މިހިތައް ލޯބިދޭށޭ – 01 ބައި

ކުޑައިރުއްސުރެ އެލައިރާ އެންމެ ފުރަތަމަ ހަނދާންވީ ހިމޭންކަމެވެ. ފާރުތަކުގައި، ކަންކޮޅުތަކުގައި، އަދި އޭނާގެ ކުޑަކުޑަ މޭމަތީގެ ތެރޭގައި ދިރިއުޅެމުން ދިޔަ ބަރު ވައްތަރެއްގެ ހިމޭންކަމެވެ. މަންމަ ނިޔާވިއިރު އޭނާގެ އުމުރުން އެންމެ ހަ އަހަރު ނަމަވެސް އެދުވަހުގެ ހަނދާން ސިކުނޑީގައި ފިއްތާފައި އޮތީ ދުވަހަކުވެސް ފަނޑު ނުވާނެ އިނގިލީގެ ނިޝާނެއް ފަދައިންނެވެ. މަންމަގެ ބުރުގާ ހިފައިގެން، އޭގެ ތެރެއަށް މޫނު ވަޅުލާފައި ހުރި ހަނދާންވީ، އޭނާގެ ވަސް އަބަދަށްޓަކައި ހުންނާނެ ކަމުގެ އުންމީދުގައެވެ. އެކަމަކު ވަސްތައް ފަނޑުވެ، މީހުން ފަނޑުވެ، އެއްދުވަހަކު ހޫނުކަން އިހުސާސް ކުރެވުނީ ގޭތެރެއައް ހިންގާލި ނަޒަރަކުންނެވެ. އޭރު މަޖާކޮއް އުޅުނު މި ގޭތެރޭގައި މިހާރު އުފާވެރިކަމުގެ ހިޔަނި ކުޑަކޮއްވެސް ފެންނާކައްނެތެވެ.

އޭނާގެ ބައްޕަ މުހައިމީން އަނެއްކާ ކައިވެނި ކުރީ އޭގެ އެންމެ އަހަރެއް ފަހުންނެވެ. އެއީ ހަމަހިމޭންކަން ބަދަލުވި ވަގުތެވެ. އެއީ ދެން ހުސް ތަނެއް ނޫން- އެއީ ތޫނު އެއްޗެކެވެ. އެއީ  ހަރުކަށި ބަސްތަކަކަށްފަހު އައި ހިމޭންކަމާއި، ފިޔަވަޅުތަކުގެ ފަހަތުން ހިނގައިގަންނަމުން ދިޔަ ހިމޭންކަމާއި، މާ ބާރަށް ނުރޯން މަސައްކަތް ކުރުމުގެ ހިމޭންކަމެވެ.

ހިނިތުންވުމެއް ލައިގެން ހުރި ތޫފާނެއް ފަދައިން ސަފާނާ ގެއަށް ވަނެވެ. ދުނިޔެއަށް އޭނާއަކީ މަޑުމައިތިރި، ޝަރަފުވެރި، އަދަބުވެރި މީހެކެވެ. އެކަމަކު އެލައިރާއަށް ނޭވާލާން ފާރުތައް މާ ތަތްވެފައި ހުރިހެން ހީވި ސަބަބަކީ އޭނާއެވެ. އޭނާގެ އަނިޔާވެރިކަން މާ މަޑުމައިތިރި- ކުދިކުދި ނިކަމެތިކަމުގެ ތެރޭގައި ފޮރުވިފައި، އަޅާނުލާ ކަރުނަތައް، އަދި ނޭދެވޭ ހަނދާނެއް ފަދައިން އެލައިރާއަށް ބަލާ ގޮތް މާގިނައިރު ދިރިހުރެގެން ދިޔައެވެ.

“ޝުކުރުވެރިވާންވީ” ލޯގަނޑަށް ބަލަހައްޓައިގެން ހުރެ ބްރޭސްލެޓްތައް އެޖެސްޓް ކުރަމުން ސަފާނާ ބުނާނެއެވެ. “އަހަރެން މި ބުރަ ނުނަގާނަމަ ކަލޭ ބަލަހައްޓާނީ ކާކު؟”

ބުރައެއް.
އެލައިރާއަށް އެބަސް މާ އަވަހަށް އެނގުނެވެ.

