ތިޔަ ލޯތްބަށް އެދެވޭތީ… 25

“ޗީޑި ބޮޑު ހަޑިގިއްލާ ގަނޑު.. ފެންނުވަރާ ދަތް ނޫނގުޅާ ހުރެގެން އަހަރެން ކައިރިޔަށް ނާންނާތި.. އައްޗީޑި..” ޔައިލްގެ އަތުގައި ނުޖެހެން ވެގެން މުޅި ކޮޓަރިތެރޭގައި ދުވަމުން ދިޔަ އަޒަލް އުޅުނު ގޮތުން ޔައިލްއަށް މަޖާވިއެވެ. އެންމެފަހުން އަޒަލް ކޮތަރިން ނުކުތުމުން ޔައިލް ހިނިތުންވަމުން ދެފަރާތަށް ބޯހޫރުވައިލިއެވެ. އަޒަލްގެ މައުސޫމު، ލޯބިވެތި ޙަރަކާތްތަކަށް އެ ހިތް އެދެން ފެށިއެވެ. އަޒަލްގެ ޚިޔާލުތަކުގައި ހުރެގެން ޔައިލް ތުވާލި ހިފައިގެން ފާހަނާއަށް ވަނީ، އޮފީހަށް ދާން ތައްޔާރު ވާށެވެ. ފާޚާނާއަށް ވަންނަމުން ސިއްރުސިއްރުން ސައިދްޓޭބަލް މަތީގައި ހުރި ކޮފީތަށި ނަގައި، ސިންކު ތެރެއަށް އަޅައިލިއެވެ. އަނެއްކާވެސް އަޒަލް އުޅުނު ގޮތް ހަނދާން ވުމުން ޔައިލްގެ ތުންފަތަށް ހިނިތުންވުމެއް ވެރިވި އިރު، ލޯބިވާ އަނބިމީހާއާއި މެދުގައި އެ ހިތް ލޯބިން ފުރިފައިވާ ކަން ދޭހަވާހައި ވެއެވެ.

ޔައިލް ފެންވަރައިގެން ނުކުތް އިރު އެނދުމަތީގައި ގަމީހާއި ފަޓުލޫނު ބާއްވާފައި އޮތުމުން އެއީ އަޒަލްގެ ކަމެއްކަން އެނގުނެވެ. ހިނިތުންވެލަމުން ޔައިލް އެ އެއްޗެހި ލައި، ތައްޔާރުވާން ފެށީ އޮފީހަށް ދާން ޖެހޭ ވަގުތު ކުޑަތަންވަމުން ދިޔައީތީއެވެ. ތައްޔާރުވެ ނިމިގެން ޔައިލް ތިރިއަށް ފޭބި އިރު މޭޒުދޮށުގައި އެންމެން ވެސް ތިއްބެވެ. ޔައިލް ގޮސް އިށީނުމާއި އެކު އަޒަލް ޔައިލްއަށް ސައިތައްޓެއް ގެނެސްދިނެވެ. ހިނިތުންވަމުން ޔައިލް އަޒަލްއަށް ޝުކުރު އަދާކޮށްލުމުން، އަޒަލް ރަކިވި މަންޒަރު ބަލަން މިލާންއާއި ޔައިނާ ތިބީ ހެވިފައެވެ.

“ދެން މިހާރު އަޒްތަ.. މި ބުނީ.. ދޮންބެދައްތަ ވެސް ހާދަ މުރާލި ވެއްޖެޔޭ ދޯ..؟ ދޮންބެ ކޮން ކަހަލަ ޖާދުލެއްތަ ތި ހެދީ..؟” ހުރިހައި މަންޒަރެއް ބަލަން އިން ޔަލީންއަށް އެދެމީހުންނާ ދިމާކޮށްނުލައި ނީނދެވުނެވެ.

“ސާބަހޭ ޔަލް.. އިރުކޮޅަކަށް ވެސް އަނގަ ލައްޕައިގެން ނީނދެވޭ ކުއްޖެކޭ ދޯ މީ..” ޔަލީން ބުނި ވާހަކައިން ޔައިނާ ކައިރިއަށް ހިނި އައެވެ. ހަގީގަތުގައި ވެސް މިއަދު އޭނާ ވެސް ހައިރާން ވިއެވެ. އަޒަލް ހޭލާ ގަޑި ލަސްވެގެން ޒާރާ ޔައިނާ ގާތު ޝަކުވާ ކުރި ވަރު އެނގޭނީ އޭނާއަކަށް ނޫން ހެއްޔެވެ؟ އެހެނަސް މިއަދު އިރު ނާރަނީސް ބަދިގެއަށް ވަދެ ޔައިނާއަށް އަތްގާތް ކޮށްދޭން އަޒަލް އުޅުނެވެ. ކައިވެނި ކުރުމުން ބޮލުގައި އެޅިގެންދާ މަސްއޫލިއްޔަތުތަކުގެ ސަބަބުން ހާދަހައި ހެޔޮ ބަދަލުތަކެއް މީހުންނަށް އާދެއެވެ. އެހެނަސް، އެ ބަދަލުތައް އަންނަނީ ޒިންމާ އުފުލަން އެނގޭ މީހުންނަށެވެ. އަޒަލްއަކީ އެއިން ކުއްޖަކަށް ވުމުން ޔައިނާއަށް ހިތާހިތުން ޙަމްދު ކުރެވުނެވެ.

