ލިޔުންތެރިއެއްގެ ދިރިއުޅުން

އިރުއޮއްސޭ މަންޒަރު ބަލަން ކުޑަދޮރު ކައިރީ ހުރި އަންހެންކުއްޖާގެ މޫނު މަތިން ފެންނަމުން ދިޔައީ މަސްހުނި އިހްސާސްތަކެކެވެ. އިރުގެ ރަން ދޯދިތައް އެކުއްޖާގެ މޫނަށް އެޅިފައިވީއިރު، އެ ކުއްޖާގެ ބޮޑު ކޮފީ ކުލައިގެ ކަޅި ފެނިގެން ދަނީ ޖާދޫވި ގޮތަކަށްށެވެ. ރުއިމުގެ ސަބަބުން ދިގު އެސްފިޔަތައް ތެމިފައިވީއިރު، ކަޅުކަން ގަދަ ވިދުމެއް އޭނަގެ އެސްފިޔަތަކުގައި ވިއެވެ. އޭނަގެ މޫނު މަތިން ފެނިގެން ދަނީ ވަރުބަލި ކަމެވެ. އިރު މަޑުމަޑުން ފެންގަނޑަށް ތިރިވަމުން އެދަނީ ދެހާސްފަންސަވީސް ވަނަ އަހަރަށް އަލްވަދާއު ކިޔަމުންނެވެ. އެ އަހަރު ދިން ފިލާވަޅުތަކާއި ކުރިމަތިވެގެން ދިޔަ ގޮންޖެހުންތަކާއި އެކުގައެވެ. މަޑުމަޑުން ހިނގާލާފައި ގޮސް އެނދުމަތީގައި އޭނަ އޮށޯވެލިއެވެ. ކުޑަކޮށް ރޯގާ ވައްތަރުވެފައި ހުރުމުގެ ސަބަބުން އޭނަގެ ނޭފަތުގެ ކުރި ވަނީ ރަތްވެފައެވެ. މަޤްރިބް ނަމާދަށް ބަންގި ގޮވުމުން ވުޟޫކޮށްލައިގެން ނަމާދުކޮށްލުމަށްފަހު ގުރްއާން ކިޔަވާލިއެވެ. އެކަމުން އޭނަގެ ހާސްވެފައިވި ސިކުނޑިއަށް ފިނިކަމެއް ލިބުނު ފަދަ އިހްސާސެއް ކުރެވުނެވެ.

ދެހާސް ފަންސަވީސް އަހަރުވެގެން ދިޔައީ އަލާޔާއަށް އެތަކެއް ފިލާވަޅުތަކެއް ދަސްކޮށްދިން އަހަރަކަށްށެވެ. އެގޮތުން ހާލަތު ކިތަންމެ ކުޑަ ވަގުތުކޮޅެއްގެ ތެރޭގައި ބަދަލު ވެގެން ގޮސްދާނެ ކަމާއި، ކިތަންމެ ގާތް މީހެއް ނަމަވެސް، އިތުބާރު ކުރަންވާނީ ވަކި ވަރަކަކަށް ދަސްވެގެން ދިޔައެވެ. މާތް ﷲ އަނެކާއަށް ނުއުފުއްލެވޭ ވަރު ބުރައެއް ނުޖައްސާނެކަން ދަސްވިއެވެ. އަދި ހަމައެހެންމެ ކޮންމެ އުނދަގޫ ކަމެއްގެ ފަހަތުގައި ފަސޭހައެއްވާނެކަން އެނގުނެވެ.

