ވާތީ ހިތަކު ލޯބި މަންމަންވެފާ 1

(1 ވަނަ ބައި)

ފަތިހުގެ ފިނިކަން ފިލާ ޖައްވައް ހޫނުކަން ފެތުރިއްޖެއެވެ. މަގުތައް ކުނި ކެހުމަށް މީހުންތައް ނުކުންނަން ފެށިއެވެ. ކާޅާއި ކުނބޯވެސް އެސޮރުމެންގެ ކެއުން ހޯދުމައް ނިކުމެއްޖެއެވެ. އިސްކޫލައް ދާކުދިން އިސްކޫލައް ތައްޔާރުވާން ފެށިއެވެ. ޑިއުޓީއަށް ދާމީހުން ޑިއުޓީއަށް ދާން ތައްޔާރުވާން ފެށިއެވެ.

ހެޔޮވަރުވަރެއްގެ ކޮޓަރިއެެކެވެ. ސީލިންގާއި މުޅި ކޮޓަރީގައިވެސް ވަނީ އަޅިކުލައެވެ. ކިންގު ސައިޒް އެނދުގައި އޮތް އުމުރުން 19 އަހަރުގެ އެޒިކިއެލް އޮތީ ނިދާފައެވެ. ހަމަ އެކަނި ސޯޓެއް ލައިގެން އޮތް އިރު އޭނާގެ ބައިމަތިފުޅާ ހަށިގަނޑު ފެނި އަންހެން ކުދިންތައް ހޭނެތޭނެކަން ޔަގީނެވެ. ބަނޑުގައި ތަރުތީބުން ހަގޮޅިއިން އިރު، އަތުގެ މަސްތަކުގައި ވެސް ވަރު ހުއްޓެވެ. އެއަތް އިތުރަށް ރީތި ކޮއްދެނީ އަތުގައި ފުއްޕާލާފައި ހުރި ނާރު ތަކެވެ. ހެޔޮވަރުވަރަކަށް ކޮށާލެވިފައި އިސްތަށިގަނޑު ވަނީ އެގޮތް މިގޮތަށް ހޭވިފައެވެ.

ދޮރު ހުޅުވާލާފައި އުމުރުން 19 އަހަރުގެ އެލާރާ ކޮޓަރިއަށް ވަނެވެ. ކަޅު ކުލައިގެ ދޫ ހަރުވާޅަކާ އެކު ކަނޑު ނޫކުލައިގެ ކަކުލާ ހަމައަށް އަރާ ހެދުމެެއް ލައިގެން ހުރި އެލާރާއަށް ނިދާފައި އޮތް އެޒިކިއެލް ފެނި ބޯހޫރުވާލެވުނެވެ. އެލާރާއާ އެޒިކިއެލްއަކީ އެއްމާބަނޑު ދެބެންނެވެ. “މި ދޮންބެ އަދިވެސް ނިދަނީ ދޯ؟” ތުންކޮޅު އޫކޮއްލަމުން ގޮސް ރީތިވާ މޭޒުމަތީގައި އިން ފެންފުޅި ނަގާ އޭގެން އެތިކޮޅެއް އެޒިކިއެލްގެ މޫނަށް އަޅާލަން އޭނާ ދިޔައެވެ. އެހެނަސް އެލާރާގެ ޙިޔާލު ބަދަލު ވިއެވެ. ތުންފަތުގައި ކުރެހުނީ ލާނެއް ހިނިތުންވުމެކެވެ. ފެންފުޅި ބައިންދާފައި އައިސް އެޒިކިއަލްގެ އުނގަނޑުގައި އަތް އަޅާ ކޮއްޕާލިއެވެ. ވަގުތުން އޭނާ ގުޅައަކަށް ބިންމައްޗަށް ޖެހުނެވެ. “އައްދޯތް”

“ކޮން އައްދޯތް އެއްތަ؟ މިހާރު އެޔޮއްގެން 7 ޖެހީއޭ. އަދި ވެސް ހަމަ ނިދަނީ ހޫން. ތިހެން ވާނީ އެހާ ލަސް ވަންދެން ނިދަންޏާ. ކިންގް ސައިޒް އެނދެއްގަ ނިދާ އިރު ވެސް އެނދުން ވެއްޓެނީ. ހިތަށް އަރާ މީނަ މީހަކާ އިނީމަ ދެން އުޅޭނީ ކިހިނެތް ބާއޭ” އެލާރާ އުނަގަނޑުގައި އަތް ޖައްސާލަމުން ބުނެލިއެވެ.

