ގޮތް ހުސްވެފައި ހުރީމޭ…1

ހެނދުނު ވެހެން ފެށި ވާރޭ ހުއްޓައެއް ނުލައެވެ. ބޯ ވިލާތަކުން ޖައްވު ބަނަކޮށްފައި ވާއިރު އިރުގެ ދޯދިތައް އެއްވަރަކަށް ވެސް މާލެ ސަރަހައްދުން ނުފެނެއޭ ބުނެވިދާނެއެވެ. ފެން ބޮޑުވުމުގެ ސަބަބުން މާލެ ތެރޭގައި ހިނގާފައި އުޅޭ މީހުންނަށް އެކަން ވާނީ ތުރާލަކާށެވެ. އެއީ މުޅި ގައުމު ދަންނަ ހަގީގަތެކެވެ.

އެއް އަތުން ކުޑައެއް ނަގައިން ހުރެ އަހަރެން ހިނގަމުން ދިޔައީ އޮފީހާއި ދިމާލަށެވެ. އާދައިގެ ހެދުމެއްގައި ހުރި އިރު އަހަރެންގެ ކަނާއަތު ކޮނޑުގައި ވަނީ ކުޑަވަރެއްގެ ހޭންޑް ބޭގެއް އަޅާލާފައެވެ. ޖެހެމުން ދިޔަ ވައިގެ ތެރޭގައި އަހަރެންގެ ކަޅު، ފަން އިސްތަށިތައް އެއްވެސް ތަރުތީބެއް ނެތި ވިހުރެމުން ދިޔައެވެ. އަހަންނަކީ ގައި ހަން އަލި ރީތި ކުއްޖެކޭ ބުނެވިދާނެއެވެ. ތުންފަތުގައި ޖައްސާލާފައި ހުރި މަޑު ރަތްކުލައިގެ މޭކަޕުން މޫނުމަތީގެ ސިފަ އިތުރަށް ރީތި ވާނެއެވެ.

އޮފީހަށް ވަނުމުގެ ކުރިން އަހަރެން ގެންގުޅުނު ކުޑަ ލައްޕާލަމުން ފަތް ޖަހާލީމެވެ. ފުރަތަމަ ފަންގިފިލާއަށް ދިއުމައްޓަކާ އަހަރެން ހިނގައިގަތީ ސިޑިންނެވެ. ހަމަޖެހުމުގެ ނޭވާއެއް ލަމުން މަޑުމަޑުން ހުރެގެން ފަހަރަކު ހަރުފަތެއް ގިރާ ކުރަމުންގޮސް އެތެރެއަށް ވަނީމެވެ.

އަހަރެން އިށީނީ އަހަންނަށް ހާއްސަކުރެވިފައިވާ ގޮނޑީގައެވެ. މޭޒު މަތީގައި ހޭންޑް ބޭގް ބައިންދާލަމުން އަހަރެން ދަތްދޮޅީގައި އެއް އަތް އަޅުވާލައިން އިރުކޮޅެއް ވަންދެން އިނީމެވެ.

“ލީން..! ކިހިނެއްވެފަ؟… ހާދަ ހީވެއޭ މޫޑް އޮފް ވެފަހެން.” އަހަރެން ސިއްސައިން ދިޔައީ އޮފީހުގައި އުޅޭ ލަމްހާގެ އަޑަށެވެ.

ލަމްހާ ބުނި ވާހަކައިގެ ބަދަލުގައި އަހަރެން ޖަވާބެއް ނުދެއެވެ. ހަމައެކަނި ކޮންމެސް ވަރަކަށް ހިނިތުން ވެލީއެވެ. ސިކުނޑީގައި އެނބުރޭ ޚިޔާލުތަކުން ދުރުވާން އަހަރެން ވަގުތުން ލެޕްޓޮޕް ހުޅުވާލީމެވެ. އަހަރެންގެ އެ ހަރަކާތާއި އެކު ލަމްހާ ވެސް އޭނާގެ ކެބިން އަށް ދިޔައެވެ.

