ހަވޭލީ – އެކާވިސްވަނަ ބައި

އެއޮއް ހުރިހާ ދުވަހު އެ ފޮތް ތެރޭގައި މަ ބާއްވައިގެން އުޅުނީމަ ޖެހޭނެއްނު އޭގެ ބަދަލު ދޭން؟ ނޫންތަ؟” އެ މަޚްލޫޤު ޔުމްނާގެ ކުރިމަތީގައި ހުއްޓެމުން ބުންޏެވެ. “މިއީ ތި ފަކީރުގެ ނަސީބު. މިހާރު އަދކިރިޔާ ތިޔަ ފެނުނީ މިއޮޢް ހުރިހާ ދުވަހު ލޯބިވި މަންމަގެ ހަޤީޤީ ކުލަވަރު! ދެރަވޭތަ؟ އޭނ؟!” ޔުމްނާ ތަޅުވަމުން އެ މަޚްލޫޤު ބުންޏެވެ. “ހުސްނާއަށް އެ ދުވަހު އެ ހުރިހާ ކުޅިވަރެއް ކުޅެދިނީ މަށަށް މަޖުބޫރުވެގެން. އެކަމަކު މިހާރު؟ މިހާރު ކުޅިވަރު ކުޅެން ޖެހޭނީ ހުސްނާ. އެ ކުޅިވަރު ބަލަން ހުންނާނީ އަހަރެން.” މިހެން ބުނެ ކުއްލިއަކަށް އެ މަޚްލޫޤު ދުންގަނޑަކަށް ބަދަލުވިއެވެ. އަދި މަދު ސިކުންތުކޮޅެއްގެ ތެރޭގައި އެ ދުންގަނޑު ޔުމްނާގެ ހަށިގަނޑުގެ ތެރެއަށް ދެމިގަތެވެ.

*** 21 ވަނަ ބައި ***

ޔުމްނާގެ ހަށިގަނޑަށް ބާރުގަނޑެއް އަރައިގެން ދިޔައެވެ. މަޑުމަޑުން ޔުމްނާގެ ހޭވެރިކަން އޭނާ ދޫކޮށްފައި ދާކަހަލަ އިހުސާސެއް އޭނާއަށް ކުރެވިގެންދިޔައެވެ. އޭނާގެ ބޮލަށް އާދަޔާޚިލާފަށް ފިނިވަމުންދިޔައެވެ. ޔުމްނާ ހޭނުނެތި ވޭތޯ ވަރަށް މަސައްކަތް ކުރަމުން ދިޔައެވެ. ނަމަވެސް މާ ގިނަ އިރަކު ޔުމްނާއަކަށް ހިފަހައްޓައެއް ނުލެވުނެވެ. ޔުމްނާ ތަޅުންގަނޑުގެ މައްޗަށް ދެމުނެވެ.

***

ހުސްނާ ހަވޭލީއާއި އަރާ ހަމަވީއިރު ހުރީ ރީއްޗަށްވެސް ގުނބު ހިލިފައެވެ. ނަމަވެސް ހުއްޓުމެއް ނެތި ގޮސް ގޭގެ ދޮރު ހުޅުވުމަށްފަހު ޔުމްނާގެ ކޮޓަރިއާއި ދިމާއަށް ދުއްވައިގެތެވެ.

ޔުމްނާގެ ކޮޓަރިއާއި އަރާ ހަމަވުމުން އަވަސްއަވަހަށް ހުސްނާގެ ހެދުމުގެ ޖީބުން ތަޅުދަނޑި ނެގުމަށްފަހު ދޮރު ހުޅުވިއެވެ. ނަމަވެސް ހުސްނާއަށް ދެން ފެނުނު މަންޒަރުން ހުސްނާގެ ފިޔަވަޅުތަކަށް ހުއްޓުމެއް އައެވެ.

