ފުންއަސަރު -01

މާލޭ އަމީރުއަހްމަދު މަގުގައި ދިހަ ބުރިއަށް ހިއްލާލާފައި ހުރި ބޮޑުގެ މަލަމަތި ފެނުނު މީހަކުވެސް ތަލިން ކުޅު ހިކޭނެކަން ޔަގީނެވެ. ބޭރުން އެގެ ބަލާލާފައިދާ ކޮންމެ މީހަކުވެސް ހުންނަނީ އެގޭ އެތެރެ ބަލާލާހިތުން ކެތްމަދުވެފައެވެ. އެގެ ފެނުމާއެކު ގޭ ވެރިފަރާތުގެ މުއްސަނދިކަމާއި ހައިބަތު ހާމަވެގެންދޭއެވެ. މ.މެކާހިޔާ އަކީ ރާއްޖެއަށް މަޝްހޫރު ވިޔަފާރިވެރިޔާ ނޫރީ ގެ އަމިއްލަ ގެއެކެވެ. މުޅި ދިވެހިރާއްޖޭގައި ނޫރީ ނުދަންނަ ކުޑަކުއްޖެއް ވެސް ނޫޅޭނޭ ބުންޏަސް ދޮގަކަށް ނުވާނެއެވެ. ޓީވީތަކުން އަބަދު ފެންނަ މިސޫރައަކީ ބަލާލަން ލޮލަށް ފަސޭހަ ސިފަތަކެއްގެ ވެރިއެކެވެ. އުމުރުން ފަންސާސްގެ އަހަރުތަކާއި ގާތްވެފައިވާއިރު ވެސް ހީވަނީ ހަމަ އެންމެ މިޒަމާނުގެ ޒުވާނެހެއްނެވެ. މެކާހިޔާގެ އެންމެ މަތީ ދެބުރި އޮފީސް ބަޔަށް ބަދަލު ކުރެވިފައިވާއިރު ގްރައުންޑް ފޮލޯރގައި ގޭގެ މުގޫ ގަނޑު ލަތާއާއި ނޫރީ އުޅޭއިރު ދެވަނަ ބައި ދީފައިވަނީ ނޫރީގެ ދެވަނަ ދަރިފުޅު އަރުހަމް އަދި އަންހެނުން ޔަޝްމީ އަށެވެ. ތިންވަނަ ބައި ހުރީ އެދެމަފިރިންގެ ދެލޮލުގެ ނޫރު އަދި އެންމެ ހަގު ދަރި ޒޯހަންއަށް ހާއްސަ ކޮށްފައެވެ. ހަތަރު ވަނަ ބައިގާ ނޫރީގެ އެއްބަނޑު އެއްބަފާ ކޮއްކޮ ސާރާ އަށް ދީފައި ހުރި އިރު މާދަމާ ނޫން އަނެއް ދުވަހަކީ ބަރާބަރު އަށާރަ އަހަރު ފަހުން ސާރާ މާލެއަށް ދިރިއުޅުން ބަދަލުކުރާ ދުވަހެވެ. ސާރާގެ ފިރިމީހާ އިބްރާހީމް އަކީ ނޫރީގެ އެންމެ ގާތް އެކުވެރިޔާއެވެ. ޝަޒަން އާއި ޝިފްނީ އެއީ ސާރާއާއި އިބްރާހީމްގެ ދެދަރިންނެވެ. އޮސްޓްރޭލިޔާގައި ޒޯހަން ކިޔެވި ދުވަސްވަރު ބެލީ އިބްރާހީމް އަދި ސާރާއެވެ. ޒޯހަންގެ އުމުރުން ފަނަރަ އަހަރު ވަންދެން އޮސްޓްރޭލިއާގައި ޒޯހަންގެ ކައިރީގައި ހުރުމަށްފަހު ދިރިއުޅުން މާލެ ބަދަލުކުރީ ހުރި ހަމައެކަނި އަންހެން ދަރިފުޅު ރާކީ މާލޭ މީހަކާއި ކައިވެނި ކުރުމުނު އެކަނި ދޫކޮށްލަން ނުކެރިގެންނެވެ.  