ލެޕްޓޮޕް ހުޅުވާލައިން އަހަރެން އިނީ ފޫހިކަމާއި އެކުއެވެ. ކީބޯރޑްގެ އެކި ފިއްތަކުމަށް ފިތަމުން ދިޔައިރު އަހަރެން ހާސިލް ކުރަން ބޭނުންވާ އެއްވެސް ކަމެއް ނެތެވެ. އެކި ފަހަރު އެކި ފިތަށް ފިތާލަ ފިތާލާ އިނީއެވެ. ކުއްލިޔަކަށް އަހަރެންގެ މޭޒުގައި އިން ފޯނު ރިންގް ވާން ފެށިއެވެ.

“ހަލޯ..!” އަހަރެން ބުނެލީމެވެ.

“ހަލޯ..! ލީން.. މިއަދު އޮފީހަށް އައިފަހުން ގަޑިއިރެއް ވީ… އެކަމު އެއްވެސް މަސައްކަތެއް ކުރާތަނެއް ނުފެނެ. އަސްލު މި ގުޅާލީ މިއަދު ބްރޭކް ގަޑީގަ މަށާއެކީ ކޮފީއަކަށް ދެވޭނެތޯ އަހާލަން.” އެކޮޅުން ވާހަކަ ދެއްކީ އޮފީހުގައި އުޅޭ އިނާނެވެ.

އިނާންގެ އަޑަށް އަހަރެން ފަސްއެނބުރި ބަލައިލީމެވެ. ކަންފަތުގައި ފޯނު ޖަހައިން އިނދެ އެ ދިމާލަށް ބަލައިލަމުން އަހަރެން ފޯނު ބޭއްވީ އާނ އެކޭ ބުނުމުގެ ގޮތުން ބޯ ޖަހައިލަމުންނެވެ. އޭރުވެސް އަހަރެންގެ މޫނުމަތީގައި ވަނީ މައުސޫމްކަމެވެ. ހިނިތުންވެލަން ހަނދާން ނެތިފައިވާ މީހެކޭ އަހަންނެކޭ އެއްވެސް ތަފާތެއް ނެތްކަން ބަލާ މީހުންނަށް ފާހަގަ ކުރެވޭނެއެވެ.

ބްރޭކް ގަޑި ޖެހުމާއި އެކު ތިރިޔަށް ފައިބަން ދިއުމަށްޓަކައި އިނާން ނުކުތެވެ. އަހަރެން ވެސް  ބޭގާއި ކުޑަ ހިފައިން އިނާންގެ ފަހަތުން ނުކުންނަން ދިޔައިމެވެ. އޭރުވެސް ހުއްޓުމެއް ނެތި ވާރޭ ވެހެމުން ދިޔައެވެ. އަހަންނާއި އިނާން އޮފީސް ކައިރި ތިރީގައި އިރު ކޮޅަކު މަޑުކޮށްލައިން ތިބީމެވެ.  މާލެ ތެރޭގައި ފެން ބޮޑު ވެފައި ވާއިރު ވެސް ދުއްވާ އެއްޗެތީގެ ހަލަބޮލިކަމަށް މަޑުޖެހުމެއް ނެތެވެ.

އޮފީސް ކުރިމަތީ އިންނަ ކުޑަކުޑަ ކެފޭ އަކީ އާންމު ގޮތެއްގައި އޮފީސް މީހުން ބްރޭކަށް ދާ ތަނެވެ. އަހަރެން އަތުގައި އޮތް ކުޑަ ހުޅުވާލަމުން އިނާންގެ ފަހަތުން އަހަރެން ހިނގައިގަތީމެވެ.

ކެފޭ ތެރެއިން މޭޒެއް ކައިރީގައި އަހަންނާއި އިނާން އިށީނީމެވެ. އެވަގުތު ކާތަކެތި ހިފައިން އައި ވެއިޓަރު މޭޒު މަތީގައި ތަރުތީބުން ތަށިތައް އަތުރާލުމަށްފަހު ދިޔައެވެ. ކާތަކެތިން ދުވާ ވަހުން ބަނޑު ފުރޭހާ ވެއެވެ. ހަގީގަތުގައި އަހަރެން އިނީ ދުވަސް ގަނޑަކަށް ފަހު އެކަހަލަ މީރު ކެއުމެއް ކާލާހިތުން ކެތް މަދުވެފައެވެ.

