އަނދިރިޔާނުލާ

ފެށުން
އުމުރުން އަށާރަވަރަކަށް އަހަރުގެ ބިސާރާއަކީ ރީތިކަމާއި ފުރިހަމަކަމަށް ބަލާނަމަ ފާހަގަކުރެވޭފަދަ ރީތި އަދި ފުރިހަމަ ޒުވާނެކެވެ. ހިމަތޮޅި ލޫޅާފަތި ހަށިގަނޑެއް ލިބިފައިވާ ބިސާރާއަކީ އެންމެ މިހާރުގެފެޝަންތަކަށް ލޯބިކުރާ އަދި ބިސާރާ ބޭނުންކުރާ ޒަމާނީ ހެދުންތަކާއި ރީތިވުމަށް ބޭނުންކުރާ ޒަމާނީތަކެތީގެ ސަބަބުން އޭނާގެ ރީތިކަމަށް އިތުރު ފުރިހަމަކަމެއް ލިބިފައިވާ ޒުވާނެކެވެ.
ބިސާރާގެ މަންމަ ނަޒްމީނާ އާއި އާމިލްގެ މަންމަ ސާމިޔާއަކީ ދުރުތާ ތިމާގެ ދެމީހުނަށް ވުމުގެ އިތުރުން ކުޑައިރުއް ސުރެ އެކުގައި އުޅެމުންއައި ވަރަށް ގާތް ދެއެކުވެރިންނެވެ. ދެމީހުންމެ ޒަވާޖީހަޔާތް ފަށައި ކުދިންލިބި އެކުދިން މީހުނާއި އިންނަ ދުވަސްވަރަށް އެޅުނު އިރު އެދެމެދުގައިވާ ރަހުމަތްތެރިކަމާއި ގާތްކަން އިތުރުވެފައިވެއެވެ.
އާމިލްގެ ދިރިއުޅުމާއި ބެހޭގޮތުން ސާމިޔާ އަޅާލި ސުރުހީ ވެގެންދިޔައީ ނަޒްމީނާއަށް ވެސް ވަރަށްކަމުދިޔަ އަދި އެހާމެ ގަޔާވި ސުރުހީ އަކަށެވެ. އެހެންކަމުން އެމަޢުލޫގައި އެދެމެދުގައި ދިގުވާހަކަތަކެއް ދެކެވިގެން ދިޔައެވެ. އޭރު ދެމީހުންގެ މޫނުމަތިން ވެސް ފެންނަމުން ދަނީ އުފަލާއި ހިތްހަމަޖެހުމުގެ އަސަރުތަކެވެ. ހިނިތުންވުމުގެ ކުލަވަރެވެ.
ދުވަސްތައް މާޒީއާ އެކުވަމުންދިޔައިރު އެހެންވެސް ޒުވާންއަންހެންކުދިންނެކޭ އެއްފަދައިން ބިސާރާއަށްވެސް ތަފާތުގޮތްގޮތަށް ލޯބީގެ ހުށަހެޅުންތަކާއި ދައުވަތުތައް ލިބެމުންދިޔައެވެ. އޭގެތެރޭގައި އެކުގައި ކިޔަވާއުޅުނު ރައްޓެހިންނާއި ދެކެފަރިތަ މީހުންގެ އިތުރުން ދުވަހަކު ނުދެކޭމީހުން ވެސް ހިމެނެއެވެ. ލިބެމުންދިޔަ ލޯބީގެ ދަޢުވަތުތަކަށް ސަމާލުކަންނުދީ ބިސާރާހުރީ އޭނާހިތްހަމަޖެހޭފަދަ ފަރާތެއްގެހުށަހެޅުމެއް ނުލިބޭތީ ކަމުގައި އޭނާގެ ރައްޓެހިން ގާތުގައި ބިސާރާ ބުނަމުންދިޔައެވެ.
ބިސާރާ އާއި ލޯބީގެގޮތުން ގުޅުމަށް އަސްފާން ހުށަހެޅި ހުށަހެޅުން ބިސާރާ ގަބޫލްކުރީ ބިސާރާގެހިތުގައި އަސްފާނާއިމެދުގައި ޝައުޤުވެރިކަންއޮތުމުންނާއި އެތައްއަހަރެއް ވާންދެން އެކުގައި ކިޔަވާންއުޅުނު އުޅުމުގެތެރޭގައި އަސްފާންގެ އުޅުމާއި ގުޅުންވަރަށްރަނގަޅަށް އެނގި ދަސްވެފައިވާތީއެވެ. ހަމައެހެންމެ އޭނާގެއެންމެގާތްއެކުވެރިޔާ ހުޒައިފާގެ ފަރާތުން އެކަމަށްޓަކައިލިބުނު މަޢުލޫމާތަށްވެސް ބަލާފައެވެ.
ބިސާރާ އާއި އަސްފާންގެ މެދުގައި އުފެދުނު ލޯބީގެ ގުޅުމުގެ ސަބަބުން އެ ދެޒުވާނުން ވެސް ތިބީ ނުހަނު އުފާވެ ހިތްހަމަ ޖެހިފައެވެ.