“ޔައިލް.. ބައްޕަ މާދަމާއިން ފެށިގެން ދަރިފުޅަށް ދެ ހަފްތާގެ ޗުއްޓީއެއް ނަގައިދޭނަން.. ދަރިފުޅުމެން ދެކުދިން ހަނީމޫން ހަދާލަން ކޮންމެވެސް ތަނަކަށް ދާން ވާނެއެއްނު.. އަޒްގެ ކުޑޭ ދިން ވެޑިން ގިފްޓް ބޭނުން ނުކޮށްފިއްޔާ ކުޑޭ ދެރަވާނެ..” މިލާން ބުނެލީ އަޒަލްއާއި ޔައިލްގެ ކައިވެނީގެ ހަދިޔާއަކަށް އަޒާން ދިން ހަނީމޫން ދަތުރުގެ ވާހަކައެވެ. އަޒަލްއާއި ޔައިލް ބޭނުން ތަނެއްގައި، އަލަތު ކައިވެނީގެ ފޮނިމީރުކަން އިޙުސާސް ކޮށްލަން އަޒާން ފުރުސަތު ދިނީ، ދަތުރުގެ ހުރިހައި ޚަރަދެއް އަޒާން ކުރާ ގޮތަށެވެ.

ހަނީމޫންގެ ވާހަކަ އަފާން ބުނުމާއި އެކު ޔައިލްއަށް އަޒަލްއާ ދިމާއަށް ބަލައިލެވުނީ، ފަހަރުގައި އަޒަލް އެ ގޮތް ބޭނުން ނުވެދާނެތީއެވެ. އެހެނަސް ޔައިލް ބަލައިލުމުން ހިނިތުންވެފައި، އަވަސްއަވަހަށް އަޒަލް ބޯޖަހައިލި ގޮތުން ޔައިލްއަށް އަޒަލް ވެސް އެ ގޮތް ބޭނުންވާ ކަން އެނގުނެވެ.

“ލައްބަ ބައްޕާ.. އަޅުގަނޑުމެން ދެމީހުން ވާހަކަ ދައްކައިގެން ދާނެ ތަނެއް ހަމަޖައްސާފަ ޓިކެޓު ނަގާނަން..” ޔައިލް ބުނީ ހަމަ އަޒަލް ވެސް ބޭނުންވި ގޮތަށެވެ.

ސައިބޮއެ ނިމިގެން މިލާންއާއި އެކުގައި ޔައިލް ގެއިން ނުކުތީ އޮފީހަށް ދާށެވެ. މިލާން އޭނާގެ ސައިކަލަށް އަރައި ދުއްވައިލުމުން، ޔައިލް އޭނާގެ ސައިކަލަށް އެރިއެވެ. ސައިކަލު ދުއްވައިލުމުގެ ކުރިން ޔައިލްއަށް ބެލްކަންޏަށް ބަލައިލެވުނީ މީހަކު އޭނާގެ ނަމުން ގޮވައިލިހެން ހީވުމުންނެވެ. އޭރު ބެލްކަނީގައި ހުރި އަޒަލް ހިނިތުންވެލާފައި ޔައިލްއަށް ހަނާއަޅަނީއެވެ. ބަދަލުގައި ޔައިލް ވެސް ހިތްގައިމު ހިނިތުންވުމެއް ތުންފަތަށް ވެރިކޮށްލަމުން، އަޒަލްއަށް “ފްލައިން ކިސް” އެއް ފޮނުވައިލިއެވެ. އެއާއެކު އަޒަލް ލަދުން އިސްޖަހައިލި މަންޒަރު ފެނުމުން ޔައިލްގެ ހިނިތުންވުން ފުޅާވިއެވެ. ދުވެފައި ގޮސް އަޒަލް ގޭތެރެއަށް ވަނުމުން ޔައިލް ލުއި ހުނުމަކާއި އެކު ދެފަރާތަށް ބޯހުރުވައިލާފައި، ސައިކަލު ދުއްވައިލިއެވެ.

*** ** ***

“ނަވީން ދެން އަހަންނަކަށް ނޭނގެ ހަދަންވީ ގޮތެއް.. ޔަލީން އަހަރެން ގުޅީމަ ފޯނެއް ނަގަނީކީ ނޫން.. މެސެޖު ކުރީމަ ރިޕްލައި ދެނީކީ ނޫން.. ދެން މަ ކިހިނެއްތަ ހަދަންވީ..؟” ޝަޔާމް ވާހަކަ ދައްކަމުން ދިޔައީ ކުރިމަތީގައި އިން ނަވީންއާއެވެ.

“ސާބަހޭ ޝަޔާމް.. އުމުރުން އެކާވީސް އަހަރުވީ އިރުވެސް އަންހެން ކުއްޖެއްގެ ކަމަކާ ނޫޅުނު މީހަކަށް ނޭނގެއެއްނު.. އަދިވެސް ބުނާތި ޔަލީން ދެކެ ލޯތްބެއް ނުވެޔޭ.. އެއްބަސް ނުވާން ހުންނާތި..” ކުރިމަތީގައި ހުރި ކޮފީތަށިން ކޯވަރެއް ބޯލަމުން ނަވީން ބުނެލިއެވެ.

“އާނ އަހަރެން ލޯބިވެޔޭ ނަވީން.. ވަރަށް ލޯބިވެޔޭ ޔަލީން ދެކެ.. ދެންވެސް ތަންކޮޅެއް ސީރިޔަސް ވެފަ އަހަންނަށް އެހީއެއް ވެދީބަލަ..” ނަވީންގެ ސަމާސާ މޫޑު ޝަޔާމަކަށް ކަމަކު ނުދިޔައެވެ. އެއާއެކު ނަވީން ވެސް ތަންކޮޅެއް ސީރިޔަސް ވިއެވެ.