ކުޑަކޮށް އަރާމްކޮށްލުމަށްޓަކާ އަލާޔާ އެނދުގައި އޮށޯތެވެ. ލެޕްޓޮޕަށް ބަލައިލީ ފޫހިވެފައި އޮވެއެވެ. އަލާޔާއަކީ ވާހަކަ ކިޔުމާއި ވާހަކަ ލިޔުމަށް ފޯރި ހުންނަ ކުއްޖެކެވެ. އެހެންނަމަވެސް ފަހަކަށް އައިސް އޭނަ ދެރަކޮށްލުމަށްޓަކައި ލިބޭ ތަފާތު ކޮމެންޓުތަކުގެ ސަބަބުން ވާހަކަ ލިޔަން ފޫހިވެއެވެ. ހެނދުނު އަށެއް ޖަހާއިރު ވަޒީފާއަށް ދާގޮތަކަށް އަލާޔާއަށް ގެއަށް އާދެވޭއިރު ހުންނަނީ ތިނެއް ޖަހާފައެވެ. އެގަޑީ އަންނަ ގޮތަށް ނަމާދުކޮށްލާގެން އަލާޔާއަށް ނިދެނީއެވެ. ދެން އަނެއްކާ ރޭގަނޑު އަށްގަޑި ބައިގައި ވަޒީފާއަށް ނިކުންނަން ޖެހެއެވެ. މި ދުވަސްކޮޅު ކޮލެޖްގެ ސެމިސްޓާރ ބްރޭކްކަމުން ކިލާހެއް ނޯވެއެވެ. އެހެންނަމަވެސް ކްލާސްތައް ފެށުމުން ރޭގަނޑު އަށަކުން ދިހަގަޑި ބައިވަންދެން އަލާޔާ ހުންނަން ޖެހޭނީ ކިލާހުގައެވެ. ކިތަންމެ ބުރަކޮށް އުޅުނު ނަމަ ވެސް ނުނިދާ ހޭލައިގެން ހުރެ ވިޔަސް ބުނާ ދުވަހަކަށް އަލާޔާ ވާހަކަ ގެނެސްދޭން މަސައްކަތް ކުރެއެވެ.

އަލާޔާއަކީ އިސްކޫލް ނިމުނީއްސުރެ ފައިސާ އަމިއްލައަށް ހޯދުމުގެ ގޮތުން އަބަދު ވެސް ކޮންމެ ވެސް މަސައްކަތެއް ކުރަމުން އަންނަ ކުއްޖެކެވެ. އެގޮތުން ކުޑަކުދިންނަށް ޓިޔުޝަންދިނުމާއި ފިހާރައިގައި ކޭޝިއަރެއްގެ ގޮތުގައި ވެސް އަލާޔާ މަސައްކަތް ކުރިއެވެ. ކުޑައިރު އެކަހެރިކޮށް އުޅުމާއި ގުޅިގެން އަލާޔާ ވެފައިވަނީ ވަރަށް ‘އިންޓްރޮވާޓެޑް’ ކުއްޖަކަށްށެވެ. އެހެންކަމުން ނުދަންނަ މީހުންނާއި ވާހަކަ ދައްކާ އުޅުމަކީ އަލާޔާއަށް ވަރަށް އުނދަގޫކަމެކެވެ. މި އަހަރުގެ މެދު ތެރެއިން ރަށު ހޮސްޕިޓަލް ރިސެޕްޝަން ވަޒީފާއަށް އަލާޔާ ހޮވުންވީ، އަލާޔާގެ ވާހަކަ ދެއްކުމުގެ ހުނަރު ކުރިއަރުވާ ތަރައްގީ ކުރަން ލިބުނު ފަހި ފުރުސަތެކެވެ.

އަލާޔާ ފޫހިކަމާއެކު ލެޕްޓޮޕް ހުޅުވައިލުމަށްފަހު ވާހަކަ ވެބްސައިޓަށްވަނެވެ. ކޮމެންޓްތައް ފެނުމުން ހިތް މަރުވާ ގޮތް ވިއެވެ. ބަހުން ވެސް އަނެކާގެ އުންމީދު ގަތުލްކޮށްލާ މީހުން އުޅޭކަމަކީ ތެދެއްކަން މިހާރު އަލާޔާއަށް ޔަގީންވެއެވެ. އެފަދަ މީހުންގެ ހިތުން އެފަދަ އިން ކޮމެންޓު ކުރުމަކީ ވަރަށް ވެސް މަޖާ ކަމެކެވެ. އެހެން ނަމަވެސް އެ ކޮމެންޓުތައް ނިސްބަތްވާ މީހާ ވާނެ ދެރަ އާއި ވިސްނާނެވަރު އެމީހުންނަށް ނޭނގެނީބާއޭ އަލާޔާގެ ހިތައް އެރިއެވެ. ދެ އަތް ތުރުތުރު އަޅާ ހާލު ކޮމެންޓު ސެކްޝަން ލައްޕައިލުމަށްފަހު ވާހަކައިގެ އަނެއް ބައި ލިޔަން ފެށިއެވެ. އެ ބައި ލިޔަމުން ދިޔައިރު ވެސް އަލާޔާއަށް ވިސްނެމުން ދިޔައީ އެމީހުން ކޮށްފައި ހުރި ކޮމެންޓުތަކާއި މެދުގައެވެ. އެމީހުން އަލާޔާގެ ސިފައަށް ވެސް މަލާމާތްކޮށްފައިވެއެވެ. އެހެން މަލާމާތް ކުރާ އިރު އެ މަލާމާތް ކުރެވެނީ އެމީހުން ވެސް ހެއްދެވި ކަލާނގެއަށްކަން އެމީހުނަށް ނުވިސްނެނީބާއޭ އަލާޔާގެ ހިތަށް އެރިއެވެ.