ތަރިރުހަނދުގެ ދަޢުރުވުމާއެކު ކޮންމެ ސައުވީސް ގަޑިއިރަކުން ދުވަހެއް މާޒީއާ އެކުވަމުން ދިޔައެވެ. ހަމައެހެންމެ ބިސާރާ އާއި އަސްފާންގެ މެދުގައިވާ ލޯބީގެ ގުޅުން ވަރުގަދަވަމުން އާރޯވަމުން ދިޔައެވެ. ދިރިއުޅުމަށްޓަކައި ނުހަނު ފޮނި އުންމީދު ތައް ކުރަމުން ރޭވުންތައް ރާވަމުން ދިޔައެވެ.
ބިސާރާ އާއި އަސްފާންގެ މެދުގައި އުފެދުނު ލޯބީގެ ގުޅުމަށް މާގިނަ ދުވަސް ނުވަނީސް އެވާހަކަތައް ބިސާރާގެ މަންމަ ނަޒްމީނާއަށް އަށްވެސް އަޑުއިވިއްޖެއެވެ. ބިސާރާ އާއި އަސްފާންގެ މެދުގައި އުފެދުނު ލޯބީގެ ގުޅުމަކީ ބިސާރާގެ މަންމަ އެއްގޮތަކަށް ވެސް ހިތްހަމަޖެހޭ ގުޅުމަކަށްނުވިއެވެ. އެހެންވެ ބިސާރާ ގާތުގައި އެވާހަކަ ދައްކައި އެގުޅުން މެދުކަނޑާލުމަށް ބުންޏެވެ.
ބިސާރާ އާއި އާމިލް ކައިވެނިކުރުވާން ދެޢާއިލާގެ ފަރާތުން ނިންމާފައިވާކަން ބިސާރާއަށް އެނގުނު ހިނދު އޭނާގެ ހިތުގެ ހިނގުން ވެސް ނުހުއްޓުނީ ކިރިޔާއެވެ. ބުނާނެ އެއްޗެއް ކުރާނެ ހަރަކާތެއް ނޭނގިފައި ބިސާރާއަށް ހުރެވުނީ ކިހާ އިރަކު ކަމެއް އޭނާއަކަށް ވެސް ނޭނގުނެވެ.
އެންމެ ކުޑައިރުއްސުރެ ފެށިގެން އެކުގައި ދުވަސްތައް ހޭދަކުރަމުން ކިޔެވުމަށް އެހީވަމުން އައި އާމިލްގެ ބޭނުމަކީ އެއީ ބާއޭ ބިސާރާގެ ހިތަށް އެރީ ކިތައް ފަހަރު ކަމެއް ވެސް ނޭނގުނެވެ. ނަޒްމީނާގެ އެވާހަކަތަކުގެ ސަބަބުން ލިބުނު ހައިރާން ކަމާއި ވީ ދެރައަށްވުރެ ބޮޑަށް އާމިލް ދެކެ ބިސާރާ ރުޅިއައެވެ. ގާތް ރައްޓެއްސަކަށްވުރެ ބޮޑަށް ބޭބެއެއްކަމުގައި ދެކެގެން އުޅުނު އާމިލްއަކީ އަމިއްލަ އެދުމުން ފޯވެފައިވާ މީހެއްކަމުގައި ވެސް ބިސާރާއަށް ގަބޫލުކުރެވުނެވެ.
ހަދާނެ ގޮތަކާމެދު ވިސްނާ ފިކުރުކުރަމުން ދިޔަ ބިސާރާގެ ސިކުނޑިއަށް ބާރު ބޮޑުވެގެން ދިޔައެވެ. އެހެންކަމުން އެކަމާމެދު އޭނާ ވިސްނާ ވިސްނުން ވެސް އިތުރުވެގެން ދިޔައެވެ. އެތައް އިރަކު އެތައް ގޮތަކަށް ވިސްނުމަށްފަހު ބިސާރާއަށް ފެނުނު އެންމެ ރަނގަޅުގޮތަކަށް ވީ މިއަދުން ފެށިގެން އާމިލާއި ގުޅުން ކަނޑާލާ އަބަދުގެ އަބަދަށް އޭނާއާ ދުރަށް ދިއުމެވެ.
މުޅިހަޔާތުގައި ވެސް ހޯދި ފުރަތަމަ ލޯބިވެރިޔާ އަކީ ، ބިސާރާ ވެސް ނުހަނު ބޭނުންވެގެން ހޯދާފައިވާ ލޯބިވެރިއަކަށް ވާތީ އާއި އަސްފާންއާ އެކުގައި އުފާވެރި ދިރިއުޅުމެއް އުޅެވޭނެކަމުގެ އުންމީދާއި ޔަގީންކަން އޮތްވަރުން އެގުޅުން މެދުކަނޑާލާކަށް ބިސާރާ ބޭނުމެއް ނުވެއެވެ.