ބާކީ ހުރި ފްލޯތައް ކުއްޔަށް ދީފައި ހުރިއިރު އެމީހުންނަށް ވެސް ނޫރީ ތަން ކުއްޔަށްދީފައި ހުރީ ހެޔޮ އަގެއްގައި ކަމަށް ވުމުން އެމީހުންނާއި ނޫރީއާއި ދެމެދު ވަނީ ވަރަށް ގާތް ގުޅުމެއް އުފެދިފައެވެ. ރާކީ ދިރިއުޅުމެއްފަށާ ވަކިވި ފަހުން މިހާރު ކުޑަދުވަސްކޮޅަކަށް ލަތާ ކައިރިއަށް ބަދަލުވީ މާބަނޑު ދުވަސްވަރު ގޭގައި އެކަނި އިނުމަކީ ފިރިމީހާ އާރިކް ހިތްހަމަޖެހޭ ކަމަކަށް ނުވާތީއެވެ. އާރިކްގެ މަންމައަކީ ބަލި މީހެއް ކަމަށްވުމުން ހޮސްޕިޓަލުގައި ބާއްވައިގެން ފަރުވާ ކުރަން ފެށިތާ މިހާރު މަހަކާއި ގާތްވީއެވެ. އާރިކްގެ ބައްޕަވަނީ އޭނާ ތުއްތުއިރު ނިޔާވެފައެވެ. ނޫރީގެ އަމިއްލަ ބޮޑެތި ފިހާރަތައް އައްޑުއާއި އިތުރުން ތ.އަތޮޅާއި ޅ އަތޮޅުގަވެސް ހުރޭއެވެ. ނޫރީގެ ތިން ދަރިން ތިބިއިރު އެންމެ ބޮޑު ރާކީ ވަނީ މީގެ ދެއަހަރެއްހާ ދުވަސް ކުރިން މީހަކާއި އިނދެގެން ދިރިއުޅުން ފިރިމީހާ އާރިކްގެ ގެއަށް ބަދަލުކޮށްފައެވެ. ނަމަވެސް ވަގުތީގޮތުން މެކާހިޔާގައި ދިރިއުޅެންވަނީ ފަށާފައެވެ. ރާކީއާއި ޖެހިގެން ހުންނަ އަރުހަމް ކައިވެނި ކުރިތާ އަދި މިވީ އެންމެ މަހެކެވެ. އަރުހަމްގެ އަންހެނުން ޔަޝްމީ އަކީ މާލޭގަ ގެދޮރު ހުރި އާދައިގެ ދެމަފިރިއެއްގެ ހުރި ހަމައެކަނި އަންހެންދަރިއެވެ. ޒޯހަން އަކީ ލަތާއާއި ނޫރީގެ ދެލޮލުގެ ދެނޫރެވެ. އުމުރުން އެންމެ ތިން އަހަރުން ފެށިގެން އޮސްޓްރޭލިޔާގައި ދިރިއުޅެންފެށި ޒޯހަން މާލެ އައިތާ ހަފްތާއެއް ވީތަނާ ނޫރީ އަތޮޅުތެރެއަށް ކުރި ދަތުރުގައި ބައިވެރިވީ ރާއްޖެތެރެ ބަލާލުމުގެ ބޭނުމުގައެވެ. ޒޯހަން އެއްފަހަރު ބުނި ކަމެއް ބޮލާލާ ޖެހުން އެއީ މިވީހާތަނަށް އެދެމަފިރިން ކުރި ކަމެއް ނޫނެވެ. އުމުރުން ވިހި އަހަރުގައި ޒޯހަން މާލެއަށް އާވެފައި އަދި އެއްވެސް ރައްޓެއްސެއް ނެތުމުން ފޫހިވާނެވަރު ހިތަށް އެރުމުން ޒޯހަން ނޫރީއާއެކު ފޮނުވީ ހިތްހަމަޖެއްްސުމަށްޓަކައެވެ. ބައްޕައާއެކު ދަތުރުގައި ބައިވެރި ވިޔަސް ޒޯހަން ދޮންތައާއި ދޮންބެ ކައިރީގައި އެކުގައި ދާން ބުނުމުން ރާކީ ބަހަނާއަކަށް ދެއްކީ ބަނޑުގައިވާ ހަމަހުގެ ދަރިފުޅެވެ. އަރުހަމް ހަނީމޫނަށް ނިއުޒީލެންޑަށް ފުރަން ޖެހުމުން ޒޯހަން ވަރަށް ހިތާމަ ފާޅުކުރިއެވެ.