“ހޫމް.. އޯކޭ.. މަ މި ބުނާ ގޮތަށް ކަންތައް ކުރަން ޝަޔާމްއަށް ކެރޭނެތަ..؟” ނަވީން ފުރަތަމަ ބޭނުންވީ ޝަޔާމްގެ ޔަގީން ކަމެވެ.

“ކުރަން ބުނާ ކަމެއްގެ ގޮތުން އެނގޭނީ.. ކަލޭ ބުނެފާނެ ވިއްޔަ މޭފަޅާފަ ހިތް ނަގާފަ ދޭށޭ ވެސް..” ނަވީންގެ ގޮތް ރަނގަޅަށް އެނގޭތީ ޝަޔާމް ބުނެލިއެވެ.

“ދެން ސާބަހޭ.. ހޫމް.. އަޑު އަހާބަލަ.. ޔަލީން އުޅޭ ގެ ހުންނަ ތަން ޝަޔާމްއަށް އެނގޭތަ..؟” ނަވީން އަހައިލުމާއެކު ޝަޔާމް ބޯޖަހައިލިއެވެ. އެއާއެކު ދެން ހަދަންވީ ގޮތް ނަވީން ކިޔައިދެމުން ދިޔަ އިރު ޝަޔާމް އަޑުއަހަމުން ދިޔައެވެ.

“އޭ ލާ.. މަށަކަށް ނުކެރޭނެ!” ނަވީންގެ ވާހަކަ ނިމުނު ތަނާ ޝަޔާމް ހަތަރެސްފައިން ނޫނެކޭ ކިޔަން ފެށިއެވެ. އޭނާ ފަދަ މަޑުމައިިތިރި، ސީރިޔަސް ޒުވާނަކަށް އެފަދަ ކަމެއް ކުރާކަށް ލާހިކެއް ނޫނެވެ.

“އާނ ދެން އެހެންވީރު ހަނދާން ނައްތައިލާ.. ތިހާ ފިނޑި މީހުންނަކަށް ނުވާނެ އެއްވެސް ކަމެއް..” ނަވީން އެހެން ބުނުމާއި އެކު ޝަޔާމްއަށް އަތް މުއްކުވައިލާފައި ނިތުގައި ޖަހައިލެވުނެވެ. ހަގީގަތުގައިވެސް ނަވީން އިރުޝާދުދޭ ގޮތަށް ކަންތައް ކުރަންވީ ބާވައޭ އޭނާގެ ހިތަށް އެރިއެވެ.

*** ** ***

“އަޒް ދާން ބޭނުންވާ ތަނެއް ޗޫޒް ކުރީމަ އޯކޭ ވާނެ..” ޔައިލްއާއި އަޒަލް މަޝްވަރާ ކުރަމުން ދިޔައީ ހަނީމޫނަށް ދާނެ ތަނަކާއި މެދުގައެވެ.

“ދެން ވެޑިންގެ ހުރިހާ ކަމެއް ވެސް ކުރީ އަހަރެން ބޭނުންވާ ގޮތަށް.. މިފަހަރު މިކަން ކުރަން ވާނީ ޔައިލް ބޭނުންވާ ގޮތަށް.. ޔައިލް ބޭނުން ތަނަކަށް ދާން ވާނީ..” އަޒަލް ހުރީ ދޫކުރާ ގޮތަކަށް ނޫނެވެ.

“ހިނގާ ރާއްޖެތެރޭ ރަށަކަށް ދާން.. އަޒްއަށް ކަމަކުނުދޭނު އެހާ ބައިބޯ ވީމަ..” ޔައިލް ބުނެލިއެވެ.

“އަނެއްކާވެސް އަހަރެން.. އަހަންނަށް ފެންނަ ގޮތެއް ނޫނޭ.. ޔައިލްއަށް ފެންނަ ގޮތް..” އަޒަލް ދުލެއް ނުކުރިއެވެ.

“މީ އަހަރެން ވެސް ބޭނުން ވެގެން ބުނާ އެއްޗެކޭ.. އެހެންނޫނަސް އަބަދު ޗުއްޓީތަކުގަ ދަނީ ބޭރަކަށްނު.. އެންމެ ދެތިން ފަހަރު ރާއްޖެތެރެއަށް ދެވުނީ.. އެހެންވީމަ މިފަހަރު އަހަރެން ދާން ބޭނުމީ ހަމަ ރަށަކަށް.. އެތަންތަނުގަ މާ ބޯހަމަ ވެސް ޖެހޭނެ..” ޔައިލް އޭނާ ބޭނުންވާ ގޮތް ހާމަކޮށްލުމުން އަޒަލް ވެސް އުފާވެފައި ބޯޖަހައިލީ އެއީ އޭނާ ވެސް އެންމެ ބޭނުންވީ ގޮތް ކަމަށް ވީތީއެވެ. ދާނެ ރަށެއް ނިންމުމަށް ފަހު، ޔައިލް ޓިކެޓުގެ ކަންތައް ހަމަޖެއްސުމުގައި އުޅުނެވެ.