“ހޫން. ދެން ބޭކާރު ވާހަކަ ނުދައްކާ. އެލާ ދޯ އަހަރެން ކޮއްޕާލީ؟” އެޒިކިއެލް އެއްބުމަ ހިއްލާލިއެވެ. “ނޫޅެން. ކުރާނެ ކަމެއް ނެތިގެނެއް ނޫޅެން” ދޫނެރެލާފައި އެލާރާ ކޮޓަރިން ނިކުމެގެން ދިޔައެވެ.

“ހިތަށް އަރަނީ މަންމަ ބަނޑުގަ އޮތް އިރު މީނަ ހާދަ ޖެއްސުމެއް ކޮއްފަ ހުންނާނެބާއޭ” ބޯހޫރުވާލަމުން އެޒިކިއެލް ތެދުވިއެވެ. މޯޅިއަކަށް ދެމިލަމުން ފާހާނާއަށް ވަނީ ފެންވަރާލާށެވެ.

ފާހާނާ ތެރޭގައިވެސް ވަނީ އަޅިކުލައެވެ. ލައިގެން ހުރި އެއްޗެހި ބާލާފައި އެޒިކިއެލް ލޯގަނޑު ކުރިމަތީގައި ހުއްޓުނެވެ. ލޯގަނޑު ކައިރީ އިން “ޓޫތްބަޝް ހޭންގާރ” ގައި އެލުވާފައި އިން ދަތްއުނގުޅާ ބުރުސް ނެގިއެވެ. ލޯގަނޑުން އަމިއްލަ ސޫރައަށް ބަލާލަމުން އޭނާ ދަތްއުނގުޅަން ފެށިއެވެ.

“ކޮބާ ދޮންބެ ހޭލީތަ؟” އެލާރާ އެނބުރި ބަދިގެއަށް ވަނުމުން ދެބެންގެ މަންމަ ޔާޝާ އަހާލިއެވެ. “އާނ. ވަދެއްޖެ ފެންވަރަން” ހެދުމުގެ އަތު ކުރި އޮޅާލަމުން އެލާރާ ތަށިތައް ދޮވެ ސައިހަދަން ތައްޔާރު ކުރުމުގެ މަސައްކަތް ފެށިއެވެ.

ލޯގަނޑު ކުރިމަތީގަ ހުރި ޒުވާނާ ތައްޔާރު ވަމުން ދިޔައީ ޑިއުޓީއަށް ދިޔުމަށެވެ. ކަޅު ކުލައިގެ ފަޓުލޫނަކާއި އެކު މަޑު ނޫކުލައިގެ ގަމީހެއް ލާފައިވީއިރު ގަމީހާއި ގުޅުވައިގެން އަޅާފައި ހުރި ކަނޑު ނޫކުލައިގެ ޓައީއިން އެޒުވާނާ ވަރަށް ފުރިހަމަ ކަމަށް ދައްކައެވެ. އަތަށް ޖެލް ކޮޅެއް އަޅާލަމުން ފަންދިގު އިސްތަށިގަނޑުގައި އަތް ހިންގާލިއެވެ. އެންމެ ފަހު ކަމަކަށް “ފޮގް” ސެންޓު ފުޅި ނަގާ މުޅި ހަށިގަނޑަށް ބުރުވާލިއެވެ.

