ތިޔަ ލޯތްބަށް އެދެވޭތީ… (ބޯނަސް އެޕިސޯޑް)

ނޯޓް: މިއީ ބައެއް ކިޔުންތެރިންގެ އެދުމުގެ މަތިން ޝަޔާމް އާއި ޔަލީން، އަދި ޒައުލް އާއި އާރާގެ ދިރިއުޅުުގެ ބޮޑު ހިއްސާއެއް ވެސް ހިމެނޭ ގޮތަށް ގެނެސްދޭ އިތުރު (ބޯނަސް) އެޕިސޯޑެކެވެ.

**ތިން އަހަރު ފަސް**

“މިހާ ހިސާބުން މިގަޑީގެ ޚަބަރުތައް ދަންނަވާ ނިމުނީ.. ޚަބަރު ބެއްލެވީތީ ޝުކުރިއްޔާ.. އެންމެ ބޭފުޅުންނަށް ވެސް ބާއްޖަވެރި، އަމާން، ރައްކާތެރި ރެޔަކަށް އެދެމުން ވަކިވެލަން.. ވައްސަލާމުޢަލައިކުމް ވަރަޙްމަތުﷲ ވަބަރަކާތުހް..” އެންމެ ފުރިހަމަ ހިނިތުންވުމަކާއި އެކު ޔަލީން އަލްވަދާޢު ކިޔައިލުމާއެކު، ކެމެރާތަކުގެ ފްލެޝް ކެނޑިގެން ދިޔައެވެ. އެއާއެކު ފުން ނޭވާއެއް ދޫކޮށްލަމުން، ޔަލީން ގޮނޑިން ތެދުވެ ލައިގެން ހުރި ކޯޓުގައި ޖަހާފައި އިން ކުޑަ މައިކް ނައްޓައިލިއެވެ.

“މަންމީ!!” ތަންކޮޅެއް ދުރުން ގޮވައިލި އަޑާއި އެކު ޔަލީންގެ ތުންފަތަށް ވަގުތުން ހިނިތުންވުމެއް ވެރިވިއެވެ. އޭރު ސްޓޫޑިއޯ ތެރޭގައި ހުރި ޝަޔާމްގެ އުރުގައި އިން ދެ އަހަރުގެ ކުޑަކުޑަ ޝެލިން އެންމެ މައުސޫމު ހިނިތުންވުމަކާއި އެކު އަތް ޖަހަޖަހާފައި ހެމުން ދިޔައެވެ. ޝެލިން އުރާލައިގެން ހުރި ޝަޔާމް ވެސް ހިތްގައިމު ހިނިތުންވުމެއް ތުންފަތަށް ވެރިކޮށްލަމުން، އެ ދަރިފުޅުގެ ދޮންދޮން ކޯތާފަތުގައި ތުންފަތް ޖައްސައިލިއެވެ.

“ބައްޕިއާ ދެކުދިން ސްޓޫޑިއޯ އަށް އައި ރެޔެއްތަ..؟” އައި ގޮތަށް އައިސް ޝެލިން އުރައިލަމުން ޔަލީން އަހައިލި އިރު، އެ ހިތް އުފަލުން ފުރެމުންދާ ކަހަލައެވެ.

“މަންމިއަށް ސަޕްރައިޒްއެއް ދޭން ވެގެން ބައްޕިއާ ދެކުދިން ހެދި ޕްލޭން އެކޭ މީ ދޯ ޝެލީ..؟ އެހެން ނޫނަސް ޝެލީ ބުނީ މަންމި ޚަބަރު ކިޔާތަން ޓީވީ އިން ބެލުމަށް ވުރެ ސްޓޫޑިއޯއަށް އައިސް ބެލުން މާ ސަޅިއޯ.. ދޯ ބައްޕި ދޫނި..؟” ޝެލިންގެ ކޮލުގައި ހިފައިލަމުން ޝަޔާމް އަހައިލުމާއެކު ޝެލިން ވަގުތުން ލައްބައޭ ކިޔައި ޔަލީންގެ ކަރުގައި އޮޅުލައިގަނެފިއެވެ.

“ދެން ހިނގާ ދޯ އަވަހަށް ގެއަށް ދާން.. މިރޭ ފެމިލީ ޑިނަރ ވެސް އެބަ އޮތެއްނު.. މިހާރު އާޒް ހުންނާނެ ޝެލީ ނައިސްގެން..” ފުރާނަ ފަދައިން ލޯބިވާ ދަރިފުޅުގެ ކުޑަކުޑަ ހަށިގަނޑުގައި ބައްދައިލަމުން ޔަލީން ބުނެލިއެވެ.

“ޔޭސް މަންމި ޝެލީ ބޭނުން އާޒް ކައިލިއަށް ދާން.. ޒާލު ދޮންބެއާ ޔަޒޫ ދޮންތި ވެސް އަންނާނެ ދޯ..؟” އާރިޒްގެ ވާހަކަ ހަމަ ބުނުމާއި އެކު ޝެލީން އޭނާގެ ތުއްތުތުއްތު މައުސޫމު ބަހުރުވައިން ބުނެލިއެވެ. ޝެލީނަށް އެރި ފޯރި ފެނުމާއި އެކު ޔަލީން އާއި ޝަޔާމް ކައިރިއަށް ވެސް ހިނި އައެވެ.

“އައިމް ސޯ ޕްރައުޑް އޮފް ޔޫ ޑާރލިން.. ހާދަ ހާދަ އުފަލެއް ވެޔޭ މިއަދު ޔަލްގެ ހުވަފެންތައް ހާސިލްކުރާތަން ފެނުނީމަ.. ޓީވީން ފެންނަ ކޮންމެ ފަހަރަކު އުފަލުން ހިނިތުންވެވޭ.. ޔަލް ދައްކާފަ އެންމެން ކައިރި ބުނާހިތްވޭ އެއީ އަހަރެންގެ އަނބިމީހާއޭ..” ޔަލީންގެ ނިތުގައި ބޮސްދެމުން ޝަޔާމް ކޮށްލި ތަޢުރީފުން ޔަލީނަށް ހިނިތުންވެވުނެވެ.