އޭގެ އަނެއް ދުވަހު ޔައިލް އާއި އަޒަލް ތޮއްޑޫއަށް ދާން ފުރީ ހަފްތާއެއް ވާންދެން އެކޮޅުގައި މަޑުކުރާ ގޮތަށެވެ. އަޒަލްއާއި ޔައިލް ފުރުމާއި އެކު މުޅި ގޭތެރެއަށް ފަޅުކަމެއް އައި ފަދައެވެ. މިލާންއާއި ޔައިނާ އަބަދު މަސައްކަތުގައި އުޅޭތީ ޔަލީން ގިނަ ވަގުތު ހޭދަކުރަމުން ދިޔައީ ނީލާއާއި އެކުގައެވެ. ސަރުކާރު ބަންދު ދުވަހަކާއި ދިމާކޮށް ކޮލެޖު ވެސް ދެތިން ދުވަހަށް ބަންދު ވުމުން ޔަލީން ގިނަ ވަގުތު ހޭދަކުރީ ގޭގައެވެ. އާރާއާއި ޒައުލްއަށް އެކަނި ވަގުތުކޮޅެއް ދިނުމުގެ ގޮތުން ޔަލީން މާ ވަރަކުން އެދެމީހުންނާ އެކީ ވެސް ބޭރަށް ދާކަށް ނޫޅެއެވެ.

އެހެނަސް އެގޮތަށް އެކަނި ގިނަ ވަގުތު ހުންނަން ވުމުން ޝަޔާމްގެ މަތިން ޔަލީން މާ ބޮޑަށް ހަނދާންވާން ފެށިއެވެ. އެކަނިވާ ކޮންމެ ވަގުތެއްގައި ޝަޔާމްގެ ޚިޔާލުތަކުން އެ ހިތް ފުރެމުން ދިޔުމާއި އެކު ޔަލީނަށް ކެތް ކުރަން އުނދަގޫވަމުން ދިޔައެވެ. އެހެނަސް އެ ހިތް ބިރު ގަންނަނީއެވެ. އޭނާ އަކީ ޝަޔާމް ބޭނުންވާ ކަހަލަ ބައިވެރިއެއް ނޫންކަން އެތައް ފަހަރަކު ޝަޔާމް ވަނީ ބުނެފައެވެ. ވީއިރު، މިއަދު ވަކި ޝަޔާމަށް އޭނާ ކަމުދާންވީ ކީއްވެހެއްޔެވެ؟ އަދި ޝަޔާމަށް އޭނާ ކަމުދިޔަ ކަމުގައި ވިޔަސް، މާދަމާ ވެސް އޭނާގެ ފަރާތުން ޝަޔާމް ހިތްހަމަނުޖެހޭ ފަދަ ސިފައެއް ފެނިއްޖެ ނަމަ، ޝަޔާމް އޭނާ ދޫކޮށް ނުލާނެ ކަމަށް އޮތީ ކޮން ޔަގީން ކަމެއް ހެއްޔެވެ؟ އެފަދަ ޚިޔާލުތަކުން ޔަލީންގެ ސިކުނޑި ތާ އަބަދު ފުރެމުން ދިޔައީ، އެ ހިތުގެ ގޮވުމަށް އިޖާބަދޭނެހައި ހިތްވަރެއް ނުކުރެވިއެވެ.

*** ** ***

އަފާންމެން ގޭގައި ތިބެ އަފާންގެ ޢާއިލާއާއި އަޒާންގެ ޢާއިލާ ކެއުމަށް އިންސާފު ކުރަމުން ދިޔަ އިރު، މުޅި މާހައުލުގައި ވަނީ ހުނުމުގެ އަޑު ހިފައިލާފައެވެ. އަޒަލް އެތަނުގައި ނެތުމުން ލިބިފައިވާ ފަޅުކަމުގެ ވާހަކަ އެންމެން ވެސް ދައްކަމުން ދިޔައެވެ. އެހެން އެންމެން އެކި ވާހަކަތަކުގައި މަސްއޫލު ވެގެން ތިބި އިރު، ޒައުލް އާއި އާރާގެ މެދުގައި ބަދަލު ކުރެވެމުން ދިޔަ ސިއްރު ނަޒަރުތަކާއި، ލޮބުވެތި ހިނިތުންވުންތައް އެއްވެސް މީހަކަށް ފާހަގަ ނުކުރެވުނުކަމީ އެދެކުދިންގެ ނަސީބެވެ.

“ލައު.. ލައުގެ އެއްކަލަ ފޮތް ވެއްޖެ އަހަރެން އަތުގަ.. އަދި ދޭން ހަނދާން ނެތިފަ މި ހުރީ..” ޒާރާ ބުނެލީ ކުރިން ދުވަހަކު ލައުރާގެ އަތުން ގެނައި ކައްކާ ފޮތުގެ ވާހަކައެވެ.

“މި ޒާ ތި ކިޔާ ފޮތެއް ބަލައިގެން ފާޑުފާޑުގެ މޮޅެތި ރެސިޕީތައް ހަދަމުން ގޮސް ހަފްތާއެއް ތެރޭ ދެތިން ގޭސްފުޅި ވެސް ހުސްކޮށްލައިފިއޭ.. އެވަރުން ވެސް އެއްޗެއްގަ ރަހައަކުން ރަހައެއް ލަނީ މަދު ފަހަރަކު..” އާދައިގެ މަތިން އަފާން ޒާރާއާ ދިމާކޮށްލިއެވެ. ވަގުތުން ޒާރާ އަފާނގެ ފުއްކިބައިގައި އެތިފަހަރެއް އަޅުވައިލިއެވެ. އެއާއެކު ފެށުނު ޒާރާއާއި އަފާން ކޯޅުން އެންމެންނަށް ވެސް ވީ މަޖާ ކަމަކަށެވެ.