ފިނިކަމުގެ އެގޭގައި ހޫނުކަމުގެ ކުޑަވެސް އިހުސާސްކުރެވެނީ މިޝީގެ ސަބަބުންނެވެ . ފަން އިސްތަށިގަނޑަކާއި އެލައިރާ ފެނުމުން ކޮންމެ ފަހަރަކު ދިއްލާފައިވާ ދެލޮލުގެ ކުޑަކުޑަ، ފަސް އަހަރުގެ އަންހެން ކުއްޖެކެވެ.

“
އެލާދޮންތީ!”އޭ ގޮވަމުން ކުޑަކުޑަ އަތްތިލަ ފުޅާކޮށްގެން ދުވެފައި ގޮސް އޭނަގެ ގާތަށް ގިސްލާނެއެވެ.

ކޮންމެ ފަހަރަކުވެސް ހިނދުކޮޅަކަށްވެސް ދުނިޔެއަށް އެހާ އަނިޔާވެރި އިހުސާސެއް ނުކުރެވެނީ ވެސް ލޯބި ލޯބި މިޝީގެސަބަބުންނެވެ.

އެކަމަކު އެ ލޯބިވެސް ވަގަށް ނެގިއެވެ.
ސަފާނާ މިޝްޔާއާއި އެކު ވަގުތު ހޭދަކުރުން މަނާކުރިއެވެ. އޭނާ ބުނީ އެކަމުގެ ސަބަބުން އޭނާގެ އަންހެން ދަރިފުޅުގެ ސަމާލުކަން “ޑިސްޓްރެކްޓް” ވެގެން ދިޔަ ކަމަށެވެ. އެކަމަކު އެލައިރާއަށް ހަގީގަތް އެނގުނީ- ައެލައިރާއަކީ އޭނާގެ ކުރިން ހުރި މީހަކަށް ނިސްބަތްވާ މީހެއްކަން ކޮންމެ ދުވަހަކުވެސް ސަފާނާ ހަނދާންކޮށްދޭތީއެވެ.

އެލައިރާ އޭނާގެ ލޯބި މަޑުމައިތިރިކޮށް، ވަގަށް ނަގާފައިވާ މިނިޓްތަކެއްގެ ތެރޭގައި މިޝްޔާއާ ބައްދަލުކޮށް، ދޮރު ފަހަތުގައި ސިއްރު ހިނިތުންވުން ބަދަލުކޮށް، ސަފާނާ ފެނުމުގެ ކުރިން އަވަސް އަވަހަށް ބައްދާލިއެވެ.

އެގޭގައި އެލައިރާ ބޮޑުވީ ޞަފްޙާތަކުގެ މެދުގައި ފިއްތާފައި ހުންނަ މަލެއް ފަދައިން- ފަށަލަ ފަށަލައެއް ނަމަވެސް އަދިވެސް އޭގެ ކުލަ ހިފަހައްޓައިގެންނެވެ.

(އޭގެ ދެދުވަސް ފަހުން)

މެޑިސިން ކިޔަވަން މެލޭޝިއާއަށް ފުރި ދުވަހު ފިލައިގެން ދިއުން ލިބުނެވެ. މަތިންދާބޯޓުގައި އިށީނދެގެން އެލައިރާ ކުޑަދޮރުން ބޭރަށް ބަލަހައްޓައިގެން ހުރިއިރު، ތިރީގައިވާ ދުނިޔެއަށް ވިލާގަނޑު ނިވާވެގެން ދިޔަ ހަނދާންވިއެވެ. ފުރަތަމަ ފަހަރަށް އޭނައަށް ލުއިކަމެއް އިހުސާސް ކުރެވުނެވެ. އެއްވެސް ފާރެއް، ހިމޭންކަމެއް، ސަފާނާއެއް. ހަމައެކަނި ވައި، ހަމައެކަނި މިނިވަންކަން، ހަމައެކަނި ހުވަފެންތަކެވެ.

