އިންތިޒާރު

މާލޭގެ ހަލަބޮލި މަގެއްގައި ހުންނަ “ސިލްވަރ މިސްޓް” ކެފޭއަކީ ހަމަހިމޭންކަން ހޯދަން ބޭނުންވާ މީހުންގެ މަންޒިލެވެ. އެ ކެފޭގެ އެންމެ އެތެރޭ ކަނުގައި ހުންނަ ކުޑަ މޭޒަކީ އަޔާންގެ އަމިއްލަ މިލްކެއް ކަހަލައެވެ. އެ ހިމޭން މޭޒަކީ، އަޔާންގެ ހުރިހާ ޚިޔާލުތަކާއި ކުލަތައް މިނިވަންކަމާއެކު އުދުހޭ އޭނާގެ އަމިއްލަ ދުނިޔެއެވެ. އުމުރުން 26 އަހަރުގެ އަޔާންއަކީ ހިމޭންކަމަށް ލޯބިކުރާ ކުރެހުންތެރިއެކެވެ. އޭނާގެ އިނގިލިތަކުގައި ހުންނަ ކުލައިގެ ނިޝާންތަކަކީ އޭނާ ކުރާ ބުރަ މަސައްކަތްތަކުގެ ހެކިވެރިންނެވެ.

އެއްދުވަހެއްގެ ހަވީރުގެ ވަގުތެވެ. ކެފޭގެ ދޮރު ހުޅުވާލާފައި އަންހެން ކުއްޖަކު ވަނެވެ. އެއީ ލައިޝާ އެވެ. އޭނާގެ އަތުގައި އޮތް ބަރު މެޑިކަލް ފޮތްތަކާއި، ކޮނޑުގައި އޮތް ދަބަހުގެ ބަރުކަމުން އޭނާ ހުރީ ވަރުބަލިވެފައެވެ. ލައިޝާ ގޮސް އިށީނީ އަޔާންގެ ކުރިމަތީގައި ހުރި މޭޒުގައެވެ.

އަޔާން އޭނާގެ ފަންސޫރު މަޑުޖައްސާލިއެވެ. ލައިޝާގެ މޫނުމަތިން ފެންނަނީ މާޔޫސްކަމެވެ. އޭނާ އޭނާގެ ފޯނު ނަގައި، ކޮންމެސް މީހަކަށް ގުޅާލިއެވެ.

“މަންމާ… ބޭސްތައް ހުސްވީތަ؟” ލައިޝާގެ އަޑު މަޑެވެ. ނަމަވެސް އޭގައި ހުރި ހާސްކަމާއި ނުތަނަވަސްކަން އަޔާންއަށް އިހުސާސް ކުރެވުނެވެ. “އަހަރެން މި މަހުވެސް ފޮނުވާނަން. ނުރޮއި މަންމާ. އަހަރެން މިހާ ބުރަކޮށް މި ކިޔަވަނީ ހަމަ މަންމަމެންނަށްޓަކައި.”

ލައިޝާ ފޯނު ބޭއްވިއެވެ. އޭނާގެ ދެލޮލުން ހޯސްލާފައި ކަރުނުތައް ފައިބައިގަތެވެ. އެމަންޒަރު ބަލަން އިން އަޔާންގެ ހިތުގައި މަޑު ރިހުމެއް އުފެދުނެވެ. އޭނާ ފަސްޖެހުމެއްނެތި އޭނާގެ ކުރަހާ ފޮތުން ގަނޑެއް ނަގައި، ވަރަށް އަވަހަށް ކުރެހުމެއް ކުރަހާލިއެވެ. އެއީ ކަޅު އަނދިރި އުޑުގެ ތެރެއިން ފެންނަ އަލިގަދަ ތަރިއެކެވެ. އޭގެ ތިރީގައި އޭނާ ލިޔެލިއެވެ.”އެންމެ އަނދިރި ރޭގަނޑަށްފަހުވެސް އިރުގެ އަލިކަން ފެންނާނެއެވެ.”

އަޔާން ތެދުވެގެން ގޮސް ލައިޝާގެ މޭޒުމަތީގައި އެ ކުރެހުން ބޭއްވިއެވެ. ލައިޝާ ސިހިފައި ބަލާލިއެވެ.

“ޝުކުރިއްޔާ،” ލައިޝާ މަޑުމަޑުން ބުންޏެވެ. “ކިހިނެއް އެނގުނީ އަހަރެން މިއީ އެކަނިވެރިވެފައި ހުރި މީހެއްކަން؟”

އަޔާން ކުޑަކޮށް ހިނިތުންވެލިއެވެ. “ކުރެހުންތެރިންނަށް މީހުންގެ ލޮލުން ކިޔައިދޭ ވާހަކަތައް ވެސް ނަގައިގަނެވޭ.