“ދަރިފުޅާ އާރޫ ދޭބަ މަންމަ ކޮޓަރީގެ އަލަމާރި ތެރޭގަ ހުރި ވަތްގަނޑުގަ އޮންނާނެ އެ ފޮތް.. ހިފައިގެން އާދެބަލަ..” އާރާ ކައި ނިމިގެން ތެދުވުމާއި އެކު ޒާރާ އެދުނެވެ. އެއާއެކު އާރާ ތަށި ދޮވެލާފައި ގޮސް މައްޗަށް އެރިއެވެ. ވަގުތުގެ ބޭނުން ހިފަމުން ޒައުލް ވެސް ކައި ނިމިއްޖެޔޭ ކިޔާފައި ތެދުވެގެން އާރާގެ ފަހަތުން ދިޔައެވެ. މާ ބޮޑު ކަމަކަށް ނުހަދައި ޒާރާމެން ނިންމީ އެދެކުދިން އަމިއްލަ ވާހަކައެއް ދައްކައިލަން ބޭނުންވީ ކަމަށެވެ.

ޒާރާގެ ކޮޓަރީގެ އަލަމާރި ކައިރީގައި ހުއްޓުނު އާރާގެ ދެލޯ ބޮޑުވީ ފަހަތުން މީހަކު އޭނާގެ ލޯމަތީގައި އަތް އެޅުމުންނެވެ. ހަޅޭލަވައިގަންނަން ބޭނުންވި ނަމަވެސް، އެކަން ކުރެވުމުގެ ކުރިން އެމީހަކު އާރާގެ އަނގަމަތީގައި އަތް އެޅިއެވެ.

“ޝްޝް އާރޫ.. އަހަންނޭ މީ..” ޒައުލްގެ އަޑު އިވުމުން އާރާއަށް ވަގުތުން ހަމަޖެހިލެވުނެވެ. އެެއާއެކު ޒައުލް އާރާގެ މޫނުމަތިން އަތް ނެގުމުން އާރާ ޒައުލްއާ ވީ ފަރާތަށް އެނބުރުނެވެ.

“އަޅޭ ޒައުލް.. އަހަރެން ފަހަތުން ތިހެން އައީމަ މަންމަމެން ކީކޭތަ ހީކުރާނީ..؟” އާރާ ހުރީ ޒައުލް ކަންތައް ކުރި ގޮތުން ހާސް ވެފައެވެ.

“ޕިސް އާރޫ ތަންކޮޅެއް ހަމަޖެހިބަލަ.. މާ ބިރުންނޭ ތި އުޅެނީ.. މަންމަމެން އެއްޗެކޭ ހިއެއް ނުކުރާނެ..” އާރާގެ ދެފަރާތުން އަލަމާރީގައި އަތް ވިއްދައިލަމުން ޒައުލް ބުނެލިއެވެ. އެއާއެކު އާރާއަށް އަލަމާރީގައި ލެނގިލެވުނު އިރު, ޒައުލް ކައިރިވެލުމާއި އެކު އެ ހިތުގެ ހިނގުން އަވަސްވެގެން ދިޔައެވެ.

އޭނާ ކައިރިވެލުމާއި އެކު އާރާއަށް އަންނަމުން ދިޔަ ބަދަލުތައް ފެނި ޒައުލްއަށް އެއް މިޔަކަނިން ހީލެވުނެވެ. އާރާގެ ހިތުގެ ތެޅުން އެހިސާބުން ވެސް އިހުސާސް ކުރެވުމާއި އެކު، ޒައުލްގެ ހިތް ވެސް އެބާރުމިނުގައި ތެޅެން ފެށިއެވެ. ހީވަނީ ދެ ހިތް ވެސް އެއް ހަމައެއްގައި ވިންދު ޖަހަން މަސައްކަތް ކުރަމުން ދިޔަ ހެންނެވެ.

އެއް ފިޔަވަޅު ކުރިއަށް އަޅައިލުމަށްފަހު ޒައުލް އޭނާއާއި އާރާއާ ދޭތެރޭގައިވީ ދުރުމިން ނައްތައިލިއެވެ. އާރާގެ މޫނާ ޖެހޭނުޖެހޭ ހިސާބުގައި ހުއްޓިލައިފާ، ޒައުލްގެ ނަޒަރު ދަތުރު ކޮށްލީ އެ މަޑުފިޔާތޮށި ކުލައިގެ ރީތި ތުންފަތަށެވެ. އެއާއެކު އެ ތުންފަތް ތުރުތުރު އަޅައިލީ ޒައުލްގެ ކަތި ނަޒަރު އަމާޒުވީކަން އެނގުނު ފަދައިންނެވެ. ދެން ވާނެ ގޮތެއް ހިތަށް އަރުވައިލެވުމާއި އެކު އާރާއަށް ދެލޯ މަރައި ބާރުކޮށްލެވުނު އިރު، ދެއަތަށް ޒައުލް ލައިގެން ހުރި ކަޅު ކުލައިގެ ގަމީސް ކޮނޑާއި ދިމާލުން ބޮނޑިކޮށްލެވުނެވެ.

އާރާގެ މައުސޫމު ހަރަކާތްކަށް ބަލަން ހުރި ޒައުލްގެ ތުންފަތަށް ހިތްގައިމު ހިނިތުންވުމެއް ވެރިވިއެވެ. ދެފަރާތަށް ބޯހޫރުވައިލަމުން ޒައުލް އާރާގެ ދެ ކޯތާފަތުގަޔާއި ނިތުގައި ބޮސްދީފައި ދުރުވެލިއެވެ. އެއާއެކު އާރާ ލަސްލަހުން ދެލޯ ހުޅުވައިލި އިރު އެ މޫނަށް ވަނީ ޖަންބުކުލަ ފާއްދައިލާފައެވެ. ޒައުލް ދުރުވެލުމާއި އެކު އާރާ ޒައުލްގެ ކުރިމަތީގައި ހުންނަން ނުކެރުމުން ދުވެފައި ދިޔަ ގޮތަށް ގޮސް ކޮޓަރިން ނުކުތެވެ.