“ޝަޔާމްއާ ނުލައި އަހަންނަށް މިއިން އެއްވެސް ކަމެއް ނުކުރެވުނީސް.. ތެންކްޔޫ ސޯ މަޗް ބޭބީ، ފޯރ އޯލްވޭޒް ބީއިން ދެއަރ ފޯރ މީ އެންޑް ސަޕޯޓިން މީ.. އައި ލަވް ޔޫ ސޯ މަޗް.. އަހަންނަށް އަބަދުވެސް އެދެވޭ ލޯތްބަކީ ތީ..” އުރުގައި އިން ޝެލިންއާއި އެކު ޝަޔާމްގެ މޭތެރެއަށް ބޮނޑިވެލަމުން ޔަލީން ބުނެލީ ހިތުގެ އަޑިންނެވެ. ކުޑައިރުއްސުރެ ދުށް ހުވަފެން މިއަދު ކާމިޔާބު ކުރެވުނީ، ހަގީގަތުގައި ވެސް އޭނާގެ ފިރިމީހާ ދިން ހިތްވަރުގެ ސަބަބުންނެވެ. ދެގޮތެއް ނުވެ އަބަދުވެސް ކައިރީގައި ހުރެ، އޭނާ ދެކެ ޝަޔާމް ވީ ލޯބީގެ ވަރުގަދަ ކަމުންނެވެ.

“އައި ލަވް ޔޫ މޯރ ޑާލިން.. ޔަލްއާ އަހަރެމެންގެ ލޯބިލޯބި ޝެލީއާ އެކީ އަހަރެންގެ މުޅި ދިރިއުޅުން ފުރިހަމަވެއްޖެ.. އިންޝާﷲ ދުވަހަކުވެސް ވަތްކެއް ނުވާނަން.. އަބަދުވެސް، އަހަންނަށް އެންމެ މުހިއްމު ވާނީ ޔަލް.. އެއީ ޔަލްއަށްޓަކައި ވަޤުފުވެފައިވާ އަހަރެންގެ މި ހިތަށް އަބަދުވެސް ތިޔަ ލޯތްބަށް އެދެވޭތީ..” ޔަލީން އާއި ޝެލިންގެ ގައިގައި އެކީ ދެ އަތް ވަށައިލަމުން ޝަޔާމް އިއްވައިލީ އެ ހިތުގެ އަޑެވެ.

ޝެލިންއަށް ޔަލީންގެ އަތުތެރޭގައި އިނދެވުނީ އިރުކޮޅަކަށެވެ. ދެތިން މިނެޓު ފަހުން ބައްޕި ކައިރިއަށް ދާށޭ ކިޔައި، ޝަޔާމްއާ ދިމާއަށް އަތް އުކަން ފެށުމުން ޝަޔާމް ޝެލިން އުރައިލިއެވެ. ކަނާއަތުން ޝެލިންގެ ކުޑަކުޑަ ހަށިގަނޑު ޝަޔާމް ހިފަހައްޓައިލުމާއެކު، ޔަލީން ޝަޔާމްގެ ވައަތުގެ މުލައްދަނޑީގައި ހިފައިލިއެވެ. އެ ކުޑަކުޑަ ޢާއިލާ އެކުގައި ސްޓޫޑިއޯއިން ނުކުމެގެން ދިޔަ އިރު، އެ ޢާއިލާގެ ފުރިހަމަކަމަށް ތައުރީފު ނުހޮވޭ އެއްވެސް ދުލެއް ނެތެވެ.

*** ** ***

“އާޒް ދަރިފުޅު ދެން އާދޭ އަވަހަށް ކާން..” އާރިޒްގެ ފަހަތުން ދުވަމުން އާރާ ގޮވަމުން ދިޔަ އިރުވެސް، އާރިޒަށް އިވޭ ކަމަކަށް ވެސް ނުވެއެވެ. އެންމެ ފަހުން އާރާއަށް އާރިޒް އަތު ނުވުމުން ތަންކޮޅެއް ބާރަށް ޒައުލްއަށް ގޮވައިލީ، ދެން އާރިޒް އަތުވާނީ ޒައުލްއަށް އެކަނިކަން އެނގޭތީއެވެ.

“އާނ މި އޮތީ ބައްޕި ދޫނި އަތުލާފަ.. ދެން ކޮންތާކަށް ދަރިފުޅު ދާނީ..؟” އާރިޒްގެ ކުޑަކުޑަ ހަށިގަނޑު އުރައިލާފައި، މައްޗަށް ހިއްލައިލަމުން ޒައުލް ބުނެލިއެވެ. ޒައުލްގެ އެ ޢަމަލުން މަޖާވީ ވަރުން އާރިޒްގެ ލޯބިލޯބި މައުސޫމު ހުނުމުގެ އަޑު އިވިލިއެވެ. އެއާއެކު ޒައުލް އާއި އާރާގެ ތުންފަތަށް ވެސް ހިނިތުންވުމެއް ވެރިވި އިރު، އާރިޒް ލޯބިކަމުން ދެމީހުންގެ ހިތް ވެސް ފުރިގެން އައި ކަހަލައެވެ.

“އިރުތަކެއް ވެއްޖޭ އާޒްއަށް ކާން ނުދެވިގެން އުޅޭތާ.. ދެން ހިނގާ އަވަހަށް ކާން ދާން.. އާދޭ މަންމި ލޯބީ..” ޒައުލްގެ އަތުތެރޭގައި އިން އާރިޒް އާދޭތޯ އާރާ އަތް ދިއްކޮށްލުމާއެކު، އާރިޒް ޒައުލްގެ ކަރުގައި އޮޅުލައިގަތީ ކާން ބޭނުން ނުވާތީއެވެ.

“އާޒް ކާނީ ޝެލީ އައިމަ މަންމީ ދެން ޕްލީޒް..” ޒައުލްގެ ކޮނޑުގައި މޫނު ފޮރުވާލައިގެން އޮވެ އެހެން ބުނެލި އިރު، އާރިޒަށް ގިސްލެވެން ފަށައިފިއެވެ.