އަހަރެންގެ ނަމަކީ އަޔާން.”

“އަހަރެންގެ ނަމަކީ ލައިޝާ،” އޭނާ ޖަވާބު ދިނެވެ.

ދުވަސްތައް ފާއިތުވަމުން ދިޔައެވެ. އެމީހުންގެ ބައްދަލުވުންތައް ކެފޭއިން ބޭރަށް ޖެހިލިއެވެ. އެއްދުވަހަކު އާޓިފިޝަލް ބީޗުގައި ތިބެގެން ލައިޝާ އަހާލިއެވެ.”

އަޔާން، ކީއްވެ ތިހާ ބޮޑަށް ކުރެހުމަށް ލޯބިކުރަނީ؟” އަޔާން ދުރު ބަލާލިއެވެ. “ދުނިޔޭގެ ބައެއް ކަންކަމަކީ ބަސްތަކުން ކިޔައިދެވޭނެ އެއްޗެއް ނޫން. ކުލަތަކަކީ ހިތުގެ ބަސް. ލައި ކީއްވެ ޑޮކްޓަރަކަށް ވާން ބޭނުންވީ؟”

“މީހުންގެ ތަދުތައް ކުޑަކޮށްދޭން،” ލައިޝާ ބުންޏެވެ. “އަހަރެންގެ ބައްޕަ ނިޔާވީ ރަނގަޅު ފަރުވާއެއް ނުލިބިގެން. އަހަރެން ބޭނުމެއް ނޫން އެހެން އެއްވެސް މީހަކަށް އެފަދަ ހިތްދަތި ކަމެއް ލިބޭކަށް.”

އަޔާން ލައިޝާގެ އަތުގައި ހިފާލިއެވެ. އަޔާންގެ އަތުގެ ހޫނުކަން ލައިޝާގެ އަތަށް އިހުސާސްވީ ވަގުތު އެމީހުންގެ ދެމެދުގައިވާ ހުރިހާ ބީރައްޓެހިކަމެއް ފިލައި، އާ ގުޅުމެއްގެ ބިންގާ އެޅުނެވެ.

ލައިޝާއަށް އިނގިރޭސިވިލާތުން ސްކޮލަޝިޕް ލިބުނު ޚަބަރުވީ އުފަލަކަށްވުރެ ބޮޑަށް ހިތާމައަކަށެވެ. ފުރަން އޮތް ރޭ، މާލޭގެ އިރުމަތީ ފަރާތު ތޮށިގަނޑު މަތީގައި އެމީހުން ތިއްބެވެ. “އަހަރެން ބިރުގަނޭ އަޔާން،” ލައިޝާ އިނީ ފެންކަޅިވެފައެވެ.”ތިން އަހަރު… ތިން އަހަރު ތެރޭގައި އަޔާން އަހަރެންގެ މަތިން ހަނދާން ނެތިއްޖެއްޔާ؟”

އަޔާން ފަސްޖެހުމެއްނެތި ލައިޝާގެ ތުރުތުރުލަމުންދިޔަ ދެއަތުގައި ބާރަށް ހިފާލިއެވެ. “ބަލާލަބަލަ މި ކަނޑަށް. ރާޅުތައް އަތިރިއަށް އައިސް ބޮސްދީފައި ދިޔަޔަސް، އެ ރާޅުތައް އަނބުރާ އަންނަނީ ހަމަ މި އައްސޭރިއަކަށް ނޫންތަ؟ ލައި ބިރުނުގަނޭ. ލައި އެނބުރި އަންނައިރުވެސް އަހަރެން ހުންނާނީ ހަމަ މިހުރި ގޮތަށް، ހަމަ މި އިންތިޒާރުގަ. އަހަރެން އިންތިޒާރު ކުރާނަން. ކޮންމެ ދުވަހަކު ކޮންމެ ސިކުންތަކު.”

ލައިޝާ އަޔާންގެ މޭގައި ބޯ އަޅާލިއެވެ. “އަހަރެން އަންނާނަން. އަހަރެން ވައުދުވަން.”