ތަށީގައިވާ އުލާއި ސަމުސާ ނަގަމުން އިނާން ކާން ފެށިއެވެ. އަހަރެން ވެސް މަޑުމަޑުން ތަށި ތެރޭގައި އުލާއި ސަމުސާ ހަރަކާތް ކޮށްލީމެވެ. އެވަގުތު ވެސް އަހަރެން އިނީ އިނާންގެ މޫނަށް ބަލާ ހަތަރު ކަޅި ހަމަކޮށްލަން ނުކެރިފައެވެ. އަހަންނާއި އިނާން އަކީ އެއް އޮފީހެއްގެ ދެ މުއައްޒަފުން ކަމުގައި ވިޔަސް އިނާން އާއި އެހެން މުއައްޒަފުންނަށް ވެސް އަހަންނަކީ ބީރައްޓެއްސެއް ކަހަލަ މީހެކެވެ. އެހެން ނުވާންވީ ކީއްވެ ހެއްޔެވެ.؟ އަހަރެންގެ މަޑުމައިތިރި މިޒާޖު އެމީހުންގެ ސަކަ މަޖާ މިޒާޖާއި އިންތިހާއަށް ނުބައްދަލެވެ.

“ލީން!… ކިހިނެއްވެފަ..؟ ކާންފަށާ ބަލަ.. ގިނައިރު މިތާ މަޑު ނުކުރާން ވެގެން އޯޑަރު ނިމޭހާ އިރު ކޮށްފަ އަހަރެން މިއައީ ވެސް..” އަހަރެން ނުކައި އިނުމުން އިނާން ބުނެލިއެވެ.

އުލާއި ސަމްސާ ދެފަރާތަށް ހަލުވާލަމުން އަހަރެން ކަން ފެށީމެވެ. އަހަރުމެން ކަމުން ދިޔައިރު އިނާން ދިޔައީ އަހަންނާއި ދިމާލަށް އިރު އިރުކޮޅުން ބަލަމުންނެވެ. އެކަން އަހަންނަށް އިހްސާސް ވިއެވެ. އިނާންގެ ކެއުމުގެ އަވަސް ހަރަކާތުގެ ސަބަބުން އަހަންނަށް ކޮންމެސް ވަރަކަށް އުނދަގޫވިއެވެ. އަހަރެން ކަހަލަ ވިސްނުމެއްގައި ވާ މީހަކު މިހެން އިނަސް، އިނާން ކަހަލަ ހަމަޖެހޭ މީހަކު އުޅޭނީ ވެސް އެހެނެވެ. އެކަން އަހަރެން ގަބޫލު ކުރަމެވެ.

“ލީން…! ވާހަކައެއް އަހައިލަންތަ؟… އަސްލު ލީން ބަލައިލީމަ ހީވަނީ ހަމަ ވަރަށް ވިސްނާހެން.. އަނެއްކާ، ލައިފްގެ ކަމެއްތަ؟؟..” އިނާން ސީދާ އަހަންނާ ސުވާލުކޮށްލިއެވެ.

“އިނާން…!” އަހަރެން ކެއުން ހުއްޓާލުމަށް ފަހު އިރުކޮޅަކަށް ވާހަކަ ނުދައްކާ އިނީމެވެ.

“ލީން…! ލީން ބޭނުމިއްޔާ އަހަރެން ލީންއަށް ހެލްޕް ވާނަމޭ.. އަހަންނަށް ކިޔައިދީބަލަ.. ވަރަށް އުފާ ވާނެ ޝެއަރ ކޮށްފިއްޔާ… އަސްލު ކޮންމެ ދުވަހަކު ޖޮބަށް އައިސް ތިހާ ދެރަވެފަ..  ކަންބޮޑު ވެފަ އިންނަތަން ފެންނާތީއޭ މިއަދު ކޮންމެހެން ވެސް މިތަނަށް މިއައީ… އަހަންނަށް ހަމަ ފަސޭހައެއް ނޫން އޮފީހުގަ ލީން ތިހެން އިންނަތަން ބަލާކަށް…” އިނާން އޭނާގެ ހިތުގައިވާ އުދާސް ތައް ބޭރުކޮށްލިއެވެ.

