އެ އިޙްސާސް…

ނަޝީދާގެ މޫނުމަތިން ފެންނަމުންދަނީ ހިތާމަވެރިކަމެވެ. ލޮލުން ފައިބަމުންދާ ކަރުނަތައް އިރުއިރުކޮޅުން ފޮހެލައެވެ. ކިތަންމެ ހިތްވަރުކުރަން މަސައްކަތް ކުރިއަސް އެކަންދަނީ ނާކާމިޔާބު ވަމުންނެވެ. އެހެންނުވާންވީ ކީއްވެ ހެއްޔެވެ؟ ހުރި ހަމައެކަނި އަންހެންދަރިފުޅު އެ އޮތީ މަރުގެ ތުންފަތްމަތީގައެވެ. ނަޝީދާއަށް ވިސްނައި ވިސްނައިވެސް ނޭގުނީ ނީމް އެފަދަ ކަމެއް ކުރުމަށް ދިމާވި ސަބަބެވެ. ކުޑަ އިރުއްސުރެ ނީމްއަކީ ބަސްއަހާ، ކިޔަމަންތެރި ދަރިއެކެވެ. ނަމަވެސް މިއަދު އަމިއްލަ އަށް މަރުވާން ނީމް މަސައްކަތް ކުރީ ކޮންކަމައް އުނިވެގެން ކަމެއް ނަޝީދާ އަކަށް ނޭގެއެވެ.

ނީމް އައި.ޖީ.އެމް.އެޗް ގައި އެޑްމިޓްކޮށްފައި އޮތްއިރު އަދިވެސް ލޯ ހުޅުވާނެ ވަރެއް އެ ހަށިގަނޑަކު ނުވެއެވެ. ނަމަވެސް ނީމްގެ ހާލުދަނީ ރަނގަޅުވަމުންނެވެ. ނީމް ކައިރީ ނީމްގެ ދޮންބެ މަޑުކޮށްލައިގެން ހުރިއިރު ނާޝިދާ ދިޔައީ ގެއަށެވެ. ނީމްއަށް ބޭނުންވާ ބައެއް އެއްޗެހި ގެނައުމަށެވެ. ގޭތެރެއަށް ވަދެވުމާއެކު ނާޝިދާ މިސްރާބުޖެހީ ނީމް ކޮޓަރިއާއި ދިމާލަށެވެ. އަލަމާރި ހުޅުވާލުމަށްފަހު ދެތިން ހެދުން ނަގައި ދަބަހަށް އެޅުމަށްފަހު ނާޝިދާ ނުކުންނަން އެޅި ފިޔަވަޅު ހުއްޓުމަކަށް އައީ މޭޒުމަތީގެ އޮތް ފޮތް ފެނިފައެވެ. އެފޮތް ނަގައިގެން ކޮންމެވެސް އެއްޗެއް ލިޔަން ނީމް އިންނަތަން ނާޝިދާއަށް ވަރަށް ގިނައިން ފެނެއެވެ. ކީއްވެ ކަމެއް ނޭގެއެވެ. އެފޮތާއި، ނީމް މަރުވާން މަސައްކަތް ކުރި ސަބަބާއި ކޮންމެވެސް ގުޅުމެއް ވެއޭ ނާޝިދާގެ ހިތަށް އެރިއެވެ. މަޑުމަޑުން އައިސް އެފޮތް ހުޅުވައިލިއެވެ. ނީމްގެ އަތުލިޔުމުން ލިޔެފައިވާ އެ ލިޔުންްކޮޅު ކިޔަން ފެށިއެވެ.