“ދެން އާޒް ދަރިފުޅު ނުރޯނެޔޭ.. އެހާ ކުދިކުދި ކަންކަމުގަ ކުދިން ނުރޯނެ ދޫނި.. އަވަހަށް ހުއްޓައިލާ.. ތީ މަންމިގެ ސްޓްރޯންގް ބޯއިއެއްނު..” އާރިޒް ރޯން ފެށުމާއި އެކު، ދަރިފުޅުގެ ބުރަކަށީގައި ފިރުމައިލަމުން އާރާ ބުނެލިއެވެ.

“އޯކޭ ދަރިފުޅު ކާނީ ޝެލީ އައީމަ.. ދެން އަވަހަށް ހުއްޓައިލާ..” އާރިޒްގެ ފަށުވިކޮޅެއް ފަދަ އިސްތަށިކޮޅުގައި ފިރުމައިލަމުން ޒައުލް ބުނެލީ، ފުރާނަ ފަދައިން ލޯބިވާ ދަރިފުޅު ހިތްހަމަޖައްސައިދިނުމަށެވެ. އެ ދަރިފުޅަށް ކުޑަ ނަމަވެސް ދެރައެއް ލިބުމަކީ، ޒައުލްގެ ހިތް އެކުގައި ޒަޚަމް ކޮށްލާނޭ ކަމެކެވެ. އެ ކުޑަކުޑަ ދެ ތުންފަތް ފޫއަޅުވައިލާފައި ނުކުންނަ އެންމެ ގިސްލުމުގެ އަޑަކުން ވެސް ޒައުލް މުޅިން ބަލިކަށި ކޮށްލާ ފަދައެވެ.

ޒައުލް އޭނާ ބޭނުންވާ ގޮތަށް ކަންތައް ކުރުމުގެ ހުއްދަ ދިނުމާއި އެކު، އާރިޒް ހީވީ ދެޢީދު އެއްފަހަރައި ލައިގަތް ހެންނެވެ. ޒައުލްގެ ކޮލަށް ދޮނެއް ދެމުން އެ އަތުތެރެއިން މިނިވަން ވުމަށް ގަދަ ހަދައިލިއެވެ. އެއާއެކު ޒައުލް އާރިޒް ތިރީގައި ބެހެއްޓުމުން، އަނެއްކައިވެސް ހީހީފައި ދުވަން ފަށައިފިއެވެ.

“ދެން ޒައުލް އަބަދު ތިހެން ހަދަންޏާ އާޒް އެންމެ ފަހުން ހަމަ ހަލާކު ވާނީ.. ބުނާހައި ކަމެއް ކޮށްދޭ އެއްޗެއް ނޫނޭ..” ޒައުލް ކަންތައް ކުރި ގޮތުން ހިތްހަމަނުޖެހިފައި ހުރެ، އާރާ މޫނު ކުނިކޮށްލިއެވެ. އާރިޒް ދެކެ ޒައުލް ވާ ލޯތްބަކީ އާރާއަށް ވެސް، އަދި އެމީހުންނާ އެކުގައި އުޅޭ އެހެން މީހަކަށް ވެސް އޮޅިފައިވާ އެއްޗެއް ނޫނެވެ. އެހެނަސް އާރާ ބިރުގަންނަނީ މިހާރު ބުނާހާ ކަމެއް ކޮށްދީގެން ފަހުން ގޮތްދޫނުކުރާ، ބޯހަރު ކުއްޖަކަށް އާރިޒް ވެދާނެތީއެވެ.

“އިޓްސް އޯކޭއޭ ލަވް.. އަހަރެމެންގެ އާޒްއަކަށް އެހެންނެއް ނުވާނެ.. އެހެންނޫނަސް އަހަންނަށްވުރެ ބޮޑަށް ޔައިބެމެންނާ މަންމަމެން މިހާރު ވެސް އާޒް ސްޕޮއިލް ކުރޭ..” އާރާގެ އަތުގައި ހިފައި ގެނެސް އެ މޭގައި ޖައްސައިލަމުން ޒައުލް ބުނެލިއެވެ.

“ދެން އޯކޭ.. ޒައުލްހާ އާޒް ވެސް ބޯހަރު.. ހަމަ ބައްޕި ކަހަލަ ކުއްޖެއް!” ޒައުލްގެ ކޮލުގައި ހިފައިލަމުން އާރާ ބުނެލުމާއި އެކު ޒައުލްގެ ފިރިހެންވަންތަ ހުނުމުގެ އަޑު އިވިލިއެވެ.

“އަހަރެން ދެކެ އެހައި ލޯބިވާ، އަހަރެންގެ ދެވަނަ ކޮޕީއެއް ދުނިޔެއަށް ގެނެސްދިނީތީ އާރޫއަށް ވަރަށް ވަރަށް ބޮޑަށް ތޭންކްސް! އަހަރެންގެ އާރޫ ދެކެ އަހަރެން ވަރަށް ލޯބިވޭ..” އާރާގެ ނޭފަތުގައި ނޭފަތް ޖައްސައިލަމުން ޒައުލް ބުނެލިއެވެ. އެތައް އަހަރެއް ފަހުން، އަދިވެސް ޒައުލްގެ ދުލުން “އަހަރެންގެ އާރޫ” އޭ ބުނެލުމާއި އެކު އާރާގެ ހިތުގެ ހިނގުމަށް ބަދަލު އައިއްސިއެވެ. އެ ތުންފަތަށް އެފަދަ ދެވަނައެއް ނުވާ ފުރިހަމަ ހިނިތުންވުމެއް ވެރިކޮށްލައިފިއެވެ.

“ޒައުލްއާ އާޒް އަކީ އަހަރެންގެ މުޅި ދިރިއުޅުން.. އަހަރެން ވެސް ވަރަށް ލޯބިވޭ.. އަބަދުވެސް އަހަރެން ދެކެ ހަމަ ތިހާ ލޯބި ވައްޗޭ..” ޒައުލްގެ މޭތެރޭގައި ބޮނޑިވެލަމުން އާރާ ހާމަކޮށްލީ އެ ހިތުގެ އެދުމެވެ.