“އިނާން…ޕްލީޒް… ތިވާހަކަ ނުދައްކަ ފާނަންތަ؟” އާދޭހުގެ ރާގުގައި އަހަރެން ބުނެލީމެވެ.

“އެންމެ ރަނގަޅު… އެކަމު އަހަންނަށް އިނގޭ މި އޮފީހުގަ ދެ އަހަރު ވީއިރު ވެސް ލީންގެ ނެތް ކަން އެއްވެސް ރައްޓެއްސެއް… އޮފީސް މީހުން އުޅޭހެނެއް ނޫން ލީން ތި އުޅެނީ.. ކޮންމެ މީހެއްގެ ވެސް ކޮންމެސް ރައްޓެއްސެއް ހުންނާނެ.. ހުންނަން ވެސް ވާނެ… އެކަމު ދެން ނޭނގެ… އަހަންނަށް ލީން އާއި ދޭތެރޭ ވިސްނޭތީ ބުނެވުނީ..” އިނާން ބުނެލީ އިނާނަށް ވިސްނުނު ގޮތަށެވެ.

“ހުރިހާ އެންމެން އެއްގޮތެއް ނުވާނެ އިނާން.” އަހަރެން ބުނެލީ ކުރު ކުރު ޖުމްލައެކެވެ.

“އެންމެން އެއްގޮތް ނުވެދާނެ.. އެކަމު އެންމެންގެ އެއްގޮތް ކަންތައްތައް ވެސް ހަމަ ހުންނާނެ.. ދެން އޯކޭ.. ލީން ކޮންމެހެން ބޭނުމެއް ނޫނެއްނު ވެގެން އުޅޭގޮތް ކިޔައިދޭކަށް. އެހެންވީމަ ދެން ނުބުންޏަސް، އަހަރެންގެ ނެތް އެއްވެސް މައްސަލައެއް.” އިނާން އޭނާގެ ކައިރީގައި އިން ފެން ތަށި ނަގާ ބޯންފެށިއެވެ.

“ވެދާނެއްނު ދިރިއުޅުމުގެ ވާހަކަ ތަކަކީ އަހަންނަށް ދައްކަން އެހާ ފަސޭހަ ވާހަކަ ތަކަކަށް ނުވަނީ ކަމަށް.” އަހަރެން ބުނެލީ ދުރު ދުރުންނެވެ.

“ވެދާނެއެއް ނޫން… އޯލްރެޑީ އެހެން ވެފަ ތި އިނީ… އެހެންވީމަ ތިހެން ތި އިންނަނީ ވެސް.. ލީންއަށް ލީންގެ ލައިފް ސްޓޯރީ ސިއްރު ކުރެވިދާނެ. އެކަމު ކިހިނެއް ލީންއަށް އެ ސްޓޯރީގެ ކަވަރ ޕޭޖުން އެއީ ކޮންކަހަލަ ސްޓޯރީއެއް ކަން ސިއްރު ކުރެވޭނީ..؟؟” އިނާން ބުނެލި ވާހަކަ އިން އަހަރެން ސިއްސައިން ދިޔައެވެ.

އިނާން އެބުނީ ތެދެކެވެ. އަހަރެން ހަޔާތުގެ ވާހަކަތަކަކީ އަހަރެން ސިއްރުކޮށްފައިވާ އެއްޗެކެވެ. އެހެން ނަމަވެސް އެބުނާ “ކަވަރ ޕޭޖް” އަކީ އަހަރެން ނަމަ ބަލަން ތިބޭ މީހުންނަށް އެކަން ސިއްރެއް ނުވާނެއެވެ. އިނާން ފަދަ ވިސްނުން ތޫނު މީހަކު އެހާ ފަސޭހައިން އަހަރެން ދަސްކޮށްލީތީ އަހަރެން ހައިރާން ވެއެވެ.

