މާޒީ

އަހަރެން ކިޔަވައި ނިމުމާއެކު ވަޒީފާއަކަށް ދާން ފެށީމެވެ. އަހަރުގެ ކުރީކޮޅު ދިޔައީ ނުހަނު އޮމާންކޮށެވެ. ނަމަވެސް ގިނަ ދުވަސްތަކެއްނުވެ އަހަރެންގެ ޙަޔާތަށް ކުދިކުދި ބަދަލުތަކެއް އަންނަން ފެށިއެވެ. ޙަޔާތުގައި ފުރަތަމަ ފަހަރަށް އަހަރެން ކުއްޖަކާއި ރައްޓެހިވީމެވެ. އަހަރެން އޭނަދެކެ އިންތިހާއަށް ލޯބިވީމެވެ . އަދި އޭނަ ބުނާ ކޮންމެ ކަމެއް ފަސްނުޖެހި ކުރަމުން ދިޔައީމެވެ. ފިރިއަކަށް ދޭންޖެހޭ މަތިވެރި މަޤާމް އަހަރެންގެ ހިތުން އޭނައަށް ދިނީމެވެ.

ދުވަސްތައް ފާއިތުވަމުން ދިޔަދިޔަހެން އަހަރުމެންގެ ބައްދަލުވުންތައް އިތުރުވަމުން ދިޔައެވެ. އަދި ދެމީހުންގެ ދެމެދުގައި އޮވެގެން ނުވާނެފަދަ ގާތްގުޅުމެއް އުފެދުނެވެ. ނަތީޖާއަކަށްވީ ﷲ ސުބުޙާނަހޫ ވަތަޢާލާ ނުރުއްސަވާ ފާފަތަކަށް އަރައިގަނެވުނެވެ. މި ކުރެވެނީ ގޯސް ކަންތައްތަކޭ އަހަރެންގެ ހިތަށް އޭރުވެސް އަރައެވެ. ނަމަވެސް އޭނަ އަހަންނަށް ވިސްނައިދެމުން ދިޔައީ އެއީ މިފަދަ ޒަމާނެއްގައި މާ ބޮޑު ކަމެއް ނޫންކަމަށެވެ. އަހަންނަށް އޭނަގެ ބަސް ޤަބޫލު ކުރެވުނެވެ. ހެއްދެވި ފަރާތް މަތިން ހަނދާން ނެތެން މާ ގިނަ ވަގުތެއް ނުނަގައެވެ.

މާ ގިނަ ދުވަސްތަކެއްނުވެ އޭނަ އަހަރެން ދޫކޮށްލާފައި ހިނގައްޖެއެވެ. އަހަރެންގެ ހިތް ކުދިކުދިވެ ހުރިހާ ހުވަފެންތައް ވިއްސިވިހާލިވިއެވެ. މިހެން ކަންތައްތައް ވާނެއެކޭ ދުވަހަކުވެސް ހިތަކަށް ނާރައެވެ. މިއީ ޙަޔާތުގައި ކުރިމަތިވި ފުރަތަމަ ހިތްދަތިކަމެވެ. އެންމެ ހިތްދަތި ދުވަސްތަކެވެ. އެ ހަނދާންތަކާ ދުރަށް ގޮސް އެ ދުވަސްތައް މަތިން ހަނދާން ނައްތާލަން އަހަރެން ނިންމީމެވެ. ކިތަންމެ ލޯބިވިޔަސް ދެން އެދުވަސްތައް އަނބުރާ ގެންނާކަށް އަހަރެން ބޭނުމެއްނޫނެވެ. އަހަރެން އަހަންނަށް ކުރެވުނު ކަންތަކާއިމެދު ދެރަވަމެވެ. އެހެނަސް އެކަމަށްޓަކައި އެއްވެސް މީހަކަށް އިނގިލި ދިއްކުރެވޭކަށްވެސް ނެތެވެ. އަހަރެން ވެސް އެނގިހުރެ އެ ފާފައިގައި ބައިވެރިވީތީވެއެވެ. ނަމަވެސް ﷲ ސުބުޙާނަހޫ ވަތަޢާލާ އެކަލާނގެ އަޅުތަކުންގެ ފާފަ ފުއްސަވާކަން އަހަންނަށް އެނގެއެވެ. ފުރިހަމަ ތައުބާއަކުން ތައުބާވެ ކުރީގެ އުޅުން އަހަރެން ދޫކޮށްލީމެވެ.

އުޚްތުންނޭވެ! ތިބާގެ ރީތިކަން ތިބާ ވިއްކާނުލާށެވެ! ތިބާއަކީ ޤަދަރާއި ޝަރަފު ދެއްވާފައިވާ މީހެކެވެ. ތިވާ ޝައިތާނީ ލޯތްބަކީ މި ދުނިޔޭގައި ވަރަށް ބޮޑު އެއްޗެއް ކަމުގައި ފެނުނަސް، އާޚިރަތުގައި ތިބާއަށް އެ ލޯބިން މަންފާއެއް ނުކުރާނެއެވެ. ތިބާގެ ނުބައިކަމުގެ ތިލަފަތް ބަރުކުރަނިވި ސަބަބަކަށް އެ ލޯބި ވެދާނެތީ ބިރުވެތިވާށެވެ. ކައިވެނިން ބޭރުގައި ވެވޭ ލޯތްބަކީ އެއްވެސް އަގެއްނެތް އެއްޗެއްކަން ތިބާއަށް ވިސްނޭނެނަމަ ކިހާ ރަނގަޅު ހެއްޔެވެ؟

**ނިމުނީ**

(މިއީ “ކަލަކުވޭ، ބިރުވެތިވޭ” ނަމަކަށް ކިޔާ ފޭސްބުކް ޕޭޖްގައި ލިޔެވިފައިވާ ވާހަކައެކެވެ. އަޅުގަނޑު މިވާހަކަ މި ސައިޓްގައި ޝާއިއުކުރީ މިވާހަކަ ލިޔުއްވި ފަރާތުގެ އިޒުނައާއެކު އަޅުގަނޑުގެ އެކުވެރިއެއްގެ އެދުމުގެ މަތިންނެވެ. މާތް ﷲ މިފަދަ ކޮންމެ ހަނދުމަކޮށްދިނުމެއްގައި ބަރަކާތް ލައްވާ އަޅަމެން އެންމެނަށް ހިދާޔަތް ދައްކަވާށި! އަމީން!)