ޔުމްނާ ހުރީ ކޮޓަރި ތެރޭގައި ކޮޅަށެވެ. ހުސްނާއަށް ފުރަގަސްދީގެން ކުޑަ ދޮރުން ބޭރު ބަލާށެވެ. “ދަ..ދަރިފުޅާ..؟” ހުސްނާގެ އަޑު ތުރުތުރު އަޅާހާލު ޔުމްނާއަށް ގޮވާލިއެވެ. ޔުމްނާ ޖަވާބެއް ނުދިނެވެ. މިހެންވެ ހުސްނާ ކޮޓަރި ތެރެއަށް މަޑުމަޑުން ވަނެވެ. ޔުމްނާއާއި އަރާ ހަމަވުމުން ހުސްނާ ޔުމްނާގެ ކޮނޑުމަތީގައި އަތް ބާވައިލިއެވެ. “ދަރިފުޅާ….މަންމައާއި ދިމާއަށް ބަލާލަބަލަ…” ހުސްނާ އެދުނެވެ.

ޔުމްނާ މަޑުމަޑުން ފަހަތަށް އެނބުރުނެވެ. ހުސްނާގެ ގައިން ދިޔައީ ހީބިހި ނަގައިގެންނެވެ. ނޫނެކެވެ. ޔުމްނާގެ ސިފަ ހުރީ ބަދަލުވެފައެއް ނޫނެވެ. ނަމަވެސް ހުސްނާ ބިރުގަތީ ޔުމްނާގެ ތުންފަތުގައި ކުޅެލަ ކުޅެލާ ހުރި މަކަރުވެރި ހިނިތުންވުން ފެނިފައެވެ. ހުސްނާ ވަގުތުން ފަހަތަށް ފިޔަވަޅު އަޅަން ފެށިއެވެ. “ކިހިނެތްވީ މަންމާ؟ ހާދަ ބިރުގަނެފަ؟” ޔުމްނާ މަލާމާތް ކުރާ ފަދައަކުން ބުންޏެވެ. “ދަ..ދަރިފުޅު މިއޮއް ހުރިހާ އިރު ނުނިދާ ކީއްކުރަނީ؟” ހުސްނާ ހަމަޖެހެވޭތޯ ބަލަމުން އެހިއެވެ.

“މަންމަ އަހަރެންގެ ކޮޓަރިއަށް ވަދެގެން ކީއްތިކުރަނީ؟” ޔުމްނާ ޝައްކުގެ ނަޒަރަކުން ބަލަމުން އެހިއެވެ. މިހެން ޔުމްނާ ބުނުމުން ހުސްނާގެ އަނގަ ބަންދުވިއެވެ. “ދަ..ދަރިފުޅު ނިދައިފިތޯ ބަލަންވެގެން….” ހުސްނާ މަޑުމަޑުން ބުންޏެވެ. ޔުމްނާ އެއް ބުމަ ހިއްލާލިއެވެ. “މިއޮއް ދަން ގަޑީގައި؟ ދެން މަންމަ ނުނިދާ ކީއްތިކުރަނީ؟” ޔުމްނާ ބުންޏެވެ. “މަ…މަންމައަށް ނުނިދިގެން….މިއުޅެނީ….” ހުސްނާ ދޮގެއް ހަދާލިއެވެ.

“މިހާރު އެނގިއްޖެއެއްނު އަހަރެން ނުނިދާކަން. ދެން އެހެންވީމަ ނުކުމޭ އަހަރެންގެ ކޮޓަރިން.” ޔުމްނާ އަމުރުކުރާ ފަދައަކުން ބުންޏެވެ. ހުސްނާ ހައިރާންވިއެވެ. ދުވަހަކުވެސް މިހެން ޔުމްނާ ހުސްނާއަކާއި ވާހަކަ ދައްކާފައެއް ނުވެއެވެ. ނަމަވެސް ހިނދިރުވާލުމަށްފަހު ހުސްނާ ކުޑަކުއްޖެއްހެން ޔުމްނާގެ ކޮޓަރިން ނުކުތެވެ.

ހުސްނާ ކޮޓަރިން ނުކުތުމުން ޔުމްނާ ގޮސް ރީތިވާ މޭޒުގައި ހަރުކޮށްފައި އިން ލޯގަނޑު ކައިރީގައި ހުއްޓުނެވެ. އޭރު ޔުމްނާގެ މުށި ކުލައިގެ ކަޅި ދިޔައީ މަޑުމަޑުން އަނގުރު ކުލައަށް ބަދަލުވަމުންނެވެ. ޔުމްނާ އެއް މިޔަކަނުން ހީލިއެވެ. “މިފަހަރު މި އާއިލާ މުޅިން ސުންނާފަތި ކޮށްފަ ނޫނީ ދުލެއް ނުކުރާނަން…” ޔުމްނާ މިހެން ބުނި އިރު ޔުމްނާގެ އަޑު ހުރީ ބަރުވެފައެވެ.