“ހޫން ހޫން ސާބަހޭ. ދޮންބެ ޑިއުޓީއަށް ދަނީ ކައުންސެލިންގ ނަގަންތަ ނޫނީ ބިޓުން ހޯދަންތަ؟” ކަޅު ކުލައިގެ އަބާޔާއަކާއި އެކު ދަނބު ކުލައިގެ ޝޯލްއެއް އަޅައިގެން ހުރި އަންހެން ކުއްޖަކު ދޮރު ހުޅުވާލަމުން ސުވާލު ކުރިއެވެ. “ކިހިނެތްވީ؟ ބިޓެއް ވެސް ލިބޭތޯ ދެން ދޯ؟ ހެހެހެހެ” މީކައިލް ފޮނިވެލަމުން ބުނެލިއެވެ. އަދި ފަހަތަށް އެނބުރި އޭނާގެ ހުރި ހަމަ އެކަނި ކޮއްކޮ ކަމުގައިވާ އުމުރުން 18 އަހަރުގެ މިކްޔާއާ ދިމާލަށް ބަލާލިއެވެ.

“މިކީ ވިއްޔާ ކީއްތަ؟ ހީވަނީ ގައިމު މޭބިސްކަދުރެއްހެން” މިކްޔާގެ ބޮލުން ފެށިގެން ފަޔާ ހަމަޔަށް ބަލާލަމުން މީކައިލް ބުނެލިއެވެ. “ދެން ތިހެންޏާ ދޮންބެ ހީވަނީ ބްލޫބެރީއެއް ހެން” މިކްޔާވެސް ދެރަނުވާން ވެގެން ބުނެލިއެވެ. “އާނ ދެން ބޭކާރު ވާހަކަ ނުދައްކާ ހިނގާ ސައިބޯން” ރީތިވާ މޭޒު މަތީގައި އޮތް ފޯނު ނަގަމުން މީކައިލް ހިނގައިގަތެވެ. އޭނާގެ ފަހަތުން މިކްޔާ ވެސް ގޮސް ވަނީ ކާގެއަށެވެ.

“ކޮބާ އާދޭ ސައިބޯން” ދެބެން ކާގެއަށް ވަނުމުން ދެބެންގެ މަންމަ ސަފިއްޔާ އިށީންނަމުން ބުނެލިއެވެ. “ވާއު. ބަޖިޔާ ދޯ؟ މްމް މިހާރު ވެސް ބަނޑު ފުރިއްޖެ” ބަޖިޔާއަކީ މީކައިލްއަށް އެންމެ މީރު ހެދިކާއެވެ.

“އާނ ދެން ބަނޑު ފުރުނީއާ ދެން ކާނެ ކަމެއް ނެތް. އަވަހަށް ދާން އުޅޭ ހަހަ” މިކްޔާ ހީގަންނަމުން ބުނެލިއެވެ. “ބަނޑު ފުރުނަސް ހިތެއް ނުފުރެޔޭ. އެހެންވެ ކާން ވާނުން” މީކައިލް ބަޖިޔާއެއް ނަގަމުން ބުނެލިއެވެ. “ދޮންބެ ކާއެއްޗެހި ދަނީ ހިތަށް ތަ؟ އަހަރެމެން ކާއެއްޗެހި ދަނީ ބަނޑަށް. ކީކޭ މަންމަ ބުނަނީ” މިކްޔާ ދެލޯ ބޮޑު ކޮއްލަމުން ބުނެލިއެވެ.

“ހޫނ ހޫން ދެން ނިމުނީ. އެކަކަށް މިހާރު 23 އަހަރުވީ އަނެކަކަށް 18 އަހަރުވީ. އަދިވެސް ދެބެންކުރެ އެކަކުވެސް ބޮޑެއް ނުވޭ ދޯ؟” ދެބެންގެ ބައްޕަ މިރުޝާލް ބޯހޫރުވާލަމުން ބުނެލިއެވެ.

“ދެން ދޮންބެ ފެށީ”

“ދެން ކޮއްކޮ ފެށީ”

ދެބެންނައް ބުނެވުނީ އެއްފަހަރާއެވެ. ސަފިއްޔާގެ ހިނިގަނޑު ފަޅައިގެން ދިޔައެވެ.