” އުފަލާއި ހިތްހަމަޖެހުމަކީ ކޯއްޗެއްކަމެއް އަހަންނަށް ނޭގޭ ކަހަލައެވެ. އަބަދުވެސް އަހަރެންގެ ހުރިހާ އިހުސާސް ތަކެއްގެ މައްޗަށް ކުރި ހޯދަނީ ރުޅިއާއި އެކަނިވެރިކަމެވެ. މީހުން އެބުނާ ކަހަލަ “ޕޮޒިޓިވް މައިންޑެޑް” މީހަކަށް ވާން އަހަރެންވެސް ބޭނުމެވެ. އެކަމަކު އަބަދުވެސް އެންމެ ގޯސްގޮތަށް އަހަންނަށް ވިސްނެނީ ކީއްވެ ހެއްޔެވެ؟ ކުޑަކުޑަ ކަމެއް ދިމާވާ އިރަށް އެންމެ ފުރަތަމަވެސް މަރުވާން ހިތަށް އަރަނީ ކީއްވެ ހެއްޔެވެ؟ އަހަންނަކީ ބޭކާރު މީހެއްކަމަށް އަމިއްލައަށް ގަބޫލުކުރެވެނީ ކީއްވެ ހެއްޔެެވެ؟ އަހަރެން މިވަނީ މުޅި ދުނިޔެ މަތިން ފޫހިވެފައެވެ. ހީވާކަހަލައެވެ. އަހަރެންދެކެ ލޯބިވާ އެކަކުވެސް ނެތެވެ.

އަހަރެންގެ އުމުރުގެ އެހެންކުދިން ގޮތަށް ރައްޓެހިންނާއިއެކު، މަޖާކޮށް އުޅެން ބޭނުމެވެ. ނަމަވެސް އުމުރުން 18 އަހަރު ވީއިރުވެސް އަހަރެންގެ އެފަދަ ރައްޓެއްސެއް ނެތެވެ. ނުލިބެނީއެއްނޫނެވެ. އަހަރެންގެ ވިސްނުން ހުންނަ ގޮތުން އެކުދިންނާއި އެކު ނޫޅެވެނީއެވެ. އަހަންނަށް ވިސްނޭ ގޮތުގައި އަހަންނާއި ހެދި އެކުދިންނަށް އުދަގޫ ވާނެއެވެ. އެހެންކަމުން ކިތަންމެ ބޭނުންނުވިއަސް އަހަރެން އެކުދިންނާއި ދުރުވަނީއެވެ. ނަތީޖާއެއްގެ ގޮތުން އަހަރެންމީ ފޮނިމީހެއްގެ ގޮތުގައި ލޭބަލް ކުރެވެއެވެ. ނަމަވެސް އެކުދިންނަށް ވިސްނުނު ނަމައެވެ.. ރައްޓެއްސަކަށް އަހަރެން ބޭނުންވެފައިވާވަރު އެނގުނު ނަމައެވެ.

އަހަރެން މިއޮތް މަރުވަނީ އެވެ… މި އިހުސާސްތަކަކީ އަހަރެންނަށް ކޮންޓްރޯލް ކުރެވޭ އެއްޗެއް ނޫނެވެ. ކުޑަކުޑަ ކަމެއްވާއިރަށް އަހަރެންނަށް ރުޅިއައިސް ކުރެވޭ ނުކުރެވޭ ކަމެއް ނޭގެއެވެ. އަމިއްލަ ހަށިގަނޑަށް ގެއްލުން ދެވުނު އަދަދެއްވެސް ނޭގެއެވެ. އެންމެ ފަހުން އަހަރެން ސައިކޭޓްރިސްޓެއްގެ އެހީ ހޯދުމަށް ނިންމައި މަންމަ ކައިރީ ބުނިދުވަހު މަންމަ ބުނި ބަސް އަދިވެސް އަހަރެން ހަނދާން އެބަހުއްޓެވެ. ރުޅި އަކީ އަހަރެންގެ އިޚްތިޔާރުގައިވާ ކަމަކަށް ވާއިރު އެކަން އަހަންނަށް ކޮންޓްރޯލް ކުރެވޭނެ ކަމަށް މަންމަ ބުންޏެވެ. އެހެން މީހުންނާއި ގުޅިގެން އުޅުނީމަ ނިމުނީ ކަމަށް ބުނެ މަންމަ އަހަންނަށް ވިސްނައިދިނީ އެކަހަލަ ކަންތަކަށް ޑޮކްޓަރަށް ދައްކާނީ މޮޔައިން ކަމުގައެއެވެ. މަންމާއެވެ.. ޑޮކްޓަރަށް ދައްކައިގެން ވިއަސް މަންމަގެ މިދަރިފުޅަށް ކުޑަވެސް ލުއި ކަމެއް ލިބޭތޯ އުޅުމުން، މަންމަގެ ވާހަކަތަކުން އަހަރެން ބިރުގަތީއެވެ. މީހުންގެ ނަޒަރުގައި މޮޔަ އަކަށް ވާން ބޭނުން ނުވީއެވެ. ނަމަވެސް އަހަރެންގެ މުޅި ދިރިއުޅުން މިދަނީ މިހެންނެވެ. އުފަލަކީ ކޯއްޗެއް ކަމެއް ނޭގިއެވެ.