އެލައިރާގެ ހަމައެކަނި ހުވަފެނުގައިވެސް ދެކޭ ފަދަ އެކުވެރިކަމެއް އޭނައަށް ހުށަހެޅި ފުރަތަމަ މީހަކީ ރިމްޝާއެވެ. އަޑުގަދަ، މަޑުމައިތިރި، ވަފާތެރި- މާ ބޮޑު ކަމަށް ހީވި ދުނިޔޭގައި އެލައިރާގެ އެންކަރަކަށް އޭނާ ވެގެން ދިޔައެވެ.

“ތިއުޅެނީ މީހަކަށްވާން” އަތުގައި ފިރުމާލަމުން ރިމްޝާ ބުނާނެއެވެ. “ވަރުގަދަ މީހަކު. ރީތި މީހަކު. ހަނދާން ނައްތާނުލެވޭނެ މީހަކު.”

އަދި ފުރަތަމަ ފަހަރަށް އެލައިރާއަށް އެކަން ގަބޫލުކުރެވެން ފެށިއެވެ.

އެކަމަކު މެލޭޝިޔާއިން ވެސް އޭނާއަށް ދިނީ އޭނާގެ އެތެރޭގެ ފުންމިނުގައި ވަޑާން ވެފައިވާ ވައްތަރުގެ ވޭން- އިންސާނާ ބަދަލުކުރާ ވައްތަރުގެ ވޭނެކެވެ. އެތަނުގައި ހުރި ފިރިހެނަކާ މުޅި ހިތުން ލޯބިވެ، އަބަދަށްޓަކައި އިތުބާރު ކުރެވޭނެ ކަމަށް ހީކުރި މީހަކާ ލޯބިވިއެވެ. އެކަމަކު ހިތާމައަކީ ލޯބިވެސް އޭނާގެ ނަސީބުގައި ނެތެވެ. ލޯބިވި މީހާ ވެގެން ދިޔައީ ހަގީގީ ހަރުފައަކަށެވެ. އޭނާ ދިޔައީ އެލައިރާގެ ފަހަތުން އެހެން އަންހެން ކުދިންނާއުޅެމުންނެވެ. އެކަން އެނގުމުން ހީވީ އޭނަގެ އެތެރޭގައި ހުރި އެއްޗެއް މުޅިން ފަޅައިގެން ދިޔަހެންނެވެ. ދުވަހަކުވެސް އަނިޔާއެއް ނުކުރާނެ ކަމަށް ވައުދުވުމުން ހާއްސަކޮށް މިހާ ބޮޑަށް އަނިޔާއެއް ލިބޭނެ ކަމަކަށް ދުވަހަކުވެސް ހިއެއް ނުކުރެއެވެ. އެކަމަކު އޭނާ ވެގެން ދިޔައީ ހަމަ އޭނާ ވައުދުވި ހުރިހާ ކަމެއް ފަދައިންނެވެ. މި ވޭނީ އަނިޔާއައްފަހު އެލައިރާ ލޯބި މަތިން ފޫލިވާންފެށިއެވެ. އޭގެ ފަހުން ދެން ދުވަހަކުވެސް ލޯބި ނުވެވޭނެ ކަމަށް އަމިއްލަ ނަފްސަށް ވައުދުވިއެވެ. ލޯތްބަކީ ނުރައްކަލެކެވެ. ލޯތްބަކީ ވޭނެކެވެ. ލޯތްބަކީ އޭނައަށް އެޅުނު ރިސްކެކެވެ.

އަހަރުތަކެއް ފާއިތުވެގެން ދިޔައެވެ. ކާޑިއޮލޮޖިސްޓެއްގެ ގޮތުގައި ޑިގްރީ ހާސިލް ކުރެއްވި- އޭނާގެ ހިތްތައް ފަނާވެފައި އޮއްވާ ހިތްތައް ރަނގަޅު ކުރުމުގެ އިރޮނީ ދުވަހަކުވެސް އޭނާގެ ކިބައިން ސަލާމަތްވެފައެއް ނުވެއެވެ. އެނބުރި ގެއަށް އައިއިރު އޭނަ ހީކުރީ އެންމެ ފަހުން ދިރިއުޅުން ހަމަޖެހުމަށް ހަމަޖެހިދާނެ ކަމަށެވެ.