ބަރާބަރު ތިން ދުވަހު އަތޮޅުތެރޭގައި އުޅުމަށްފަހު ޒޯހަން ނޫރީއާއެކު ގެއަށް ވަތްތަން ފެނުމުން ބޭރު ބަގީޗާގައި ހައްދާފައި ހުރި ރަތް ފިނިފެންމާ ގަސްތަކަށް ފެން އަޅަން ހުރި ލަތާ ތެޅެމުން ފޮޅެމުން އައިސް ޒޯހަންގެ ނިއްކުރިއަށް ބޮސްދިނެވެ. ވަގުތަކީ ހަވީރުގެ ވަގުތު ކަމުން އެވަގުތު ގޭގައި އުޅުނީވެސް ލަތާ އެކަންޏެވެ. ކޮންމެ ދުވަހަކު ހަވީރު ގަޑިއަކީ ރާކީގެ މައިދައިތަ ކައިރިއަށް ހޮސްޕިޓަލަށް ދާވަގުތެވެ. ކެންސަރު ބައްޔަށް ބޭސްކުރަމުންދާ އާރިކްގެ މަންމަ ނޫރާ އެންމެ ފަހު ސްޓޭޖުގައި މިހާރު މީހަކާ ވާހަކަވެސް ނުދެއްކެއެވެ. ރާކީ ދިޔުމާއެކު ކުޑަކޮށް ލޯހުޅުވާލާފައި ބަލާލަނީ ކައިރީގައި ހުރި މާމަދަރިފުޅު ލައިލް އަށެވެ.

ޒޯހަން ފެންވަރައިގެން ކޮޓަރިން ނިކުތުމާއެކު ލަތާ ސައިބޯން އެދުމުން ދެބަހެއް ނެތި ކައިރީގައި އައިސް އިށީނެވެ. ކުރިމަތީގައި އިން ނޫރީ ޖަވާބުދެމުންދިޔަ ފޯނު ކުރުކޮށްލުމަށްފަހު ކުރިމަތީގައި އިން ޒުވާން ދަރިފުޅަށް ވަރަށް ފުން ނަޒަރަކުން ބަލާލިއެވެ.

“މަންމާ މިގޭގަ ނޫޅޭތަ މަންމަ އަށް އަތް ގާތްކޮށްދޭނެ ކުއްޖެއް ވެސް…. ދޮންތައަށް ނުވާނެއްނު… ލައިއްްކޮއަށް ދެއަހަރު ނުވަނިސް އަނެއްކާ އެއުޅެނީ އެކަހަލަ ބޭބީއެއް ގެންނަން ވެގެން” ޒޯހަން އަށް އެންމެ މީރު ހެދިކާ ބަޖީޔާ ކަމުން ވާހަކަދެއްކިއެވެ.

