މަގޭލޯބި މަގޭހައްގު

ކޮޓަރިއަށް ވަދެ ދޮރު ލައްޕާލުމާ އެކު މީޝާގެ ދެލޮލުން ކަރުނަތައް އޮހެން ފެށިއެވެ. އެއާއި އެކު މީޝާގެ ހިތަށް ވެރިވެގެން ދިޔައީ ޒައިން އެވެ. މީޝާގެ ހަދާނަށް އައީ އޭނާ ފުރަތަމަ ފަހަރު ޒައިން އާއި ބައްދަލުވި ދުވަހެވެ. ދުވަހަކީ ވަރަށް ރީތި އުޑުމަތި ސާފު ދުވަހެކެވެ. ސުކޫލުގެ ބޮޑު ޗުއްޓީ ދުވަސްތައް ކަމުން މީޝާ، އާލާ އަދި އަސްރާރު މިތިން ކުދިން ވަނީ މިއަދު މަޖާ ކޮށްލުމައް ޕިކުނިކު ރާވާފައެވެ. މީޝާ ތައްޔާރު ވެލައިގެން ގެއިން ނިކުތީ ތިންކުދިން ބައްދަލުވާން ހަމަޖެހިފައިވާ ވިއުޕޮއިންޓަށް ދިއުމަށެވެ. ފަސްވަރަކަށް މިނެޓު ތެރޭ މީޝާއަށް އެކުދިންތިބި ދިމާލަށް ދެވުނެވެ. އޭރު އެކުދިން ތިބީ މީޝާގެ އިންތިޒާރުގަ އެވެ.

އަތިރިމައްޗައް ދެވުމާއެކު ތިންކުދިން ވޮލީކުޅެން ކޯޓެއް ދޮންވެލިގަނޑު މަތީގައި ކުރަހާލިއެވެ. ނަސީބު ރަނގަޅުކަމުން ކުރިން ބަޔަކު ބޭނުން ކޮއްފައި އޮތް ނެޓެއް އެތަނުގައި ދަމާލައިފައި ވެއެވެ. އިރުކޮޅަކުން ފެނުނީ އެދިމާލަށް ފިރިހެން ކުދިންތަކެއް އަންނަތަނެވެ. އެމަންޒަރު ބަލަން އިރުކޮޅަކު ހުރެފައި އަސްރާރު މީޝާ އަށް ލާނެއްގޮތަކަށް ގޮވަން ފެށިއެވެ.”މިޝް..މިޝް… އަޅެމިޝް..”. އެފިރިހެން ކުދިންތައް ދިޔުމުން ކުޅުން ކުރިއަށް ގެންދިއުމަށް މީޝާ އެދުނެވެ.

ކުޅުމުގެ ތެރޭގައި އަސްރާރު ޖެހި ބޯޅައެއް މާބާރަށް ގޮސް މޫދުގައި އޮތް ފިރިހެންކުއްޖެއްގެ ގައިގަ ޖެހުނެވެ. މީޝާ ބޯޅަނަގަން ދުވެފައި ދިޔައިރު ބޯޅަ ހިފައިގެން އާދައިގެ މަޑުހިނގުމެއްގައި ކުއްޖަކު އަންނަތަން ފެނުނެވެ. ހަލުވި ދުވެއްޔެއްގައި މީޝާގޮސް ބޯޅައަތުލުމަށްފަހު މާފަށް އެދުނެވެ. އެއަށްފަހު އެކުދިން ތިބި ދިމާލަށް ދިޔައެވެ. ކުޅެނިމުމުން ތިންކުދިން ގެނައި ކާއެއްޗިހި ނަގާއަތުރާލިއެވެ. ކައިނިމިގެން ކުޑަކޮށް މޫދަށް އެރެލުމަށްފަހު މީޝާ ގެއަށް ދިޔައެވެ.

މުޅިން އާދުވަހެކެވެ. މީޝާ ހެނދުނު ހެނދުނާ ތެދުވެ ތައްޔާރުވެލީ ސުކޫލަށް ދިއުމަށެވެ. ދިގު ޗުއްޓީއަކަށްފަހު މުޅިން އާސުކޫލަކަށް މުޅިން އާމާހައުލަކަށް ބަދަލުވުމަށްޓަކައެވެ. ސުކޫލުގެ ގޭޓުން ވަނުމާއެކު ފެނުނީ މުޅިން ވެސް އާމަންޒަރު ތަކެވެ. މުޅިންވެސް އާ މޫނުތަކެކެވެ. ޕުރިންސިޕަލްގެ އޮފީސް ކޮބައިތޯ ސުވާލު ކޮށްލުމުން މަސައްކަތުމީހާ ޕުރިންސިޕަލްގެ އޮފީސް ދައްކާލިއެވެ. މީޝާ ސަލާމް ގޮވާލުމަށްފަހު ޖަވާބު ލިބުމުން އެތެރެއަށް ވަދެތަޢާރަފް ވެލިއެވެ.