ލެޕްޓޮޕްއާއި ދިމާލަށް ބަލަން ވިސްނުމަކަށް ގެއްލިފައި އިން އަލާޔާ ސިހުނީ އޭނަގެ ލޯބިވާ މަންމަ އެނދުގައި އިށީނުމުންނެވެ. “އަލާ.. ހާދަ ބޮޑު ވިސްނުމަކަށް ގެއްލިފަ؟ އަނެއްކާ އެ ކޮމެންޓުތަކާ މެދު ވިސްނަނީދޯ؟” އަލާޔާގެ ބޮލުގައި ފިރުމައިލަމުން އައިޝާ އަހައިލިއެވެ. އަލާޔާ އިސްޖަހައިގެން އިނދެ ބޯޖަހައިލިއެވެ. “ދަރިފުޅާ މަންމަ ކިހާވަރަކަށް ބުނަނީ އެމީހުން ކުރާ ކޮމެންޓުތަކާ މެދު ތިހާ ވަރަށް ނުވިސްނާށޭ.. އެ ކޮމެންޓު ކުރާ މީހުންނަކަށް ނޭނގޭނެ އަލާ ތީ އެހާ ބިޒީ ކުއްޖެއް ކަމެއް.. އެހެންނޫނަސް ކަންކަމުގައި ކުރިއަރާ ވަރަކަށް ހަސަދައިގެ ލޯތައް އިތުރުވާނެ.. އެކަހަލަ ބޭކާރު މީހުން ކިޔާ އެއްޗިއްސައް ވިސްނުމަކީ ބޭކާރު ކަމެއް… ދަރިފުޅު ވާހަކަ ލިޔުން ހުއްޓާލާފިއްޔާ ވާހަކަ ރީތި ކުދިން ކިހާ ދެރަވާނެ؟ އެހެންނޫނަސް ދަރިފުޅުގެ ހުވަފެންތަކޯ؟ އަލާ ބޭނުމެއްނުން ދިގު ވާހަކަ ފޮތެއް ނެރެން؟ އެކަން އިރާދަ ކުރެއްވިއްޔާ ވާނެ.. މަންމަގެ ދުއާ އަބަދު ވެސް ވާނީ ދަރިފުޅާއެކު..” އައިޝާ އަލާޔާގެ ކޮނޑަށް ފިއްތައިލަމުން ބުންޏެވެ. އައިޝާގެ ބަސްތަކުން ކަނިވަމުން ދިޔަ އުންމީދުގެ ހުޅުކޮޅުއަލުން ރޯވިއެވެ.

މެންދަމު ބާރަ ޖެހުމާއެކު ދެހާސް ސައްބީސް ވަނަ އަހަރަށް މަރުހަބާ ކިއެވެ. ނުދަންނަ ނަންބަރަކުން އަލާޔާއަށް ގުޅަން ފެށުމުން އަލާޔާ ފޯނު ނެގިއެވެ. ވަރަށް ހާސްވެފައި ހުރެ އަންހެނެއް އެއްޗެހިތަކެއް ކިޔަން ފެށުމުން އަލާޔާ ކޮންމެ ވެސް ވަރަކަށް ހާސްވިއެވެ. “ދައްތާ ތަންކޮޅެއް ހަމަޖެހިލައިގެން ވާހަކަ ދައްކާލާ.. އަޅުގަނޑަކަށް އެއްވެސް ގޮތަކަށް ނޭނގެ ދައްތަ ތިކިޔާ އެއްޗެއް..” އަލާޔާ މަޑުމައިތިރި ރާގަކަށް ވާހަކަ ދެއްކިއެވެ. މިރޭ އޭނަގެ އޮންކޯލްކަމުން އެމަރޖެންސީ ކޭހެއް އަތުވެދާނެ ކަމަށް އަލާޔާ ހުރީ ތައްޔާރުވެގެންނެވެ. “ދައްތަގެ ދަރި..ދަރިފުޅު.. ބްލީޗް..” ރޮވިފައި ހުރެ އޭނަ ވާހަކަ ދެއްކިއެވެ. އަލާޔާއަށް ހިންދިރުވައިލެވުނެވެ. އަދި މިފަދަ ސުއިސައިޑް ކޭސްއަކާ އޭނަ ދިމާވީ އަލަށްށެވެ. “ދައްތަގެ ދަރިފުޅު ނޭވާލާތަ؟ ވިންދު އެބަހުރިތަ؟ ވަރަށް އަވަހަށް އަޅުގަނޑު އެމްބިޔުލާންސް ފޮނުވާލާނަން ކޮބާތޯ ގޭގެ ނަމަކީ؟..” އަލާޔާ ކުރި ސުވާލުތަކުގެ ޖަވާބު ލިބުމުން ފޯނު ކަނޑައިލުމަށްފަހު އެމްބިޔުލާންސް ޑްރައިވަރަށް ގުޅާ ވެގެން އުޅޭ ގޮތް ކިޔައިދިނުމަށްފަހު އެމްބިޔުލާންސް ފޮނުވައިދިނުމަށް އެދުނެވެ.

