ފެނުގެ ކުލައިގައި ފިލައި ދިޔަ ހުވަފެން

ދޮރު ހުޅުވާލުމާއެކު ފެނުނު މަންޒަރުން ސިޔާނާ އަންބުރައިގެން ވެއްޓުނެވެ. މާގިނައިރު ތަކެއް ވަންދެން ބަލަންނުހުރެ ޒާއިމް އޭނާގެ އަންހެނުން ހިފެހެއްޓިއެވެ. އެވަގުތު އޭނާއަށްވެސް ބޭއިޚްތިޔާރުގައި ހަޅޭއްލަވައިގަނެވުނެވެ. ވާނީވެސް އެހެންތާއެވެ. ކުރިމަތިން ފެންނަމުން ދިޔަ މަންޒަރަކީ އޭނާ ދުވަހެއްގެ ކޮޅުންވެސް ފެންނާނެކަމަށް ހީވެސްނުކުރާ މަންޒަރެއްކަން ޔަޤީނެވެ. އޭނާއާއި ސިޔާނާގެ ކައިވެންޏަން ލިބުނު ހަމައެކަނި ދަރިފުޅު، ވިޝާލް ދަންޖެހިގެން އޮތް މަންޒަރެވެ. މިފަދަ ހިތްދަތި މަންޒަރެއް ބަލަން ކެތްކުރެވޭނީ ކޮން މަންމަ އަކާއި ބައްޕައަކަށްހެއްޔެވެ؟. މިމަންޒަރު ފެނުމުން ޒާއިމްއަށް ހުރެވުނީ ގަންޑުވެފައެވެ. އިންތަނުން ގުޑާލަން އިރުކޮޅެއް ނެގިއެވެ. ނަމަވެސް ތެދުވެ، ހަމައަކަށް އެޅިލާފައި ސިޔާނާ އާއި ވިޝާލް ހޮސްޕިޓަލަށް ގެންދިއުމަށް އަވަސްވެގަތެވެ. އަވަހަށް ޖީބުން ފޯނުނަގާ އެންބިއުލާންސަށް ގުޅިއެވެ. މާގިނައިރުތަކެއްނުވެ އެންބިއުލާންސް ހ.ރޯސްވިލާ ކައިރިއަށް މަޑުކޮށްލިއެވެ. ޒާއިމް ގައިގައި ހުރި ބާރަކުން ސިޔާނާ އާއި ވިޝާލްގެ ފުރާނަނެތް މަސްގަނޑު އެންބިޔުލާންސަށް ލިޔެވެ.

ހޮސްޕިޓަލަށް ދެވުނުހާއަވަހަކަށް ޒާއިމް އަވަހަށް ސިޔާނާ ގޮވައިގެން އިމަރޖެންސީ ކޮޓަރިއަށް ދިޔައެވެ. އޭރު ވިޝާލް ކަފުންކޮށް ހިނުވަން ވައްދައިފިއެވެ. ސަޔާނާގެ ހާލުވެސް ވަރަށް ދަށެވެ. ލިބުނު ހައިރާންކަމެއްގެ ސަބަބުން ހާޓް އެޓޭކެއް ޖެހިފައިވާކަމަށް ޑޮކުޓަރު ބުންޏެވެ. ޒާއިމް ހަދާނެ ގޮތް ހުސްވިއެވެ. ނަމަވެސް ވަޤުތު ބޭކާރުނުކޮށް އޭނާ ދިޔައީ ވަޅުލުމުގެ ކުރިން ވިޝާލްގެ މޫނު ދެކިލާށެވެ. ވިޝާލް ބާއްވާފައިވާ ކޮޓަރިއަށް އޭނާ ވައިން އިރު، އޭނާގެ ބޭބެ ޒައިޝަން ހުއްޓެވެ. ޒައިޝަން ހުރީ ކުރިމަތިން ފެންނަމުން ދިޔަ މަންޒަރު ޤަބޫލުކުރަން ދަތިވެފައެވެ. “ކޮންއިރަކުތަ ކަށުނަމާދު އޮތީ؟” ޒައިޝަން އޭނާގެ ބޭބެ ގާތު އެހިއެވެ. “އިޝާއަށް ފަހުގައި” ޒާއިމް ދިނީ ކުރު ޖަވާބެކެވެ. “އަހަރެން ރަށުގަ ތިބި މީހުންނަށް ޚަބަރު ދިނިން، އެކަމަކު އެކަކަށްވެސް އާދެވޭ ވަރެއް ނުވި”. ޒާއިމް ބޯޖަހާލިއެވެ. އެވަގުތު އެނާއަށް ހޮސްޕިޓަލުން ފޯނު ކޯލެއް އައެވެ. އޭނާ އެ ފޯނުކޯލަށް ޖަވާބު ދިނީ އެއީ އެނާގެ ހިތްދަތިކަން ލުއިކޮަށްދޭނެ ކޯލެއް ކަމަށް ހީކޮށެވެ. “އައްސަލާމުޢަލައިކުމް، ތިއީ ޒާއިމްތޯ؟”.” އާދެ، ކިހިނެއްތޯވީ؟”………………………..

-ނުނިމޭ-