް މަދު ފަހަރަކުއެވެ. އޮފީހަށްދާން ލާ ހެދުންތައް ވެސް ހުންނަނީ އިސްތިރި ނުކުރެވި ނުވަތަ ނުދޮވެވިއެވެ. މިކަމާއި އަންހެނުންގާތު ޝަކުވާކުރުމުން އޭނަ އައީ ރުޅިއެވެ. ގޭގައި އެކަނިމާއެކަނި ހުރިހާ ކަމެއް ނުކުރެވޭނެކަމަށް ބުނެ އޭނަ ހަޅޭއްލެވިއެވެ.

މިފަހަރުވެސް ހަތިޔާރު ބަހައްޓަން ޖެހުނީ އަހަންނަށެވެ. ގޭގައި މަސައްކަތް ކުރާނެ މީހަކު ގެނެސްދިނީމެވެ. ނަމަވެސް ކަންތައް ދިޔައީ ގޯހުން ގޯހަށެވެ. އޭގެ ފަހުން އޮފީހުން ގެއަށް އައިސް އަނބިމީހާއާއެކު ހޭދަކުރަން އޮންނަ ވަގުތުތައް އަހަރެން ހޭދަކުރަން ޖެހުނީ އެކަންޏެވެ. އޭނަ އަބަދުވެސް ވާނީ ކޮންމެވެސް ޕާޓީއަކަށް ނުވަތަ ކޮފީއަކަށް ގޮހެވެ. އަހަރެން ހިތުގައި އެންމެ ރިއްސާލީ އަހަރެންގެ ޙަލާލު އަނބިމީހާ ހިލޭ ފިރިހެނުންނާއި ގުޅުން ބާއްވާކަން އަހަރެންގެ ޢާއިލާއާއި ރައްޓެހިންގެ ފަރާތުން އެނގުމުންނެވެ. އޭނަ ފިރިހެނުންގެ ސައިކަލުތަކުގެ ފަހަތުން ވެސް ފެންނަން ފެށިއެވެ. އަހަރެންގެ ކެތްތެރިކަން ކޮޅުންލީ މި ހިސާބުންނެވެ.

އޭނަ މުޅިން ދޫކުރުމުގެ ކުރިން އަހަރެން އޭނައަށް ވަރަށް ނަޞޭޙަތްތެރިވީމެވެ. އެ ކުރެވެމުންދާ ފާފަތަކުގެ ބޮޑުކަމާއި ހުރި ޢަޒާބުވެސް ވިސްނައިދެވޭތޯ ބެލީމެވެ. އެހެނަސް އޭނަ އަހަރެން ކުރި އާދޭސްތަކަށް ދިނީ ބީރު ކަންފަތެކެވެ. އަދި އަހަންނަކީ އޭނައާއި އަރާއަރަ ފޯދިގެންނުވާ މީހެއްކަމަށް ބުނެ އަޑުލިއެވެ.

އަހަންނަށް ވިސްނުނީ ދެނެވެ. އޭނައަށް އަހަރެން މާ ބޮޑަށް އަޅުވެތިވީއެވެ. އެންމެ ލޯބިދޭންޖެހޭ މަންމަ ދޫކޮށް އަހަރެން އޭނަގެ އަވައިގައިޖެހުނީއެވެ. އަހަރެން ދަހިވެތިވީ އޭނަގެ ރީތިކަމަށެވެ. އެ ރީތި ކަމުގެ މަސްތުގައިޖެހި އަހަންނަށް ޙަޤީޤަތްވެގެން ދިޔައީ އަވާމެންދުރަކަށެވެ. އަވާމެންދުރެއްފެނި އެތަނުން ފެން ލިބޭނެކަމަށް މީހަކަށް ހީވެދާނެ ފަދައިން އަންހެން ކުއްޖެއްގެ ރީތިކަމުން އުފާވެރިކަން ލިބޭނެކަމަށް އަހަރެން ހީކުރީމެވެ. އެހެނަސް އަވާމެންދުރު ފެންނަ ހިސާބާއި ހަމައަށް ދިޔުމުން އެތާނގައި ފެން ނެތްކަން އެނގުންވާ ފަދައިން، އުޅުމާއި އަޚްލާޤެއް ނެތް އަންހެނެއްގެ ކިބައިން އަހަންނަށް ލިބޭނެ އުފަލެއް ނެތްކަން އަހަންނަށް ޔަޤީންވިއެވެ.

އަހަންނަށް ކުރެވުނު ކުށުގެ އިޙްޞާޞް އަހަންނަށް ރަނގަޅަށް ކުރެވުނީ އޭނަ ދޫކޮށް އަހަރެން މަންމަ ގާތަށް ދިޔުމުންނެވެ. ކޮންމެ ދުވަހަކު އޭނަ މަންމައާއި ކޮއްކޮގެ ޝަކުވާތައް ކުރަމުން ދިޔައިރު އެއީ ތެދެއްތޯ އަހާވެސް ނުލާ އެމީހުން އަހަރެންގެ ޙަޔާތާއި ދުރުކުރކަމުގެ މޮޔަހީވިއެވެ. އަހަންނަށް މި ލިބެނީ އެކަމުގެ ޢަޒާބު ކަމަށްބުނެ އަހަރެންގެ ހިތް ޔަޤީންކުރިއެވެ. ޖަޒުބާތުން ފުރިގެން ދިޔަ އެ ހިތާއެކީ އަހަރެން މަންމަގާތު މަޢާފަށް އެދުނީމެވެ. އެއްވެސް ބުރަކަމެއް ހިތުގައި ނުބާއްވާ މަންމަ އަހަންނަށް މަޢާފްކުރިއެވެ. މައިވަންތަ ކަމުގެ ލޯތްބަކީ އޭގެ އަގު ދުވަހަކުވެސް އަދާ ނުކުރެވޭނެ ފަދަ ލޯތްބެއްކަން އަހަންނަށް އެނގުންވީ އެދުވަހުއެވެ.

ލޮބުވެތި އަޚުންނޭވެ! ޙަޔާތުގެ ބައިވެރިއެއް ޚިޔާރު ކުރުމުގައި އަންހެން ކުއްޖެއްގެ އަޚްލާޤަށް ބަލާށެވެ. ﷲ ރުހިވޮޑިގެންނުވާފަދަ ގުޅުމަކަށް ނުގޮސް އެ ކުއްޖަކު ތިބާގެ ޙަޔާތުގެ ބައިވެރިއަކަށް ހަދާށެވެ. އަދި އެކުއްޖަކުދެކެ ކިތަންމެ ލޯބިވިޔަސް ތިބާގެ މައިންބަފައިންނަށްވުރެ އެކުއްޖާ އިސް ނުކުރާށެވެ. އެހެންނޫނީ މިހުރިހާ ކަމެއްގެ ހިތި ނަތީޖާ ދުނިޔެއާއި އާޚިރަތުގައި ވެސް ދެކެން ޖެހިދާނެއެވެ.

(މިއީ “ކަލަކުވޭ، ބިރުވެތިވޭ” ނަމަކަށް ކިޔާ ފޭސްބުކް ޕޭޖްގައިވާ ވާހަކައަކަށް ކުދި ބަދަލުތައް ގެނެސްގެން ޝާއިއުކުރެވުނު ވާހަކައެކެވެ.)