ނަޒްމީނާގެވާހަކަތައް ކޮންމެގޮތަކަށް ހުރިނަމަވެސް އަސްފާންގެ ފަރާތުން ބިސާރާ ބޭނުންވާ ހުރިހާއުފަލަކާއި ހިތްހަމަޖެހުން އަދި އެހީތެރިކަމާއި އެއްބާރުލުން ލިބޭނެކަމުގެ ޔަގީންކަން ބިސާރާއަށް އޮވެއެވެ. ހަމައެހެންމެ ބިސާރާ އެކޭ އެއްފަދައިން އަސްފާން، ބިސާރާދެކެލޯބިވާކަންވެސް ބިސާރާއަށްޔަގީންވެއެވެ.
ނަޒްމީނާގެ ވާހަކަތަކާއި މެދުގައި ވިސްނާ ފިކުރުކުރުމަށްފަހު، އެކަމާމެދުގައި ބިސާރާ ވާހަކަދައްކާމަޝްވަރާކުރީ އޭނާގެ އެންމެގާތް ރަހުމަތްތެރިޔާ ހުޒައިފާއާއެވެ. ހަމައެހެންމެ އަސްފާން އާއި ވެސް ވާހަކަދައްކައި މަޝްވަރާކުރިއެވެ. . އަސްފާންއާއި ހުޒައިފާގެފަރާތުން ބިސާރާއަށް ލިބުނީ އެއްޖަވާބެކެވެ. ހަމައެހެންމެ ދާދިއެއްހިޔާލެކެވެ. އަސްފާންއާއި ހުޒައިފާ އެބުނާފަދައިން ކަންތައް ކުރުމަށް ބިސާރާ ބިރުގަނެޖެހިލުންވި ނަމަވެސް،އެދެމީހުން އިތުރަށްދެއްކި ވާހަކަތަކުގެ ސަބަބުން ބިސާރާ ހަމައަކަށް އެޅޭގޮތްވިއެވެ.
ދުވަސްތައް މާޒީއާ އެކުވަމުންދިޔައިރު ހުޒައިފާގެ އެހީތެރިކަމާ އެކުގައި ހުޒައިފާމެން ބުނިފަދައިން ބިސާރާވެސް ޢަމަލު ކުރަމުން ގެންދިޔައެވެ. ރަށުގެ އެހެން ވެސް މީހުންނާއި ބިސާރާގެ ޢާއިލާއަށް ސިއްރުން ބައްދަލުކުރާންޖެހޭތީ އަސްފާން އާއި ބިސާރާ ވެސްއެދެލޯބިވެރީންގެ ބައްދަލުވުންތައް ބާއްވަމުންދަނީ އެދެލޯބިވެރީންގެ ރަހުމަތްތެރިން ފަދައިންރަށުގެ ދެކޮޅުތުނޑިއާއިއަތިރިތަކާއި ކަނުއަނދިރިކަން އެކުލެވިގެންވާ ފަޅުގެތައްފަދަ އެކަހެރިތަންތަނުގައެވެ.
އަސްފާންއާއި އޭނާގެ ރަހުމަތްތެރީންގެފަރާތުން ބިސާރާއަށް އެނގިފައިވާ ގޮތުގައި ލޯބީގެބައްދަލުވުންތައް ބޭއްވުމަށް އެންމެއެކަށީގެން ވަނީ އެފަދަ އެކަހެރި މިނިވަން ތަންތަނެވެ.
އަސްފާންގެ ފަރާތުން ލިބެމުންދިޔަ ލޯތްބާއި އަޅާލުމާއި ގާތްކަމުގެ ސަބަބުން ބިސާރާ ހުންނަނީ ވަރަށްއުފާވެ ހިތްހަމަޖެހިފަ އެވެ. ހަމައެހެންމެ އަސްފާންގެ ފަރާތުން އޭނާއަށް ލިބެމުންދާ ލޯތްބާއި އަޅާލުމާ އެއްފަދައިން ބިސާރާ ވެސް އަސްފާނަށް ލޯތްބާއި އަޅާލުން ދެމުންދިޔައެވެ.
ބިސާރާގެ ޢާއިލާމީހުންނާއި އެހެންވެސް މީހުންނަށް ސިއްރުން ބައްދަލުކުރެވޭތީ ބިސާރާއާއި އަސްފާންގެ އުފާވެރިކަން އިތުރު ވަމުންދިޔައެވެ. ބިސާރާ އާއި އަސްފާން އެދެލޯބިވެރީންގެ ބައްދަލުވުންތައް ހަފްތާއަކު ދެރޭ ކަހަލަގޮތަކަށް ރަށުގެ މީހުންނާއި އެކަހެރި ކަނުއަނދިރި ތަންތަނުގައި ބާއްވަމުން ގެންދިޔަ އެވެ.
އެހެނަސް އެއިންއެއްވެސް ކަމެއް އެދެމީހުންނާއި އެދެމީހުންގެ ޚާއްޞަ ރަހުމަތްތެރީން ފިޔަވާ އެހެންމީހަކަށް ނޭނގެއެވެ.