އާރާ ދުވެފައި ދިޔަ މަންޒަރު ބަލަން ހުރި ޒައުލް ހިނިތުންވެފައި، އިސްތަށިގަނޑުގެ ތެރޭގައި އަތް ހިންގައިލިއެވެ. ދެފަރާތަށް ބޯ ހޫރުވައިލަމުން ނުކުންނަން ދިޔަ ޒައުލްގެ ފިޔަވަޅުތައް މަޑުޖެހުނީ އާރާ އެ ކޮޓަރިއަށް އައި މަގްސަދު ހަނދާން ވުމުންނެވެ. ދެންމެ ހިނގައިދިޔަ ކަމަށް ފަހު އާރާ އެ ފޮތް ނަގަން ހަނދާން ނެތުނީތާއޭ ޒައުލްގެ ހިތަށް އެރިއެވެ. ފޮތް އޮންނާނީ އަލަމާރީގެ ވަތްގަނޑުގައޭ ޒާރާ ބުނި ހަނދާން ވުމުން ޒައުލް ނިންމީ އެ ފޮތް ހިފައިގެން ދާށެވެ. އެހެން ހިތަށް އަރާފައި، ޒައުލް އަލަމާރީގެ ދޮރު ހުޅުވައިލާފައި، އެތެރޭގައި ހުރި ވަތްގަނޑަށް ދަމައިލިއެވެ.

އެންމެ މަތީގައި “ނޯއާ’ސް ގުޑީސް” ޖަހާފައި އޮތް ފޮތް ފެނުމުން ޒައުލްއަށް ޒާރާ އެ ދައްކަނީ އެ ފޮތުގެ ވާހަކަ ކަން އެނގުނެވެ. އޭނާގެ މަންމަ ވެސް އެތައް ފަހަރެއްގެ މަތިން އެ ފޮތް ނަގައިގެން އުޅޭ މަންޒަރު އޭނާއަށް ވަނީ ފެނިފައެވެ.

ފޮތް ނަގާފައި، ވަތްގަނޑު ލައްޕައިލަން އުޅެނިކޮށް ޒައުލްގެ ލޮލުގައި އަޅައިގަތީ ވަތްގަނޑުގެ ތެރޭގައި އޮތް ފޮޓޯ ފްރޭމެކެވެ. އެއީ އަފާން އާއި ޒާރާގެ ކައިވެނީގައި އެދެމީހުން ނަގާފައިވާ ފޮޓޯގަނޑެކެވެ. ފޮޓޯގަނޑުގައި ދެމީހުން ތިބިލެއް ލޯބިކަމުން ޒައުލްއަށް އެ ފްރޭޭމް ނެގުނެވެ. އެ ފޮޓޯގައި ޒާރާ އާއި އަފާން އެކަކު އަނެކެއްގެ ލޮލަށް ގެއްލިފައި ތިބި އިރު، ޒާރާގެ އަތް ވަނީ އަފާންގެ މޭމަތީގައި ބާއްވައިލެވިފައެވެ. އަފާންގެ އަތް ޒާރާގެ އުނަގަނޑުގައި އަޅުވައިލެވިފައިވީ އިރު، ދެމީހުންގެ ލޮލުން ވެސް ފެންނަމުން ދިޔައީ އިންތިހާ ދަރަޖައިގެ އުފާވެރި ކަމެވެ. އެކަކު އަނެކަކު ދެކެ ވާ މާތް، މަތިވެރި ލޯތްބެވެ.

އިރުކޮޅަކު ހިނިތުންވުމަކާއި އެކު އެ ފޮޓޯގަނޑަށް ނަޒަރު ހުއްޓާލައިގެން ހުރުމަށްފަހު ޒައުލް އެ ފޮޓޯގަނޑު ބާއްވަން އުޅެނިކޮށް، އޭގެ ދަށުގައި އޮތް ކަޅުކުލައިގެ ބަނޑޭރިގަނޑެއް ލީ ފޮތެއް ޒައުލްގެ ލޮލުގައި އަޅައިގަތެވެ. ފޮތުގެ ބަނޑޭރިގަނޑު ފެންނަ ފެނުމަށް ބައު ވުމުން، ޒައުލްގެ ހިތުގައި އެ ފޮތާއި ދޭތެރޭގައި ޝައުގުވެރިކަމެއް އުފެދުނީ ކުއްލިއަކަށެވެ. ފޮޓޯފްރޭމް ފަތްގަނޑުތެރެއަށް ލާފައި، ޒައުލް ދެން ނެގީ އެ ފޮތެވެ. އެ ފޮތް ހުޅުވައިލުމާއި އެކު، އެ ފޮތުގެ ތެރެއިން ވެއްޓުނު ކަރުދާސްކޮޅަށް ޒައުލްގެ ނަޒަރު ދަތުރު ކުރިއެވެ. ގުދުވެލާފައި ފައި ކައިރިއަށް ވެއްޓިފައި އޮތް އެ ކަރުދާސްކޮޅު ނަގާފައި، ޒައުލް އެ ނިއުޅުވައިލިއެވެ.

މަޑު މުށިކުލައެއްގައި އޮތް އެ ކަރުދާސްކޮޅުގައި ކަޅުކުލައިގެ ދެލިން ލިޔެފައިވާ ޖުމުލަތަކުގެ ތަންތަންކޮޅު ވަނީ ފޭދިފައެވެ. ބަލާބެލުމަށް އެއަށް ވަރަށް ގިނަ ދުވަސްތަކެއް ވެއްޖެހެން ހީވެއެވެ. ހިތުގައި އޮތް ޝައުގުވެރިކަމެއްގެ ސަބަބުން ޒައުލްގެ ތުންފަތް، އެ ކަރުދާސްކޮޅުގައި ލިޔެފައިވާ ކޮންމެ ލަފްޒަކާ އެއްވަރަށް ޙަރަކާތް ކުރަން ފެށިއެވެ.