“އިންޝާﷲ އަބަދުވެސް.. އަހަންނަށް އަބަދުވެސް އެދެވޭ ލޯތްބަކީ ތީ.. އަބަދުވެސް ވާނީ އާރޫއާ އެކީ.. އެއީ އަހަންނަށް އަބަދުވެސް ތިޔަ ލޯތްބަށް އެދެވޭތީ..” އާރާގެ ހަށިގަނޑުގައި ދެއަތް ވަށައިލަމުން ޒައުލް ބުނެލީ އެ ހިތުގައި އޮތް ގޮތަށެވެ. ޒައުލްގެ ބަސްތަކުން ލިބުނު ހިތްހަމަޖެހުމެއްގެ ބޮޑުކަމުން އާރާގެ ތުންފަތުގައިވީ ހިނިތުންވުން ފުޅާވެގެން ދިޔަ އިރު، އަދިވެސް އިތުރަށް ޒައުލްގެ މޭތެރޭގައި ބޮނޑިވެލިއެވެ.

އެކަކުއަނެކަކުގެ އަތުތެރޭގައި ތިބި ދެމަފިރިންނަށް ސިހުމެއް ލިބުނީ ގޭގެ ބެލް އަޅައިލި އަޑު އިވިފައެވެ. އެހެނަސް އެދެމީހުންނަށް ވުރެ ކުރިން “ޝެލީ” އޭ ކިޔަމުން ގޮސް ދޮރު ހުޅުވައިލީ އާރިޒްއެވެ.

ކުރިމަތީގައި ތިބި ޔަލީން އާއި ޝަޔާމްގެ އަތުގައި ހިފާލައިގެން ހުރި ޝެލިން ފެނިފައި އާރިޒްގެ ހިނިތުންވުން އިތުރަށް ފުޅާވިއެވެ. ވަގުތުން ޝެލިންގެ އަތުގައި ހިފައިގެން ގޭތެރެއަށް ދުއްވައިގަތުމާއި އެކު، ދެކުދީންގެ ހުނުމުގެ އަޑު އެއްފަރާ އިވިލިއެވެ.

“ފޯރި ހުންނަ ދެމީހުންނޭ ދޯ..” ހިނިތުންވަމުން ޔަލީން ބުނެލުމާއި އެކު، ދެން ތިބި ތިން މީހުން ވެސް އެކަމާ އެއްބަސްވިއެވެ.

“އިރުތަކެއް ވެއްޖޭ ކާން ދޭން އުޅޭތާ.. އެކަމް ހަމަ ޝެލީ ނާންނަނީސް ނުކާނަމޭ ކިޔާފަ ބޮޑާހާކާލައިގެން އެ ހުންނަނީ..” އާރާ ބުނެލީ ސަކަރާތް ޖަހަމުން ދިޔަ އާރިޒް އާއި ޝެލިންނަށް ނަޒަރެއް ދެމުންނެވެ.

“ކޮބާތަ އަޒް ދޮންތިމެން..؟ އަދިވެސް ނާދޭ..؟” ޝަޔާމް އަހައިލުމާއި އެކު އާރާ ބޯޖަހައިލިއެވެ.

“އާދެވޭނީ ކަމަނާފާނަށް އަވަހަށް ތައްޔާރު ވެވިގެންނު.. ދެންމެ ޔައިބެ ގުޅާފަ ބުނެފި ކުޑަކޮށް ލަސްވެދާނެޔޯ.. މަހާރާނީ އަދިވެސް ނާނޭނޭފުޅު ފިއްލަވަނީއޯ.. ތުރުކުރައްވާނޭ ހެދުންކޮޅު ވެސް އިސްތިރި ކުރަން ޖެހުނީ މަށަށޯ..” ޒައުލް ބުނެލި ވާހަކައިން އެންމެން ކައިރިއަށް ވެސް ހިނި އައެވެ. އަޒަލްއާ ދިމާކޮށްލަން ލިބޭ ފުރުސަތެއް ޒައުލް ދުވަހަކުވެސް ދުލެއް ނުކުރާނެއެވެ. ފުރުސަތެއް ލިބޭ އިރަށް އަޒަލް ރުޅިއަރުވައިލުމަކީ އެންމެ ކުޑައިރުން ފެށިގެން މިއަދާ ހަމައަށް ވެސް ޒައުލްއަށް ބޮޑު އުފަލެއް ލިބޭ ކަމެއް ކަހަލައެވެ.

ޔައިލް އާއި އަޒަލްއަށް އެގެއަށް އާދެވުނީ އޭގެ ވިއްސަކަށް މިނެޓު ފަހުންނެވެ. އެދެމީހުން ހަމަ އައިސް ވަނުމާއި އެކު ޔަލީން އާއި ޒައުލް އެތިވަރު ގޮވައިގަތެވެ. ރައްދުގައި އަޒަލް ވެސް ފެންވަރުގެ ބަސްބަސް ބުނެލިއެވެ. އެ މަޖާ ކޯޅުންގަނޑު ބަލަން ތިބި ޔައިލްއާއި އާރާގެ އިތުރުން ޝަޔާމް ތިބީ ހިންޏާ ބިނދިފައެވެ.

“ދެން މަށަށް އެނގޭ މި އަންހެނާއާ ޒުވާބު ކޮށްގެން މޮޅެއް ނުވާނެކަން.. ރާއްޖޭގަ ހުރި އެންމެ ގާބިލު އެއް ވަކީލު.. މަށަށް ކޮން މޮޅެއް ވެވޭނީ..” ޒައުލް ބުނެލީ ދެރަ ގަބޫލު ކުރަމުންނެވެ.

“ކިރިޔާވެސް ކަމެއް ވަންޏާ ވާނީ ޔަލްއަށް.. މޮޅު ނޫސްވެރިއެއް ވިއްޔަ.. އަނގައިގަ ވަރު ހުންނާނީ ދޮންތި އެކަންޏެއް ނޫނޭ..” އާރާ ވެސް ބައިވެރި ވިއެވެ.

“ނޫނޭ މަށަކަށް ނެތޭ ދޮންބެދައްތައާ ދިމާއަށް އެއްޗެކޭ ބުނެވޭކަށް.. އަހަންނަށް އެންމެ ފަސޭހައިން ގާނޫނީ ދާއިރާގެ ހަބަރުތައް ދޭ ކަންމަތި އާންޓީ ވިއްޔަ އެއީ.. މީނާ ނެތް ނަމަ ކިހިނެއްތަ އެހައި މޮޅު ރިޕޯޓުތައް އެހައި ފަސޭހައިން މަ ލިޔާނީ..” ޔަލީން ބުނެލުމާއި އެކު އެންމެން ވެސް ހޭން ފަށައިފިއެވެ.