ނަރުސް ޔުނީފޯމު ލައިގެން ލޯގަނޑު ކުރިމަތީގައި ރީތިވާން ހުރި އުމުރުން 23 އަހަރުގެ ޒާލާގެ ހަރަކާތްތައް އަވަހެވެ. މިހާރު 8 ޖަހަން 20 މިނިޓްއަށް ވީއެވެ. އަދިވެސް ތައްޔާރުވެ ނުނިމެޔެވެ.

“އަޅެ ލޯބީ. ނާނު އަބަދުވެސް ބުނަމޭނުން ޕިން އަނގައަށް ނުލާނޭ” އެވަގުތު ކޮޓަރިއަށް ވައިން ޒާލާގެ ފިރިމީހާ އަކްނާން އޭނާގެ އަނގައިގައި އިން ޕިން ނެގިއެވެ. “ދެން އެހެން ދޯ ވާނީ. ހާދަ ލަސް ވެއްޖޭ” ޒާލާ ބުނެލިއެވެ.

އަކްނާން ހިނިތުންވެލައިގެން ހުރެ ޒާލާގެ ދޮން މޫނަށް ބަލާލިއެވެ. ބޮޑުބޮޑު ދެލޮލެކެވެ. ދޮންކަމުން މުޅި މޫނުމައްޗަށް ވެސް ވަނީ ޖަންބު ކުލަ އަރާފައެވެ. ރަތް ފިނިފެންމަލެއްގެ ފިޔަފަދަ ބޮޑު ތުންފަތެކެވެ. ތުންފަތް ކައިރީގައި އިން ކުޑަ ކަޅު ތިލަ، ޒާލާގެ މޫނު ވަކިން ފުރިހަމަ ކޮއްދެއެވެ. ހިތިފަތުބުމައަކާ ދިގު އެސްފިޔަތަކެކެވެ. އަންނާރު އޮށްތަކެއް ފަދަ ކުދި ކުދި ދަތްތަކެކެވެ.

“ކިހިނެތްވީ މޫނުގަ އެއްޗެއް އިނީތަ މާވަރަކަށް ތިބަލަނީ؟” އަކްނާން ބަލަން ހުރުމުން ޒާލާ ލަދުގަތެވެ. “ބެލޭނެއްނުން؟ ނާނުގެ ވައިފީ ހާދަ ހޮޓޭ” ދަތްދޮޅީގައި އަތް ހިންގާލަމުން އަކްނާން ބުނެލިއެވެ. “ހޫން. ގަޑި ޖެހެން މިހާ ކައިރިވީމަ ވެސް ވާނެ ފްލާޓް ކުރަން” ޒާލާ ދެފަރާތަށް ބޯހޫރުވާލިއެވެ. “ހަހަ. ގެރެއެއްނުން؟ އަން. މި ޕެކެޓް ބޯލާ” އަތުގައި އޮތް މައިލޯ ޕެކެޓް ކަނޑާލަމުން ޒާލާގެ ތުމުގައި ޖައްސާލަ ދިނެވެ. “ކޮބާތަ ޒަވުލްކޮ؟ އޭނަ ދިޔައީ ތަ؟” ޒާލާ އަހާލިއެވެ.

މަޑު ދުވެއްޔެއްގައި ދުއްވާފައިއައި ސައިކަލު މަޑުކޮއްލީ ރަށު ސުކޫލު ޕާކިންގ ލޮޓް ކައިރިއަށެވެ. ކަޅު ކުލައިގެ ޖީންސަކާއި އެކު ޕީޗް ކުލައިގެ ގަމީހެއް ލާފައި ހުރި ޒުވާނެއް ސައިކަލުން ފޭބިއެވެ. އަޅައިގެން ހުރި މަޑު ރަތް ކުލައިގެ ޓައީ ރީތި ކޮއްލަމުން އުމުރުން 21 އަހަރުގެ ޒަވުލް ހިނގައިގަތެވެ.

ފަންދިގު އިސްތަށިގަނޑެކެވެ. ދިގު މިނުގައި ޔަގީނުންވެސް 6 ފޫޓު ހުންނާނެއެވެ. ކުޑަ ކުޑަ ދެލޮލަކާއި އެކު ބޮޑު ތުންފަތެއް ލިބިފައިވިއެވެ. ތުންފަތް ކައިރީ އިން ކަޅު ތިލައިން ވަކިން ރީތިކަމަށް ދައްކައެވެ. ޒަވުލްއާ ޒާލާއާ ވަރަށް ވެސް ވައްތަރެވެ. ޒަވުލްއަކީ ސުކޫލު ދިވެހި ޓީޗަރެކެވެ.