“އިނާން…! ވަރަށް ބޮޑަށް ސޮރީ.. އަހަންނަކަށް ނޭނގުނު ތިއަށް ދޭނެ ޖަވާބެއް. އަހަރެން ދަނީ..” ހޭންޑް ބޭގް ކޮނޑުގައި އަޅުވާލަމުން އަހަރެން ހިނގައިގަތީމެވެ.

ކެފޭގެ ދޮރު ކައިރިއަށް ނުކުތުމާއި އެކު އަހަރެން ހަނދާންވީ އެތެރޭގައި ކުޑަ ބާއްވާފައި އާދެވުނު ކަމެވެ. އެހެންވެ ކުޑަ ބަލާ ދިއުމަށްޓަކާ އަހަރެން އެނބުރި ލީމެވެ. އަހަރެން ދިޔައީ ސިއްސައިންނެވެ. އެވަގުތު އަހަރެންގެ ބޯމައްޗަށް ހުޅުވާލާފައިވާ ކުޑަ ހިފައިން ހުރީ އިނާނެވެ. އަހަރެން އަތަށް ކުޑަ ދިއްކޮށްލަމުން އިނާން އޮފީހަށް ދިއުމަށްޓަ ވާރޭ ތެރެއިން ހިނގައިގަތީ އެއްވެސް އެއްޗެއް ނުބުނެއެވެ.

ތެމިގެން މަގު ހުރަސް ކުރަން ދިޔަ އިނާންއަށް ބަލަން އަހަންނަށް ހުރެވުނެވެ. އެވަގުތު އަހަންނަށް ހީވީ އަހަރެންގެ އަމިއްލަ ނަފްސު ކުށްވެރި ވިހެނެވެ. އެހެން ނުވާނެ ހެއްޔެވެ؟ އިނާންގެ ޚަރަދުގައި އަހަންނަށް މީރު ކެއުމެއް ދިންއިރު، އިނާންގެ އެއްވެސް ސުވާލަކަށް އަހަންނަށް ޖަވާބެއް ނުދެވުނެވެ.

އެދުވަހު އޮފީހުގައި ބާކީ ވަގުތުތައް އަހަރެން ހޭދަކުރީ ވަރަށް ފޫހިކަމާއި އެކުއެވެ. ކުރިން ވެސް ވިސްނުންތައް ފުނިޖެހިފައިވާ ބޮލުގައި މިހާރު އިތުރަށް ހަނގުރާމަ ކުރަނީ އިނާން ދެއްކި ވާހަކަތަކެވެ. އިނާން ކުރި އާދޭސްތަކެވެ.

އޮފީސް ނިންމާލާފައި ގެއަށް ދާން އަހަރެން ތިރިއަށް ފޭބީމެވެ. އޭރު އޮފީހުގެ ގިނަ މީހުން އެމީހުންގެ އަމިއްލަ ސައިކަލުގައި ގެއަށް ދިއުމަށްޓަކައި މިސްރާބު ޖެހިއެވެ. ބައެއް އަންހެން ވެރިން ބަލާ އެމީހުންގެ ލޯބިވާ ފިރިން ސައިކަލުގައި ނޫނީ ކާރުގައި އައިސް ގޮސްފިއެވެ. ލައްޕާލާފައިވާ ކުޑަ ހިފައިން ދުރުގައި ހުރެ އަހަރެން އެ މަންޒަރު ބަލަމުން ދިޔައިމެވެ.

“ލީން…! އަދިވެސް ގެއަށް ނުދަންތަ…؟” އަހަރެން ސިއްސައިން ގޮސް ބަލައިލީ ލަމްހާގެ އަޑަށެވެ. އޭރު ލަމްހާ އާއި ނުހަނު ގާތުގައި އިނާން ހުއްޓެވެ.

“މި ދަނީ….” އިނާންގެ ލޮލަށް ބަލައިލުމަށްފަހު ވަރަށް އަވަހަށް އަހަރެންގެ ނަޒަރު އެހެން ދިމާލަކަށް ހުއްޓާލަމުން ކުޑަ ހުޅުވާލީމެވެ.