ހަގީގަތުގައި ވެސް އަޒަލް އާއި ޔަލީން ގުޅިގެން ކުރާ މަސައްކަތްތަކަކީ ގައުމުގެ ގިނަ ބައެއްގެ ސަމާލުކަން ހޯދާފައިވާ ކަންތައްތަކެވެ. އެތައް ބަޔަކަށް އިންސާފު ހޯދައިދިނުމުގައި އެދެމީހުން ގުޅިގެން ވަނީ އެތައް މަސައްކަތްތަކެއް ކޮށްފައެވެ. ޔަލީން މަސައްކަތް ކުރަނީ ގާނޫނީ ދާއިރާގެ ނޫސްވެރިއެއްގެ ގޮތުގައި ކަމަށް ވުމުން، އަޒަލް ފަދަ އެވަނަ ދެވަނައެއް ނެތް ކުޅަދާނަ ވަކީލެއްގެ އެހީތެރިކަން ވެފައިވަނީ ރަނަށް ވުރެ އަގުހުރި އެއްޗަކަށެވެ. މީގެ ހަތަރު އަހަރު ކުރިން “ނިޔާމަ” ޓިވީ ޗެނަލްގައި ޔަލީން ފެށި ދަތުރުގެ މިހައި ހިސާބަށް އާދެވުނު އިރު، މިއަދު އޭނާ އަކީ ސީނިއަރ ޖަރނަލިސްޓެކެވެ. މިއަދު ޔަލީން މުހައްމަދު މިލާންގެ ނަން ބުނުމުން އެއީ ކާކުކަން ނޭނގޭ އެއްވެސް މީހަކު މި ދިވެހިރާއްޖޭގައި ނުހުންނާނެ ކަން ގައިމެވެ.

ޔައިލް ވެސް މިއަދު އޭނާގެ ބައްޕަގެ ކުންފުންޏާ ހަވާލުވެފައިވާ އިރު، ދުވަހަކަށް ވުރެ ދުވަހެއް ވިޔަފާރި ދަނީ ފުޅާވަމުންނެވެ. ޔައިލް ސީއީއޯގެ ގޮތުގައި ހުރެ، އަދި ޒައުލް ސީއޯއޯގެ ގޮތުގައި ހުރެ، އެ ކުންފުންޏަށް ގިނަގުނަ ކާމިޔާބީތަކެއް ވަނީ ހޯދައިދީފައެވެ. “އެމް ވައި ޓެކް ކޮމްޕެނީ” އަކީ މިއަދު ބައިނަލްއަޤުވާމީ ލެވެލްގައި ފުޅާވަމުން އަންނަ، ދިވެހިރާއްޖޭގެ އެންމެން ވެސް ދަންނަ، އެންމެ މަޝްހޫރު އެއް ކުންފުންޏެވެ.

އާރާ ވެސް މިއަދު ކެއަރލޫޕް ހޮސްޕިޓަލުގައި ރެޖިސްޓަރޑް ނަރުހެއްގެ ގޮތުގައި މަސައްކަތް ކުރަމުން ދާ އިރު، އެ މަޑުމައިތިރިކަމާއި ހިތްހެޔޮ ކަމުން އެތައް ބައެެއްގެ ހިތްތައް ވަނީ ފަތަޙަ ކޮށްފައެވެ.

ޝަޔާމަކީ މިވަގުތު ރާއްޖޭގެ ސިފައިންގެ ޚިދުމަތުގެ ތެރެއިން އެންމެ ފާހަގަ ކޮށްލެވޭ އެއް ނަމެވެ. އޭނާގެ ފަރުވާތެރިކަމާއި، ޒިންމާދާރު ކަމާއި، ހަރުދަނާކަމުން އެތައް ބައެއްގެ ލޯތްބާއި އިހުތިރާމާއި އިތުބާރު ޝަޔާމް ވަނީ ހާސިލް ކޮށްފައެވެ.

އެންމެންގެ ހުވަފެންތައް ވެސް މިއަދު ހަގީގަތަކަށް ވެފައިވާ އިރު، އެކަމުގެ ފޮނިމީރުކަން އިހުސާސް ނުކުރެވޭ އެއްވެސް ހިތެއް ނެތެވެ. އެންމެ ލޯބިވާ މީހުންނާ އެކީ ދިރިއުޅުމުގެ ހަރުފަތްތައް ގިރާކޮށް، ކާމިޔާބީއާ ހަމައަށް ވާޞިލްވާނޭ ފުރުސަތު ލިބުމަކީ، ދެއްވި އަގުރުހުރި ނިޢުމަތެއް ކަމަށް އެ އެންމެން ވެސް ދެކެއެވެ.

އަޒަލްމެން އެކިއެކި ވާހަކަތައް ދައްކަމުން ދިޔަ އިރު، ކުދިވެރީން އުޅެމުން ދިޔައީ އެކުދީންގެ އަމިއްލަ ދުނިޔޭގައެވެ. ޔަޒާލް އާއި ޔަޒާ ދެން ތިބި ދެކުދީންނަށް ވުރެ ބޮޑުވުމުން، އެދެކުދިން އުޅެމުން ދިޔައީ ޝެލިން އާއި އާރިޒަށް ބަލަމުންނެވެ. އެހެނަސް ޔަޒާ ބައެއް ފަހަރު އާރިޒް ޖަހާ ސަކަރާތުގައި ބައިވެރިވެ، އާރިޒަށް ވުރެ ވެސް ސިޔާސަ ވެލައިގެން އުޅެއެވެ. އެދެކުދިން އުޅޭ ގޮތުން ދެކުދިންނަށް ކަމެއް ވެދާނެތީ ޔަޒާލް ހުންނާނީ ހާސްވެފައެވެ. ޝެލިން މަޑުމަޑުން ހުރި ނަމަވެސް، ބައެއް ފަހަރު މަޖާވެގެން ހީހީފައި ޔަޒާ އާއި އާރިޒަށް ހިތްވަރު ދޭނެއެވެ.