އިރުއޮއްސި ހަތެއްޖަހާކަން ހާއިރެވެ. ބިސާރާ ވަރަށް ރީތިވެލައިގެން ނަޒްމީނާއަށް ނޭނގޭނެހެން ގޮސް ގެއިންނުކުތެވެ. އޭނާއަށް ބަލާލުމުން ވެސް އޭނާ އެދަނީ ކޮންމެވެސް މުހިންމުތާކަށްކަން އެނގޭހާވެއެވެ.
ބިސާރާއާ ހުޒައިފާ ބައްދަލުވީ ހުޒައިފާމެން ގެއާއި މާދުރުނޫން ހިސާބަ ކުންނެވެ. ބައްދަލުވާއި އެކުހެން އެކަކު އަނެކަކަށް ބަލާލަމުން ހީލިއިރު ދެމީހުންގެ މޫނު މަތިންވެސް ފާޅުވަމުންދަނީ ހިނިތުންވުމުގެ އަސަރުތަކެވެ.
ވާހަކަދައްކާލާން ކުޑައިރުކޮޅަކު މަޑުކުރުމަށްފަހު ބިސާރާ އާއި ހުޒައިފާ އެކުގައި ކަހަލަގޮތަކަށް ހިނގައިގަތެވެ.
މިރޭވެސް ބިސާރާ އާއި ހުޒައިފާ މިސްރާބުޖެހީ އެހެންވެސް ރޭތައް ފަދައިން ރަށުގެ އިރުވާކޮޅުގައިވާ ފަޅުގެތަކާއި ދިމާއަށެވެ. އެއީ އެދެއެކުވެރީން އެމީހުންގެ ލޯބިވެރިންނާއި ބައްދަލުކުރާ އެންމެއާންމު މަންޒިލެވެ.
ބިސާރާއާއި ހުޒައިފާ އެތަނަށްދާއިރު އަސްފާން އާއި ޖާވިޒް އެތަނުގައި ތިބޭނެކަން ބިސާރާމެނަށް ޔަގީންވެއެވެ. ލޯބިވެރިޔާއާއި ބައްދަލުވުމުގެ ވަގުތުގާތްވަމުން ދާތީ ދެމީހުންގެ މޫނުމަތީންވެސް ފާޅުވަމުންދަނީ އުފަލާއިހިތްހަމަޖެހުމުގެ އަސަރުތަކެވެ.
ދުވަސްވަރަކީ ހަނދުމަހުގެ ފުރަތަމަދުވަސްވަރު ކަމަށްވާތީ ރަށުތެރެއަށް ފެތުރިފައިވަނީ ފަނޑުހަނދުވަރެއްގެ އަލިކަމެވެ.
ރަށުގެ މީހުންދިރިނޫޅޭ ސަރަހައްދުގައިވާ އެފަޅުގެތަކާއި ދިމާއަށް ހިގަމުންދިޔައިރު ބިސާރާމެންގެ މޫނުމަތީން އެއްވެސްވަރަކަށް ކަންބޮޑުވުމުގެ އަސަރުތައް ނުވަތަ ނުތަނަވަސްކަމުގެ އަސަރެއްވެސް ފާޅެއްނުވެއެވެ. އެހެން އުޅެއުޅެ އެމީހުންތިބީ އެކަމަށާއި އެމާހައުލަށް ހޭނިފައެވެ.
ބިސާރާއާއި ހުޒައިފާ ގޮސް އެގެއާއިހަމަވަނިކޮށް ޖާވިޒް އައިސް އެމީހުންނާއި ބައްދަލު ކުރިއެވެ.
ހުޒައިފާ އާއި ޖާވިޒް ދިއުމުން އަސްފާނަށް އިންތިޒާރުކުރަމުން ބިސާރާ ގޮސް މަޑުކޮށްލީ މަގުގެ އެއްފަރާތުގައެވެ. ވަރަށް އަވަހަށް އަސްފާން އަންނާނެކަން ބިސާރާ އަށް ޔަގީންވެއެވެ.
މަގުގެއެއްފަރާތުގައި ހުއްޓިލައިގެން ރަށުތެރެއާއިދިމާއަށް ބަލަހައްޓައިގެން ހުރި ބިސާރާ ސިއްސައިގެން ދިޔައީ އަސްފާން ގޮވާލިއަޑަށެވެ. އެއާއެކުހެން އަވަސް އަވަހަށް ވަށައިގެން ހޯދާލިއިރު މަގުގެ އަނެއްކޮޅުން އަސްފާން އަންނަނީއެވެ.
އަސްފާން އައިގޮތަށް އައިސް ބިސާރާ ގާތަށް ހުއްޓެމުން ވާހަކަދައްކާން ފެށިއެވެ. ބައްދަލުވުމާ އެކުހެން ދެމީހުންގެ މޫނުމަތީން ވެސް ފާޅުވެގެންދިޔައީ އުފާލާއި ހިތްހަމަ ޖެހުމުގެ އަސަރުތަކެވެ.