މި އިހުސާސްތަކަކީ މިހެން ކިޔައިދެވޭނެ އެއްޗިއްސެއް ނޫނެވެ. ނަމަވެސް އަހަރެން ވެސް ބޭނުމެވެ. އެހެންމީހުން ހެން އުޅެން ބޭނުމެވެ. އުފަލުގައި އުޅެން ބޭނުމެވެ. އަހަންނަށް އެހީ ވެދޭށެވެ. މިކަމުން ސަލާމަތްކޮށްދީ، އުފާވެރި ހަޔާތެއް އަހަންނަށް ހޯދަ ދޭށެވެ. އަހަރެންދެކެވެސް ލޯބިވާ ބަޔަކު ތިބިކަން އަހަންނަށް އިހުސާސްކޮށްދޭށެވެ.”

ލިޔުން ކިޔައި ނިމުނުއިރު ނަޝީދާއަށް ހުރީ ހަމަރަނގަޅަށްވެސް ރޮވިފައެވެ. އޭނާގެ ލޯބިވާ ދަރިފުޅު ވޭތުކުރަމުންއެދަނީ ކޮންފަދަ ހިތްދަތި ދިރިއުޅުމެއް ހެއްޔެވެ؟ ކޮންމެ ގޮތެއްވިއަސް ނަޝީދާ އޭނާގެ ދަރިފުޅު ސަލާމަތް ކުރާނެއެވެ. ޑިޕްރެޝަން އަކީ އެކަމުގެ ސަބަބުން އެމީހަކު ބާކީކޮށްލަން ޖެހޭ ކަމެއްނޫންކަމާއި، އެހެންމީހުންގެ ލޯތްބާއި، އަޅާލުމުން ޑިޕްރެޝަންގެ ޝިކާރައަކަށް ވެފައިވާ މީހުންނަށް އެހީވެވޭނެ ކަން ދުނިޔެއަށް އަންގާނެއެވެ. މިއަދު އޭނާގެ ހުރި ހަމައެކަނި އަންހެންދަރިފުޅު މަރުން ސަލާމަތްވީ ހަމަކިރިޔާއެވެ. ނަމަވެސް ދެވަނަ ފަހަރަށް ނީމް އެކަހަލަ ކަމެއް ކުރުމުގެ ފުރުސަތެއް ނަޝީދާ ނުދޭނެއެވެ. ޑިޕްރެޝަންގެ ސަބަބުން މީހުން އިހުސާސް ކުރަމުންދާ ވޭންދެނިވި ކަންތައްތައް މިއަދު ނަޝީދާއަށް ވިސްނިއްޖެއެވެ. އޭނާ ނީމް ސަލާމަތްކުރާނެއެވެ. ނީމްއަށް އުފާވެރި ހަޔާތެއް ހޯދަދޭނެއެވެ. ޑިޕްރެޝަންގެ ސަބަބުން އެ އިހުސާސްކުރާ ކަންތައްތަކާއި ދުރުގައެވެ… ނިމުނީ.

As this is my frst stry, thre wud b mistakes n i promise coming storys wud b far bttr thn dis and thnk you everyone who kept waiting fr dis stry n i hpe u ol wil lyk dis