އެކުއެކީގައި އުޅެބޮޑުވި މި ހަތަރު ކުދިންގެ މެދުގައި އޮންނަނީ ދެބެންގެދެދަރި ކަމުގެ ގުޅުމަށް ވުރެ ބޮޑަށް، އެއްބަނޑުއެއްބަފާވަންތަ ކަމުގެ ގުޅުމެވެ. ޔަޒާލާއި ޔަޒާ އަކީ ފެށުނީއްސުރެ ވެސް އާރިޒް އާއި ޝެލިންގެ ދޮންތި އާއި ދޮންބެއެވެ. ހުރިހައި ކުދިން އެހައި ކުޑަ އިރުވެސް، އެއް ކުއްޖަކު އަނެއް ކުއްޖަކު ދެކެ ވަނީ އަމަށަކު ލޯތްބެއް ނޫނެވެ.

“މަންމަމެން ގުޅި މިއަދު.. އެންމެން އެއްކޮށް ތިބެގެން ގުޅީ.. ވަރަށް ވާހަކަ ދެއްކި.. ބޭބީސްކޮޅު މަތިން މިސްވާ ވާހަކަ އެންމެ ގިނައިން ދެއްކީ..” އަޒަލް ދެއްކީ ޔައިނާމެންގެ ވާހަކައެވެ. ދާދި އިހަކަށް ދުވަހު އެންމެން ރިޓަޔަރ ވުމުން، އަޒަލްމެންގެ ފަރާތުން އެ ހަ މީހުންނަށް ހަދިޔާއެއްގެ ގޮތުން ޢުމްރާ ދަތުރެއް ހަމަޖެއްސީ، ދަތުރުގެ ހުރިހައި ޚަރަދެއް އަޒަލްމެން ހަ މީހުން ވެގެން ހަމަޖައްސާ ގޮތަށެވެ. މިލާން، ޔައިނާ، އަފާން، ޒާރާ، އަޒާން އަދި ލައުރާއާ ހަ މީހުން އެއްކޮށް ޢުމްރާގެ މަތިވެރި އަޅުކަން އަދާކުުރުމަށް ދާން ލިބުމުން އެ އެންމެން ވެސް ތިބީ އުފަލުން ފޮޅިފައެވެ. މަންމަމެންގެ މޫނުމަތިން އެ ހިނިތުންވުން ދުށުމަށްޓަކައި ޤުރުބާންވާން ތައްޔާރަށް ތިބި ދަރީންތައް ތިބީ، އެ ހިތްހަމަޖެހުން ހޯދައިދެވުނީތީ ނުހަނު އުފަލުންނެވެ.

“މަންމަމެން ގުޅާ ކޮންމެ ފަހަރަކު ދައްކާނެ ކުދިންކޮޅު މަތިން މިސްވާ ވާހަކަ.. އެހެންޏާ ފަހެ އާދައިގެ ލޯތްބެއް ނޫނޭ އެކުދިން ދެކެ ވަނީކީ.. މިހާރުވެސް އެބަ އުޅޭ މި މީހުންނަށް އަންނައުނާ ކުޅޭ އެއްޗެއްސާ އެއްޗެހި ގަނެދީގެން.. އަދި ޔަޒޫއަށާ ޝެލީއަށް ހުސް ރަން ޖުވެލަރީސް ގަނެފަ ހުރި އެތަނުން.. ހަމަ ހުވާ މަންމަމެން އެކުދިން ސްޕޮއިލް ކުރާ ވަރުން ވެސް ނެތް އުޅެވޭކަށް.. ބުނާހާ އެއްޗެއް އެބަ ގަނެދެޔޭ..” ޔަލީން ދެއްކި ވާހަކައާ އެންމެ ފުރަތަމަ ވެސް އެއްބަސްވީ އާރާއެވެ.

“އަދި ވަކި މީހެއްގެ ދަރިއެއް ބަލައިލުމެއް ވެސް ނޯވެޔޭ.. ގެންނަންޏާ ހަދިޔާ ގެނެސްދޭނީ ވެސް ހަތަރު ކުދިންނަށް އެއްކޮށް..” އާރާ އެހެން ބުނި ނަމަވެސް އެ އަޑުގައިވީ އުފާވެރިކަމެވެ. އެއްވެސް ކުއްޖަކާއި މެދު ތަފާތުނުކޮށް ޔައިނާމެން އަބަދުވެސް ކަންތައް ކޮށްދޭތީ، އެ ހަ މީހުން ނުހަނު ހިތްހަމަޖެހެއެވެ. ހުރިހައި ކުދިންނަކީ ވެސް އެމީހުންގެ އަމިއްލަ މާމަކާފަ ދަރިން ކަމުގައި ދެކިގެން އުޅޭތީ، ފެންނަ އާއިލީ މަންޒަރުތައް އަބަދުވެސް ނުހަނު ފުރިހަމައެވެ. ޝެލިން އާއި ޔަޒާގެ އިތުރުން ޔަޒާލް ވެސް އަޒާން އާއި ލައުރާއަށް ކުޑަމާމަ ކުޑަކާފަ ކިޔާ އިރު، އާރިޒް ވެސް ޔައިނާ އާއި މިލާންއާ މުޚާތަބު ކުރަނީ ހަމަ އެހެންނެވެ. ހައްތަހައި ވެސް ދަރީން ކަމުގައި ދެކިގެން އެންމެން ވެސް އުޅޭތީ، އެ ތުއްތުތުއްތު މައުސޫމު މޫނުތަކުން އަބަދުވެސް ފެންނަނީ ހިނިތުންވުމެކެވެ.