އެ ކަރުދާސްކޮޅުގައި ލިޔެފައިވީ ޢިބާރާތްތައް ކިޔަމުން ދިޔަ ވަރަކަށް ޒައުލްގެ ދެލޯ ދިޔައީ ބޮޑުވަމުންނެވެ. ކިޔަމުން ދިޔަ ކޮންމެ ޖުމުލައަކާ އެކުގައި އެ ހިތުގެ ހިނގުން ދިޔައީ އަވަސް ވަމުންނެވެ. މުޅި މީހާ ފިނިވެ، ނޭވާ ކުރުވާން ފެށީ، އޭގައި ލިޔެފައިވީ އެއްޗެއް ޤަބޫލު ކުރަން ހިިތް ދެކޮޅު ހެދުމުންނެވެ. އެ ދެލޮލުގެ ތެރެއަށް ބޮނޑިވެގަތް ކަރުނަތައް، ކޯތާފަތް މައްޗަށް ލޫދިގެން ދިޔުމުގެން ކުރިން ޒައުލް އަވަސްއަވަހަށް އެސްފިޔަ ޖަހައިލިއެވެ. ހާމަވަގެން ދިޔަ އަނދިރި ޙަޤީގަތުން ޒައުލްގެ މުޅި ހަށީގައި ގޮތްނޭނގޭ ހަައިޖާނުގަނޑެއް އުފައްދައިފިއެވެ. ބާރުގަދަ ތޫފާނެއްގައި އެ ހިތް އޮޔާ ބެހިގެން ހިނގައްޖެއެވެ. ވަރުގަދަ ޒަލްޒަލާއެއް މުޅި ހިތަށް ގެނުވައިފިއެވެ. ދެން ގެންނަންވީ ޙަރަކާތެއް ނޭނގިފައި ޒައުލްއަށް ހުރެވުނީ ހުއްޓުން އަރާފައެވެ.

“ޒައުލް..” އެވަގުތު އިވުނު އާރާގެ އަޑުން ޒައުލްއަށް ހަމަބިމަށް އާދެވުނު ފަދައެވެ. އަވަސް ޙަރަކާތަކާއި އެކު އެ ގަނޑުކޮޅު ފޮތުގެ ތެރެއަށް ލުމަށް ފަހު، އެ ފޮތް ކަބަޑުތެރެއަށް ލިއެވެ. އަމިއްލަ ނަފްސު ހަމައަކަށް އަޅުވައިލުމަށް ދެތިން ނޭވާ ބޭރުކޮށްލުމަށް ފަހު، ޒައުލް ކަބަޑުގެ ދޮރު ލައްޕައިލީ، އާރާއާ ކުރިމަތިލުމަށް ތައްޔާރު ވަމުންނެވެ.

“އަހަރެން ތިރީގަ މިހުރީ ޒައުލް ފޮތް ހިފައިގެން އަންނާނެ ކަމަށް.. އެކަމް ޒައުލް ނައިސް ގިނަ އިރު ވެގެން މަންމަމެން ޒައުލް ކޮބައިތޯ ބަލައިލަން ދާށޭ ބުނީމަ އަހަރެން މި އައީ.. ކީއްވެތަ އެހާ ގިނަ އިރުވީ..؟” އާރާ ކުރި ސުވާލަށް ދޭނެ ޖަވާބަކާއި ދޭތެރޭގައި ޒައުލް ޖެހުނީ އިހަށް ވިސްނައިލާށެވެ.

“މީ.. ފާޚަނާއަށް ދާން ޖެހުނީ..” އެންމެ އަވަހަށް ހިތަށް އައި އެތި ޒައުލް ބުނެލިއެވެ.

“ކީއްވެ މާ ހާސްވެފަ.. މީހާ އެއްކޮށް ދާހިތްލާފަ އެއްނު ތިހުރީ..” ޒައުލް ހުރި ހާލުން އާރާ ހައިރާންވިއެވެ. ދާދިދ ެންމެއަކު ހަމަ ރަނގަޅަށް ހުރެފައި މިހާރު ޒައުލްއަށް އެވީ ކިހިނެއް ހެއްޔެވެ؟

“އާނ އެއީ.. މީ.. މާ ބޮޑަށް ހޫނުވީމަ ދާހިތްލީ.. މިއޮތީ ފޮތް.. ހިނގަ ދާން ތިރިޔަށް.. މަންމަމެން އުޅޭނެ މިހާރު އަހަރެމެން ނައިސްގެން..” އަތގައި އޮތް ފޮތް އާރާއަށް ދައްކައިލާފައި ޒައުލް ގޮސް ކޮޓަރިން ނުކުތީ އާރާ އިތުރު ސުވާލެއް ކޮށްފާނެތީއެވެ. އާރާއަށް ދޮގު ހަދާނެހައި ހިތްވަރެއް އޭނާގެ ބަލިކަށި ހިތަކު ނެތެވެ.