“ނޫނޭ ދަރިފުޅާ… އުޅޭނެ ދިވެހި ކުއްޖަކު. އެމަންޖެ މިއަދު ވަރަށް ބަލިކޮށް އުޅުނީމަ މަންމަ ފޮނުވާލީ ގެއަށް އަރާމު ކުރަން… ދޮންތަވެސް ބަލިކޮށް އުޅުނަސް މަންމައަށް މިއަދު އެހީވެދިން… ޔަޝްމީ ހުރިއިރު އެމަންޖެ ވެސް ވަރަށް އެހީތެރިވާނެ ބަދިގޭ ކަންތަކުގަ. އެކަހަލަ ޅީދަރިޔަކު މިޒަމާނުގަ މަދުވާނެ” ލަތާ ވެސް ކުރިމަތީގައި ހުރި ތަށިތެރެއިން  ބަޖިޔަލެއް ނަގަމުން ވާހަކަދެއްކިއެވެ.

“މަންމައަށް އެނގޭތަ ބައްޕަ މިއަދު ބުނީ އަޅުގަނޑުވެސް ދެން މީހަކާ އިންނާށޯ… އަޅުގަނޑު އަދިނުވޭ އެކަހަލަ ކަމެއް ކުރަން މަންމާ” ޒޯހަން ވާހަކަދެއްކި ގޮތުން ސައިތަށި ތުނބުގައި ޖަހައިގެން އިން ނޫރީ ހީލިއަޑަށް ނޫރީއަށް ބަލާލުމަށްފަހު ލަތާވެސް ހީލަމުން ލޯބިން ޒޯހަންގެ ފަންކޮށް ކޮނޑާ ހަމައަށް އޮތް ފިރިހެންވަންތަ އިސްތަށިގަނޑުގައި ފިރުމާލިއެވެ. މަންމައާއި ބައްޕަ ހޭތަން ފެނުމުން ތުނިތުނިކޮށް ފަޅާފައި ހުރި ޒޯހަންގެ ތުނބުޅީގައި އަތް ހާކާލަމުން ހީލއެވެ. އުމުރުން ވިހި އަހަރު ވެފައި ވިޔަސް ޒޯހަން އަދި ދުވަހަކު ވެސް އަންހެންކުއްޖެއް ދެކެ ލޯބިވެފައެއް ނުވެއެވެ. އޮސްޓްރޭލިޔާގައި ކިޔަވަން އުޅުނު އެންމެ ގާތް އެކުވެރިޔާ ޝަޒަން ބުނި ގޮތުގައި އެމީހަކު ހިތްއެދޭ ސިފަތަކެއް ހުރި އަންހެންކުއްޖެއް ފެނިއްޖެނަމަ އެކުއްޖަކާއި ބައްދަލުކުރަން ހިތް އެދޭނެއެވެ. އަމިއްލަ ހިތަށް ބުނެދޭން ނޭނގޭ ގޮތް ތަކެއް ވާނެއެވެ. ނަމަވެސް އެފަދަ ކުއްޖަކު އަދި ޒޯހަން އަށް ފެނިފައެއްނުވެއެވެ. ޒޯހަން އެންމެ ފޫހިވަނީ މަތިންބައިން ޖެހިގެން އައިސް ޒޯހަންގެ ދިރިއުޅުމަށް ވަންނަން އުޅުުނު އަންހެންކުދިންތައް ދެކެއެވެ.