ޔައިނާމެން އެކުދީންނާއި އެކީ އުޅޭ ވަގުތުތަކުގައި ޝަޔާމް އޭނާގެ ބައްޕަ މަތިން ހަނދާން ވަނީ އިންތިހާއަށެވެ. ޝިޔަލް މިއަދު ދުނިޔޭގައި ހުރި ނަމަ އޭނާގެ ޝެލިންއަށް އުނި ނުވާ ވަރަށް ކާފައެއްގެ ލޯބި ދިނީސްކަން ޔަގީނެވެ. ލޯބިން އެ ދަރިފުޅުގެ ހިތް ފުރައިލަދިނީސްކަން ގައިމެވެ. އެ ދަރިފުޅަށް ޓަކައި މުޅި ދުނިޔެ ވެސް ހޯދައިދިނީހެވެ. އެހެނަސް، ތަގުދީރު އޭނާގެ ބައްޕައަށް އެ ފުރުސަތު ނުދިނީއެވެ. އެހެނެއްކަމަކު، ޖަންނަތުން ބައްޕައާ ދިމާވެ، އޭނާގެ ކުޑަކުޑަ ދަރިފުޅާ ބައްޕައާ ޖަންނަތުން ބައްދަލު ކޮށްދެއްވުން އެދި ޝަޔާމް އަބަދުވެސް ދުޢާ ކުރެއެވެ. ބައްޕައަށް ޓަކައި ޝަޔާމްގެ ދުލުން އަބަދުމެ ބޭރުވަނީ ތައުރީފާއި، ހެޔޮ ދުޢާއެވެ.

“ދެން އެކަމް ދުވަސްކޮޅަކުން ހަތަރު ކުދިންނެކޭ ނުކިޔޭނެ.. ދެން ކިޔަން ޖެހޭނީ ފަސް ކުދިން..” ކުއްލިއަކަށް ޔައިލް ބުނެލި ވާހަކައަކުން އެންމެންގެ ބަސް ހުއްޓުނެވެ. އެންމެން ވެސް ޔައިލް ބުނި އެއްޗެއް ނަގައިގަންނަން މަސައްކަތް ކުރަމުން ދިޔަ އިރު، ޔައިލް އާއި އަޒަލް އިނީ ހީލަހީލައެވެ.

“ދޮންތި.. ބަނޑުބޮޑުތަ..؟” އެންމެ ފުރަތަމަ ހަރަކާތް ކުރަން ފެށީ އާރާގެ ހިއްސުތަކެވެ. ފުޅާ ހިނިތުންވުމަކާއި އެކު އަޒަލް ބޯޖަހައިލުމުން އެންމެން އެއްފަރާ އަރައިގަތް ފަދައެވެ. އަޒަލް އާއި ޔައިލްއަށް މަރުޙަބާ ކިޔައި، ސަލާމްކޮށް، ބައްދަބައްދާފައި އުޅުނު އިރު އެންމެން ވެސް ތިބީ ހިތުގެ އަޑިން އެދެމީހުންނަށް ޓަކައި އުފާވެފައެވެ.

“ޔަޒޫއާ ޒާލުއަށާ ވަރަށް ފޯރި އަރާނެ ދޯ..” ހިނދުކޮޅެއްގެ އުފާވެރިކަމަކަށް ފަހު ޝަޔާމް ބުނެލިއެވެ.

“އާނ.. އެކަމް އަދި އެދެކުދިން ކައިރިޔަކު ނުބުނަން.. އަހަރެމެންނަށް ވެސް އެނގުނީ އިއްޔެ..” އަޒަލްގެ މޫނުމަތީގައިވީ ނުފިލާ ފަދަ ހިނިތުންވުމެކެވެ. ޔައިލް ވެސް ހުރިހައި ދަތްތަކެއް ފެންނަ ވަރަށް ހީލައިގެން އިން އިރު، ބައްޕަ ކިޔާނޭ ތިންވަނަ ދަރިއަކު ލިބެން އުޅޭތީ އެ ހިތް ވަނީ އުފަލުން ފުރިފައެވެ.

“މި ފަހަރު ކޮން ކަހަލަ ކުއްޖެއްބާ.. ދެން އޯކޭއެއްނު ކޮންމެ ކަހަލަ ކުއްޖަކަސް.. މިހާރުވެސް ވައްތަރަކުން އެކެއް އެބަ ތިބި ވިއްޔަ.. ޔައިބެ ހަމަ ކުޅަދާނައީއޭ!” ޒައުލްގެ ވާހަކައިން އެންމެން ކައިރިއަށް ހިނި އައި އިރު، އަޒަލް ލަދުން އިނދެފައި ވެސް ޒައުލްގެ ގައިގައި ބޮނޑިއެއް އަޅައިފިއެވެ. ދެން އެތަނުގައި ދެކެވެން ފެށީ މުޅީން ވެސް އެ ވާހަކައެވެ. އާރާ އާއި ޔަލީން އަންހެން ކުއްޖަކު ބޭނުންވެގެން އެ ވާހަކަ ފެށި އިރު، ޒައުލް އާއި ޝަޔާމް ފިރިހެން ކުއްޖަކު ބޭނުންވާ ވާހަކަ ދެއްކިއެވެ. އެމީހުންގެ ކޯޅުންގަނޑު ބަލަން ޔައިލް އާއި އަޒަލް ތިބީ ހީލަހީލައެވެ.

ޔައިލްމެން އެމީހުންގެ އަމިއްލަ ވާހަތަކުގައި ތިބި އިރު، ކުދިވެރީން ވެސް ތިބީ އެކުދީންގެ އަމިއްލަ ވާހަކަތަކުގައެވެ. އޭރު ޔަޒާ އާއި އާރިޒް ސޯފާމައްޗަށް އަރައި ތިބެގެން ފުންމާތީ، އެދެކުދިން ކައިރީ ފައިބާށޭ ޔަޒާލް ކިޔަމުން ދިޔައެވެ. އެ ހުރިހައި އިރަކު ޔަޒާލް ކައިރީގައި އަނގަމަތީގައި އަތް އަޅާލައިގެން ހުރެ، ޝެލިން ހެމުން ދިޔައީ ޔަޒާމެން އުޅެމުން ދިޔަ ގޮތުން މަޖާވެ ހުރެއެވެ.

“ޔަޒްކޮ ދެން ފައިބާ.. އާޒް ވެސް.. ދެކުދިން ވެއްޓިދާނޭ..” ޔަޒާލް އޭނާގެ ޅަ އަޑުން ބުނެލި ނަމަވެސް، އެ އަޑުގައިވީ ވިސްނޭކަމާއި ހާސްކަމެވެ. އެހައި ކުޑަ އިރުވެސް ޔަޒާލް ހިކުމަތްތެރިކަމާ އެކީ ކަންކަމާ ދޭތެރޭ ވިސްނާ، ޢަމަލު ކުރާ ގޮތުން އެތައް ބަޔަކު ހައިރާންކޮށްލާހައި ވެއެވެ.