ކޮންމެވެސް ވަރަކަށް ތެމިގެން ގެއަށް ދެވުނު އިރު އަހަރެން ހުރީ ހީކަރުވައި ގަނެފައެވެ. މަޑުމަޑުން ފިޔަވަޅު އަޅަމުން ގޮސް އަހަރެން ވަނީ ކޮޓަރިއަށެވެ. ބުޅި ގަނޑުގައި އަޅުވާފައިވާ ތުވާއްޔާއި ހެދުން ނަގައިން ފާޚާނާއަށް ވަނީމެވެ.

އަހަރެން ފެންވަރައިގެން ނުކުތް އިރު ފިރިމީހާ އިޔާޝް ގޭމް ކުޅެލަ ކުޅެލައި އެނދުމަތީގައި އޮތެވެ. އަހަރެން އެކަމަށް ފަރުވާލެއް ނުބަހައްޓަމެވެ. އެއީ އިޔާޝްގެ އާދަކަމުގައި ވާތީއެވެ.

ލޯގަނޑު ކުރިމަތީގައި ހުރެ އަހަރެން ރީތި ވަމުން ދިޔައިމެވެ. ފިރިމީހާގެ މަންމަ ގެއަށް ދަރިފުޅު އިޔާން ބަލާ އަހަރެން ކޮންމެ ދުވަހަކު ވެސް ދަނީ އޮފީހުން އައިސް ރީތިވެގެންނެވެ. އެގޮތުން މިއަދުވެސް އަހަރެން އެގެއަށް ދާން ތައްޔާރު ވީމެވެ.

“ލީން..! މި ވިއްސާރައިގަ ދެން އިޔާން ގެންނާނެކަމެއް ނެތް.. މަންމަ ގޭގަ މިއަދު ބަހައްޓާ…” ގޭމް ކުޅެން އޮވެ އިޔާޝް ބުނެލިއެވެ.

އިޔާޝްގެ ވާހަކަ އަޑުއެހުމެއް ނެތި އަހަރެން އޭނާ އާއި ދިމާލަށް ބަލައިލަމުން ކޮޓަރިން ނުކުތީމެވެ. އަހަރެން ގެންގުޅޭ ކުޑަ ނަގައިން ކުރިޔަށް ހިނގަމުން އަހަރެން ނުކުތީ މަގުމައްޗަށެވެ.

އިޔާން ބަލާ ދެވުނު ވަގުތަކީ އެގޭތެރޭގައި އުޅޭ ހުރިހާ ކުޑަކުދިން ސައިބޯން ތިބި ވަގުތެވެ. އަހަރެން ވަނުމާއި އެކު މައިދާތަ ޔުސްރާ އަހަންނާ ދިމާލަށް އައެވެ. ޔުސްރާ އާއި ކުރިމަތި ލުމަކީ އެއްވެސް އިރެއްގައި އަހަންނަށް ފަސޭހަ ކަމެއް ނޫނެވެ. ޔުސްރާގެ ޒީލަ ގަދަ ކަމާއި ނުފޫޒު ގަދަ ކަމުން ގިނަ ފަހަރަށް އަހަރެން ހުންނަނީ ޔުސްރާގެ މުށު ތެރޭގައެވެ.

“ހުރިހާ ކުދިން ސައިބޯން އައި އިރު އިޔާން ގާތު ބުނިން އަންނާށޭ.. އެކަމު ކީއްކުރާނީ މިއަދު ވެސް އެހުރީ އަމާ ނެތީމައޯ ކިޔާފަ އަރުން އެއްޗެއް ދިރުވާ ނުލާން.” އެކި ކޮޅުކޮޅަށް އަތް އުކަމުން ޔުސްރާ ބުނެލީ އާދަވެގެން ކޮންމެ ދުވަހަކު ވެސް ބުނާ ވާހަކައެވެ.

“އިޔާން ބަލާ މިއައީ” އަހަރެން ބުނީ ކުރު ޖުމްލައެކެވެ.