ދުވަހަކީ ހުކުރު ދުވަސްކަމަށް ވުމާއެކު ނޫރީ ވެސް މިއަދު ގޭގައި އިންނެވި ދުވަހެކެވެ. އަމިއްލައަށް ފެނިގެން ގޭ ހުރިހާ ފްލޯތަކެއް ސާފު ކުރުމުގައި މަސައްކަތުގައި ގެންގުޅޭ ބޮންދުންތައް ގޮވައިގެން އުޅެެއެވެ. މުއްސަނދިކަމާއި މަޝްހޫރުކަން އިންތިހާއަށް ލިބިފައި ވިޔަސް ނޫރީއަކީ ވިސްނުންތޫނު ދަރިންދެކެ ލޯބިވާ ދަށުގައި މަސައްކަތްކުރާ މުވައްޒަފުންނަށް އިހުތިރާމްކުރާ ހުލްގު ހެޔޮ އިންސާނެކެވެ. އެންމެ ތިރިން ސާފު ކުރަމުން ގޮސް ނުވަވަނަބުރިއާއި ހަމައަށް ދިޔުމުން މެދުކަނޑާލީ ނޫރީއަކީ އެގާރައިގެ ކުރިން މިސްކިތަށްދާ މީހަކަށް ވުމުންނެވެ. ނުވަވަނަ ބުރިއާއި ދިހަވަނަ ބުރިއަކީ ނޫރީ އޮފީސް ހިންގާ ދެބަޔަށް ވުމާއެކު އެތަން ފޮޅާ ސާފުކުރަން އަންނަ ހުކުރަށް މަޑުޖައްސާލީ ބޮންދުންތަކަށް ވެސް ލުއި ކޮށްދިނުމުގެ ގޮތުންނެވެ. ބަދިގެ ތެރޭގައި ކޮފީ ގިރަން ހުރި ލަތާ ޒިންކު ކައިރީގައި ހުރި ޝިޔާރާ އަށް ގޮވާލުމަށްފަހު ކޮފީތަށި ޒޯހަން ހޭލަންވާއިރަށް އެކޮޓަރީގައި ބަހައްޓަދޭން ބުނެލުމުން ޝިޔާރާ ހީލުމަށްފަހު ތަށި ހިފައިގެން މަޑު ހިނގުމެއްގައި ގޮސް ދޮރު ހުޅުވާލިއިރު އެނދުގައި ޒޯހަން ފެންނަން ނެތުމުން ދެކޮޅު ހޯދާ ބަލާލިއެވެ. ފާހާނައިން ފެން އަޑު އިވުމުން ޝިޔާރާ އެނގުނީ ކަންނޭނގެއެވެ. ހީލާފައި ކޮފީތަށި ސައިޑްކަބަޑް މަތީގައި ބަހައްޓާފައި ހިނގައިގަންނަން ތައްޔާރު ވީތަނާ ފާހާނާ ދޮރު ހުޅުވާލި އަޑު އިވުމުން ޝިޔާރާގެ ފިޔަވަޅު މަޑުމަޑު ކާޕެޓްމަތީގައި ތަތްވިއެވެ. ފިޔަވަޅަށް ހުއްޓުމެއް އައި ކަހަލައެވެ. ފާހާނާ ދޮރު މަތީގައި ހުރި ޒޯހަން ހުރީ ކޮޓަރިން އަންހެންކުއްޖަކު ފެނުމުން ހިތްހަމަނުޖެހިފައެވެ. ޝިޔާރާ ހުރީ ޒޯހަންއަށް ފުރަގަހަށް ކަމަށްވުމާއެކު އެކަކުގެ ވެސް މޫނެއް ނުފެނެއެވެ. ބޮޑު ކަޅުހެދުން ހުރީ ޝިޔާރާގެ ހަށިގަނޑަށް ބޮޑުކަމުން ދެފަރާތަށް ސޮހިފައެވެ. ހީވަނީ ދަނޑިބުރިއަކަށް ގޯންޏެއް މަހާފައި ހުރި ހެންނެވެ. ބޮލު މެދަށް ބޮޑު ހުޅިއެއް ޖަހާފައި ހުރުމުން އަމުދުން ޒޯހަން އަށް ކަމުނުދިޔައެވެ. އެމޫނު ބަލަން ޒޯހަންގެ ޝައުގުވެރިކަން ވެސް ނެތީއެވެ.