“ޒަވޫ” ފަހަތުން ޒުވާނެއްގެ އަޑު އިވުމުން ޒަވުލް ފަހަތް ބަލާލިއެވެ. އޭރު އަކްނާން އޭނާއާ ދިމާލަށް އަންނަނީއެވެ. އެއީ ޒަވުލްގެ ދޮންތަބެއެވެ. އުމުރުން 22 އަހަރުގެ އަކްނާން ސުކޫލު އޮފީހުގައި މަސައްކަތް ކުރާ މުވައްޒަފެކެވެ. 6 ފޫޓުގެ އަކްނާންއަކީ ޒުވާން އަންހެން ކުދިންގެ ހިތްތައް ކަތިލާފަދަ ރީތި ކަމެއް ލިބިފާވާ ޒުވާނެކެވެ. ފަންދިގު އިސްތަށިގަނޑަކާއި ކުޑަ ކުޑަ ދެލޮލެކެވެ. ބޮލުގެ އިސްތަށިގަނޑު އެސިހުރުވެރި ދެލޮލަށް އުނދަގޫ ކުރަމުން ދިޔައިރު ބަލާ ބަލާ ފޫހި ނުވާނޭ ފަދަ މަންޒަރެކެވެ. ބައިމަތި ފުޅާ ހަށިގަނޑެއް ލިބިފައިވާ އިރު، ލައިގެން ހުރި ކަޅު ކުލައިގެ ގަމީހުގެ އަތްކުރި އުޅަނބޮއްޓާއި ހަމައަށް އޮޅާލެވިފައިވީ އިރު، ފުއްޕާލާފައި ހުރި ނާރުތައް އޮތީ ހާމައަށެވެ.

“ކޮބާ އަހަރެން ބުނީ ކޮން އިރަކުންހޭ ދިވެހި މަދަހަ މުބާރާތް ބާއްވަނީ؟” ޒަވުލް ކުރެން އަކްނާން އަހާލިއެވެ. “ނޭނގެ ބްރޯ. އިއްޔެ ނޫން ކުރީ ދުވަހުކީ 2 މަސް ފަހުންނޭ. ދެން އިއްޔެގަ ބުނީ މިމަހު ނިމޭކޮޅޭ. ނޭނގެދެން” ޒަވުލް ބޯހޫރުވާލަމުން ބުނެލިއެވެ.

އެލާރާއާ އެޒިކިއެލް ދެބެން ސްޓޭޝަނަށް ވައިން އިރު ދެބެންގެ އިންތިޒާރުގައި ޔައުލާން އިނެވެ. “ސާބަހޭ. މިދެމީހުންހާ ތަތްބައެއް މުޅި ސްޓޭޝަނުގަ ވެސް ނޫޅޭނެ” ބޯހޫރުވާލަމުން ޔައުލާން ބުނެލިއެވެ. “ހަހަ ކިހިނެތްވީ؟ އެލާ ނާހިސްގެން ހިތް ކުދިކުދިވެފަ ދޯ؟” އެޒިކިއެލް އަހާލީ ދިމާކުރާ ރާގެއްގައެވެ.

“ސާބަހޭ ދޮންބެއަށް. ވީއާރ ޖަސްޓް ބެސްޓީޒްއޭ” ކަޅި އަޅާލަމުން އެލާރާ ބުނެލިއެވެ. “އޯކޭ އޯކޭ” ހެމުން ހެމުން އެޒިކިއެލް ސްޓޭޝަނަށް ވަނެވެ. އެޒިކިއެލް ވަނުމުން ޔައުލާން ގާތުގައި އެލާރާ އިށީނެވެ.