އެއަށްފަހު ޑޮކްޓަރަށްށާއި ނަރުސްކުއްޖާއަށް ގުޅުމަށްފަހު އަވަސް ގޮތަކަށް ތައްޔާރުވެލައި، ހޮސްޕިޓަލް ތަޅުދަނޑި ހިފައިގެން ހޮސްޕިޓަލަށް ދިޔައެވެ. ކުޑައިރުކޮޅެއްފަހުން އެމްބިޔުލާންސްގެ ސައިރެންގެ އަޑާއިއެކު ޕޭޝަންޓު ގެނެވުނެވެ. އީއާރްއަށް ވެއްދުމާއެކު ފަރުވާ ދެވެން ފެށިއެވެ. ޕޭޝަންޓުގެ ހަށިގަނޑަށް އެތެރެވެފައިވި ކެމިކަލްތައް ނެރެވުމުން ޕޭޝަންޓް ނުރައްކަލުން ބޭރުވިއެވެ. ޑޮކްޓަރުގެ އެދުމާއިއެކު ޕޭޝަންޓުގެ މަންމަ ގެނެސް ސުވާލު ކުރެވެން ފެށުނެވެ.

“ޒައިވާ މިހެން ހެދީ ކީއްވެގެންކަން ދައްތައަށް އެނގިލައްވާތޯ؟” އަލާޔާ ސުވާލުކޮށްލިއެވެ. “މިދިޔަ އަހަރު ޒައިއަށް ފަނަރަ އަހަރު ފުރުނު ފަހުން ޒައި ވާހަކަ ލިޔަން ފެށީ.. ކުޑައިރުއްސުރެ ވަރަށް ވާހަކަ ކިޔާނެ.. ޒައިގެ ވާހަކަތައް ކުރިއަރަން ފެށިފަހުން ހަނގާކުރާ ފަދަ ކޮމެންޓުތައް ޒައިއަށް ލިބެން ފެށީ.. ފުރަތަމަ ވަރަށް އަޅާ ނުލާނެ.. އެކަމަކު ފަހަކަށް އައިސް ވަރަށް އެކަންކަމާ ފިކުރު ކުރާކަން އެނގޭ.. އެހެންމީހުނަށް ނުދައްކަން އަމިއްލަ އިހްސާސްތައް ވަންހަނާކޮށްލުމަކީ ޒައި ވަރަށް ގަދަޔަށް ކުރާކަމެއް.. އޭނަގެ ހިތުން އެއީ އެހެން މީހުންނަށް އުނދަގޫ ނުކުރުމަށް.. ޒައި އެހެން ހެދީ ފިނޑި ކަމަކުންނެއްނޫން… އެކަމަކު އޭނައަށް ކެތް ނުކުރެވިގެން..” ޒައިވާ މަންމަ ރޮމުން އަލާޔާއަށް ކިޔައިދިނެވެ.