ތިން އަހަރު ފާއިތުވަމުން ދިޔައީ ވަރަށް ލަސްލަހުންނެވެ. ލައިޝާ އިނގިރޭސިވިލާތުގެ ފިނީގައި، ކިޔެވުމުގެ ބުރަކަމުގެ ތެރޭގައި އުޅެއެވެ. އަޔާން ކޮންމެ ރެއަކު ލައިޝާއަށް ކުރެހުމެއް ފޮނުވައެވެ. ބައެއް ރޭރޭ ދެމީހުން އެތައް ގަޑިއިރުތަކެއް ވަންދެން ވީޑިއޯ ކޯލްގައި ތިބެއެވެ.

“މިތަން ވަރަށް ފިނި،” ލައިޝާ އެއްދުވަހަކު ބުންޏެވެ. “އަޔާން މަތިން ވަރަށް ބޮޑަށް މިސްވޭ.”

“އަހަރެން ކެފޭގަ މި އިންނަނީ ލައި އިށީންނަ ގޮނޑީގަ” އަޔާން ޖަވާބު ދިނެވެ. “ކެފޭގެ ވެއިޓަރުވެސް މިހާރު އަހަރެންގެ ގާތުގައި އަހާ ކޮބާހޭ މެޑަމް؟ މުޅި މާލެ މި އިންތިޒާރު ކުރަނީ ލައިއަށް.”

ދުވަސް ކޮޅެއް ފަހުން އަޔާންގެ އަމިއްލަ އާޓް ގެލެރީ “ލައިޝާ” ހުޅުވުނެވެ. އެ ދުވަހު މުޅި ގެލެރީ ފުރިފައި އޮތީ ހަމައެކަނި މީހުންނަކުން ނޫނެވެ. އޭނާގެ ލޯބީގެ ހަނދާންތަކުންނެވެ. އެންމެ ބޮޑު ކުރެހުމުގައި ހުރީ ލައިޝާ ފުރައިގެން ދިޔަ ރޭގެ މަންޒަރެވެ. ކަރުނައިގެ ތިކިތަކުގައި ހުރި ވިދުމާއި އަސަރުން ހީވަނީ މިހާރުވެސް އެ ކަރުނަތައް ކުރެހުމުގެ މަތިން، ތިރިއަށް ފައިބައިގަނެފާނެ ހެންނެވެ.

ކުއްލި އަކަށް ގެލެރީގެ ދޮރު ހުޅުވުނެވެ. މީހުންތަކުގެ ތެރެއިން ކަޅު ކުލައިގެ ހެދުމެއްގައި ހުރި އަންހެން ކުއްޖަކު ވަދެގެން އައެވެ. އެއީ ލައިޝާއެވެ. އޭނާގެ ދެލޮލުން ކަރުނަ ފައިބަމުން ދިޔައެވެ. އަޔާން އޭނާގެ ގާތަށް ހިނގައިގަތެވެ.

“ލައި…” އަޔާންގެ އަޑު ކުރެހުނެވެ.

ލައިޝާ އަޔާންގެ މޭގައި ބޯއަޅައިލިއެވެ. “އަހަރެން މިއައީ. އަހަރެންގެ ވައުދު ފުއްދައިފިން.”

ގެލެރީގައި ތިބި މީހުންގެ ތަރުހީބުގެ އަޑާއެކު، އަޔާން ލައިޝާގެ ކަންފަތްދޮށުގައި ބުންޏެވެ. “އަހަރެންގެ އިންތިޒާރު ފުރިހަމަވެއްޖެ. މި ހުރިހާ ދުވަހު އަހަރެން ކުރެހީ ހަނދާންތަކެއް. އެކަމަކު މިއަދުން ފެށިގެން އަހަރެން ކުރަހާނީ ހަޤީޤަތް. އެއީ އުފަލާއި ހިނިތުންވުމުން ފުރިގެންވާ އަހަރެމެންގެ މުސްތަގުބަލު.”

ލައިޝާ އިސްއުފުލާލާފައި އަޔާންގެ މޫނަށް ބަލާލިއެވެ. “އަހަރެން ދެން ދުވަހަކުވެސް އަޔާން ދޫކޮށްފަ ނުދާނަން. ދުނިޔޭގެ ކޮންމެ ތާކަށް ދިޔަޔަސް އަހަރެންގެ ހިތަށް ހަމަޖެހުން ލިބޭނެ ހަމައެކަނި އައްސޭރިއަކީ ތީ”

ލައިޝާ އަޔާންގެ ކޮނޑުގައި ބޯ އަޅާލިއެވެ. އެއީ ދެ ހިތެއްގެ ދިގު އިންތިޒާރުގެ ނިމުމެވެ. އަދި އާ ފުރިހަމަ ހަޔާތެއްގެ ފެށުމެވެ.

ނިމުނީ