ވާތީ ހިތަކު ލޯބި މަންމަންވެފާ ޓްރޭލާރ

~މިވާހަކައަކީ ހިލޭ ކިޔާލަން ލިބޭ ވާހަކައެކެވެ~

ދަންވަރުގެ ވަގުތެވެ. އެހެނަސް އެއްވެސް ހަމަހިމޭން ކަމެއް މަގުތަކަކު ނެތެވެ. ވެހެމުން ދިޔަ ބޯވާރޭގެ އަޑު ސީލިންގު ކޮއްފައި ހުރި ކޮޓަރިތަކަށް ވެސް އެއްވެސް އުނދަގުލެއް ނެތި އިވެމުން ދިޔައެވެ. ޖަހަމުން ދާ ބާރު ގުގުރީގެ ސަބަބުން ވެސް ބިރުން ރޫރޫ އަޅާހާވެޔެވެ. ޖެހެމުން ދިޔަ ވައިތަކާއި އެއްވަރަށް ގަސްގަހާއި ރުއް ރުއް ވެސް ނަށަމުން ދިޔައެވެ.

ދުވެފާ ކޮޓަރިއަށް ވައިން އަންހެން ކުއްޖާގެ ގިސްލުމުގެ އަޑު މެދު ކެނޑުމެއް ނެތި އިވެމުން ދިޔައެވެ. ކޮޓަރިއަށް ވަދެ ދޮރު ލައްޕާ ތަޅުލާފައި ދޮރު ކައިރިއަށް ތިރިވެ ރޯން ފެށުނީ ހިތަށް ނުކުޅަދާނަ ވެގެންނެވެ. އޭނާ ލައިގެން ހުރި ކަޅު ކުލައިގެ ޓީޝާޓުގެ ކަރުވަޅު ވީދިފައިވީ އިރު ލައިގެން ހުރި ހަރުވާޅެއް ނެތެވެ. ހަށިގަނޑުގެ އެތަން މިތާގައި ނޫފާގަނެ ރަތްވެ، ދުޅަވެފައިވިއެވެ.

އެގޮތުގައި ރޯން އިންނަތާ 15 ވަރަކަށް މިނިޓް ފަހުން ވެފާ ހުރި ވަރުބައްޔާއެކު އެކުއްޖާގެ ލޮލުގައި ނިދި ޖެހުނެވެ. ދެން ފެނުނީ ކޮޓަރި ޖާލި ދޮރުތަޅާލި މަންޒަރެވެ. ޒުވާން ފިރިހެނެއް ކޮޓަރި ތެރެއަށް ވަނެވެ. އަދި އެއަންހެން ކުއްޖާ އަތްދަނޑި މައްޗައް ލައިގެން ކޮޓަރިން ނިކުތެވެ…

***

ހޮސްޕިޓަލު ތެރެ ވަނީ ހަލަބޮލި ވެފައެވެ. ނަރުހުންނާ ޑަކްޓަރުންގެ ހަރަކާތްތަަށް އަވަހެވެ. މަރުވެފާ އޮތް ޒުވާނާގެ މަރުގެ ފޯމު ފުރަން ތައްޔާރު ވަނީއެވެ. މަރުވެފާ އޮތް މައްޔިތާގެ މޫނު މަތީގައިވީ ވަރުބަލި ކަމެވެ. ދެލޯ ވަނީ ވަޅުވެފައެވެ. ތުންފަތްވަނީ ކަޅުވެފައެވެ. ކޯތާފަތުގައި ހިކިފާ ހުރި ކަރުނަ ހުއްޓެވެ.

މައްޔިތާ އޮތް އެނދާ ތަންކޮޅެއް ދުރުގާ ނަރުހަކު އިށީނދެ އިނެވެ. ގަބުވެފާ އިން އެކުއްޖާގެ ދެލޮލުން ފަހަރަކު ކަރުނަ ތިއްކެއް އޭގެ މަގާމު ދޫކޮއްފައި އަންނަމުންދިޔައެވެ. “ޒާލް…” ނަރުސް ކުއްޖަކު ގޮވާލި އަޑަށް އެއަންހެން ކުއްޖާ ބަލާލިއެވެ.