” މިތާތިއްބާ މީހަކަށް ފެނިދާނެ ….. މަންމައަށް އެނގިއްޖާ ވަރަށް ގޯސް ވެސް ވެދާނެ …. ހިނގާ ދާން އެތެރަށް. “އަސްފާންގެ އަތުގައި ހިފާލަމުން ބިސާރާ ވާހަކަދެއްކިއިރު،އަޑާއިހަރަކާތުން އަދި މޫނުމަތިން ފާޅުވެގެންދިޔައީ ކޮންމެވެސް ވަރެއްގެ ނުތަނަވަސްކަމެއްގެ އަސަރުތަކެވެ.ބިސާރާ އާއި އަސްފާން އެކުގައި ކަހަލަ ގޮތަކަށްގޮސް އެފަޅުގެއަށްވަތްއިރު ދެމީހުންގެމޫނުމަތިން ފާޅުވަމުންދިޔަ އުފަލާއިހިތްހަމަޖެހުން އިތުރުވަމުން ދިޔައެވެ. ބިސާރާ އާއި އަސްފާން ދިޔަގޮތަށް ގޮސް ވަނީ އެގޭތެރޭގައިވާ ކޮޓަރިތަކުން ކޮޓަރިއަކަށެވެ. ބާވެ ގިނަދުވަސްވުމުގެސަބަބުން ފޫވެއްޓިފައިވާ ޓިނުތަކުން ހެދިފައިވާ ބާގަނޑުތަކުން ހަނދުވަރުގެ ފަނޑުއަލިކަން އެތަނަށްވެރިވެފައިވެއެވެ.
ބިސާރާއާއި އަސްފާން ލޯބީގެއަހުދުތަކާއި ވައުދުތައްވަމުން ފިރުމުންތައް ފިރުމަމުން ވާހަކަތަކާއިގެން ކުރިޔަށްދާވަރަކަށް ޢަމަލުތައް ގިނަވަމުން ދެމީހުން ގާތްވަމުން ވެސް ދިޔައެވެ.
ބިސާރާ އާއި އަސްފާން އަދި ހުޒައިފާ އާއި ޖާވިޒް އެހަތަރުޒުވާނުންގެ ލޯބީގެ ބައްދަލުވުން ނިންމާލުމަށްފަހު އެފަޅުގެއިން ނުކުމެ،ދެން ބައްދަލުކުރާނެ ތާރީހާ ގަޑިއާ ބެހޭގޮތުން ވާހަކަދައްކައި މަސްވަރާ ކުރާން މަގުމަތީގައިތިއްބެވެ.
ކުރީރޭތައް ފަދައިން މިރޭވެސް ބިސާރާ އާއި ހުޒައިފާ ގެއާއި ދިމާއަށް މިސްރާބުޖެހީ އެމީހުން އައިމަގުންނެވެ. އެއީ މީހުން ދިރިއުޅެމުންދާ ގެތަކުގެ ނުރަސްމީ ފަރާތުގައި އޮންނަމަގަކަށްވާތީ، ހާލަކުންފަހަރަކު ނޫނީ އެމަގުން މީހަކުނުފެންނާނެއެވެ. ވަރަށް ގަޔާވެފައިތިބެގެން ތަފާތުވާހަކަތައް ދައްކަމުންދިޔައިރު ދެމީހުންގެ މޫނުމަތީންނާއި ހަރަކާތްތަކުން ފާޅުވަމުންދަނީ އުފަލާއި ހިތްހަމަޖެހުމުގެ އަސަރުތަކެވެ.
ވާހަކަތަކާއިގެން މަޝްޣޫލްވެ ހުރެ ހިނގަމުން ދިޔަ ބިސާރާ ކުއްލިއަކަށް ހުއްޓެމުން ވަށައިގެން ހޯދާލުމުން ހުޒައިފާއަށް ލިބިގެން ދިޔައީ ހައިރާންކަމެވެ.
” ކިހިނެތްވީ ؟” ހައިރާންކަމާއި އެކުގައި ބިސާރާއަށް ބަލާލަމުން ހުޒައިފާ އަހާލިއެވެ.

“އަހަރެންނަށް ހީވަނީ ކޮންމެވެސް ބަޔަކު ނޫނީ ކޮންމެވެސް މީހަކު އަހަރުމެންނަށް އެބަ ފާރަލާހެން ….. ދެންމެ މިހެންދިޔަމީހާ ނުދެކެންތަ ؟ ” ހުޒައިފާއާ ދިމާއަށް ބަލާލަމުން ބިސާރާ ވާހަކަދެއްކިއިރު އަޑާއިހަރަކާތުން ވެސް ފާޅުވަމުންދަނީ ހައިރާންކަމުގެ އަސަރުތަކެވެ.
ބިސާރާ އެހެންބުނުމުން ހުޒައިފާގެ ހައިރާންކަން ކުރިޔަށްވުރެ އިތުރު ވެގެންދިޔައެވެ. އަދި އަވަސްއަވަހަށް ވަށައިގެން ހޯދާލިއެވެ.