“ތިތާ ހުރޭ.. މަ އަންނާނަން ކަލޭގެ “ގަދަރުއްމާނު ރަސްގެފާނު” ގޮވައިން..” ޔުސްރާ އެހެން ބުނުމާއި އެކު ސައިބޯން ތިބި ކުދިން ހޭންފެށިއެވެ.

އިޔާނަކީ ހަލަބޮލި ކުއްޖެކެވެ. އެއްތާ މަޑުން ހުންނަން އުނދަގޫ އިޔާން ގެންގުޅުމަކީ އަހަންނަށް ވެސް ފަސޭހަ ކަމެއް ނޫނެވެ. އެހެނޭ ކިޔާފައި މައިދާތަވެސް އެކުއްޖާއަށް ދީފައިވަނީ ކޮންކަހަލަ ނަމެއްހެއްޔެވެ؟ އެއީ ކޮންމެ ދުވަހަކު ވެސް މައިދާތަ އެ ސޮރަށް މުޚާތަބު ކުރާ ނަމެވެ.

އަނެއްކޮޅުން ދެން ތިބި ކުޑަކުދިންނެވެ. ބޮޑެތި މީހުންގެ ނެތް އަޚާލްގެއް އެކުދިން ފުށުން ވަކި ފެންނާނީ ކިހިނެއް ހެއްޔެވެ؟. އިޔާން އުޅޭ ގޮތުންނާއި ކުރާ ކަންކަމުން އެކުއްޖާއަށް ޖޯކު ޖަހާ ހަޖޫ ޖެހުން ނޫން ކަމެއް އެކުދިން ވެސް ނުކުރިއެވެ. އެކަހަލަ ވަގުތު ތަކުގައި އަހަރެންގެ ދެ ދަތްޕިލާ ފިއްތާ ބާރުކޮށްލަނީ އަނގައިގެ ތެރޭގައި އޮންނަ ދޫ ހަރަކާތް ކޮށްފާނެތީ އެވެ.

އެހެނަސް، ކޮންމެ ދުވަހަކު ވަޒީފާއަށް ދަމުން އިޔާން އެގެއަށް ގެންނަނީ އަހަންނަށް އެހެން ގޮތެއް ނެތީމައެވެ. ހަގީގަތުގައި އިޔާން ބެލުމުގެ ޒިންމާ އަދާކުރާ މީހަކީ އަހަރެން އެކަންޏެވެ. އިޔާޝްގެ ފަރާތުން އިޔާނަށް ލޯތްބާ އަޅާލުމެއް ނުލިބެއެވެ.

“މަންމާ..! އިޔާން ވަރަށް ބަނޑުހައި.. މިއަދު ވެސް މާމަ ކާކަށް ނުދޭ..” އިޔާން ވަރަށް ބާރަށް ދުވެފައި އައިސް އަހަރެން ގައިގާ ބައްދާލަމުން އެހެން ބުނިއިރު ކުރިމަތީގައި ޔުސްރާ ހުއްޓެވެ.

– ނުނިމެ –

ސަލާމް! ކިޔުންތެރިންނަށް ބާއްޖަވެރި ދުވަހަކަށް އެދެން. ދުވަސްތަކަކަށް ފަހު އަނެއްކާ ވެސް އަޅުގަނޑުގެ ފަރާތުން މި ގެނެސްދެވޭ ދިގު ވާހަކަ އަކީ ކިޔުންތެރިންނަށް ކަމުދާނެ ވާހަކައެއް ކަމުގައި އުންމީދު ކުރަން. މި ވާހަކަ ކިޔާލަން ލިބޭނީ ކޮންމެ ހަފްތާ އެއްގެ އާދިއްތަ އަދި ބުދަ ދުވަހު ކަމުގައި ދަންނަވަން. ޝަލީންގެ ވާހަކަތައް ކަމުދާ ފަރާތްތަކުން މި ވާހަކައިގެ ކުރިޔަށް ހުރި ބައިތަކަށް އިންތިޒާރު ކޮށްލުން އެދެން. 🙂♥️

ޝުކުރިއްޔާ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.