“އަން…” ނަރުސް ކުއްޖާ ދިއްކޮއްލި މަރުގެ ފޯމު ފެނި އޭނާގެ ބަޑި ފަޅައިގެން ދިޔައެވެ. އަޑުން އަޑު ނަގާ ރޯން ފެށުނެވެ. އޭނާގެ މަރުގެ ފޯމު ފުރާނީ ކިހިނެތް ހެއްޔެވެ؟ އެކަން ކުރަން އެހިތަށް ކުޅަދާނަ ވާނެ ހެއްޔެވެ؟ ނޫނެކެވެ. އެކަމެއް ނުވާނެއެވެ…

***

“އާހްހްހް ނޫން… ނޫނެކޭ. އަހަރެން އެލާދެކެ ވަރަށް ލޯބިވެޔޭ. އެލާއާ ނުލާ ނޫޅެވޭނެ. ހަމަ މިހާރު އަހަރެންގެ އެލާ އަހަރެން ގާތަށް ގެނޭ” ރޮވިފާ ވާހާލުގައި ފިރިހެން ކުއްޖާ ކުރިމަތީ ހުރި ޑަކްޓަރު ކޯޓުގައި ހިފާ ތަޅުވައިގަތެވެ.

“އެލާ ބުނީ އަހަރެންދެކެ ލޯބިވެޔޭ… ދެން ކީއްވެ…؟ ކީއްވެ ތިިހާ ގޯސްވާންވީ؟” ބިންމައްޗަށް ޖެހިގަންނަމުން އޭނާ ހަޅޭލަވައިގަތެވެ. އެންމެންގެ ނަޒަރުވެސް އޭނާއަށް ހުއްޓިފައި ހުރި އިރު, އެންމެންގެ ލޮލުގައިވެސްވީ ހަމްދަރުދީއެވެ…

***

ދަންވަރުގެ ވަގުތެވެ. ވެހެމުން ދިޔަ ބޯވާރެއާ އެއްރާގުގާ ގުގުރަމުންވެސް ދިޔައެވެ. ޖެހެމުން ދިޔަ ވަޔާއެކު ގަސްތަށް ވެސް ނަށަމުން ދިޔައެވެ. އެފިނި ފިނި ވަގުތުގައި ނިދީގެ ފޮނި މީރުކަން ހާސިލް ކުރުމައިގެން މީހުންތައް ނިދަން ތިބި އިރު ޒުވާން ފިރިހެނެއް ގެޔެއްގެ ޖާލި ދޮރުގައި ޖަހަމުން ރޮމުން ދިޔައެވެ. އެއަޑުގާ ވީވޭން އިވި ހިލަ ހިތެއްގެ ވެރިޔާ ވެސް ހިތް ފިސްފިސް ވާނޭކަން ކަށަވަރެވެ.

“ހެޔޮނުވާނެ… އަހަރެން މި ދުނިޔެއަށް އެކަނި ކޮއްފަ ނުދޭ…” ޖާލި ދޮރުގާ އަނެއްކާވެސް އޭނާ ޖަހާލިއެވެ. ރޮއެ ރޮއެ ކޮޅަށް ހުންނާނެހާ ވަރުވެސް އޭރު އޭނާގެ ހަށިގަނޑުގާ ނެތެވެ. “އަހަރެން ބޭނުމެއް ނޫން ތިކަހަލަ އަނިޔާވެރި އާއިލާއެއްގެ މީހަކާ އެކު އުޅޭކަށް. އަހަރެންގެ ދިރިއުޅުމުން ފެއްސިގެން ދޭ” ކޮޓަރި ތެރެއިން އަންހެން ކުއްޖަކު ބުނެލި އަޑު އިވުނެވެ. ރުޅިވެރި ކަމާ އެކު އެހެން ބުނި ނަމަވެސް އެދެލޮލުގާވީ ކަރުނައެވެ…

***

“އަހަރެން އޭނާ ހޯދާނަން! ދުވަހަކުވެސް އޭނާއަށް ހަމަ ޖެހިލާގެން ނޫޅެވޭނޭ” އެޒުވާނާ ކޮޅަށް ތެދުވަމުން ބުނެލިއެވެ. “ސާރ. ބެލެވޭ ގޮތުން ސީރިޔަލް ކިލާރ ކޭސް، އަދި ކިޑްނެޕިން ކޭސްގަ ވެސް މިއުޅެނީ ހަމަ އެކަކު” ފުލުސް ކުއްޖަކު އިތުރު ކޮއްލިއެވެ.