” އާން …. އަހަރެން ނުދެކެން އެއްވެސް މީހެއް. ވެދާނެދޯ އާމިލް އަހަރެމެންނަށް ފާރަލަނީ ކަމަށް ވެސް. އެހެން ނޫނީ ތިވާނީ ބިސާރާއަށް ހީވިގޮތަކަށް. ހިނގާ އަވަހަށް ގެއަށްދާން. ” ބިސާރާގެކޮނޑުގައި އަތްޖައްސާލަމުން ހުޒައިފާ ބުންޏެވެ.
” އާން. ވެދާނެދޯ ތިހެން ވެސް. މަންމަ އެވާހަކަ ދެއްކިފަހުން އަހަރެން އޭނާއާ އަގައަކުން ނުބުނަން. އެކަމު އޭނާ އައިސް ވަރަށް އުޅޭނެ އަހަރެންނާއި ވާހަކަ ދައްކާން. އަހަރެން ހަމަ ދަންނަ ކަމަށް ވެސް ނުހަދަން. އަހަރެން އެހެން ކަންތައް ކުރިޔަސް މަންމަ ކައިރީ އޭނަ އެވާހަކަ ދެއްކިހެނެއް ހިޔެއްނުވޭ. އެހެން މިބުނީ އެކަހަލަ އެއްވެސް ވާހަކައެއް މަންމަ ނުދައްކާތީ. އެކަމާ ދެން އުޅޭނީ އެހެން ފަހަރަކުން ….. ހިނގާ ދާން. ” އެހެން ބުނަމުން ބިސާރާ ހިނގައިގަތުމުން އޭނާގެ ފަހަތުން ކަހަލަގޮތަކަށް ހުޒައިފާ ވެސް ހިނގައިގަތެވެ.
” އާން. ދެން ހިތުގައި އޮންނަންޏާއި ފާރަވެސް ލާނެތާ. އަސަރު ވެސް ކުރާނެތާ. ” ބިސާރާގެ ފަހަތުން ހިނގަމުން ހިނިއައިސްފައިވާ ރާގަކަށް ހުޒައިފާ ބުންޏެވެ.
” ހޫމް ……. ކަންތަކާ ޖެހުނީދޯ ؟ އަހަރެންނަށް ހެޔޮ އާމިލަކަސް ސޯމިލަކަސް. ކޮންމެހެން ފާރަލައިގެން ނޫޅެ އަންނަންވީނު. ” ހިތްހަމަ ނުޖެހިފައިވާ ކަހަލަގޮތަކަށް ބިސާރާ ވާހަކަ ދެއްކިއެވެ. ބިސާރާގެ އެވާހަކަތަކުގެ ސަބަބުން ހުޒައިފާ ގާތަށް ވަރަށް ހިނިއައި ނަމަވެސް އަނގައަކުން ނުބުނެއެވެ.
ބިސާރާ ގޮސް ގެއަށްވަތްއިރު ގޭފެންޑާތެރޭގައި އޭނާގެ މަންމަ ނަޒްމީނާ އާއި ކޮއްކޮނަބީލާ ތިއްބެވެ. އޭރު ނަޒްމީނާގެމޫނުމަތީން ފާޅުވަމުންދަނީ ހިތްހަމަނުޖެހުމުގެ އަސަރުތަކެވެ. ނަޒްމީނާގެ މޫނުމަތިން ފާޅުވަމުންދިޔަ ހިތްހަމަނުޖެހުން ފެނުމާއެކުހެން ބިސާރާއަށް އިސްޖަހާލެވުނެވެ.
” ބިސާރާ! ކޮންތާކުން ތިއައީ ؟” ބިސާރާއައިސް ގެއަށްވަނުމުން ބިސާރާ އާއި ދިމާއަށް ބަލާލަމުން ހިތްހަމަނުޖެހުމާ އެކުގައި ނަޒްމީނާ ސުވާލުކުރިއެވެ.
” ހުޒައިފާމެން ގެއިން. ” އިސްއުފުލައި ނަޒްމީނާއަށް ބަލާލަމުން މަޑުމަޑުން ބިސާރާބުނެލިއެވެ. އޭނާދިޔައީ އަސްފާންއާ ބައްދަލުކުރާންކަން ނަޒްމީނާއަށް އެނގޭކަށް ބިސާރާވެސް އަސްފާން ވެސް ބޭނުމެއްނުވެއެވެ. ޖަވާބު ދިންއިރު ބިސާރާގެއަޑާއިހަރަކާތުން ފާޅުވަމުންދަނީ ނުތަނަވަސްކަމާއި ކަންބޮޑުވުމުގެ އަސަރުތަކެވެ.
” އެހެންދޯ ؟ ….. ބަދިގެއަށް ގޮސް ކައިގެން އެއްޗެތި ހޫނުކޮށްފައި އައިސް ނިދާ. ” ބިސާރާ އާއި ދިމާއަށް ބަލަހައްޓައިގެން އިންގޮތަށް އިނދެ ނަޒްމީނާ ވާހަކަދެއްކީ ބިސާރާގެ ވާހަކަތައް އެއީ ތެދެއްކަމުގައި ގަބޫލުކޮށްގެންނެވެ.