އަލާޔާގެ ހިތައް ތަފާތު ގޮތެއްވެގެން ދިޔައެވެ. ޒައިވާ ވެސް ހުރީ އޭނަ ހުރި ހާލަތުގައެވެ. އެހެންނަމަވެސް ޒައިވާ ހިޔާރު ކުރީ ރަނގަޅު މަގެއް ނޫނެވެ. އެހެން މީހަކާއި ހިއްސާ ކުރުމެއް ނެތި ސިކުނޑީގައި ހިޔާލުތައް ފުނި ޖެހި އެކަނިވާ ހިނދު އެކަންކަމާއި ވިސްނައި ނުރަނގަޅު މަގު ބައެއްފަހަރު އިންސާނާއަށް އިހްތިޔާރު ކުރެވެއެވެ. ޒައިވާއަށް ވެސް ވީ އެހެންނެވެ. ޒައިވާ ހަމައަކަށް އެޅިލުމުން އަލާޔާ ޒައިވާއާއި ބައްދަލުކޮށްލަން، ޒައިވާ އޮތް ކޮޓަރިއަށް ވަނެވެ. އޭރު އެއްވެސް އަސަރެއް މޫނު މަތިން ދެއްކުމެއް ނެތި ސީލިންގަށް ކަޅި ހުއްޓައިލައިގެން ޒައިވާ އޮތެވެ. އަތަށް އައިވީ ގުޅާފައިވީއިރު، ނޭފަތުގައި އޮކްސިޖެން ހޮޅި ގުޅާފައިވެއެވެ. ޒައިވާ އޮތް އެނދު ކައިރީ ހުރި ގޮޑިއެއް ދަމައިލުމަށްފަހު އަލާޔާ އިށީނެވެ. ޒައިވާ މަންމަ އައިސް ޒައިވާއާއި ވާހަކަ ދައްކަން އުޅެއުޅެ ޒައިވާގެ އިޝާރާތެއް ނުވިއެވެ.

ޒައިވާގެ މޫނަށް ފުން ނަޒަރެއް ދިނުމަށްފަހު އަލާޔާ ވާހަކަ ދައްކަން ފެށިއެވެ. “ހޭއި ޒައިވާ.. ޒައިއަށް އަލާ ނޭނގިދާނެ.. އެކަމަކު އަލާ މިއީ ޒައިގެ ވާހަކަތައް ފެށުނީއްސުރެ ކިޔަމުން އަންނަ މީހެއް.. އެންޑް އައި ގޮޓަ ސޭ.. ޒައިގެ އިމޭޖިނޭޝަން ހާދަ ބޮޑޭ.. އަލާއަށް ވެސް އެހާ ރީއްޗަށް ވާހަކައެއް ނުލިޔެވޭ ކަންނޭނގެ..” އެކުވެރިއަކާ ވާހަކަ ދައްކާހައި ގާތްކޮށް އަލާޔާ ވާހަކަ ދެއްކިއެވެ. އަލާޔާގެ ވާހަކައިން ޒައިވާގެ މޫނު އަލާޔާއާއި ދިމާލަށް ވަގުތުން އެނބުރުނެވެ. “ހައު ޑިޑް ޔޫ ނޯ؟” ކުރަކިވެފައިވި އަޑަކުން ހައިރާންކަމާއެކު ޒައިވާ އަހައިލިއެވެ. “އަސްލު ނޭނގެ ކުރިންނެއް.. ޒިވީއަކީ ޒައިވާކަން އެނގުނީ ޒައި މަންމަ ބުނި ފަހުން..” އަލާޔާ ޒައިވާގެ ސުވާލަށް ޖަވާބުދިނެވެ. “އަލާ ވާހަކަ ލިޔަންތަ؟” ޒައިވާ ސުވާލުކޮށްލިއެވެ. “ޔޭސް.. އަލާ ވެސް ވާހަކަ ލިޔަން އެލީ އިންނާނީ އޯތާ ނޭމްއަކަށް.. ޒައި ވަރަށް ކޮމެންޓު ކުރަމެއްނުން..” ހީލަމުން އަލާޔާ ބުނެލިއެވެ.