“ޑޯންޓް މައިންޑް ހިމް” އެލާރާ ބުނެލިއެވެ. “ހެހެ އެއޯކޭ ވާނެ. ދޮންބެ އަބަދުވެސް އެހެން ކިޔައޭނުން” ޔައުލާން ހީލަމުން ބުނެލިއެވެ. “އާހްހްހް ހާދަ ވައޭ ދޯ މިދުވަސްކޮޅު. ވަރަށް ބޮޑު ކޭސްއަކާ އުޅެން ބޭނުމީ” އެލާރާ މޯޅިއަކަށް ދެމިލަމުން ބުނެލިއެވެ.

“ސުބްހާނައްﷲ އެލާ ދެން ތިކަހަލަ ވާޙަކަ ދައްކާކަށް ނުވާނުން؟ ނޭނގެއޭނުން ދެން ވާނީ ކިހިނެތްކަމެއް ވެސް” ޔައުލާން ދެލޯ ބޮޑު ކޮއްލަމުން ބުނެލިއެވެ. “އަޅެ ދެން އެއްވެސް ކޭސްއަކާ ނޫޅޭތާ މިހާރު ކޮން ދުހެއްތަ؟” އެލާރާ ތުންކޮޅު އޫކޮއްލިއެވެ. “ރޭގެ ޑިއުޓީގަ ސައިކަލެއް ނެގި ވާހަކަ އެހިން ހަހަ” ޔައުލާން ހީލިއެވެ. “ތިދެން އާމު ކަމެއްނުން؟ ހަހަ” އެލާރާ ހީލިއެވެ.

ގަޑިއަކީ ރިލީފް ވަގުތެއް ކަމުން ކުލާސް ކުދިންތައް ސަކަރާތް ޖަހަމުން ދިޔައެވެ. އެންމެ ކުއްޖެއް ފިޔަވައެވެ. އެއީ އުމުރުން 17 އަހަރުގެ ލަޝްކާއެވެ. ކުއްޖާ ހިކި ކަމުން ހީވަނީ މަރު މައްޔިތެއްހެނެވެ. ދެލޯ ވަޅުވަދެފައިވީ އިރު ކޯތާފަތުގައާ ދެލޮލުގައިވެސް ރަތްކަން ވިއެވެ. ހިތާމައިގެ ތަސްވީރެއް ފަދައެވެ. ލަޝްކާ އެހާ އެކަނި އޭނީ ކީއްވެ ބާއެވެ؟

“އޭ. ސިންގާގެ ލަޝްކަރު” އަންހެން ކުއްޖަކު ގޮވާލި އަޑަށް ލަޝްކާ ސިހުނެވެ. އޭރު ދެއަންހެން ކުދިން ލަޝްކާއާ ދިމާލަށް އަންނަމުން ދިޔައެވެ. ވަގުތުން ލަޝްކާގެ މުޅި ހަށިގަނޑު ތުރުތުރުލާ ގަތެވެ.

(ނުނިމޭ)

ދެވަނަބައިގެ ތެރެއިން:

“ކޮބާ ކޮބާ ނެއްތަ ޓީއެއް؟” ހަރަމްބަނދެލަމުން ޔައުލާން އަހާލިއެވެ. “އަމްމްމް… އަސްލު ދެއާރ އިޒް…” މޫނު މަތީގައި އަތް އަޅާލަމުން އެލާރާ ބުނެލިއެވެ. “ކޮބާ ސްޕިލްލްލް” ޝައުގުވެރި ވެލާފައި ޔައުލާން ބުނެލިއެވެ. “ސޯ… އެލާ ކުއްޖަކާ ވާހަކަ ދައްކަން އެބަ…” މޫނުގައި އަތްއަޅައިގެން އިނދެ އެލާރާ ބުނެލިއެވެ. ވަގުތުން ޔައުލާންއަށް ކުރެވުނީ އެހެން ކަހަލަ އިހުސާސެކެވެ. މެއަށް ފިތޭ ކަހަލަ އިހުސާސެކެވެ. އެމީހަކާ މެދު ހިތުގާ ހަސަދަ ހުފެދުނެވެ. އެއީ ކީއްވެ ހެއްޔެވެ؟

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.