ނިދާން އޮތްއިރު ވެސް ބިސާރާއަށް ވިސްނެމުންދިޔައީ އަސްފާންއާ މެދުގައެވެ. ހަމައެހެންމެ އޭނާ އާއި އަސްފާން އެކުގައި ހޭދަކުރާ ވަގުތުތަކުގެ އުފާވެރިކަމާ މެދުގައެވެ.
އަސްފާންއާ ގުޅުވައިގެން ފޮނި ހިޔާލުތައް ކުރަމުންދިޔަ ބިސާރާއަށް ނިދުނުއިރެއް އޭނާއަށް ވެސް ނޭނގެއެވެ.
މީހުންނިދާ ހަމަހިމޭންވެފައިވާ ރަށުތެރޭން ފާޅުވަމުންދަނީ ހަމަހިމޭންކަމާއި ފަޅުކަމެވެ. ހަމައެހެންމެ އަމާންކަމެވެ. މަގެއްމަތީން މީހެއްގެ ހިލަމެއްނުވާތާ ގެއެއްގެތެރޭން ގަދައައްޔެއް ނުވަތަ ބާރު އަޑެއްވެސް އިވިނުލައެވެ.
ފަތިސްނަމާދުވަގުތުގެ ބަންގީގެއަޑާއި އެކުހެން ރަށުތެރޭގެ ހަމަހިމޭންކަން ފިލާދިޔަ ކަހަލައެވެ. ގެތަކުތެރޭން ފާޅުވާންފެށި ގަދައަލިތަކާއި އެކުހެން އަޑުއަޑު ވެސް އިވޭންފެށިއެވެ. ހަމައެހެންމެ މަދުވަގުތުކޮޅެއް ތެރޭގައި މަގުތަކުން މީހުން ފެންނާންފެށިއެވެ. މަގުތަކުން ފެންނަމުންދިޔަ އެންމެންގެ ވެސް މިސްރާބަކަށްވެފައި ވަނީ މިސްކިތްކަމުގައި ވުމަކީ އުފާކުރާންޖެހޭކަމެކެވެ.
ނަބީލާ އޭނާގެ އާދައިގެމަތީން ފަތިސްނަމާދަށް ތެދުވެ ފުރަތަމަ ވެސްބިސާރާއަށް ގޮވިއެވެ. އެހެނަސް ބިސާރާ އެކަމާއަޅާނުލުމުން ނަބީލާއަމިއްލައަށް ނަމާދު ކޮށްގެން އޮށޯވެނިދީއެވެ. އިތުރަށްގޮވުމަކީ ބިސާރާ ރުޅިއައުންނޫންކަމެއް ނުވާނެކަމެއްކަން ނަބީލާއަށް ވަނީ ތަޖުރިބާ ކުރެވިފައެވެ.
ދުވާލުގެ ހަލަބޮލިކަމާއެކުގައި ވަގުތުތައް ފާއިތުވަމުންއައިސް އިރުއޮއްސޭވަގުތުގާތްވުމުން ރަށުތެރެ ހަމަހިމޭން
ވަމުންދިޔައެވެ. މަސައްކަތްތެރީން މަސައްކަތް ހުއްޓާލާ މަގުތަކުންނާއި އަތިރިތަކުން ފެންނަމުންދިޔަ ކުޑަކުދީންނާއި އަންހެނުން މަދުވާން ފެށިއެވެ.
ކިތަންމެވަރަކަށް ނަސޭހަތްދިންނަމަވެސް ބިސާރާގެ ޢަމަލުތަކަކަށް ބަދަލެއް ނާދެއެވެ. އެކަމާމެދު ބިސާރާ އަބަދުވެސްބުނަނީ ނަޒްމީނާ ތިދައްކަނީ ކުރީޒަމާނުގެ މީހުން ދައްކާ ތާކުންތާކުން ނުޖެހޭ ބޯދާވާހަކަ ތައްކަމަށެވެ.
އިރުއޮއްސި ހަތެއްޖަހާކަން ހާއިރެވެ. ބިސާރާ އޭނާގެ އާދައިގެމަތީން ފެންވަރާން ތައްޔާރުވެގެން ތުވާލިހިފައިގެން ގޮސް ގިފިއްޔަށް ވަނެވެ. ގިފިލިތެރެއަށް ވެރިވެފައިވަނީ ފަނޑުހަނދުވަރެއްގެ އަލިކަމެވެ.
ގިފިލިތެރޭގައިވާ މިދިލިގަހަށް އަރުވާފައިވާ ބިލެތާއި ގިފިލީގެއެއްފަރާތުގައި ހައްދާފައިވާ ހިކަނދިފަތްގަސްތަކުގެ ގިނަކަމުން ގިފިލީގެ ބޮޑުބައެއްވަނީ ގަހުންފުރިފައެވެ.