ޒައިވާގެ ދެލޯ ބޮޑުވިއެވެ. ދެމީހުންނަކީ އެއް ރަށެއްގައި އުޅޭ މީހުންކަން ނޭނގި ހުރެ ދެމީހުން އެކަކު އަނެއްކަކުގެ ވާހަކައަށް ކޮމެންޓުކޮށް އީމެއިލްއިން ވާހަކަ ދައްކައެވެ. ޒައިވާ ސްކޫލު ނުނިމޭތީ ސޯޝަލްމީޑިއާ ޕްލެޓްފޯރމްތަކުގައެއް ނޫޅެއެވެ. “އޯހް މައި ގޯޑް… އެހާ ވަރަށް ވާހަކަ ދެއްކި އިރު ވެސް ނޭނގުން ތި އަލާ ކަމެއް އެއީ..” ޒައިވާގެ ދެލޯ ވިދައިލިއެވެ. އަލާޔާ ހިނިތުންވެލިއެވެ. “ޒައިއަށް އެނގޭތަ އަލާ ވާހަކަ ލިޔަން ފެށީ އަލާގެ ލައިފްއަށް އައި ވަރަށް އުނދަގޫ ދުވަސްކޮޅެއްގަ.. އެންޑް ވާހަކައަށް އިހްސާސްތައް އަޅައިލުމުން އަލާއަށް ހީވަނީ ބޮލުން ބަރު އެއްޗެއް ނެގޭހެން.. ޒައި ތިހެން ހެދީމަ ޒައި މަންމަ ވަރަށް ދެރަވެފަ ހުރީ.. ދެން މިކަހަލަ ކަންކަން ނުކުރައްޗޭ.. ސުއިސައިޑް ތޯޓްސް ޒައިގެ ބޮލަށް އަންނަންޏާ އެކުވެރިއަކާ އެކަންކަން ހިއްސާކޮށްލާ.. ނޫނީ ނިކަން ވާހަކައިގެ ކެރެކްޓާރއަކަށް އެކަންތައް ދީބަލަ.. އޭރުން އެކަން ސޯލްވް ކުރަން ވަރަށް ފަސޭހަވެގެން ދާނެ..” ޒައިވާއަށް ވިސްނޭނެ ފަދައަކުން އަލާޔާ ވާހަކަ ދެއްކިއެވެ.

ޒައިވާ ފުންނޭވާއެއްލަމުން މައްޗަށް ބަލައިލިއެވެ. “ވަރަށް ދެރަވާ ގޮތަށް އެމީހުން ކޮމެންޓު ކުރަނީ.. ވާހަކަ ރީތި ނޫން ކަމަށް ބުނެފަ އަދި ހުރޭ ޒައިގެ ސިފައަށްށާ އެހެން ކަންކަމަށް މަލާމާތްކޮށްފަ ވެސް.. ދެން އެމީހުން ބުނަނީ ޒައިއަށް ކްރިޓިޒިޒަމް ހޭންޑަލް ނުކުރެވޭ.. ބަޓް އެމީހުން ހުންނަނީ ހަމަ ސީދާ ބުލީކޮށްފަ ދެން ވަރަށް ހާޓްވާ ކަހަލަ އެއްޗެހި ކިޔާފަ ހުންނަނީ.. ދެން ޒައިގެ އެގްޒާމް ސްޓްރެސްއާ ހުރެ މިހެން ހެދުނީ.. އައިމް ސަޗް އަ ކަވާރޑް..” ޒައިވާ މޫނު މަތީ އަތް އަޅައިލަމުން ބުންޏެވެ. “ޒައީ ތިހެން ނުބުނޭ.. ޒައިއަށް ފެނޭނުން އަލާގެ ކޮމެންޓް ސެކްޝަން ވެސް ހަމަ ތިހެން މިހާރު.. އެ އުޅެނީ ޒައިއާ ހަސަދަލައިގެން އުޅޭ މީހުން.. ފިފްޓީން އިޔާޒްގެ ކުއްޖަކަށްވެ ހުރެ ސައިޓްގެ ޓޮޕް ޓެން ސްޓޯރީޒްގަ ވާހަކަ ހިމެނުމަކީ ހާދަ ބޮޑު ކަމެކޭ.. ޒައިއަށް ނުލާހިކު ބައިވަރު ޕޮސިޓިވް ކޮމެންޓްސް ވެސް ލިބޭ.. ރީޑާސް ލަވްސް ޔޫ.. އެގޮތަށް އެކި ނަން ނަމުގެ ބޭކާރު ކޮމެންޓު ކުރާ މީހުންނާއި މެދު ނުވިސްނާ.. ފޫހިވީމަ އެމީހުން ގޮސްދާނެ.. ޔޫ ނޯ.. މީހެއްގެ ސަބަބުން އެހެން މީހެއްގެ ލޮލުން ވެއްޓޭ ކަރުނަތިކީގެ އަގު ޤިޔާމަތް ދުވަހުން އެމީހަކު ދައްކަން ޖެހޭނެ.. އަދި އެމީހަކަށް އެކަން ދުނިޔެމަތީ ވެސް ދައްކާނެ.. ޖަސްޓު ބިލީވް އިން ﷲ.. އެންޑް ޑޯންޓް ޑޫ ދިޒް އެވާރ އަގައިން.. ފުރާނައަކީ ﷲ ދެއްވި އަމާނާތެއް.. އަމިއްލައަށް މަރުވާ މީހާއަށް ސުވަރުގޭގެ ވަހުން ވެސް މަހްރޫމްވާނެ..” ޒައިވާގެ ބޮލުގައި ފިރުމާލަމުން އަލާޔާ ބުންޏެވެ. ޒައިވާ މަޑުމަޑުން ބޯޖަހައިލިއެވެ.