“ތީކާކު؟ ކާކު ކަލޭ ކައިރީގައި ބުނީ މިކޮޓަރިއަށް ވަންނަން…” ޒޯހަންގެ ހަރުކަށި އަޑު އިވުމާއެކު ޝިޔާރާ ފިއްކަނޑައިގެން ދިޔަހެން ހީވިއެވެ. ޒޯހަންއަށް ބަލާލުމެއްނެތި ޝިޔާރާ ދުވަމުން ކޮޓަރިން ނިކުތެވެ. ކޮޓަރިން އަންހެންކުއްޖަކު ފެނުމުން ޒޯހަންގެ މޫޑު މުޅިން ހަރާބުވީއެވެ. މަންމަދެކެ ހިތްހަމަނުޖެހުނެވެ. “އައްދެ މިއަދު ހާދަ މޫޑެއްނެތޭ ދޯ ކޮއްކޮގެ” ޒޯހަންގެ ކޮޓަރިއަށް ވަދެގެން އައި ރާކީ ބުނެލިއެވެ. ” ދޮންތާ …. މިތާ ދެންމެހުރި ފާޑެއްގެ އަންހެނެއް.. އެއީ ކާކު؟ ނޭނގެ ވަގަށް ގެންދިޔައީ ކޯއްޗެއް ކަމެއް ވެސް… ދޮންތަމެން ބޭރުގައި ތިބިއިރު ކޮޓަރިއަށް ވަގުން ވަންނަ އިރު ވެސް ނުފެނޭދޯ” ކަޅުކުލައިގެ އަތްކުރު ޓީޝާޓް ހަށިގަނޑަށް ހެތޮވަރުކޮށްލަމުން ޒޯހަން އެނދުގައި އިން ރާކީއަށް ބަލާލަމުން ބުނެލިއެވެ. “ސާބަސް ކޮއްކޮއަށް… އެއީ ވައްކަންކުރާ ކުއްޖެއްނޫން… އެއީ މިގޭގަ މަންމައަށް އެހީވާން އުޅޭ ކުއްޖާ… އެއީ ވަރަށް ނިކަމެތި ކުއްޖެއް” ރާކީ ޝިޔާރާ އާއި ބެހޭ ގޮތުން ބުނެލިއެވެ. “އެހެންތަ؟؟ އެހެންވިޔަސް ހެޔޮ… އަޅުގަނޑު ކަންތައް މަންމަ ކޮށްދޭން ބޭނުމީ.. މަންމަ ނެތިއްޔާ ދޮންތަ… ދޮންތަ ނެތިއްޔާ ދޮންބެދައްތަ” ބޮލުގައި ޖެލް ހާކަން ހުރި ޒޯހަން ވާހަކަދެއްކިއެވެ. “މާތްކަލާކޯ…. ބަލަ ތިކިޔާ އެއްވެސް މީހަކީ އަބަދު ކޮއްކޮގެ ކަންތައް ކޮށްދޭން ކައިރީގައި ތިބޭނެ މީހުނެއް ނޫން… މާދަމާ އަންބަކު ގޮވައިގެން އެކަނި އުޅެންވެސް ޖެހިދާނެެ….މީހާދަ ނުވިސްނޭ ކުއްޖެކޭ ދޯ” ކައިރީގައި ކޮފީތަށި ހިފައިގެން އިށިން ޒޯހަންގެ ކޮލުގައި ވިކަލާމުން ރާކީ ބުނެލިއެވެ. “އަވަސްކޮށްބަލަ ދެން….ދޮންތަބެ މިއަދު އަންނަ ދުވަސްމީ… މިއަދު ދޮންތަބެ މަންމަ ވަރަށް ހާލުބޮޑު ދުވަހެއް… ލައިއްކޮ ބުނި  ހުކުރަށްދާނީ ކާފައާއެކު ނޫނޭ….މިއަދު ދާނީ ކުޑަބެއާއި އެއްކޮށޭ….” ރާކީ ކޮޓަރިން ނިކުންނަމުން ޒޯހަންއަށް ބަލާލަމުން ވާހަކަދެއްކިއެވެ.

……ނުނިމޭ…….