ގިފިލިތެރެއަށް ވަށައިގެން ނަޒަރުހިންގާލުމަށްފަހު، ހެދުމާއި ތުވާލިގެން ގޮސް ރޯނުގައި ބާއްވާފައި އައިސް ވަޅުކައިރިއަށްހުއްޓި ފެންދާންޏެއް ނެގިއެވެ. އޭރުވެސް ބިސާރާގެ މޫނުމަތީން ފާޅުވަމުންދަނީ އާދައިގެގޮތެކެވެ.
ގިފިލިތެރޭގައިވާ މިދިލިގަހުން އުދައްސައިގަތް ކާޅުތައް ގޮވައިގަތް އަޑުބާރުކަމުން ބިސާރާ ދިޔައީ ސިއްސައިގެން ނެވެ. އެކަމުގެ ސަބަބުން ބިސާރާގެ ބޮލަށްއުނދަގޫވިއެވެ. ހަމައެހެންމެ ކާޅުތައްދެކެ ރުޅިވެސް އާދެވުނެވެ.
ޓީސާޓް ބާލާ ދޮވެލުމަށްފަހު ގެންގޮސް ރޯނުގައި އަޅާފައި ބިސާރާ އައިސް އަނެއްކާވެސް ވަޅުކައިރިއަށް ހުއްޓުނެވެ.
ޓީސާޓް ދޮވުނުފެންދާނި ބިލެއްބުޑަށް އުކާލުމަށްފަހު ބިސާރާ ފެންވަރާން ފެށިއިރު ގިފިލިތެރޭގައި ކަމެއްހިނގާކަމުގެ އެއްވެސްހިލަމެއް އޭނާއަށް ނުވާކަހަލައެވެ.
” ބިސާރާ … ” ކުއްލިއަކަށް ކަހަލަގޮތަކަށް ގިފިލިތެރޭން އިވުނުފިރިހެންއަޑުގެ ސަބަބުން ބިސާރާ ދިޔައީ ސިއްސައިގެނެވެ. އެއާއެކުހެން ބިސާރާގެ އަތުން ދާނި ވެސް ދޫވިއެވެ.
ގިފިލި ތެރޭގައިވާ ބޮޑުމިދިލިގަހުގެ ފުރަގަހުން އެއިވުނު ފިރިހެން އަޑަކީ އަސްފާންގެ އަޑުކަން ބިސާރާއަށް ޔަގީން ވެއެވެ.
އެހެނަސް މީގެކުރީން ދުވަހަކުވެސް އަސްފާންގެ ފަރާތުން އެފަދައަމަލެއް ފެނިފައިނުވާތީ ކޮންމެވެސް ވަރަކަށް ހައިރާންވިއެވެ.
މިދިލިގަހާ ދިމާއަށް ބަލަހައްޓައިގެންހުރި ބިސާރާއަށް އަސްފާން ފެނުމާ އެކުހެން ލަދުގަތެވެ. އަވަސްއަވަހަށް ދުވެފައިކަހަލަގޮތަކަށްގޮސް ތުވާލިނަގާ ގައިގައޮޅާލިއެވެ. އޭރުވެސް ބިސާރާގެ މޫނުމަތީންނާއި ހަރަކާތްތަކުން ފާޅުވަމުންދަނީ ލަދުވެތިކަމުގެ އަސަރުތަކެވެ.
އަސްފާން އައިގޮތަށް އައިސް ބިސާރާގާތަށް ހުއްޓެމުން ބިސާރާ އާއި ހަތަރުކަޅި ހަމަކޮއްލިއެވެ. އެއާއެކުހެން ބިސާރާގެ ހުރިހާހަރަކާތެއްހުއްޓި މުޅިމީހާ ގަނޑުވި ކަހަލައެވެ.
ބާރުއަޑަކުން ގޮވާލަމުން ބިލެތްބުޑުން ނުކުތް ކަޅުބުޅަލުގެ ސަބަބުން ލިބުނު ސިހުމާއި ގަތްބިރުގެ ސަބަބުން ބިސާރާއަށް ހަޅޭލަވައި ގަނެވުނެވެ. އެހެނަސް އަސްފާން ހުރީ އެވަރު ވިސްނައިގެން ކަމަށްވާތީ އަވަސްއަވަހަށް ބިސާރާގެ އަނގަމަތީގައި އަތްއަޅައި އަޑުބަންދުކޮށްލިއެވެ.
އަސްފާން ކޮށްލި އެންމެހަރަކާތަކާއި އެކުހެން އެއްވެސް އިޚްތިޔާރަކާއި ނުލައި ބިސާރާގެ ގޮސް އަސްފާންގެގައިގައި ޖެހުމުންއަސްފާންގެ ހަށިގަނޑާއި ބިސާރާގެ ހަށިގަނޑުޖެހި ފިތިއްޖެއެވެ.
އަސްފާން ހުރީ ވަގުތަކަށް ބަލަބަލަ ކަހަލައެވެ.
ނުނިމޭ