“ދޮންބެ ނޯ ދެން ވަރަށް މަޖަލޭ!!” އާރިޒްއާ އަތުގުޅުވާލައިގެން ހުރެ ފުންމަމުން ދިޔަ ޔަޒާ ބުނެލީ ޔަޒާލް ބުނި އެއްޗަކަށް މާ ބޮޑު ސަމާލުކަމެއް ނުދީއެވެ.

“މާމަ މިއަދު ޝެލީއަށް ގުޅާފަ ބުނި ބާވަލު ގިފްތްސް ގެންނަމޯ.. އެކަމް ބަސްއަހަންނާއޯ ގިފްތް ދޭނީ..” ޝެލިން އޭނާގެ ތުއްތު ބަހުރުވައިން ބުނެލި ވާހަކައިން ޔަޒާ އާއި އާރިޒްގެ ސަމާލުކަން ވަގުތުން ދަމައިގަތެވެ. ދެކުދިން އަވަސްއަވަހަށް ސޯފާއިން ފައިބާފައި ރީތިކޮށް އިށީނދެލީ “ބަސްއަހަން” ވެގެންނެވެ. ހާސްވެފައި ހުރި ޔަޒާލަށް ހަމަނޭވާއެއް ލެވުނީ ދެނެވެ.

“ބަލާބަ އަޅެ އެކުދިން ލޯބިކަން..” ސޯފާގައި އިށީނދެގެން ތިބެ އެކިއެކި ވާހަކަތައް ދައްކާފައި ހެމުން ދިޔަ ހަތަރު ކުދީންނަށް ލޯބިން ފުރިގެންވީ ނަޒަރެއް ދެމުން ޔަލީން ބުނެލިއެވެ.

“އަސްލުވެސް.. މަންމަމެންގެ މެދުގަ އޮތް ފްރެންޑްޝިޕް އަހަރެމެންނަށް ވާރުތަވެ، މިހާރު އެކުދިންނަށް ވެސް ވާރުތަ ވެއްޖެ.. ތިންވަނަ ޖެނަރޭޝަންއެއް ދޯ މި އުޅެނީ..” ޔައިލްގެ އަޑުން އެކަނިވެސް އޭނާ އުފާވެފައިވީ މިންވަރު އެނގޭހައި ވެއެވެ.

“އިރާދަކުރެއްވިިއްޔާ އަހަރެމެންގެ ކުދިން ވެސް ބޮޑުވާނީ ހަމަ މި އެކުވެރިކަން މަތީގަ.. އަހަރެމެންގެ މަންމަމެންނާ އަހަރެމެން ވެސް އުޅޭ ގޮތަށް.. ބަލާބަ މިހާރު ވެސް ގުޅިގެން އުޅޭ ވަރު.. އިންޝާﷲ އަބަދުވެސް ތިބޭނީ އެހެން..” އަޒަލް ވެސް ބުނެލީ ހިތުގެ އަޑިން އުފާވެ އިނދެއެވެ.

ހަ މީހުން ވެސް އެމީހުންގެ ދިރިއުޅުން އަލިކޮށްދިން ލޯބިލޯބި ކުދީންތަކަށް ބަލަހައްޓައިގެން ތިބި އިރު، އެއިން ކޮންމެ ހިތެއް ވެސް ދިޔައީ ލޯބިން ފުރެމުންނެވެ. އަޒަލް ގޮސް ޔައިލްގެ ކައިރީގައި އިށީނުމާއި އެކު ޔައިލް އަޒަލްގެ ގައިގައި އަތް ވަށައިލާފައި، އެ އޮމާން ކޯތާފަތުގައި ތުންފަތް ޖައްސައިލިއެވެ. ޝަޔާމް ވެސް ކުދީންތަކަށް ނަޒަރު ހުއްޓާލައިގެން އިން ޔަލީންގެ ގޮނޑި އޭނަޔާ ކައިރިއަށް ޖައްސައިލާފައި، އެ ކޮނޑުގައި ދަތްދޮޅި އަޅުވައިލިއެވެ. ޒައުލް އާރާގެ އަތުގައި ހިފައި ދަމައިލާފައި ގެނެސް އެ ތަނަވަސް މޭގައި ތަތްކޮށްލި އިރު، އާރާގެ މޫނުމަތީގައި ލަދުރަކި ހިނިތުންވުމެއް ކުޅެލީ އެންމެ ފުރަތަމަ ދުވަހެކޭ ވެސް އެއްފަދައިންނެވެ.

އެކަކު އަނެކަކުގެ އަތުތެރޭގައި ތިން ޖޯޑުވެސް ތިބި އިރު، އެންމެންގެ ނަޒަރު ވެސް ހުއްޓިފައިވަނީ އަމިއްލަ ދުނިޔެއެއްގައި އުޅެމުން ދިޔަ މައުސޫމު ތުއްތު ތުއްތު މޫނުތަކަށެވެ. ބަލައި ފޫހިނުވާނޭހައި ހިތްގައިމު މަންޒަރެކެވެ. މާޒީގައި ކުރިމަތިލާން ޖެހުނު އެތައް އަޑިގުޑަންތަކަކަށް ފަހު މިއަދު އެ އެންމެންނަށް ވެސް ފުރިހަމަ، އުފާވެރި ދިރިއުޅުމެއް ލިބިފައިވީ އިރު، އެކަމަށް ޓަކައި ޙަމްދު ނުކުރާ އެއްވެސް ހިތެއް ނުވެއެވެ. އެކަކު އަނެކަކުގެ އަތުތެރޭގައި ތިބެގެން ފުރާނަ ފަދައިން ލޯބިވާ މައުސޫމު ދަރީންތަކަށް ނަޒަރު ހުއްޓާލައިގެން ތިބި އިރު، ކޮންމެ ހިތެއްގައި ވެސް ޖަހަމުން ދިޔައީ އެއް ވިންދެކެވެ. ކުރަމުން ދިޔައީ އެއް ދުޢާއެކެވެ. ބުނަމުން ދިޔައީ އެއް ވާހަކައެވެ. އެކަކު އަނެކަކުގެ ލޯތްބަށް އެދެވޭ ވަރެވެ.

ނިމުނީ