އެކަމަކު ހަމަޖެހުމަކީ ދުވަހަކުވެސް ދިރިއުޅުމުން އެލައިރާއަށް ހުށަހެޅި ކަމެއް ނޫނެވެ.

އެއްދުވަހަކު ހަވީރު ބައްޕަ ސިޓިންރޫމަށް ގޮވާލިއެވެ. ބައްޕަގެ މޫނުމަތީގެ ކުލަވަރު ކިޔަން ނޭނގޭ ނަމަވެސް އެއަޑުގައި ކޮންމެވެސް ވަރަކައް ހަރުކަށިކަން ހުއްޓެވެ.

“އެލައިރާ އިށީނދެބަލަ.. އަހަރެން ބޭނުން ކަލެއާ ވާހަކަ ދައްކަން.”

އިށީނުމުގެ ކުރިންވެސް ހީވީ ތޫނުއެއްޗެއް މޭގެ ތެރެއަށް ވަދެގެން ދިޔަހެންނެވެ.

އޭނާގެ ބައްޕަ ކަރު ސާފުކޮށްލިއެވެ. “އަހަރެން… އަހަރެން ބޭނުން ކަލޭ މެރީ ކުރަން.”

އެލައިރާއަށް ހީވީ އޭނާގެ އެތެރޭގައި ހުރި އެއްޗެއް އޭނާގެ ހަށިގަނޑުން ނިކުމެގެން ދިޔަހެންނެވެ. ކައިވެނި. ލޯބި. އިތުބާރު.
އަބަދަށްޓަކައި ތަޅުލާފައި ހުރި ކަންތައްތަކެވެ.

ބައްޕަ ކުރިއަށް ގެންދިޔައީ “އަހަރެންގެ އެކުވެރި އަމްޖްދުގެ ހުންނާނެ ކުއްޖެއް. އޭނާގެ ނަމަކީ ކައިލް. އޭނާއަކީ ކާމިޔާބު، އިޙްތިރާމް ކުރާ، ރަނގަޅު އާއިލާއެއްގެ މީހެއް. ކަލޭ ކައިވެނި ކުރާނީ އޭނާއާ.”

އެލައިރާގެ ހަށިގަނޑު ފިނިވެގެން ދިޔައެވެ. “ބައްޕާ..، ނޫން… އަހަންނަކަށް ނުކުރެވޭނެ. އަހަރެން ބޭނުމެއް ނޫން މެރީ ކުރާކަށް. މިހާރަކު ނޫން… މިހެންނެއް ނޫން.”

މުހައިމީންގެ މޫނުމަތި އަނދިރިވެގެން ދިޔައެވެ. އޭނާގެ އަތް ތެޅިގަތެވެ.
އަހަރުތަކެއް ފަހުން ފުރަތަމަ ފަހަރަށް އޭނާއަށް އެ ބައްޕަ އެހާ ރުުޅިގަދަވެފައި ހުރިތަން ފެނުމުން ޖެހިލުންވިއެވެ.

“މިއީ ކަލޭގެ އިޚްތިޔާރެއް ނޫން،” ބައްޕަ ބުންޏެވެއެވެ. “ކަލޭ އޭނައާ އިންނަންޖެހޭނެ.”

ކޮޓަރި އެނބުރެމުން ދިޔައެވެ. ފާރުތައް މާ ގާތްހެން ހީވިއެވެ. ކުރީގެ ހިމޭންކަން އެނބުރި އައީ އޭނަގެ ކަރުތެރޭގައި އޮޅާލައިގެންނެވެ.

އެވަގުތު އެލައިރާގެ ހިތައްއެރިއެވެ.

އޭނާގެ ވާހަކަ ދުވަހަކުވެސް ހަގީގަތުގައި ފެށިފައެއް ނުވެއެވެ.
އޭނާގެ އަސްލު ހަނގުރާމަ ފެށުނީ މިހާރުއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.