***

“ކީއްވެތަ ތިހެން ތިހަދަނީ؟ ކީއްވެތަ؟ އިންސާނުންނަށޭ ކުށްވެސް ކުރެވޭނީ…” އޭނާ ހިނގައިގަންނަން އުޅުމުން އަންހެން ކުއްޖާ އޭނާގެ އަތުގާ ހިފިއެވެ. “ދޫކުރޭ” އަޑަށް ރުޅިވެރިކަން އިތުރު ކޮއްލަމުން އޭނާ ބުންޏެވެ. އޭރު ރެސްޓޯރެންޓުގާ ތިބި އެންމެންގެ ނަޒަރުވެސް އެދެމީހުނަށް ހުއްޓިފައިވިއެވެ.

“ކީއްވެ؟ ތި ދެލޮލުން މަށަށްޓަކާ ލޯބި ފެނޭ އެބަ. ދެން ކީއްވެ އެހެން ނުބުނެވެންވީ؟ ކީއްވެ؟” އަންހެން ކުއްޖާ އޭނާގެ ކުރިމައްޗަށް އަރަމުން ސުވާލު ކުރިއެވެ. “ދެން؟؟؟ ކޮބާތަ މައްސަލައަކީ؟ އަހަރެން ލޯބިވާނީ އަހަރެން ލޯބިވާން ބޭނުން މީހެއްދެކެ. އަހަރެން ކަލޭދެކެ ލޯބިވީން. އެލޯބީގަ ކޮޅުފައިން ޖެހީ ކާކު؟ ކަލޭ! ހަމަ ކަލޭ! ދުވަހަކުވެސް އަހަރެންގެ ހިތް ކަލެއަކަށް ހެވެއްނުވާނެ. އަހަރެންގެ ހިތުގަ ކަލެއަށްޓަކާ ވީ ލޯބި މަންމަން ވެއްޖެ!”

***

އެ އަންހެން ކުއްޖާ އަކީ ކާކު ބާއެވެ؟

އެ އަންހެން ކުއްޖާ ގޮވައިގެން އެދިޔައީ ކާކު ބާއެވެ؟

މަރުވެފާ އޮތް މައްޔިތާއަކީ ކާކުބާއެވެ؟

އެނަރުސް ކުއްޖާއާ އޭނާއާ ހުރި ގުޅުމަކީ ކޮބާބާއެވެ؟

އެފިރިހެން ކުއްޖާ އެރޮނީ ކީއްވެބާއެވެ؟

އެއަންހެން ކުއްޖާއާ ފިރިހެން ކުއްޖާގެ ހުރި ގުޅުމަކީ ކޮބާ ބާއެވެ؟

އަންހެން ކުއްޖާގެ ކޮޓަރި ޖާލި ދޮރުގާ ޓަކި ޖަހަނީ ކާކުބާއެވެ؟

“ސީރިޔަލް ކިލާރް” އާއި “ކިޑްނެޕާރް” އަކީ ކާކުބާއެވެ؟

އަންހެން ކުއްޖާދެކެ އޭނާ ނަފްރަތް ކުރަން އޭނާއަށް ކުރެވުނު ކުށަކީ ކޮބާބާއެވެ؟

މިސުވާލު ތަކުގެ ޖަވާބު ހޯދެއްވުމަށް އަޅުގަނޑުގެ 13 ވަނަ ދިގު ވާޙަކަ “ވާތީ ހިތަކު ލޯބި މަންމަން ވެފާ” އަށް އިންތިޒާރު ކޮއްލައްވާ…! މިވާހަކަވެސް ކިޔުންތެރިންނަށް ކަމުދާނޭ ކަމަށް އުންމީދު ކުރަން ♡

~އިންޝާ ﷲ މިވާހަކައިގެ ފުރަތަމަ ބައި ނޮވެންބަރު 11 ވަނަ ދުވަހު ކިޔާލަން ލިބޭނެ~

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.