“މިފެށުނީ އައު އަހަރެއް.. އެހެންވީމަ އައު އަހަރަށް އަޒުމް ކަނޑައަޅަން ވާނެއެއްނުން ދޯ.. އެހެންމީހުންގެ ބަސްތަކުން އަމިއްލަ އުންމީދުތައް ފުޑުފުޑުނުކޮށްލާން.. އަދި އެހެންމީހުންގެ ހިތުގަ ޖެހޭ ކަންކަން ކުރުމުން ދުރުވާންވާނެ.. ގޯސްކޮށް ކުރެވޭ ކަންކަމުން ފިލާވަޅު ލިބިގަނެ އެކަން ތަކުރާރު ނުކުރުމަކީ ވަރަށް މުހިންމު ކަމެއް..” ޒައިވާއަށް ވިސްނައިދިނުމުގެ ގޮތުން އަލާޔާ ބުންޏެވެ. ޒައިވާ ހިނިތުންވެލަމުން ބޯޖަހައިލިއެވެ. ދެ އެކުވެރިންގެ ދެމެދު އެތަކެއް ވާހަކަތެކެއް ދެކެވުނެވެ. ޒައިވާގެ ހާލު ރަނގަޅުވުމާއިއެކު ޒައިވާ ގެއަށް ފޮނުވާލެވުނެވެ. ލުއި ފިޔަވަޅުތަކަކާއިއެކު އަލާޔާ ގެއަށް ދާން މިސްރާބު ޖެހިއެވެ. ގެއަށް ދެވުމުން ހެދުން ބަދަލު ކޮށްލުމަށްފަހު އަލާޔާ އޮށޯތެވެ. އަލާޔާއަށް ނިދުނީ ޒައިވާއާއި ދެކެވުނު ވާހަކައާއި މެދު ވިސްނަމުންނެވެ.

(ނިމުނީ)

ބަސްތަކުން އުންމީދުތައް ގަތުލްކޮށްލަނީ އަޅުގަނޑުމެންގެ ތެރެއިން ކިތައް މީހުން ހެއްޔެވެ؟ މީހުންގެ ރުހުން ހޯދުމަށްޓަކައި އަމިއްލަ އުފާ ވެލިގަނޑުދަށުގައި ވަޅުލަނީ އަޅުގަނޑުމެންގެ ތެރެއިން ކިތައް މީހުން ހެއްޔެވެ؟ މިފަދައިން ކަންތައް ކުރާތީ އަނެކާގެ ހިތައް ކުރާނެ އަސަރާއި މެދު ނުވިސްނަނީ ކީއްވެ ހެއްޔެވެ؟ މީހެއް ވިހަ ތޫނު ބަސްތައް އަނެކާގެ ސިކުނޑީގައި އެތައް ފަހަރު އެނބުރެމުން ދެއެވެ. ކިތަންމެ އުފާވެރިކަން ބޭރުފުށުން ދައްކާ މީހުން، ފަރުދާ ފަހަތުގައި ކުރާ ހިތާމައެއް އެހެން މީހުންނަކަށް ނޭނގޭނެއެވެ. އެހެންކަމުން އަޅުގަނޑުމެންގެ އައު އަހަރުގެ އަޒުމަކަށް އެހެން މީހުންނާއި ދޭތެރޭ ހެޔޮކޮށް ހިތާ، އެހެން މީހުން ދެރަކޮށްލާ ފަދަ ބަސް ބަސް ބުނުން ހުއްޓައިލުން ހަދަމާ ހިގާށެވެ.

އައު އަހަރުގެ ތަހުނިޔާ ހުރިހާ ކިޔުންތެރިންނަށް އަރިސްކުރަމެވެ.