މީޝާ ކުލާހަށް ވަނީ ޕުރިންސިޕަލްގެ ފަހަތުންނެވެ. މީޝާ ކުލާސްކުދިންނަށް އޭނާގެ ކުރު ތަޢާރަފެއްދިނެވެ. އެއަށް ފަހު މީޝާ ކުލާހުގެ ތެރެއަށް ނަޒަރު ހިންގާލިއެވެ. ހުސްގޮނޑިއެއް ހުރިތޯބަލައި ލުމުގެ ބޭނުމުގައެވެ. މީޝާ ގޮސް އިށީނުމާއެކު ޓިޗަރެއް އައެވެ. އެއަށް ފަހުކުލާސް ފެށުނެވެ. އިންޓަވަލުގަޑި ޖެހުމުން މީޝާ ތެދުވެގެން މަޑު ހިނގުމެއްގައި ގޮސް ކެންޓީނަށް ވަނެވެ. ކޮފީއަކައް އޯޑަރު ކޮށް ލުމަށްފަހު މީޝާ ގޮސް ކެނޓީނުގެ ގޮނޑިއެއްގައި އިށީނދެ ފޮތެއް ކިޔަން ފެށިއެވެ. އޭގެ ފަސްވަރަކަށް މިނެޓު ވިތަނާ މީޝާގެ ކުރިމަޓިގައި އިން ގޮނޑީގައި ކުއްޖަކު އިށީނދެއްޖެއެވެ. ކޮފީތަށި ދިއްކޮއްލަމުން “ހައި..!!” ބުނެލި އެެވެ. މީޝާ އިސްއުފުލާ ބަލައިލި އެވެ. ބާރުގަދަ ފިރިހެން ވަންތަ އަޑެކެވެ. ރީތި މުތްތަކެއް ހެން ވިދަވިދާ ހުރި ދެލޮލެވެ. ފަންކަޅު އިސްތަށިގަނޑު އޮތީ ތެއްކޮށެވެ. ހަމަދެންމެ އަކު ފެން ވަރާލައިގެން ހުރި ހެން ހީވެއެވެ. މޫނުމަތީގަ ވަނީ ތާޒާކަމެވެ. ރީތި ހިނިތުންވުމަކާއި އެކު ކުރިމަތީގައި އިށީދެލައިގެން މިހިރީ މީޝާ އައް ފެނިފަހުރި މޫނެކެވެ.

ކުއްލިއަކަށް މީޝާ އައް މެސެޖެއް އައެވެ. އެއީ އޭނަގެ ދޮންތަގެ މެސެޖެކެވެ.”އަތް ހިލާލަބަލަ..!!”،  ދޮންތަގެ އަމުރުވެރި ގޮތަކަށް އައި މެސެޖު ކިޔާލުމާއި އެކުމީޝާގެ އަތް މައްޗައް ހިލާލިއެވެ. ދެންފެނުނީ މީޝާގެ ދޮންތަ އައިސް އިށީން ތަނެވެ. އެފިރިހެން ކުއްޖާގެ އަތުގައި ހުރި ކޮފީތށި އަތުނުލައި ދޮންތަ އާއި އެކު ހިނގަި ގަތުމުން އެކުއްޖާ ގޮވާލިއެވެ.”ހެލޯ.. ކޮފީ ބޭނުން ނެތްނަމަ އޯޑަރ ނުކުރާނެކަން ޔަގީން.. ހެލޯ ލިސެން… ހެ..”އެކުއްޖާ މީޝާ ޖަވާބުނުދިނުމުން ފަހަތުން ހިނގައި ގަތެވެ. ނަމަވެސް މީޝާމެން އެފިރިހެންކުއްޖާ އަށް ފިލައިގެން ގޮސް އެދެކުދިން އެކުދިންގެ ކުލާސްތަކައް ވަދެއްޖެއެވެ. މީޝާ ކުލާހަށް ވަނީ ހެމުންްނެވެ. ގޮންޑިގައި އިށީނީ ޖެހިގެން އިން ގޮނޑީގައި އިނީކާކުތޯނުވެސް ބަލައެވެ.