ޒައުލް ކޮޓަރިން ނުކުތުމާއި އެކު އާރާއަށް ބަލައިލެވުނީ ސޯޅަޔަށް ލާފައި ހުރި އޭސީއަށެވެ. އެހައި ފިނިކޮށް ކޮޓަރިތެރެ އޮތް އިރުވެސް ޒައުލްއަށް ހޫނުވެގެން އެ އުޅެނީ ކީއްވެގެންބާވައޭ އާރާގެ ހިތަށް އެރިއެވެ. ކުޑަކުޑަ ހިނދުކޮޅެއްގެ ތެރޭގައި ޒައުލްއަށް އެ އައި ބަދަލު ދެނެގަންނަން އާރާއަށް އުނދަގޫވިއެވެ. އެހެންނަމަވެސް އެކަމާއި ދޭތެރޭގައި މާ ބޮޑަށް ވިސްނުމެއް ނެތި އާރާ ކޮޓަރިން ނުކުތެވެ.

ތިރިޔަށް ފައިބާފައި އަތުގައި އޮތް ފޮތް ޒާރާއަށް ދިއްކޮށްލި އިރު، އެ އަތުގައި މަޑު ތުރުތުރެއް ހުރިކަން ޒައުލް އަމިއްލައަށް ވެސް ފާހަގަ ކުރެވުނެވެ. ވަކިވަކިން ޒާރާ އާއި އަފާންގެ މޫނަށް ފުންކޮށް ބަލައިލި އިރު، ޒައުލްގެ މޫނުމަތީގައިވީ ދެގެންނަން އުނދަގޫ ކުލަވަރުތަކެކެވެ. އެހެނަސް، ހިތުގައިވީީ އުދާސްތައް ފަރުދާކޮށްލުމަށް ފަހު ޒައުލް ވެސް އެމީހުންގެ ވާހަކައިގައި ބައިވެރިވެވޭތޯ ބެލިއެވެ.

*** ** ***

ޢިޝާ ނަމާދު ކޮށްލައިގެން ކޮލެޖުގެ އެސައިންމެންޓެއް ނިންމަން އިން ޔަލީންގެ ނަޒަރު ލެޕްޓޮޕުން ދުރުކޮށްލެވުނީ ގޭގެ މައި ދޮރުގައި މީހަކު ބެލް އެޅުމުންނެވެ. ޔައިނާއާއި މިލާން ބޭރަށް ގޮސްފައި އައީއޭ ހިތަށް އަރާފައި ޔަލީން އެނދުން ތެދުވިއެވެ. އާދައިގެ ވަށް ބުރުގާކޮޅެއް ބޮލަށް މަހައިލަމުން ޔަލީން ގޮސް ގޭގެ ދޮރު ހުޅުވައިލިއެވެ. ދޮރު މަތީގައި އެއްވެސް މީހަކު ނެތުމުން ޔަލީނަށް ދެކޮޅު ބަލައިލެވުނެވެ. އެކަކުވެސް ފެންނަން ނެތުމުން ދޮރު ލައްޕަން އުޅުނު ޔަލީންގެ ހަރަކާތްތައް މަޑުޖެހުނީ ފައިވާން ހަރުގަނޑުގެ މަތީގައި ބާއްވާފައި އޮތް ރަތްކުލައިގެ ފިނިފެންމާ ބޮނޑި ފެނުމުންނެވެ. އަނެއްކާވެސް މީހެއްގެ ހިލަމެއް ވޭތޯ ދެކޮޅު ހޯދައި ބަލައިލި ޔަލީނަށް މިފަހަރުވެސް މީހަކު ނުފެނުނެވެ. އެހެންކަމުން އެ މާބޮނޑި ހިފައިގެން ޔަލީން އެތެރެއަށް ވަދެ ދޮރު ލައްޕައިލިއެވެ.

ސިޓިންރޫމު ސޯފާގައި އިށީނދެފައި ޔަލީން އެ މާ ބޮނޑިން ވަސްބަލައިލިއެވެ. ފިނިފެންމަލުގެ މަޑުމަޑު، ފޮނިފޮނި މީރު ވަހުން އެ ނޭފަތުގެ ހިނދުރި ފުރިގެން ދިޔުމާއި އެކު، ޔަލީނަށް ހިނިތުންވެފައި ދެލޯ މަރައިލެވުނެވެ. މާބޮނޑި ތިރިކޮށްލި ވަގުތު އޭގެ ތެރެއިން ވެއްޓުނު ނޯޓްކޮޅަށް ޔަލީންގެ ނަޒަރު ހުއްޓުނީ ދެނެވެ. ގުދުވެލަމުން، އެ ނޯޓުކޮޅު ނަގައި ކިޔައިލި ޔަލީންއަށް އަނގަމަތީގައި އަތް އަޅައިލެވުނީ ހައިރާންވީ ވަރުންނެވެ.

“ގޯ ޗެކް ޑައުން ދަ ބެލްކަނީ!” އިނގިރޭސި އަކުރުން ލިޔެފައިވީ އެ ޢިބާރާތްކޮޅުގެ ތިރީގައި ނަމެއް ނެތް ނަމަވެސް، ޔަލީނަށް ވަގުތުން އެއީ ކާކުގެ ކަމެއްކަން އެނގުނެވެ. ހަލުވި ފިޔަވަޅުތަކެއްގައި ދުވެލާފައި ޔަލީން ގޮސް ބެލްކަންޏަށް ނުކުތެވެ. ރެއިލިންގައި އަތް އަޅުވައިލަމުން، ތިރިއަށް ބަލައިލި ވަގުތު ފެނުނު މަންޒަރަކުން ޔަލީންގެ ދެލޮލަށް ވަގުތުން ކަރުނަތައް ބަރާވިއެވެ. އެ ދޮގު އެސްފިޔަތައް ޖަހައިލުމާއި އެކު، އެ ކަރުނަތައް އެސްފިޔަތައް ފޫއަޅުވައިލާފައި ކޯތާފަތް ތެންމާލައިފިއެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.