***

ހުސްނާ އޭނާގެ ކޮޓަރިއަށް ވަދެ ގޮސް އެނދުމަތީގައި އިށީން އިރު ވެސް އޭނާގެ ބޮލުގެ ތެރޭގައި އެނބުރެމުން ދިޔައީ ދެންމެ ޔުމްނާ ވާހަކަ ދެއްކި ގޮތެވެ. އެއީ ހަމަ އޭނާގެ އުފަން ދަރިފުޅު ހެއްޔެވެ؟ ނޫނީ….

ކުއްލިއަކަށް މީހަކު ކޮޓަރި ދޮރުގައި ޓަކި ޖެހުމުން ހުސްނާ ދިޔައީ ސިއްސައިގެންނެވެ. އެނދުން ތެދުވުމަށްފަހު ދޮރު ހުޅުވާލިއިރު ކުރިމަތީގައި ހުރީ ޔައުޤޫބެވެ.

“އެ ކޮއި ރަނގަޅުތަ؟” ޔައުޤޫބު އެ އެހީ ޔުމްނާގެ ވާހަކައެވެ. ހުސްނާ ވަގުތުން ބޯ ހޫރާލިއެވެ. “އަހަރެން ދިޔަ އިރުވެސް އޭނާ އިނީ ހޭލާ. އަހަރެންނާއި ވާހަކަ ދެއްކީ ވެސް ވަރަށް ފާޑަކަށް..” ހުސްނާ ބުންޏެވެ. “މިރޭ އެ ސަލާމަތްވި ޖިންނި އަނބުރާ އެއްބަސްވުމަށް ގެނައުމަކީ އަހަރެންނަށް ކުޅަދާނަ ކަމެއް ނޫން. އަހަރެން ލަފާ ދޭނީ ހުވަދޫ އިން ބަޔަކު ގެންނަން”. ޔައުޤޫބު ބުންޏެވެ. ހުސްނާ އެއްވެސް އެއްޗެއް ނުބުނެ ބޯ ޖަހާލިއެވެ. އޭނާ އަދިވެސް ހުރީ ދެންމެ ދިމާވި ކަންތައްތަކާއި މެދު ފިކުރު ބޮޑުވެފައެވެ. “އެއްޗެއް އަހާލަންތަ؟” ކުއްލިއަކަށް ޔައުޤޫބު ބުންޏެވެ. ހުސްނާ ވަގުތުން އެލާޓަށް އައެވެ. “އަނެއްކާ ކިހިނެއް ވީ؟” ހުސްނާ ހިތް ނުތަނަވަސްވެފައި ހުރެ އެހިއެވެ.

“ހުސްނާ އެ ޖިންނިއާއެއްކޮށް ކޮން އެއްބަސްވުމަކަށްތަ ދެމީހުން އެއްބަސްވީ؟” ޔައުޤޫބު އެހިއެވެ. ހުސްނާ ފުން ނޭވާއެއް ދޫކޮށްލިއެވެ. “މި ގަޑީގައި އަހަރެންނަކަށް ތި ވާހަކަ  ތަފްސީލުކޮށް ކިޔައިދެވޭކަށް ނެތް. އެކަމަކު…..އަހަރެން އެއްބަސްވީ އޭނާގެ ފަރާތުން މަދަދު ލިބުމަށް”. ހުސްނާ ކޮޓަރި ތެރެއަށް ނަޒަރު ހިންގާލަމުން ބުންޏެވެ.

“ކޮންޗެއް ހޯދަން؟” ޔައުޤޫބު ވަގުތުން އެހިއެވެ.

“……އާރާއި ބާރު. މީހުންގެ ޤަދަރު. މީހުންގެ އިހްތިރާމް. މީހުންނަށް….އޮޅުވާލަން.” ހުސްނާ ބުންޏެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.